Author: ATVLive

Një grabitje ka ndodhur gjatë ditës së sotme në Prishtinë.

Grabitja ka ndodhur në njërën nga pikat e Bankës Kombëtarë Tregtare (BKT)

Policia ka arritur në vendin e ngjarjes dhe ka arritur ta kap të dyshuarin pak metra larg vendit të ngjarjes.

Policia poashtu ka njoftuar se është në kërkim të personit të dytë të dyshuar për vjedhjen.

Zëdhënësja e Policisë së Kosovës për Rajonin e Prishtinës, Flora Ahmeti tha për Insajderin se rasti ka ndodhur rreth orës 13:00.

“Sot nga zyrtarët policor, është arrestuar një person, për të cilin ekziston dyshimi i arsyeshëm se është i përfshirë në një rast të grabitjes, që ka ndodhë sot rreth orës 13:00, në filialin e një banke në sheshin Nëna Terezë në Prishtinë. Personi i dyshuar, N.D, mashkull, është arrestuar menjëherë pas raportimit të rastit, pak metra larg nga vendi i ngjarjes”, deklaroi ajo.

Ahmeti shtoi më tej se lidhur me këtë rast policia është në kërkim të personit të dytë të dyshuar, i cili aktualisht ndodhet në arrati.

Është zhvilluar takimi mes presidentes së Kosovës, Vjosa Osmani, bashkë me kryetarin e Komunës së Rahovecit, Smajl Latifi.

Kjo vizitë nga e para e shtetit, është në kuadër të vizitave në komunat e vendit.

Pas këtij takimi, ajo është paraparë të vizitojë shkollën SHFMU “Liria” në Fortesë e Rahovecit. Ndërsa nga ora 12:00 të jetë prezente në ceremoninë zyrtare të hapjes së edicionit të 22-të festë së vjeljes së rrushit “Hardh Fest”, me sloganin “Prek n’rrush, shijo n’ven”.

Një 29-vjeçar është vrarë të enjten në fshatin Balincë të Malishevës, pas një mosmarrëveshjeje që kishte ndodhur mes viktimës dhe dorasit.

Ngjarja me epilog tragjik për 29-vjeçarin nga Bubaveci thuhet të ketë ndodhur në tregun e druve.

Ndonëse organet e hetuesisë nuk kanë treguar motivet dhe rrethanat e vrasjes, pretendohet që zënka të ketë ndodhur shkaku i një borxhi, me ç’rast 40 vjeçari me inicialet A.G. nga fshati Balincë, ka qëlluar për vdekje viktimën me inicialet Sh.K.

Zëdhënësi i Policisë për rajonin e Gjakovës, Sheremet Elezaj, menjëherë pas ndodhjes së vrasjes, ka thënë për telegrafin se “Sot (e enjte) rreth orës 13:30 kemi pranuar informatë se një person mashkull i moshës madhore është dërguar në QKMF Malishevë, dyshohet të jetë qëlluar me armë zjarri. Personeli mjekësor atje ka konstatuar vdekjen e tij”.

“Njësitet e nevojshme policore ju kanë përgjigjur rastit si dhe është njoftuar prokurori i shtetit në konsultim me të cilin janë duke u ndërmarrë të gjitha veprimet e nevojshme hetimore”, ka thënë Elezaj.

Trupi i pajetë i viktimës është dërguar në Institutin e Mjekësisë Ligjore për obduksion.

Elezaj gjithashtu ka njoftuar se lidhur me rastin janë arrestuar katër persona të cilët dyshohen të jenë të përfshirë në rast, si dhe është konfiskuar një armë.

Policia ka arrestuar tre persona që dyshohen se janë përgjegjës për zjarrin në Muzeun e Muzikës në Gjakovë.

Më 30 gusht, njësitet përkatëse dolën në vendngjarje dhe shuan zjarrin që kaploi muzeun, ndërsa objekti pothuajse është shkatërruar tërësisht.

Hetuesit ndërkohë ka identifikuar personat, që janë të mitur, si të dyshuar për zjarrvënien.

“Më datë 31.08.2023, pas një pune intensive hetuesit policorë kanë arritur të identifikojnë tre persona të moshës së mitur, të dyshuar si kryes të mundshëm të veprës. Pas dëgjimit të tyre në prezencën e akterëve të nevojshëm në konsultim me prokurorin e çështjes të njëjtit janë liruar në procedurë të rregullt”, ka thënë Policia.

Kryetari i Komunës së Vushtrrisë, Ferit Idrizi, i shoqëruar nga kabineti i tij kanë bërë homazhe për nder të 1 Shtatorit, Ditës së Dëshmorëve të këtij qyteti, raporton Ekonomia Online.

Nga aty, Idrizi tha se meritorët për çlirimin e vendit janë dëshmorët e kombit dhe për këtë, kërkoi dhe shprehu mirënjohjen e thellë. Ditën e çlirimit të qytetit, Idrizi e quajti të madhe dhe të veçantë.

Idrizi tha se sipërfaqja e kompleksit është e vogël, krahasuar me numrin e pjesëmarrësve në këtë ceremoni.

“Sot përkujtojmë ditën e dëshmorëve që janë dëshmorë të kombit të Komunës së Vushtrrisë nga brigada 141-142 dhe të zonave të tjera operative të Shalës. Është një ditë e madhe dhe një ditë e veçantë, siç po e shihni këtu jemi bashkë me familjarët e dëshmorëve, invalidë e veteranë të Ushtrisë Çlirimtare të Kosovës, me nderin e pjesëtarëve të FSK-së që bëjnë roje nderi këtu në këtë kompleks që për nga sipërfaqja është i madh por duket i vogël për t’i zënë të gjithë këta qytetarë të cilët kanë ardhur për të bërë homazhe për të përkujtuar”, tha Idrizi.

Krahas dëshmorëve, Idrizi nuk la pa përmendur edhe invalidët dhe veteranët e UÇK-së.

“Këta të cilët ranë për ta çliruar Kosovën, që ne sot të jemi të lirë, që institucionet tona të funksionojnë, që populli ynë të frymojë lirshëm, andaj nuk mund të gjejë fjalë për të përshkruar ndjenjën dhe për të shprehur respektin dhe falënderimin për dëshmorët e kombit të cilët dhanë jetën për ta çliruar Kosovën. Gjithashtu respekt i veçantë për familjarët e dëshmorëve, për invalidët dhe veteranët e Ushtrisë Çlirimtare të Kosovës”, tha Idrizi.

Kreu i AAK-së, Ramush Haradinaj, zgjodhi një komunë ku udhëheq partia e tij për të vizituar fëmijët që sot nisën ditën e parë të shkollës.

Ai tha se hyrja në një klasë me fëmijë i dha atij emocion, derisa tha se kanë synim rritjen e cilësisë në arsim.

“Sot më shumë se çdo herë u emocionova teksa pashë nxënësit në hapat e tyre të parë në një botë me plot mundësi. Nxënësve ju thashë se jemi bashkë me ta, mësimdhënësit dhe prindërit, në synimin tonë drejt rritjes së cilësisë së arsimit dhe ndërtimin e një të ardhme më të ndritshme për vendin”.

Ai foli edhe për takimin që pati me kryetarin e komunës.

“Në ditën e parë të vitit të ri shkollor, pata nderin të vizitoj Komunën e Suharekës dhe të bisedoj me kryetarin Bali Muharremaj, një kryetar shembull për angazhim në të gjitha sferat e jetës. Bashkë me kryetarin dhe deputeten Albana Bytyqi, po ashtu vizituam shkollën më të vjetër në Suharekë, shkollën fillore “7 Marsi”, me ç’rast takuam personelin dhe nxënësit”.

“Urime nxënës, mësimdhënës e prindër të dashur!”, ka përfunduar Haradinaj.

Me fillimin e vitit të ri shkollor, Fondacioni “Golden Eagle”, i ka pajisur me çanta, fletore dhe mjetet tjera, të gjithë nxënësit e ciklit të ulët të shkollës fillore “Drita” në Gelancë të Suharekës.

Këtë e ka bërë të ditur pronari i kompanisë “Golden Eagle”, Shaqir Palushi.

“Sot me fillimin e vitit të ri shkollor, Fondacioni Golden Eagle i paisi me qanta, fletore dhe mjetet tjera , të gjithë nxënësit e ciklit të ulët të shkollës fillore ‘Drita’ në Gelancë”, ka shkruar ai.

Komuna e Prishtinës ka hapur sot thirrjen për subvencionim të familjeve të Prishtinës për regjistrimin e fëmijëve në çerdhe private.

Në një konferencë për media të premten, drejtoresha e Arsimit në Komunën e Prishtinës, Besianë Musmurati tha se subvencionimi do të bëhet në vlerë 70 euro për familjet me të ardhura nën 500 euro.

“Arsyeja pse e kemi thirrur këtë konferencë është për të ndarë me ju lajmin e mirë se kemi hapur thirrje për subvencionimin me nga 70 euro të familjeve të Prishtinës që t’i regjistrojnë fëmijët në çerdhe private”, tha Musmurati, raporton Paparaci.

Komuna ka publikuar thirrjen për aplikim. Atë mund ta gjeni në uebsajtin zyrtar të komunës.

Aplikimi bëhet përmes shkarkimit të formularit dhe plotësimit të tij. Pastaj, atë duhet ta dërgoni në Qendrën për Shërbim me Qytetarë në sportelin nr. 5, në objektin e vjetër të Komunës së Prishtinës.

Në këtë vegëz mund të mësoni kriteret për subvencionim dhe të shkarkoni formularin e aplikimit: LINK

Kriteret:

– Kjo thirrje për subvencionim vlenë vetëm për familjet të cilat të hyrat i kanë nën 500 Euro dhe këtë e dëshmojnë me dokumentet e kërkuara më poshtë;

– Fëmijët e prindërve që janë të regjistruar dhe që regjistrohen në institucionet parashkollore private të Komunës së Prishtinës mund të aplikojnë në këtë thirrje publike;

– Në institucionet parashkollore private mund të regjistrohen fëmijët prej moshës 9 muaj deri në 6 vjeç dhe subvencionimi bëhet për këtë periudhë kohore;

– Llogaritja e moshës së fëmijëve për subvencionim nuk bëhet duke marrë parasysh datën e regjistrimit, por datën e fillimit të shërbimit, përkatësisht duke marrë parasysh datën 1 Tetor;

– Një familje mund të aplikojë për subvencionim për më shumë se një fëmijë;

– Nëse Komisioni i pranimit të fëmijëve gjatë shqyrtimit të aplikacioneve për subvencionim konstaton se ka dy e më shumë fëmijë me pikë të barabarta, atëherë duhet praktikuar shortin, i cili bëhet në prani të prindërve të fëmijëve;

– Shuma e dedikuar për të zbatuar subvencionimin është 100,000.000 (njëqind mijë) Euro dhe do të mbulojë subvencionimin e 120 fëmijëve për këtë thirrje;

– Subvencionimi i fëmijëve në IP bëhet në bazë të numrit më të madh të pikëve totale që merr një kandidat bazuar në kriteret e specifikuara në tabelën e mëposhtme:

– Të gjitha statuset e të gjitha kategorive të përfshira në tabelën e mësipërme duhet të dëshmohen me dokumente valide të lëshuara nga institucionet relevante;

– Prindërit që kualifikohen për të marrë subvencionimin detyrohen që çdo muaj të sjellin në Drejtorinë e Arsimit faturën për pagesë mujore të IP-së private. Në të kundërtën, Komuna nuk do të mund të bëjë subvencionimin për muajin pasues;

– Pagesat nga Komuna për prindërit do të bëhen nga data 1 deri me datën 5 të çdo muaji.