Author: ATVLive

Gjykata Komerciale e Kosovës, ka shprehur shqetësimin e saj lidhur me deklarimet e zyrtarëve shtetëror, lidhur me rastin e marrjes së vendimit për caktimin e masës së sigurisë, përkatësisht shtyrjen e ekzekutimit të vendimit të OshP-së në rastin “Rruga A”, e cila është në procedurë pranë Dhomës së Shkallës së Parë të Gjykatës Komerciale.

“Përmbajtja dhe retorika e mediave, si dhe deklaratat e politikanëve, mund të kenë ndikim të madh në opinionin publik dhe besimin në institucionet gjyqësore. Andaj, është e rëndësishme që të ndërtohet një kulturë e respektimit të vendimeve gjyqësore dhe të kujdesemi për të mos paragjykuar ato, duke lënë gjyqtarët të punojnë në mënyrë të pavarur dhe të bazuar në ligj dhe fakte”, ka deklaruar Gjykata.

Tutje, Gjykata Komerciale në reagimin e saj njofton se palët kanë të drejtën e tyre të shfrytëzimit të mjeteve juridike për vlerësimin e vendimit nga instancat më të larta gjyqësore, andaj nuk duhet të paragjykohet çështja pa marr epilog përfundimtar.

Përgatiti: Pranvera Krasniqi

Pasi piu një gotë ujë, Armend Metaj kishte ndier simptoma helmimi. Uji, i cili buronte nga ujësjellësi rajonal i Prishtinës, u bë shkaktar që ai të kërkonte trajtim mjekësor muaj më parë.

“Njerëzit mund të helmohen nga uji, rasti konkret më ka ndodhur mu, jam infektuar në lukth prej ujit, ka mundur me ndodh edhe prej ushqimit që është pastruar nga ai ujë, ama kryesore është uji, kjo gjë edhe faktohet”, tha Metaj.

Ai thotë se situata mund t’i kishte ndodhur prapë atij e shumë qytetarëve nëse IKSHP-ja nuk do të kishte dalë me njoftim për cilësinë aktuale të ujit nga Badoci, që sipas rezultateve laboratorike rezultoi me rritje të vlerës së manganit.

Aktualisht, ujin nga rezervat e Badocit qytetarët po e përdorin për shërbime të tjera, por jo pirje.

“Ne këtë ujë nuk mundemi me përdor për pirje, përveç për pastrim ose diçka se mundemi të helmohemi”, tha Metaj.

Arjeta Mjeku, zëdhënëse e ujësjellësit “Prishtina“, tha se nuk ka arsye për shqetësim. Sipas saj, prania e manganit gjatë stinës së vjeshtës është dukuri natyrore.

“Nuk ka vend për shqetësime, sepse është dukuri natyrore dhe kjo kalon, është rezultati i stinës së vjeshtës, nuk është hera e parë nëse mangani paraqitet për një kohë të shkurtër”, tha Mjeku.

Me qëllim të lehtësimit të kësaj situate e cila, sipas KRU-së, është çështje ditësh, ujësjellësi ka vendosur autobote në rrugën Muharrem Fejza, Hajvali, Kishnicë e Graçanicë, përmes të cilave qytetarët mund të furnizohen me ujë të pijshëm deri në njoftimin e radhës.

Përgatiti: Benita Zeneli

Kolonat e gjata të trafikut në kryeqytet, pritet që së shpejti të reduktohen.

Komuna e Prishtinës do të hapë një rrugë të re, e cila do të bëjë lidhjen me Fushë-Kosovën, nëpërmjet nënkalimit në rreth-rrotullimin e Lakërishtës.

Shtimi i një rruge anësore, sipas njohësit të komunikacionit, Burim Krasniqi, do të jetë zgjidhje për ngarkesën e trafikut në segmentin rrugor më të ngarkuar, atë “Tirana” dhe “Bill Clinton”

Para afro 7 muajve, përmes hapjes së një rruge tjetër, e cila kalon nëpër tunelin e stacionit të Autobusëve, është mundësuar lidhja e lagjes “Dardania” me atë “Kalabria”.

Përgatiti: Arton Hamiti

Pas një takimi në Bruksel me emisarin e BE-së për dialog, Miroslav Lajçak, me 19 korrik, zëvendëskryeministri Besnik Bislimi deklaroi se nënshkrimi i kontratës mes KEDS-it dhe Elektroseverit për faturimin e rrymës në veri është afër.

Por, katër muaj pas, Zyra e Rregullatorit për Energji konfirmoi se udhërrëfyesi për energji ka ngecur pikërisht te kjo marrëveshje që KEDS-i duhet ta nënshkruajë me kompaninë serbe, Elektrosever.

“Në proces janë marrëveshjet komerciale me KEDS-in për shërbimet në katër komunat veriore, si dhe çështje të tjera për ofrimin e qasjes në nënstacionin e Vallaqit”, thuhet në përgjigjen e ZRRE-së.

Madje, edhe disa prej pikave që nisën të zbatohen, nuk u çuan deri në fund.

“ZRRE-ja është informuar se baza e të dhënave është pranuar nga KOSTT-i dhe KEDS-i, mirëpo këto të dhëna nuk i përmbajnë të gjitha elementet që kërkohen për bazën e të dhënave”, thuhet më tej në përgjigjen e ZRRE-së.

Përderisa, udhërrëfyesi vazhdon të mos zbatohet, vlera e humbjeve në katër komunat veriore vetëm në pjesën e parë të këtij viti, është mbi 20 milionë euro.

Teksa barra për mbulimin e humbjeve i bie KOSTT-it, ministrja e Ekonomisë, Artane Rizvanolli, ditë më parë tha se ekzekutivi nuk ka ndarë mjete financiare për pagesën e rrymës në veri.

Nëse Qeveria vendos që rrymën e shpenzuar nga qytetarët e komunave veriore të mos e paguajë më, sipas opozitës, duhet të dilet me alternativa të tjera.

“Është lehtë me thanë se ne nuk e paguajmë. Por kur e thua një gjë të tillë, atëherë duhet të dilet me një alternativë. Barra i bie KOSTT-it e që faktikisht e ka një gjendje shumë të renduar”, tha deputeti i PDK-së, Ferat Shala.

“Gabimi është që një çështje teknike është kthyer në politike…”, tha deputeti i AAK-së, Pal Lekaj.

Qytetarët në Mitrovicë të Veriut, Leposaviq, Zveçan dhe Zubin Potok – kryesisht me shumicë serbe – nuk kanë paguar për rrymën e shpenzuar nga viti 1999.

Gjatë viteve, borxhi i tyre është paguar nga qytetarët e komunave të tjera të Kosovës dhe prej vitit 2017 nga Qeveria e Kosovës.

Kryeministri, ministrja e Arsimit dhe kryetari i Shtimes, vunë gurthemelin për ndërtimin e çerdhes në Godanc të Shtimes, e cila do të kushtojë rreth 415 mijë euro.

“Edukimi i hershëm është vendimtar për karakterin dhe tejet i rëndësishëm për karrierën e këtyre fëmijëve, një ditë kur ata do të rriten”, tha kryeministri i Kosovës, Albin Kurti.

Mirëpo, kjo çerdhe nuk do të jetë e vetmja për këtë komunë, e cila udhëhiqet nga Lëvizja Vetëvendosje.

“Deri në fillim të muajit të ardhshëm, do të finalizohet edhe çerdhja e cila është duke u ndërtuar në Muzeqinë të Shtimes dhe kemi paraparë për vitin e ardhshëm edhe çerdhen në Petrovë, të cilat janë disa nga investimet në këtë komunë”, tha ministrja e Arsimit, Arbërie Nagavci.

Sipas kryetarit Qemajl Aliu, në katër anët e Shtimes do të ketë çerdhe.

“Ne kemi fatin me projekte konkrete dhe të studiuara mirë, nga një çerdhe që e kemi gjetur në Komunën e Shtimes, brenda këtij mandati katërvjeçar t’i shtojmë edhe tri çerdhe të tjera”, tha Aliu.

Punimet e çerdhes së Godancit pritet të përfundojnë brenda dy vjetësh. Çerdhja me kapacitet për më shumë se 70 fëmijë, pritet të funksionalizohet menjëherë. /atvlive.tv

Përgatiti: Nora Luta

Një tjetër ligj i miratuar në Kuvend do t’i nënshtrohet vlerësimit të gjyqtarëve të Gjykatës Kushtetuese.

Të premten, në sirtarët e kësaj gjykate është dorëzuar kërkesa nga Partia Demokratike e Kosovës, për të parë nëse Ligji për Këshillin e Pavarur Mbikëqyrës për Shërbimin Civil është në përputhje me Kushtetutën e vendit.

PDK-ja e kishte kontestuar në Kushtetuese edhe shkarkimin e anëtarëve të këtij Këshilli.

Avokati Faton Fetahu ka përmendur të paktën katër nene që, sipas tij, nuk janë në përputhje me Kushtetutën, përfshirë rritjen e numrit të anëtarëve dhe heqjen e imunitetit të tyre.

Ky ligj nuk është në përputhje me Kushtetutën, sipas LDK-së, e cila ka dorëzuar të njëjtën kërkesë në Gjykatë të premten.

Ligji është miratuar javën e kaluar në Kuvend, por vetëm me votat e deputetëve të partisë në pushtet, Lëvizjes Vetëvendosje. Përveç LDK-së, e PDK-së, edhe AAK-ja kishte paralajmëruar se do ta dërgojë ligjin në kushtetuese.

Përgatiti: Krenare Mulliqi

Bazuar në pagën mesatare dhe numrin e zyrtarëve policorë, më shumë se 20 milionë euro pritet t’i kushtojnë buxhetit të shtetit 4 paga të 13-ta, nëse Gjykatat Themelore u japin të drejtë, pas padisë që bënë ndaj Qeverisë.

Ata paditën Qeverinë për moszbatimin e Udhëzimit Administrativ mbi Marrëdhënien e Punës.

Por, 20 milionë euro, sipas ish-ministrit të Brendshëm, Valdet Hoxha, nuk janë aq problem për Qeverinë, meqë pagat nuk do të ekzekutoheshin njëkohësisht.

Skeptik për ekzekutimin e tyre, megjithatë, është një ish-ministri i Financave.

“Qeveria nuk është duke i kryer pothuajse asnjë nga obligimet që janë të paraparë me ligj, kështu që këto gjëra që parashihen me udhëzime as që do t’i futë në listë për t’u marrë me të…”, tha ish-ministri i Financave, Haki Shatri.

Megjithatë, vendimet e Gjykatës detyrojnë Qeverinë t’i përmbushë obligimet, thotë Hoxha.

Zyrtarë policorë kanë paditur Qeverinë në periudha të ndryshe kohore dhe në grupe, në disa Gjykata Themelore, pasi nuk i morën pagat e 13-ta.