Author: ATVLive

Këngëtarja Elsa Lila që prej më shumë se dy dekadash jeton në Itali, e cilëson si ngjarjen më të rëndë në jetën e saj arrestimin e para disa muajve në shtetin italian, e dyshuar si pjesë e një grupi të trafikut të drogës.

Elsa Lila qëndroi dy muaj në paraburgim në Itali dhe më pas u provua pafajësia e saj dhe u la e lirë.

Në një intervistë për emisionin Opinion, Elsa Lila tregoi se shkaku i arrestimit të saj ka qenë njohja me 2 prej shqiptarëve që ishin pjesë e rrjetit të drogës, me të cilët ishte takuar në disa raste

“Për mua mbetet kjo mbetet pikëpyetje shumë e madhe nga momenti që jam e pafajshme dhe nuk kam asnjë lidhje. Sistemi i drejtësisë italiane sidomos në rastin e grupazheve është një sistem i mbrapshtë.

Ata në filim bllokojnë grupin i cili dyshohet për diçka dhe më pas ky grup krasitet deri kur mbetet bërthama kryesore dhe ata që nuk kanë lidhje lirohen. Në këtë lloj sistemi grupazhi që mori brenda shumë njerëz qëllova edhe unë.

Unë duke qenë personazh publik në Romë, dy prej shqiptarëve që unë njihja, mesa duket merreshin me aktivitet për të cilat unë nuk isha në dijeni. Telefoni im ka qenë i vetmi objekt i sekuestruar, nga apartamenti im procesverbali ka qenë shumë i varfër.

Më pas pas disa muajsh këto objekte më janë rikthyer pasi nuk përbënin asnjë provë kundër meje pasi ishin pa asnjë lloj lidhje me këtë lloj grupazhi.

Pasi unë gjatë gjithë këtyre 2 muajve në të cilat vuajta jolirinë time dhe zhdukjen nga shoqëria… Hallka që më lidhte ishte njohja.

Për mua është mister i jashtëzakonshëm. Unë isha parë duke ngrënë darka apo dreka me këta persona, isha parë duke i frekuentuar. Këto ishin provat kryesore.

Nëpërmjet avokatit im, i cili u gjet pas arrestimit tim, më është dhënë nga shteti italian, më shpjegoi dhe më tregoi më vonë që ndërkohë atë natë në shtëpitë e gjithë këtyre personazheve të tjerë, në procesverbalet e sekuestrimeve ishin shumë të pasura me elementë të jashtëligjshëm, janë gjetur para, armë, lëndë narkotike. Ndërkohë që në shtëpinë time nuk është gjetur asgjë.

Celulari im nuk ka pasur asnjë lloj marrëdhënie telefonike as me këtë grupazh as me këta persona.

Ishte ngjarja më e rëndë që më ka ndodhur më jetën time dhe që nuk ja uroj askujt sepse ja që ndodhka që të jesh i pafajshëm dhe të përfundosh në një histori absurde. Kush më njeh nga afër e di shumë mirë se si jetoj, i njeh shumë mirë principet e mia, vlerat e mia. Ishte thjesht një absurditet”, tha ajo.

Të shumta kanë qenë edhe pyetjet e publikut në momentin e arrestimit të Elsa Lilës, se me çfarë jetonte këngëtarja shqiptare pasi prej vitesh nuk ishte aktive në muzikë.

Edhe këtyre dyshimeve, Elsa Lila u ka dhënë përgjigje.

“Në atë periudhë kisha AIR BNB timin personal, i cili është një aktivitet që në Romë më lejonte mua që të kisha një jetesë shumë të mirë krahas punëve të tjera artistike që bëja, sepse kam punuar shumë në studio”, u shpreh Lila.

“Pjesëmarrja në grevën e urisë së PS”, Elsa Lila: Nuk e bëra për politikë

Elsa Lila ka treguar më shumë edhe mbi marrëdhënien e saj me politikën në Shqipëri dhe pjesëmarrjen e saj në grevën e urisë nga Partia Socialiste ne vitin 2010. Ajo tha se nuk e bëri për politikë dhe se ajo ka qenë një nga eksperiencat e saj më të mrekullueshme

Në vitin 2010 ju u përfshitë në grevën e urisë së Partisë Socialiste për çështjen e zgjedhjeve të 2009. Cne kjo lidhje dhe çfarë raporti keni sot më Ramën dhe Partinë Socialiste?

Elsa Lila: Pjesëmarrja ime në atë grevë urie ka qenë spontane. Kthehesha nga Vlora nuk dija çfarë ndodhte në Tiranë atëherë. Shoh tendat, informohem çfarë po ndodhte dhe më tregojnë që po ndodhte ky lloj aksioni i PS. Pyes nëse kishte gra më thanë që kishte 6 gra dhe pyes nëse kishte artistë dhe më thanë që jo. Disa artistë kishin fimros një peticion kundra grevës së urisë, dhe unë si një shpirt i lirë mendova që të jap kontributin tim si artiste duke e menduar të drejtë atë kauzë dhe kërkova që të futem dhe u gjenda aty me 204 pjesmarës të tjerë. Ka qenë një nga eksperiencat më të mrekullueshme.

Po ju e dinit çfarë kishte ndodhur me votat apo thjesht patë protestën dhe ju bashkuat?

Elsa Lila: Unë besova atë version informacioni.

Keni raporte me politikën?

Elsa Lila: Dhe në atë kohë nuk e bëra për politikë, nuk jam marrë ndonjëherë me politik edhe këtë e kam demonstruar pas asaj greve urie.

Gjithashtu këngëtarja foli edhe për marrëdhënien me vajzën e saj dhe bashkëshortin ku u shpreh se kanë një marrëdhënie shumë të mirë.

Ndër të tjera lidhur me situatat e vështira në jetën e saj Elsa Lila shprehet:

“Po t’i përmbledhim nga ky këndvështrim duket më keq se familja Kenedi, por unë nuk e shoh kështu sepse e shoh jetën time nga brenda pasi në këtë miks ka pasur momente brilante të cilat balancojnë momentet e vështira. Jeta ime ka qenë e vështirë, por ka qenë edhe e bukur. Unë besoj se të gjitha këto vështirësi që unë kam përjetuar, reflektohen shumë qartë në muzikën time dhe kjo është një nga armët e mia më të forta. Ka qenë terapia ime kjo”.

Komisioni për Mbikëqyrjen e Financave Publike në mbledhjen e radhës ka shqyrtuar raportet e auditimit për pasqyrat financiare vjetore për vitin 2022 të Autoritetit për Komunikime Elektronike dhe Postare (ARKEP), Këshillit të Pavarur Mbikëqyrës për Shërbimin Civil dhe për Agjencinë për Informim dhe Privatësi, raporton Ekonomia Online.

Kryetarja e Komisionit Hykmete Bajrami, tha se në raportet e Auditimit për këto Agjenci të pavarura nuk ka pasur asnjë të gjetur dhe asnjë rekomandim.

Ajo tha se kjo ka qenë edhe arsyeja pse nuk janë ftuar zyrtarët e Audtitimi për raportim.

“Ky raport ka rezultuar pas asnjë gjetur nuk ka asnjë rekomnadim. Arsyeja pse nuk i kemi thirrur zyrtarët e Zyrës Kombëtare të Auditimit është për shkak se nuk ka pasur të gjetura dhe rekomandime”, tha ajo.

Rendi i ditës:

1. Miratimi i rendit të ditës;

2. Miratimi i procesverbalit nga mbledhja e mbajtur më 3.10.2023;

3. Shqyrtimi i Raportit të auditimit për pasqyrat financiare vjetore të Autoritetit Rregullator për Shërbimet e Ujit, për vitin 2022;

4. Shqyrtimi i Raportit të auditimit për pasqyrat financiare vjetore të Autoritetit për Komunikime Elektronike dhe Postare – ARKEP, për vitin 2022;

5. Shqyrtimi i Raportit të auditimit për pasqyrat financiare vjetore të Këshillit të Pavarur Mbikëqyrës për Shërbimin Civil, për vitin 2022;

6. Shqyrtimi i Raportit të auditimit për pasqyrat financiare vjetore të Agjencisë për Informim dhe Privatësi për vitin 2022;

7. Të ndryshme.

Policia e Kosovës ka arritur ta arrestojë të dyshuarin për plagosjen e dy personave në Prishtinë mbrëmjen e së premtes së kaluar.

I arrestuari, i cili dyshohet për ‘vrasje të rëndë në tentativë’, kishte gjuajtur me armë zjarri në drejtim të dy personave të tjerë në afërsi të unazës qendrore të Prishtinës, në lagjen Lakrishtë.

Ai është arrestuar pas pesë ditësh në arrati.

“Lidhur me rastin, me 25.10.2023 është arrestuar i dyshuari mashkull kosovar dhe me vendim të prokurorit i njëjti është dërguar në mbajtje”, thuhet në njoftimin e Policisë.

Kampioni i Kosovës, Ballkani do ta zhvillojë sonte ndeshjen e radhës në kuadër të fazës së grupeve të Ligës së Konferencës.

Rivali i tyre që zbarkon sonte në Prishtinë, përkatësisht në stadiumin “Fadil Vokrri” është Astana, skuadër kjo e cila ka dy humbje nga dy ndeshjet e zhvilluara dhe rrjedhimisht është e fundit në grupin C me zero pikë.

Skuadra e Ilir Dajës do të luajë vetëm për fitore në mënyrë që të marr epitetin e liderit të grupit, aty ku momentalisht është Viktoria Plzen me gjashtë pikë, kundrejt tri sa ka Ballkani.

Para ndeshjes, trajneri Ilir Daja dhe portieri Enea Koliqi u shprehën se do të japin maksimumin në këtë ballafaqim për të marr pikët e plota.

Ndeshja zhvillohet nga ora 18:45.

Autoritetet kosovare në një raport preliminar të lëshuar më 20 tetor, po thonë se grupi terrorist serb vrau rreshterin e Policisë së Kosovës, Afrim Bunjaku, me armë ndërkombëtarisht të ndaluara, sipas Konventës së Otavës.

Kryeministri Kurti e ministri Sveçla nëpër konferenca bënë me dije se rreshteri Bunjaku ishte vrarë nga një minë me telekomandë, teksa mbronte territorin e Republikës së Kosovës, në Banjskë të Zveçanit më 24 shtator.

Në raportin preliminar të Ministrisë së Punëve të Jashtme dhe Diasporës, të siguruar nga Gazeta Insajderi, thuhet se minat e konfiskuara nga Policia e Kosovës prej grupit terrorist, prodhim i vitit 1984, janë të ndaluara sipas Konventës së Otavës.

“Minat e konfiskuara, të cilat janë prodhuar në vitin 1984, janë shkak për shqetësim të veçantë, veçanërisht pasi Serbia ende posedon një numër të konsiderueshëm të këtyre minat në stoqe. Këto armë madje janë të ndaluara sipas Konventës së Otavës. Rreshteri i policisë, Afrim Bunjaku, është vrarë me armë të ndaluara ndërkombëtare nga Serbia. Ai iu nënshtrua plagëve të shkaktuara nga një minë e tillë që u aktivizua nga distanca”, thuhet në raport preliminar.

Mina të ngjashme, sipas autoriteteve të Kosovës, janë konfiskuar nga bandat e tjera kriminale në Serbi, të cilat, pretendohet nga raporti preliminar, janë të lidhura ngushtë me udhëheqësinë e Serbisë, si dhe me kriminelë dhe paraushtarakë si Milan Radoiçiq.

Duke cituar ekspertët ushtarakë serbë, raporti preliminar thotë se këto armë mund të kenë hyrë në veri të Kosovës përmes vjedhjes së ndonjë depoje të armëve në Serbi, shitje nga tregtarë private apo transferim direct nga vetë shteti.

Krerët shtetërorë kanë konfirmuar se vrasja e Afrim Bunjakut ka ndodhur në vendin e ngjarjes, pasi i njëjti ishte sulmuar me një minë telekomanduese nga grupi terrorist serb.

Profesori i së Drejtës Kushtetuese, Arsim Bajrami, në emisionin CONTEXT në ATV, tha Kosova ka bërë gabime në dialogun me Serbinë, duke mos qenë gjithmonë pragmatike.

Sipas tij, kjo mungesë e pragmatizmit, i ka humbur Kosovës njohjen nga Serbia.

“Pala kosovare ka bërë gabime në dialog, nuk ka qenë gjithmonë pragmatike, sepse të kujtojmë që para një viti a dy vitesh, Kosovës i është ofruar një zgjidhje përfundimtare, ligjërisht të detyrueshme me njohje në Qendër. Ajo ka qenë korniza e dialogut, ka qenë propozim amerikan por edhe evropian, që Kosova dhe Serbia duhet të përmbyllur dialogun me një marrëveshje ligjërisht e detyrueshme, që do të thotë e akceptushme në Kushtetuat e dy vendeve, që kërkonte ndryshime kushtetuese nga Serbia, heqjen e Kosovës nga Preambula dhe që decidivisht parashihte njohjen reciproke”, tha Bajrami. /atvlive.tv

Emisionin e plotë e gjeni në videon më poshtë:

Përgatiti: Armand Hoti

Me shpejtësi prej 4 metrash për sekondë, në ashensorin një shekull të vjetër, po shkojmë drejt horizontit të dhjetë të minierës së Trepçës, ku edhe po qëndrojnë minatorët grevistë.

Rreth 800 metra nën sipërfaqen e tokës, me sasi të limituara të ushqimit e pijeve, punëtorët e nëndheshëm të Kosovës po zhvillojnë ditën e dytë të grevës.

Brenda 24 orëve, tre nga minatorët u alivanosën, derisa dhjetëra të tjerë kërkuan ndihmë mjekësore.

“Është rasti i tretë brenda 24 orëve. Jemi të rraskapitur pa ngrënë e pa pirë, 19 orë s’kam ngrënë”, tha Miftar Mehmeti, minator/grevist.

Përkundër ekzekutimit të 55 përqindëshit të pagës së shtatorit, që ndërmarrja iu detyrohej, minatorët përveç sigurimit shëndetësor dhe përmirësimit të kushteve të punës, po kërkojnë shkarkimin nga detyra të ushtruesit të detyrës së kryeshefit ekzekutiv të ‘’Trepçës’’.

“Nga muaji qershor, ne duhet çdo muaj të grevojmë për të arritur të marrin pagën mujore, ne e shohim një keq-menaxhim që po ndodh atje, e duhet të mbahet përgjegjës dikush për të e që mendojmë që është menaxhmeti dhe për këtë arsye kemi kërkuar shkarkimin e tij”, tha kryetari i Sindikatës të Punëtorëve të “Trepçës”, Ibrahim Jonuzi.

Minatorët të përkrahur edhe nga punëtorët e flotacionit, janë të vendosur ta vazhdojnë grevën e tyre deri në realizimin e kërkesave, derisa përkrahen edhe nga sindikatat e tjera të Kosovës.
Kurse pensionisti Ferid Neziri, i cili qe pjesë e grevës së urisë në 89-ën, erdhi në minierë në mbështetje të grevës të kolegëve të tij.

“Kam ardhur t’i përkrahë kolegët e mi, unë e kam djalin këtu, vëllezërit të gjithë të këtij vendi jemi”, tha Neziri.

Se minatorët punojnë në kushte të vështira të punës, e thotë edhe Ushtruesi i detyrës së drejtorit të Njësisë Biznesore ‘’Trepça’’, në Stan Tërg. Madje, sipas tij, si pasojë e grevës humbjet kapin vlerën e dhjetëra mijëra eurove.

Ndërsa, si zakonisht, as kryeshefi i ndërmarrjes e as nga Bordi Mbikëqyrës i ‘’Trepçës’’, nuk iu përgjigjën televizionit.

Punëtorët e ‘’Trepçës’’ kanë mbajtur grevë edhe në korrik të këtij viti, për shkak të mos-ekzekutimit të pagave të qershorit.

Më shumë detaje i gjeni në Edicionin Qendror të lajmeve në ATV, të cilin e gjeni në videon më poshtë:

Përgatiti: Sara Shehu

Pacientët e diagnostikuar me kancer, për vite me radhë shërbimet mjekësore në Klinikën e Onkologjisë në QKU i kanë marrë përmes aparaturave të vjetra.

Përveç aparaturave në këtë klinikë, edhe hapësirat janë të ngushta.

Mirëpo, këto telashe sipas një postimi të kryeministrit Albin Kurti, do të evitohen.

Të martën në mbrëmje, Kurti mes tjerash njoftoi se janë ndarë edhe 500 mijë euro për renovimin e objektit, derisa përmendi edhe blerjen e akseleratorit me vlerë mbi 1 milion euro.

Me blerjen e aparaturave të reja, sipas drejtorit të Klinikës së Onkologjisë, lista e pritjes është shkurtuar.

“Aparaturat e avancuara po eliminojnë listën e pritjes, e cila është një sukses për stafin e onkologjisë. Pra përmes një rrezatimi të specializuar, jemi duke ia dalë në këtë pjesë”, tha drejtori i Klinikës së Onkologjisë, Ilir Kurtishi.

Ndërsa sa i përket punimeve, sipas Kurtishit, i gjithë renovimi pritet të përfundojë në fillim të vitit 2024.

“Brenda 6 muajve renovimi pritet të realizohet, këto ndryshime do të rrisin numrin e shtretërve nga 45 në 90. Do të kemi hapësirë më të përshtatshme për pacientët. Monitorimi i punës, po ashtu, do të jetë më i lehtë, puna e stafit mjekësor do të jetë më efikase e çdo gjë do të stabilizohet më shumë”, tha Kurtishi.

Mirëpo, sipas Besim Kodrës, nga Shoqata për të Drejtat e Pacientëve, duhet të bëhet më shumë sa i përket trajtimit të pacientëve të prekur nga kanceri.

“Rritja e nevojës për shtimin e kapaciteteve në Onkologji, na tregon se shteti nuk po e bën punën e duhur në parandalimin e kancerit. Përderisa, shteti nuk ka programe të skriningut të kancerit, gjithmonë do të merremi me pasojat. Kjo po e dëmton shëndetin e qytetarëve. Pra nevoja për shtim të kapaciteteve në kohën kur Kosova po zbrazet, tregon se kancerin nuk e kemi fare nën kontroll”, tha Besim Kodra nga Shoqata për të Drejtat e Pacientëve.

Shërbimi Spitalor Klinik Universitar ka njoftuar se deri në përfundimin e punimeve, pacientët e hospitalizuar në katin e dytë të objektit të onkologjisë, do të transferohen në hapësirat afër sterilizimit qendror, hapësirë kjo që më parë ka shërbyer për pacientët si ambulancë specialistike e Klinikës së Ortopedisë.

Për transformimin e tërësishëm të klinikës së onkologjisë, Ministria e Shëndetësisë, në koordinim me Qeverinë, kanë ndarë gjithsej 2.1 milionë euro.