Author: ATVLive

Përgatiti: Driton Sadiku

Pjesëtarët e Njësisë Speciale Intervenuese të Policisë dolën nga takimi 3 orësh me kryeministrin, pa shpresë për konsideratë ndaj kërkesave të tyre.

Për situatën në Polici, të pashpresë para kryeministrit duken edhe partitë opozitare, sipas të cilave s’mund të bëjnë asgjë, meqë shumicën parlamentare e ka pushteti.

Meqë, disa tentime të opozitës për votim të rezolutave në mbështetje të Policisë dështuan, në seancën e së enjtes ku debatohej për buxhetin e vitit të ardhshëm nuk propozuan asnjë.

Megjithatë, AAK-ja pati kërkesa të cilat nuk ndërlidhen specifikisht me Policinë.

Lidhja Demokratike në këtë seancë e kritikoi kryeministrin Albin Kurti, që përmend Policinë vetëm në kohë trazirash.

Për mospërfillje të kërkesave ndaj Njësisë Speciale Intervenuese, kryeministri Kurti u kritikua edhe nga deputetët e tjerë.

Sidoqoftë, sipas ministrit të Punëve të Brendshme, Xhelal Sveçla, i cili vonë erdhi në seancë, buxheti për Policinë këtë vit ka rritjen më të madhe të bërë ndonjëherë.

Shefi i politikës së jashtme të BE-së, Josep Borrell i kërkoi sot Izraelit të mos rrëmbehet nga zemërimi në përgjigjen e tij ndaj sulmit të Hamasit të muajit të kaluar, duke thënë se “një tmerr nuk justifikon tjetrin”.

Borell i bëri komentet gjatë një vizitë në Izrael, duke folur së bashku me ministrin e Jashtëm izraelit Eli Cohen pas vizitës së tyre në Kibbutz Be’eri, një nga objektivat e sulmit të Hamasit të 7 tetorit.

“E kuptoj zemërimin tuaj, por më lejoni t’ju kërkoj që të mos të rrëmbeheni nga zemërimi. Unë besoj se kjo është diçka që miqtë më të mirë të Izraelit mund t’ju thonë,” tha ai.

Borrell theksoi gjithashtu se solidariteti i BE-së me Izraelin dhe mbështetja e tij për të drejtën e vendit për vetëmbrojtje janë në përputhje me ligjin ndërkombëtar.

“Por është një gjë të mbrosh Izraelin dhe një gjë tjetër të kujdesesh për njerëzit në nevojë”, shtoi ai.

“Dhe kjo është arsyeja pse Bashkimi Europian, së bashku me mbështetjen e të drejtës së Izraelit për vetëmbrojtje, po kërkon gjithashtu ndihmë humanitare duke përfshirë ushqim, ujë, karburant, mbrojtje (të njerëzve në Gaza)”, tha zyrtari europian, i cili gjithashtu bëri një thirrje për “lirimin e menjëhershëm dhe pa kushte” të pengjeve.

Ministrja e Ekonomisë, Artane Rizvanolli, tha se sa i përket kapaciteteve gjeneruese, deri në vitin 2025 do të kontraktohen investime në vlerë 1.2 miliard euro, me anë të të cilave do të ndërtohen 950 megavat kapacitete të reja energjetike, përfshirë këtu investime private, publike dhe publiko-private.

Rizvanolli foli edhe për projektin e baterive, për të cilin tha se ky projekt me MCC-në do të fillojë të zbatohet pas 18 muajsh pas nënshkrimit të marrëveshjes, duke thënë se koha e zakonshme e fillimit të zbatimit të marrëveshjes është 2 vite pas nënshkrimit, raporton Ekonomia Online.

Ajo tha se janë siguruar edhe 80 milionë euro për investime në kapacitete e energjisë së ripërtishme, ku sipas saj synohet që ky investim të rritet edhe për 80 milionë euro të tjera, të cilat tha se do të shfrytëzohen për investime publiko-private në kapacitete të erës me kapacitet 150 megavat.

“Për këtë projekt, për vitin 2024 kemi të ndara 12 milionë euro, të cilat do të përdoren për dizajnim të projektit dhe aspekte të ndryshme përgatitore, pra, nga mallra dhe shërbime, 12 milionë euro janë të buxhetuara për programin e MCC-së”.

“Në fund të vitit 2024 do të tenderohet kapaciteti prej 45 megavat për rezerva sekondare, ndërsa në vitin pas kësaj, kapaciteti tjetër 125 megavat për rezerva terciare. Në çerekun e fundit të vitit 2024 do të shpallen procedurat për parkun solar prej 100 megavat në KEK dhe ngrohjen solare në Prishtinë, në total këto kontrata 180 milionë euro”.

“Gjithashtu, KEK-u në fund të këtij viti do të shpallë tenderin për rehabilitimin e thellë të njësisë A3 të Kosovës A, ndërsa investimi pritet të fillojë në vitin tjetër”.

Rasti i parë në këtë vit i Gripit të Shpezëve “Avian Influenza” është paraqitur në fshatin Godancë të Shtimes.

Agjencisa e Ushqimit dhe Veterinarisë ka konfirmuar përmes një njoftimi duke thënë se kanë nxjerrë vendim për masat e përgjithshme për kontrollin, parandalimin dhe luftimin e sëmundjes.

“Pas konfirmimit të prezencës se sëmundjes, Gripi i Shpezëve – Avian Influenza në një fermë jo komerciale në Shtime, Agjencia e Ushqimit dhe Veterinarisë sot më datë 16.11.2023 ka nxjerrë ‘Vendim’ me nr AUV 01/619 për masat e përgjithshme për kontrollin, parandalimin dhe luftimin e sëmundjes Gripi i Shpezëve-Avian Influenza.

Zona në perimetër 3 km nga ferma në Fshatin Godancë, komuna Shtime, shpallet zonë karantine e ndalimit të lëvizjes se shpezëve. Ndërsa zona në perimetër 10 km shpallet zonë nën mbikëqyrje për hulumtim”, thuhet në njoftim.

Masat e përgjithshme:

Ndalimin e lëvizjes së shpezëve nga fermat dhe tregtimi i tyre në tregjet e kafshëve – shitblerja e shpezëve;

Vendosja e masave të bio-sigurisë në ferma (vetëkontrolli),

Përcaktimi i zonave të mbrojtura (3 km) dhe gjurmueshmëria e sëmundjes (10 km); dezinfektimi i objektit dhe zonave përreth ku ka shpërthim të sëmundjes;

Njoftimi i rasteve të dyshimta për sëmundjen Gripi i Shpezëve;

Vizita e fermave të dyshuara nga ambulancat veterinare në koordinim me inspektorët veterinar, marrja e mostrave dhe dërgimi në Laboratorin e Ushqimit dhe Veterinarisë

Përcaktimi i lokacioneve për groposjen e shpezëve.

Përjashtimisht nga masat e lartcekura, lejohet lëvizja shpezëve nga fermat e lira nga kjo sëmundje në thertore të licencuara vetëm me pëlqimin e inspektorit veterinar të Agjencisë së Ushqimit dhe Veterinarisë. Reklama

Urdhërohen të gjithë menaxheret e tregjeve që nga momenti i hyrjes në fuqi të këtij vendimi të pezullojnë punën në pranimin e shpezëve në hapësirat e tyre.

Obligohet Komuna e Shtimes, Policia e Kosovës, në koordinim dhe bashkëpunim me AUV-në të bëjnë mbikëqyrjen e zbatimit të masave.

Vendimi hyn në fuqi sot datë 16.11.2023.

Kryeministri i Republikës së Kosovës, Albin Kurti, i shoqëruar nga ministrja e Ekonominë, Artane Rizvanolli dhe ministri i Mjedisit, Planifikimit Hapësinor dhe Infrastrukturës, Liburn Aliu mirëpriti dje në ndërtesën e Qeverisë, Chargee d’affaires të Zyrës së BE-së në Kosovë, Eva Palatova, së bashku me ambasadorë e zëvendësambasadorë të shteteve anëtarë të BE-së, në prag të Konferencës së Kombeve të Bashkuara mbi Ndryshimet Klimatike, COP 28.

Në takim, Kryeministri Kurti dhe ministrat Rizvanolli dhe Aliu shprehën mirënjohjen për mbështetjen e BE-së, i informuan mbi reformat në fushën e energjisë, klimës dhe ambientit, dhe konfirmuan përkushtimin e Kosovës ndaj zotimeve globale për Energjinë e Ripërtëritshme dhe Efiçiencë të Energjisë (Global Renewables & Energy Efficiency pledge), të cilat janë në përputhje me synimet dhe politikat e Qeverisë në fushat përkatëse.

Republika e Kosovës do të marrë pjesë në COP28 për herë të dytë. Me këtë rast, Qeveria e Republikës së Kosovës edhe zyrtarisht do t’i bashkohet Zotimit Global për Energjinë e Ripërtëritshme dhe Efiçiencë të energjisë (Global Renewables and Energy Efficiency Pledge).

Punëtorët teknik të Qendrave të Mjekësisë Familjare në Prishtinë dhe ata të nëntë shkollave të kryeqytetit, do të protestojnë të martën para Komunës së Prishtinës.

Protesta e do mbahet nga ora 10-11, bëri të ditur kryetari e Sindikatës së Pavarur të Sektorit Privat të Kosovës, Jusuf Azemi.

Ndërkaq, ai tha se nëse protesta nuk sjell rezultate, ata mund të hyjnë në grevë.

“Nëse kjo protestë nuk do të ketë rezultate, po këtë ditë kryetarët e shoqatave do të caktojnë datën për hyrje në grevë”, theksoi Azemi.