Kryetarja e partisë ‘Alternativa’, Mimoza Kusari-Lila, në emisionin CONTEXT në ATV, ka komentuar refuzimin e kryetarit të LDK-së, Lumir Abdixhiku, për të qenë pjesë e bashkëqeverisjes, duke thënë se vendimet politike nuk duhet të udhëhiqen nga ndjenjat personale.
Sipas Kusari-Lilës, çdo subjekt politik mban përgjegjësi ndaj strukturave dhe elektoratit, por veprimet e sotme duhet të fokusohen në të ardhmen.
“Para se me hartu, shkurtimisht e lexova reagimin e kryetarit të Lidhjes Demokratike. Natyrisht, është e drejtë e tyre dhe referenca në retorikë është referencë në të kalumen. E kalumja ka pasë situata shumë më të rënda për këtë subjekt… gjithsesi është vendim ose veprim për të cilin ata normal i japin llogari edhe strukturave edhe elektoratit të vet. Po një pozicion që duhet me qenë për të gjithë, e përfshirë edhe neve si partinë e parë, është që veprimet tash e tutje, më shumë sesa për të kalumën, kanë bajmë për të ardhmen”, tha Kusari-Lila.
Deklaratën e plotë të Mimoza Kusari-Lilës në CONTEXT, e gjeni në videon më poshtë:
Kryetarja e partisë ‘Alternativa’, Mimoza Kusari-Lila, në emisionin CONTEXT në ATV, tha se ende nuk është caktuar emri i të nominuarit të tyre për kryetar të Kuvendit.
Ajo tha se përderisa nuk ka një shumicë të konfirmuar me 61 vota, çështja e kryetarit të Kuvendit mbetet ende e hapur për diskutim.
“Jo, kjo është punë në proces. Na tash, ajo si çështje e marrëveshjes politike bëhet edhe përfshihet edhe pozita e kryetarit ose kryetares së Kuvendit edhe në këtë proces. Përderisa nuk ka të formalizume asgjë, na ende nuk e kemi emrin për të nominuarin tanë për kryetar të Kuvendit, edhe kjo është e natyrshme kur nënkuptohet që në momentin kur ti nuk i ke 61 vota vetë për me formu gjegjësisht shumicën… për me pasë shumicën në Kuvend, nënkuptohet se këto e ke subjekt të trajtimit të mëtutjeshëm”, deklaroi Kusari-Lila.
Ajo përmendi edhe sfidat që kanë dalë më parë me përfaqësuesit e komuniteteve joshumicë, veçanërisht rreth postit të nënkryetarit të Kuvendit dhe kërkesave për rotacion.
“Ka pak divergjenca në kërkesat se si ata i kanë parashtru para mandatarit për Qeverinë e re dhe ka qenë që e kanë pasë, për shembull, postin e nënkryetarit të Kuvendit me rotacion. Dhe jemi ballafaqu hoxhane telashe në momentin kur përfaqësues të grupit multietnik, gjegjësisht deputetë të komuniteteve joshumicë e kanë mbajtë postin dhe ka qenë legjislatura e tetë e para që ka pasë rotacion të postit. Domethënë, se nuk kanë pranu me u tërheqë… ka pasë goxha diskutime e trajtime të shumëfishta, të cilat për dikë tash mundet me thanë qytetarët: ‘Pse na po ngarkohemi me këto?’ Fatkeqësisht, proceset politike përbrenda nganjëherë kalojnë në këto hyjne, në kësi debat i cili merr edhe energji edhe merr kohë”, tha Kusari-Lila.
Deklaratën e plotë të Mimoza Kusari-Lilës në CONTEXT, e gjeni në videon më poshtë:
Kryetarja e partisë ‘Alternativa’, Mimoza Kusari-Lila, në emisionin CONTEXT në ATV, tha se për dallim nga e kaluara, kësaj radhe nuk është e mjaftueshme mbështetja vetëm nga komunitetet jo-shumicë për formimin e Qeverisë së re.
Sipas saj, edhe në të kaluarën bashkëpunimi me komunitetet joshumicë ka qenë formal dhe i natyrshëm, por tani nuk i mjaftojnë numrat.
“Edhe në të kalumen, Qeverinë Kurti 2, përkundër që e kemi pasë një shumicë me 10 deputetë më shumë, kanë fillu, domethënë, koalicioni, gjegjësisht arsyeja e lidhjes së koalicionit ose një bashkëpunimi formal ka qenë me këto parti. Me këto është edhe njëfarë forme – janë edhe vendet e garantume edhe në Kuvend, edhe në Qeveri. Njëjtë edhe për pakicën tjetër apo komunitetin e një shumice tjetër, por gjithsesi që ka pasur trajtim në kuptimin e bashkëpunimit ose një vazhdimësie të komunikimit prej edhe mandatit të kalum”, tha Kusari-Lila.
Ajo shtoi se në këtë mandat nuk mund të arrihet numri i nevojshëm i votave vetëm me komunitetet joshumicë dhe prandaj do të nevojiten diskutime të mëtejshme për formimin e Qeverisë.
“Nuk është më e lehtë, është pak më e vështirë, qysh e kemi pa – numrat e tregojnë që vetëm me komunitetet joshumicë, si herën e kalume, nuk ka me qenë e mjaftueshme ose nuk është e mundshme të arrihet numri 61 i minimumit që duhet për një Qeveri të votohet. Prandaj kjo është tashmë një punë e cila ka me vazhdu procesin dhe e cila ka me shty përpara gjithsesi diskutim të matutjeshëm mbi formën e mënyrën e arritjes së këtij numri”, deklaroi Kusari-Lila.
Deklaratën e plotë të Mimoza Kusari-Lilës në CONTEXT, e gjeni në videon më poshtë:
Tri janë ngjarjet që javën e kaluar e kanë poshtëruar Kosovën dhe kanë dëshmuar që nuk jemi shtet serioz. Një prej tyre ka ndodhë në Serbi, konkretisht në kongresin e UEFA-s në Beograd. E dyta në Prishtinë, kur Kryeministri pranoi se e ka kuptuar që paska struktura të Serbisë që paskan ndikim në disa deputetë të zgjedhur të Kuvendit të Kosovës. Tash, dorën në zemër, këto dy zhvillime, sado të pakëndshme që janë, s’është që unë prej Serbisë kam pritë diçka tjetër, ose në raport me Serbinë kam mësuar ndonjë gjë të re.
Ama prej Vjosës e Hekuranit… pra, po e kuptoni edhe vetë – Ngjarja e tretë që dëshmon se jemi shtet jo serioz është krejt hallakama që u shkaktua në komunikimin ndërmjet Presidencës dhe Qeverisë për tarifën e vendosur nga Shtetet e Bashkuara për mallrat kosovare.
Qe pak fakte dhe raportime për krejt Vjosat dhe krejt Hekuranat e kësaj Kosove që mund të mos e dinë çka është kah bëhet dhe në vend të qartësimeve politikanët iu japin mjegull, ta merr mendja ti, përnjëmend është e rëndësishme kur e kryen Hekurani orarin e punës, ose kur Vjosa hyn në rrjete sociale.
Siç dihet, Presidenti amerikan Donald J. Trump ka vendosur tarifa në mallrat e shteteve ndaj të cilave Shtetet e Bashkuara kanë deficit tregtar dhe e kanë gjetur një formulë për të vendosur tarifa ndaj këtyre shteteve.
Sipas Shtëpisë së Bardhë, vlera e tarifave që Amerika aplikon ndaj vendeve është fiks gjysma e vlerës së barrierave tarifore dhe jotarifore që ato vende aplikojnë ndaj mallrave amerikane. Pra, nëse Kina, një shtet, ka tarifa dhe barriera le të themi 67%, atëherë Amerika ka tarifë 34% për mallrat e atij shteti.
Tash, në rastin e Kosovës kjo nuk vlen.
Axiosi, gjegjësisht James Suroviecki i Axiosit, e kanë publikuar edhe formulën e saktë që duket shumë shkencore sepse i ka do shkronja greqisht në të, por që ju mos me e ndërru kanalin, nuk po hyj tash me formulën e saktë, fundja garant në Kosovë e lexojmë Axiosin, nuk është që rrimë në TikTok gjithë ditën tu këqyrë budallenjtë e reality show-ve.
Arsyeja pse nuk po ndalem në formulën e saktë është se duhet të shpjegoj çka eksporton Kosova me Amerikë, çka kanë blerë amerikanët “made in Kosova”.
Qe statistika. Deri në 2019-ën nuk kanë blerë ama gati bash kurrgjë hiç. Prej 2020-ës e posaçërisht pas pandemisë, kjo rritet dhe për 4 vjet i mbërrin rreth 400 milionë eksporte.
Prej 400 milionëve, qysh po e shihni, 30% janë tekstil dhe artikuj tekstili dhe 51% të ndryshme – çfarë sistemi i mirë i klasifikimit të eksporteve tjera: plastikë, bimore, ushqim e pije, metale, tekstil dhe të ndryshme – fort efikas jemi.
Nga këto 50% të ndryshme, 49.4%, që i bie rreth 200 milionë për 4 vjet, janë dyshekë, mbajtëse të dyshekëve, jastëkë, mbuloja, e shertesa – 200 milionë për 4 vjet.
Çka kemi importu nga Amerika? Produkte minerale, kimike, kerrë e kamiona, makineri, etj. etj. Totali i importeve? Rreth 100 milionë euro. Pra, nëse e heqim masën 10% i humbim 10 milionë euro, 10 milionë – that’s it! Një ose 2 km rrugë, që edhe ashtu nuk shtrohen, më pak se një stadium që kurrë nuk u kry!
Pare të ima për buxhetin e madh me rritjen më të shpejtë e më stabile në Ballkanin Perëndimor dhe jo vetëm!
E tash, pas këtyre fakteve, të flasim pak për procedurën e heqjes së tarifës.
Fillimisht, kjo është punë e Presidentes, aq sa është tarifa e rrymës – me fjalë të tjera, bash hiç! A ia ndalon dikush Presidentes të propozojë dhe të avokojë për këto tema? – Askush!
A ka ndikim dhe kompetencë? – JO!
A ka protagonizëm nga i cili populli është më i hutuar? – PO!
Në Kosovë është në fuqi një dokument që titullohet LIGJ PËR MALLRAT E LIRUARA NGA TATIMI DOGANOR DHE MALLRAT ME TARIFË ZERO TË TATIMIT. Në këtë ligj është një neni 3 ku thuhet se:
Subjektet dhe mallrat e liruara nga tatimi doganor apo reduktimi ose pezullimi i tatimit doganor në zero normë, rregullohet me akt nënligjor të nxjerrë nga Qeveria e Republikës së Kosovës dhe për këtë njoftohet Kuvendi.
Dikush thotë: Cili Kuvend? S’ka Kuvend hiç, s’ka ku me u dërgu njoftimi dhe tarifa mbetet. Tash, nëse i besojmë këtij interpretimi, del që as Vjosa e as Hekurani nuk e dinë ligjin dhe nuk e dinë që s’kemi Kuvend.
Nëse Kuvendi veç njoftohet, e Qeveria vendos, i bie që për të hequr tarifën, duhet të plotësohen dy kushte:
Që Hekuran Murati të jetë në orar të punës dhe të kërkojë nga KM Kurti që të heqë tarifën dhe
Që KM Kurti ta pranojë kërkesën e Hekuranit, qoftë edhe jashtë orarit të punës – meqë kjo Qeveri shpesh ka marrë vendime jashtë orarit, për mos me thënë që në vikend është marrë me rezultat të zgjedhjeve, në Këshill të Sigurisë.
Pra, tarifa mund të hiqet, dihet kush e kërkon këtë punë, dihet kush e miraton dhe kush njoftohet dhe sa kushton!
E tash, a hiqet? – Varet prej protagonizmit politik primitiv.
Përgatitjen e ushqimit e bënë aty ku e bënë edhe gjumin.
E në këtë shtëpi me vetëm dy dhoma jeton një nënë 72 vjeçare me tre djemtë e saj.
Përveç mungesës së hapësirës dhe kushteve të rënda të jetës, Demira Demirov, nga komunitet rom duhet të paguajë edhe qira mujore. Sipas 72-vjeçares, nga Gjilani, jeta bëhet edhe më të vështirë për shkak të vet përkatësisë etnike që ka.
“Jeta vërtet është e vështirë, fëmijët nuk kamë arritur t’i shkolloj dhe tan nuk punojnë askund, mezi mbijetojmë, kjo shtëpi nuk është e jona ne jemi me qira 220 paguajmë çdo muaj”, tha Demirov.
Por pavarësisht paragjykimeve dhe shumë sfidave që i janë paraqitur përgjatë rrugës, Shpresa Gashi nuk hoqi dorë nga përpjekjet e saj për të përmirësuar sado pak jetën e komunitetit.
Si rome që është, ajo i takon komunitetit që vlerësohet të jetë më i margjinalizuari në shoqërinë kosovare por paraqet histori suksesi si aktivistja e parë grua rome.
“Paragjykimet që janë bërë komuniteteve më ka bërë që të punojmë më shumë për ta nuk ka qenë e lehtë por megjithatë ja kemi dal të përmirësojmë sado pak jetën e tyre..”, tha Gashi.
Pavarësisht problemeve shëndetësore 54 vjeçarja punën nuk e ndal as në shtëpi, andaj përkushtimi i saj është vlerësuar me shumë shpërblime.
Komuniteti rom në Kosovë dhe gjithandej në botë më 8 prill shënon Ditën Ndërkombëtare e sipas regjistrimit të fundit të popullsisë, në Kosovë jetojnë 8 mijë e 700 rom.
Pas refuzimit të palës serbe në janar të këtij viti të ulet në tavolinën e bisedimeve në Bruksel për çështjen e të pagjeturve, një takim i ri pritet të mbahet gjatë muajit prill.
Sipas kryetarit të Komisionit Qeveritar për personat e pagjetur, Andin Hoti takimi i Komisionit të Përbashkët për të Pagjeturit do të mbahet brenda dhjetë ditësh.
Hoti, që të martën u takua në Prishtinë me përfaqësues të emisarit për dialogun Kosovë- Serbi Peter Sorensen, ka thënë se dy temat që do të shpalosen në Bruksel janë arkivat shtetërore të Serbisë dhe lokacionet për gërmime atje.
Hoti në një intervistë për ATV, tha se pret qasje ndryshe ndaj Serbisë nga strukturat e reja të BE-së.
Nëse edhe kësaj radhe, pala serbe refuzon të marrë pjesë dhe nuk ndëshkohet, sipas Hotit nuk do të kishte më kuptim as dialogu me Serbinë.
Hoti në shkurt të këtij viti, i kishte dërguar letër Përfaqësueses së Lartë për Punët e Jashtme dhe Politikën e Sigurisë, Kaja Kallas, duke kërkuar hapa konkretë për të detyruar Serbinë të zbatojë deklaratën e përbashkët për personat e zhdukur, dhe të hapë arkivat ushtarake, policore dhe të inteligjencës.
Tenderi 18 milionësh, për bulevardin e Gjilanit, ka përfunduar në Organin Shqyrtues të Prokurimit, pas dy ankesave të pranuara më 4 prill.
Operatori ekonomik, Pro&Co Grup shpk, pretendon se Komuna vendosi një kriter diskriminues.
“Përderisa shumica dërrmuese e punëve ka të bëjë me ndërtimin e sheshit, parkingut dhe objektit të administratës, është e pakuptueshme se si është vendosur si kriter edhe vlera prej 6 milionë eurosh në ndërtimin e nënkalimeve”, janë deklaruar operatorët ekonomik ankues, Pro&Co Grup.
Pikërisht ky kriter, cilësohet si diskriminues edhe nga operatori tjetër ekonomik Semaks SHPK, i cili po ashtu ka dorëzuar ankesë në OSHP.
Kjo kompani, madje pretendon se në këtë paramasë, diskriminuese është edhe kërkesa që kompania ta posedojë një gjysmë-rimorkio për zhbllokim të kanalizimit.
“Kjo pajisje është e panevojshme dhe diksriminuese sepse s’ka pozicion në paramasë për këtë pajisje sepse këtu kemi të bëjmë me ndërtim dhe jo mirëmbajtje të projektit..”, janë deklaruar nga kompania Semaks SHPK.
Ndarja e mjeteve për këtë projekt, nuk ishte mbështetur nga Kuvendi Komunal i Gjilanit për buxhetin e vitit 2025.
Por, pak javë më vonë, kryetari Alban Hyseni, njoftoi se pushteti i siguroi paratë e nevojshme, pa dhënë më shumë detaje.
Presidentja e Republikës së Kosovës, Vjosa Osmani, dekretoi sot 20 gjyqtarë me mandat fillestar, në bazë të propozimit të Këshillit Gjyqësor të Kosovës. Nga gjyqtarët e dekretuar, 12 janë gra dhe 8 burra.
Gjatë ceremonisë së betimit para Presidentes Osmani, gjyqtarët e rinj u zotuan se do t’i qëndrojnë besnik Kushtetutës dhe ligjeve të Republikës së Kosovës, do të respektojnë etikën profesionale dhe do ta kryejnë detyrën e tyre me integritet, profesionalizëm dhe paanshmëri.
Sipas një komunikate të Presidencës, Osmani theksoi se ndërtimi i një shteti të suksesshëm dhe demokratik është i mundur vetëm përmes një sistemi të drejtësisë të pavarur dhe funksional, raporton KP.
Ajo vuri në dukje se integriteti dhe profesionalizmi i gjyqtarëve janë shtyllat kryesore për garantimin e barazisë para ligjit dhe për forcimin e besimit të qytetarëve në institucionet e drejtësisë.
Në ditën e dytë të qëndrim në Bruksel, kryeministri në detyrë i Republikës së Kosovës, Albin Kurti ka deklaruar se mbajtja në sirtar të aplikimit të Kosovës për anëtarësim në Bashkimin Evropian për më shumë se 27 muaj, nuk pasqyron qasje të bazuar në meritë, dhe se një situatë e këtillë rrezikon besimin ndaj procesit.
Kurti këto komente i bëri derisa ishte i ftuar si folës kryesor në Konferencën e organizuar nga Fondacioni për Studime Progresive Evropiane (FEPS), Friedirch-Elbert-Stiftung (FES), Fondacioni Max car der Stoel, Qendra Ndërkombëtare Olaf Palme, së bashku me Grupin e Aleancës Progresive të Socialistëve dhe Demokratëve (S&D) në Parlamentin Evropian, me temë “Një kapitull i ri i përbashkët për zgjerimin e Bashkimit Evropian”, raporton KosovaPress.
Gjatë adresimit të tij hyrës, theksoi se për herë të parë në më shumë se 20 vjet, në botë ka më pak vende me demokraci sesa autokraci, 88, respektivisht 91, kurse numri i demokracive liberale ka rënë nga 42 në vitin 2012, në 29 në vitin 2024.
Ai citoi ish-kancelarin gjerman Ëilly Brandt, i cili në vitin 1969 kishte sfiduar Gjermaninë dhe Evropën për të përqafuar më shumë demokracinë duke thënë, “Ne duam të guxojmë më shumë demokraci”. Kryeministri veçoi se në këtë thënie të ish-kanceralit gjerman nuk duhet të harrojmë se ai përmend fjalën guxoj/marr guximin, kështu që në politikë është shumë e rëndësishme të guxojmë.
“Deficiti demokratik nuk është gjë e re për BE-në dhe që nga ditët e Traktatit të Mastrihtit, janë bërë përpjekje për të reformuar dhe zgjeruar unionin. Për të guxuar demokracinë, unë besoj se Bashkimi Evropian duhet t’i bëjë të dyja: reformimin dhe zgjerimin. Unë marr guximin të them se këto mundësojnë dhe kushtëzojnë njëra-tjetrën njëkohësisht. Vetëm një BE që është e gatshme të reformohet mund të zgjerohet gjithashtu, dhe vetëm një BE që dëshiron të zgjerohet, do të jetë në gjendje të reformohet”, u shpreh kryeministri Kurti.
Duke folur për nevojën dhe përgjegjësinë për të mbrojtur demokracinë, kudo, ai tha se çdo vonesë është e kushtueshme.
“Që demokracia të mbijetojë, ne patjetër duhet ta mbrojmë atë, kudo. Çdo vonesë për ta bërë këtë është e kushtueshme. Për ta mbrojtur atë, së pari duhet ta pranojmë se kjo është detyra jonë historike dhe morale. Për sa i përket zgjerimit, pranimi do të thotë një ‘garë drejt majës’, një qasje e bazuar në merita. Progresi demokratik duhet të shpërblehet, ndërsa rrëshqitja prapa duhet të trajtohet. Regjimet autoritare dhe vetëkënaqësia në shoqëritë demokratike duhet të sfidohen, menjëherë, jo të lihen për më vonë”, deklaroi kryeministri.
Ai tha se mbajtja në sirtar të aplikimit të Kosovës për anëtarësim në Bashkimin Evropian për më shumë se 27 muaj, përkundër angazhimit dhe reformave të realizuara të vendit tonë, nuk pasqyron qasje të bazuar në meritë, dhe se një situatë e këtillë rrezikon besimin ndaj procesit. Me tej, shtoi se te Komisioni i ri Evropian ka vërejtur më shumë gatishmëri, vullnet dhe interes për të përfshirë Ballkanin Perëndimor në Bashkimin Evropian, megjithëse duket të ketë më shumë gatishmëri dhe interes sesa vullnet, teksa theksoi rëndësinë që të rritet vullneti, sepse gatishmëria dhe interesi nuk mjaftojnë pa vullnetin.
Sipas një komunikate të Qeverisë, në fund, kryeministri bëri thirrje për më shumë aktivizim, bashkëpunim dhe solidaritet ndërmjet partive simotra dhe socialdemokratëve dhe njëkohësisht më shumë optimizëm të përgjegjshëm dhe entuziazëm ndaj qytetarëve.
Kjo konferencë u organizua në kuadër të programit “Ëilly Brandt për Zgjerimin e Bashkimit Evropian” të Grupit të Aleancës Progresive të Socialistëve dhe Demokratëve (S&D) në Parlamentin Evropian.
Kryetari i Lidhjes Demokratike të Kosovës, Lumir Abdixhiku ka refuzuar ftesën e kryeministrit në detyrë, Albin Kurit për diskutime për një koalicion që do ta formonte Qeverinë e re.
Ai ka shkruar në Facebook se sado që ai dhe LDK nuk udhëhiqen nga inati; sado që besojnë në dialog, bashkëpunim e komunikim njerëzor e politik, një takim i tillë, madje edhe konsultativ, do të ishte kapërcim fatal i dinjitetit njerëzor dhe politik.
“Mes ‘hajvanatit’, ‘mbytjes së LDK-së’, ‘bashkëpunëtorëve të Serbisë’, mes moçalit të madh të pështymave ndaj nesh – unë, LDK dhe votuesit tanë – nuk e gjejmë veten as për konsultim. Sepse fjalët, si edhe bindjet, kanë peshë”, ka shkruar ai.
Postimi i plotë i Abdixhikut:
Të dashur qytetarë të Republikës,
Në politikë, si në jetë, fjalët kanë peshë. Ato janë pasqyrë e karakterit, e vlerave dhe e qëllimeve. Janë reflektim i momenteve që, kur përsëriten, bëhen bindje – shpesh edhe të pakapërcyeshme.
Për ne, në Lidhjen Demokratike të Kosovës, fjala është përgjegjësi. Është zotim. Është besë.
Prandaj, secili – veçanërisht ata me pushtet – duhet të jenë të përgjegjshëm për fjalët që thonë dhe për bindjet që mbjellin.
Për muaj, e në të vërtetë për vite të tëra – para, gjatë dhe pas fushatës – LDK, anëtarët tanë dhe votuesit tanë, kanë qenë subjekt i një gjuhe dhe mendësie që ofendon, përçan, etiketon dhe sulmon. Një mendësi që ka goditur thelbin njerëzor të politikës – respektin dhe dinjitetin. Dhe ka cenuar parimet themelore mbi të cilat ne kemi zgjedhur të bëjmë politikë.
Duket se fjalët e thëna e bindjet e ushqyera në vijimësi, nuk kanë peshë njëjtë për të gjithë. Sepse, pavarësisht të gjithë gjërave të thëna, të bëra e stërbëra, dje kam pranuar një letër nga Kryetari i Lëvizjes Vetëvendosje, z. Kurti, për takim konsultativ mes nesh.
Sado që unë dhe LDK nuk udhëhiqemi nga inati; sado që ne besojmë në dialog, bashkëpunim e komunikim njerëzor e politik; një takim i tillë – madje edhe konsultativ – do të ishte kapërcim fatal i dinjitetit njerëzor dhe politik.
Mes ‘hajvanatit’, ‘mbytjes së LDK-së’, ‘bashkëpunëtorëve të Serbisë’, mes moçalit të madh të pështymave ndaj nesh – unë, LDK dhe votuesit tanë – nuk e gjejmë veten as për konsultim.
Sepse fjalët, si edhe bindjet, kanë peshë.
Fjalët e thëna ndaj nesh kanë peshë. Dhe fjalët tona – ato që u kemi dhënë qytetarëve tanë, atyre që nuk joshen nga spektakli i përçarjes por që besojnë se shteti ndërtohet me respekt e dinjitet – kanë peshën e fjalës së dhënë. Peshën e besës.
Besë do të ketë!
Le të jetë kjo përgjigje e qartë edhe për të tjerët që së fundi, duke marrë peshën që nuk u takon, kanë tentuar t’i tregojnë LDK-së se çfarë duhet të bëjë.
LDK – për ta kuptuar mirë – u qëndron besnike vendimeve, bindjeve dhe fjalëve të thëna para fushatës, gjatë fushatës dhe pas fushatës. Ndaj të gjithëve – njësoj.
Sepse fjalët kanë peshë!
LDK e pret dhe e mbështet konstituimin e Kuvendit më 15 prill. Nuk ka dhe nuk do të ketë asnjë pengesë. Prandaj, le ta konstituojmë Kuvendin e Republikës.
LDK njeh të drejtën legjitime, demokratike dhe kushtetuese të partisë së parë për të marrë mandatin për qeverisje. Dhe në rast të dështimit të saj, njeh të drejtën e secilit për të ndërtuar shumicën. Qëndrimet tona janë të qarta.
