Author: ATVLive

Përgatiti: Nora Luta

Kamerat e sigurisë nga objekti i partisë që e udhëhiqte Oliver Ivanoviqi kishin kapur vetëm momentet pas vrasjes së tij, më 16 janar të 2018-s. Pamjet nga ora 8:17 minuta e asaj dite janë shfaqur të premten, në gjykimin për vrasjen e ish-liderit serb, që po zhvillohet në Gjykatën Themelore të Prishtinës.

Kjo video dhe të tjerat të shfaqura gjatë kësaj seance, sipas Prokurorisë Speciale, vërtetojnë se kamerat e sigurisë nuk kishin punuar nga 4 janari deri më 16 janar të 2018-s. Pas ambulancës, në vendin e ngjarjes arrin edhe policia, në mesin e tyre edhe akuzuari Nedelko Spasojeviq.

Në video-incizimet shihen lëvizje të qytetarëve në oborrin e objektit të partisë, çka, sipas PSRK-së, dëshmon se Spasojeviq nuk e siguroi vendin e ngjarjes.

E për veprimet e të akuzuarve, ish-pjesëtarëve të Policisë, është sfiduar me pyetje ish-shefi i Njësisë rajonale Hetimore të Mitrovicës së Veriut, Nenad Simiq, i cili ishte në vendin e ngjarjes së vrasjes së Ivanoviqit dhe pjesë e hetimeve.

Por, ishte vetëm një video-incizim që Simiq e kishte parë nga kamerat e sigurisë, nga e cila e kishte identifikuar të akuzuarin Dragisha Markoviq.

Simiq u ftua të dëshmojë në këtë gjykim me ftesë të të akuzuarit Rade Basara, i cili pretendon se në kohën e vrasjes, nuk ishte në Kosovë dhe sipas Simiqit, ai ishte në pushim vjetor.

Gjykimi për vrasjen e Oliver Ivanoviqit do të vazhdojë javën e ardhshme.

Përgatiti: Arton Hamiti

Është njëra prej pajisjeve që shërben për ta neutralizuar rrezikun pa pasur nevojë të përdoret arma. Por, policët e Kosovës, spërkatësin kimik e kanë me afat të skaduar, dëshmon një raport i Inspektoratit Policor.

“Policët e Kosovës ishin të pajisur me armë brezi, pranga, elektrik dore dhe spërkatës kimik dhe uniformat ishin të rregullta, por si problematikë u konstatua se spërkatësi në të gjitha rastet ka qenë me afat të skaduar, që nga dhjetori i vitit të kaluar”, thuhet në raportin e AMP & IPK.

Përdorimi i spërkatësit me afat të skaduar vlerësohet të jetë shumë i rrezikshëm për shëndetin e njeriut.

Teksa u kërkua zgjidhje e shpejtë e problematikës, institucionet përkatëse u fajësuan për faktin se pjesëtarët e Policisë kanë mungesë të pajisjeve adekuate.

Inspektorati Policor edhe më parë gjatë inspektimit në stacione ka hasur spërkatës kimikë dhe jelekë antiplumbë me afat të skaduar.

Kryetari i Partisë Demokratike të Kosovës, Memli Krasniqi, ka vizituar Komunën e Mitrovicës, ku së bashku me Kryetarin Bedri Hamza, kanë ndjekur nga afër punimet e rëndësishme infrastrukturore që po zhvillohen në këtë komunë.

Krasniqi tha se Komuna e Mitrovicës dhe komunat tjera që udhëhiqen nga kryetarët që janë nga radhët e PDK-së, janë shembull i rikthimit të politikës në shërbim të të gjithë qytetarëve, pa dallim, thuhet në komunikatë.

“Unë jam krenar si kryetar i Partisë Demokratike të Kosovës, që kryetarët e komunave që udhëhiqen nga PDK-ja siç është rasti i Bedri Hamzës, janë modeli më i mirë i qeverisjes, janë kampionet zyrtarë të Kosovës në qeverisjen e mirë, në transparencë buxhetore financiare, në realizim të projekteve, në realizimin e projekteve kapitale edhe në përmirësimin e dukshëm jo vetëm të infrastrukturës që tashmë është evidente po edhe në ofrimin e shërbimeve shumë më efikase edhe ndihmës për të gjitha kategoritë e shoqërisë”, theksoi Krasniqi.

Ndërsa, kryetari i Komunës së Mitrovicës, Bedri Hamza tha se Qeveria Kurti përgjatë mandatit të saj nuk ka mbështetur realizimin e asnjë projekti në këtë komunë.

“Katër vjet qeverisje, një shirit të një projekti kapital në Mitrovicë mos me e pre si rezultat i financimit të nivelit qendror, nuk është mirë”, shtoi Hamza.

Gjatë vizitës së tij në Komunën e Mitrovicës, Krasniqi përcolli nga afër punimet për ndërtimin e Ambulantës së Mjekësisë Familjare në Koshtovë, ato në rrugën “Dëshmorët e Kombit” në lagjen Shipol dhe në rrugën “Mbretëresha Teutë”, hapësirën ku po ndërtohet shëtitorja që lidh shëtitoren e qytetit dhe shëtitoren e Liqenit Akumulues, si dhe punimet e Ballkonit Panoramik të qytetit.

Kryeministri Albin Kurti, priti sot në takim përfaqësuesin e Norvegjisë për Ballkanin Perëndimor, Haakon Blankenborg, me të cilin bisedoi për punën e qeverisjes, situatën e sigurisë dhe dialogun me Serbinë.

Kurti shprehu falënderimin për mbështetjen e vazhdueshme të shtetit të Norvegjisë për zhvillimin dhe integrimin e Kosovës në organizatat euro-atlantike.
Ai tha se luftimi i korrupsionit është përkthyer në zhvillim ekonomik dhe përparim demokratik të vendit, duke u bërë kështu kampione e demokracisë në rajon. Pasi prezantoi strategjinë 2022-2030 në fushën e energjisë, Kurti ftoi për investime të Norvegjisë në Kosovë, të cilat do të forcojnë më shumë marrëdhëniet bilaterale.

Në takim u bisedua edhe mbi situatën e sigurisë dhe dialogun me Serbinë për normalizim të plotë të marrëdhënieve, me ç ‘rast kryeministri Kurti theksoi se pas sulmit terrorist e paramilitar, të inspiruar, përgatitur e sponsorizuar nga Serbia, është e rëndësishme që të shtohet siguria në kufirin me Serbinë.

Ndërkaq, për sa i takon dialogut, Kurti vijoi duke i dhënë theks rëndësisë, që marrëveshja e arritur këtë vit në Bruksel dhe Aneksi në Ohër të nënshkruhet, pranohet, respektohet dhe zbatohet nga Serbia në tërësi, sidomos pas deklarimit të hapur tash së fundmi nga Serbia për mosrespektim të tyre e deri te mosnjohja e integritetit territorial të Kosovës, që paraqet kërcënim të hapur për ne.

Koalicioni i OJQ-ve për Mbrojtjen e Fëmijëve në Kosovë (KOMF) ka mirëpritur miratimin e Projektligjit të ri për shërbime sociale dhe familjare në Kuvendin e Kosovës. Në konferencë për media, KOMF në emër të 35 organizatave anëtare prezantoi qëndrimin e koalicionit, derisa u tha se ky projektligj do të ndikojë në përmirësimin e gjendjes së fëmijëve.

Drejtoresha ekzekutive e KOMF-it, Donjeta Kelmendi tha se si koalicion bashkë me organizatat anëtare të koalicionit, kanë arritur të përfshijnë në këtë ligj vizionin e organizatave për të ardhmen e shërbimeve sociale.

Kelmendi potencoi se Ligji i ri për shërbime sociale dhe familjare sjell shumë risi, duke përfshirë rritjen e gamës së shërbimeve, fuqizimin e shërbimeve të parandalimit, themelimin e shërbimeve të reja të parandalimit dhe fuqizimin e shërbimeve të mbrojtjes.

Ajo shtoi se hartimi i këtij projektligjit ishte një proces i gjatë prej pesë viteve, për çka tregoi se ishin pjesë e grupit punues dhe pjesë integrale e gjithë procesit përgjatë hartimit.

“Jemi shumë të lumtur që Kuvendi miratoi ligjin e ri për shërbime sociale dhe familjare, proces ky i pritur tashmë e sa kohë…Si koalicion bashkë me organizatat anëtare të koalicionit kemi arritur të përfshijmë në këtë ligj vizionin e organizatave për të ardhmen e shërbimeve sociale. Miratimi i këtij ligji hap zyrtarisht rrugën drejt reformës së shërbimeve sociale dhe familjare. Hartimi i projektligjit ishte një proces i gjatë prej pesë viteve ku ne ishim pjesë e grupit punues dhe pjesë integrale e gjithë procesit për gjatë hartimit…Në këtë rrugëtim si shoqëri civile ishim bashkë me institucionin e avokatit të popullit dhe ishim bashkë edhe me asociacionin e qendrave për punë sociale në Kosovë duke unifikuar qëndrimet tona dhe duke shtyrë këtë proces bashkërisht dhe me propozime të cilat i ofruam për avancimin e shërbimeve sociale në Kosovë…Ligji i ri për shërbime sociale dhe familjare sjellë shumë risi në fushën e shërbimeve sociale dhe familjare. Fillimisht bën rritjen e gamës së shërbimeve duke fuqizuar shërbimet e parandalimit, themelimin e shërbimeve të reja të parandalimit, por edhe fuqizimin e shërbimeve të mbrojtjes”, tha Kelmendi.

Ndër të tjera, drejtoresha e KOMF-it, Donjeta Kelmendi, tha se ky projektligj parasheh krijimin e një skeme të hapur të ofrimit të shërbimeve sociale në mes të ofruesve publik, jo qeveritar dhe atyre privat. Ajo shtoi se me rritjen e ofrueseve të shërbimeve sociale, pritet që rritet edhe cilësia dhe konkurrenca, për çka tha s këto shkojnë në dobi të fëmijëve dhe familjeve në nevojë.

Ndërkaq, drejtoresha në SOS Fshatrat e Fëmijëve në Kosovë, Remzije Krasniqi tha se e kanë pritur me mjaftë gëzim miratimin e këtij ligji.

Ajo shtoi se miratimi i këtij ligji paraqet moment që shënon një rrugëtim për të përmirësuar dhe për të rritur cilësinë e shërbimeve sociale, por që sipas saj ndikon edhe në mirëqenien e fëmijëve, të rinjve dhe të rriturve që ajane në nevojë sociale.

“Për ne si organizatë SOS fshatrat e fëmijëve e kanë pritur me mjaftë gëzim lajmin e aprovimit të Ligjit për Shërbime Sociale dhe Familjare. Një moment që shënon një rrugëtim për të përmirësuar dhe për të rritur cilësinë e shërbimeve sociale, por edhe për të ndikuar në mirëqenien e fëmijëve, të rinjve dhe të rriturve që janë në nevojë sociale. Për ne sigurisht si organizatë dhe pjesë e KOMF është shumë me rëndësi që në këtë proces kemi qenë të përfshirë dhe përveç përfshirjes ka qenë edhe propozimet dhe rekomandimet e ardhura nga organizata që ofrojnë shërbime të tilla direkte 24 orëshe në forma dhe mbulueshmëri territoriale kanë qenë të pranueshme dhe janë konsideruar dhe përfshirë në këtë ligj. Kjo sigurisht që do të garantoj edhe jo vetëm ushtrimin e të drejtës së tyre për shërbime më të mirë, por do të garantojë edhe avancimin dhe mirëqenin e të gjithë fëmijëve në rrezik”, theksoi Krasniqi.

Po ashtu, edhe drejtoresha në organizatën për Fëmijët pa Kujdes Prindëror (OFAP), Ibadete Krasniqi u shpreh e lumtur për aprovimin e Ligjit për Shërbime Sociale dhe Familjare.

Miratimin e këtij ligji, Krasniqi e quajti jashtëzakonisht pozitiv, për faktin se për herë të parë u aprovua forma e mbrojtjes së fëmijëve pa kujdes prindëror, për strehimin familjar.

“Edhe ne si organizatë për fëmijët pa kujdes prindëror jemi jashtëzakonisht të lumtur që më në fund u aprovua ligji i shërbimeve sociale dhe familjare…Çka është jashtëzakonisht pozitive është që për herë të parë aprovohet tek forma e mbrojtjes së fëmijëve pa kujdes prindëror për strehimin familjar. Për herë të parë njihet që të gjitha familjar strehuese që e ofrojnë këtë shërbim janë ofrues të shërbimeve. Është shumë pozitive, sepse tani do të fillojë edhe ndryshimi, ku do të kemi mundësi që të bëjmë edhe familje të specializuara për shkak që nevoja për vendosje të fëmijëve pa kujdes prindëror me probleme të shumta të bëhet edhe karshi specializimit të këtyre familjeve që janë të gatshme që të kujdesen 24 orë në 7 për fëmijët…Ne bashkërisht si ofrues të shërbimeve në bashkëpunim të ngushtë me nivelin lokal dhe nivelin qendror na jep sinjal që duhet patjetër që të punohet sa më shpejt në udhëzimet administrative”, potencoi Krasniqi.

Ligji i ri për Shërbime Sociale dhe Familjare sjell disa risi të cilat përfshijnë:

Rritjen e gamës së shërbimeve, themelimin e shërbimeve të reja duke përcaktuar shërbimet e parandalimit, mbrojtjes, rehabilitimit dhe re-integrimit, si dhe duke i klasifikuar shërbimet në tri kategori primare, sekondare dhe terciare, duke garantuar kështu të drejtën në shërbime sociale për të gjithë fëmijët dhe personat në nevojë për shërbime sociale, pa marrë parasysh nivelin e urgjencës apo rrezikshmërisë;

Krijimin e një skeme të hapur të ofrimit të shërbimeve sociale në mes të sektorit publik, jo qeveritar dhe atij privat. Skema e hapur dhe e qëndrueshme e ofrimit të shërbimeve sociale në mes të institucioneve publike, sektorit jo qeveritar dhe privat, ofron mundësi për gamë më të gjerë të ofrimit të shërbimeve sociale, shërbime të specializuara dhe më cilësore;

Zhvillimin dhe fuqizimin e shërbimeve në familje dhe shërbimeve me bazë në komunitet, zgjerimin e formave të mbrojtjes, konkretisht zhvillimin e strehimit familjar pas arritjes së moshës 18 vjeçare zhvillimin e formës së re të mbrojtjes “Jetesa e pavarur e mbikëqyrur”;

Ndarjen e përgjegjësive të institucioneve të nivelit qendror dhe komunal, për të shmangur paqartësitë rreth themelimit të shërbimeve sociale, menaxhimit, monitorimit dhe inspektimit;

Ndarjen e funksionit të inspektimit dhe monitorimit, fuqizimin e inspektimit përmes dhënies së kompetencave ekzekutive, përcaktimin e masave, gjobave dhe sanksioneve si dhe ofrimin e kapaciteteve të nevojshme për kryerjen e funksioneve të kërkuara;

Rregullimin ekontraktimit të shërbimeve sociale dhe familjare;

Ligji i ri për shërbime sociale dhe familjare është aprovuar dje (e enjte) nga Kuvendi i Republikës së Kosovës./kp

Kryeministri i Republikës së Kosovës, Albin Kurti, ka pritur sot në takim ambasadorin e Francës në Prishtinë, Olivier Guerot, raporton Gazeta Sinjali.

Zyra e Kryeministrit njofton se në takim është diskutuar rreth nismave dhe bashkëpunimeve të mundshme në fushën e arsimit e teknologjisë së informacionit bazuar në përvojat e shtetit francez, si dhe për mundësitë që ofron Kosova dhe planet në zbatim të Qeverisë në sektorin e energjisë, përkatësisht në atë të burimeve të ripërtëritshme të energjisë.

“Ata folën Gjatë bisedës, u trajtuan edhe temat e zhvillimet aktuale, që përfshijnë mbarëvajtjen e deritanishme të procesit të konvertimit të targave ilegale dhe regjistrimit të veturave me targa RKS dhe procesi që parashihet me udhëzimin administrativ për zgjedhje të parakohshme në katër komunat në veri të vendit”, thuhet në komunikatë.

Kujtojmë se para Guerot, Kurti priti në takim edhe zyrtarët amerikanë, ambasadorin e Shteteve të Bashkuara të Amerikës në Prishtinë, Jeffrey Hovenier dhe drejtoreshën për Çështje të Evropës Qendrore dhe Jugore në Departamentin e Shtetit Amerikan, Collen Hyland.

Veriu dhe juglindja e Shqipërisë janë përfshirë nga reshje të dendura të borës. Flokët e bardhë kanë sjellë pamje magjepsëse nga zonat turistike në Korçë.

Bardhësia që ka mbuluar Dardhën, Voskopojën dhe Vithkuqin e më tej sjellin imazhe të rralla.

Pas situatës së krijuar në nëntor ku kompanitë e pastrimit të rrugëve u gjetën të papërgatitur, këtë radhë borëpastrueset kanë punuar edhe gjatë natës për të mbajtur hapur rrugët

I gjithë territori i Qarkut Kukës gjatë gjithë natës ka qenë i përfshirë nga reshje shiu dhe në lartësinë mbi 700 m reshje bore.

Mëngjesi i kësaj të premte e ka gjetur Shishtavecin deri në 30 centimetra borë. Edhe Valbona u mbulua nga velloja e bardhë që në orët e para kapërceu pesë centimetra.

Ndërsa bora thërret për më shumë turistë që kërkojnë të shijojnë pamjet e mbuluara me të bardhë, nga ngrohtësia e oxhakut që ofrojnë shtëpitë e pushimit, në rrugë vijon kontrolli me mjete.

Kriposja e akseve dhe largimi i borës ka bërë të mundur që qarkullimi të vijojë normalisht dhe pa pengesa.

Megjithatë në zonat e përfshira nga ngricat policia apelon të përdoren zinxhirët./OraNews