ATV

Author: ATVLive

  • SBAShK kërkon rrogën e 13 për mësuesit më të dalluar

    SBAShK kërkon rrogën e 13 për mësuesit më të dalluar

    Në muajin janar të vitit 2021 është nënshkruar kontrata e fundit kolektive në arsim mes Ministrisë së Arsimit dhe Sindikatës së Bashkuar për Arsim, Shkencë dhe Kulturë.

    Rrahman Jasharaj, kryetar i SBASHK-ut thotë se në janarin e vitit 2024 duhet të fillojnë bisedat për kontratën e re.

    “Validiteti i kontratës aktuale vlen së paku deri në janarin që po vjen sepse me ligjin e Punës, çdo tre vjet duhet përtri dhe nënshkruar kontrata e re. Të dy palët janë të obliguara me ligj që të ulen dhe të bisedojnë për kontratën. Edhe pse në kontratën e kaluar shkruan se është me afat të pacaktuar, palët do të ulen të bisedojnë për ndonjë shtim apo aneks apo nen të ri dhe besoj që përkundër fërkimeve që i kemi, zonja Nagavci do e respektoj obligimin ligjor dhe do të formoj komisionin e vet” – deklaroi Jasharaj.

    SBASHK-u, për kontratën e re kanë një kërkesë të veçantë.

    “Do të filloj, po them në mënyrë figurative, një betejë e vërtetë për një kontratë edhe më të mirë. Në përgjithësi jemi të kënaqur me ato që i kemi por do të insistoj që për ata që janë më të dalluarit në sistemin arsimor dhe që dallohen me arritje, qoftë klasa e tyre, qoftë ata me profesion që ta kenë edhe pagën e trembëdhjetë si shpërblim për punë. Kjo nuk do të ju takoj të gjithëve por vetëm atyre që dallohen”- shtoi Jasharaj.

    Kjo bëhet që të nxiten mësimdhënësit të arrijnë rezultate më të mira dhe të jetë një lloj gare në mënyrë që ta fitojnë pagën e 13-të.

  • ​Shpallet i pafajshëm pasi kaloi gati 50 vjet në burg për vrasje që nuk e kishte kryer

    ​Shpallet i pafajshëm pasi kaloi gati 50 vjet në burg për vrasje që nuk e kishte kryer

    Një burrë që kaloi gati 50 vjet burg për vrasje është shfajësuar nga një gjykatës – duke u bërë i burgosuri që ka qenë i burgosur për kohën më të gjatë i cili pastaj shpallet i pafajshëm për një krim.

    Glynn Simmons, 71 vjeç, u lirua në korrik pasi prokurorët ranë dakord që provat kryesore në rastin e tij nuk iu dorëzuan avokatëve të tij mbrojtës.

    Gjyqtarja e qarkut të Oklahomas, Amy Palumbo e shpalli atë të pafajshëm të martën.

    “Kjo gjykatë konstaton me prova të qarta dhe bindëse se vepra për të cilën z. Simmons u dënua dhe u burgos… nuk është kryer nga z. Simmons”, thuhet në vendim.

    Z. Simmons tani ka të drejtë për deri në 175.000 dollarë si kompensim nga shteti për dënim të gabuar.

    Vendimi gjithashtu hap derën për një padi federale kundër Oklahoma City dhe zbatimit të ligjit të përfshirë në arrestimin dhe dënimin e Simmons, tha të mërkurën avokati mbrojtës Joe Norwood.

    Z. Simmons aktualisht po jeton me donacione ndërsa po trajtohej për kancerin që u zbulua pas lirimit të tij nga burgu.

    Z. Simmons kreu 48 vjet, një muaj e 18 ditë burg pas dënimit të tij, duke e bërë atë të burgosurin për kohën më të gjatë në SHBA që u shfajësua, sipas të dhënave të mbajtura nga Regjistri Kombëtar i Shfajësimeve.

    Ai e kishte mbrojtur gjithmonë pafajësinë e tij, duke thënë se ishte në Luiziana në kohën kur Carolyn Sue Rogers u vra brenda një dyqani pijesh alkoolike Edmond në 1974.

    Z. Simmons dhe i bashkëpandehuri Don Roberts u dënuan të dy në vitin 1975 për vrasjen dhe fillimisht u dënuan me vdekje.

    Dënimet e tyre u reduktuan në burgim të përjetshëm në vitin 1977 pas vendimeve të Gjykatës së Lartë të SHBA në lidhje me dënimin me vdekje.

    Roberts u lirua me kusht në vitin 2008.

  • Nënshkruhet kontrata 263 mijë euro për këpucat standarde të policisë

    Nënshkruhet kontrata 263 mijë euro për këpucat standarde të policisë

    Tenderi që peshon 263 mijë euro do t’i sigurojë Policisë së Kosovës 10 mijë palë këpucë. Kontrata është nënshkruar më 14 dhjetor me kompaninë vendase “Solid”.

    Policia e Kosovës do të furnizohet më 10 mijë palë këpucë të reja së shpejti.

    Kështu thotë kontrata e nënshkruar më 14 dhjetor, e cila është publikuar në faqen zyrtare të Komisionit Rregullativ të Prokurimit Publik.

    Ato do të punohen nga ndërmarrja vendore për prodhimin e këpucëve “Solid”, kompani kjo e cila e ka bazën në Suharekë sipas Sinjalit.

    Për këtë prokurim publik, Policia e kishte parashikuar vlerën e kontratës prej 265 mijë eurove, po firma suharekase e këpucëve e ka ofruar çmimin me të ulët, atë prej 263 mijë eurove.

  • Kurti, Çeku dhe Tërnava vizitojnë xhaminë e Çarshisë së Novobërdës

    Kurti, Çeku dhe Tërnava vizitojnë xhaminë e Çarshisë së Novobërdës

    Kryetari i Bashkësisë Islame të Kosovës, Myftiu Naim Tërnava me bashkëpunëtorë, së bashku me kryeministrin e Kosovës, Albin Kurtin dhe ministrin e Kulturës, Rinisë dhe Sportit, Hajrulla Çeku, vizituan xhaminë e “Osman Efendiut” apo Xhaminë e Çarshisë së Novobërdës, për të parë nga afër punimet në restaurimin e kësaj xhamie, ka njoftuar BIK’u, të mërkurën.

    “Xhamia e “Osman Efendiut” është rikonstruktim i shekullit XVIII dhe është në proces të restaurimit që nga fundviti i kaluar. Procesi i restaurimit është duke u mbështetur nga BE-ja dhe duke u implementuar nga zyra e UNDP-së në Kosovë”.

    “Ajo është ndër së paku pesë xhamitë sa ishin ndërtuar në periudhën osmane, 1455, shek. XX në qytetin e Novobërdës”, thuhet në njoftim.

  • Ibishi: Vlerësimet se në Kosovë ekziston rreziku për kërcënime, janë reale

    Ibishi: Vlerësimet se në Kosovë ekziston rreziku për kërcënime, janë reale

    Eksperti i sigurisë, Nuredin Ibishi, në emisionin CONTEXT në ATV, tha se vlerësimet nga qarqet e ndryshme se në Kosovë ekziston rreziku për kërcënime, janë reale.

    “Këto vlerësime që vijnë nga qarqet edhe lokale, nacionale por edhe rajonale, por gjithashtu dhe nga sekretari i Përgjithshëm i NATO-s dhe përgjithësisht liderët e Bashkimit Evropian, sidomos përfaqësuesit për politikë të jashtme dhe siguri e SHBA-ve në veçanti që vlerësojnë situatën, mendoj që ende është një rrezik potencial dhe mirë është edhe lidershipi i ynë pra ka ngritë vëmendjen në kuptim të paralajmërimit të rreziqeve dhe kërcënimeve që janë reale pa marrë parasysh që situata duket që është e qetë dhe stabile”, tha Ibishi.

    Sipas tij, presidenti i Serbisë është një promotor dhe pasardhës i Millosheviqit, i cili me ideologjinë e tij të re, po e mban në tension Bosnjë Hercegovinën, Kosovën dhe Malin e Zi.

    “Presidenti i një vendi fqinj vazhdon të jetë një promotor, një pasardhës i Millosheviqit në kuptim tash që ky i një ideologjie të re që po mban në sistem edhe Bosnjë Hercegovinën në një sistem tensioni me ekstremist Dodik, por edhe Kosovën me gjithë atë luftën hibride çfarë tentoi ta bëjë me grupin e Rdojiçiqit, por njëkohësisht edhe Malin e Zi me bllokun pro rus”, tha Ibishi.

    Ai tha se Serbia po e shfrytëzon politikën e perëndimit për të mbajtur vendet e Ballkanit larg Lindjes, dhe se Kosova në këtë situatë gjendet në një pozicion më të pa definuar.

    “Serbia po e shfrytëzon këtë balancë apo këtë mbajtjen në sistem kur e ka shpallë neutralitetin edhe ndaj perëndimit apo NATO-s por edhe ndaj Lindjes, Rusisë, është armatosë gjithandej e ka bërë një debalancë të kuptimit të shtimit të forcave, pajisjeve duke u armatosë edhe sipas standardeve të NATO-s por njëkohësisht edhe nga Lindja, pra Rusia, mandej Kina dhe vende tjera, pra edhe Irani”, tha Ibishi. /atvlive.tv

  • Gashi: Perëndimi po e humb durimin karshi obstruksionit politik që po e bën Serbia

    Gashi: Perëndimi po e humb durimin karshi obstruksionit politik që po e bën Serbia

    Kosova ishte në qendër të mesazhit të fund-vitit, të Sekretarit të Përgjithshëm të NATO-s, Jens Stoltenberg, teksa foli për tensionet në Ballkanin Perëndimor. Duke folur për rëndësinë e ruajtjes së paqes në kohën kur, siç tha, bota është më e rrezikshme, Stoltenberg falënderoi ushtarët e KFOR-it.

    “Muajin e kaluar, takova trupat e NATO-s në veri të Kosovës. Ndihma në ruajtjen e një mjedisi të qetë dhe të sigurt për të gjithë në Kosovë është çelës i stabilitetit të gjerë, në të gjithë rajonin e Ballkanit Perëndimor”, tha Stoltenberg.

    Duke komentuar këtë deklaratë të kreut të NATO-s, profesori Ibrahim Gashi, në emisionin CONTEXT në ATV, tha se kjo dëshmon se po i vie fundit durimit të perëndimit karshi obstruksionit politik që po e bën Serbia ndaj paqes dhe rendit ndërkombëtarë.

    “Deklarata e sotme e Stoltenberg që do të thotë edhe takimi i ministrave të Jashtëm dhe vendimet për rritjen të shkalles së angazhimit të KFOR-it në komunat veriore, flasin se tashmë nuk është dhe nuk është që nuk e ka ditur perëndimi se cila është Serbia e vërtetë, por thjeshtë ka qenë politika e tillë e mbajtjes në njëfarë mënyrë të një balance në raportet Kosovë – Serbi e ndonjëherë duke e rënduar stegën nga Kosova, duke e mbajtur Kosovën nën sanksione dhe duke mos nxjerrë sanksione për një agresion të hapur. Mendoj që mund të lexohet edhe se po i vie fundi i këtij lloj durimi të perëndimit karshi këtij obstruksionit politik që po e bën Serbia ndaj paqes dhe rendit ndërkombëtarë në pjesën e Evropës ku ajo është aktive”, tha Gashi.

    Ai komentoi edhe zgjedhjet e fundit në Serbi, për të cilat tha janë shumë dekurajuese për bashkësinë ndërkombëtare.

    “Sigurisht që zhvillimet e fundit në Serbi janë shumë dekurajuese për bashkësinë ndërkombëtare, për pjesën e shteteve demokratike të Evropës dhe përgjithësisht të botës për shkak se atje kem një proces zgjedhor jo demokratik tashmë të konstatuar si të tillë nga vëzhgues ndërkombëtarë dhe rrjedhimisht mendoj që Serbia çdo ditë e më shumë, në njëfarë mënyrë, politika zyrtare serbe, çdo ditë e më shumë po demaskohet në sy të opinionit perëndimor se nuk po lëvizë drejtë një evolumi pozitiv që do të mund të quhej edhe si rezultat i asaj përkëdhelje që ia ka bërë deri tash bashkësia ndërkombëtare ose të përmbushte pritjet e bashkësisë ndërkombëtare për të ndryshu politika serbe sa i takon proceseve integrative, ruajtjes së paqes në rajon. Mendoj që sa më shumë të vazhdojë kështu, kjo do ta ndërgjegjësojë më shumë perëndimin”, theksoi Gashi. /atvlive.tv

    Emisionin e plotë e gjeni në videon më poshtë:

  • Ish ministri i Mbrojtjes, Bejtush Gashi: Situata në Kosovë është jashtëzakonisht e qetë, nuk ka vend për panik

    Ish ministri i Mbrojtjes, Bejtush Gashi: Situata në Kosovë është jashtëzakonisht e qetë, nuk ka vend për panik

    Ish ministri i Brendshëm, Bejtush Gashi, në emisionin CONTEXT në ATV, duke komentuar deklaratën e kreut të NATO-s, Jens Stoltenberg, i cili në mesazhin e fund vitit përmendi edhe Kosovën, vlerësoi se situata e krizës në vend është qetë dhe se nuk ka vend për panik.

    “Deri tani, reagimi i shpejtë, përforcimi i trupave të misionit të NATO-s në ato komuna, në mënyrë të drejtpërdrejtë kanë ndikuar që tensionet të ulen, të krijohet një situatë më e favorshme për të gjithë ata që jetojnë atje pa përjashtim dhe mbështetur në vendimet që Qeveria e Kosovës ka marrë, për faktin se për kundër lëshimeve që ka pasur në disa procese, situata e krizës në ato pjesë është menaxhuar jashtëzakonisht mirë dhe si rezultat i një bashkëpunimi me misionet ndërkombëtare atje, misionin e NATO-s dhe EULEX-it, aktualisht situata është jashtëzakonisht e qetë dhe mund të themi se nuk ka vend për panik”, tha ish-ministri Gashi.

    Megjithatë, deklaratat e fundit për çështjen e sigurisë në Kosovë, sipas tij krijojnë shqetësime tek opinioni publik fillimisht si dhe në rrafshin ndërkombëtar,

    “Të gjitha deklaratat që po jepen kohëve të fundit krijojnë një shqetësim në opinionin publik që mund të ketë impakt në ambientin e sigurisë në Republikës së Kosovës. Ky impakt përpos që ka ndikim të drejtpërdrejt të qytetarët, mund të ketë ndikim edhe në rrafshin ndërkombëtar, sepse mund të hezitojnë edhe investitorët potencial që janë të interesuar që të investojnë në Kosovë dhe aty ku nuk ka stabilitet, pastaj mungon interesimi për investimin”, tha Gashi. /atvlive.tv

    Emisionin e plotë e gjeni në videon më poshtë:

  • Grabitje në një pompë derivatesh: Hajnat e armatosur s’arrijnë të kapin shumë para – ikin me monedha metalike

    Grabitje në një pompë derivatesh: Hajnat e armatosur s’arrijnë të kapin shumë para – ikin me monedha metalike

    Pompat e derivateve jo rrallëherë janë cak i hajnave. Kjo dukuri po krijon pasiguri dhe frikë si për qytetarët ashtu edhe për punëtorët që punojnë në këto biznese. Një rast i tillë ka ndodhur edhe mbrëmë pas mesnate në pompën e derivateve ‘Veda Petrol’ në rrugën “Agim Bajrami” në Kaçanik, raporton Gazeta Sinjali.

    Sinjali mëson se dy persona ende të paidentifikuar kanë hyrë brenda dhe nën kërcënimin e armëve kanë kërkuar të holla nga punëtorët.

    Por, sipas informacioneve të para, hajnat nuk kanë arritur të ‘avullojnë’ para nga arka e pompës, por kanë kapur vetëm disa monedha metalike, që ua kanë gjetur punëtorëve.

    Me t’u denoncuar rasti, Policia ka dalë në vendin e ngjarjes ku kanë kryer ekzaminimet e nevojshme që ndihmojnë në zbardhjen e rrethanave të rastit.

    Në kuadër të veprimeve hetimore janë intervistuar dy punëtorë të kompanisë, të cilët kanë deklaruar se të dyshuarit menjëherë pas kryerjes së veprës janë larguar me shpejtësi për në drejtim të panjohur.

    Me urdhër të Prokurorit të Shtetit, rasti është cilësuar ‘Grabitje’, teksa veprimet tjera ligjore do merren posa të kapen të dyshuarit.

  • “Gjuetarët” e zhavorrit, “vrasës” të lumenjve

    “Gjuetarët” e zhavorrit, “vrasës” të lumenjve

    Përgatiti: Armand Hoti

    I vendosur në fshatin Zupç të Zubin Potokut, ky separacion i palicencuar i rërës dhe zhavorrit ndërpreu aktivitetin së fundmi.

    Në mënyrë që ky seperacion të funksiononte u desh të degradohej shtrati i lumit Ibër meqë nga aty furnizohej me resurse.

    Komisioni i Pavarur për Miniera dhe Minerale, kishte lëshuar disa herë urdhër për ndërprerjen e aktivitetit të këtij separacioni, por nuk u respektua.
    Ndërkaq, kështu duket lumi Ibër në muajin dhjetor.

    Referuar dosjeve të KPMM-së, i njëjti operator ilegal, vetëm gjatë këtij viti, është përfshirë katër herë në aktivitete ilegale, të shfrytëzimit dhe të përpunimit të resurseve minerare, në fshatin Zupç.

    KPMM-ja konfirmoi për ATV-në, se operatori i vetëm ilegal i evidentuar në këtë zonë është ai i personit fizik, I.M. Sipas njohësit të çështjeve mjedisore, Faton Berisha, degradimi i lumenjve për eksploatim, si dukuri, mes tjerash, rezulton me fatkeqësi natyrore.

    Pasojat e asaj po i vuajmë në çdo vit, po ndodhin vërshime ku ka lumenj, ku ka vendbanime, pikërisht për këtë arsye sepse është prishur rrjedha natyrore e lumit”, tha Berisha.

    Bazuar në të dhënat e raportit të publikuar nga Agjencia për Mbrojtjen e Mjedisit të Kosovës në vitin e kaluar, lumi më i degraduar në Kosovë, është Drini i Bardhë.
    Sipas raportit, lumenjtë e tjerë të prekur nga degradimi, janë Lumbardhi i Pejës, Ereniku dhe të tjerë më të vegjël.

    “Këtu ka ndodhur eksploatim i zhavorrit, ka ndërruar rrjedha e lumit, janë zhdukur lloje të peshqve, lloje të tjera shtazore, janë zhdukë lloje bimore, tani po i vuajmë pasojat pikërisht për këtë arsye, sepse është prishur rrjedha natyrore e lumit… Me një fjalë mund ta përmbledh se kemi bërë ekocid”, tha Berisha.

    AMMK-ja konstaton se sipërfaqja e lumenjve të degraduar, nga viti 2008 deri në atë 2018, është mbi 1760 hektarë.

  • Dëgjim i përgjithshëm publik, qytetarët ankohen për shumë çështje në kryeqytet

    Dëgjim i përgjithshëm publik, qytetarët ankohen për shumë çështje në kryeqytet

    Përgatiti: Donisa Fazliu

    Ankesat që kishin, i shpalosën para kryetarit e zyrtarëve të tjerë të komunës së Prishtinës. Kështu, dhjetëra përfaqësues të lagjeve e fshatrave, u bënë bashkë në diskutimin e përgjithshëm publik me qytetarë.

    “Është problem me ashensorë, në banesën përballë meje e kemi një person që është me karrocë dhe banon në katin e katërt, ne kemi bërë kërkesa në komunë, na kanë thënë që do të shqyrtohet, por asnjë gjë nuk është ndërmarrë, kur pritet të rregullohet”, tha një qytetar.

    “Problemi ynë është me mungesë të parkingut, do të ishte mirë që në Dragodan te hekurudha mu afru, që njerëzit mos me pritu me ardhë deri në periferi në qendër, për shkak që po shkaktohet shumë komunikacion, janë edhe mbeturinat që po na shkaktojnë shumë probleme, ju lutemi që të ndërmerrni diçka”, tha një qytetar tjetër.

    Për gjithë këto ankesa të qytetarëve, kryetari Përparim Rama dhe përfaqësuesit e drejtorive përkatëse dhanë përgjigje, derisa premtuan edhe zgjidhje të problemeve.
    “Besoj e keni parë që një numër i madh i pjesëve që kanë qenë në qendër i kemi ndërlidhë, kemi ende punë dhe besoj që aspekti i bizneseve aty do të ketë një pakt pozitiv”, tha Rama.

    Javë më parë, Komuna e Prishtinës ka lansuar platformën e ankesave, përmes të cilës qytetarët në mënyrë elektronike kanë mundësi të adresojnë problemet e tyre.