Puna e një anesteziologut që të shlyejë vetëdijen, të eliminojë dhembjen dhe të mobilizojë trupin gjatë operacionit kërkon procedurë.
Sipas drejtorit të klinikës së anesteziologjisë, Gazmend Spahiu, krahas numrit të pacientëve, 48 anesteziolog sa ka Qendra Klinike Universitare nuk mjaftojnë.
Për t’i kryer të gjitha nevojat e pacientëve, Spahia thotë se duhet të jenë së paku 100 anesteziologë.
Krahas mungesës së anesteziologëve, në këtë klinikë janë vetëm 195 infermierë, përfshirë edhe personelin mbështetës.
Arsyet e mungesës së personelin shëndetësorë në përgjithësi konsiderohet të jetë angazhimi në klinika private dhe largimi jashtë vendit.
Sportistët dhe trajnerët, që kontribuuan për sportin gjatë kohës së ish-regjimit në Kosovë, me hyrjen në fuqi të projektligjit do gëzojnë edhe të drejtën për kompensim financiar.
Megjithatë, referuar projektligjit, kompensimi do bëhet me kusht që ata nuk përfitojnë të hyra të tjera të rregullta.
“Sportistët dhe trajnerët të cilët kanë ofruar kontributin e tyre në fushën e sportit gjatë periudhës së okupimit të Kosovës nga data 23 mars 1989 deri më 11 qershor 1999 kanë të drejtë për kompensim financiar për kontributin e tyre, me kusht që nuk përfitojnë të hyra të tjera të rregullta”, thuhet në Projektligjin për Sport.
Sipas zëvendësministres së Kulturës, Rinisë dhe Sportit, Daulina Osmani, procedurat e tjera për të fituar kompensimin, do të rregullohen përmes akteve nënligjore.
“Tashmë kemi krijuar bazë e cila më në detaje do të shtjellohet edhe përmes akteve nënligjore të cilat do të hartohen në momentin që ligji do të votohet në parlament”, tha Osmani.
Ish-futbollisti Alban Krasniqi duke e mirëpritur projektligjin thotë se është koha që shteti t’u jep kreditet e merituara sportistëve të asaj epoke.
“Sinqerisht janë të lënë pas dore, janë në gjendje jo të mirë financiare, për atë arsye duhet bërë ç’mos nga organet kompetente nga Ministria e Sportit, por edhe shteti në përgjithësi që të mendojnë pak më shumë për gjeneratën e artë edhe gjeneratën që i bëri ballë regjimit të atëhershëm edhe kanë dhënë një kontribut shumë të madh”, tha Krasniqi.
Projektligji në fjalë pritet të hidhet për votim në Kuvend javët në vazhdim.
Më shumë detaje i gjeni në Edicionin Qendror të lajmeve në videon më poshtë:
Gjatë kontrollit rutinor në njërën nga rrugët e Gjilanit, zyrtari policor Jeton Daku ndaloi prokurorin e shtetit Agron Uka të cilit ia shqiptoi një gjobë për kundërvajtje në trafik.
Pas këtij rasti, polici gjilanas aludoi se nga eprorët u qortua, për çka pastaj shprehu shqetësim te këshilltari komunal, Ismajl Kurteshi.
Kështu, ish-deputeti i kuvendit, vendosi që Dakun ta propozojë për t’u nderuar me titullin qytetar nderi.
“Si qytetar e si këshilltar komunal, që besoj se ligji duhet të jetë mbi seccilin… në seancën e radhës të kuvendit do propozoj që policit ti jepet mirënjohje…”, tha Kurteshi.
Propozimi pritet të trajtohet me seriozitet nga kuvendi komunal.
“Në seacën e radhës ne do ta shqyrtojmë. Por, sigurisht se do t’i marrim parasysh qëndrimet e të gjitha palëve…”, tha kryesuesi i Kuvendit Komunal, Kushtrim Kadriu.
Titulli “Qytetar Nderi” është më i larti që mund t’i jepet një personaliteti të shquar për kontribut të veçantë në ndonjë fushë.
Nxënës ka aq shumë sa që zor iu bëjnë vend. Kështu në shkollën fillore “Mihal Grameno” në Fushë-Kosovë, u desh të aktivizoheshin 4 ndërrime, e një pjesë të nxënësve t’i sistemojnë në anekse tjera që të mund t’iu bënin zgjidhje të gjithë nxënësve e regjistruar.
Kjo është një sfidë e madhe për drejtorinë e shkollës.
Përveç hapësirës, problem tjetër për ta është edhe mungesa e mësimdhënësve.
Megjithatë, ky problem prek më shumë Drejtorinë e Arsimit, të cilët përkundër nevojës e kanë të pamundur të angazhojnë mësimdhënës të rinj.
Krejt kjo, sipas DKA-së, vjen për shkak të mosregjistrimit të popullsisë, meqë në këtë komunë besohet se jetojnë trefish më shumë qytetarë sesa figurojnë të regjistruar.
Ai, thotë Berisha, është edhe shkaku kryesor që komuna nuk po mund të investojë në objekte të reja shkollore.
Sipas regjistrimit të fundit të popullsisë, bërë me 2011 Fushë-Kosova rezulton të ketë rreth 34 mijë banorë, por sipas disa statistikave të tjera jozyrtare, besohet se në këtë komunë jetojnë mbi 80 mijë qytetarë.
Që nga viti 2022, Komuna e Prishtinës paguan mbi 15 mijë euro për një ditë pune, e 3 milionë euro në vit, për një kompani për realizimin e Konsultave dhe Shërbimeve të Arkitektit në Kryeqytet.
Kryetari i Prishtinës, Përparim Rama, themelimin e zyrës, e arsyetoi me faktin se projektet arkitekturore do të përfundohen nga ajo pa pasur nevojë për angazhim të operatorëve të jashtëm. Por, për punën e zyrës opozita nuk është e informuar.
Njëkohësisht në janar të këtij viti u nënshkrua kontratë të re me operatorë të jashtëm.
“Veprimet janë kanë kundër, për çdo vit janë dhanë kontrata milionëshe arkitekteve të jashtëm, projektet më të kushtueshme janë jashtë zyrës së arkitektit të Prishtinës. Faktet janë se komuna po paguan projekte, si ky i fundit, që është 1.2 milion euro”, tha Feim Osmani, asamblist i LV-së.
Projekti ‘Arkitekti i kryeqytetit” do të duhej t’i ndihmojë Komunës së Prishtinës në konceptimin dhe realizimin e ideve të cilat i ka premtuar kryetari Rama.
Rrjedhimisht themelimin e kësaj zyre e ka mirëpritu arkitektja Adelina Tahiri-Nela, por me theks të veçantë, transparencën.
“Në raste se kur nuk kanë burime njerëzor, zyra arkitektit është një komponent e duhur për komunat. Ajo i paraprinë zhvillimit të qyteteve. Kjo është një komponent e duhur zyra duhet të jetë shumë transparente, në informimin e komunitetit. Të informoj se çfarë projekti po planifikohen, procesin si po vazhdojnë dhe produktin final”, tha Tahiri-Nela.
Komuna e Prishtinës ka dy drejtori të cilat merren me planin strategjik dhe zhvillimor të kryeqytetit, ajo e urbanizmit dhe drejtoria e planifikimit strategjik.
Ndërkaq ATV-ja ka kërkuar sqarime nga komuna e Prishtinës lidhur me angazhimin e kësaj zyre dhe shpenzimin e buxhetit mirë po askush nuk ka kthyer përgjigje.
Vitin e kaluar ishte planifikuar shtrirje e rrjetit në 5 lagje të Prishtinës nga ngrohtorja “Termokos”. Por, për ngecjen e projektit 9.4 milionësh, nga ngrohtorja thuhet se fajin e ka Ministria e Financave.
Duke marrë parasysh rëndësinë e madhe të këtij projekti, Osmani thotë se presin ndihmë nga komuna e niveli qendror.
Në projektin, i cili do të përfshinte mbi 700 mijë metra katrorë, në lagjet e planifikuara për shtrirjen e rrjetit bënin pjesë edhe objekte si ajo e Forcës së Sigurisë së Kosovës, Arkivi i Prishtinës, sahat-kulla dhe disa objekte me rëndësi të veçanta për kryeqytetin.
Inspektori i vetëm përgjegjës në kuadër të Komisionit të Pavarur për Miniera dhe Minerale për mbikëqyrjen e pajisjeve elektrike, u pensionua të premten, për ta lënë të zbrazët këtë pozitë.
Tash, ky institucion po e ka të vështirë ta gjejë dikë tjetër për ta zëvendësuar atë. Kryeinspektori Naim Sejdiu thotë se në konkursin e fundit, kanë aplikuar 10 persona, nëntë prej të cilëve nuk i kanë plotësuar kriteret. Ndërsa tjetri s’i vazhdoi fare procedurat tjera të aplikimit.
“Do të kemi vështirësi në kryerjen e punëve, por do të mundohemi që punët te ecin mbarë. Konkursi për inspektorë të Minierave Elektrike ka dështuar për shkak te mos aplikantëve, konkursi është përsëritur dhe është procedurë”, tha Sejdiu.
Sejdiu thotë se ka nevojë edhe për rritje të numrit të inspektorëve që i evidentojnë operatorët ilegal.
Aktualisht janë 10 sosh, të shpërndarë në pesë regjione, pa llogaritur edhe dy inspektor të minierave nëntokësore që sipas nevojës mund t’u asistojnë të parëve.
“Numri i inspektorëve që merren me operatorët ilegal për momentin është 12. Numri inspektorëve është i vogël dhe ka nevojë të rritet sepse, përveç inspektimeve të rregullta, ka edhe inspektime në operator ilegal”, tha Sejdiu.
Gjatë vitit 2023, inspektorati i KPMM-së, evidentoi 46 raste të operimeve ilegale që ndërlidhen kryesisht me nxjerrjen e rërës dhe zhavorrit nga shtrati i lumenjve dhe tokave përreth, por edhe me përpunim të resurseve.
Gjeografi Faruk Foniqi, thotë se mungesa e kapaciteteve inspektuese, është shkak i degradimit të shtretërve lumorë.
“Vërehet që kemi degradim të jashtëzakonshëm të shtretërve lumor që ndodhë si pasojë e mungesës së inspektimeve ose monitorimit të vazhdueshëm që duhet ta kenë pellgjet lumore. Në kuadër të Ministrisë janë vetëm dy inspektor që merren me monitorimin apo monitorimin e pellgjeve lumore, ndërsa në dikasteret e tjera të Qeverisë janë ndoshta edhe disa sosh që ndoshta nuk arrijnë në masë të madhe t’i mbulojnë hapësirat e gjëra që përfshijnë shtretërit lumor”, tha Foniqi.
Sipas tij, mungesa e inspektorëve duhet të trajtohet me prioritet nga shteti.
“Është e domosdoshme që ministritë e linjës të shikojnë forma që të rekrutojnë personel adekuat dhe të kualifikuar për mbikëqyrjen dhe monitorimin dhe zbatimin e ligjeve që i mbrojnë lumenjtë e Kosovës”, tha Foniqi.
Sipas të dhënave zyrtare, deri në vitin 2018, afro 1800 hektarë sipërfaqe e shtretërve të lumenjve dhe tokave pranë tyre, janë dëmtuar nga dora e njeriut.
Kryetarët shqiptarë të komunave veriore të Kosovës ka mundësi t’i zë edhe pranvera në këto poste. Sipas partisë në pushtetin qendror, por edhe njohësve të proceseve zgjedhore, mund të kalojnë edhe disa muaj deri te shpallja e zgjedhjeve të reja.
Komisioni Qendror i Zgjedhjeve ka konfirmuar se është në proces të verifikimit të nënshkrimeve të mbledhura në peticionet për shkarkim të liderëve lokalë në Mitrovicë të Veriut, Zveçan, Leposaviq e Zubin Potok.
Deputeti i Lëvizjes Vetëvendosje, Adnan Rrustemi, thotë se kjo varet nga vullneti i serbëve lokalë, nëse do ta përkrahin rrëzimin e kryetarëve atje.
“Nuk mund të flasim për afate sepse këto marrin kohë dhe varet çfarë dinamike ndiqet atje. Por nëse dalin 50.1 për qind dhe votojnë për largimin e tyre, padyshim se zgjedhjet janë një fakt i kryer. Mos të harrojmë kjo situatë është krijuar përsëri si pasojë e veprimi politik të Serbisë për t’i detyruar serbët që të tërhiqen nga institucionet”, tha Rrustemi.
Ndërsa ish-kryetari i KQZ-së, Mazllum Baraliu, tregon se procedurat e pamundësojnë përshpejtimin e procesit.
“Siç pritet dhe shihet do të ketë nevojë edhe për disa muaj kohë që këto formalitet informuese të kryhet, pastaj që të ketë ose jo sukses. Nëse s’ka sukses iniciativa, atëherë 1 vit s’ka mundësi sipas udhëzimit administrativ që të iniciohet një iniciativë e re qytetarësh për të përmbushur 20 për qindshin e trupës elektorale që të nis sërish një iniciativë të re për shkarkimin të kryetarëve”, tha Baraliu.
Sipas udhëzimit administrativ, pasi që KQZ-ja i konfirmon nënshkrimet e mbledhura në komision, e organizon votimin për shkarkim të kryetarit, ku kërkohet 50% plus një votues, për të pasur sukses.
Më pas i mbetet presidentes që brenda 30 deri 45 ditësh, t’i shpallë zgjedhjet e jashtëzakonshme lokale për katër komunat me shumicë serbe.
Më shumë detaje i gjeni në Edicionin Qendror të lajmeve në videon më poshtë:
Mbyllja e komunave paralele serbe brenda territorit të Kosovës po shihet si hedhje e benzinës në zjarr, nga aleatët ndërkombëtarë të republikës.
Pavarësisht se këto institucione funksiononin me sistem të Beogradit, Shtetet e Bashkuara të Amerikës dhe Bashkimi Evropian e kanë qortuar qeverinë kosovare për dëmtim të komunitetit serb.
Në aksionet ku morën pjesë edhe ministrat, Xhelal Svecla e Elbert Krasniqi, policia mbylli komunat paralele në Dragash, Pejë, Istog e Klinë. Këto veprime, sipas ambasadorit amerikan Jeffrey Hovenier, i rrisin tensionet ndëretnike dhe kufizojnë opsionet e Amerikës që të avokojë për Kosovën në arenën ndërkombëtare.
Sikur Hovenier, edhe zëdhënësi i Bashkimit Evropian, Peter Stano, kërkoi që tema të tilla të shtrohen në tavolinën e bisedimeve Kosovë-Serbi.
Njohësi i pushtetit lokal, Shemsi Jashari, thotë se mbyllja e objekteve ku u gjetën materiale të Listës Serbe, është e ligjshme, por qeveria ka gabuar që nuk është konsultuar me miqtë, paraprakisht.
“Qeveria para se të marrë veprime si kjo, pavarësisht që janë të ligjshme, duhet të koordinohet mirë, dhe të sigurohet që partnerët ndërkombëtare e kuptojnë drejtë dhe nuk lë hapësirë interpretimi sikur kjo po bëhet si presion ndaj serbëve lokalë”, tha Jashari.
Ndryshe vlerëson profesori universitar, Gëzim Qerimi, i cili thotë se reagimet ndërkombëtare për këtë çështje kanë tjetër prapavijë.
“Reagimet e SHBA dhe BE janë të pakuptimta sepse nuk duhet të lejohen komunat paralele… Por kjo tregon raportet jo të ngrohta midis faktorit ndërkombëtar dhe qeverisë së Albin Kurtit…”, tha Qerimi.
Ky nuk pajtohet që çështje të tilla teknike të vazhdojnë të diskutohen në Bruksel.
Kundër thirrjeve amerikano-evropiane doli deputetja britanike, Alicia Kearns, e cila tha se reagime të këtij niveli nuk ka pasur për arrestimin e 3 policëve kosovarë nga Serbia e as për sulmin terrorist në Banjskë.
Më shumë detaje i gjeni në Edicionin Qendror të lajmeve në videon më poshtë:
Presidentja e Kosovës, Vjosa Osmani ka thënë se masakra e 3 dhe 4 shkurtit në Mitrovicë shërben si një kujtesë e trishtë e përpjekjes për mbijetesë.
Ajo gjithashtu ka thënë se vënia e autorëve të krimit para drejtësisë është domosdoshmëri në funksion të paqes afatgjate.
“Në kujtim të dy netëve të tmerrit të 3-4 shkurtit të vitit 2000, në Mitrovicë, sot nderojmë jetët e humbura të 10 qytetarëve të pafajshëm, mes tyre pleq, gra dhe fëmijë, të cilët u vranë mizorisht nga bandat kriminale, të nxitura nga Serbia. Respekt edhe për 25 të plagosur, të cilët mbijetuan dhe jetojnë ende me plagë fizike dhe emocionale nga nata e tmerrit”.
“1,564 familje me 11,364 anëtarë, të shpërngulur me forcë nga shtëpitë e tyre janë dëshmi e tendencës për spastrim etnik të kësaj pjesë të Mitrovicës nga grupet kriminale. Ngjarjet e atyre dy netëve të tmerrit, shërbejnë si një kujtesë e trishtë e përpjekjes për mbijetesë dhe për ta mbrojtur lirinë e arritur me gjak e sakrificë. Vënia e autorëve të krimit para drejtësisë është domosdoshmëri në funksion të paqes afatgjate! Qoftë i përhershëm kujtimi për të vrarët më 3-4 shkurt 2000 në Mitrovicë”, thuhet tutje në shkrimin e saj.
