Author: ATVLive

Përgatiti: Krenare Mulliqi

Reforma në skemën pensionale që Ministria e Financave është duke e bërë më Bankën Botërore mund të mos i kënaqë disa pensionistë.

Sipas propozimit të ministrit të Financave pensionistët do të duhej të merrnin pensionin bazë varësisht nga shuma e mjeteve financiare në Fondin e Kursimeve Pensionale.

Propozimet e ministrit janë kundërshtuar nga njohësit e ekonomisë sipas të cilëve kjo formë vetëm sa do të thellojë pabarazia e do të krijonte privatizim pensional.

“Ajo që kemi dëgjuar nga Murati nuk dëshmohet më as në Kili prej ku është marr ideja”, tha Artan Mustafa, socio-ekonomist.

Derisa vlerësohet se paratë e grumbulluara në TRUST janë kursime individuale sipas Zekirja Shabanit nuk do të duhej të merren për bazë.

Për ministrinë madje ka edhe sugjerime.

Vlerësohet se janë rreth 149 mijë pensionistë kosovarë të moshës që marrin nga 100 euro në muaj. E reforma pensionale dhe sociale ishte paraparë në programin qeverisës 2021-2025.

Përgatiti: Fatlum Jashari

Në margjina të Konferencës së Sigurisë në Munih, mes tjerash, kryeministri Albin Kurti zhvilloi takime me krerë të shteteve jo-njohëse të Kosovës.

Në takim me kryeministrin e Greqisë, Kyriakos Mitsotakis, i cili ditë më parë ri-konfirmoi pozicionin e pa-ndryshuar në raport me Kosovën, Kurti foli për procesin e dialogut me Serbinë, rregulloren e BQK-së dhe energjinë.

“Ai e njoftoi kryeministrin Mitsotakis se pas ankandit të parë solar 100 MË, do të ketë edhe një ankand tjetër për energji të erës, i cili paraqet një mundësi të re dhe shtesë për investime në Kosovë nga kompani greke”, thuhet në njoftimin nga Zyra e Kryeministrit.

Pos dialogut dhe rregullores së BQK-së, siguria në rajon ishte një nga temat në takimin ndërmjet kryeministrit Albin Kurti dhe kryetarit të Presidencës së Bosnjë e Hercegovinës, Zeljko Komsic.

“U bisedua për përfitimet nga bashkëpunimi rajonal si dhe sfidat në këtë drejtim. Kryeministri Kurti theksoi rëndësinë dhe nevojën e ratifikimit nga Bosnja dhe Hercegovina të marrëveshjes për lëvizjen e lirë me letërnjoftime ndërmjet dy vendeve”, thuhet më tej në njoftimin nga Zyra e Kryeministrit.

Për sigurinë dhe çështjet aktuale, kryeministri kosovar diskutoi edhe me Përfaqësuesin e Posaçëm të Mbretërisë së Bashkuar për Ballkanin Perëndimor, lord Stuar Peach.

Ndërsa për ambiciet e Kosovës për anëtarësim në Partneritetin për Paqe dhe NATO, Kurti foli në takimin me deputeten finlandeze, Tytti Tuppurainen.

Përgatiti: Arton Hamiti

Kafet u ftohen meqë anëtarët e Komisionit për Buxhet, Punë dhe Transfere u vonuan e disa prej tyre nuk erdhën fare.

Kësisoj, me vonesë, nisi raportimi i Kryetares së bordit të Organit Shqyrtues të Prokurimit, për planin e performancës për vitin 2024.

Për kryesuesin e Komisionit, përmbajtja e këtij raporti tregon mungesë respekti për Kuvendin e Republikës.

Shumë më i ashpër ndaj përfaqësueseve të OSHP-së u tregua deputeti i LDK-së, Avdullah Hoti.

Megjithatë, kryetarja e asaj që njihet si “Gjykata e Tenderëve” u arsyetua me mungesë të stafit.

Sidoqoftë, meqë raporti i prezantuar u tha se është kopje e viteve paraprake, nuk u hodh fare në votim.

Organit Shqyrtues të Prokurimit iu dha dy javë kohë për ta përmirësuar raportin. Për arsye të njëjtë, Komisioni nuk e aprovoi as planin vjetor të performancës të Komisionit Rregullativ të Prokurimit.

Përgatiti: Nora Luta

Disa ditë pasi e pranuan fajësinë, Gjykata Themelore të premten i shpalli fajtorë Gjon Musollin, dhe Halit Berishën. Fermerët, Prokuroria Speciale i ngarkonte me akuzat “mashtrim me subvencione”, dhe “dhënie ryshfeti”.

Për caktimin e dënimit, Gjykata do të vendosë gjatë muajit mars. Seanca për caktimin e dënimit pas pranimit të fajësisë apo aktgjykimit dënues, parashihet me Kodin e ri të procedurën penale, respektivisht nenin 356.

Gjon Musolli, sipas Prokurorisë Speciale, i ka shkaktuar dëm buxhetit të shtetit afër 26 mijë euro. Ai në shqyrtimin fillestar kishte deklaruar se korruptimi i zyrtarëve ishte mënyra e vetme që të përfitonte subvencione në bujqësi.

Ndërsa Halit Berisha, sipas PSRK-së i ka shkaktuar dëm buxhetit të shtetit më shumë se 14 mijë euro.

Bashkë me ta, Prokuroria Speciale në aktakuzën që e ngriti në dhjetor të vitit të kaluar i ka përfshirë edhe tetë persona të tjerë, zyrtarë të Agjencisë për Zhvillimin e Bujqësisë dhe zyrtarë komunalë, por që të gjithë të hënën e mohuan fajësinë rreth akuzave për marrje ryshfeti e ushtrim ndikimi, dhe procesi gjyqësor ndaj tyre pritet të vazhdojë në Departamentin Special.

Sipas aktakuzës veprat penale janë kryer gjatë periudhës gusht të vitit 2020 deri më 24 shkurt të 2021-s.

Kryetari i Kryeqytetit, Përparim Rama i ka dhuruar “Çelësin e Qytetit” Ambasadorit të Mbretërisë së Bashkuar në Kosovë, Sh.T.Z Nicholas Abbott, për për devotshmërinë dhe përkushtimin e treguar në forcimin e marrëdhënieve mes dy vendeve dhe për mbështetjen e palodhshme të zhvillimeve pozitive në Prishtinë e Kosovë.

“Në emër të qytetarëve të Prishtinës, ju uroj shëndet, sukses dhe mirëqenie në angazhimet e juaja në të ardhmen. Faleminderit, Ambasador Abbott, për shërbimin tuaj të shkëlqyeshëm dhe për ndikimin pozitiv që keni lënë në vendin tonë!” – deklaroi Kryetari Rama.

Ndërsa, Ambasadori Abbott u shpreh falënderues për njohjen e kontributit të tij në forcimin e mardhënieve mes dy vendeve.

Abbott premtoi se do të vijë për një makiato!

Presidenti i Rusisë, Vladimir Putin, dhe bashkëpunëtorët e tij nuk do të shpëtojnë pa u ndëshkuar nëse konfirmohet vdekja e raportuar e Alexei Navalnyt, tha të premten Yulia Navalnaya, bashkëshortja e kritikut të zëshëm të Kremlinit.

Yulia Navalnaya i bëri thirrje bashkësisë ndërkombëtare ta luftojë së bashku “regjimin e tmerrshëm” në Rusi, duke folur Konferencën e Sigurisë në Munih.

“Nuk e di nëse duhet t’i besojmë lajmit të tmerrshëm. Ne nuk mund t’i besojmë Putinit dhe Qeverisë së tij. Por, nëse kjo është e vërtetë, do të doja që Putini dhe i gjithë stafi i tij, i gjithë rreth i tij, Qeveria e tij dhe miqtë e tij, ta dinë se do të ndëshkohen për atë që kanë bërë me shtetin tonë, me familjen time dhe me bashkëshortin tim”, tha Yulia Navalnaya për raportimet për vdekjen e bashkëshortit të saj në burgun rus.

Një departament lokal i Shërbimit Federal të Burgjeve të Rusisë tha të premten në mesditë se Navalny ka vdekur në burg.

“Të gjitha masat për ta kthyer në jetë u ndërmorën, por ato nuk prodhuan rezultate pozitive. Mjekët e autoambulancës e shpallën të vdekur të burgosurin. Shkaku i vdekjes është duke u përcaktuar”, u tha në deklaratën e Shërbimit rus, njoftim që nuk ka qenë e mundur të konfirmohet në mënyrë të pavarur.

Mediat e kontrolluara nga shteti rus po ashtu kanë cituar këtë deklaratë, duke raportuar se Navalny, 47 vjeç, ka vdekur.

Media shtetërore, TASS, citoi zëdhënësin e Kremlinit, Dmitry Peskov, të ketë thënë se presidenti rus, Vladimir Putin, është informuar për raportimet lidhur me vdekjen e Navalnyt dhe se ai nuk kishte informacione për shkakun e vdekjes së tij.

Por, sekretarja për media e Navalnyt, Kira Yarmysh, shkroi në X, që më herët njihej si Tëitter, se ekipi i kritikut të Kremlinit, nuk ka konfirmim për vdekjen e tij.

“Shërbimi Federal i Burgjeve në qarkun Jamalo-Nenets po shpërndan lajme për vdekjen e Aleksei Navalnyt në burgun IK-3. Ne ende nuk kemi konfirmim për këtë lajm. Avokati i Navalnyt do të shkojë atje dhe sapo të kemi informacione, do t’iu njoftojmë”, shkroi ajo.

Raportimi për vdekjen e Navalnyt ka nxitur zemërim dhe dënim nga liderët botërorë që e kanë thënë se kritiku i Kremlinit ka paguar “çmimin më të lartë” për kurajën e tij për të folur kundër udhëheqjes së shtetit.

Navalny, një kritik i zëshëm i Putinit, është mbajtur në burgun rus prej vitit 2021 nën akuza që janë cilësuar nga shumë si të nxitura politikisht.

Në gusht, Navalny u shpall fajtor për themelimin dhe financimin e një organizate ekstremiste, gjë të cilën e ka mohuar gjithmonë, dhe u dënua me 19 vjet burgim shtesë.

Ai veçse ishte dënuar me nëntë vjet burgim për shkelje të lirimit me kusht, për mashtrim dhe shpërfillje të gjykatës.

Nesër, Kosova feston 16-vjetorin e shpalljes së Pavarësisë.

Lidhur me këtë kryeministri i vendit, Albin Kurti ka uruar të gjithë qytetarët e vendit me një video emocionuese.

Në këtë video janë figurat kryesore të Kosovës, Adem Jashari, Dua Lipa e Rita Ora.

Po ashtu në videon e publikuar nga Kurti shihen edhe yjet e futbollit, Granit Xhaka, Xherdan Shaqiri e lojtarët e Kombëtares së Kosovës.

Udhëheqësi i opozitës ruse, Alexei Navalny, ka vdekur në burg, ka thënë shërbimi i burgjeve të vendit, në atë që ka të ngjarë të shihet si një vrasje politike që i atribuohet Vladimir Putinit.

Lidhur me këtë kanë reaguar shumë emra të rëndësishëm evropianë dhe botërorë, shkruan BBC, transmeton KosovaPress.

Sekretari amerikan i Shtetit, Antony Blinken, ka thënë se nëse vdekja e Navalny konfirmohet, kjo “vetëm thekson dobësinë dhe kalbjen në zemër të sistemit që Putini ka ndërtuar”.

“Para së gjithash, nëse këto raporte janë të sakta, zemrat tona janë me familjen dhe gruan e tij”, tha ai në konferencën e sigurisë në Mynih, duke shtuar se “Rusia është përgjegjëse” nëse konfirmohet vdekja.

I pyetur për vdekjen e Navalny-t këtë mëngjes në NPR, Këshilltari i Sigurisë Kombëtare i SHBA-së, Jake Sullivan thotë se SHBA-të po përpiqen të konfirmojnë saktësisht se çfarë ka ndodhur.

“Është një tragjedi e tmerrshme, dhe duke pasur parasysh historinë e gjatë dhe të ndyrë të qeverisë ruse për të dëmtuar kundërshtarët e saj, ajo ngre pyetje reale dhe të dukshme për atë që ndodhi këtu”, i tha ai transmetuesit amerikan.

“Por unë do të ndaloj komentet e mëtejshme për të derisa të mësojmë më shumë dhe ne jemi duke kërkuar në mënyrë aktive konfirmimin, pasi e di që është edhe familja e z. Navalny. Dhe ne do të përcaktojmë prej andej se çfarë – çfarë do të vijë më pas.”

Presidentja e Komisionit Evropian Ursula Von der Leyen në konferencën e sigurisë në Mynih, i tha BBC-së: “Ne presim që familja ta konfirmojë atë përpara se të japim deklaratën tonë”.

Jens Stoltenberg, sekretari i përgjithshëm i NATO-s, thotë se është “i pikëlluar dhe i shqetësuar nga raportet që vijnë nga Rusia”.

Vdekja e Alexei Navalny është “lajm i tmerrshëm” thotë kryeministri i Mbretërisë së Bashkuar Rishi Sunak, i cili thotë se ai “demonstroi guxim të jashtëzakonshëm gjatë gjithë jetës së tij”.

Kancelari gjerman Olaf Scholz thotë se aktivisti “e pagoi guximin e tij me jetë”.

Ndërsa Ministri i Jashtëm çek, Jan Lipavsky, i ka bërë thirrje botës që të “nderojë kujtimin” e një njeriu “të burgosur dhe të torturuar deri në vdekje për shkak të qëndrimit kundër Putinit”.

Dhe Krisjanis Karins – ish-kryeministër letonez dhe ministër i jashtëm aktual – thotë se është “thellësisht i shqetësuar” nga lajmet dhe thotë se “vdekja e tij është plotësisht në ndërgjegjen e regjimit kriminal të Putinit”.