Author: ATVLive

Përkrah Mbretërisë së Bashkuar, Kosova si shtet pjesëmarrës në operacionin Interflex, përmes instruktorëve të FSK-së vazhdon të ofrojë kontribut në trajnimin e rekrutëve ukrainas.

Në njoftimin e Ministrisë së Mbrojtjes në Kosovës kanë bërë të ditur se deri më tani në këtë operacion janë trajnuar 34 mijë rekrutë.

“Mbretëria e Bashkuar dhe 11 kombe partnere qëndrojnë si një për të mbështetur Ukrainën në trajnimin e rekrutëve. Op Interflex, me qendër në Britaninë e Madhe, ka trajnuar mbi 34,000 rekrutë ukrainas me ndihmën e partnerëve tanë, përfshirë edhe anëtarin më të ri Kosovën”, thuhet në njoftim.

NATO nuk planifikon të dërgojë trupa tokësore në Ukrainë, tha të martën një zyrtar i aleancës, pasi presidenti francez, Emmanuel Macron tha se asgjë nuk mund të përjashtohet.

“NATO dhe aleatët po ofrojnë mbështetje ushtarake të paprecedentë për Ukrainën”, tha zyrtari i NATO-s.

“Por nuk ka plane për trupa luftarake të NATO-s në Ukrainë”, shtoi ai.

Presidenti francez tha të martën se “asnjë konsensus” nuk ekziston për dërgimin e trupave tokësore perëndimore në Ukrainë, por shtoi se “asgjë nuk duhet të përjashtohet për të arritur objektivin tonë”.

“Rusia nuk mund të fitojë luftën”, tha Macron.

“Sipas ligjit ndërkombëtar, Ukraina ka të drejtën e vetëmbrojtjes dhe ne kemi të drejtën ta mbështesim atë”, tha zyrtari i NATO-s.

“Kjo është ajo që aleatët e NATO-s po bëjnë dhe do të vazhdojnë të bëjnë”, shtoi ai.

Udhëheqësi francez kishte pritur në Paris, në një samit, liderët e kontinentit.

Aty, udhëheqësit evropianë janë pajtuar të krijojnë një koalicion për të furnizuar Ukrainën me raketa me rreze të mesme dhe të gjatë veprimi dhe bomba, për të mbështetur përpjekjet e Kievit për të luftuar pushtimin e nisur nga Rusia.

Kancelari gjerman, Olaf Scholz, presidenti polak Andrzej Duda, dhe udhëheqësit nga shtetet e Baltikut po ashtu morën pjesë në samit që zgjati deri në hënën mbrëma.

Shtetet e Bashkuara u përfaqësuan në samit me diplomatin kryesor për Evropë, James O’Brien, ndërkaq në samit mori pjesë edhe sekretari i Jashtëm i Britanisë, David Cameron. ​

Presidenti ukrainas, Volodymyr Zelensky, që iu adresua samitit përmes video-lidhjes, u bëri thirrje udhëheqësve evropianë që të sigurohen që presidenti rus, Vladimir Putin, “nuk mund të shkatërrojë arritjet tona dhe të mos mund të zgjerojë agresionin e tij në shtete të tjera”.

Evropa do të ndihmojë Ukrainën “të marrë iniciativën dhe të veprojë së bashku në një kohë kur ka pasiguri në SHBA sa i përket ndihmës”, tha Macron, duke shtuar se në mesin e udhëheqësve që morën pjesë në samit kishte “konsensus të gjerë për të bërë më shumë dhe në mënyrë më të shpejtë”.

Rusia ka filluar pushtimin e Ukrainës në shkurt të vitit 2022./REL

Njësiti i hetimeve të stacionit policor në Prishtinë, me autorizim nga prokuroria kompetente, ka kërkuar ndihmë nga qytetarët në ofrimin e informatave, të cilat do të ndihmonin në identifikimin dhe arrestimin e personit që shihet në fotografi.

E dyshuara kërkohet për përfshirje në një rast, Shpërdorim i pasurisë së huaj , që është raportuar në polici në dhjetor të vitit 2023.

“Të nderuar, për çdo informatë që mund të çojë në identifikimin e personit apo vendodhjes së saj, kontaktoni policinë në numrin e telefonit: 192”, thuhet mes tjerash në njoftimin zyrtar.

Në Dhomat e Specializuara të Kosovës (DhSK) në Hagë, është hedhur për të dytën herë apelimi i Isni Kilajt kundër mbajtjes së tij në paraburgim.

Vendimi është marrë me 26 shkurt 2024 nga gjyqtarja Michele Picard.

“Për këto arsye, Kolegji i Gjykatës së Apelit: mohon Apelimin; udhëzon ZPS-në të paraqesë një version të redaktuar publik të Përgjigjes (IA005/F00003) ose të tregojë, nëpërmjet një dosjeje, nëse kjo dosje mund të riklasifikohet si publike brenda dhjetë ditëve nga marrja e njoftimit për këtë Vendim; dhe udhëzon Regjistrin që të ekzekutojë riklasifikimin e Përgjigjes me ndikimin nga ZPS, nëse ka, dhe se si ajo mund të riklasifikohet”, thuhet në vendimin e gjyqtares Picard.

Në arsyetimin e vendimit thuhet se Kilaj kishte pohuar se gjyqtari i vetëm i procedurës paraprake kishte gabuar kur ka konstatuar se propozimi për të paguar garanci në vlerë të 30 mijë euro mund të merret në konsideratë vetëm si faktor zbutës i rrezikut të arratisjes dhe jo për pengim të mëtejmë të procedurave.

“Sipas Kilajt, gjyqtari i vetëm gaboi në “dallimin e paarsyeshëm” midis efektit dekurajues të një “shumë të madhe parash” që konfiskohet në rast se ai arratiset dhe të njëjtit efekt dekurajues në rast se ai ndërhyn në procedim ose kryen vepra të tjera. Kilaj parashtron se “baza e vetme” për një dallim të tillë është “arsyetimi” i Gjykatësit të Vetëm se “garancia e dorëzanisë është krijuar në parim për të siguruar jo kompensimin e humbjes, por praninë e të Akuzuarit në gjyq”, thuhet në vendim.

Ndërsa ZPS-ja ishte përgjigjur që Kilaj kishte keqinterpretuar vendimin e kundërshtuar.

Ndërsa sa i përket vlerësimit që i ka bërë paneli, ata kanë theksuar se janë të vetëdijshëm për faktin se aktakuza nuk është ngritur ende dhe se ngritja e saj sipas ZPS-së është e pashmangshme, raporton “Betimi për Drejtësi”.

Ndryshe, ish-kryetari i Komunës së Malishevës, Isni Kilaj, është transferuar më 3 nëntor 2023 në objektin e Dhomave të Specializuara të Kosovës (DhSK) në Hagë, pasi është arrestuar nën dyshimin për veprën penale kundër administrimit të drejtësisë.

Përveç kësaj vepre, Kilaj dyshohet edhe për veprën penale “Pengim i personave zyrtarë në kryerjen e detyrës zyrtare” dhe “Shkelje të sekretit të procedurave”.

Kancelari gjerman Olaf Scholz tha të martën se vendet perëndimore nuk do të dërgojnë trupa tokësore në Ukrainë, duke hedhur poshtë sugjerimin e fundit të presidentit francez Emmanuel Macron.

“Ajo që u ra dakord me njëri-tjetrin që nga fillimi vlen edhe për të ardhmen, domethënë që nuk do të ketë trupa tokësore në tokën ukrainase që do të dërgohen atje nga shtetet evropiane, ose shtetet e NATO-s”, u tha Scholz gazetarëve gjatë një vizite në jugperëndim të qytetit Freiburg.

Komentet e tij erdhën vetëm një ditë pasi presidenti francez Emmanuel Macron kishte sugjeruar dërgimin e trupave tokësore perëndimore në Ukrainë, në mënyrë që të mbështesin ukrainasit në mbrojtjen e vendit të tyre kundër Rusisë.

“Nuk ka asnjë konsensus sot që trupat tokësore duhet të dislokohen në mënyrë zyrtare… por asgjë nuk duhet të përjashtohet”, tha Macron në një konferencë shtypi në Paris, pasi priti liderët perëndimorë për një konferencë për të diskutuar mbështetjen ushtarake për Ukrainën.

“Ne do të bëjmë gjithçka që duhet për të siguruar që Rusia nuk mund ta fitojë këtë luftë”, tha Macron./AA

Profesori i ekonomisë, Medain Hashani, në emisionin A LIVE në ATV, tha BQK-ja e ka humbur statusin e pavarur si i pavarur, pasi që sipas tij, tani është shndërruar në një institucion të politikave ditore të Qeverisë.

Ai tha se nuk mendon se do të ketë zgjidhe nga takimi i sotëm në Bruksel për çështjen e dinarit.

“Nuk mendoj se ka me u ba zgjidhje për arsye se vullneti politik nuk është që me u largu nga ky pozicion, sepse me vet faktin që BQK-ja deri më herët e ka pasur një status të pavarur dhe është njohur si institucion i pavarur, tani unë mendoj që BQK-ja është shndërruar në një institucion, i cili është duke u marrë me politikat ditore të Qeverisë dhe e ka humbur atë pavarësinë në bazë të veprimit të fundit që e ka bërë dhe vetë takimi i guvernatorit të BQK-së me kryeministrin dhe mos tërheqjen e tij nga kjo çështje që të shtyhet një afat, ka tregu që nuk ka ndonjë vullnet për me u largu nga ky pozicion dhe masat të cilat janë ndërmarrë për një tranzicion, janë ndërmarrë diku rreth 15 pika të cilat i ka prezantuar BQK-ja për fillimin e hapjes së llogarive, integrimin, etj.. e këto është dashur të merren shumë më herët”, tha Hashani. /atvlive.tv

Intervistën e tij të plotë në A LIVE, e gjeni në videon më poshtë: