Në vlerë prej 121,993.04 euro po vazhdojnë investimet në infrastrukturën në fshatrat e harruara në të kaluarën.
Rreth 1 km gjatësi janë rrugët që po asfalltohen në fshatin Shillovë.
Kryetari i Komunës së Gjilanit, Alban Hyseni, ka parë nga afër sot punimet që po zhvillohen në ndërtimin e rrugëve të këtij fshati, të cilat tha se janë lënë anash në të kaluarën.
Këshilli i Ministrave i Bullgarisë vendosi sot që Sofja zyrtare t’i bashkohet Deklaratës Evropiane për teknologjitë kuantike. Ministri i E-Qeverisjes ishte autorizuar për nënshkrimin e dokumentit.
Deklarata, e iniciuar nga Presidenca spanjolle e Këshillit të BE-së, u publikua zyrtarisht më 6 dhjetor 2023. Tetëmbëdhjetë shtete anëtare e kanë nënshkruar deri më tani: Kroacia, Qiproja, Çekia, Danimarka, Estonia, Finlanda, Franca, Gjermania, Greqia, Hungaria, Italia, Letonia, Holanda, Rumania, Spanja, Sllovakia, Sllovenia dhe Suedia.
Deklarata i sheh përpjekjet e Bashkimit për të zhvilluar teknologjitë kuantike përmes prizmit të mbrojtjes së aseteve strategjike, interesave, autonomisë dhe sigurisë dhe si një mënyrë për të shmangur varësinë strategjike nga burimet jo-BE. Ai thekson nevojën që BE-ja të ndërtojë kapacitetet e veta për të hulumtuar dhe zhvilluar teknologjitë kuantike dhe për të prodhuar pajisje dhe sisteme të bazuara në to, duke investuar në të gjithë paketën kuantike – nga hardueri në softuer te aplikacionet dhe standardet, në fushat kryesore të aplikimit të teknologjitë kuantike: llogaritja dhe simulimi kuantik, komunikimet kuantike dhe sensorët kuantikë dhe metrologjia.
Shtetet anëtare nënshkruese angazhohen për të bashkëpunuar në zhvillimin e një ekosistemi të teknologjisë kuantike, me qëllimin përfundimtar për ta bërë Evropën “luginën kuantike”, rajonin kryesor në botë për përsosmëri dhe inovacion në teknologjitë kuantike. /BTA
Një kosovar i kërkuar ndërkombëtarisht u arrestua nga policia shqiptare në pikëkalimin kufitar në Morinë.
Siç njofton Policia e Shtetit, Jeton Dërvishaj, 38-vjeçar Gjykata në Hungari e ka dënuar atë, me dy vjet burgim, për kalim të kundërligjshëm emigrantësh.
“Ndërsa Gjykata e Lartë në Serbi ka lëshuar ndaj tij, urdhër arresti, për të njëjtën veprimtari kriminale. Interpol Tirana, në bashkëpunim me homologët, vijon procedurat për ekstradimin e 38-vjeçarit”, thuhet në njoftim.
Po ashtu, në dalje u arrestuan në flagrancë shtetasit kosovarë A. M., 26 vjeç dhe L. C., 23 vjeç, pasi kanë paraqitur dy pasaporta që dyshohet se janë të falsifikuara.
Në cilësinë e provës materiale u sekuestruan këto dy dokumente.
Kërkimi i Liverpoolit për pasardhësin e Jurgen Klopp do të përshpejtohet pas konfirmimit të emërimit të Richard Hughes si drejtor sportiv.
Hughes është ardhja e parë kyçe që kur Michael Edwards u emërua nga Fenway Sports Group si shef i futbollit. Çështja e parë e ngutshme e Hughes është vlerësimi i kandidatëve kryesorë për t’u bërë trajneri i ardhshëm i Liverpoolit, raporton KP.
Shumë nga emrat në listën e ngushtë të Liverpoolit janë të mirë-dokumentuar. Mes tyre Xabi Alonso i Bayer Leverkusen, Roberto de Zerbi i Brighton dhe Ruben Amorim i Sporting Lisbonas.
Edhe pse Hughes dhe Edwards nuk fillojnë zyrtarisht në postet e tyre të reja deri në qershor, Liverpool tashmë ka filluar kontrolle të gjera për objektivat e tyre kryesore. Hughes, i cili do të krijojë një marrëdhënie të përditshme me trajnerin e ardhshëm, do t’i besohet të gjejë kandidatin e preferuar.
Klubi e dinte se një drejtor sportiv do të ishte në pozitë përpara se të mund të konsideronin një qasje formale ndaj trajnerëve më të pëlqyer.
Emërimi i Hughes në “Anfield” u bë një sekret i hapur pasi Bournemouth njoftoi se ai do të largohej nga bregdeti jugor në fund të këtij sezoni pas një periudhe 10-vjeçare si pjesë e operacioneve të tyre të futbollit, dhe loja me hamendje se ku ishte drejtuar ai nuk zgjati, jo shumë kohë pasi që Edwards u konfirmua si suprem i futbollit të FSG-së.
Ish-komandanti i UÇK-së në zonën e Llapit, Rrustem Mustafa, ka thënë se personave që kanë qenë pjese e administratës së dhunshme në periudhën e pushtimit serb 1989-’99, nuk duhet t’iu mundësohet qasja në media, si masë preventive kundër luftës hibride ruso-serbe.
“Preventiva e luftës hibride ruso-serbe… Individëd të cilët kanë qenë pjesë e administratës së dhunshme në periudhën e pushtimit serb 1989-99, nuk duhet vazhduar t’u adresohen mediave. Ata kanë qenë dhe mbeten njerëz që përvjedhin fokusin e autoritetit duke u vardisur rreth liderëve dhe pa hezitim vihen në shërbim të së keqes. Në rrethana të jashtëzakonshme siç jemi ne sot, është mëse e nevojshme që të tillët të menjanohen nga mediat dhe platformat publike, dhe në këtë mënyrë të evitohen dëmet nga spekulimet dhe lufta hibride ruso-sërbe që mund t’i shkaktohen vendit. Asnjërit nga të tillët nuk mbajnë barrë për ata që ikën dhe nuk kthehen më, ndihuni të sigurt në vendin tuaj, tani të PAVARUR!”, ka shkruar ai në Facebook.
Çmimet e cigareve në Itali janë rritur sërish të mërkurën, raporton ANSA.
Pas një rritjeje mesatare prej 10-12 centë për pako më 2 shkurt, çmimet u rritën për 20 cent të tjerë, sipas ligjit për buxhetin e vitit 2024.
Duhanpirësit që shpenzojnë një pako në ditë tani do të paguajnë rreth gjashtë euro më shumë në muaj, apo 72 euro më shumë në vit.
Presidentja Vjosa Osmani, ka thënë se Kosova ka bërë hapa të rëndësishëm në avancimin e sundimit të ligjit në përputhje me strategjinë e miratuar gjithëpërfshirëse kombëtare, një nga rezultatet më të rëndësishme në kuadër të zotimeve në Samitin për Demokraci.
Në kuadër të Samitit të tretë për Demokraci, i mbajtur në Republikën e Koresë, e para e vendit tonë tha se Kosova ka dëshmuar gjithashtu edhe përkushtimin ndaj standardeve ndërkombëtare dhe bashkëpunimit, duke miratuar Deklaratën kundër ndalimit arbitrar në marrëdhëniet ndërshtetërore; duke u bërë pjesë e Deklaratës së Parimeve për ta luftuar represionin transnacional së bashku me gjashtë vende të tjera demokratike, në tetorin e kaluar, si dhe duke punuar ngushtë me Shtetet e Bashkuara drejt avancimit të përpjekjeve të përbashkëta për të luftuar manipulimin e informacioneve nga ndonjë shtet i huaj.
Osmani ka thënë se zotimet e marra në kuadër të Samitit për Demokraci i kanë prirë rrugëtimit të Kosovës në politikë dhe vendimmarrje.
“Teksa po flas para jush, ne jemi duke i bërë përgatitjet për ta mbajtur edicionin e dytë të Forumit Ndërkombëtar për Gratë, Paqen dhe Sigurinë, i cili do të mbahet në muajin prill në Prishtinë. Në këtë edicion, ne do të fokusohemi jo vetëm në partneritetet dhe dialogun për ta ndërtuar paqen e qëndrueshme përmes sigurimit të përfaqësimit më të madh të grave në të gjitha nivelet e vendimmarrjes. Jam e lumtur ta ndajë me ju lajmin për themelimin e Qendrës së parë Rajonale të Ekselencës për Gratë, Paqen dhe Sigurinë në Ballkanin Perëndimor, në partneritet me Zyrën e Sekretarit të Shtetit të SHBA-ve, në përputhje me Strategjinë për Gratë, Paqen dhe Sigurinë 2023 të SHBA-ve, si dhe Planin Kombëtar të Veprimit”.
“Këto masa përfaqësojnë në tërësi një qasje të fuqishme drejtë forcimit të sundimit të ligjit, duke shfaqur përkushtimin e Kosovës ndaj reformës ligjore, transparencës si dhe mbrojtjes dhe avancimit të të drejtave të njeriut. Në këtë rrugëtim, angazhimi i brezit të ardhshëm në proceset demokratike është jetik. Jam e bindur se nëpërmjet njohurive të tyre digjitale gjithnjë në zhvillim, ne kemi mundësi të jashtëzakonshme për ta zhvilluar tutje demokracinë. Veprimet e të rinjve tanë, pasioni i tyre dhe përkushtimi ndaj demokracisë mund ta nxisin një epokë të re prosperiteti. Kjo, ngase, ku ka qëndrueshmëri, këmbëngulje, unitet dhe ambicie, demokracia gjithmonë fiton”, ka përfunduar Osmani.
Ylli i Kombëtares së Kosovës, Albion Rrahmani foli sot gjatë stërvitjes së radhës së “Dardanëve” para ndeshjeve të këtij muaji.
Rrahmani është pjesë e grumbullimit të trajnerit Franco Foda për dy ndeshjet e këtij muaji kundër Armenisë dhe Hungarisë, raporton KosovaPress.
Rrahmani tha se është i lumtur që është rikthyer në Kombëtare pas lëndimit të rëndë që e pati, ndërsa shtoi se është i gatshëm ta jap 100% nga vetja për të ndihmuar “Dardanët”.
“Jam shumë i lumtur që përsëri jam pjesë e Kombëtares, siç dihet pas një lëndimi të rëndë që e kam pasur. Jam kthyer në formën time më të mirë të mundshme dhe jam i gatshëm që ta jap 100% për kombëtaren tonë. Janë ndeshje shumë të rëndësishme edhe pse miqësore por do të na shërbejnë që ta njohim më shumë trajnerin, taktikat e tij dhe gjithë bashkëlojtarët njëri-tjetrin me taktikat e reja, dhe shpresoj që do të dalim me rezultat pozitiv se do të jetë shtysë e madhe për neve që në shtator të jemi sa më të gatshëm”, tha Rrahmani.
Kosova përballet me Armeninë më 22 mars, ndërsa më 26 mars do të luajë kundër Hungarisë.
Kombëtarja e Italisë kishte një vizitor të veçantë gjatë kohës së inspektimit të “Chase Stadium”, ku kampioni i tenisit, Jannik Sinner iu bashkua skuadrës së Luciano Spallettit.
“Azzurrët” udhëtuan drejt Miamit mbrëmë para dy ndeshjeve miqësore të këtij muaji për tu përgatitur për Kampionatit Evropian Euro 2024, raporton KosovaPress.
Italia do të përballet me Venezuelën në “Fort Lauderdale’s Chase Stadium”, dhe më pas me Ekuadorin në “Red Bull Arena” në New Jersey.
Ndërkohë që skuadra po e inspektonte fushën në stadiumin i cili zakonisht përdoret nga Inter Miami i Lionel Messit, ata morën një vizitë befasuese nga kampioni i tenisit, Sinner.
Sinner ishte në Miami për turneun Masters 1000 dhe dëshironte që të përshëndet kombëtaren italiane, kështu që kjo e fundit ndërpreu stërvitjen për ta përshëndetur kampionin e tenisit me duartrokitje dhe për t’i bërë disa foto.
Pjesë e fotove ishte edhe fituesi i Kupës së Botës 2006 me Italinë, Gigi Buffon, i cili po punon tani si pjesë e stafit të Spallettit.
Sinner u bë italiani i parë që e fiton një titull të Grand Slam pas më shumë se 30 vitesh, kur ai e fitoi Australian Open 2024.
Në mbledhjen e Qeverisë më 15 mars, kryeministri Albin Kurti ka kërkuar nga Agjencia Kadastrale e Kosovës ta zbatojë vendimin e Gjykatës Kushtetuese për t’ia regjistruar pronën Manastirit të Deçanit.
Historianët e Kosovës një gjë të tillë po e konsiderojnë si jo të drejtë, pasi nuk përkon me realitetin dhe të dhënat historike dhe se me këtë po cenohet identiteti historik dhe kulturor i Kosovës.
Bedri Muhadri nga Instituti i Historisë, thotë për KosovaPress se ky vendim cenon identitetin historik dhe kulturor të Kosovës. Sipas tij, arsyeja që ka ardhur në këto vendime bazohet në faktin që në vitin 2021 organizata “Europa Nostra” e ka cilësuar Manastirin e Deçanit si “të rrezikuar.”
“Vendimi si i tillë mbetet për të mos u përkrahur, sepse në radhë të parë cenohet identiteti historik, kulturor i Dardanisë dhe Kosovës që bart në vete. Si pjesë e tërë kulturës shpirtërore, arkeologjike dhe historike është edhe Manastiri i Deçanit dhe manastireve tjera në specifiket e veta historike në një kohë të sunduesit… është cenim i identitetit tonë historik, por edhe qasja e kryeministrit lë për të dëshiruar dhe jo shumë e admirueshme për faktin se thotë vendimin po e zbatojmë edhe pse është vendim i dëmshëm… Arsyeshmëria pse ka ardhur deri te këto vendime, bazohen në faktin që në 2021 organizata “Evropa Nostra” e ka cilësuar Manastirin e Deçanit se është në gjendje të rrezikshmërisë, që rrezikohet nga popullata vendase”, ka thënë Muhadri.
Sipas tij, vendimi nuk është dashur të zbatohet si kompromis, pasi kompromiset po derivojnë me kompromise të ardhshme.
“Për mendimin tim është një vendim jo i drejtë, i cili nuk përkon me realitetin dhe të dhënat historike, vendim për të cilin kanë thënë vetë institucionet, krerët tanë pak para se të vjen në zbatim, sepse kanë kontestuar mënyrën se si ka ardhur deri te vendimi i Gjykatës Kushtetuese…Nëse thuhet po bën kompromis për të hyrë në Këshillin e Evropës, po njohim pronat e manastirit ortodoks, pastaj mund të vijë një ditë që për t’u futur në UNESCO si pjesë e organizatës të ruajtjes të trashëgimisë botërore, atëherë mund të jetë që të avancohet statuti i këtyre institucioneve…Vendimi nuk është dashur të zbatohet si kompromis, sepse kompromiset po derivojnë me kompromise të ardhshme, rrjedhat politike gjithherë kanë shkuar duke u avancuar në kompromise të mëtejshme. Institucionet e shtetit gjithherë duhet të kenë parasysh që me kompromise nuk prosperohet ardhmëria e vendit”, ka shtuar ai.
Për Manastirin e Deçanit, historiani Muhadri ka theksuar se është ndër më të rëndësishmit të trashëgimisë kulturore mesjetare dhe ballkanike.
“Manastiri i Deçanit është institucion i rëndësishëm kulturor, mesjetar i cili rezulton si vlerë mjaft e rëndësishme e trashëgimisë historike, kulturore të Kosovës. Kur themi trashëgimi e Kosovës domosdo duhet të them se Manastiri i Deçanit e ka historiken e vet të formimit dhe veprimtarisë si institucion kulturor dhe religjioz…Manastiri i Deçanit sot është ndër manastiret më të rëndësishme të trashëgimisë kulturore mesjetare dhe ballkanike dhe është në listën e trashëgimisë kulturore, botërore të UNESCO-s… Historia e manastirit dhe trashëgimia që bart Manastiri i Deçanit është pjesë e kulturës historike dhe mesjetare të Kosovës dhe të popullit shqiptar në përgjithësi si real arbëror”, ka theksuar Muhadri.
Ndryshe, Dioqeza e Rashkës dhe Prizrenit e Kishës Ortodokse Serbe në Kosovë sot ka konfirmuar se Manastiri i Deçanit ka regjistruar në emër të tij 24 hektarë tokë në Agjencinë Kadastrale të Kosovës, pasi kryeministri Albin Kurti më herët gjatë këtij muaji urdhëroi të bëhej një gjë të tillë.
Kurti kishte deklaruar se Qeveria e Kosovës ka qenë para dy opsioneve, të zbatojë vendimin e Gjykatës Kushtetuese dhe të mundësohet ecja tutje me qëllim të anëtarësimit në Këshillin e Evropës këtë vit ose heqja e çështjes së Kosovës nga agjenda e anëtarësimit./kp/