Author: ATVLive

U.D i kryetarit të OVL’së së UÇK’së, Faton Klinaku, ka thënë se Gjykata Speciale sot ka arrestuar Fahri Fazliun, nipin e Bahri dhe Fahri Fazliut.

Klinaku ka thënë se ai ishte 8 vjeç gjatë luftës.

“Gjykata ilegale Speciale, në mungesë të fakteve për krime lufte, vazhdon spektaklet e saj duke arrestuar edhe njerëz që në kohën e luftës së UÇK-së ishin fëmijë. Ajo sot ka arrestuar Fahri Fazliun, nipin e heronjëve Bahri e Fahri Fazliu, i cili gjatë luftës ishte vetëm 8 vjeçar.”

Klinaku ka thënë “krimi që po e bën ZPS do t’i kthehet bumerang asaj vet”.

“Krimin që po e bën ZPS, herëdokur do t’i kthehet bumerang vet asaj, dhe le ta kuptojnë njëherë e përgjithmonë se nuk mund të na nënshtrojnë as ata, ashtu siç nuk na ka nënshtruar as pushtuesi. Për sa kohë që do të zgjas kjo e keqe e madhe për Kosovën, do të kemi këso lloj spektaklesh.”

Komisioni Qendror i Zgjedhjeve do të mblidhet sot nga ora 14:00.

Rendi i ditës:

1. Hyrje: z.Kreshnik Radoniqi, Kryesues i mbledhjes së KQZ-së

2. Shqyrtimi dhe miratimi i procesverbalit Nr.24/2024

3. Aktivitetet e SKQZ

4. Aktivitetet e Zyrës

-Rekomandim për akreditimin e vëzhguesve në procesin e votimit për apo kundër

largimit të kryetarëve të komunave në Leposaviq, Zubin Potok, Zveçan dhe Mitrovicë e

Veriut, 21.04.2024 (Grupi III).

5. Raport i Këshillave të KQZ

5.1.Këshilli për Operacione Zgjedhore

1. Shqyrtimi dhe miratimi i emërimit të anëtarëve të KVV, të listës plotësuese

2. Shqyrtimi dhe miratimi i Kodit të sjelljes për anëtarët e KVV

3. Shqyrtimi dhe miratimi i Planit Operacional për ditën e zgjedhjeve të datës 21 prill 2024

4. Shqyrtimi dhe miratimi i mëditjeve për pagesat e Stafit të Angazhuar në Qendrat e Votimit (QV) dhe në Vendvotime (VV)

5. Shqyrtimi dhe miratimi i aktiviteteve dhe afateve kohore për realizimin e projektit për edukimin dhe informimin e votuesve të rinj

6. Shqyrtimi dhe miratimi i sloganit, përmbajtjes dhe dizajnit të fletëpalosjes, lapsë kimikëve, byzylykëve, stikersave, maicave dhe fletëvotimit për realizimin e projektit për edukimin dhe informimin e votuesve të rinj

7. Njoftim lidhur me fushaten e informimit publik, për procesin e votimit, për apo kundër largimit të kryetarëve në komunat: Leposaviq, Zubin Potok, Zveçan dhe Mitrovicë e Veriut.

5.2.Këshilli për Buxhet dhe Financa

– Shqyrtimi dhe miratimi i mëditjeve për pagesat e Stafit të Angazhuar në Qendrat e

Votimit (QV) dhe në Vendvotime (VV)

5.3. Këshilli për Marëdhënie me Jashtë

1. Shqyrtimi dhe miratimi i pjesëmarrjes së KQZ-së në Programin e Vizitorëve Ndërkombëtarë të Zgjedhjeve të Parlamentit Evropian 2024 në Talin 7-10 qershor 2024

2. Shqyrtimi dhe miratimi i pjesëmarrjes së KQZ-së në Konferencën “Promovimi i kushteve për fushata zgjedhore të lira dhe të ndershme në Ballkanin Perëndimor” në Podgoricë, 14-15 Maj 2024

3. Shqyrtimi dhe miratimi i pjesëmarrjes së KQZ-së në takimin e rradhës të Grupit Punues Rajonal të Evropës dhe Euroazisë për Media Sociale, Dezinformim dhe Integritet Zgjedhor, në Pragë, 16-17 Maj 2024

Ambasada e Italisë në Kosovë sot ka ulur në gjysmështizë flamujt e saj në kujtim të grave dhe vajzave që u vranë nga dhuna me bazë gjinore.

Ambasada tha se i dënon rastet e fundit që ndodhën këtë javë ku dy gra u vranë dhe tha se koha për të vepruar është tash.
“Ne i dënojmë fuqishëm rastet e fundit të femicidit në Kosovë. Duke pasë parasysh njoftimin e Presidentes Vjosa Osmani për shpalljen e ditë zie kombëtare, ne kemi ulur flamujt tonë në gjysmë në kujtim të të gjitha grave dhe vajzave që humbën jetën nga dhuna me bazë gjinore në Kosovë. Koha për të vepruar është tani”, ka shkruar ambasada.

We strongly condemn recent cases of femicide in #Kosovo. Following the announcement of national mourning by @VjosaOsmaniPRKS, we have put our flags at half mast in memory of all women and girls who lost their lives due to gender violence in #Kosovo. Time to act is now! pic.twitter.com/zcljKhjww3

— Italy in Kosovo (@ItalyinKosovo) April 17, 2024

Natasha Kandiq, themeluese e Fondit për të Drejtën Humanitare, ka komentuar ecjen e Kosovën drejt anëtarësimit në Këshillin e Evropës.

Sipas Kandiqit, ky anëtarësim u mundëson qytetarëve të paraqesin ankesa në Gjykatën Evropiane për të Drejtat e Njeriut.

Madje, kundërshtimin e Serbisë, Kandiq e ka cilësuar si autogol.

“Anëtarësimi i Kosovës në Këshillin e Evropës u mundëson qytetarëve të paraqesin ankesa në Gjykatën Evropiane për të Drejtat e Njeriut dhe detyron institucionet që të respektojnë vendimet e asaj gjykate. Kundërshtimi i Serbisë është autogol” – ka shkruar Kandiq.

Članstvo Kosova u Savetu Evrope omogućuje građanima da podnose žalbe Evropskom sudu za ljudska prava a institucije primorava da poštuju odluke tog suda. Protivljenje Srbije je autogol.

— Natasa Kandic (@natasakandic) April 16, 2024

Sipas një raporti të medias gjermane, kandidati kryesor i AfD-së për zgjedhjet e Parlamentit Evropian, Maximilian Krah, është marrë në pyetje nga Byroja Federale e Hetimit (FBI) e SHBA-së në lidhje me pagesat e mundshme nga klientët pro rusë.

”Marrja në pyetje u bë në dhjetor 2023 në SHBA përpara udhëtimit të kthimit të Krah në Gjermani, pas një takimi të republikanëve të rinj në Nju Jork”, raportoi ”Der Spiegel” duke cituar informacionin e ndarë me transmetuesin publik gjerman ZDF.

Krah tha për DPA-në se “unë u mora në pyetje si dëshmitar për kontaktet e mia në Ukrainë. Unë kam dhënë informacion në përputhje me rrethanat”.

Sipas hulumtimit nga ”Der Spiegel” dhe ZDF, hetuesit amerikanë dyshohet se dyshonin për një mesazh chat në të cilin një aktivist pro rus siguroi se një problem me “kompensimin” për “shpenzimet teknike” të Krah ishte zgjidhur.

Formulimi sugjeron që Krah mund të ishte paguar fshehurazi për disa kohë.

Krah vazhdoi duke thënë se ai kurrë nuk i kishte fshehur kontaktet e tij me aktivistin pro rus dhe se ato mund të gjendeshin në llogarinë e tij në Instagram.

“Akuzat janë absurde dhe të sajuara”, tha Krah.

”Der Spiegel” citoi Krah të thoshte se ai nuk kishte marrë “asnjë pagesë, përfitime monetare apo kompensim tjetër” nga aktivisti.

”Aktivisti mund të ketë dashur t’i kthejë paratë për një biletë në oper”, tha ai.

Emri i Krah është shfaqur gjithashtu në lidhje me platformën pro ruse të internetit ”Zëri i Evropës” (VoE).

Sipas ”Der Spiegel”, Krah mohon gjithashtu të ketë pranuar para’ nga VoE.

Zgjedhjet për Parlamentin Evropian janë caktuar për 6-9 qershor.

Ministri i jashtëm serb Ivica Daçiq ka pretenduar se rezoluta për gjenocidin në Srebrenicë, e cila duhet të miratohet sot në OKB, nuk i kontribuon pajtimit dhe konsensusit dhe ka theksuar se ajo që ndodhi në Srebrenicë “nuk mund të cilësohet si gjenocid” sepse “ne e dimë se çfarë është përkufizimi i këtij termi”.

Daçiqi ka deklaruar për televizionin në shërbim të regjimit aktual serb “TV Pink”, se një krim ka ndodhur në Srebrenicë, “por jo gjenocid”, sepse sipas definicionit ky term nënkupton se dikush kishte një plan për të shkatërruar një komb, “gjë që nuk ishte kështu”.

“Keni një krim që është, natyrisht, i tmerrshëm dhe ne vetë si popull serb “insistojmë” që të gjithë ata që janë përgjegjës për të “të mbajnë përgjegjësi”, sepse i është bërë dëm popullit serb në tërësi. Gjenocidi është një vepër penale që nënkupton se ka pasur një plan për të shkatërruar një komb”, ka thënë ky shërbëtor i vogël por besnik i iniciatorit të të gjitha luftërave dhe krimeve si dhe gjenocideve në hapësirat e ish-Jugosllavisë, kriminelit të luftës të quajtur Kasapi i Ballkanit, Sllobodan Millosheviq.

Ky shërbëtor i Millosheviqit, aktualisht në shërbim të Vuçiqit si ministër i jashtëm, gjithashtu ka pretenduar se rezoluta për gjenocidin në Srebrenicë “nuk kontribuon në pajtim” dhe se çështja, e cila do të diskutohet në OKB, “duhet të hiqet nga rendi i ditës”.

“Nëse kemi miratuar një rezolutë të përgjithshme kundër gjenocidit, pse duhet të miratojmë tani një rezolutë individuale dhe t’i shpallim serbët pranë Hutuve si kombet e vetme gjenocidale, pranë të gjithë keqbërësve që ishin në këtë planet. Pra, pranë gjermanëve, turqve dhe të tjerëve ne duhet të shpallemi si gjenocidalë”, ankohet Daçiqi.

Daçiqi, gjithashtu ka thënë se ajo që ndodhi në Srebrenicë “nuk mund të etiketohet si gjenocid” sepse ndodhi në territorin e vetëm një komune në Bosnje dhe Hercegovinë.

“Por nëse kemi diçka që ka ndodhur në territorin e vetëm një komune në Bosnje dhe Hercegovinë, hajde, si mund të deklaroni diçka si gjenocid? Si, ​​kur keni një situatë që nuk është e pranishme në të gjithë territorin. Madje në aktgjykim thuhet se është kryer vetëm në këtë komunë”, përpiqet Daçiq të arsyetojë politikën e tokës së djegur të cilën Serbia ka zbatuar në vitet e 90-ta, pjesë e të cilës politikë ka qenë edhe vet ai.

Në mungesë të kryetarit të trupit gjykues, gjykatësit Gazmend Bahtiri për shkaqe shëndetësore, është anuluar seanca e së mërkurës në rastin e njohur si “Veteranët”.

Një gjë e tillë u bë e ditur nga zyra e gjykatësit Bahtiri, raporton “Betimi për Drejtësi”.

Në këtë rast, për keqpërdorim të detyrës zyrtare akuzohen ish-kryeministri Agim Çeku, ish-ministri i Mbrojtjes, Rrustem Berisha, ish-deputeti Shkumbin Demalijaj, Nuredin Lushtaku, Sadik Halitjaha, Qelë Gashi, Shukri Buja, Ahmet Daku, Faik Fazliu, Smajl Elezaj, Fadil Shurdhaj dhe Xhavit Jashari.

Për këtë rast, më 21 dhjetor 2023 ka dëshmuar ish-komandanti i Zonës Operative të Drenicës, Sami Lushtaku.

Gjykata Themelore në Prishtinë, më 16 prill 2021 të akuzuarit i kishte liruar nga akuza. Por, Gjykata e Apelit më 26 prill 2022 e ka kthyer në rigjykim këtë rast.

Sipas Prokurorisë Speciale të Republikës së Kosovës (PSRK), të akuzuarit duke keqpërdorur detyrën e tyre zyrtare, për kohën sa ishin pjesë e Komisionit Qeveritar për Njohjen dhe Verifikimin e Statusit të Dëshmorit të Kombit, Invalidit, Veteranit, Pjesëtarit dhe të Internuarit të Luftës së UÇK-së, i kanë shkaktuar dëm buxhetit të Kosovës në vlerë prej 88.769.217.04 euro.

Për këto akuza, Gjykata Themelore në Prishtinë kishte marrë aktgjykim lirues edhe më 19 janar 2021.

Aktgjykimi në këtë rast ishte përpiluar tre muaj më vonë, ku PSRK brenda 15 ditësh kishte pasur mundësi të ushtrojë ankesë ndaj këtij aktgjykimi.

Ndryshe, Gjykata Themelore në Prishtinë, më 19 qershor 2019, e kishte konfirmuar aktakuzën për këtë rast, ndërsa këtë vendim e kishte konfirmuar edhe Gjykata e Apelit në gusht të vitit 2019.

Me aktakuzën e PSRK-së, po ashtu ishte kërkuar që Gjykata Themelore në Prishtinë, të urdhërojë Ministria e Punës dhe Mirëqenies Sociale (MPMS), që të pezullonte pagesën e pensioneve për 19 mijë e 500 veteranë, deri në përfundimin e procesit gjyqësor.

Por, më 1 prill 2019, gjykata e kishte refuzuar këtë kërkesë me arsyetimin se propozimi për masën e përkohshme nuk është ndaj të akuzuarve, por ndaj MPMS-së, si palë e tretë.

Kurse pas seancave të mbajtura, Gjykata Themelore në Prishtinë, më 19 janar 2021, ka shpallur aktgjykim lirues ndaj të akuzuarve në këtë rast.

Sipas aktakuzës së përgatitur nga ish-prokurori special, Elez Blakaj, personat e përfshirë thuhet se prej vitit 2011 deri në vitin 2017, duke vepruar si anëtarë të Komisionit Qeveritar për Njohjen dhe Verifikimin e Statusit të Dëshmorit të Kombit, Invalidit, Veteranit, Pjesëtarit dhe të Internuarit të Luftës së Ushtrisë Çlirimtare të Kosovës, kanë shfrytëzuar detyrën dhe autoritetin zyrtar, duke tejkaluar kompetencat me dashje dhe duke mos i përmbushur detyrat zyrtare, me qëllim që të përfitojnë personat e tjerë në mënyrë të kundërligjshme, në vazhdimësi, në dëm të Buxhetit të Republikës së Kosovës.

Në këtë aktakuzë, janë përfshirë 12 persona, të cilët ngarkohen me veprën penale “Keqpërdorimi i pozitës apo autoritetit zyrtar”.

Siç kishte raportuar “Betimi për Drejtësi”, listës së personave të akuzuar i prin Agim Çeku, i pasuar nga Nuredin Lushtaku, Sadik Halitjaha, Shkumbin Demaliaj, Qelë Gashi, Shukri Buja, Ahmet Daku, Rrustem Berisha, Faik Fazliu, Smajl Elezaj, Fadil Shurdhaj dhe Xhavit Jashari.

PSRK-ja, po ashtu i kishte propozuar gjykatës, që ta lëshonte masën për ndalimin e pagesës së pensioneve të fituara në mënyrë të kundërligjshme si veteranë luftëtarë të UÇK-së, deri në përfundimin e procedurës penale.

Tutje, sipas PSRK-së, nga provat e siguruara ishte vërtetuar se nga pagesat e kundërligjshme për veteranët luftëtarë të UÇK-së, buxheti i Republikës së Kosovës ishte dëmtuar në shumë prej 68.153.533.14 euro.

Ndërsa, me aktakuzën e dorëzuar në gjykatë më 7 dhjetor 2018, pretendohet se buxheti i Republikës së Kosovës ishte dëmtuar në shumë prej 88.769.217.04 euro.

Autoritetet në Kosovë u kanë bërë thirrje qytetarëve që janë duke udhëtuar që të shmangin “me çdo kusht” kalimin nëpër territorin e Serbisë.

Kjo thirrje, sipas Ministrisë së Punëve të Jashtme dhe Diasporës dhe Ministrisë së Punëve të Brendshme bëhet “pas situatës së krijuar në pikat kufitare në Serbi dhe ndaljes arbitrare të qytetarëve të Kosovës në vendkalime kufitare”.

“Të gjithë udhëtarët luten që të ndjekin me vëmendje situatën e tensionuar të sigurisë dhe të mos udhëtojnë përmes Serbisë”, u tha në njoftimin e përbashkët të MPJD-së dhe MPB-së.

Thirrja vjen pasi sekretari i Zyrës Ndërlidhëse të Kosovës në Beograd, Fatmir Haxholli, tha se autoritetet në Serbi që nga mesnata “po mbajnë të bllokuar” së paku katër autobusë me targa dhe udhëtarë nga Kosova.

Sipas tij, bllokimi i autobusëve në pikëkalimin kufitar Batrovci, që lidh Serbinë me Kroacinë, është bërë “në shenjë hakmarrjeje dhe nervozizmi absurd” ndaj votimit në Asamblenë Parlamentare të Këshillit të Evropës në mbështetje të anëtarësimit të Kosovës në këtë organizatë.

“Bllokimi i më shumë se 300 qytetarëve, duke ua mbajtur pasaportat dhe dokumentacionet e udhëtimit, është shkelje flagrante jo vetëm e marrëveshjeve të Brukselit, por edhe e të drejtave universale të njeriut të garantuara me të gjitha konventat ndërkombëtare. Vetëm regjimet më autoritare i bllokojnë udhëtarët e një vendi tjetër, me shpjegimin ‘ky është një urdhër nga Beogradi’”, shkroi ai në llogarinë e tij në Facebook.

Haxholli tha se pasi që Zyra Ndërlidhëse serbe është duke komunikuar me Zyrën Ndërlidhëse të Kosovës, duke shtuar se synon që të udhëtojë drejt pikëkalimit kufitar Serbi-Kroaci për të parë nga afër gjendjen e qytetarëve të Kosovës që mbeten të bllokuar atje.

Më 16 prill, në Asamblenë Parlamentare u miratua rekomandimi për pranimin e Kosovës në Këshillin e Evropës. Çështja tani do të dërgohet te Këshilli i Ministrave, që takohet në maj, organ që jep përgjigjen përfundimtare për anëtarësimin e një shteti në këtë organizatë.

Serbia kundërshton anëtarësimin e Kosovës në Këshillin e Evropës dhe ministri i Punëve të Jashtme të Serbisë, Ivica Daçiq, deklaroi pas votimit se shteti i tij do të vazhdojë luftën “me të gjitha forcat” që vendimi të mos miratohet në mbledhjen e ministrave të Jashtëm të Këshillit të Evropës më 16 maj.

Edhe në të kaluarën, qytetarët të Kosovës që kalojnë përmes Serbisë kanë hasur në probleme, me disa prej tyre që janë arrestuar nga autoritetet serbe nën dyshimet për krime lufte.

Ka vdekur sot Zyrafete Lajqi, nëna e Edmond Lajqit, të arrestuarit për vrasjen e gruas së tij në Pejë të martën.

Nëna e të arrestuarit për vrasjen makabre në Pejë ka vdekur në spital, shkruan sot portali Indeksonline.

Sipas raportimit të mediumit, Zyrafete Lajqi po vuante nga një sëmundje e rëndë dhe ishte e shtrirë që një kohë në spital.

Ndërkaq, Edmond Lajqi po mbahet në paraburgim me akuzën se mëngjesin e djeshëm ka vrarë gruan e tij, Gjyljetën. Motivet e vrasjes nuk janë zbardhur ende.