Author: ATVLive

Gjykata Themelore në Prishtinë ka aprovuar kërkesën e Prokurorisë Themelore në Prishtinë, duke ia caktuar masën e paraburgimit në kohëzgjatje prej një muaji, administratorit të grupit “Albkings”.

Lajmin e ka konfirmuar për “Betimi për Drejtësi“, mbrojtësi i të dyshuarit, avokati Besnik Beqiri.

Caktimi i kësaj mase, është bërë pas mbajtjes së seancës dëgjimore.

Presidentja e Republikës së Kosovës, Vjosa Osmani, është nderuar nga Fondacioni Pan-Evropian Richard Coudenhove-Kalergi me Çmimin e Evropës për përkushtimin e saj ndaj raporteve me partnerët euroatlantikë, si dhe përkushtimin ndaj orientimit pro-evropian, demokracisë dhe sundimit të ligjit.

Në njoftimin e publikuar nga Fondacioni, Presidentja Osmani është vlerësuar për qëndrimin politik dhe orientimin e saj të qartë evropian, duke e mbrojtur atë me përkushtim, pavarësisht situatës delikate të sigurisë në rajon dhe kërcënimit të vazhdueshëm nga Serbia.

Mëtej, në njoftimin e publikuar nga Fondacioni Pan-Evropian, Presidentja Osmani është vlerësuar edhe për punën dhe përkushtimin e saj për demokracinë dhe sundimin e ligjit, si dhe për integrimin e Kosovës në Bashkimin Evropian.

Tutje, në njoftim, Presidentja vlerësohet për qëndrimin e saj politik të ndjekur me bindje të plotë ndaj rëndësisë së marrëdhënieve transatlantike, e cila në angazhimin e saj mbështet filozofinë e arkitektit të pavarësisë së Kosovës, presidentit dr. Ibrahim Rugova, i cili u nderua me po këtë çmim, 20 vjet më parë.

Laureatët e këtij çmimi përfshijnë personalitete të ndryshme botërore, përfshirë edhe: ish-Kancelaren Angela Merkel, ish-Presidentin amerikan Ronald Reagan dhe Presidentin historik të Kosovës Dr.Ibrahim Rugova.

Ka përfunduar takimi në mes të emisarit special të Bashkimit Evropian në dialogun Kosovë-Serbi, Miroslav Lajçak, dhe kryenegociatorin e Serbisë, Petar Petkoviq.

Temë e diskutimit të këtij takimi është çështja e dinarit.

Emisari i BE-së më pas do të ketë një takim edhe me kryenegociatorin e Kosovës, Besnik Bislimin.

Raportohet se pritet të ketë edhe një takim trepalësh, gjatë ditës shkruan N1.

Ky është takimi i katërt në mes të Kosovës dhe Serbisë, në përpjekjet për gjetjen e zgjidhjes për çështjen e dinarit.

Më herë Lajçak, pati deklaruar se pret nga palët që të arrijnë një marrëveshje.

Ministri i Punëve të Brendshme, Xhelal Sveçla ka bërë të ditur se zëvendësdrejtori i Policisë së Kosovës, Dejan Jankoviq është dërguar në paraburgim për 48 orë nga autoritetet e Serbisë.

“Gjatë ditës së djeshme është ndaluar edhe zëvendësdrejtori i PK-së, Dejan Jankoviq. Dhjetë pjesëtarë të policisë janë ndaluar pesë janë liruar mbrëmë kurse 4 sot, dhe zv.drejtori vazhdon të jetë i arrestuar. Ai është dërguar dje në Rashkë për tu marrë në pyetje . Sipas informatave të fundit ai është dërguar në paraburgim 48 orësh me akuzën për prishje të rendit kushtetues”, ka thënë Sveçla.

Ai tutje shtoi se kjo akuzë është përmendur nga presidenti serb Aleksandar Vuçiq gjatë vizitës që pati ditë më parë në njësitin ushtarak “Kobra”.

“Me arrestimin e zëvendësdrejtorit Jankoviq, Vuçiq dëshiron të dërgoj mesazh frike për serbët e Kosovës që janë të integruar ose do të integrohen në Policinë e Kosovës”, tha Sveçla.

Ministri kërkoi lirimin e menjëhershëm të zv.drejtorit Jankoviq dhe qytetarëve tjerë që po mbahen nga Serbia.

“Ka edhe qytetar që po mbahen të arrestuar, dhe kërkoj lirimin e tyre të menjëhershëm dhe kthimin e tyre në Kosovë. Ky veprim i Serbisë kërkon ndëshkim nga bashkësia ndërkombëtare”, tha ai.

Kryeministri i Kosovës, Albin Kurti ka thënë se mungesa e sanksioneve ndaj Serbisë e ka trimëruar atë duke bërë arrestime në masë ndaj qytetarëve kosovarë.

Kurti në konferencë për medie pas mbledhjes së qeverisë akuzoi Serbinë si shtet mafioz, derisa theksoi se kryemafiozi është presidenti Aleksandër Vuçiq.

Ndërkaq, ministri i Punëve të Brendshme, Xhelal Sveçla, tha se rreth 1500 qytetarë kosovarë dje janë ndaluar dhe malltretuar nga autoritetet serbe.

Sveçla tha se ky veprim i Serbisë përbënë kërcënim për sigurinë në rajon dhe është një precendtë i rrezikshëm.

Shefi për Politikë të Jashtme i Bashkimit Evropian, Josep Borrel, ka deklaruar se Lindja e Mesme është shumë pranë luftës rajonale.

Sipas tij krerët evropianë duhet t’i kërkojnë “përgjigje të përmbajtur” te Irani pas sulmeve ajrore të fundjavës, raporton CNN.

“Nuk mund të eskalohet. Nuk mund të shkohet hap pas hapi për të ju përgjigjur secilës situatë që shkon më përpara, te lufta rajonale”, është shprehur Borrell me të arritur në Itali për takimin e ministrave të Jashtëm të G7-ës.

“Jemi në cep të një lufte rajonale me Lindjen e Mesme që do të dërgojë lëkundje mbarë botë, veçanërisht në Evropë”.

Komentet e tij vijnë pasi që Sekretari i Jashtëm i Britanisë së Madhe, David Cameron, u bëri thirrje ekonomive më të mëdha globale që të koordinohen për të vendosur sanksione ndaj Iranit.

Kryetari i Aleancës për Ardhmërinë e Kosovës (AAK), Ramush Haradinaj, ka kërkuar nga krerët e institucioneve shtetërore që t’i japin ultimatum Serbisë, për lirimin e zëvendësdrejtorit të Policisë së Kosovës, Dejan Jankoviç, në të kundërtën, ai ka kërkuar që Kosova të veprojë me reciprocitet ndaj zyrtarëve serbë kur të hyjnë në territorin kosovar.

Këto komente, Haradinaj i ka bërë përmes një postimi në Facebook, derisa reagimin e krerëve të shtetit për këtë rast e ka konsideruar si inert.

“Reagimi inert dhe vetëm deklarativ shtetëror i Kosovës për arrestimin e Zv. Drejtorit Jankoviç dhe policëve të Kosovës në Serbi, shpërfaq mungesën e mbështetjes serioze dhe pasigurinë për pjesëtarët e komunitetit serb në institucionet e sigurisë së Kosovës”, shkroi Haradinaj.

Qeveria, Presidenca, Ministria e Punëve të Brendshme dhe Ministria e Punëve të Jashtme, ka theksuar kreu i AAK-së, “do duhej të japin ultimatum të prerë për lirimin e menjëhershëm të tyre, në të kundërtën edhe Kosova do të veprojë me reciprocitet ndaj pjesëtarëve të institucioneve të sigurisë të Serbisë, kurdo që hyjnë në territorin e Kosovës”.