Author: ATVLive

Presidenti i Shqipërisë, Bajram Begaj, në një intervistë për gazetën italiane “Il Tempo”, ka ndarë përshtypjet e tij pas pjesëmarrjes në ceremoninë e varrimit të Papa Françeskut, duke e cilësuar atë si një përvojë unike dhe një shenjë të jashtëzakonshme respekti për figurën e Atit të Shenjtë.

“Në një ceremoni ku morën pjesë liderë nga e gjithë bota – Afrika, Azia, Europa, Amerika Latine, Shtetet e Bashkuara, bota arabe dhe Lindja e Mesme – u dëshmua nderimi i madh për këtë figurë të madhe fetare dhe publike. Papa Françesku edhe një herë na dha një dëshmi të madhështisë së tij: një lumë njerëzish, nga Sheshi ‘Shën Pjetri’ deri te ‘Santa Maria Maggiore’, erdhi për t’i bërë homazh”, tha Presidenti Begaj.

Në intervistë, Presidenti foli edhe për lidhjen e veçantë të Papa Françeskut me Shqipërinë, duke kujtuar se vizita e parë shtetërore jashtë Italisë pas zgjedhjes si Papë ishte pikërisht në Tiranë, njëmbëdhjetë vite më parë. “Një vizitë historike, e krahasueshme me atë të Papa Gjon Palit II pas rënies së komunizmit. Një kujtim që do të mbetet përherë në memorien e popullit tonë”, theksoi ai.

Presidenti Begaj kujtoi gjithashtu dy audiencat që pati me Papa Françeskun, në dhjetor 2022 dhe në maj të vitit të kaluar, duke vënë në dukje vëmendjen dhe dashurinë e Atit të Shenjtë për Shqipërinë dhe shqiptarët. “Papa Françesku kishte një njohje të thellë të shqiptarëve që nga koha kur ndodhej në Argjentinë, përmes komunitetit arbëresh të Buenos Airesit. Ai ishte shumë i lidhur edhe me figurën e Nënë Terezës, Shenjtja shqiptare që ai vetë e kanonizoi”, tha Presidenti.

Duke folur për pjesëmarrjen në funeral, Presidenti Begaj theksoi rëndësinë që ka bashkëjetesa fetare në Shqipëri: “Delegacioni ynë zyrtar përbëhet nga unë dhe dy ministra, por janë të pranishëm edhe udhëheqësit fetarë të vendit: myslimanë, ortodoksë, bektashinj dhe katolikë. Kjo është një dëshmi e harmonisë sonë fetare. Ashtu si edhe njëzet vite më parë, në funeralin e Papa Gjon Palit II, liderët shqiptarë të të gjitha besimeve ishin bashkë.”

Të ngjashme

Forca e Sigurisë së Kosovës përfundoi ushtrimin fushor “Arrow Vravo 25”.

Ky ushtrim synon përgatitjen, koordinimin dhe ngritjen e kapaciteteve taktike dhe operacione të trupave.

Njoftimi i FSK-së:

KFT ka realizuar ushtrimin fushor “Arrow Bravo 25”

Komanda e Forcave Tokësore (KFT),Regjimenti i Tretë i Këmbësorisë(R3K) ka realizuar Ushtrimin Fushor “Arroë Bravo 25”, me qëllim vlerësimin dhe validimin e Kompanisë së Shtabit dhe Kompanisë B në detyrat esenciale për zbatim të misionit.

Kompanitë kanë realizuar operacione të sulmit, mbrojtëse dhe të stabilitetit të cilat kontrolli i UF i planifikoi dhe simuloi që kompanitë të përballen me situata sa më reale, duke vlerësuar shkathtësitë dhe aftësitë e komandimit, vendimmarrjes në kushte stresi, dhe bashkëpunimit ndërmjet strukturave të ndryshme ushtarake.

Ushtrimi Fushor “Arrow Bravo 25”u zhvillua me qëllim përgatitjen, koordinimin dhe ngritjen e kapaciteteve taktike dhe operacionale të trupave pjesëmarrëse, në kuadër të rritjes së ndërveprueshmërisë dhe reagimit të shpejtë në situata të ndryshme kur kërkohet të ofrohet siguri dhe të mbrohet integriteti territorial i Republikës së Kosovës.

Një aksident i rëndë trafiku ka ndodhur në orët e para të mëngjesit të sotëm në fshatin Vogovë të Gjakovës, ku për pasojë një person ka humbur jetën dhe tre të tjerë kanë mbetur të lënduar.

Sipas njoftimit të Policisë së Kosovës, aksidenti ka ndodhur më 27 prill 2025, rreth orës 02:05.

Hetimet paraprake tregojnë se shoferi i një automjeti, gjatë lëvizjes, ka humbur kontrollin mbi veturën dhe është vetaksidentuar.

Për pasojë, një person – mashkull, shtetas i Shqipërisë – ka humbur jetën në vendin e ngjarjes.

Tre persona të tjerë, që ndodheshin në automjet, kanë pësuar lëndime dhe janë dërguar për trajtim mjekësor.

Njësitet policore dhe ekipet emergjente kanë ndërhyrë menjëherë në vendin e ngjarjes për të ofruar ndihmën e parë dhe për të filluar hetimet mbi shkaqet e aksidentit.

Në shënimin e Ditës së Personave të Zhdukur gjatë luftës së fundit në Kosovë, të shtunën janë bërë homazhe te Monumenti i Personave të Zhdukur, pranë Kuvendit të Kosovës, homazhe këto që janë organizuar nga Komisioni Qeveritar për Personat e Zhdukur, raporton Ekonomia Online.

Pas homazheve, kryetari i Komisionit Qeveritar për Personat e Zhdukur, Andin Hoti, tha se të zhdukurit dhe plaga e tyre nuk janë plagë individuale, por një plagë kolektive që prek tërë shoqërinë kosovare.

Ai theksoi se nuk mund të ketë normalitet pa zbardhjen e të vërtetës dhe vendosjen e drejtësisë. Sipas Hotit, të zhdukurit nuk mund të harrohen as të shërohen vetëm me kalimin e kohës, por vetëm atëherë kur e vërteta të dalë në dritë dhe drejtësia të vihet në vend për secilën familje.

“Të zhdukurit dhe plaga jonë nuk është plagë individuale, por është një plagë që e prek gjithë shoqërinë tonë. Është një plagë që nuk mund të ketë normalitet, pa u treguar e vërteta dhe pa ardhur drejtësia në vend. Të zhdukurit nuk mund të shërohen si plagë vetëm me kalimin e kohës. Kjo plagë do të shërohet vetëm kur drejtësia do të vihet në vend dhe e vërteta të tregohet në familje. Zhdukjet, vrasjet apo edhe dërgimi i trupave në frigorifer apo në pajisje të ndryshme bërë varreza masive në Serbi nuk janë thjeshtë akte lufte. Ato janë krim kundër njerëzimit, gjenocid i pastër. Një lloj krimi që në fakt bota e sotme nuk e sheh shpesh herë. Prandaj, ky krim duhet të ketë drejtësi, e që fatkeqësisht ne këtë drejtësi ende po vazhdojmë ta kërkojmë në instanca ndërkombëtare dhe kudo që mundemi. Ne Kosova, qytetarët e Kosovës nuk di të ndalemi derisa personi i fundit i zhdukur të dihet fati i tij”, tha Hoti.

A po e kupton më në fund Donald Trump etjen e Vladimir Putinit për pushtim më shumë sesa për paqe? Një postim i tij në rrjetet sociale, pas takimit me presidentin ukrainas Volodymyr Zelensky, ku sugjeroi se Putini “nuk dëshiron ndoshta ta ndalë luftën” por “po më tërheq me vete dhe duhet trajtuar ndryshe”, i jep Kievit njëfarë shprese se mund të ketë ndryshim në marrëveshjen e propozuar më parë nga Trump, që ai e kishte cilësuar si “të gdhendur në gur”.

Megjithatë, përvoja tregon se momente të tilla kthjellimi nga ana e Trump kanë qenë të rralla dhe jetëshkurtra. Për momentin, Ukraina duhet të përballet ende me pasojat e një ultimatumi të dhimbshëm: një marrëveshje paqeje që shkel ligjin ndërkombëtar dhe parimet bazë të ndershmërisë.

Kushtet e propozuara

Plani, ende jo publik në detaje, parashikon një armëpushim të menjëhershëm dhe bisedime të drejtpërdrejta midis Kievit dhe Moskës. Ukrainës do t’i ndalohej anëtarësimi në NATO, ndërsa do të nënshkruhej një marrëveshje për mineralet dhe infrastrukturën me Shtetet e Bashkuara. SHBA-të, ndërkohë, do të njihnin sovranitetin rus mbi Krimenë dhe de facto kontrollin mbi territoret e tjera të pushtuara, duke hequr sanksionet ndaj Rusisë me mundësinë e rikthimit të tyre në rast të një agresioni të ri.

Për Ukrainën, e lodhur nga një luftë brutale që ka shkaktuar qindra mijëra të vrarë e të plagosur, miliona refugjatë dhe dëme kolosale, këto kushte përbëjnë një çmim të tmerrshëm për një paqe të imponuar.

Pasojat dhe rreziqet

Pranimi i një marrëveshjeje të tillë do të rrezikonte të përsëriste gabimet e kaluara të Perëndimit — si mosndëshkimi i Rusisë pas pushtimit të Gjeorgjisë më 2008 dhe aneksimit të Krimesë më 2014 — duke e inkurajuar Putinin për më shumë agresion në të ardhmen. Po ashtu, një precedent i tillë do të mund ta nxiste Pekinin të ndërmarrë hapa të ngjashëm ndaj Tajvanit.

Pavarësisht kësaj, për një Ukrainë që lufton për mbijetesë dhe që vuan nga mungesa e mbështetjes amerikane në rast të një administrate të re Trump, zgjedhjet janë shumë të kufizuara.

A do të mbijetojë Zelensky?

Një marrëveshje e tillë, megjithëse mund të sillte paqe, do të kërcënonte pozitën politike të presidentit Zelensky. Sondazhet tregojnë se gjysma e ukrainasve mund të jenë të gatshëm të konsiderojnë shkëmbimin e tokës për paqe, por zemërimi për pasojat e luftës do të kërkonte një “fajtor”.

Ka disa lëvizje nga Moska që sugjerojnë fleksibilitet. Rusia, sipas kushteve të reja, do të tërhiqej nga disa territore në jug për të rikthyer aksesin e Ukrainës në lumin Dnipro dhe do të hiqte dorë nga pretendimet për rajone të tjera që aktualisht nuk i kontrollon.

Gjithashtu, megjithëse ndalohet anëtarësimi i Ukrainës në NATO, nuk ndalohet ndihma ushtarake nga aleatë të tjerë dhe pranimi i saj në Bashkimin Evropian — që do të garantonte perspektivë sigurie dhe zhvillimi afatgjatë.

Çfarë duhet bërë?

Nëse marrëveshja imponohet, aleatët e Ukrainës duhet të sigurojnë që vendi të mbetet sovran, demokratik dhe i mbrojtur. Kjo përfshin riarmatimin, ndihmën për rindërtimin e infrastrukturës civile dhe forcimin e mbrojtjes së kufijve të rinj. Gjithashtu, konfiskimi i aseteve të ngrira ruse mund të përdoret për të financuar procesin e rindërtimit.

Ukraina mund të ndjekë shembuj si ai i Gjermanisë Lindore dhe Kroacisë, ku territore të humbura u rikuperuan pas dekadash. Për këtë, është thelbësore që Ukraina të ndërtojë një shtet të fortë dhe të suksesshëm që të mbijetojë dhe të përballojë çdo kërcënim të ardhshëm nga Rusia.

Edhe pse kjo marrëveshje i jep më shumë fitime Putinit sesa Kievit, ajo mund të jetë, me gjithë dhimbjen, alternativa më e mirë që Ukraina mund të sigurojë në rrethanat aktuale. Nëse nuk arrihet një ndryshim i madh përmes diplomacisë, Zelensky dhe kombi i tij mund të detyrohen ta pranojnë këtë kompromis — jo si dorëzim, por si një hap të përkohshëm drejt një të ardhme më të sigurt dhe më të ndritur.

Të paktën nëntë njerëz kanë vdekur në Vankuver pasi një veturë e shtypi turmën e njerëzve në një festival rrugor në qytetin perëndimor të Kanadasë, njoftoi policia të dielën.

Policia tha se e ka arrestuar një 30-vjeçar nga Vankuveri në vendin e ngjarjes dhe se i dyshuari është “i njohur” për ta, por nuk dha më shumë hollësi. I dyshuari fillimisht ishte ndaluar nga njerëzit në vendin e ngjarjes.

“Në këtë çast, jemi të bindur se ky incident nuk ishte akt terrorizmi”, tha policia e Vankuverit në një postim në X.

Incidenti ndodhi pak pas orës 20:00, me kohën lokale, pranë një rruge ku po zhvillohej Festa e Ditës së Lapu Lapu, në nderim të një heroi kombëtar filipinas.

Kryeministri kanadez, Mark Carney, tha në X: “Jam i shkatërruar nga lajmi për ngjarjet tragjike në festivalin Lapu Lapu në Vankuver këtë mbrëmje”.

Jagmeet Singh, udhëheqës i Partisë Demokratike të Re të Kanadasë, ishte në mesin e pjesëmarrësve në këtë festival, por u largua disa minuta para se automjeti të mbërrinte, raportoi CTV News.

“Është e tmerrshme, nuk di çfarë të them”, citohet Singh nga CTV. “Isha aty dhe më shfaqen në mendje fytyrat e fëmijëve që pashë duke buzëqeshur dhe kërcyer”.

Një dëshmitar, i cili nuk dëshiroi të identifikohej, tha se kishte parë rreth 15 persona të shtrirë në tokë pasi një veturë e zezë shtypi turmën me shpejtësi. Dëshmitari tha se drejtuesi i mjetit kishte tentuar të arratisej, por ishte ndjekur nga pjesëmarrësit e festivalit dhe ishte mbajtur pranë një gardhi për rreth 10 minuta deri sa mbërriti policia.

Gazeta Vancouver Sun raportoi se mijëra njerëz ndodheshin në atë zonë.

Deputeti i LDK-së, Arben Gashi, tha se pret që Lëvizja Vetëvendosje të bëhet më e përgjegjshme për kapërcimin e bllokadës së krijuar në Kuvend, raporton EO.

“Është tentim i radhës për të zgjedhur kryetaren apo kryetarin e Kuvendit. Duket që jemi në një bllokadë. Është për keqardhje situata, por pres që të gjitha partitë politike, duke filluar nga Vetëvendosje të bëhen më të përgjegjshme dhe të gjendet një zgjidhje. Mendoj se presidentja në këtë rast nuk ka kompetenca. Është çështje kryekëput e partive politike dhe e Kuvendit”, tha Gashi.

Ministri në detyrë i Financave, Hekuran Murati, tha se ata që votojnë kundër zgjedhjes së kryetarit të Kuvendit bëjnë bllokadë, raporton EO.

“Nuk u arrit që të realizohet me sukses konstituimi i Kuvendit. Ne si parti fituese kemi kryer obligimin tonë kushtetues, duke propozuar kandidatin dhe duke votuar për. Me votë për nuk bëhet bllokadë. Më votë kundër bëhet bllokada. Ne vazhdimësi kanë qenë 57 vota për dhe janë të përfaqësuara të gjitha komunitetet pakicë. Ne sot e pamë një ndryshim që tek votat kundër pati një rënie. 46 vota kundër kanë qenë herën e kaluar, sot ishin 41 vota kundër. Ftesa ka qenë publike nga kryesuesi i seancës. Ne jemi të gatshëm që të marrim pjesë sa herë që na ofrojnë. Janë subjektet e tjera që kundërshtojnë dhe nuk marrin pjesë”, tha Murati.