Author: A.M.

Real Madridi ka marrë një tjetër goditje para fazës përmbyllëse të sezonit, pasi Dani Carvajal është përjashtuar zyrtarisht për shkak të lëndimit. Klubi spanjoll ka publikuar një komunikatë mjekësore, duke konfirmuar shkallën e problemit të mbrojtësit dhe duke shtuar shqetësime në një sezon tashmë të vështirë.

Edhe pse njoftimi zyrtar nuk jep një afat rikuperimi, mediat spanjolle sugjerojnë se Carvajal mund të mungojë rreth dy javë. Bazuar në këtë periudhë, ai pritet të humbasë ndeshjet e rëndësishme ndaj Espanyolit, Barcelonës dhe Real Oviedos, ndërsa përballja me Sevillën mbetet gjithashtu e pasigurt.

Megjithatë, ekziston mundësia që ai të rikthehet në kohë për ndeshjen e fundit të sezonit kundër Athletic Bilbaos, një takim që mund të ketë rëndësi të veçantë, pasi mund të përfaqësojë paraqitjen e tij të fundit me klubin.

Minutat e kufizuara kanë reduktuar tashmë ndikimin e tij këtë sezon, me mbrojtësin që ka regjistruar vetëm 885 minuta në të gjitha garat. Nën drejtimin e Alvaro Arbeloas, mundësitë kanë qenë të pakta, dhe kjo mungesë e fundit vetëm sa ia shton vështirësitë ekipit.

Barcelona ka kthyer vëmendjen te Liga Premier, duke identifikuar Jeremy Doku si zëvendësuesin ideal për repartin sulmues në të ardhmen e afërt.

Kjo lëvizje lidhet drejtpërdrejt me të ardhmen e Raphinhas, i cili ka zgjuar interes të madh nga Superliga e Arabisë. Klubet arabe do të ishin të gatshme të paguajnë deri në 100 milionë euro për anësorin brazilian, një shifër tejet joshëse për ekonominë e Barcelonës.

Përballë mundësisë së largimeve të mëdha, drejtuesit teknikë po kërkojnë një profil që garanton depërtim, shpërthim dhe “energji të pastër” në skemën sulmuese. Paqartësia rreth vazhdimësisë së Marcus Rashfordit, i cili aktualisht luan në huazim, e forcon edhe më shumë nevojën për të kërkuar elementë të rinj me peshë në treg.

Talenti i kombëtares së Belgjikës po shfaqet si opsioni i preferuar i Hansi Flickut, i cili synon t’i japë skuadrës një vertikalitet shkatërrues. Barcelona vlerëson se momenti për ta realizuar këtë transferim është i përshtatshëm, sidomos për faktin se te Manchester City po ndihet fundi i një cikli. Largimi i mundshëm i Pep Guardiolës për një pushim profesional ka ngritur dyshime te disa pjesëtarë të skuadrës së “Qytetarëve”.

Doku, i cili ka kontratë deri në verën e vitit 2028, thuhet se do ta shihte shumë pozitivisht një ndryshim drejt ngrohtësisë së Mesdheut spanjoll. Aftësia e tij për të krijuar rrezik është e padiskutueshme; ai ka shënuar pesë gola dhe ka dhënë 14 asistime në 41 ndeshje zyrtare.

Operacioni vlerësohet rreth 80 milionë euro, shumë që klubi blaugranas besohet se do ta mundësonte pa vështirësi.

Play-off-i i basketbollit të Kosovës hyn në një fazë vendimtare këtë fundjavë, me zhvillimin e ndeshjeve të katërta gjysmëfinale, të cilat mund të përcaktojnë edhe dy skuadrat finaliste.

Në përballjen e parë, Bora pret Bashkimi në palestrën “1 Tetori” në Prishtinë. Skuadra nga Prizreni udhëheq serinë 2:1 dhe ka mundësinë që me një fitore ta sigurojë finalen, ndërsa Bora kërkon barazimin për ta çuar serinë në ndeshje vendimtare.

Një ditë më vonë, vëmendja zhvendoset në Pejë, ku Peja përballet me Trepça. Edhe këtu mitrovicasit kanë epërsinë 2:1 dhe synojnë ta mbyllin serinë, ndërsa vendasit kërkojnë reagim për të mbetur në garë për finale.

Të dyja ndeshjet nisin nga ora 19:30 dhe pritet të sjellin spektakël e tension maksimal, pasi çdo gabim mund të jetë vendimtar.

Nëse Bashkimi dhe Trepça triumfojnë, finalistët do të dihen menjëherë. Por në rast se Bora dhe Peja arrijnë fitore, atëherë gjithçka do të vendoset në ndeshjet e pesta, ku drama e play-off-it do të arrijë kulmin.

Gjatë javëve të fundit kanë qarkulluar shumë spekulime për një rikthim të mundshëm të José Mourinhos te Real Madridi. Trajneri portugez, i cili e drejtoi skuadrën në “Santiago Bernabéu” nga viti 2010 deri në 2013, konsiderohet kandidati i preferuar i presidentit Florentino Pérez për të marrë drejtimin, në rast se Álvaro Arbeloa shkarkohet, siç pritet.

Mourinho vazhdon të jetë një figurë e vlerësuar brenda klubit, ndërsa te tifozët opinionet mbeten të ndara, sidomos pas komenteve të tij lidhur me polemikat e fundit që përfshinë Vinícius Júnior dhe Gianluca Prestianni.

Edhe lojtarët kanë dhënë mendimin e tyre, teksa mundësia e rikthimit të Mourinhos po bëhet gjithnjë e më konkrete. Sipas gazetarit Gastón Álvarez, dhoma e zhveshjes te Real Madridi nuk e ka portugezin si zgjedhjen e parë për sezonin e ardhshëm, pasi preferon Jürgen Kloppin.

“Klopp pëlqehet shumë më tepër se Mourinho. Mourinho është një ‘bombë me sahat’ dhe, në një dhomë zhveshjeje ku ka mënyra të caktuara veprimi dhe njëfarë egoizmi, një njeri si ai mund të përplaset drejtpërdrejt me ta, dhe ata e dinë këtë”, citohet të ketë thënë Álvarez.

Më tej, gazetari shpjegoi edhe pse Pérez e vlerëson kaq shumë Mourinhon. Edhe pse Klopp konsiderohet si kandidati ideal nga shumë brenda klubit, ardhja e portugezit shihet si një mënyrë për të rikthyer entuziazmin te tifozët pas dy sezoneve zhgënjyese.

“Florentino e di se ai që i entuziazmon tifozët është Klopp, por gjithashtu e di se nëse vjen Mourinho, pas disa javësh, zhurma që krijon figura e tij do t’i bëjë tifozët të harrojnë gjithçka që ka ndodhur”, shtoi ai.

Mbetet për t’u parë se si do të zhvillohet kjo situatë te Real Madridi në javët në vijim.

Luka Modrić po përballet me një vendim të madh për të ardhmen e tij, pasi pësoi një dëmtim në fytyrë gjatë paraqitjes me Milanin.

40-vjeçari kroat tani duhet të zgjedhë mes vazhdimit të aventurës në “San Siro” ose mbylljes së një karriere të jashtëzakonshme. Modrić është përjashtuar për pjesën e mbetur të sezonit në Serie A, pasi pësoi frakturë të mollëzës në një përplasje me Manuel Locatelli gjatë barazimit 0-0 të Milanit me Juventus FC.

Mesfushori kroat ka nevojë për ndërhyrje kirurgjikale dhe do t’i mungojë Milanit në katër ndeshjet e fundit të kampionatit.

Pavarësisht dëmtimit, kjo situatë nuk ia ka zbehur dëshirën për të vazhduar të luajë. Sipas raportimeve të La Gazzetta dello Sport, ish-ylli i Real Madrid CF po anon drejt aktivizimit të klauzolës për zgjatjen edhe për një vit të kontratës me Milanin.

Modrić ka pasur rol kyç në mesfushën e “Rossonerëve” këtë sezon, duke zhvilluar më shumë minuta sesa në cilindo nga pesë sezonet e tij të fundit në Madrid. Veterani mbetet i vendosur ta përfundojë karrierën sipas kushteve të tij.

Raporti shton se motivimi kryesor i Modrić është mundësia për ta mbyllur karrierën duke garuar në nivelin më të lartë të futbollit evropian. Qëndrimi në “San Siro” do t’i jepte mundësinë të synojë edhe një herë një rrugëtim të fundit në Ligën e Kampionëve.

Mesfushori thuhet se ka ndërtuar një mirëkuptim të fortë taktik me trajnerin e Milanit, Massimiliano Allegri, i cili është mbështetur shumë te kroati për të kontrolluar ritmin e lojës së skuadrës.

Drejtuesit e Milanit besohet se janë të gatshëm ta zgjasin qëndrimin e Modrić vetëm me miratimin e lojtarit, duke reflektuar respektin e ndërsjellë të krijuar që nga ardhja e tij në klub.

FC Barcelona ka disa çështje për të zgjidhur para hapjes së afatit kalimtar veror në fillim të korrikut, dhe njëra prej tyre lidhet me kontratën e sulmuesit veteran, Robert Lewandowski.

Kontrata aktuale e polakut skadon në fund të qershorit dhe, ndonëse klubi katalanas i ka ofruar rinovim, ende nuk ka një përgjigje përfundimtare nga ana e lojtarit. Me kalimin e javëve, po shtohen gjasat që ai të largohet nga Barcelona në fund të sezonit.

Në rast largimi, destinacioni më i mundshëm duket Italia. Për Lewandowskin kanë shfaqur interes disa klube të mëdha si Juventus FC, Inter Milan dhe AC Milan.

Juventusi është klubi më i avancuar në këtë drejtim, pasi tashmë ka zhvilluar bisedime me përfaqësuesit e lojtarit dhe i ka paraqitur një ofertë konkrete. Sipas raportimeve nga mediat italiane, drejtuesit e klubit torinez besojnë se marrëveshja mund të arrihet brenda javëve të ardhshme.

“Zonja e Vjetër” pritet të ndahet me Dušan Vlahović dhe e sheh Lewandowskin si zëvendësuesin ideal në repartin ofensiv. Brenda klubit ekziston bindja se sulmuesi polak do të largohet nga Barcelona në fund të sezonit.

Nga ana tjetër, një largim i Lewandowskit do të ishte i dobishëm edhe për Barcelonën në aspektin financiar. Kursimi i pagës së tij do t’i ndihmonte katalanasit të regjistrojnë përforcimet e reja në La Liga, duke shmangur problemet që kanë hasur në sezonet e fundit.

Vendimi përfundimtar tani mbetet në duart e vetë lojtarit, i cili pritet të sqarojë të ardhmen e tij në javët në vijim.

Mohamed Salah, i cili pritet të largohet nga Liverpool FC këtë verë, do ta shfrytëzojë Botërorin e kësaj vere për të vendosur se ku do ta vazhdojë karrierën e tij në nivel klubesh.

Salah e njoftoi largimin nga “Anfield” në mars, duke i dhënë fund një periudhe nëntëvjeçare në Merseyside, gjatë së cilës fitoi pothuajse çdo trofe të mundshëm me klubin. Egjiptiani pati një rol kyç sezonin e kaluar, duke ndihmuar Liverpoolin të fitojë titullin e Premier League.

Edhe pse kishte negociuar një vazhdim kontrate në vitin 2025, e cila pritej të zgjaste edhe dy vite, ai arriti një marrëveshje për ndërprerje me konsensus me klubin, duke u bërë lojtar i lirë këtë verë.

Në garë për firmën e tij është përmendur edhe Fenerbahçe, që thuhet se i ka ofruar një pagë vjetore prej rreth 20 milionë eurosh.

Megjithatë, sipas raportimeve, Salah po shqyrton seriozisht edhe një transferim në Major League Soccer (MLS) në Shtetet e Bashkuara. Liga amerikane është e interesuar ta afrojë yllin egjiptian, ndërsa klubi nga San Diego po përmendet si një nga destinacionet më të mundshme.

Vendimi përfundimtar i Salah pritet të merret gjatë ose pas Botërorit të kësaj vere, ku ai synon të përqendrohet fillimisht te paraqitjet me kombëtaren e tij.

Më 2 dhe 3 maj 2026, në Stamboll të Turqisë do të mbahet Kupa Evropiane për juniorë. Kosovën do ta përfaqësojnë: Estea Arifaj -52 kg, Laurinë Gashi -52 kg, Enise Zijade -57 kg, Erlule Musaj -63 kg dhe Sidorela Dodaj -63 kg.

Ekipi ynë do të udhëhiqet nga trajnerët Driton Kuka, Majlinda Kelmendi dhe Kushtrim Gashi.

Kjo garë do të mbledhë gjithsej 512 garues/e, 309 meshkuj dhe 203 femra, nga 27 shtete dhe 3 kontinente.

Erlulja dhe Sidorela do të ndeshen të shtunën, ndërsa Estea, Laurinë dhe Enise do të ndeshen të dielën, njofton Federata e Xhudos e Kosovës (FXHK).

Trajneri i Barcelonës, Hansi Flick, ka konfirmuar se Raphinha dhe Marc Bernal do të jenë pjesë e udhëtimit për përballjen ndaj CA Osasuna në Pamplona këtë fundjavë, ndërsa skuadra e tij synon të afrohet edhe më shumë me titullin e La Liga-s. Barcelona rikthehet në “El Sadar”, vendi ku Flick pësoi humbjen e tij të parë si trajner i Barcelonës, për ndeshjen që do të luhet të shtunën në orën 21:00.

Flick u pyet për atë ndeshje dhe më herët kishte vlerësuar cilësinë e Osasunës, përfshirë edhe sulmuesin Ante Budimir. “E mbaj mend atë ditë sepse bëmë shumë ndryshime në formacionin titullar. Nesër nuk do ta bëjmë këtë. Mendoj se tani jemi në një moment të mirë. E di gjithashtu që Osasuna po luan mirë dhe një nga objektivat e tyre është të luajnë në Evropë sezonin e ardhshëm. Si gjithmonë, duhet të japim maksimumin,” u shpreh ai.

Barcelona ka mundësinë të arrijë në 100 pikë këtë sezon nëse fiton pesë ndeshjet e mbetura, por kjo nuk është diçka që e shqetëson trajnerin gjerman. “Ne jemi të fokusuar vetëm te ndeshja e radhës. Nuk jam i mirë me numrat. Do të ishte perfekte nëse i fitojmë të gjitha ndeshjet, por kemi ende kundërshtarë të vështirë. Duhet të luajmë në nivelin tonë më të mirë. Kjo është filozofia dhe mentaliteti ynë. Jam i kënaqur me atë që po shoh në stërvitje. Skuadra është 100% e fokusuar,” theksoi Flick.

Barcelona mund të rikthejë një nga lojtarët kyç në sulm, Raphinha, i cili ka munguar gjatë gjithë muajit prill për shkak të një lëndimi. Edhe Andreas Christensen dhe Marc Bernal janë stërvitur me ekipin. “Lëndimet ndodhin. Rapha gjithmonë jep 100%. Kjo është mentaliteti dhe qëndrimi i tij. Ai na ndihmon shumë, por ka pasur vështirësi këtë sezon. Është e rëndësishme ta kemi sërish. Do të udhëtojë me ekipin dhe do të shohim çfarë do të ndodhë. Ai është kapiten. Ndoshta do të na japë atë që na duhet,” përfundoi trajneri i Barcelonës

Anthony Joshua ka zgjedhur të zhvillojë një ndeshje “ngrohëse” para përballjes së madhe me Tyson Fury, sipas trajnerit të njohur Shane McGuigan.

McGuigan ka paralajmëruar Joshuan se ndeshja kundër shqiptarit Kristian Prenga nuk do të jetë e lehtë, veçanërisht në aspektin emocional. Britaniku do të stërvitet pa disa nga miqtë e tij që humbën jetën në një aksident muaj më parë.

“Stërvitjet janë vende të vetmuara. Boksi është një sport i vjetër dhe i vështirë, dhe nëse nuk e bën për para, por për kënaqësi, ndoshta kënaqësia nuk është më ajo që ka qenë dikur,” tha McGuigan për “Sky Sports”.

Ai shtoi se Joshua duhet të ketë guxim për të përballuar një sfidë të madhe si ajo me Tyson Fury dhe se ndeshja kundër Prengës është një hap i nevojshëm për t’u përgatitur fizikisht dhe emocionalisht.

Përballja mes Joshua dhe Prengës do të zhvillohet më 25 korrik në Arabinë Saudite.