Author: A.M.

Kosova po vazhdon përgatitjet për ndeshjet miqësore të muajit qershor, ku “Dardanët” fillimisht do të përballen me Çekinë, ndërsa një javë më vonë do të luajnë ndaj Andorrës.

Megjithatë, lajmi i keq për përfaqësuesen është lëndimi i mesfushorit Andi Hoti në stërvitjen e djeshme. Pas kontrolleve mjekësore është konfirmuar se ai nuk do të jetë pjesë e grumbullimit të Kosovës për këto dy ndeshje.

Hoti pritet të qëndrojë jashtë fushave për disa javë dhe do të udhëtojë drejt Gjermanisë për ekzaminime shtesë dhe trajtim të mëtejshëm.

Krerët e Mallorcas raportohet se kanë përcaktuar çmimin për kartonin e sulmuesit të Kombëtares së Kosovës, Vedat Muriqi, i cili pritet të largohet gjatë afatit kalimtar të verës.

32-vjeçari ka kontratë me klubin spanjoll deri në vitin 2029, por rënia e Mallorcas nga La Liga ka ndryshuar planet e të gjitha palëve.

Sipas mediave spanjolle, Mallorca kërkon të paktën 18 milionë euro për transferimin e Muriqit, një shumë dukshëm më e ulët krahasuar me vlerësimin prej rreth 30 milionë eurosh që klubi kishte para rënies në kategorinë e dytë të futbollit spanjoll.

Interesimi për sulmuesin kosovar mbetet i madh. Ditë më parë u raportua se Muriqi ka arritur marrëveshje personale me Aziz Yildirimin, kandidatin për president të Fenerbahçes, për një rikthim të mundshëm në futbollin turk.

Përveç Fenerbahçes, interesim për shërbimet e tij kanë shfaqur edhe Galatasaray, Charlotte FC dhe gjiganti spanjoll Barcelona.

Muriqi zhvilloi një sezon fantastik në La Liga, duke realizuar 23 gola dhe duke qenë lojtari kryesor i Mallorcas në repartin ofensiv.

Eksperti i transferimeve, Fabrizio Romano, ka konfirmuar se Barcelona ka dorëzuar ofertën e parë zyrtare për sulmuesin e Atletico Madridit, Julian Alvarez.

Pas kompletimit të transferimit të Anthony Gordon nga Newcastle United, klubi katalanas është fokusuar plotësisht te transferimi i Alvarezit.

Sipas Romanos, Barcelona i ka ofruar Atletico Madridit 100 milionë euro për sulmuesin argjentinas, pa përfshirë bonuse apo lojtarë në marrëveshje.

“Barcelona i dërgoi ofertën e parë zyrtare Atletico Madridit për Julian Alvarez me vlerë 100 milionë euro. Pa bonuse, pa lojtarë të përfshirë”.

“Atletico nuk është i kënaqur me situatën gjatë 24 orëve të fundit, por Juliani tashmë ka kërkuar të largohet”, ka shkruar Romano.

Alvarez ka qenë gjithashtu në radarët e kampionit aktual të Evropës, PSG-së, por sipas raportimeve, lojtari preferon transferimin te Barcelona.

E ardhmja e mbrojtësit të Liverpoolit, Ibrahima Konate, mbetet e paqartë për shkak të ngecjes së bisedimeve për rinovimin e kontratës me klubin anglez.

Sipas raportimeve të gazetës franceze L’Equipe, palët ende nuk kanë arritur marrëveshje për kushtet e kontratës së re dhe negociatat kanë mbetur të bllokuara.

Arsyeja kryesore e mosmarrëveshjes lidhet me aspektin financiar dhe strukturën e marrëveshjes së re, pas një sezoni zhgënjyes të Liverpoolit.

Mbrojtësi francez pritet të largohet nga klubi si lojtar i lirë, ndërsa disa nga klubet më të mëdha evropiane po e ndjekin nga afër situatën e tij.

Në mesin e skuadrave të interesuara për 27-vjeçarin janë Real Madridi, Bayern Munichu dhe Chelsea.

Sipas mediave franceze, vetë lojtari dëshiron të vendosë për të ardhmen e tij para fillimit të Kupës së Botës 2026.

Përzgjedhësi i Argjentinës, Lionel Scaloni, ka publikuar listën përfundimtare prej 26 futbollistësh për Kupën e Botës 2026, me Lionel Messin që do të mbajë sërish shiritin e kapitenit në mbrojtje të titullit botëror.

Pavarësisht shqetësimeve për një lëndim në kofshën e majtë, Messi është përfshirë në listën finale dhe pritet të udhëheqë skuadrën e kampionëve në fuqi gjatë turneut më të madh të futbollit botëror.

Për yllin argjentinas, kjo do të jetë paraqitja e gjashtë në Kupën e Botës, duke vazhduar të shkruajë histori me fanellën e Argjentinës. Sulmuesi, i cili muajin e ardhshëm mbush 39 vjeç, mbetet figura kryesore e skuadrës së Scalonit.

Lista e publikuar përfshin shumicën e lojtarëve që triumfuan në Katar 2022, por nuk mungojnë as disa emra të rinj që kanë bindur me paraqitjet e tyre gjatë eliminatoreve dhe ndeshjeve miqësore.

Megjithatë, trajneri ka lënë jashtë disa emra të njohur. Mungesat më të komentuara janë talenti i Real Madridit, Franco Mastantuono, si dhe mesfushori i Real Betisit, Giovani Lo Celso.

Kombëtarja e Spanjës ka zbuluar listën prej 26 futbollistësh për botërorin 2026, në një event të veçantë të mbajtur në Movistar Space në Gran Vía të Madridit.

Në mënyrë jo të zakonshme, njoftimi i listës nuk u bë direkt nga trajneri Luis de la Fuente, por u zbulua fillimisht nga Mbreti dhe Mbretëresha e Spanjës, ndërsa më pas lista u lexua publikisht nga Mbreti Filipi VI, me prezantimin e lojtarëve nga qytetarë të ndryshëm.

Eventi u organizua nga Jesús Navas, kampion bote me Spanjën në vitin 2010, duke i dhënë një karakter simbolik prezantimit të skuadrës.

Procesi i përzgjedhjes së skuadrës ka zgjatur që nga marsi i vitit 2023, periudhë gjatë së cilës janë testuar 77 lojtarë. Në këtë periudhë, Spanja ka fituar Kampionatin Evropian dhe UEFA Nations League, si dhe ka arritur finalen në edicionin e kaluar të turneut.

Në listën finale nuk ka shumë surpriza në emrat kryesorë, me lojtarë si Mikel Merino, Nico Williams dhe Lamine Yamal që mbeten pjesë e rëndësishme e skuadrës.

Në portë është përzgjedhur Joan García, duke fituar garën ndaj Álex Remiro. Në mbrojtje bien në sy emrat e Aymeric Laporte, Pau Cubarsí dhe Eric García.

Në mesfushë bëjnë pjesë Rodri, Pedri dhe Fabián Ruiz, ndërsa në sulm spikasin Ferran Torres dhe Borja Iglesias.

Një nga vendimet e fundit të stafit teknik ishte përfshirja e Yeremy Pino, i cili zëvendëson të dëmtuarin Fermín, duke shtuar fleksibilitet në repartin ofensiv të skuadrës spanjolle.

Albion Rrahmani ka vazhduar me paraqitje mbresëlënëse në Czech First League, duke shkëlqyer me fanellën e AC Sparta Prague.

Sulmuesi dardan realizoi gol në fitoren 2:1 të Sparta Pragës ndaj FC Hradec Králové, duke qenë një nga lojtarët më të mirë në fushë.

Falë golit dhe paraqitjes së tij shumë të mirë, Rrahmani është përfshirë në formacionin e javës nga SofaScore.

25-vjeçari e mbyll kështu sezonin me statistika shumë pozitive, duke regjistruar 16 gola dhe 4 asistime në 49 paraqitje zyrtare me Sparta Pragën.

Kombëtarja e Kosovës ka bërë publike listën për ndeshjet miqësore ndaj Çekisë dhe Andorrës.

Përzgjedhësi Franco Foda ka ftuar gjithsej 25 futbollistë për këto dy ndeshje,ku përfshihen emra të rinj në grumbullim si dhe ata që janë rikthyer pas një kohe.

Ndër emrat që janë rikthyer tek “Dardanët”janë lojtarët si Leon Avdullahu i cili nuk ishte në grumbullimin për dy finalet e play-off-it të Kupës së Botës shkaku i lëndimit,teksa pas një kohe të gjatë janë rikthyer edhe Muharrem Jashari,Bersant Celina,Andi Hoti dhe Ron Raçi.

Foda ndërkohë nga emrat ka ftuar këta futbollistë si: Valmir Matoshi, Dardan Shabanhaxhaj dhe Rilind Nivokazi,të cilët janë grumbulluar për herë të parë tek Kombëtarja e Kosovës,kurse nuk janë ftuar lojtarët kryesorë si Vedat Muriqi,Amir Rrahmani,Valon Berisha,Florent Hadergjonaj dhe Milot Rashica.

Nga këto miqësore “Dardanët”synojnë që të nxjerrin rezultate pozitive,në mënyrë që të jenë gati për aventurën në Ligën e Kombeve që do të nis në shtator ku Kosova është në grup me Austrinë,Irlandën dhe Izraelin.

Kujtojmë që Kosova së pari e zhvillon miqësoren kundër Çekisë në Pragë më 31 maj,e më pas ndaj Andorrës më 7 qershor kundër Andorrës në stadiumin “Fadil Vokrri”në Prishtinë.