Author: A.M.

Sulmuesi i Kosovës, Vedat Muriqi, mund të rikthehet në futbollin turk dhe te një klub që e njeh shumë mirë. Mediat turke raportojnë se “Pirati” është një nga objektivat kryesorë të drejtuesve të ardhshëm të Fenerbahçe.

Sipas gazetarit turk Yagiz Sabuncuoglu, ekziston një marrëveshje e plotë mes sulmuesit të RCD Mallorca dhe Aziz Yıldırım, i cili pritet të kandidojë për postin e presidentit të Fenerbahçes në zgjedhjet e muajit qershor.

Ndërkohë, Mallorca po e ndjek me qetësi situatën, pasi klubi spanjoll pret të përfitojë një shumë të konsiderueshme nga transferimi i mundshëm i sulmuesit kosovar.

Fillimisht u raportua se Mallorca ishte e gatshme të ndahej me Muriqin vetëm për një shumë rreth 18 milionë euro. Megjithatë, duke pasur parasysh dëshirën e fortë të lojtarit për t’u larguar nga Spanja, palët pritet të ulen në bisedime për të rishikuar kushtet e transferimit.

Muriqi nuk është një emër i panjohur për tifozët e Fenerbahçes. Ai ishte pjesë e skuadrës turke gjatë sezonit 2019/20, ku me paraqitjet e tij të mira tërhoqi vëmendjen e klubeve evropiane dhe më pas vazhdoi karrierën jashtë Turqisë.

Nëse transferimi realizohet, ky do të ishte një rikthim i bujshëm për sulmuesin kosovar, i cili vazhdon të mbetet një nga futbollistët më të rëndësishëm të Kosova.

Barcelona ka nisur me vrull merkaton e verës, duke zyrtarizuar transferimin e sulmuesit anglez Anthony Gordon.

Klubi katalanas konfirmoi se Gordon ka nënshkruar një kontratë afatgjatë, e vlefshme deri në vitin 2031, duke u bërë kështu përforcimi i parë i madh i skuadrës për sezonin e ri.

Presidenti Joan Laporta arriti të mposhtë konkurrencën e fortë për shërbimet e futbollistit, pasi interesim për të kishin shfaqur edhe Bayern Munich dhe Liverpool.

Sipas raportimeve, Barcelona pagoi 70 milionë euro menjëherë, ndërsa marrëveshja përfshin edhe 10 milionë euro të tjera në formë bonusesh. Investimi konsiderohet një nga lëvizjet më të rëndësishme të verës për klubin katalanas, i cili synon të forcojë edhe më shumë repartin ofensiv të drejtuar nga Hansi Flick.

Gjatë prezantimit zyrtar, Gordon nuk i fshehu emocionet për transferimin në “Camp Nou”, duke e cilësuar këtë moment si realizimin e një ëndrre.

“Të jem pjesë e klubit më të madh në botë është një ëndërr e bërë realitet. Jam shumë i lumtur që ndodhem këtu dhe mezi pres të nis këtë aventurë të re”, deklaroi sulmuesi anglez.

Gordon shtoi se objektivi i tij kryesor me fanellën blaugrana është të fitojë trofe të mëdhenj, veçanërisht UEFA Champions League, trofe që mbetet ëndrra e tij më e madhe në karrierë.

Me këtë transferim, Barcelona dërgon një sinjal të qartë për ambiciet e saj, duke synuar të ndërtojë një skuadër konkurruese në të gjitha frontet për sezonin e ardhshëm.

Boksieri shqiptar Jurgen Uldedaj ka dërguar një mesazh të qartë dhe plot vetëbesim para përballjes me Austine Nnamdi, ku do të mbrojë titullin botëror IBO në kategorinë cruiserweight.

Pak orë para ngjitjes në ring në OVO Arena Wembley, Uldedaj ka shprehur entuziazmin për sfidën, duke theksuar se synimi i tij afatgjatë është të bëhet kampion i padiskutueshëm i kategorisë.

“Karriera perfekte për mua është të bëhem kampion i padiskutueshëm në kategorinë time. Tani dua vetëm ta mbroj titullin. Më pas, pse jo një meç unifikues? Kjo është mbrojtja ime e parë e titullit dhe jam jashtëzakonisht i emocionuar”, deklaroi shqiptari.

Boksieri nga Lezha foli gjithashtu me krenari për mbështetjen e madhe që vazhdon të marrë nga tifozët shqiptarë, duke zbuluar se pret një numër të konsiderueshëm bashkatdhetarësh në Londër për ta përkrahur.

“Shqiptarët kanë qenë gjithmonë pranë meje. I dua njerëzit e mi dhe mbështetësit e mi. Ata janë zjarr. Kur jam në ring dhe i dëgjoj duke brohoritur, është një ndjenjë e jashtëzakonshme”, u shpreh ai.

Megjithatë, deklarata më e fortë erdhi kur Uldedaj u pyet për rezultatin e meçit. Boksieri nuk la vend për dilema, duke e bërë të qartë objektivin e tij.

“Fitore, fitore, fitore. Me çdo kusht fitore. Nuk ka rëndësi si, por ne do të fitojmë. Jemi gati. Kemi punuar fort dhe jemi përgatitur maksimalisht”, tha ai.

Përballja ndaj Nnamdit konsiderohet një nga sfidat më të rëndësishme në karrierën e Uldedajt. Një triumf në Wembley do t’i siguronte mbrojtjen e parë të suksesshme të titullit botëror IBO dhe do ta afronte edhe më shumë drejt objektivit të madh për t’u shpallur kampion i padiskutueshëm në kategorinë cruiserweight.

Nico Paz është gjithnjë e më pranë rikthimit te Real Madridi, me mesfushorin argjentinas që tashmë është i informuar prej javësh për planet e klubit dhe e ka pranuar me entuziazëm sfidën për t’u rikthyer në “Santiago Bernabeu” sezonin e ardhshëm.

Sipas raportimeve, lojtari është i gatshëm të nisë një kapitull të ri me skuadrën madrilene, pavarësisht lidhjes emocionale që ka krijuar me Comon gjatë qëndrimit të tij në Itali. Paz largohet nga klubi italian me vlerësime të larta, pasi zhvilloi një sezon pozitiv dhe u rrit ndjeshëm si futbollist nën drejtimin e trajnerit Cesc Fabregas.

Te Real Madridi besohet se 20-vjeçari rikthehet si një lojtar më i pjekur dhe me cilësi të dëshmuara, i gatshëm për të konkurruar në nivelin më të lartë.

Klubi madrilen pritet të aktivizojë klauzolën e riblerjes para afatit të 30 qershorit, duke siguruar shërbimet e talentit argjentinas për një shumë më të vogël se vlera aktuale e tij në treg. Raportohet se Reali do ta rikthejë Paz për më pak se 10 milionë euro, një lëvizje që konsiderohet shumë e favorshme ekonomikisht.

Në këtë mënyrë, “Los Blancos” kanë arritur të mbrojnë interesat e tyre ndaj konkurrencës së fortë nga klubet e tjera evropiane, të cilat ishin të gatshme të investonin shuma shumë më të larta për transferimin e mesfushorit premtues.

Rikthimi i Nico Paz pritet të jetë një nga lëvizjet e para të Real Madridit gjatë afatit kalimtar veror, ndërsa drejtuesit e klubit vazhdojnë ndërtimin e skuadrës për epokën e re nën drejtimin e Xabi Alonsos.

Kombëtarja e Kosovës ka përmbyllur përgatitjet e fundit në vend dhe është nisur drejt Pragës, ku të dielën do të zhvillojë ndeshjen miqësore kundër Çekisë.

Atmosfera në kampin e “Dardanëve” është pozitive, me futbollistët dhe stafin teknik të fokusuar maksimalisht në këtë përballje, e cila konsiderohet një test i rëndësishëm në kuadër të përgatitjeve për sfidat e ardhshme.

Federata e Futbollit e Kosovës ka publikuar pamje nga udhëtimi i ekipit drejt kryeqytetit çek, duke pasqyruar mobilizimin dhe përkushtimin e grupit para ndeshjes.

“Drejt Çekisë për miqësoren e parë. Fokus, përkushtim dhe gati për sfidën që na pret”, ka shkruar FFK-ja në një nga publikimet e saj në rrjetet sociale.

Në një tjetër postim, të shoqëruar me fotografi nga aeroporti dhe udhëtimi i ekipit, Federata ka ndarë momentet e nisjes së futbollistëve drejt Pragës, me mbishkrimin: “Dardanët nisen për në Pragë”.

Përzgjedhësi Franco Foda pritet ta shfrytëzojë këtë takim për të testuar alternativa të ndryshme në formacion, si dhe për t’u dhënë mundësi disa lojtarëve që synojnë të fitojnë më shumë hapësirë në skuadër.

Përballja me Çekinë do të shërbejë gjithashtu si një tregues i nivelit aktual të ekipit dhe do të ndihmojë stafin teknik në identifikimin e elementeve që kërkojnë përmirësim para sfidave të ardhshme.

Ndeshja do të zhvillohet në stadiumin “epet ARENA” në Pragë, me fillim nga ora 16:00. Pas këtij takimi, Kosova do të vazhdojë përgatitjet për ndeshjen e radhës miqësore ndaj Andorrës, e cila do të luhet në stadiumin “Fadil Vokrri”.

Trajneri i Portugalisë, Roberto Martinez, ka bërë një deklaratë befasuese lidhur me të ardhmen e Cristiano Ronaldos në kombëtare, duke mos e përjashtuar mundësinë që ylli portugez të luajë edhe në Kupën e Botës 2030.

I pyetur nëse Ronaldo mund të jetë pjesë e Botërorit pas katër vitesh, Martinez u përgjigj: “Askush nuk duhet ta dyshojë këtë. Ai e ka merituar”.

Tekniku portugez e vlerësoi maksimalisht mentalitetin dhe profesionalizmin e sulmuesit legjendar, duke e cilësuar si model ideal për futbollistët e rinj.

“Do të dëshironim që modelin e Cristiano Ronaldos t’ua transmetonim të gjithë lojtarëve të rinj në Portugali, sepse ai është një shembull për t’u ndjekur”, deklaroi Martinez.

Ai shtoi se Ronaldo nuk motivohen vetëm nga trofetë individualë apo kolektivë, por nga dëshira e vazhdueshme për t’u përmirësuar.

“Cristiano nuk përcaktohet nga ajo që ka fituar, por nga uria që ka. Çfarëdo që fiton, të nesërmen ai ka të njëjtin motivim për t’u bërë edhe më i mirë”, tha trajneri i Portugalisë.

Martinez gjithashtu theksoi se ka punuar me shumë futbollistë që pasi kanë fituar trofe të mëdhenj kanë humbur motivimin, ndërsa Ronaldo vazhdon të ketë mentalitet unik.

“Kam punuar me lojtarë që pasi fituan Ligën e Kampionëve ose Topin e Artë humbën oreksin për sukses. Te Ronaldo shohim një mentalitet krejt ndryshe”, u shpreh ai.

Sipas Martinezit, jetëgjatësia sportive e Ronaldos lidhet me përkushtimin maksimal ndaj trupit, disiplinën dhe mentalitetin fitues.

Nëse do të luante në Kupën e Botës 2030, Cristiano Ronaldo do të ishte 45 vjeç.

Sulmuesi i Kombëtares së Kosovës, Vedat Muriqi, mund të rikthehet sërish në futbollin turk gjatë afatit kalimtar veror.

Sipas raportimeve të gazetarit të njohur italian, Nicolo Schira, Fenerbahçe ka nisur negociatat për transferimin e “bomberit” kosovar nga Mallorca. Klubet po vazhdojnë bisedimet për të finalizuar shumën e transferimit, ndërsa Muriqi thuhet se ka arritur marrëveshje personale me Fenerbahçen për një kontratë deri në verën e vitit 2029.

Ky rikthim do të shënonte një kapitull të njohur për “Piratin”, i cili kishte veshur fanellën e gjigantit turk gjatë sezonit 2019/20 dhe kishte lënë gjurmë me golat dhe paraqitjet e tij. Pikërisht forma e tij me Fenerbahçen i hapi rrugën transferimit të madh në Serie A te Lazio.

Edhe pse Mallorca ra nga La Liga sezonin e kaluar, Muriqi zhvilloi një sezon shumë të suksesshëm individualisht, duke shënuar 23 gola në 37 ndeshje dhe duke qenë lideri i skuadrës spanjolle në repartin ofensiv.

Një rikthim te Fenerbahçe do të ishte padyshim një lajm i mirë për tifozët e klubit dhe një hap i rëndësishëm në karrierën e sulmuesit kosovar.