Author: A.M.

Shqipëria ka pësuar humbje 2-1 në transfertë ndaj Finlandës, në ndeshjen e Ligës së Kombeve. Kuqezinjtë e nisën në mënyrën më të mirë të mundshme, por kartoni i kuq i Etrit Berishës ndryshoi rrjedhën e takimit.

Shqipëria kaloi në avantazh që në minutën e katërt. Rey Manaj shënoi me kokë pas një harkimi të saktë të Kristjan Asllanit nga këndorja, duke i dhënë skuadrës shqiptare një nisje perfekte.

Por në minutën e 22-të, Berisha u ndëshkua me karton të kuq pas një ndërhyrjeje jashtë zonës. Kuqezinjtë mbetën me dhjetë lojtarë dhe kjo i dha Finlandës mundësinë të merrte kontrollin e takimit.

Vetëm pak minuta më vonë, Leo Walta barazoi rezultatin me goditje dënimi, duke mposhtur Alen Sherrin, i cili u aktivizua në vend të Arbër Hoxhës.

Pavarësisht inferioritetit numerik, Shqipëria rezistoi deri në fund të pjesës së parë, ndërsa skuadrat shkuan në pushim me rezultatin 1-1.

Në pjesën e dytë, Finlanda rriti presionin dhe në minutën e 71-të Walta shënoi sërish nga goditja e dënimit, duke përmbysur rezultatin në 2-1.

Kuqezinjtë tentuan të reagojnë në minutat e fundit, por nuk arritën të gjenin golin e barazimit dhe u larguan nga Finlanda pa pikë.

Pas kësaj humbjeje, Shqipëria mbetet në vendin e dytë me gjashtë pikë, ndërsa Finlanda ngjitet në krye të grupit me shtatë pikë.

Përzgjedhësi i Kombëtares së Kosovës Franco Foda ka folur në konferencën për shtyp para ndeshjes me Austrinë,takim ky i vlefshëm në kuadër të Ligës së Kombeve.

Foda foli për ndeshjen e parë kundër austriakëve konkretisht për problemet që patën gjatë ndeshjes së parë,dhe thotë se ekipi ka bërë përmirësime në aspektin defanziv në ndeshjen ndaj Izraelit.

“I kemi pas ndaj Austrisë disa probleme kemi pas probleme në mbrojtje mirëpo tani kemi treguar ndaj Izraelit që kemi ditur të përmirësohemi tani kemi analizuar lojën mirë”

Tutje tekniku gjerman ka deklaruar se “Dardanët”janë të gatshëm për ndeshjen ndaj Austrisë,si dhe vuri në theks të vecantë e intensiteti i ndeshjes dhe fazat e tranzicionit të lojës.

“Jemi të përgatitur për Austrinë. E dimë që na pret ndeshje intensive duhet kemi kujdes në fazat e tranzicionit nga sulmi në mbrojtje dhe anasjelltas dhe këtu duhet të kemi kujdes në gjitha fazat e lojës. Tani e dimë që jemi vendas dhe kemi publikun mbrapa. Kjo na shërben me na jep energji tjetër”.

Sa i përket formacionit për ndeshjen e nesërme Foda ka thënë se endimet merren pas analizave të çdo ndeshjeje,dhe poashtu përmendi edhe problemet me lëndimet e lojtarëve.

“Pas çdo ndeshje e analizojmë ndeshjen dhe marrim vendime. Pas analizave në Izrael kemi treguar që mundemi mu stabilizuar në mbrojtje. Disa lojtar kanë pasur lëndime për këtë arsye ndaj Izraelit është dashur t’i bëjmë disa ndryshime dhe tani prapë ndaj Austrisë duhet të kemi energji më shumë, me shumë pasion dhe ndoshta detyrohemi të kemi disa ndryshime”

Foda bëri një reagim lidhur me deklaratën e trajnerit të Austrisë për fushën e stadiumit “Fadil Vokrri”,ku përzgjedhësi i “Dardanëve”dha këtë përgjigjje.

“Fusha nuk është në gjendje shumë të mirë, për shkak se gjatë verës shumë ekipe kanë luajtur këtu. Ne e dimë që kjo gjendje e fushës vlen për të dyja ekipet. E kuptoj kritikën e Rangnickut”

Në konferencë për shtyp foli edhe kapiteni Vedat Muriqi i cili u rikthye nga lëndimi,ku ka thënë se është i gatshëm për ndeshjen kundër Austrisë të dielën.

Kujtojmë që ndeshja Kosovë-Austri pritet të zhvillohet të dielën në stadiumin “Fadil Vokrri”në Prishtinë me fillim nga ora 18:00.

Trajneri i Austrisë, Ralf Rangnick, ka bërë të qartë objektivin e skuadrës së tij para përballjes me Kosovën në Ligën e Kombeve: fitoren dhe tri pikët.

Austria udhëton në Prishtinë për ndeshjen e katërt të grupit, e cila zhvillohet të dielën nga ora 18:00 në stadiumin “Fadil Vokrri”. Rangnick ka kërkuar nga futbollistët e tij durim dhe përqendrim maksimal gjatë gjithë takimit.

“Duhet të jemi të durueshëm. Edhe nëse deri në fund rezultati është baras, durimi duhet të jetë maksimal. Duhet ta shohim edhe një herë ndeshjen e parë dhe pastaj të nxjerrim përfundimet”, deklaroi Rangnick.

Trajneri austriak theksoi se skuadra e tij nuk dëshiron të largohet nga Prishtina pa pikë, ndërsa objektivi mbetet i njëjtë si në përballjen ndaj Irlandës.

“Natyrisht, nuk duam të humbim në Prishtinë. Por duam t’i marrim tri pikët, ashtu siç donim në Irlandë. Atje, në pjesën e dytë luajtëm me të gjitha forcat dhe morëm një pikë”, u shpreh ai.

Rangnick konfirmoi gjithashtu se ka në dispozicion pothuajse të gjithë lojtarët për këtë sfidë. I vetmi në dyshim mbetet Carney Chukwuemeka.

Austria kërkon fitoren në Prishtinë për të vazhduar objektivin në grup, ndërsa Kosova do të synojë të shfrytëzojë faktorin fushë dhe mbështetjen e tifozëve për t’u rikthyer te tri pikët.

Një tjetër arsye mund të ketë ndikuar në vendimin e Cristiano Ronaldos për të lënë grumbullimin e Portugalisë përpara ndeshjes së Ligës së Kombeve ndaj Danimarkës.

Vitor Pinto, zëvendësdrejtor i të përditshmes portugeze “Record”, ka zbuluar se kapiteni i Portugalisë ishte i zhgënjyer edhe nga mosgrumbullimi i djalit të tij të madh, Cristiano Ronaldo Jr., me përfaqësuesen U-16.

“Ka edhe një arsye tjetër që e ka lënduar Cristiano Ronaldon. Besoj se nuk lidhet drejtpërdrejt me largimin e tij nga kombëtarja, por në momente të tilla gjithçka grumbullohet”, deklaroi Pinto.

Sipas gazetarit portugez, fakti që Ronaldo Jr. nuk ishte përfshirë në listën e U-16 ka qenë një tjetër element që ka ndikuar emocionalisht te ylli i Portugalisë.

“Cristiano Ronaldo mbeti i zhgënjyer sepse Cristiano Jr. nuk u grumbullua me U-16”, shtoi Pinto.

Megjithatë, këto janë deklarata të gazetarit të “Record” dhe nuk përbëjnë një konfirmim zyrtar nga Cristiano Ronaldo apo Federata Portugeze e Futbollit për arsyet e vendimit të tij.

Përfshirja e Pep Guardiolës në çështjen financiare të Manchester Cityt mund të ndikojë në mundësinë që trajneri spanjoll të marrë drejtimin e Kombëtares së Anglisë në të ardhmen.

Kështu ka deklaruar gazetari i njohur spanjoll Guillem Balague, i cili ka zbuluar se Federata Angleze e Futbollit kishte pritur për rreth dy muaj një përgjigje nga Guardiola, për të mësuar nëse ai ishte i interesuar për postin e trajnerit të “Tre Luanëve”.

Sipas Balagues, Guardiola në fund vendosi të vazhdonte te Manchester City, duke rinovuar kontratën me klubin. Pas kësaj, FA emëroi Thomas Tuchelin në krye të Anglisë.

“Gjithmonë e kam parë Guardiolën si kandidat për ta marrë drejtimin pas Tuchelit”, deklaroi Balague në talkSPORT.

Megjithatë, gazetari beson se qëndrimi i Guardiolës në krah të Manchester Cityt gjatë çështjes financiare mund ta komplikojë një mundësi të tillë.

Një komision i pavarur e ka shpallur Manchester Cityn fajtor për 114 shkelje të rregullave financiare të Premier League, ndërsa procedurat ligjore dhe pasojat përfundimtare të çështjes vijojnë.

“Për momentin, nuk mendoj se FA do të dëshironte të sillte dikë që do ta ndante Anglinë në mënyrën se si Pep Guardiola mund ta bëjë nga tani e tutje”, tha Balague.

Ai la gjithashtu të hapur mundësinë që vetë Guardiola të mos jetë më i interesuar për drejtimin e Anglisë, duke theksuar se trajneri mund të dëshirojë të shmangë një post ku trashëgimia e tij do të ishte vazhdimisht pjesë e debateve.

Fabrizio Ravanelli ka folur me superlativa për Edon Zhegrovën, duke vlerësuar talentin dhe stilin e veçantë të futbollistit kosovar.

Ish-sulmuesi i Juventusit, në një podcast të “Tuttosport”, tregoi se ka diskutuar disa herë me trajnerin Luciano Spalletti për mënyrën se si duhet përdorur Zhegrova.

“Gjithmonë kam qenë i dashuruar me Zhegrovën. E kam gjetur veten duke diskutuar përdorimin e tij me Spallettin shumë herë”, u shpreh Ravanelli.

Sipas tij, Zhegrova është një futbollist që duhet të ketë më shumë liri në fushë, pasi cilësitë e tij individuale e bëjnë të aftë të ndryshojë një ndeshje.

“Ky është një lojtar që në momente të caktuara duhet të lihet më i qetë. Ai ka cilësi të jashtëzakonshme dhe duhet të falet kur herë pas here bën gabime apo nuk angazhohet në mbrojtje”, theksoi italiani.

Ravanelli argumentoi se humbjet e topit janë pjesë e mënyrës së lojës së Zhegrovës, pasi kosovari kërkon vazhdimisht të marrë iniciativa dhe të jetë vendimtar.

“Nëse Zhegrova humbet disa topa, kjo ndodh sepse ai vazhdimisht rrezikon. Ai dëshiron të jetë vendimtar”, përfundoi legjenda e Juventusit.

Zlatan Ibrahimovic ka bërë parashikimet e tij për sezonin e ri dhe ka zgjedhur Barcelonën si fituese të La Ligës dhe Ligës së Kampionëve, ndërsa Lamine Yamalin e sheh si fitues të Topit të Artë 2026.

Në një intervistë të shkurtër të publikuar nga ESPN FC, ish-sulmuesi suedez u pyet për favoritët e tij në garat kryesore. Për të dy trofetë, përgjigjja ishte e njëjtë: Barcelona. Ndërsa për çmimin individual më prestigjioz, Ibrahimovic zgjodhi Lamine Yamalin.

19-vjeçari spanjoll po konsiderohet ndër emrat kryesorë në garën për Topin e Artë, pas paraqitjeve me Barcelonën dhe përfaqësuesen e Spanjës. Në 10 ndeshjet e para me klubin dhe kombëtaren këtë sezon, Yamal ka realizuar 11 gola dhe ka dhënë shtatë asistime.

Barcelona synon të vazhdojë dominimin në La Liga dhe të rikthehet në majën e futbollit evropian, ndërsa Yamal kërkon të shndërrohet në fituesin më të ri të Topit të Artë.

Ibrahimovic ka një lidhje të veçantë me klubin katalanas, pasi veshi fanellën e Barcelonës gjatë sezonit 2009/10.

Max Verstappen ka siguruar “pole position” për Çmimin e Madh të Bahreinit, që këtë fundjavë po zhvillohet në pistën e Sepangut, në Malajzi, për shkak të situatës së krijuar në Lindjen e Mesme.

Piloti holandez i Red Bull regjistroi kohën më të shpejtë, 1’35”250, duke lënë pas Lewis Hamilton me Ferrari. Britaniku u rendit i dyti, rreth tre të dhjetat më i ngadaltë se Verstappen.

Dy ish-kampionët e botës do ta nisin garën e së dielës nga vija e parë, ndërsa Red Bull konfirmoi ritmin e lartë në pistë edhe me Isak Hadjar, i cili u rendit i treti në kualifikuese. Megjithatë, Hadjar ka një penalitet prej pesë pozicionesh.

Kimi Antonelli me Mercedes u klasifikua i katërti, ndërsa Charles Leclerc me Ferrari zuri vendin e pestë. Pas tyre u renditën dy McLaren-ët e Lando Norris dhe Oscar Piastri, ndërsa “top 10” e plotësuan George Russell, Pierre Gasly dhe Gabriel Bortoleto.

Për Verstappen ky është “pole position” i parë i sezonit, duke i dhënë Red Bull një avantazh të rëndësishëm përpara garës së së dielës.

Zinedine Zidane e nisi me barazim 1-1 debutimin e tij në shtëpi si trajner i Francës, ndaj Italisë në Ligën e Kombeve.

“Les Bleus” kaluan në avantazh me Michael Olise, i cili realizoi një goditje dënimi spektakolare, por Alessandro Bastoni barazoi 13 minuta më vonë.

Pas ndeshjes, Zidane u shpreh i zhgënjyer me rezultatin, duke theksuar se Franca kishte krijuar mundësi të mjaftueshme për ta fituar takimin.

“Jam i zhgënjyer sepse meritonim më shumë. Patëm raste për ta mbyllur ndeshjen, por nuk i shfrytëzuam. Ndonjëherë kështu është futbolli”, deklaroi Zidane.

Ky ishte barazimi i parë për Francën nën drejtimin e tij, pas dy fitoreve në ndeshjet e para.