I dënuari për sulm seksual në garë për deputet

Përgatiti: Arian Hajdaraj

Në krah të zëvendëskryeministres Emilia Rexhepi, Numan Balic ka filluar fushatën duke kërkuar votat për t’u zgjedhur deputet.

Por, vetëm pak vjet më parë, ish-ministri i Shëndetësisë, akuzohej për sulm seksual. Madje, përballë aktit akuzues të prokurorisë themelore të Pejës, për sulm ndaj një pacienteje, edhe u dënua me dy vjet burgim efektiv.

Për faktin se kanë kaluar tri vjet që nga shpallja e vendimit, i njëjti u certifikua nga Komisioni Qendror i Zgjedhjeve. Por, njohës të procesit vlerësojnë se i njëjti në rast se zgjidhet deputet, dëmton kredibilitetin e Kuvendit.

“Nuk ka kredibilitet. Personi që është I dënuar për sulm seksual, të votojë për miraitmin e ligjeve e projektligjeve, për viktimat e veprës së njëjtë penale”, tha Eugen Cakolli nga Instituti Demokratik i Kosovës.

Në këtë drejtim, vlerësohet se nevojiten ndryshime thelbësore, në mënyrë që kryerësve të krimeve seksuale t’u pamundësohet certifikimi.

Numan Balic akuzohej se gjatë punës si kirurg në spitalin e Pejës, në gusht të vitit 2020, kishte sulmuar seksualisht pacienten duke shfrytëzuar gjendjen e saj të rënduar.