Vitin e ardhshëm fillon vendosja e kamerave të sigurisë në Prishtinë

Përgatiti: Pranvera Krasniqi

Me qëllim që të parandalohen vrasjet, vjedhjet dhe akte të tjera që bien ndesh me ligjin, por edhe të identifikohen kryerësit, komuna e Prishtinës nga viti i ardhëm do të fillojë vendosjen e kamerave në hapësira publike.

Kryetari i Prishtinës, Përparim Rama, thotë se siguria në kryeqytet është ndër planet themelore për transformimin e kryeqytetit.

“Si pjesë e procesit të zhvillimit të kryeqytetit edhe ne aspektin e SMART CITY, jemi duke planifikuar të bëhet instalimi I pikave të shumta për instalimin ku do të jenë pjesë e sigurisë e gjithë infrastrukturës e transportit”, tha Rama.

Ndërsa nënkryetari Alban Zogaj thotë se komuna e ka edhe përkrahjen e policisë për këtë projekt.

Ndërkaq, eksperti i sigurisë, Drizan Shala, konsideron se komuna e Prishtinës është vonuar në këtë drejtim.

“Edhe pse jo sipas afateve të parapara, por prapëseprapë i mirëpresim këto kamera, vetëm se vendosja e tyre nuk do të thotë që duhet të jetë e fokusuar vetëm në qytet, por edhe në rrugë nacionale, fshatrat përreth, sepse ne çdo ditë po dëgjojmë fenomene të ndryshme edhe nga atje”, tha Shala.

Për projektin e vendosjes së kamerave në kryeqytet, janë ndarë rreth 1.3 milionë euro.

Më shumë detaje i gjeni në Edicionin Qendror të lajmeve në videon më poshtë: