Tag: Ballina

Ministri i Mbrojtjes, Ejup Maqedonci ka bërë të ditur se finalen Kosovë-Turqi do ta sheh nga afër bashkë me CEO-n e kompanisë Bykar, Haluk Bajyraktar në stadiumin “Fadil Vokrri”.

Maqedonci tha se kjo ndeshje nuk është vetëm një sfidë për pikë, por edhe një festë e miqësisë dhe respektit të ndërsjellë mes dy popujve

“Sonte me mikun tim Haluk Bayraktar, CEO të kompanisë Bykar që është simbol i inovacionit modern, u takuam për të parë nga afër zhvillimet në një tjetër fushë, atë të futbollit, ku lojtarët e Kosovës dhe Turqisë në stadiumin “Fadil Vokrri” do të marrin rolin e protagonistëve. Ashtu si dronët që synojnë me saktësi, edhe sulmuesit e të dyja ekipeve do të kërkojnë të godasin portën me vendosmëri, duke e kthyer ndeshjen në një duel të fortë, por të ndershëm”, ka shkruar Maqedonci në Facebook.

“Kjo ndeshje nuk është vetëm një sfidë për pikë, por edhe një festë e miqësisë dhe respektit të ndërsjellë mes dy popujve. Në fund, le të fitojë përfaqësuesja më e mirë dhe mbi të gjitha, le të triumfojë sporti!”, ka shkruar Maqedonci.

Trafiku Urban Prishtinë ka njoftuar qytetarët se gjatë mbrëmjes së sotme pritet të ketë vonesa dhe devijime të përkohshme në qarkullimin e linjave të autobusëve.

Sipas njoftimit, këto ndryshime vijnë si pasojë e bllokimit të disa rrugëve.

Njoftimi i plotë:

Njoftojmë qytetarët se, për shkak të bllokimit të disa rrugëve, gjatë mbrëmjes së sotme mund të ketë vonesa dhe devijime të përkohshme në qarkullimin e linjave të autobusëve, në përputhje me rregullimin e trafikut nga organet e rendit.

Ju falënderojmë për mirëkuptimin dhe i urojmë Kombëtares sonë suksese në ndeshjen e sontme kualifikuese!

Sot, kryesuesi i bordit të Zyrës së Rregullatorit për Energji (ZRRE), Ymer Fejzullahu, ka bërë të ditur se, tarifat e reja të energjisë elektrike të parapara të hyjnë në fuqi më 1 prill, pritet të shtyhen deri më 1 maj.

Lidhur me këtë ka reaguar, Visar Azemi nga Lidhja Demokratike e Kosovës. Ky i fundit këtë vendim e ka cilësuar si të ‘’duhur’’, porse, ‘’të pamjaftueshëm’’.

Azemi më tej, ka thënë se veprimi në fjalë është rezultat i presionit publik ‘’pas skandalit me njehsorët’’.

‘’Nuk mund të ketë rritje, ndryshim apo barrë të re mbi qytetarët, derisa të sqarohet e vërteta e plotë për matjen, faturimin dhe dëmin e shkaktuar. Kjo është kërkesë minimale e drejtësisë dhe mbrojtjes së konsumatorit’’, ka shkruar ai mes tjerash.

Postimi i plotë:

Shtyrja e vendimit të ZRRE-së për tarifat e reja të energjisë deri më 1 maj është hap i duhur, por i pamjaftueshëm.

Ky veprim duket qartë se është rezultat i drejtpërdrejtë i presionit publik pas skandalit me njehsorët.

Por kjo nuk mjafton.

Çdo ndryshim tarifor duhet të pezullohet plotësisht deri në përfundimin e hetimeve.

Nuk mund të ketë rritje, ndryshim apo barrë të re mbi qytetarët, derisa të sqarohet e vërteta e plotë për matjen, faturimin dhe dëmin e shkaktuar. Kjo është kërkesë minimale e drejtësisë dhe mbrojtjes së konsumatorit.

Qytetarët e Kosovës nuk mund të paguajnë më shumë, kur ende nuk dihet saktë sa janë dëmtuar. Prandaj, kërkoj që të gjitha ndryshimet të mbeten të pezulluara deri në përmbylljen e plotë të hetimeve dhe nxjerrjen e përgjegjësisë institucionale.

Pas protestës së djeshme para Kuvendit të Kosovës, organizatat e dala nga lufta e UÇK-së kanë ndërmarrë një tjetër hap lidhur me publikimin “Masakrat në Kosovë 1998–1999”.

Organizata e Veteranëve të Luftës së UÇK-së (OVL UÇK) ka njoftuar se u është drejtuar me një letër publike disa institucioneve dhe organizatave ndërkombëtare që kanë mbështetur këtë publikim, duke kërkuar tërheqjen e emrave të tyre nga çdo referencë mbështetjeje.

Letra u është dërguar Community Development Fund (CDF) – Ambasada e Suedisë në Kosovë, Rockefeller Brothers Fund (RBF), Institute of International Education (IIE), Departamentit Federal të Punëve të Jashtme të Zvicrës (FDFA) – Ambasada e Zvicrës në Kosovë, Cultural Heritage without Borders (CHwB) dhe Kosovo Foundation for Open Society (KFOS).

Sipas OVL UÇK-së, kërkesa vjen për shkak të shqetësimeve serioze lidhur me besueshmërinë dhe integritetin e publikimit të autorit Shkëlzen Gashi, si dhe ndikimin e ekspozitës së tij publike në Prishtinë.

Në letrën drejtuar këtyre institucioneve, organizata thekson se publikimi paraqet mangësi në metodologjinë kërkimore, mungesë të analizës së strukturuar të burimeve dhe probleme në organizimin e të dhënave.

Po ashtu, sipas tyre, në disa raste përfshihen ngjarje të cilësuara si “masakra” edhe pse mungojnë burime të mjaftueshme, ndërsa njëkohësisht jepen të dhëna konkrete për to, çka, sipas OVL UÇK-së, krijon kontradikta dhe ngre dyshime mbi saktësinë e publikimit.

Organizata ka ngritur shqetësime edhe për mënyrën e klasifikimit të viktimave, duke e cilësuar atë si reduktuese, si dhe për mospërputhje në të dhënat numerike dhe përdorimin e materialeve vizuale që, sipas tyre, nuk përkojnë gjithmonë me ngjarjet e paraqitura.

Në letër theksohet se përfshirja e institucioneve ndërkombëtare si mbështetëse e publikimit krijon lidhje të drejtpërdrejtë me përmbajtjen e tij dhe ndikon në perceptimin publik, pavarësisht deklarimeve formale për distancim nga qëndrimet e autorit.

Për këtë arsye, OVL UÇK ka kërkuar që këto institucione të tërheqin emrat e tyre nga publikimi, duke theksuar se ruajtja e së vërtetës historike është përgjegjësi morale ndaj viktimave dhe brezave të ardhshëm.

“Përmes kësaj letre është kërkuar tërheqja e emrave të tyre nga çdo referencë e mbështetjes në këtë publikim, për shkak të shqetësimeve serioze lidhur me besueshmërinë dhe integritetin e tij. OVL UÇK thekson se trajtimi i temave të ndjeshme historike kërkon përgjegjësi të lartë dhe standarde të mirëfillta profesionale”, thuhet më njoftim.

Letrën e plotë pa ndërhyrje, e gjeni më poshtë:

Për vëmendjen e drejtuesve të institucioneve mbështetëse,

Të nderuar,

Me shpresën se ky komunikim ju gjen mirë, në emër të kategorive të dala nga lufta e UÇK-së, po ju drejtohemi përmes kësaj letre publike në lidhje me mbështetjen që institucioni juaj i ka dhënë publikimit “Masakrat në Kosovë 1998–1999” të autorit z. Shkëlzen Gashi, si dhe ndikimit që ka pasur ekspozita e tij publike në Prishtinë.

Pas një shqyrtimi të kujdesshëm të përmbajtjes, vlerësojmë se ky publikim paraqet një sërë problematikash serioze që cenojnë besueshmërinë dhe integritetin e tij.

Së pari, ndonëse publikimi paraqitet si studim, ai nuk mbështetet në një metodologji të qartë kërkimore; mungon analiza e strukturuar dhe kritike e burimeve, si dhe një organizim sistematik i të dhënave, duke e afruar më shumë me një përmbledhje sesa me një hulumtim apo studim të mirëfilltë.

Së dyti, në disa raste përfshihen ngjarje të cilat cilësohen si “masakra”, edhe pse vetë publikimi e pranon mungesën e burimeve të mjaftueshme për to. Megjithatë, për këto raste paraqiten të dhëna konkrete si data, vendndodhje dhe numri i viktimave, duke krijuar një kontradiktë të drejtpërdrejtë dhe duke ngritur dyshime serioze mbi saktësinë dhe përgjegjësinë akademike të publikimit.

Së treti, mënyra e klasifikimit të viktimave përmes një ndarjeje të ngurtë ndërmjet civilëve dhe luftëtarëve paraqet një qasje reduktuese, që nuk reflekton kompleksitetin e realitetit në terren dhe rrezikon të prodhojë interpretime të deformuara të ngjarjeve, e po ashtu përbën mungesë të ndjeshmërisë për viktimat.

Së katërti, janë evidentuar mospërputhje në të dhënat numerike të viktimave në disa raste, si dhe përdorimi i materialeve vizuale që nuk përkojnë gjithmonë me ngjarjet që pretendohet të paraqiten, duke e dobësuar më tej kredibilitetin e publikimit.

Në këtë kontekst, vlerësojmë se përfshirja e institucionit tuaj në seksionin e mbështetjes së këtij publikimi nuk është neutrale. Pavarësisht deklarimit formal se pikëpamjet e shprehura nuk përfaqësojnë domosdoshmërisht qëndrimet e donatorëve, vetë fakti i mbështetjes financiare dhe identifikimit publik krijon një lidhje të drejtpërdrejtë të legjitimitetit institucional me përmbajtjen e tij.

Një distancim i tillë formal nuk është i mjaftueshëm për të neutralizuar perceptimin publik, as ndikimin që kjo lidhje prodhon në interpretimin dhe pranimin e përmbajtjes.

Duke marrë parasysh arsyet e sipërpërmendura, konsiderojmë se mbajtja e emrit të institucionit tuaj si mbështetës i këtij publikimi cenon kredibilitetin institucional dhe përgjegjësinë publike që e shoqëron atë.

Për këtë arsye, kërkojmë nga ju që të tërhiqni emrin e institucionit tuaj nga çdo referencë e mbështetjes në këtë publikim.

Ruajtja e së vërtetës historike nuk është thjesht çështje akademike, por për më tepër një përgjegjësi morale ndaj viktimave dhe brezave që vijnë.

Me respekt,

Organizata e Veteranëve të Luftës së UÇK-së

Prishtinë, Kosovë.

Është shënuar 27-vjetori i masakrimit të 106 qytetarëve në Pastasel të Komunës së Rahovecit. Në përkujtimin e viktimave të një nga krimet më të rënda të luftës së Kosovës ishte edhe kryeministri, Albin Kurti.

Ai tha se 106 civilët në Pastasel u vranë vetëm pse ishin shqiptarë. “Ata që na vranë menuan se do të na zhdukin, por ata ikën e ne qëndruam këtu të pathyeshëm”, tha Kurti.

Kurti tha se ky ishte krim i paramenduar.

Ai u shpreh se është detyrë e institucioneve të drejtësisë që këto të shndërrohen në aktakuza.

“Në dhjetorin e kaluar është dorëzuar kallëzim penal për këtë masakër, një hap i domosdoshëm drejt drejtësisë. Është detyrë e institucioneve të drejtësisë që këto krime të shndërrohen në aktakuza.

Drejtësia e vonuar është drejtësi e cunguar, por ne nuk do të ndalemi kurrë së kërkuari atë. Ata më vonë u përpoqën të fshihej e vërteta me zhvarrosjen dhe djegien e trupave. Serbia kreu gjenocid në Kosovë, menduan se do na zhdukin; ata ikën e ne qëndruam këtu të pathyeshëm. Sakrifica e dëshmorëve u bë udhërrëfyes i popullit tonë”, tha Kurti.

Është publikuar kërkesa e INTEGRA’s drejtuar komunës së Prishtinës, për lejimin e zhvillimit të ekspozitës për masakrat në Kosovë, e cila u kritikua ashpër për shkak të pasaktësive në të dhëna.

Në letrën drejtuar kryeqytetit, INTEGRA kërkon nga komuna që t’i lejohet shfrytëzimi i hapësirave në sheshin Nënë Tereza, duke theksuar se aty do të ekspozoheshin 52 panele ‘’ me tekst dhe fotografi që dokumentojnë 50 masakra të kryera gjatë luftës së fundit në Kosovë 1998–1999’’, përcjell Gazeta Express.

‘‘Këto panele do të vendosen përgjatë fillimit deri në fund të sheshit “Nënë Tereza”, në të dy anët e sheshit, në mes të drunjve (1 panel mes të 2 drunjve). Gjithashtu, me anë të kësaj kërkese, kërkojmë leje për hyrje në shesh me automjete për bartjen e paneleve për ekspozitë, konkretisht në këto pika: Te Hotel Grand; Te Kuvendi i Kosovës.’’, thuhet mes tjerash aty.

Aty theksohet edhe se ekspozita është përkrahur nga kuvendi, dhe se ‘‘fotografitë e përfshira në ekspozitë janë përzgjedhur me kujdes, duke pasur parasysh ndjeshmërinë e hapësirës publike.’’.

Letra e plotë:

Të nderuar,

Shpresoj që jeni mirë me shëndet dhe me punë.

Ju drejtohem me këtë kërkesë për të marrë leje për shfrytëzimin e hapësirës publike në sheshin Nënë Tereza, me qëllim të organizimit të ekspozitës së përkohshme “Masakrat në Kosovë 1998–1999”.

Ekspozita do të hapet më 27 mars 2026 dhe do të qëndrojë e hapur për 14 ditë. Në kuadër të saj do të ekspozohen 52 panele (2×1 m) me tekst dhe fotografi që dokumentojnë 50 masakra të kryera gjatë luftës së fundit në Kosovë 1998–1999.

Këto panele do të vendosen përgjatë fillimit deri në fund të sheshit “Nënë Tereza”, në të dy anët e sheshit, në mes të drunjve (1 panel mes të 2 drunjve).

Gjithashtu, me anë të kësaj kërkese, kërkojmë leje për hyrje në shesh me automjete për bartjen e paneleve për ekspozitë, konkretisht në këto pika:

Te Hotel Grand;

Te Kuvendi i Kosovës.

Kjo ekspozitë organizohet nga OJQ Integra me mbështetje nga Kuvendi i Republikës së Kosovës dhe synon të kontribuojë në informimin e publikut dhe në kujtesën kolektive për krimet e kryera gjatë luftës në Kosovë.

Fotografitë e përfshira në ekspozitë janë përzgjedhur me kujdes, duke pasur parasysh ndjeshmërinë e hapësirës publike. Ato nuk paraqesin skena morbide apo pamje grafike të dhunës, por synojnë të dokumentojnë vuajtjen dhe pasojat njerëzore të krimeve të luftës në mënyrë dinjitoze dhe të përgjegjshme.

Gjatë kohës së shfrytëzimit, do të sigurohemi që hapësira publike të ruhet e pastër dhe të mos dëmtohet në asnjë mënyrë.

Ju lutem që ta shqyrtoni kërkesën tonë dhe të na njoftoni për procedurat e mëtejme. Nëse ju nevojiten informata shtesë, mos hezitoni të na kontaktoni.

Faleminderit për kohën dhe bashkëpunimin tuaj!

Me respekt,

Kushtrim Koliqi
INTEGRA
Drejtor ekzekutiv

Dhuna në familje mbetet fenomen shqetësues në Kosovë, me shumicën e viktimave gra, ndërsa sfidë kryesore vazhdon të jetë zbatimi i ligjeve në praktikë, u tha në një tryezë të organizuar nga Grupi për Studime Juridike dhe Politike (GLPS) me temën “Një vlerësim mbi trajtimin institucional të rasteve të dhunës në familje: Si u trajtuan gjatë vitit 2025?”, raporton Ekonomia Online.

Drejtoresha ekzekutive e GLPS-së, Njomza Arifi, tha se dhuna në familje vazhdon të mbetet shqetësim serioz në vend, pavarësisht përmirësimeve të caktuara në trajtimin institucional.

“Dhuna në familje vazhdon të mbetet shqetësim në Kosovë dhe shumica e viktimave janë gra. Këto janë edhe të gjeturat e raportit tonë. Ndonëse ka pasur përmirësime ndër vite sa i përket trajtimit të rasteve të dhunës në familje dhe dhunës në bazë gjinore nga sistemi gjyqësor dhe prokurorial, ende ka probleme dhe sfida strukturore të cilat kërkojnë natyrisht vëmendje të mëtejshme si nga sistemi ashtu edhe ndaj institucioneve të tjera. Megjithatë, i gjithë raporti fokusohet në punën e gjyqësorit, prokurorisë dhe policisë”, tha ajo.

Përfaqësuesja e Zyrës së BE-së, Lumnije Azemi, vlerësoi raportin si bazë të rëndësishme të të dhënave, duke theksuar si shqetësuese numrin e rasteve në veri, por edhe progresin në uljen e kohëzgjatjes së trajtimit të rasteve.

“Raportin e kam lexuar, është një bazë e mirë e të dhënave, më kanë rënë në sy dy gjëra diametralisht të kundërta. E para ka të bëjë me numrin e madh të rasteve në Mitrovicën e Veriut. Nuk e kam zgjedhur me ndonjë prapavijë, mirëpo më ka rënë në sy se aty ishte numri më i madh i rasteve. Nga ana tjetër, zvogëlimi i kohës së rasteve si dhe zvogëlimi i backlogut të rasteve. Kjo ishte një anë shumë pozitive që nuk duhet të çdo herë të potencojmë gjërat të cilat janë negative meqenëse të gjithë i dimë, por në anën tjetër edhe diçka pozitive. Për të parën, në fakt fatkeqësisht përpjekjet dhe të dhënat edhe të raportit edhe të bazës ligjore dhe të institucioneve janë më të ngadalta, meqenëse është një temë shumë delikate, shumë e rëndësishme dhe mjaft serioze, nuk ka mundësi që ajo të ndryshohet ngadalë”, tha ajo.

Menaxheri i projektit, Liridon Salihi, tha se rreth 75% e viktimave të dhunës në familje janë gra, ndërsa sfidë kryesore mbetet politika ndëshkimore dhe zbatimi i legjislacionit.

“E gjetura kryesore nga ky raport është se dhuna në familje mbetet një fenomen shqetësues që prek të gjitha grupmoshat e shoqërisë, nga fëmijët deri tek personat e moshës së shtyrë. Forma më e përhapur e dhunës në familje është dhuna ndaj grave. Me të dhënat e shohim se rreth 75% e viktimave të dhunës në familje rezultojnë të jenë gra, ndërsa 25% janë burra. Kosova ka një kornizë të konsoliduar ligjore për mbrojtjen dhe parandalimin e këtij fenomeni. Sfidë kryesore mbetet implementimi në praktikë i legjislacionit ekzistues. Policia vazhdon të pranojë një numër të konsiderueshëm të raportimeve të dhunës në familje, për nga numri i raportimeve prin rajoni i Prishtinës, ndërsa rajoni i Mitrovicës së Veriut prin në bazë të incidentes në 10,000 banorë. Por ajo çka mbetet sfiduese edhe nga të gjeturat e këtij raporti mbetet politika ndëshkimore”, tha ai.

Ai shtoi se shumica e akteve akuzuese përfundojnë me vendime dënuese, por dënimet shpesh nuk janë në përputhje të plotë me parashikimet ligjore.

“Rreth 87% e akteve akuzuese të prokurorive konfirmohen nga gjykatat dhe përfundojnë me aktgjykime dënuese, pra paraqet një efikasitet të lartë të akteve akuzuese që ngriten nga ana e prokurorit të shtetit. Sa i përket gjykatave, vetëm 14% e të akuzuarve marrin dënimin kumulativ, gjobë dhe dënim me burgim, siç e parashikon Kodi Penal i Republikës së Kosovës”, tha ai.

Salihi theksoi se një nga problemet kryesore mbetet edhe numri i madh i seancave të shtyra.

“Sfidë kryesore mbetet numri i lartë i seancave të anuluara apo të shtyra, si pasojë e mungesës së të pandehurve, dhe palëve të tjera të përfshira në procese gjyqësore. Çka kemi vlerësuar te pjesa e kornizës ligjore, ajo çka mbetet shqetësuese pra është çështja e implementimit në praktikë. Siç e dini, nga viti 2015, Kosova e ka ligjin për mbikëqyrjen elektronike të personave, lëvizja e të cilëve është kufizuar me vendim gjyqësor”, tha ai.

Sipas të dhënave të prezantuara, gjatë vitit 2025 Policia e Kosovës ka pranuar 2815 raste të dhunës në familje, me Prishtinën që prin për nga numri i rasteve, ndërsa Mitrovica e Veriut për nga incidenca. Numri i përgjithshëm i viktimave ishte 2836, ku 75.35% ishin gra dhe 24.65% burra, ndërsa nga 2998 persona të dyshuar, 84% ishin burra.

Sipas raportit ai tha se Prokuroria ka pranuar 2453 penale. Ndërsa sipas tij nga databaza e KGJK për vitin 2025 janë pranuar 1007 raste.

“Siç shihet edhe nga tabela, në total gjatë vitit 2025 Policia e Kosovës ka pranuar 2815 raste të dhunës në familje. Prishtina prin si rajoni me numrin më të madh me 960 raste, ndërsa në bazë të incidencës në 10,000 banorë, prin rajoni i Mitrovicës së Veriut me rreth 25 raste për 10,000 banorë. Në nivel vendi, numri i përgjithshëm i viktimave të dhunës në familje ishte 2836, nga të cilat 75.35% e tyre ishin gra dhe 24.65% ishin burra. Nga të dhënat e raportuara tek Policia e Kosovës, kemi 2998 persona të dyshuar, ku 84% e tyre ishin burra, ndërsa 16% ishin gra. Nga numri i personave të dyshuar, 1081 persona janë arrestuar për dhunë në familje, ku prej tyre 92% janë burra ndërsa 8% janë gra”, tha ai.

Prokurorja në ZKPSH dhe koordinatore për rastet e dhunës në familje, Laura Pula, tha se dhuna në familje mbetet një nga sfidat më serioze për sundimin e ligjit.

“Unë konsideroj se dhuna në familje është një nga sfidat më serioze të shtetit të së drejtës dhe një provë reale për funksionimin e drejtësisë penale në çdo shoqëri demokratike. Gjithë pajtohemi se ajo nuk ndodh në hapësira publike, në sallë, nuk zhvillohet as para kamerave, ajo ndodh në heshtje pas dyerve të mbyllura aty ku viktima shpesh mbetet e vetme përballë frikës, presionit dhe dhunës së vazhdueshme. Prandaj është më se i domosdoshëm reagimi institucional ndaj dhunës në familje dhe nuk është vetëm detyrë ligjore por është detyrim morale dhe është detyrim shtetërore. Mund të themi se në Kosovë ne prokuroria përfaqëson mekanizmin kyç të reagimit të shtetit së bashku me Policinë e Kosovës”, tha ajo.

Në prag të përballjes Kosovë-Turqi, autoritetet e sigurisë kanë ndërmarrë masa të shtuara për të garantuar zhvillim sa më të mirë të këtij eventi sportiv.

Policia e Kosovës ka “blinduar” zonën përreth hotelit ku është akomoduar Kombëtarja e Turqisë, duke rritur ndjeshëm prezencën e saj në terren, përfshirë edhe njësitin K9.

Burime brenda policisë kanë bërë të ditur se këto kontrolle janë rutinore dhe zhvillohen shpesh.

Këto masa vijnë si pjesë e planit të përgjithshëm të sigurisë për ndeshjen e shumëpritur ndërmjet Kosovës dhe Turqisë, e cila zhvillohet sonte në stadiumin “Fadil Vokrri” në Prishtinë, me fillim nga ora 20:45.

Niveli i sigurisë është ngritur në maksimum, duke synuar një organizim të qetë dhe pa incidente për një nga ndeshjet më të rëndësishme për Kombëtaren e Kosovës.

Bordi i Paqes ka reaguar pas vendimit të Qeverisë së Kosovës për dërgimin e trupave të Forca e Sigurisë së Kosovës në Gazë, duke e mirëpritur këtë angazhim.

Në një postim në rrjetin social X, Bordi i Paqes theksoi mbështetjen për vendimin e institucioneve të Kosovës.

“Bordi i Paqes e mirëpret angazhimin e fuqishëm të Qeverisë së Kosovës për të avancuar paqen dhe rindërtimin në Gazë”, thuhet në reagim.

Sipas legjislacionit në fuqi, pas vendimit të ekzekutivit, çështja i kalon ligjvënësve për shqyrtim dhe votim, ndërsa në fund kërkohet edhe miratimi i presidentit të vendit.

Kryeministri i Kosovës, Albin Kurti, gjatë mbledhjes së Qeverisë, tha se “jemi të gatshëm të marrim pjesë dhe të ndihmojmë popullin e Gazës, sepse edhe vetë kemi qenë dhe jemi përfitues të forcave ndërkombëtare që nga viti 1999”.

The Board of Peace welcomes the strong commitment from the Government of Kosovo to advance peace and reconstruction in Gaza. https://t.co/4bDkiyWOUG

— Board of Peace (@BoardOfPeace) March 30, 2026

Ministri i Mbrojtjes, Ejup Maqedonci, theksoi se përmes këtij angazhimi Kosova synon të dëshmojë se është një partnere e besueshme dhe e gatshme të veprojë krah aleatëve në mbështetje të paqes dhe sigurisë.

“Ky vendim forcon edhe më tej profilin ndërkombëtar të shtetit tonë, afirmon profesionalizmin e FSK-së dhe e vendos republikën tonë në radhën e shteteve që jo vetëm përfitojnë nga siguria ndërkombëtare, por edhe kontribuojnë vazhdimisht në ruajtjen e paqes dhe rendit ndërkombëtar”, tha ai.

Vendimi për dërgimin e trupave u miratua pa asnjë votë kundër dhe pa asnjë abstenim.

Dërgimi i trupave të FSK-së parashihet të bëhet në kuadër të Forcës Ndërkombëtare Stabilizuese (FNS), një mekanizëm i krijuar si pjesë e nismës së ashtuquajtur Bordi i Paqes, i propozuar nga presidenti amerikan, Donald Trump, për arritjen e paqes në botë.

Kosova është në mesin e pesë shteteve të para – së bashku me Indonezinë, Marokun, Kazakistanin dhe Shqipërinë – që janë zotuar për angazhim në këtë mision, me qëllim ofrimin e sigurisë dhe mbikëqyrjen e armëpushimit në Rripin e Gazës.

Megjithatë, ende nuk dihet se kur saktësisht do të ndodhë dislokimi i trupave dhe sa do të jetë numri i tyre. Ministria e Mbrojtjes ka bërë të ditur më herët se propozimvendimi për këtë çështje ishte përcjellë në Qeveri më 3 mars.

Vendimi i Qeverisë vjen pasi funksionalizimi i punës së Kuvendit, pas vendimit të Gjykatës Kushtetuese më 25 mars, ka hapur rrugën për trajtimin e çështjeve të tilla.

Përveç autorizimit për dërgimin e trupave, Kuvendi duhet të miratojë edhe marrëveshjen për anëtarësimin e Kosovës në Bordin e Paqes.

Presidentja e Kosovës, Vjosa Osmani, e cila ka qenë ndër themelueset e Bordit të Paqes, e ka mbështetur publikisht këtë nismë. Mandati i saj presidencial përfundon më 4 prill.

Sipas raportimeve të transmetuesit publik izraelit KAN, Forca Ndërkombëtare Stabilizuese pritet të nisë angazhimin në Gazë nga muaji maj, përfshirë edhe dhjetëra ushtarë nga Kosova, megjithëse institucionet në Prishtinë nuk e kanë konfirmuar zyrtarisht këtë afat.

Ministri i Mbrojtjes, Ejup Maqedonci, ka deklaruar se fillimisht planifikohet dërgimi i mbi 20 ushtarëve të specializuar në fusha të ndryshme, përfshirë njësitë për deminim dhe eliminim të mjeteve të pashpërthyera (EOD), operacione speciale, planifikim dhe ekipe mjekësore.

Zyrtarët e ministrisë kanë bërë të ditur se janë në koordinim të vazhdueshëm me strukturat e FNS-së dhe se është caktuar edhe një ushtarak ndërlidhës për përgatitjen e dislokimit.

Forca Ndërkombëtare Stabilizuese pritet të ketë për detyrë stabilizimin e situatës së sigurisë në Gazë, pas luftës që nisi në tetor të vitit 2023, kur Hamasi – i shpallur organizatë terroriste nga SHBA-ja dhe Bashkimi Evropian – sulmoi Izraelin, duke vrarë mbi 1.200 njerëz dhe duke marrë pengje.

Sulmet pasuese izraelite në Gazë shkaktuan dhjetëra mijëra viktima, krizë humanitare dhe dëme të mëdha infrastrukturore.

Agjencia për Parandalimin e Korrupsionit (APK) ka njoftuar se procesi i deklarimit vjetor të pasurisë po zhvillohet sipas afateve ligjore, me shumicën e zyrtarëve publikë që tashmë kanë përmbushur obligimin.

Sipas të dhënave të fundit, 79.79% e zyrtarëve (8276 persona) kanë deklaruar pasurinë, 11.52% janë ende në proces, ndërsa 8.69% nuk e kanë nisur ende këtë procedurë. Afati përfundimtar për deklarimin është 31 mars 2026, deri në mesnatë, dhe nuk parashihet shtyrje pa pasoja juridike, përveç rasteve të veçanta teknike.

APK paralajmëron masa ndëshkuese për zyrtarët që nuk respektojnë afatin, përfshirë gjoba në vlerë prej 30% të pagës mujore. Në rast të mosdeklarimit edhe pas masave administrative, çështja mund të procedohet më tej me kallëzime penale në prokurori.

Verifikimi i pasurisë bëhet përmes shortit të rastësishëm ose bazuar në informacione nga qytetarët, mediat dhe institucionet. Ndërkohë, deklarimi i rremë ose i paplotë mund të çojë në pasoja ligjore, përfshirë hetime dhe njoftim të institucioneve relevante si Administrata Tatimore apo Dogana./Front Online