ATV

Tag: Ballina

  • Gjykimi ndaj Thaçit dhe të tjerëve, dëshmitari i katërt ka dhënë dëshminë në seancë të mbyllur

    Gjykimi ndaj Thaçit dhe të tjerëve, dëshmitari i katërt ka dhënë dëshminë në seancë të mbyllur

    PËRGATITI: NORA LUTA 

    Një tjetër seancë e mbyllur për publikun është zhvilluar në Dhomat e Specializuara në Hagë, në gjykimin ndaj ish-krerëve të Ushtrisë Çlirimtare të Kosovës. Dëshminë e ka vazhduar dëshmitari i mbrojtur i Zyrës së Prokurorit të Specializuar. Derisa, shoqëria civile ka treguar pse ndërmerren këto masa, duke theksuar edhe rëndësinë e transparencës. ZPS-ja ka paralajmëruar që edhe seanca e të martës do të jetë e mbyllur, ndërsa për të mërkurën është paraparë të jetë publike.

    Në një seancë të mbyllur për publikun, të hënën dëshmitari i katërt ka vazhduar dëshminë e tij në gjykimin ndaj ish-krerëve të Ushtrisë Çlirimtare të Kosovës.

    Dëshmitari i mbrojtur i Zyrës së Prokurorit të Specializuar është ballafaquar me pyetjet e ekipeve mbrojtëse të të akuzuarve.

    Për palët në procedurë, sipas monitoruesve, është normale mbajtja e seancave të mbyllura për publikun, i cili dëshiron më shumë transparencë.

    Kryesisht në seancat e ndjeshme kur Prokuroria apo dëshmitarët kanë kërkuar të merren masa mbrojtëse ndaj tij. Sa i përket pjesës së redaktuar është normale për palët në procedurë, por për neve monitoruesit është sfidë.

    Seancat mund të mbyllen në këtë rast edhe për shkak të dëshmive të rëndësishme, sipas ish-prokurorit në Tribunalin e Hagës, Geoffrey Nice.

    “Me sa e di, të gjitha dëshmitë deri më tani janë dhënë në seanca të mbyllura. Kush e di pse? Ndoshta sepse kishte diçka shumë të rëndësishme dhe të fortë, apo ndoshta për ndonjë arsye tjetër?

    Gjykimi ndaj ish-presidentit Hashim Thaçi, ish-kryeparlamentarëve Jakup Krasniqi e Kadri Veseli, dhe Rexhep Selimit nisi në prill të këtij viti.

    Deri tash katër dëshmitarë janë dëgjuar në seanca të mbyllura për publikun.

    Prokuroria ka thënë për ATV-në se të mërkurën seanca parashihet të jetë tërësisht publike.

  • Vilat në tokë të shtetit, në Stankaj të Rugovës

    Vilat në tokë të shtetit, në Stankaj të Rugovës

    PËRGATITI: KASTRIOT TAHIRI 

    Ministri i Bujqësisë, Faton Peci, ka ngritur shqetësimin se prokuroria nuk po i trajton si duhet rastet me pronat e uzurpuara të shtetit, në Stankaj të Rugovës, në të cilat janë ndërtuar vila.

    ATV-ja ka siguruar dosjen e plotë me detaje se si janë uzurpuar parcelat për 26 vila të banimit, në tokat që i takojnë Institutit Bujqësor të Kosovës.

    Shtatë muaj më parë, ministri i Bujqësisë, Pylltarisë dhe Zhvillimit kishte denoncuar publikisht uzurpimet në Stankaj të Rugovës. Meqenëse nuk pati reagim për këto denoncime, ai vendosi që pyetjen se në pronësi të kujt janë vilat, ta bëjë përmes rrjetit social, Facebook, duke publikuar edhe fotografi.

    Por në fotografi nuk janë paraqitur të gjitha vilat. ATV-ja ka siguruar dosjen e plotë të pronave të uzurpuara në këtë pjesë të bjeshkëve të Rugovës, të cilat i takojnë Institutit Bujqësor në Pejë.

    Ministria e Bujqësisë, në vitin 2022, kishte bërë një hulumtim, të cilin e posedon ATV-ja, sipas të cilit shihet se numri total i parcelave të uzurpuara në Stankaj është 41, me një sipërfaqe prej 90 hektarësh.

    Pjesa më e madhe e sipërfaqes janë prona të lira, pa degradime e eksploatime. Një pjesë e madhe e sipërfaqes është e mbjellë me pisha ku ka kullosa. Ndërkaq, në disa parcela ka të ndërtuara objekte – vila banimi.

    Në këtë sipërfaqe janë të ndërtuara 26 vila banimi.

    Megjithatë, në bazë të fotografive të bashkëngjitura duket se uzurpatorët e kanë menduar mirë vendin se ku t’i ndërtojë ato.

    Të gjitha vilat janë ndërtuar në afërsi të rrugës që lidh fshatrat, për t’iu dhënë qasje më të lehtë.

    Për secilën prej tyre janë bërë fotografi e janë nxjerrë dokumente të pronësisë.

    Por, në bazë të gjetjeve nuk është evidentuar se kush janë uzurpatorët e tyre.

    Lidhur me denoncimin e ministrit Faton Peci, zëdhënësi i Prokurorisë Themelore të Pejës, Shkodran Nikçi, ka shpjeguar se lidhur me rastin kanë autorizuar Policinë e Kosovës për marrjen e informatave dhe se prokuroria që nga fillimi është marrë me këtë çështje.

    Sipas tij, Prokuroria ka hetuar edhe ndërtimet e tjera dhe jo vetëm ato ndërtime që janë në tokë të shtetit.

  • Të premten bëhet betimi i kryetarit të ri të Mitrovicës së Veriut

    Të premten bëhet betimi i kryetarit të ri të Mitrovicës së Veriut

    PËRGATITI: DONISA FAZLIU

    Kryetari i Komunës së Mitrovicës së Veriut, Erden Atiq, të premten do ta bëjë betimin si kryetar i ri i kësaj komune.

    Kështu ka njoftuar ministri i Administrimit të Pushtetit Lokal, sipas të cilit do të organizohet ceremoni betimi në secilën komunë.

    Tri javë pas zgjedhjeve të jashtëzakonshme në 4 komunat në veri të vendit, Erden Atiq, të premten do ta bëjë betimin si kryetar i ri i komunës së Mitrovicës Veriore. Këtë e ka bërë të ditur, ministri i Administrimit të Pushtetit Lokal, Elbert Krasniqi.

    Ai tha se seancat për betimin e kryetarëve të zgjedhur do të organizohen edhe në tri komuna të tjera..

    “Nuk digjet mandati i kryetarëve dhe asamblistëve të komunave. Janë të parapara afatet ligjore që janë tri herë nga 15 dhe mandej prej momentit kur konstituohet Kuvendi, fillon rrjedha e afatit prej 30, për dhënien e betimit të kryetarëve të komunave. Me ta jemi dakorduar individualisht që me secilën komunë do ta organizojmë seancën e betimit të kryetarit dhe aty ku ka nevojë edhe të konstituimit të Kuvendit. Kuvendi i Komunës së Mitrovicës së Veriut ka dërguar informacione në MAPL që të premten do të organizohet seanca për betimin e kryetarit dhe gjithçka do të jetë në proces të organizimit mes Kuvendit Komunal të Mitrovicës së Veriut… në sallën e Kuvendit Komunal aty ku e kanë vendin asamblistët dhe kryetari i komunës”.

    Ndërkaq, Krasniqi tha se janë duke e trajtuar ende vendimin për hapjen e urës mbi lumin Ibër.

    “Vendimi është marrë në Kuvendin e Komunës së Mitrovicës së Veriut. Është aktualisht në Ministrinë tonë në trajtim e sipër, kurdo që përfundon vlerësimi i ligjshmërisë së aktit, ne do ta dërgojmë tek instancat e tjera”.

    Erden Atiq u zgjodh kryetar i komunës së Mitrovicës së Veriut me 66,9 për qind të votave të qytetarëve.

  • Vetingu në pritje të kushtetueses, Komisioni ad hoc kërkon nga Kuvendi që t’i vazhdohet mandati

    Vetingu në pritje të kushtetueses, Komisioni ad hoc kërkon nga Kuvendi që t’i vazhdohet mandati

    PËRGATITI: NORA LUTA

    Gjykata Kushtetuese ende nuk ka dalë me një vendim rreth vlerësimit të amendamenteve kushtetuese rreth procesit të vetingut.

    Shoqëria civile pret që të kjo të ndodhë brenda një periudhe të arsyeshme kohore, megjithëse sipas ligjit nuk ka një afat të përcaktuar.

    Në pritje të vendimit të Kushtetueses, puna e Komisionit Ad Hoc për të përfunduar këtë proces brenda gjashtë muajve ashtu siç ishte planifikuar, nuk do të mund të realizohet.

    Deputetët e këtij Komisioni i kanë kërkuar Kuvendit të Kosovës që atyre t’iu vazhdohet puna në afat të pacaktuar kohor.

    Amendamentet që do t’i hapnin rrugë procesit të vetingut ka dy muaj që i janë dorëzuar Gjykatës Kushtetuese për vlerësim.

    Megjithatë, shoqëria civile thotë se sipas ligjit, gjykata nuk ka një afat brenda të cilit do të duhet të vendosë nëse të njëjtat amendamente janë në përputhje me Kushtetutën e Kosovës.

    Sipas ligjit, gjykata nuk ka një afat që duhet vendosur për kushtetutshmërinë e këtyre amendamenteve. Besoj që tashmë janë duke i shqyrtuar.

    Në pritje të vendimit të Kushtetueses, puna e Komisionit Ad Hoc për të përfunduar këtë proces brenda gjashtë muajve, ashtu siç ishte planifikuar, nuk do të mund të realizohet.

    Të hënën, deputetët e këtij Komisioni i kanë kërkuar Kuvendit që atyre t’i vazhdohet puna në afat të pacaktuar kohor.

    Ky proces nuk varet nga ne në këtë fazë. Nuk kemi të drejtë as të interesohemi për procesin, sepse mund të konsiderohet ndërhyrje politike. Në seancën plenare propozoj që komisionit i duhet një afat shtesë pa kufizim kohor, meqë lidhet me çështjen e vlerësimit të Gj. Kushtetuese.

    Varemi nga një rrethanë jashtë Kuvendit të Kosovës. Kjo është arsye që mbase Kryesia e Kuvendit dhe Kuvendi mund të bëjë ndonjë përjashtim.

    Megjithatë, sipas KDI-së, kërkesa e tillë është në kundërshtim me rregulloren e Kuvendit.

    Komisioni Ad-hoc për Zhvillimin e Procesit të Vlerësimit Kalimtar kishte miratuar amendamentet kushtetuese për procesin e Vetingut, në shkurt të këtij viti.

    Në anën tjetër, sistemi i drejtësisë ka insistuar se i njëjti proces mund të ndodhë edhe pa ndryshime kushtetuese.

    Këshilli Gjyqësor dhe ai Prokurorial kanë thënë se nuk i frikësohen vetingut, por kanë vlerësuar se ky proces duhet të ndodhë për krejt sistemin, jo vetëm për krerët e tij.

  • Power për Asociacionin: Pozicioni i SHBA-së i qartë se nuk do të ketë kompetenca ekzekutive, do të jetë në përputhje me Kushtetutën

    Power për Asociacionin: Pozicioni i SHBA-së i qartë se nuk do të ketë kompetenca ekzekutive, do të jetë në përputhje me Kushtetutën

    Administratorja e Agjencisë Amerikane për Zhvillim Ndërkombëtar (USAID), Samantha Power, në një intervistë në emisionin CONTEXT në ATV, tha se pozicioni i SHBA-së është i qartë sa i përket Asociacionit, i cili duhet të jetë në përputhje me Kushtetutës së Kosovës dhe strukturës qeverisëse.

    Ajo tha se kompetencat ekzekutive nuk janë diçka që parashihen në marrëveshje.

    “Mendoj se SHBA-ja ka qenë shumë e qartë lidhur me pozicionin tonë, e që është se nuk duhet krijuar një nivel shtesë të qeverisjes dhe se kompetencat ekzekutive nuk janë diçka që parashihet këtu. Ajo për çka po flasim janë funksionet komunale, që tashmë ushtrohen në pjesët tjera të Kosovës. Prandaj, e kuptoj sensitivitetin rreth kësaj çështjeje, brengën që ekziston, sidomos kur kihen parasysh disa propozime të bëra paraprakisht. Prapë, sa i përket qëndrimit të SHBA-së lidhur me vendin që ky Asociacion duhet të ketë brenda Kushtetutës së Kosovës dhe strukturës qeverisëse në Kosovë, ai është shumë i qartë”, tha Power. /atvlive.tv

    Emisionin e plotë e gjeni në videon më poshtë:

  • Power: Pozicioni i SHBA-së për njohje të ndërsjellët mes Kosovës dhe Serbisë, është i qartë

    Power: Pozicioni i SHBA-së për njohje të ndërsjellët mes Kosovës dhe Serbisë, është i qartë

    Administratorja e Agjencisë Amerikane për Zhvillim Ndërkombëtar (USAID), Samantha Power, në një intervistë në emisionin CONTEXT në ATV, tha se pozicioni i SHBA-së për njohje të ndërsjellët mes Kosovës dhe Serbisë është i qartë dhe kur mendohet normalizimi i raporteve kudo në botë kjo është një rrjedhojë normale.

    ““Tani fokusi është në integrimin e Kosovës në institucionet Euro-Atlantike, ndërsa në Kosovë fokusi është në krijimin e Asociacionit të komunave me shumicë serbe. Fokusi gjithashtu është edhe në sigurimin që serbët të përmbushin pjesën e tyre të obligimeve nga marrëveshja. Mendoj se ka mjaft në këtë marrëveshje mbi normalizimin për t’u sjellë benefite të gjithëve”, tha Power.

    Sipas saj, normalizimi me Serbinë do të hiqte shumë barriera për Kosovën si nga aspekti i integrimit po ashtu edhe në uljen e barrierave në tregti.

    “Qartazi, ka kaluar një periudhë e gjatë nga viti 1999 pa shumë normalizim, përkundër përparimit të madh demokratik dhe ekonomik. Asgjë nuk mund t’ia mohojë këtë të fundit Kosovës dhe kjo është arsyeja pse ajo është aty ku është sot dhe po shënon rezultate në luftën kundër korrupsinit dhe zhvillim të reformave. Megjithatë, ajo që normalizimi do të bënte të mundur nga aspekti i integrimit rajonal, uljes së barrierave në tregti si dhe reputacionit të Kosovës në nivel rajonal, European dhe global, mendoj se do të ishte një ngjarje transformative, dhe zbatimi i kornizës implementuese do të zhbllokonte progresin ekonomik i cili tani do të ishte vështirë i realizueshëm”, tha Power. /atvlive.tv

    Emisionin e plotë e gjeni në videon më poshtë:

  • Përfundojnë dy takimet dypalëshe, pritet të nisë takimi mes Lajçakut, Bislimit dhe Petkoviqit

    Përfundojnë dy takimet dypalëshe, pritet të nisë takimi mes Lajçakut, Bislimit dhe Petkoviqit

    Dialogu mes Kosovës dhe Serbisë ka vazhduar të hënën në Bruksel, me takime të ndara të kryenegociatorëve të të dyja shteteve me të dërguarin e posaçëm të Bashkimit Evropian për dialogun, Mirosllav Lajçak.

    Lajçak, ka zhvilluar një takim bilateral me delegacionin serb të kryesuar nga kryenegociatori serb Petar Petkoviq. Më pas ai ka zhvilluar një takim dypalësh edhe me kryenegociatorin e Kosovës, Besnik Bisimi.

    Pas takimeve të ndara, pritet të nisë edhe takimi i përbashkët.

    Fokusi i takimeve është zbatimi i Marrëveshjes për rrugën drejt normalizimit të raporteve dhe Aneksit të saj.

    Ky është takimi i parë i kryenegociatorëve pas takimit në nivel të lartë midis kryeministrit të Kosovës, Albin Kurti, dhe presidentit të Serbisë, Aleksandar Vuçiq, më 2 maj në Bruksel. Në atë takim, liderët politikë u pajtuan për deklaratën e përbashkët për të zhdukurit nga lufta e fundit në Kosovë dhe aty u prezantua nga Ekipi Menaxhues drafti i parë i statutit për Asociacionin e komunave me shumicë serbe në Kosovë.

    Pritet që në takimin e 15 majit të vazhdohen diskutimet për këto çështje, por të bisedohet edhe për situatën aktuale në veriun e Kosovës, të banuar me shumicë serbe, pas zgjedhjeve lokale të 23 prillit.

    I dërguari i BE-së, Mirosllav Lajçak, në prag të takimit në Bruksel, kishte shkruar në rrjetet sociale se është i nevojshëm një fokus i plotë në normalizimin e raporteve dhe në zbatimin e Marrëveshjes drejt normalizimit.

    Kosova dhe Serbia më 27 shkurt në Bruksel arritën Marrëveshjen drejt normalizimit të raporteve, ndërkaq më 18 mars në Ohër u pajtuan për Aneksin e zbatimit të saj.

    Lajçak takimin e së hënës e përgatiti përmes vizitave javën e kaluar në Kosovë dhe Serbi.

    Duke folur për takimet në Prishtinë dhe Beograd, përfshirë edhe me kryeministrin kosovar Kurti, dhe presidentin serb Vuçiq, Lajçak tha se liderëve u ka përcjellë pritshmërinë për përqendrimin në normalizimin e raporteve dhe për zbatimin e Marrëveshjes së Ohrit.

    “Nënvizova po ashtu rëndësinë që të evitohet çfarëdo lëvizje e pakoordinuar që mund të dëmtojë procesin”, ka shkruar Lajçak. Ndërkaq, duke iu referuar vizitës që zhvilloi në veri të Kosovës, ku ka biseduar për situatën aktuale, ai ka tërhequr vërejtjen se “ajo që kam dëgjuar, më ka shqetësuar”.

    “Prandaj ritheksova nevojën për të shmangur çdo mundësi përshkallëzimi dhe përqendrim të plotë në normalizimin”, shkroi ai.

    Zyrtari i lartë evropian po ashtu është shprehur se pret nga Bislimi dhe Petkoviqi që të jenë të gatshëm të pajtohen për hapa konkretë në zbatimin e Marrëveshjes së Ohrit.

    BE-ja pret që pas takimit të së hënës të ketë edhe takime të grupeve punuese dhe të ekspertëve, por edhe të komisionit të përbashkët për monitorimin e zbatimit të Marrëveshjes së Ohrit.

    Palët tashmë kanë shprehur qëndrime të ndryshme rreth prioriteteve sa i përket zbatimit të pikave të Marrëveshjes drejt normalizimit dhe Aneksit të saj.

    Ekzekutivi kosovar insiston se duhet të zbatohen të gjitha pikat e marrëveshjes, por Beogradi këmbëngul që fillimisht të themelohet Asociacioni i komunave me shumicë serbe.

    Edhe BE-ja, sipas një zyrtari të lartë, është e mendimit që themelimi i Asociacionit është çështja kryesore që do të vendosë edhe fatin e tërë procesit dhe kjo çështje konsiderohet si prioriteti kryesor, edhe pse sipas Aneksit të marrëveshjes, të gjitha pikat formalisht duhet të kenë rëndësinë e njëjtë.

    Drafti i parë i statutit për themelimin e Asociacionit, që u prezantua në Bruksel më 2 maj, u refuzua menjëherë nga Qeveria e Kosovës dhe ky refuzim ishte i pritshëm për BE-në.

    Kryeministri Kurti kishte prezantuar një vizion të tij për vetëmenaxhimin e komunitetit serb në Kosovë, për të cilin tha se ishte frymëzuar nga marrëveshja e Kroacisë me Serbinë.

    Qeveria e Kosovës ka shkarkuar Ekipin Menaxhues që ka hartuar statutin për Asociacionin, me arsyetimin se ky ekip ka përfunduar mandatin me prezantimin e draftit. Por, ky veprim i ekzekutivit kosovar në BE është konsideruar se është në kundërshtim me marrëveshjen e dialogut. Blloku evropian ka shprehur qëndrimin se ky ekip – i përbërë nga katër anëtarë serbë – duhet të jetë funksional deri në miratimin e statutit të Asociacionit.

    Kosova dhe Serbia kanë arritur dy marrëveshjes për Asociacionin, më 2013 dhe 2015. Por, Marrëveshja mbi parimet për themelimin e Asociacionit, sipas Gjykatës Kushtetuese të Kosovës nuk është në harmoni të plotë me aktin më të lartë juridik të shtetit. Megjithatë, Kushtetuesja ka thënë se ajo mund të harmonizohet me akte ligjore. /REL

  • ​Turqia shkon në balotazh

    ​Turqia shkon në balotazh

    Beteja e Turqisë për presidencën duket pothuajse e sigurt se do të shkojë në balotazh, me presidentin Rexhep Tajip Erdogan të vendosur për një epërsi prej katër pikësh në raundin e parë.

    Pas 20 vitesh në pushtet, ai qëndroi në ballkonin e selisë së partisë së tij duke thënë se ishte i bindur se do të fitonte edhe pesë vite të tjera.

    Sfidanti i opozitës Kemal Kilicdaroglu pohoi gjithashtu se kishte fitoren në duart e tij.

    Gjithçka dukej se kishte rënë në vend për suksesin e raundit të parë.

    Por rezultatet jo të plota i japin atij rreth 45%, Erdoganin me më shumë se 49% të votave. Kandidatëve u duhen më shumë se 50% për të fituar në raundin e parë, shkruan BBC.

    Erdogan ka një rritje të shtuar teksa kërkon të zgjasë presidencën e tij. Aleanca e tij Popullore e partive ka fituar gjithashtu një shumicë në parlament, sipas shifrave paraprake të dhëna nga agjencia shtetërore e lajmeve.

    Për muaj të tërë, partitë e ndryshme opozitare të Turqisë kishin bashkuar forcat e tyre në një përpjekje për t’i dhënë fund një presidenti që e ka zgjeruar pushtetin e tij në mënyrë dramatike që nga një grusht shteti i dështuar kundër tij më 2016.

    Dhe turqit dolën për të votuar në një numër shumë të lartë. Zyrtarët vlerësojnë pjesëmarrje prej 88.8%.

    Zgjedhjet po ndiqen nga afër në Perëndim, sepse Kilicdaroglu ka premtuar të ringjallë demokracinë turke si dhe marrëdhëniet me aleatët e saj në NATO. Nga ana tjetër, qeveria e Erdogan me rrënjë islamike ka akuzuar Perëndimin se po komploton për ta rrëzuar atë dhe kandidatura e Turqisë për në BE ka qenë prej kohësh në akull.

    Në orët e para të së hënës, Kilicdaroglu qëndroi në një skenë në selinë e partisë së tij në Ankara, i rrethuar nga aleatët e tij, duke bërë çmos që të dukej optimist.

    “Nëse kombi ynë thotë raundin e dytë, ne do të fitojmë absolutisht në raundin e dytë,” tha ai.

    Zëdhënësi i partisë Faik Oztrak përforcoi më vonë komentet e tij, duke shtuar se ata do të bënin gjithçka që mundeshin në dy javë përpara balotazhit.

  • ​Kurti takon kryetarët e komunave, i ankohen për mungesë të mbështetjes

    ​Kurti takon kryetarët e komunave, i ankohen për mungesë të mbështetjes

    Kryeministri i Kosovës, Albin Kurti, ka pritur në takim kryetarët e komunave të Kosovës.

    Ai, para tyre ka shprehur angazhimin e ekzekutivit për nivelin lokal.

    “Qeverisja lokale e ka vëmendjen e nivelit qendror. Buxheti komunal për vitin e ardhshëm është mbi 700 milionë euro”, tha ai.

    Mirëpo, kryetari i Asociacionit të Komunave të Kosovës, Agim Aliu, ngriti disa shqetësime që sipas tij niveli lokal nuk po gjen mbështetje nga qeveria.

    “Për shumë çështje nuk kemi marrë përgjigje, përkundër zotimeve. Njëra prej sfidave është tatimi në pronë, ku komunat janë në situatë të pakëndshme, po ashtu edhe bllokimi i fondeve vetanake të komunave”, shtoi ai.

  • Erdogan i bindur për fitore, por pranon edhe mundësinë e balotazhit

    Erdogan i bindur për fitore, por pranon edhe mundësinë e balotazhit

    Recep Tayyip Erdogan tha se aleanca e tij në pushtet ka fituar shumicën e votave në zgjedhjet presidenciale, ndërsa pranoi se është gati për një raund të dytë të mundshëm me rivalin Kemal Kilicdaroglu.

    Sipas DW, pas numërimit të 99. 78% të votave, Erdogan prinë me 49,25%, i pasuar nga lideri i opozitës Kemal Kilicdaroglu me 45,05%, përcjell atvlive.tv.

    Sipas Bordit të Lartë Zgjedhor, shumica e fletëve të votimit nga 3.4 milionë votues jashtë shtetit me të drejtë vote duhet ende të numërohen.

    Kujtojmë presidenti Erdogan kishte fituar rreth 60% të votave jashtë shtetit në zgjedhjet e vitit 2018. /atvlive.tv