Ministri i Mbrojtjes, Armend Mehaj u shpreh se janë në dispozicion për të tejkaluar situatën e rënduar në Pejë, pas vërshimeve të së shtunës.
“Njësitë tona të kërkim-shpëtimit tashmë janë nisur për në qytetin e Pejës, do të jenë aty ku ka nevojë për t’iu dalur në ndihmë në këtë gjendje të rëndë. Me të gjitha kapacitetet tona jemi në dispozicion për të tejkaluar këtë situatë.”, shkroi Mehaj në Facebook.
Një grua dhe djali i saj, 5-vjeçar vdiqën si pasojë e vërshimeve të djeshme në Pejë. Policia informoi se pas vdekjes së 5-vjeçarit, në lagjen “Asllan qeshme”, u gjet e vdekur edhe nëna e tij, e cila ishte e zhdukur.
Një nënë bashkë me fëmijën e saj 5 vjeç, kanë vdekur të shtunën në Pejë, si pasojë e vërshimeve, ka njoftuar Policia e Kosovës.
Sipas Policisë, nëna fillimisht është zhdukur, por është gjetur pas kërkimeve të ekipeve policore në lagjen “Asllan qeshme”.
Përveç tyre, në lagjen “Fidanishte”, po ashtu në Pejë, dy persona kanë pësuar lëndime trupore dhe janë dërguar në spital.
Kosova është përballur me vërshime në disa qytete edhe në janar të këtij viti.
Atëherë, Asociacioni i Komunave të Kosovës (AKK) pati kërkuar nga Qeveria e Kosovës që të mundojë krijimin e një fondi emergjent për komunat, në raste të tilla.
Shirat e rrëmbyeshëm shkaktojnë shpesh vërshime në Kosovë.
Vlerësohet se dëmtimi i shtretërve të lumenjve, si pasojë e nxjerrjeve të paligjshme të zhavorrit, kontribuon shumë në përmbytjen e zonave.
Lideri i “Lëvizjes për mbrojtjen e Kosovës”, Nebojsha Joviq është tërhequr nga politika pasi është kërcënuar me vdekje.
Ai së bashku me familjen e tij ka disa ditë që nuk janë parë më në vendin e tij të lindjes, në veri të Mitrovicës, ndërsa për vendndodhjen e tyre nuk di askush.
Burime të KosovaPress-it bënë të ditur se më 14 qershor në orët e vona të natës, 6 persona të armatosur dhe me maska, kanë hyrë me forcë në banesën e Nebojsha Joviq-it që ndodhet në rrugën “Knjaz Milos” në veri të Mitrovicës, që dyshohet se synim kanë pasur vrasjen e tij, mirëpo përveç bashkëshortes dhe dy fëmijëve, ai nuk është gjetur aty.
Sipas këtyre burimeve, atij edhe në të kaluarën i është tërhequr vërejtja disa herë që ta ndërpresë aktivitetin e tij politik, por që ai nuk është ndalur.
“Ky tipi nga Kopaoniku (Millan Radoicic v. j.) i ka dërguar njerëzit e tij nga Serbia për ta likuiduar Joviq-in, por nuk e kanë gjetur në banesë. Bashkëshorten dhe dy fëmijët ia kanë maltretuar dhe ju kanë thënë se sapo ta gjejnë do t’ia mbyllin gojën përgjithmonë.
Ai dhe familja e tij tashmë janë larguar dhe e kanë braktisur Kosovën. Askush nuk e di se ku ndodhen’, bënë të ditur burime të sigurta të KosovaPress-it.
KosovaPress-i ka provuar për disa ditë me radhë të kontaktojë me Nebojsha Joviq, por pa sukses, ndërsa telefoni i tij vazhdimisht nuk ka qasje.
Madje, ai nuk ka qasje as në rrjetet sociale, në të cilat ka qenë shumë aktiv, por që me gjasë i ka mbyllur të gjitha.
Zëvendësdrejtori i Policisë së Kosovës në Mitrovicë, Veton Elshani bëri të ditur se policia nuk është në dijeni për rastin.
“Policia nuk ka informacion dhe askush nga qytetarët deri tash nuk ka raportuar një rast të tillë në polici”, u shpreh Elshani për KosovaPress.
Ndryshe, Nebojsha Joviq ka qenë ndër bashkëpunëtorët më të ngushtë të politikanit të vrarë serb, Oliver Ivanoviq, ndërsa kohët e fundit në paraqitjet e tij të shumta publike, ka deklaruar se “Lista serbe ka humbur kredibilitetin dhe se nuk mund ta përfaqësojë më popullin serb të Kosovës”.
Po ashtu, ai ka udhëhequr protestën e 13 qershorit në veri të Mitrovicës kundër arrestimit të Millun Milenkoviq – “Llune” nga ana e Policisë së Kosovës, me ç’rast ka brohoritur “tradhti”, “tradhti”, si dhe fjalë të rënda në adresë të presidentit serb, Aleksandar Vuçiq.
Ministri i Bujqësisë, Faton Peci, është aksidentuar sot derisa ishte në terren me veturë zyrtare.
Ai tha se nga ky aksident mori lëndime të lehta bashkë me një shoqërues të tij.
“Gjatë vizitave në terren sot vetura në të cilën ishim, u godit nga një veturë tjetër ku për shkak të kësaj, pësuam lëndime të lehta por pa pasoja serioze. Ju falënderoj të gjithëve që keni shprehur shqetësim e kujdes ndaj meje dhe shoqëruesit tim”, ka shkruar ai.
Megjithatë, nuk dihet nëse personat që ishin në veturën tjetër kanë pësduar lëndime nga ky aksident.
Familjarët e dëshmorëve të Istogut në shenjë revolte kanë larguar emrat e familjarëve të tyre nga lapidari që u vendos ditë më parë në këtë qytet. Sipas tyre, në këtë lapidar janë vendosur emra që nuk ishin pjesë e brigadës 133 të Istogut.
Në shenjë revolte, familjarë të dëshmorëve të komunës së Istogut, larguan emrat e familjarëve të tyre, në lapidarin e dëshmorëve që u përurua ditë më parë.
E për të ndaluar aksionin, dolën pjesëtarë të Policisë. (pamje policia)
Familjarët janë të zemëruar që në lapidar janë vendosur edhe emra të civilëve të vrarë të cilët nuk ishin luftëtarë.
“Ne sot si shenjë revolte, si shenjë pezmi, për tendencën me pirateru historinë e lavdishme, ne kemi dalë mi largu emrat e familjarëve tonë nga pllaka e cila është vendosur me 20 qershor të këtij viti.
“Numri i saktë i dëshmorëve se brigada jonë e përfshin edhe Pejën, një pjesë të Klinës dhe gjithashtu Istogun. Numri i saktë i dëshmorëve është 51, edhe nuk janë dëshmorë vetëm të brigadës 133 të zonës tonë, por që gjysma e dëshmorëve në këtë pllakë janë nga zonat e tjera. Këta emra i kanë shkruar disa komandantë vërceniar, ata janë vërceniar për mu”.
Para se vet t’i largonin emrat e familjarëve, protestuesit thanë se këtë ia kërkuan paraprakisht kryetarit të komunës.
“Në vitin 2008 na kanë ardhë edhe 13 emra janë shtuar dëshmorë, në atë kohë nuk i kemi pranuar ata emra, kemi provuar në mënyra të ndryshme që t’i kundërshtojmë këta 13 emra sepse ata nuk kanë qenë dëshmorë. Kemi kërkuar nga kryetari i komunës që të vendosen vetëm emrat që kanë qenë dhe të mos shtohen emrat tjerë. Kemi marrë premtim nga kryetari, por më vonë e kemi vrejtë që janë shtuar emrat. Kemi kërkuar që mu largu emrat e familjarëve tonë, por që nuk i kanë larguar dhe jemi detyruar që sot t’i largojmë personalisht”.
Por, sipas zyrtarëve komunalë, listën me emrat e dëshmorëve e morën nga shoqatat e dala nga lufta.
“Listën me emrat e dëshmorëve e kanë sjellë Shoqata e dala nga lufta. Ne përpos që i kemi vendosur emrat e tyre në lapidar, nuk kemi përgjegjësi të për listat e dëshmorëve. Kemi mbajtur rreth 7 ose 8 takime me disa nga familjarët e dëshmorëve dhe se u kemi dhënë të njëjtën përgjigje”.
Lapidari i Ri i Dëshmorëve në Istog, në të cilin janë të 63 emra të dëshmorëve është inauguruar në 24 vjetorin e Ditës së Çlirimit të qytetit.
Mbi 80 gra bashkë me fëmijët deri më tani këtë vit kanë kërkuar ndihmë për strehim në qendrën për mbrojte në kryeqytet. Edhe pse kjo qendër operon me probleme financiare megjithatë sfidë më e madhe mbetet riintergrimi i viktimave.
Ndajnë dhimbjen e përbashkët. Por, mbi 80 gra që kanë përjetuar dhunë në familje ndajnë edhe hapësirën e përbashkët, respektivisht Qendrën për Mbrojtje në Prishtinë.
Në këtë qendër ka gra të cilat vijnë për herë të tretë apo të katërt, andaj riintegrimi i viktimave konsiderohet sfida kryesore.
“Pjesa më sfiduese është pjesa e riintegrimit, çka pas strehimores? Se viktimat nëse nuk e kanë një qëndrueshmëri financiare, një punë, një sigurim financiar ato prapë po kthehen tek dhunuesit dhe prapë po vazhdon cikli i dhunës. Që nënkupton që shpesh kemi raste recidive që vijnë për herën e tretë, katërt apo të pestë”
Për shkak të kërkesave të shumta për strehim në këtë qendër, viktimave u lejohet të qëndrojnë deri në gjashtë muaj.
“E kemi një rregullore standard prej momentit kur pranohet deri në gjashtë muaj kanë të drejtë qëndrimi. Mirëpo, nëse atyre nuk ju bëhet ndonjë zgjidhje ato qëndrojnë më gjatë. Për momentin e kemi një grua që është që tetë muaj dhe ende nuk i është bërë zgjidhje dhe vazhdon të marrë shërbime.
Qysh nga fillimi i vitit strehimoret e këtilla kanë kaluar nën ombrellën e Ministrisë së Drejtësisë.
Hamiti shpreson për linjë buxhetore të qëndrueshme që të arrijnë të ofrojnë shërbime për të gjitha gratë që kanë nevojë.
9 zolla, 1 predhë e minahedhësit, 21 granata dore prodhim serb, lloji i të cilave dyshohet të jetë përdorur gjatë sulmit ndaj KFOR-it, 10 armë të gjata automatike dhe mbi 5000 fishekë, është vetëm një pjesë e municionit që Policia e Kosovës konfiskoi të premten në Zveçan.
Në një konferencë të jashtëzakonshme, ministri i Brendshëm dhe drejtori i Policisë, thanë se u parandalua një sulm terrorist. Vetura ku u gjet kjo sasi armesh, dyshohet se është në pronësi të shtetit serb.
Kjo veturë është e paraparë të transportojë jo më shumë se pesë persona. Por, brenda audisë me targa të Beogradit, e cila ishte parkuar vetëm 100 metra larg Komunës së Zveçanit, Policia e Kosovës, gjeti sasi të konsiderueshme të municionit.
“9 zolla, 2 lansues, 2 ossa, 1 predhë e minahedhësit, 21 granata dora, 20 predha të trombolinit, 2 mbushës të barutit, 10 armë të gjata automatike,një revole, një shurdhues i armëve, 51 karikator i armëve të gjata, 5 karikatorë për armë të shkurta, 5756 fishekë të kalibreve të ndryshme, 18 koktej molotovi, 17 mjete piroteknike, 14 mjete tymuese, 5 thika ushtarake, 11 jelek antiplumb dhe jelekë taktik, 9 uniforma ushtarake, 1 palë dylbi, një maskë për helm e gaz, një dyshek ushtarak, 19 emblema të “Brigadës së Veriut”, 3 radiolidhje dhe mbushës, një sasi e narkotikëve”, tha ministri Sveçla.
Sipas drejtorit të Policisë, kjo sasi e armëve është deponuar nga strukturat ilegale, që pastaj të përdoret për sulme terroriste. Madje, lloje të granatave që u hasen në veturë e që janë prodhim serb, dyshohet se u përdoren në sulmet ndaj KFOR-it.
“Vlen te theksohet se 15 granata dore, janë prodhim serb i vitit 2021, dhe nga hetimi i njësive te specializuara ekziston dyshimi i bazuar se ky lloj i granatave është përdorur në sulmin ndaj KFOR-it te datës 29 maj”, tha drejtori i Policisë, Gazmend Hoxha.
Vetura që për një kohë kishte qëndruar e parkuar në lagjen “Kolonia” të Zveçanit, dyshohet se është në pronësi të shtetit serb.
“Vetura që shihni këtu, me targa të Beogradit, e përfshirë në këtë rast është evidentuar si pronë e një ndërmarrje publike shtetërore e Serbisë. Saktësisht “Shoqëria Aksionare Hekurudha e Serbisë”. Është mese e qartë kush qëndron pas sulmeve dhe përpjekjeve terroriste brenda vendit tonë. Pra, këtu në këto prova gjeni veturën e institucioneve të shtetit të Serbisë, radiolidhje të zyrtarëve serbë në Kosovë, simbole të Rusisë dhe të organizimit terrorist “Severna Brigada”, shtoi ministri.
Mbrojtja Civile dhe Brigada e Veriut, organizata këto që funksionojnë në veriun të Kosovës, sipas ministrit të Brendshëm do të shpallen organizata terroriste.
