ATV

Tag: Ballina

  • SBAShK: Orët e humbur s’janë zëvendësuar në tërësi

    SBAShK: Orët e humbur s’janë zëvendësuar në tërësi

    Nënkryetarja e Sindikatës së Bashkuar të Arsimit, Shkencës dhe Kulturës (SBASHK), Vjollca Shala ka thënë se procesi mësimor është zhvilluar sipas plan-programit, ndonëse fillimviti ka filluar me grevë pesë javëshe.

    Gjatë një interviste për Ekonomia Online, nënkryetarja e SBAShK-ut, ka deklaruar se përkundër grevës, mësimdhënësit kanë arritur të përfundojnë njësitë mësimore sipas planit të paraparë.

    “Procesi mësimor është zhvilluar ashtu siç është paraparë, ngase mësimdhënësit pavarësisht ka qenë që ka qenë greva pesë javore në fillimvit për kërkesat tashmë të njohura të asaj kohe, mësimdhënësit kanë arritur që të gjitha njësitë mësimore të cilat i kanë pasur të parapara për t’i shpjeguar për gjatë vitit shkollor, natyrisht që kanë arritur t’i shpjegojnë dhe t’u japin njohuritë e duhura nxënësve, ndërsa vlerësimi në përgjithësi të procesit mësimor, mendoj që është bërë një punë siç është kërkuar nga mësimdhënësit por vlerësimin e nxënësve e bëjnë pikërisht mësimdhënësit dhe ata janë kompetent për vlerësimin e nxënësve”, u shpreh ajo.

    E humbja e orëve të mësimit si pasojë e grevës, sipas Shalës janë zëvendësuar por jo në masë të madhe.

    Ajo u shpreh se përkundër kontratës kolektive që orët e humbura nuk zëvendësohen, mësimdhënësit i kanë mbajtur ato orë.

    “Orët të cilat kanë qenë të parapara për vitin shkollor 2022-23, natyrisht që janë realizuar edhe pse me kontratën kolektive të nënshkruar ndërmjet SBAShK-ut dhe MAShTI-t, ka qenë që orët e humbura gjatë grevës të mos zëvendësohen, mirëpo megjithatë mësimdhënësit përkundër asaj edhe nëse nuk i kanë zëvendësuar si orë mësimore, në orët mësimore kanë pasur mundësi që njësitë mësimore të cilat kanë qenë më të shkurtra t’i realizojnë, qoftë përmes një zgjatje të orarit por edhe plotësimit të ndonjë ore mësimore aty ku e kanë parë që nxënësit kanë nevojë për ato njësi mësimore”, u shpreh ajo.

  • S’ka vendim, KE-ja përsërit paralajmërimin për masa nëse s’ka shtensionim

    S’ka vendim, KE-ja përsërit paralajmërimin për masa nëse s’ka shtensionim

    Me një tjetër përsëritje të paralajmërimit për “pasoja negative” nëse nuk ka shtensionim të situatës në veri të Kosovës, përfundoi punimet dyditore Këshilli Evropian.

    Në konkluzionet e publikuara pasditen e 30 qershorit, Këshilli Evropian nuk njoftoi për ndonjë vendim në raport me Kosovën.

    “Këshilli Evropian dënon incidentet e fundit të dhunshme në veri të Kosovës dhe thërret për deeskalim të situatës, bazuar në elementet kyçe tashmë të theksuara nga Bashkimi Evropian, më 3 qershor 2023. Palët duhet t’i krijojnë kushtet për zgjedhje të parakohshme në të katër komunat në veri të Kosovës. Dështimi për të deeskaluar tensionet do të ketë pasoja negative”, thuhet në konkluzionet e Këshilli Evropian.

    Në vijim të paragrafit me pesë rreshta, për raportet Kosovë-Serbi, Këshilli kërkoi vazhdim të dialogut në Bruksel dhe zbatim të asaj që është dakorduar.

    “Është thelbësore që të vazhdohet me dialogun e lehtësuar nga BE-ja, të udhëhequr nga Përfaqësuesi i Lartë, dhe me zbatimin e shpejtë të Marrëveshjes për rrugën drejt normalizimit dhe shtojcës për zbatim. Kjo përfshin themelimin e Asociacionit apo Bashkësisë së Komunave me Shumicë Serbe”, thuhet me tej në konkluzionet e Këshilli Evropian.

    Kosova nuk u përmend në asnjërën nga dy konferencat e organizuara pas mbledhjes së Këshillit.

    As në atë të kancelarit gjerman, Olaf Scholz. As në atë të presidentëve të Këshillit dhe Komisionit Evropian, Charles Michel dhe Ursula Von Der Leyen, me kryeministrin e Suedisë, Ulf Kristensson.

    I pyetur nëse në Bruksel flitet për presion ndaj Serbisë për deeskalim, kryeministri kroat Andej Plenkovic tha se në fjalën e tij në Këshill kërkoi qasje të balancuar.

    “Ne e pamë se si dhe kush i sulmoi ushtarët e KFOR-it dhe EULEX-in. Stabilizim, po. Pjesëmarrje në zgjedhje, po. Bisedime me të dyja palët, po. Respektim i marrëveshjeve, po. Dhe, krijim i parakushteve për marrëveshjen për normalizim. Mesazhi është qasje e balancuar, jo presion në njërën palë”, tha Plenkovic.

    Ai përsëriti nevojën për zgjedhje të reja në katër komunat me shumicë serbe në veri të Kosovës dhe pjesëmarrjen e serbëve në to.

    Javët e fundit, BE-ja paralajmëroi për mundësinë e pezullimit të bashkëpunimit financiar dhe takimeve të nivelit të lartë me Kosovën, nëse Qeveria nuk ndërmerr veprime të menjëhershme për shtensionim të situatës në veri. /atvlive.tv

    Edicionin Qendror të lajmeve në ATV e gjeni në videon më poshtë:

  • “Festo me zemër, jo me armë”

    “Festo me zemër, jo me armë”

    “Festo me zemër e jo me armë”, është motoja e fushatës së Ministrisë së Punëve të Brendshme, e cila synon ta parandalojë përdorimin e armëve nëpër ahengje e festa.

    Derisa përdorimi i armës për festime është vepër penale, Ministrja e Punëve të Jashtme, Donika Gërvalla, ka kërkuar nga institucionet e sigurisë t’i ndjekin shkelësit.

    “Arma nuk e ka vendin as në familje, as në shtëpi. Arma e ka vendin në duart e Policisë së Kosovës, te profesionistët, të cilët janë të trajnuar të ushtrojnë rendin dhe ligjin, qoftë edhe me anë të forcës. Mërgata kur vjen të mos përballet me tragjedi. Përdorimi i armës është vepër penale dhe duhet ndjekur nga të gjitha institucionet e sigurisë dhe të drejtësisë”, tha Gërvalla.

    Derisa muajt e verës në Kosovë janë të njohur më shumë për organizimin e ahengjeve të ndryshme, Policia do të jetë më aktive në terren, që të parandalojë siç thanë ata, ndonjë tragjedi.

    “Fushata do të prihet kryesisht gjatë sezonit të verës. Arsyeja janë shtimi i ahengjeve, shtimi i popullsisë, pra ardhja e mërgatës, e me këtë shtim edhe shtimi i të shtënave. Mendojmë se institucionet mund të arrijnë ndalimin e shtënies së armëve. Policia e Kosovës vazhdimisht punon në këtë drejtim, por e vetme nuk mund të arrijë të ndalojë këtë fenomen. Një nga prioritetet e Ministrisë së Punëve të Brendshme dhe e Qeverisë së Kosovës është ofrimi dhe ruajtja e sigurisë”, tha zëvendësministri i Punëve të Brendshme, Blerim Gashani.

    Ndonëse gjuajtja me armë në raste të caktuara nuk ka për motiv vrasjen, sipas Shqipdon Fazliut nga Prokuroria e Shtetit, dënimi është i njëjtë.

    “Kryerësit e këtyre rasteve janë ose dashamirë ose familjarë. Por pavarësisht motivit, dënimi për vrasje është i njëjtë. Kjo fushatë është e një rëndësie të veçantë; arma është vdekjeprurëse. Festoni ditën e natën, kërceni e luani, por duhet t’i kursejmë edhe fëmijët e të afërmve tanë. Ka pasur raste kur prindi e ka vrarë fëmijën e tij, burri ka vrarë njëkohësisht gruan dhe nënën e tij”, tha Fazliu.

    Çdo vit në Kosovë plagosen dhe vriten fëmijë, gra e burra nga të shtënat në festa. Muaj më parë u plagos një vajzë 15-vjeçare dhe dy meshkuj nga plumba qorr, ndërsa 76 persona të tjerë u plagosën nga mjetet piroteknike. /atvlive.tv

    Edicionin Qendror të lajmeve në ATV e gjeni në videon më poshtë:

  • Liderët e BE-së kërkojnë shtensionim në Kosovë, ndryshe do të ketë pasoja

    Liderët e BE-së kërkojnë shtensionim në Kosovë, ndryshe do të ketë pasoja

    Udhëheqësit e shteteve dhe qeverive të Bashkimit Evropian në samitin që u mbajt në Bruksel, të premten kërkuan shtensionim të menjëhershëm të situatës në Kosovë dhe paralajmëruan “pasoja negative” nëse nuk bëhet një gjë e tillë.

    Në konkluzionet e miratuara në fund të samitit dyditor në Bruksel, një version të të cilit Radio Evropa e Lirë e kishte parë më herët, liderët përsëritën “përkushtimin e tyre të plotë dhe të qartë ndaj perspektivës së vendeve të Ballkanit Perëndimor për anëtarësimin në BE”.

    Më tej u ritheksua “mbështetja për përshpejtimin e procesit të pranimit të bazuar në merita dhe reforma përkatëse”.

    Një paragraf i veçantë i konkluzioneve u kushtohet tensioneve ndërmjet Kosovës dhe Serbisë dhe në samit raporti iu dorëzua liderëve të BE-së nga shefi i diplomacisë evropiane, Josep Borrell.

    “Këshilli Evropian dënon incidentet e fundit të dhunshme në veri të Kosovës dhe bën thirrje për një shtensionim të menjëhershëm të situatës, bazuar në elementet kyçe që Bashkimi Evropian i ka theksuar tashmë më 3 qershor 2023. Palët duhet të krijojnë kushte për zgjedhjet e parakohshme në të katër komunat e veriut të Kosovës. Dështimi i shtensionimit të tensioneve do të ketë pasoja negative”, theksuan liderët në konkluzionet e miratuara.

    Ata theksuan se është thelbësor vazhdimi i dialogut me ndërmjetësimin e BE-së dhe zbatimi i shpejtë i Marrëveshjes për rrugën drejt normalizimit dhe Aneksit të saj.

    Në konkluzione, shtohet se këtu përfshihet edhe formimi i Asociacionit të komunave me shumicë serbe në Kosovë.

    Edhe pse konkluzionet u përgatitën me kohë dhe nuk u kontestua përmbajtja e tyre, miratimi ishte i pasigurt deri në momentin e fundit, sepse ishte një paketë konkluzionesh me të gjitha temat që ishin në rend dite gjatë dy ditëve sa u zhvillua samiti.

  • Borrell e konfirmon: Sot njoftohen liderët e vendeve të BE-së për zhvillimet në Veri të Kosovës

    Borrell e konfirmon: Sot njoftohen liderët e vendeve të BE-së për zhvillimet në Veri të Kosovës

    Përfaqësuesi i Lartë i Bashkimit Evropian, Josep Borell, ka bërë të ditur se sot në ditën e dytë të takimi të Këshillit të Bashkimit Evropian do të diskutohet për situatën dhe zhvillimet në veri të Kosovës.

    Borell ka thënë se sot ai do të informoj liderët e shteteve të BE-së për ngjarjet e fundit lidhur me veriun.

    “Sot, një diskutim i rëndësishëm për Kinën dhe sigurinë ekonomike. Do të informoj liderët për zhvillimet e fundit në veri të Kosovës”, ka shkruar ai në Twitter.

  • Dita e dyta e samitit të BE-së, “Duhet shtensionuar shpejt situatën në Kosovë”

    Dita e dyta e samitit të BE-së, “Duhet shtensionuar shpejt situatën në Kosovë”

    Në Bruksel është duke vazhduar samiti i liderëve të vendeve të Bashkimit Evropian, në të cilin, ndër tjerash temë për diskutim janë edhe tensionet në raportet ndërmjet Kosovës dhe Serbisë.

    Për këtë është diskutuar edhe ditën e parë të samitit, së pari në një takim të përbashkët që liderët e BE-së patën me sekretarin e Përgjithshëm të NATO-s, Jens Stoltenberg, e pastaj edhe në takimin e shefave të shteteve apo qeverive të BE-së.

    “Ishte një diskutim mjaft dinamik dhe shumë pjesëmarrës folën për këtë temë. Por, porosia kryesore ishte se duhet të veprohet shpejt për shtensionimin e situatës dhe këto [veprime] duhet të bëhen nga të dyja palët“, ka thënë një zyrtar i BE-së, duke folur me gazetarët mëngjesin e së premtes, kur edhe ka nisur dita e dytë e samitit, shkruan Rel.

    Gjatë ditës, pritet të debatohet edhe për tekstin e konkluzioneve, i cili tekst është përgatitur për miratim. Në këtë tekst, ndër tjerash, është një paragraf që u kushtohet Kosovës dhe Serbisë, si dhe një tjetër për zgjerimin e Bashkimit Evropian.

    Mirëpo, problemi me konkluzionet është se ato të gjitha janë në një dokument dhe ka mundësi që për shkak të mospajtimeve mes vendeve të BE-së për temën e migracionit, të mos miratohen fare as konkluzionet për temat tjera.

    Liderët e BE-së kanë bërë përpjekje deri pas mesnate që të arrijnë pajtim për tekstin, por Hungaria dhe Polonia e kanë bllokuar miratimin e pjesës që ka të bëjë me menaxhimin e migrimit në BE.

    Zyrtarët e BE-së shpresojnë se gjatë ditës së premte do të arrihet një kompromis dhe të miratohen konkluzionet. Si mundësi alternative mbetet edhe miratimi i tyre në formën e “Konkluzioneve të Presidencës“ e jo si “Konkluzione të Këshillit Evropian”.

    Në tekstin e konkluzioneve kushtuar zgjerimit të BE-së, pritet që të shprehet mbështetja për integrimin e vendeve të rajonit të Ballkanit Perëndimor në BE.

    Ndërsa, në pjesën e konkluzioneve kushtuar Kosovës e Serbisë, pritet që të dyja vendeve t’u kërkohet të bëjnë hapa të menjëhershëm për t’i ulur tensionet.

    “Këshilli Evropian dënon incidentet e fundit në veri të Kosovës dhe bën thirrje për shtensionim të menjëhershëm të situatës, në bazë të elementeve kyçe që tashmë janë shfaqur nga Bashkimi Evropian më 3 qershor 2023”, thuhet në këtë tekst, shkruan Rel. “Palët duhet të krijojnë kushte për zgjedhje të parakohshme në të gjitha katër komunat në veri të Kosovës. Dështimi në uljen e tensioneve do të ketë pasoja negative”, shtohet tutje në tekstin e konkluzioneve.

    “Është esencial vazhdimi i dialogut të lehtësuar nga BE-ja, udhëhequr nga përfaqësuesi i lartë dhe zbatimi i shpejtë i Marrëveshjes për rrugën drejt normalizimit dhe implementimi i Aneksit është i domosdoshëm. Kjo përfshin edhe themelimin e Asociacionit/Bashkësisë së komunave me shumicë serbe“, theksohet në tekst.

    ensionet në veri të Kosovës kanë filluar më 26 maj, kur kryetarët e zgjedhur në Zubin Potok, Zveçan dhe Leposaviq kanë shkuar në objektet komunale, të asistuar nga Policia e Kosovës. Situata ka eskaluar më datën 29 maj, kur grupet kriminale kanë sulmuar Policinë e Kosovës dhe ushtarët e KFOR-it, ku rreth tridhjetë prej tyre kanë mbetur të lënduar.

    Komuniteti ndërkombëtar i ka drejtuar tri kërkesa kryeministrit Kurti, lidhur me situatën në veri: Shtensionimin e situatës atje, mbajtjen e zgjedhjeve të reja dhe kthimin në dialogun për normalizimin e marrëdhënieve Kosovë-Serbi, të ndërmjetësuar nga Bashkimi Evropian.

    Ditë më parë, kryeministri Albin Kurti ka paraqitur pesë pika për situatën në veri, ku fokus sipas tij, duhet të jetë sundimi i ligjit në katër komunat veriore.

    Ndërkaq, dje (29 qershor), Kurti ka paraqitur propozimin e ri për shtensionimin e situatës në veri. Ai ka paraqitur katër hapa konkretë që Qeveria e Kosovës është e gatshme t’i ndërmarrë për t’i kontribuar rikthimit të stabilitetit në veri. Mirëpo, ka thënë se presin edhe nga Serbia që të zotohet për tërheqje të protestuesve të dhunshëm nga ndërtesat komunale dhe të bashkëpunojë për paraburgimin dhe procedimin gjyqësor të kryesve të dhunës nga ana e Kosovës.

  • ​Gërvalla: Masat e BE-së të panevojshme dhe mesazh i rrezikshëm

    ​Gërvalla: Masat e BE-së të panevojshme dhe mesazh i rrezikshëm

    Zëvendëskryeministrja e Kosovës, Donika Gërvalla masat e paralajmëruara nga Bashkimi Evropian karshi Kosovës i ka quajtur të panevojshme. Sipas saj, nuk bëhet fjalë për bllokim të fondeve të BE-së, por për suspendim të përkohshëm.

    E para e diplomacisë kosovare u shpreh se mesazhet e tilla janë të rrezikshme dhe mund t’i krijojnë përshtypjen presidentit serb, Aleksandër Vuçiq se mund të vazhdojë destabilizimin jo vetëm në Kosovë, por edhe në rajon.

    Këto komente Gërvalla i bëri pas ceremonisë së hapjes së fushatës “Festo me zemër e jo me armë”, të organizuara nga Ministria e Punëve të Brendshme.

    “Masat që janë ndërmarrë në kuadër të përpjekjeve të Bashkimit Evropian për deeskalim të gjendjes në veri të Kosovës, janë masa të cilat BE i sheh si të arsyeshme. Ne mendojmë se masat e tilla janë të panevojshme për shkak se është e rëndësishme që në një situatë të tillë në të cilën ndodhemi mesazhi t’i dërgohet qartë dhe pa asnjë mundësi për keqkuptim atyre që i kanë krijuar trazirat në pjesën veriore të Kosovës. Personalisht mendoj se mesazhet e tilla janë të rrezikshme sepse mund të krijojnë përshtypjen tek presidenti serb, Vuçiq se mund të vazhdojë me të njëjtën mënyrë të destabilizojë jo vetëm Kosovën, por dhe të gjithë fqinjët që ka rreth e rrotull”, theksoi ajo.

    Ministrja e Punëve të Jashtme dhe Diasporës, Donika Gërvalla konsideron se këto masa nënkuptojnë suspendim të përkohshëm të fondeve të BE-së e jo bllokim.

    “Nuk ka bllokim të fondeve, ka suspendim të përkohshëm të fondeve dhe BE e ka bërë të qartë që këto janë masa të cilat janë për momentin dhe të cilat janë natyrisht të rikthyeshme”, tha ajo.

    E pyetur se a ka pasur koordin me SHBA-të për shpalljen e “Mbrojtjes Civile” dhe “Brigada e Veriut” si organizata terroriste, ajo nuk deshi të flas në këtë aspekt, por tha se organizatat që ushtrojnë terror mbi qytetarët dhe institucionet nuk kanë vend në Kosovë.

    “Baza ligjore është aty edhe ne mendojmë se asnjë organizatë terroriste e çfarëdo prejardhje etnike apo çfarëdolloj përbërje kriminale të ketë nuk duhet të lejohet të veprojë në Republikën e Kosovës. Ne jemi zotuar për sundim të ligjit në çdo cep të vendit dhe aty organizatat që ushtrojnë terror ndaj qytetarëve dhe institucioneve të Republikës nuk kanë vend”, u shpreh ministrja Gërvalla.

    E gjatë ditës së djeshme Qeveria e Kosovës, “Mbrojtjes Civile” dhe “Brigadës së Veriut” janë shpallur organizata terroriste. Për këtë vendim kanë votuar pro i gjithë kabineti qeveritar, në përjashtim të ministrit për Kthim dhe Komunitete, Nenad Rashiq.

    Ndërsa, karshi këtij vendimi ka reaguar Departamenti i Shtetit Amerika të cilët thanë se ky vendim është ndërmarrë nga ekzekutivi kosovar pa koordinim me ta.

    E Komisioni Evropian ka paralajmëruar një numër masash kundër Kosovës dhe ato do të përfshijnë pezullimin e programit të fondeve për Kosovën, pezullimin e mbështetjes së vazhdueshme për prokurimin dhe nënshkrimin e kontratave, pezullimin e pjesëmarrjes në ngjarjet e nivelit të lartë, pezullimin e vizitave dypalëshe, si dhe propozimin e dorëzuar nga Kosova për kornizën investuese për Ballkanin Perëndimor që nuk do të procedohet në këtë moment.

    Ndërsa, dy ditë pasi Komisioni Evropian i prezantoi Parlamentit Evropian masat ndëshkuese për Kosovën, kryeministri Albin Kurti paraqiti në Prishtinë një plan 8-pikësh për “shtensionimin e situatës në veri të vendit”. /kp

  • Vendimi i Kurtit për organizatat “Mbrojtja Civile” dhe “Brigada e Veriut” – reagon Lista Serbe

    Vendimi i Kurtit për organizatat “Mbrojtja Civile” dhe “Brigada e Veriut” – reagon Lista Serbe

    Vendimin e Qeverisë së Kosovës për të shpallur organizata terroriste “Mbrojtjen Civile” dhe “Brigadën e Veriut”, Lista Serbe e ka vlerësuar si “pjesë të planit të regjimit të kryeministrit [të Kosovës] Albin Kurti për të vazhduar me terrorin politik në veri të Kosovës dhe arrestimin e serbëve.

    “Planet që dalin nga ky vendim tregojnë se në vend të shtensionimit në bazë të thirrjeve të gjithë bashkësisë ndërkombëtare dhe mbarë popullit serb, Kurti po planifikon përshkallëzim të mëtejmë, represion dhe konsolidim të pushtetit parapolicor dhe pushtues në veri të Kosovës”, u tha në njoftimin e Listës Serbe, partisë më të madhe të serbëve në Kosovë.

    Më 29 qershor, Qeveria e Kosovës shpalli “Mbrojtjen Civile” dhe “Brigadën e Veriut” organizata terroriste, duke argumentuar se këto organizata qëndrojnë pas trazirave në veri të Kosovës dhe se ato paraqesin “kërcënim serioz dhe të drejtpërdrejtë për rendin kushtetues dhe sigurinë në Kosovë”.

    Lista Serbe edhe një herë u bëri thirrje misioneve të NATO-s dhe Bashkimit Evropian në Kosovë, KFOR-it dhe EULEX-it që të vendosin menjëherë forcat e tyre në veri të Kosovës në mënyrë që të “parandalojnë Kurtin që të realizojë planin e tij djallëzor dhe të rrezikojë paqen”.

    Autoritetet në Kosovë kanë sqaruar se vendimi për shpalljen e këtyre dy organizatave si terroriste nuk do të prekë askënd që mund të ketë kryer vepra penale para këtij vendimi.

    Sipas ligjit në Kosovë, kur organizatat shpallen terroriste, aktiviteti i tyre ndalohet menjëherë. Çdo aktivitet i mëtejmë i tyre do të bartte pasoja të rënda ligjore.

    “Mbrojtja Civile” dhe “Brigada e Veriut” – organizata që veprojnë në veri të vendit, të banuar me shumicë serbe – numërojnë qindra pjesëtarë të tyre nga radhët e komunitetit serb.

    Në mbledhjen e Qeverisë, kundër këtij vendimi ka votuar ministri për Komunitete dhe Kthim, Nenad Rashiq. Ai ka argumentuar se ky vendim i ekzekutivit është i nxituar.

    Ndërkaq, Shtetet e Bashkuara kanë thënë se Kosova nuk është koordinuar me ta për këtë vendim, e as me partnerët e tjerë ndërkombëtarë.

    “Ky vendim do të duhej të koordinohej me partnerët më të ngushtë ndërkombëtarë të Kosovës, përfshirë ata të cilët kanë përgjegjësinë primare për të siguruar stabilitetin e Kosovës”, tha një zëdhënës i Departamentit të Shtetit për Radion Evropa e Lirë.

    Që nga përfundimi i luftës më 1999, në Kosovë operojnë struktura ilegale, të mbështetura dhe financuara nga shteti i Serbisë.

    Njëra ndër to është edhe “Mbrojtja Civile”, e cila ka dalë publikisht më 2011.

    “Mbrojtja Civile” në Serbi funksionon në kuadër të Ministrisë së Punëve të Brendshme dhe roli i saj është të reagojë në situata emergjente të rrezikut, siç janë përmbytjet, tërmetet e të ngjashme.

    Shuarja e saj është paraparë në marrëveshjen e arritur mes Kosovës dhe Serbisë më 2015, në kuadër të dialogut për normalizimin e marrëdhënieve.

    Ndërkaq, në gusht të vitit 2022, në pjesën veriore të Kosovës u shfaqën grafite me një log dhe mbishkrimin “Brigada e Veriut” në serbisht.

    Përveç grafiteve me logo të saj në disa rrugë dhe objekte të ndryshme në pjesën veriore të Kosovës, nuk dihet se kush qëndron pas saj, nëse ka anëtarë aktivë dhe cili është roli i tyre.

    Shpallja e “Mbrojtjes Civile” dhe “Brigadës së Veriut” si organizata terroriste vjen në kohën kur tensionet në veri të Kosovës janë rritur.

    Serbët lokalë po kundërshtojnë kryetarët e rinj shqiptarë të Zveçanit, Zubin Potokut dhe Leposaviqit që u zgjodhën më 23 prill. Këto votime u bojkotuan nga popullata serbe.

    Që nga 26 maji, serbët kanë protestuar në veri dhe që atëherë në këtë zonë janë regjistruar disa sulme me shok-bomba dhe granata dore, që kanë shkaktuar dëme materiale, por pa pasoja në njerëz.

    Bashkësia ndërkombëtare ka kërkuar nga Kosova dhe Serbia që të shtensionojnë menjëherë situatën dhe Prishtina të organizojë zgjedhje të reja në katër komunat në veri./REL

  • Kurti: Nuk e forcojmë ushtrinë për ta sulmuar dikën, por për t’u mbrojtur nga dikush

    Kurti: Nuk e forcojmë ushtrinë për ta sulmuar dikën, por për t’u mbrojtur nga dikush

    Kryeministri i Kosovës, Albin Kurti, ka deklaruar se Fora e Sigurisë së Kosovës është shpresë për të ardhmen dhe na bënë krenar për të kaluarën, raporton EO.

    Në ceremoninë e diplomimit të gjeneratës së klasës 2023 të kadetëve të Qendrës për Studime Universitare të Forcës së Sigurisë së Kosovës, Kurti u shpreh se FSK ka krijuar imazhin dhe që nxjerr ushtarë të shkëlqyer që shërbejnë së bashku me ushtritë partnere.

    Të diplomuarve ai u tha se thash e kanë mbi supe ruajtjen e qytetarëve dhe sovranitetin, madje u shpreh se “ne nuk e forcojmë ushtrinë për ta sulmuar dikën por për t’u mbrojtur nga dikush”.

    Kurti përmendi edhe shtimin e buxhetit për ushtrinë, një rritje prej 82 për qind. Investimet për armatim tha se gati i kanë trefishuar.

    “Diplomimi i sotëm nga Qendra për Studime Universitare të Forcës së Sigurisë së Kosovës na jep shpresë për të ardhmen dhe na bënë krenar për të kaluarën. Na kthen në kohën 1999, ku nga shkollimi në fazë të luftës, ushtria jonë vazhdon të zhvillohet. Teksa po e shënojmë këtë gjeneratë, QSU e FSK ka krijuar imazhin dhe që nxjerr ushtarë të shkëlqyer që shërbejnë së bashku me ushtritë partnere”.

    “Kemi lidhur bashkëpunim me Mbretërinë e Bashkuar, Shqipërinë, Letoninë. Nga sot përveç gradën e oficerit, ju do ta keni mbi supe ruajtjen e qytetarëve dhe sovranitetin. Duke pranuar titullin e oficerit që u ndërtua mbi supet e UÇK-së. FSK e keni bërë të hapur për çdo të ri dhe të re dhe keni larguar numrin e kufizuar. Në proces të rekrutimit janë edhe 600 ushtar të rinj”, tha Kurti.

    “Ne nuk e forcojmë ushtrinë për ta sulmuar dikën por për t’u mbrojtur nga dikush”, tha Kurti, teksa falënderoi familjarët për siç tha shkollimin në frymën e atdhedashurisë.

    Komandanti i Qendrës për Studime Universitare të Forcës së Sigurisë së Kosovës, major Albion Ajvazi, tha se kjo është gjenerata e 15-të e oficerëve të diplomuar, për çka u kërkoi që të punojnë me integrimet e besim, raporton EO.

    “Sot është padyshim datë e jashtëzakonshme për Forcën e Sigurisë së Kosovë, kur po e diplomojmë gjeneratën e 15-të të oficerëve të FSK-së. Klasa 2023 përgjatë 4 viteve jeni rritur duke shfaqur vetëbesim”.

    “Veprimet dhe vendimet që do të merrni, padyshim se do të jetë rol kyç në mbrojtje të integritetit dhe qytetarëve të vendit. Mbajeni në mendje besimin dhe përgjegjësinë që u është dhënë. Udhëhiqni me integritet dhe besim dhe padyshim se do të keni sukses për ata që do t’u rrethojnë”, tha ai.

  • Schneeberger: Kosova me ofertë konkrete për shtensionim të situatës – po pala serbe?

    Schneeberger: Kosova me ofertë konkrete për shtensionim të situatës – po pala serbe?

    Këshilltarja lokale e Bashkimit Evropian, Kati Schneeberger, ka reaguar pas hapave që kryeministri i vendit, Albin Kurti, i prezantoi dje si mënyrë për t’u shtensionuar situata në veri.

    Ajo tha se Kosova tashmë ka një ofertë për shtensionimin e situatës, por jo edhe pala serbe.

    “Këtu oferta nga Kosova për të de-përshkallëzuar situatën. A ka edhe ofertë konstruktive nga pala serbe? Ju lutem mos ngurroni të postoni në komente nëse dikush ka gjetur diçka”, ka shkruar Scheeberger në llogarinë e saj në Twitter, transmeton Klankosova.tv.

    Kujtojmë se dje Kurti prezantoi tetë hapa përmes të cilëve, sipas tij, do të ndodhte shtensionimi i situatës në veri.

    Më poshtë gjeni hapat e prezantuar nga Kurti:

    • Reduktimi i pranisë së Policisë së Kosovës në ndërtesat komunale dhe rrethina e tyre, gradualisht dhe proporcionalisht me reduktimin e dhunës;
    • Qasja e plotë në proceset gjyqësore të kryesve të dhunës, dhe monitorimi i proceseve, nga ana e EULEX-it dhe OJQ-ve të interesuara të të drejtave të njeriut;
    • Zgjedhje të parakohshme aktivizohen në katër komunat veriore nga një peticion për tërheqje i përkrahur nga të paktën 20 përqind të elektoratit, siç parashihet në legjislacionin e Kosovës. Pas konfirmimit që janë përmbushur kërkesat për tërheqje, data e zgjedhjeve shpallet nga Presidentja;
    • Katër kryetarët e komunave në fjalë do të udhëzohen që t’ua dorëzojnë autoritetin e tyre kryetarëve të rinj të komunave pas certifikimit nga KQZ-ja në përputhje me legjislacionin e Kosovës.
    • Ndërkohë nga Serbia presim si në vijim:
    • Tërheqja e protestuesve të dhunshëm nga ndërtesat komunale dhe rrethina e tyre;
    • Zotimi për bashkëpunim në paraburgimin dhe procedimin gjyqësor të kryesve nga ana e Kosovës, me monitorim nga ana e EULEX-it dhe garanci të plota për gjykim të drejtë;
    • Reduktimi i gatishmërisë së forcave të armatosura në nivel të ulët, asnjë lëvizje e re e trupave, heqja e 48 Bazave të Përparme Operative që ndodhen përgjatë kufirit.
    • Serbia të mos pengojë apo ndërhyjë në të drejtën e qytetarëve të përkatësisë serbe të Kosovës dhe të gjitha partive politike për të marrë pjesë lirshëm, pa asnjë frikësim, detyrim apo ndikim korruptiv, në procesin e zgjedhjeve lokale të Kosovës.

    Të dyja palët, Kosova dhe Serbia, zotohen të respektojnë plotësisht rregullat e Tregut të Përbashkët Rajonal të Procesit të Berlinit dhe pajtueshmërinë me acquis të BE-së për tregtinë e lirë rajonale sipas marrëveshjeve të bëra.