Kuvendi i Kosovës nga ora 10:00 do të mbajë seancë plenare, derisa ka njoftuar se në rend dite është edhe zgjedhja e guvernatorit të Bankës Qendrore të Republikës së Kosovës.
Seanca do të fillojë me deklarimet jashtë rendit të ditës, ndërsa pritet të bëhet votimi në parim i Projektligjit për shëndet riprodhues dhe fertilizim të asistuar mjekësor.
Në seancën e sotme gjithashtu pritet të votohet edhe projektligjit për ratifikimin e Marrëveshjes për bashkëfinancimin e bursave të arsimit të lartë në nivelin master në mes Ministrisë së Arsimit.
Kuvendi sot do të shqyrtoj edhe Projektligjin për ratifikimin e Traktatit ndërmjet Kosovës dhe Mbretërisë së Danimarkës për shfrytëzimin e institucionit korrektues në Gjilan me qëllim të ekzekutimit të dënimeve daneze.
Tërheqja e të gjithë pjesëtarëve të njësive speciale të Policisë së Kosovës nga veriu, kthimi i serbëve në polici dhe mbajtja e zgjedhjeve të reja – këto janë hapat që Slavisha nga Zubin Potoku i sheh si zgjidhje për shtensionimin e plotë të situatës në veri të Kosovës.
“Të kthehen policët tanë… do të thotë, që ne të kthehemi në punë në [sistemin] e Kosovë. Përderisa janë këtu, do të jetë e vështirë”, thotë ky i intervistuar nga Radio Evropa e Lirë (REL).
Me të pajtohen Miroslav dhe Nemanja nga Zubin Potoku dhe shtojnë se serbët nga veriu duhet të zgjedhin përfaqësuesit e tyre.
Serbët në veri braktisën institucionet e Kosovës në nëntor të vitit të kaluar, si formë e kundërshtimit të procesit të ri-regjistrimit të automjeteve nga targat serbe në ato të Kosovës. Që atëherë ka pasur një varg krizash dhe protestash të serbëve.
Tensionet e fundit, të cilat u rritën në fund të majit për shkak të ardhjes së kryetarëve shqiptarë në krye të komunave, vazhdojnë edhe më tej.
Danijela nga Mitrovica e Veriut, e sheh zgjidhen e krizës në veri si një proces gradual. Ajo beson se serbët, si pjesë e marrëveshjes ndërmjet Kosovës dhe Serbisë, do të tërhiqen nga protestat para komunave.
“Se çfarë mund të shkojë keq në ndërkohë, nuk jam e sigurt, por evidente është se nuk do të ketë tërheqje të plotë të njësive speciale nga ndërtesat komunale dhe para komunave, gjë që në fakt nuk e përmbushë plotësisht kërkesën e serbëve”, deklaron ajo.
Më 10 korrik, BE-ja dhe Kosova konfirmuan se kanë arritur një marrëveshje për shtensionimin e situatës dhe një një ditë më vonë u prezantuan hapat konkretë: tërheqja e 25 për qind e policisë nga dhe rreth ndërtesave komunale në veri, organizimi i zgjedhjeve të jashtëzakonshme vendore pas verës dhe rikthimi në dialog për normalizimin e marrëdhënieve.
Kryetari i LDK-së, Lumir Abdixhiku, tha se rruga e tretë do të jetë pa kryeministrin e Kosovës, Albin Kurti, duke përjashtuar çdo mundësi bashkëpunimi me të.
“Ka një rrugë të tretë, që me aleatë e mundim Serbinë, me aleatë i luftojmë edhe bandat në veri. Sot jemi të dobët, pa aleatë dhe prodhues të krizave”, tha ai në .
Sipas tij, Kurti mbahet përgjegjës për të gjitha skandalet e dështimet e sotme.
“Shikoni çfarë bëri në veri, e tensionoi situatën, morëm dënime, sanksione. E kuptoni sa e trishtë është kjo?”.
“Të gjitha këto trazira për t’u kthyer sërish kryetarët serbë në komunat në veri. Çfarë arritje është kjo? Për teket e një njeriu që të mbuloj paaftësinë e tij në sektorët e tjerë”, deklaroi ligjvënësi opozitar. /rtv21
Samiti i NATO-s në Vilnius përfundoi dje me mbështetje të fortë për Ukrainën, pasi aleatët ranë dakord për një paketë trepjesëshe “për ta sjellë Ukrainën më afër aleancës”, ndërsa vendet e G7-tës nënshkruan një deklaratë të përbashkët mbi garancitë e sigurisë të Kievit.
Në fjalën e tij përmbyllëse, shefi i NATO-s Jens Stoltenberg tha se aleatët sapo përfunduan një samit “historik” në Lituani me marrëveshje mbi “planet më të detajuara dhe më të fuqishme të mbrojtjes që nga Lufta e Ftohtë”.
Duke nënvizuar se riafirmuan gjithashtu për ta sjellë Ukrainën më afër aleancës dhe për të rritur mbështetjen për një kohë të gjatë, Stoltenberg tha se NATO dhe Ukraina do të takohen në Këshillin NATO-Ukrainë për të diskutuar çështjet si partnerë të barabartë tani e tutje.
“Unë mirëpres gjithashtu njoftimet e reja të mëdha të mbështetjes ushtarake të bëra nga aleatët e NATO-s në këtë samit”, tha ai.
Duke kujtuar ndihmën ushtarake të ofruar nga aleatët me vlerë dhjetëra miliarda dollarë dhe trajnimin e dhjetëra mijëra trupave ukrainase nga aleatët, ai tha se “ndërsa Ukraina vazhdon të çlirojë territorin, ne do të qëndrojmë pranë tyre për aq kohë sa të duhet”.
Ai përmendi gjithashtu paketën e re shumëvjeçare të ndihmës për Ukrainën, e cila u miratua të martën, për të ndihmuar në kalimin e Ukrainës nga standardet e epokës sovjetike në ato të NATO-s dhe për t’i bërë forcat e saj plotësisht të ndërveprueshme me NATO-n.
“Ukraina është tani më afër NATO-s se kurrë më parë”, tha Stoltenberg, duke iu referuar heqjes së kërkesës për një plan veprimi anëtarësimi për Ukrainën.
“Ne do të lëshojmë një ftesë për Ukrainën për t’u bashkuar me NATO-n kur aleatët të bien dakord që kushtet janë përmbushur”, përsëriti ai. “Kjo dërgon një mesazh të qartë, të fortë dhe të bashkuar nga samiti ynë i Vilniusit”, shtoi shefi i NATO-s.
Lidhur me takimin e tij me partnerët e Indo-Paqësorit, Stoltenberg tha se “vetëbesimi global i Pekinit dhe lufta e Moskës kundër Ukrainës kërkojnë një koordinim edhe më të ngushtë midis NATO-s, BE-së dhe partnerëve tanë të Indo-Paqësorit”.
NATO po përballet me situatën “më serioze” të sigurisë në dekada, por aleatët po i bëjnë ballë sfidës, tha ai dhe shtoi se “NATO është më e bashkuar se kurrë, duke qëndruar e fortë në mbrojtje të popullit tonë dhe vlerave tona”.
Ai falënderoi gjithashtu presidentin lituan Gitanas Nauseda dhe qeverinë e vendit për pritjen e samitit historik. /Abc news
Habit Hjredini nga Zyra për Qeverisje të Mirë, në emisionin CONTEXT në ATV, tha se inkorporomi i Konventës Ndërkombëtare për Personat me Aftësi të Kufizuara në Kushtetutën e Kosovës, do të ketë përfitime të shumta personat me aftësi të kufizuara në Kosovë.
“Çdo punë që bëhet nga ana e institucionit tonë është në përputhje me këtë konventë. Natyrisht që mbas shumë analizave që kemi bërë, nuk ka qenë e mjaftueshme kjo. Çfarë ne përfitojmë dhe pse do duhej të inkorporojmë në Kushtetutën e Republikës këtë konventë, natyrisht që mund të përfitojmë shumë qytetarët tanë, personat me aftësi të kufizuara, sepse kjo konventë ka pesëdhjetë nene dhe shumica nga neneve i dedikohen aspektit të shëndetësisë, qasjes, edukimit, mirëqenies dhe specifikave të tjera”, tha Hjredini.
Ai përmendi se një nga nenet e kësaj konvente, jo vetëm që obligon secilin shtet që të krijojë kushte për personat me aftësi të kufizuara, por edhe ta adaptojë edhe legjislacionin në përputhje me konventën.
“Është një nga nenet që kërkohen nga secili shtet që Qeveria të krijojë një strukturë, një komitet, një këshill nacional që merret dhe koordinon punën në nivel vendi, gjë për të cilën, ne si qeveri kemi bërë. E kemi këshillin nacional për personat me aftësi të kufizuar që është kompetent për të koordinuar procesin e politikave, po ne e shohim me vlerë këtë konventë, sepse jo vetëm që i obligon qeverinë tonë në dy nivelet për të marrë veprime konkrete në aspektin e shëndetësisë, mirëqenies sociale të punësimit, por në të njëjtën kohë, nenet e konventës thonë që në momentin kur ratifikohet kjo konventë, shteti, do të thotë qeveria, obligohet që legjislacionin që e ka, ta adaptojë në përputhje me konventën”, tha Hjredini. /atvlive.tv
Afrim Maliqi, përfaqësues i HANDIKOS, në emisionin CONTEXT në ATV, vlerësoi se Kosova ende qëndron keq në ofrimin e shërbimeve ndaj personave me aftësi të kufizuara.
“Sfidat janë të shumta, si në sfida në qasje, si në arsim, vetëm, unë gjithmonë dalja dhe them se pasqyra më e mirë se si kuptohet, se ku qëndron Kosova, ku qëndrojmë ne, tregon me vetë faktin numrit i vogël i fëmijëve të përfshirë në arsim. Vlerësohet se vetëm 12 përqindje, por edhe nëse janë 15 për qind, ku është 85 përqindëshi. Institucionet e tona duhet të mirren me atë numër dhe kjo krejt për arsye të mungesës së shërbimeve të duhura shëndetësore, mungesës së kujdestarëve apo asistentëve personal, mungesës së pajisjeve ndihmëse teknologjike, qasjes, infrastrukturës, transportit të qasshëm, që fëmijët nuk mund të vijnë”, tha Maliqi.
Ai bëri një krahasim se si shteti ndërmerr masa ndaj familjeve të fëmijëve që nuk kanë kufizime në sistemin arsimor, ndërsa kjo, sipas tij nuk ndodh edhe me familjet e fëmijëve me aftësi të kufizuara.
“Po qe se sot një fëmijë, i cili nuk ka kufizime, nuk drejtohet në shkollë, atëherë institucionet ndërmarrin përsipër masa ndaj tyre, ndërsa paramendoni, ndaj një familje e cili e cila ka një fëmijë me aftësi të kufizuar, absolut nuk ndërmarrin masa. Pse? Për shkak se nëse ndërmarrin masa, atëherë duhet t’i plotësojnë kushtet, e kushtet nuk mund të plotësohen. Është duke u folur, u fole edhe në vitin 2022, po flitet për personat me aftësi të kufizuar, çka është e mirë, ka përpjekje, mirëpo ende duhet të punohen edhe më shumë”, tha Maliqi.
Ai përmendi se një ndër shkaktarët të cilët i përjashtojnë personat me aftësi të kufizuara nga shoqëria, janë paragjykimet e shoqërisë ndaj tyre.
“Në vendin tonë vlerësohet se janë tre shkaktarë të cilët i përjashtojnë personat me aftësi të kufizuara nga shoqëria. E para janë paragjykimet, të cilat i ka shoqëria ndaj personave me aftësi të kufizuar të cilat shkaktojnë kompleks, madje edhe izolim për shkak se ata e pranojnë atë gjendje dhe izolohen. Po kjo ndodh për arsye se, nëse sot marrim për shembull një familja nëse lind një fëmijë me aftësi të kufizuara, nëse nëna është duke punu, ajo detyrimisht largohet prej pune në mënyrë që të kujdeset për fëmijën apo ndodh edhe të i rriturie njëjta. Kjo familje varfërohet edhe më tepër. Prandaj shpeshherë edhe thuhet i kam dëgju fjalët që thonë se familjet po i mshefin personat me aftësi të kufizuara. Kjo nuk është fshehje, aspak, po ata e pranojnë për shkak se atë izolim të pavullnetshëm, të padëshirë, për shkak se institucionet nuk u ofrojnë shërbime të duhura shëndetësore rehabilituese fillimisht”, tha Maliqi.
Shkaktar tjetër, sipas Maliqit është edhe qasshmëria e personave me aftësi të kufizuara.
“Qasshmëria në objekte në rrugë në trotuare në çdokund. Po te qasshmëria hyn në komunikimi, gjuha e shenjave, mënyrat e komunikimit për grupet e ndryshme të personave me aftësi të kufizuara, që kjo i pengon personat me aftësi të kufizuar në pjesëmarrje, e po ashtu edhe legjislacioni apo politika duke mos i përfshi fillimisht personat me aftësi të kufizuara në grupe punuese, në të drejtat që ata i artikulojnë në mënyrën më të mirë të mundshme, për shkak se vlerësohet se personat me aftësi të kufizuar janë ekspertë sa i përket aftësisë së kufizuar, mirëpo janë persona të tjerë profesionistë, e kur kombinohen këto dy atëherë situata mund të shkojë deri te përmirësimi”, u shpreh Maliqi. /atvlive.tv
Veriu më shumë gjasë do të shkojë në zgjedhje, për të dytën herë brenda këtij viti.
Kryeministri Albin Kurti pohoi gatishmërinë për mbajtjen e zgjedhjeve në 4 komunat veriore, por kryetarët e tanishëm tha se nuk do të japin dorëheqje.
“Dorëheqja është një akt individual moral, pra nuk e thotë dikush në vend të dikujt tjetër, kur e thotë dikush në vend të dikujt tjetër mund të jetë shkarkim, por dorëheqja është dorëheqje e dikujt të veçantë të cilin duhet ta pyesni. Nuk do të ketë dorëheqje, por të ketë neni 72 i ligjit për zgjedhjet lokale”, tha Kurti.
Andaj e vetmja formë, sipas kryeministrit Kurti, është ashtu siç parasheh Ligji për Vetëqeverisje Lokale.
“Sa i përket zgjedhjeve të reja të parakohshme atje, ne këtë e kemi shprehur si zotim tonin edhe më herët dhe se për të arritur aty është e nevojshme që të ndjekim procedurat siç i parasheh ligji në Kosovë, përkatësisht ligji për vetëqeverisje lokale”, tha Kurti.
Në këtë situatë, sipas njohësve të qeverisjeve lokale, ka vetëm një rrugë për mbajtjen e zgjedhjeve të reja.
“Në rastin hipotetik nëse ata nuk japin dorëheqje, atëherë ekziston një procedurë. Në fillim duhet të mblidhen 20 për qind e votuesve të regjistruar dhe t’i mbledhin nënshkrimet për ta iniciuar procedurën, e cila do të shtynte deri te mbajtja e një referendumi, pastaj duhet të organizohet një referendum ku duhet të marrin pjesë 50 për qind të votuesve të regjistruar dhe në të njëjtën kohë duhet të votojnë më shumë se 50 për qind e votuesve të regjistruar për shkarkimin e kryetarit”, tha Selatin Kllokoqi nga Demokracia Plus.
Kryetarët e rinj në katër komunat veriore dolën nga zgjedhjet e 23 prillit, ndonëse pjesëmarrja në votime ishte tejet e ulët. /atvlive.tv
Edicionin Qendror të lajmeve në ATV e gjeni në videon më poshtë:
Nga salla e mbledhjeve të Qeverisë, kryeministri Albin Kurti tha se uron që pritjes për vendimin nga Gjykata Kushtetuese për amendamentet lidhur me vetingun në drejtësi, t’i vijë fundi.
Më direkte në kërkesë ndaj Gjykatës Kushtetuese ishte ministrja e Drejtësisë, Albulena Haxhiu, në konferencën pas mbledhjes.
“Presim që Gjykata Kushtetuese sa më parë e sa më shpejt t’i hapë rrugën zhvillimi të procesit të vetingut në sistemin e drejtësisë”, tha Haxhiu.
Në kuadër që asaj i referohet si reformë në sistemin e drejtësisë, Qeveria miratoi Projektligjin për Këshillin Prokurorial – që mes tjerash parasheh ndryshim në përzgjedhjen dhe përbërjen e Këshillit.
“Nga 13 anëtarë në 7 anëtarë permanentë. Anëtarët permanentë janë 7, në mesin e të cilëve tre prokurorë, kryeprokurori i shtetit, sipas detyrës zyrtare dhe 3 anëtarë jo-prokurorë të zgjedhur nga Kuvendi, por duke ndryshuar mënyrën e zgjedhjes së tyre… Përbërja e përkohshme rritet përkohësisht nga 13 në 19 anëtarë, kjo përbërje do të jetë deri në janar 2026”, tha Haxhiu.
Në dy vendime të ndryshme, Qeveria miratoi shpronësimin e mëtejmë për zgjerimin e rrugës Prizren – Prevallë dhe rrugës Doganaj – Shtërpcë.
“Janë dy projekte të cilat kanë pasur ngecje për shkak të shpronësimeve”, tha ministri MPHI-së, Liburn Aliu.
Ekzekutivi miratoi marrëveshjen ndërkombëtare për kredi nga Banka Evropiane për Investime për financim shtesë prej 38 milionë Eurosh, për vazhdimin e rehabilitimit të “Linjës Hekurudhore 10”, pjesa nga Mitrovica në Leshak.
Qeveria themeloi Grupin Koordinues për anëtarësimin e Kosovës në Këshillin e Evropës.
Aprovimin e morën edhe nismat për lidhjen e dy marrëveshjeve me Turqinë, për bashkëpunim në fushën ushtarake të trajnimeve, teknikës dhe shkencës. /atvlive.tv
Edicionin Qendror të lajmeve në ATV e gjeni në videon më poshtë:
Emërimi dhe shkarkimi i Avokatit të Përgjithshëm Shtetëror, nëse projektligji për përfaqësimin e Institucioneve Shtetërore në Procedura Gjyqësore dhe Arbitrash do të miratohet, do të bëhet drejtpërdrejt nga Ministri i Drejtësisë.
Sipas draftit të këtij projektligji, parashihet që ky institucion të përbëhet të paktën nga dhjetë avokatë shtetërorë, të cilët gjithashtu do të emërohen nga udhëheqësi i këtij dikasteri.
Por për juristët që kanë disa vërejtje në këtë projektligj, kjo mënyrë e emërimit cenon pavarësinë e këtij institucioni.
Ish-avokati i përgjithshëm, Sami Istrefi, thotë se nëse do të mbesin këto ndryshime avokatura rrezikon politizimin.
Megjithatë, ministrja që udhëheq dikasterin e Drejtësisë, teksa ka paralajmëruar që ky projektligj do të jetë në rend të ditës në seancën e ardhshme të Kuvendit, ka deklaruar se mënyra e përzgjedhjes së avokatit shtetëror nuk do të ndryshojë.
Sipas ligjit aktual, Avokati i Përgjithshëm Shtetëror dhe avokatët shtetërorë emërohen me konkurs publik, sipas procedurës së paraparë me dispozitat për emërimin për pozitat e larta drejtuese në Shërbimin Civil të Kosovës.
Me projektligjin e ri, parashihet edhe avokati i komunës, që do t’i përfaqësojë komunat në kontestet komunale, deri në shumën 200 mijë euro. /atvlive.tv
Edicionin Qendror të lajmeve në ATV e gjeni në videon më poshtë:
Audio-incizimet e publikuara nga gazeta online “Nacionale”, në të cilat shefja e Grupit Parlamentar të Lëvizjes Vetëvendosje, Mimoza Kusari, gjatë një takimi me Slako Simiqin e Listës, pranon se ka biseduar me Milan Radojçiqit, kryeministri Albin Kurti i vlerësoi luftë hibride të Serbisë ndaj Kosovës.
Teksa incizimeve iu referua si të gjymtuara e të redaktuara, Kurti mbrojti Kusarin duke thënë se komunikimi me Simiqin ishte bërë në kuadër të punës si shefe e grupit parlamentar.
“Asaj i është lëshuar në interfon të telefonit të Slavko Simiqit, gjë që s’mund të thuhet që është takim, andaj unë edhe një herë po e theksoj, pushteti ynë është demokratik, shteti ynë është i pavarur dhe të gjitha këto sulme në kuadër të luftës hibride, do të dështojnë”, tha Kurti.
Kurti mohoi pretendimet që e implikojnë atë në audio-incizim.
“As që jam takuar e as kam komunikuar ndonjëherë me personin në fjalë”, tha Kurti.
Duke iu shmangur pyetjeve nëse Kusari-Lila duhet të shkarkohet ose të vihet para përgjegjësisë për bisedën me Radojçiqin, i cili është në arrati nga institucionet vendore dhe në listën e sanksioneve të SHBA-së, ministrja e Drejtësisë, Albulena Haxhiu, mbrojti shefen e grupit parlamentar të partisë së saj.
“Lista Serbe nuk ka mundur të shantazhojë dhe t’i bëjë presion shefes së Grupit Parlamentar të LV-së, Mimoza Kusari-Lila. Po të kishin efektin e tyre dhe të shkonin përpara kërkesat e Listës Serbe ato nuk do të publikoheshin”, tha Haxhiu.
Edhe Haxhiu mohoi implikimet nga përmendja që i bëhet në audio-incizim.
Lidhur me incizimin e publikuar, në një intervistë në CONTEXT të ATV-së, Kusari Lila ka paralajmëruar padi ndaj Slavko Simiqit dhe gazetarit Berat Buzhala. /atvlive.tv
Edicionin Qendror të lajmeve në ATV e gjeni në videon më poshtë:
