ATV

Tag: Ballina

  • 24 vjet nga themelimi, policëtt ende pa sigurim shëndetësior e jetësor

    24 vjet nga themelimi, policëtt ende pa sigurim shëndetësior e jetësor

    Përgatiti: Pranvera Krasniqi

    Armë, robotikë, automjete, autoblinda, motorë, pajisje të forenzikës dhe ato të mjekësisë, janë ekspozuar në sheshet e kryeqytetit, me rastin e 24-vjetorit të themelimit të Policisë së Kosovës.

    Për punën e suksesshme të zyrtarëve policorë ka folur ministri i Punëve të Brendshme, Xhelal Sveçla, i cili, po ashtu, ka theksuar se po bën përpjekje që ky institucion të ketë mbështetje më të madhe nga Qeveria.

    “Tashmë Policia e Kosovës është institucioni me besueshmërinë më të madhe në shoqërinë tonë”, tha Sveçla.

    Në këtë përvjetor, drejtori i përgjithshëm i Policisë, Gazmend Hoxha, ka bërë të ditur se Policisë do t’i shtohen rreth 500 pjesëtarë të rinj.

    “Ne veç e kemi pasur një konkurs para një muaji, do t’i marrim të paktën 400 deri në 500 zyrtarë të rinj dhe rekrutimi do të vazhdojë çdo vit”, tha Hoxha.

    Për sfidat e zyrtarëve policorë ka folur kryetari i Sindikatës, Imer Zeqiri. Sipas tij, edhe 24-vjetori i Policisë së Kosovës i gjeti ata pa sigurim shëndetësor.

    “Me sfidat që i ka treguar për këto 24 vjet dhe të mos ketë ende një sigurim shëndetësor dhe jetësor, kjo ka qenë kërkesë e kahershme e Sindikatës të Policisë së Kosovës por nuk kemi marrë përgjigje, nga asnjë qeveri deri më tani”, tha Zeqiri.

    Juristja Dorentina Bujupi ka kërkuar nga institucionet përkatëse që t’i realizojnë kërkesat e policisë.

    “Institucionet t’i realizojnë kërkesat e Policisë së Kosovës”, tha Dorentina Bujupi, juriste.

    Gjatë shënimit të 24-vjetorit, gjithashtu, janë shfaqur disa prej aksioneve të Policisë, që konsiderohen si operacionet më të rëndësishme që janë kryer nga zyrtarët policorë.

  • Kurti: Po vuajmë nga masat ndëshkuese të BE-së

    Kurti: Po vuajmë nga masat ndëshkuese të BE-së

    Përgatiti: Fitim Majkovci

    Kryeministri i Kosovës, Albin Kurti, i ka quajtur të padrejta masat ndëshkuese të Bashkimit Evropian të vendosura ndaj Kosovës.

    Duke folur për këto masa dhe situatën në veri të vendit me katër kryetarët, Kurti tha se zgjedhja e tyre në krye të komunave, erdhi si pasojë e bojkotit të Listës Serbe në zgjedhjet e prillit.

    “Fillimisht, u larguan nga institucionet, më pas refuzuan të marrin pjesë në zgjedhjet për kryetar komunash. Për shkak të situatës në veri të Kosovës, ndaj vendit tonë demokratik janë në fuqi disa sanksione, apo masa të Bashkimit Evropian. Ne po vuajmë për shkak të këtyre sanksioneve. Kryesisht komuniteti ynë i biznesit, por edhe shërbimet shtetërore”, ka deklaruar Kurti.

    Duke shpresuar për ndryshimin e qëndrimit ndërkombëtar ndaj Kosovës, Kurti foli për afatin më të afërt për organizimin e zgjedhjeve të jashtëzakonshme në Veri.

    “Shpresoj se ata do të ndryshojnë mendje. Ne po punojmë me komunitetin ndërkombëtar për ta bërë të mundur këtë. Unë jam duke punuar shumë dhe duke përgatitur gjithçka që zgjedhjet në veri të mbahen këtë vjeshtë”, deklaroi Kurti.

    Në një intervistë për mediat sllovene, Kurti ka folur edhe për marrëdhëniet në Ballkanin Perëndimor, me ç’rast tha se raportet mes vendeve në rajon mund të normalizohen vetëm me njohje të ndërsjellë mes shteteve.

  • Mësimi ka nisur, përveç librave, në disa shkolla s’ka ende ditarë

    Mësimi ka nisur, përveç librave, në disa shkolla s’ka ende ditarë

    Përgatiti: Benita Zeneli

    Veç mungesës së librave, në disa shkolla po mungojnë edhe ditarët.

    Si rrjedhojë orët mësimore po nuk po evidentohen.

    Prishtina është njëra ndër komunat që po përballet me këtë problematikë tash e katër ditë, prej kur ka nisur procesi mësimor.

    “Po presim, sipas informatave, që nesër të kemi furnizimin me ditarë”, tha drejtori i shkollës “Emin Duraku”, Visar Osmani.

    Derisa janë në pritje të drejtorisë komunale të arsimit për t’i furnizuar me ditarë, për këtë është gjetur zgjidhje nga ana e mësimdhënësve.

    “Ne edhe ashtu e kemi planin javor dhe ditor. Më pas kur të vijnë ditarët ne i vendosim në ditar e momentalisht i vendosim në ditarët personalë”, tha Naxhije Fejzullahu, mësimdhënëse.

    Me mungesë të ditarëve janë duke u përballur edhe shkollat në komunën e Drenasit.

    “Nuk kemi ditarë. Është shqetësuese dhe nuk e dimë se kur do të bëhet furnizimi me to”, tha drejtori i shkollës “Halil Bajraktari”, Sylë Berisha.

    Derisa thotë se furnizimi me ditarë do të duhej të bëhej me kohë, kryetari i SBASHK-ut, Rrahman Jasharaj, nuk e bën shumë problematike mungesën e tyre nëpër shkolla.

    “Më problem janë librat. Por do të duhej edhe të bëhej furnizimi me ditarë”, tha kryetari i SBASHK-ut, Rrahman Jasharaj.

    Sipas SBASHK-ut, në komunën e Prizrenit është bërë pjesërisht furnizimi me ditarë, derisa Lipjani, Rahoveci dhe Peja tashmë janë furnizuar.

  • Rikthehen në Turqi 500 trupat që u sollën pas dhunës në veri

    Rikthehen në Turqi 500 trupat që u sollën pas dhunës në veri

    Përgatiti: Armand Hoti

    Ushtarët turq të këmbësorisë, të cilët u dislokuan në Kosovë me kërkesë të NATO-s, pas protestave të dhunshme në veri, kanë filluar të kthehen në atdheun e tyre.

    Ministria e Mbrojtës e Turqisë vlerësoi se misioni i 500 trupave turq mbaroi me sukses.

    “Njësia jonë e dislokuar, pas mbërritjes së saj në kazermën “Sulltan Murat”, në Kosovë, më 6 qershor 2023, ka dhënë një kontribut të rëndësishëm në garantimin e paqes në Kosovë, mes 10 qershorit dhe 31 gushtit, dhe ka përmbushur me sukses misionin e saj”, thuhet në njoftimin e Ministrisë së Mbrojtjes së Turqisë.

    Në një përgjigje për ATV-në, KFOR-i thotë se ky veprim vjen në kuadër të një procedure normale të ndërrimit të kontingjenteve.

    “Ndërrimi i kontingjenteve lidhet me procedurën normale të pranim-dorëzimit”, thuhet në përgjigjen e KFOR-it.

    Eksperti i sigurisë, Avni Islami, vlerëson se largimi i ushtarëve turq nga Kosova, mes tjerash është rezultat i mirë-menaxhimit të situatës nga institucionet e sigurisë së Kosovës.

    “Kjo flet qartë se situata në veriun e Kosovës është shpërshkallëzuar me vetë faktin kjo flet më shumë se kaq. Kjo tregon se deri më tani institucionet e sigurisë së Kosovës po e menaxhojnë situatën në mënyrë perfekte”, tha Islami.

    Në anën tjetër, Sergjan Simonoviç, nga shoqëria civile në Mitrovicë të Veriut, beson se gjendja e sigurisë në veri vazhdon të mos jetë e kënaqshme.

    “Nuk do të thosha se situata e sigurisë është e përsosur në veri, për shkak se nuk kemi mjaftueshëm pjesëtarë të policisë, që mirëpriten nga qytetarët. Çfarë kemi këtu janë forcat speciale, të cilat nga qytetarët shihen si kërcënim. Gjëja e parë që na duhet është që dikush nga komuniteti të shërbejë në forcën e policisë, në mënyrë që të ketë ndjenjë të sigurisë në mesin e qytetarëve”, tha Simonoviç.

    Madje, ai kërkon që të ketë prezencë më të shtuar të autoriteteve ndërkombëtare në veri.

    “Edhe KFOR-i mund të jetë pjesë e kësaj, por mendoj se angazhimi i EULEX-it, apo veçanërisht UNMIK-ut, nuk shohim aktivitete apo përpjekje të këtyre organizatave për deeskalim, në përjashtim të disa takimeve që mbajnë me ne, sektori civil.”

    Trupat e KFOR-it turk, pas protestës së dhunshme ku mbetën të lënduar 30 pjesëtarë të misionit të NATO-s në Kosovë, ishin vendosur përreth objektit komunal në Zveçan. Ndërkaq, së fundmi para këtij objekti, po qëndron KFOR-i letonez.

  • Hasani: Udhëzimi për largimin e kryetarëve kundërkushtetues, nëse shkon në Gjykatë do të rrëzohet

    Hasani: Udhëzimi për largimin e kryetarëve kundërkushtetues, nëse shkon në Gjykatë do të rrëzohet

    Ish-kryetari i Gjykatës Kushtetuese të Kosovës, Enver Hasani, ka thënë se një udhëzim administrativ i lëshuar nga Ministria e Administrimit të Pushtetit Lokal për largimin e kryetarëve të komunave nga funksioni, është në kundërshtim me Kushtetutën e Kosovës. Në një intervistë për Radion Evropa e Lirë, ai e mbështet këtë qëndrim te mungesa e një Ligji për iniciativë qytetare apo referendum.

    Mes tjerash, Hasani, aktualisht profesor i së Drejtës dhe Marrëdhënieve Ndërkombëtare në Universitetin e Prishtinës, ka thënë se pushteti po tregon mungesë vullneti për zgjidhjen e situatës në veri të Kosovës, dhe se dorëheqja e kryetarëve të katër komunave të banuara me shumicë serbe në atë pjesë do të ishte vendimi më i duhur.

    Zoti Hasani, a është udhëzimi i ri administrativ për largimin e një kryetari komune në përputhje me Kushtetutën e Kosovës?

    Enver Hasani: Jo, sepse caktimi i të drejtave dhe detyrimeve, dhe mënyra e realizimit të tyre, duhet fillimisht të përcaktohet me ligj. Kushtetuta kërkon ligj. Këtu bëhet fjalë për demokracinë e drejtpërdrejtë, që është kategori kushtetuese, dhe mënyrat e realizimit të saj përcaktohen me ligj, zakonisht quhet Ligj për iniciativën qytetare, Ligj për referendum, ose Ligj për referendum dhe iniciativë qytetare. Kushtetuta tregon se çka mund të jetë dhe çka nuk mund të jetë subjekt i referendumit. Pastaj, ligjvënësi është i lirë që t’i përcaktojë këto dy çështje. Por, këto dy çështje nuk i ka rregulluar Kuvendi i Kosovës, dhe për pasojë ky udhëzim e ka uzurpuar një autorizim ligjor të Kuvendit, dhe e ka normuar një çështje që është dashur të normohet me Ligjin për iniciativën qytetare.

    Çfarë mund të ndodhë tash?

    Enver Hasani: Jam shumë i sigurt se nëse përfundon në Gjykatë Kushtetuese, ky ligj rrëzohet për arsyet që i thashë, por edhe për arsyen tjetër, që udhëzimin administrativ me përmbajtje të thellë të normave ligjore e ka nxjerrë organi administrativ, që është dikasteri ministror. Ky është konflikt i hapur i interesit, sepse këtu nuk bëhet fjalë për specifikimin e procedurave të realizimit të një të drejte, por caktohen të drejta shtesë prej autorizimit të zëvendëskryesuesit, pastaj mandatimit të Komisionit Qendror të Zgjedhjeve për organizim të zgjedhjeve, gjë që mund ta bëjë vetëm ligji, jo udhëzimi administrativ.

    Sipas jush, a mund të procedojë KQZ-ja me këtë udhëzim, nëse i bëhet kërkesë për largim të një kryetari komune?

    Enver Hasani: KQZ-ja, me këtë udhëzim, nuk mund të procedojë, sepse nuk mund t’i japë urdhër për procedim organi administrativ, Ministria e Administrimit të Pushtetit Lokal, për shkak se atë mund ta bëjë vetëm ligjvënësi. Nenet 70 dhe 71 [të Ligjit për Vetëqeverisje Lokale] kanë autorizimin ligjor, dhe caktohen me ligj iniciativat për rregullat normative dhe politika komunale. Për ato ekzistojnë dispozita ligjore, për nenin 72 nuk ekzistojnë, dhe për pasojë nuk ka autorizim për nxjerrje të udhëzimit administrativ. Udhëzimet nxirren për ta zbatuar një ligj, një normë ligjore, dhe duhet të ketë autorizim në ligj. Neni 72 nuk flet fare për autorizim të ministrisë, as Qeverisë, as askujt. Flet për ligj, e ligji nuk ekziston.

    Sipas Ligjit për Vetëqeverisje lokale, zgjedhjet e parakohshme për kryetarë mbahen në tri raste: nëse kryetari jep dorëheqje, nëse qytetarët e kërkojnë shkarkimin e tij përmes peticionit, dhe nëse kryetari nuk paraqitet në vendin e punës për më shumë se një muaj, pa arsye.

    Enver Hasani: Largimi përmes peticionit i ka dy faza. Faza e parë është iniciativa me 20 për qind, dhe faza e dytë është faza e organizimit të zgjedhjeve. Aty ku të organizohen, duhet të shtrohet pyetja: “A jeni për largim të kryetarit të komunës? Po ose Jo”. Kështu formulohet ajo. Këtë formulim nuk mund ta bëjë organi administrativ, Ministria e Administrimit të Pushtetit Lokal. Atë e bën vetëm ligji, duhet bërë ligj. Kjo nuk mund të bëhet me udhëzim.

    Radio Evropa e Lirë: Po në rast se shkohet përpara me këtë udhëzim, a mund të ketë ai ndikim edhe në komunat tjera?

    Enver Hasani: Ai udhëzim shihet që është bërë nga njerëz që e njohin drejtësinë, përkundër që është kundërkushtetues dhe kundërligjor. Ai nuk vlen vetëm për komunat e veriut, vlen për krejt Kosovën. Përmes një udhëzimi të tillë, për gjashtë muaj mund të përmbysen të gjitha rezultatet e zgjedhjeve, gjë që është e ndaluar, është tërësisht jokushtetuese. Aty përmendet 45-ditëshi. Pse përmendet ai afat, me çfarë të drejte? Duhet pasur autorizim ligjor. Pastaj, ku është logjika e autorizimit të KQZ-së, përmes udhëzimit administrativ të ministrisë? KQZ-ja është organ, vetë është organ administrativ. Ata dhe Ministria e Administrimit të Pushtetit Lokal janë të barabartë para ligjit. Ato e zbatojnë ligjin, direkt. Ato e marrin udhëzimin prej ligjit, jo prej njëra-tjetrës.

    Sipas jush, cila është rruga e duhur për dalje nga situata në veri?

    Enver Hasani: Kjo është çështje e mungesës së vullnetit politik nga ana e pushtetit. Nëse pushteti do të donte ta rregullonte këtë punë, kjo çështje do të harrohej. Do të mund të ulej me opozitën dhe t’i thoshte se ne bëmë zgjidhje, i mbajtëm zgjedhjet siç na tha Kushtetua e ligji, dhe siç na përkrahen miqtë tanë ndërkombëtarë. Miqtë tanë nuk e konsiderojnë, sipas standardeve të shteteve të tyre, këtë rezultat, dhe ne për pasojë jemi të delegjitimuar.

    Unë mendoj që Kosova nuk po i bën nder vetes. Mund t’iu thuhet [kryetarëve], ose mos shkoni një muaj në punë, ose jepni dorëheqje. Shumë më dinjitoze është të jepet dorëheqje dhe të mos shkohet në punë, sesa të largohen me nënshkrim. Sepse, në atë mënyrë, pushteti vetëm po u kundërvihet tezave të veta qe pesë-gjashtë muaj, që ata janë legjitimë. Ata nuk janë legjitimë aty. Ata janë legalë, sipas ligjeve dhe Kushtetutës së Kosovës, por legjitimiteti aty është zero.

  • Numri i turistëve që vizituan Kosovën shënon rritje

    Numri i turistëve që vizituan Kosovën shënon rritje

    Përgatiti: Jeta Selmanaj

    Këtë vit numri i turisteve që si destinacion zgjodhën Kosovën për të vizituar, ka shënuar rritje.

    Vetëm në korrik të këtij viti numri i vizitorëve vendorë dhe të huaj ishte 71 mijë e 341, prej tyre 34,73 për qind, ishin vendorë dhe 65,27 për qind ishin të jashtëm.

    Krahasuar me muajin korrik të vitit 2022 sa ishin 53 mijë e 820 vizitorë kishte rritje të numrit të përgjithshëm të vizitorëve për 32,6 për qind.

    Në njoftimin e Agjencisë së Statistikave të Kosovës për turizmin, thuhet se numri i net-qëndrimeve ishte 177 mijë e 383, prej tyre 42,64 për qind nga vendorët dhe 57,36 për qind nga të huajt.

    Numrin më të madh të vizitorëve të brendshëm e ka rajoni i Pejës me 7 582 vizitorë dhe 38 145 net-qëndrime.

    Sa u përket vizitorëve të huaj, krahasuar me periudhën paraprake (Korrik 2022) ka rritje të vizitoreve për 21,24%. Në total, 45 566 vizitorë të huaj, nga të cilët numri më i madh është nga:

    Shqipëria, Gjermania, Zvicra, Turqia etj, thuhet në raportin për Statistikat e Hotelerisë për muajin korrik 2023 të publikuar nga Agjencia e Statistikave të Kosovës.

    Pavarësisht problemeve me infrastrukturë e e shumë problemeve të tjera që përcjellin turizmin në vend, Kosova ka potencial për turizëm, sidomos atë natyror.

    Duke filluar nga Bjeshkët e Rugovës që ndodhen në qytetin e Pejës, atraksion tjetër turistik është edhe ujëvara e Drinit të Bardhë në Radac, dy pika turistike jo shumë larg njëra tjetrës.
    Tutje, Kalaja e Prizrenit është një vend tjetër i bukur e që ia vlenë të vizitohet nga turistë vendor e të huaj.

    Koosva poashtu ka pasuri nëntokësorë, e disa nga to mund të përjetohen duke vizituar shpellën e Gadimës në Lipjan e vetmja shpellë e Mermetit në Kosovë.

    Pak kilometra nga Prishtina gjendet Ulpiana, aty ku edhe filloi historia e hershme e një qyteti të hershëm Ilir, e që u mbulua nga pluhuri i harresës për dekada, por tani Ulpiana është një atraksion arkeologjik e turistik që në vete gërsheton aq shumë në pak metra katrorë.

    Në vitet e fundit, në qytetin e bukur të Gjakovës po promovohet për vizita Shpella e Kusarit.

    Jo fort larg Gjakovës, në fshatin Rudë të Malishevës, gjendet Ujëvarat e Mirushës, ndryshe e njohur edhe si Park Regjional i Natyrës, një ndër destinacionet më të bukura që ka Kosova.

    Vende të tjera që ia vlen të vizitohen në Kosovë, ndër të tjera, janë edhe Kalaja e Artanës, Liqenati në Bjeshkë të Rugovës, e bjeshkët e Prevallës.

    Më shumë detaje rreth kësaj çështje i gjeni në emisionin “A LIVE”, të cilin e gjeni në videon më poshtë:

  • Lista Serbe: Institucionet serbe nuk do të largohen nga zyrat në Mitrovicë të Veriut

    Lista Serbe: Institucionet serbe nuk do të largohen nga zyrat në Mitrovicë të Veriut

    Lista Serbe njoftoi se katër institucionet serbe nuk do të largohen nga objekti në Lagjen e Boshnjakëve në Mitrovicë të Veriut, që sipas autoriteteve lokale i përket kësaj komune.

    Komuna e Mitrovicës së Veriut ka dhënë afat që deri më 8 shtator Zyra për Kosovën e Qeverisë së Serbisë, Drejtoria e Fondit të Sigurimit Pensional dhe Invalidor, Qarku Administrativ i Mitrovicës së Kosovës dhe Qendra për Punë Sociale nga Vushtrria të largohen nga objekti. Këto institucione prej kohësh përdorin këtë ndërtesë komunale.

    “Duke pasur parasysh synimin e Prishtinës që me çdo kusht të vazhdojë me përshkallëzimin e situatës në terren dhe të pushtojë objektin në Mitrovicës, duam t’iu njoftojmë publikisht se refuzojmë ultimatumin e regjimit në Prishtinë për lëshimin e zyrave tona dhe kërkojmë që kjo çështje të zgjidhet në dialogun mes Beogradit dhe Prishtinës që ndërmjetësohet nga BE-ja dhe në kuadër të themelimit të Asociacionit të komunave me shumicë serbe, siç parashihet në marrëveshjet e vitit 2013 dhe 2015”, u tha në njoftimin e Listë Serbe.

    Kjo parti – që është partia më e madhe e serbëve të Kosovës dhe gëzon mbështetjen e Beogradit zyrtar – tha po ashtu se institucionet që gjenden në objektin komunal ofrojnë shërbime për të gjithë qytetarët, pa dallim të etnisë.

    “Përndjekja dhe pushtimi me forcë i kësaj ndërtese do të kërcënonte ushtrimin e të drejtave të njeriut për dhjetëra mijëra persona, si në fushën e sigurimeve pensionale dhe invalidore ashtu edhe atë të mbrojtjes sociale të shtresave më të rrezikuara të shoqërisë”, tha kjo parti.

    Ajo i bëri thirrje faktorit ndërkombëtar “që të parandalojë” autoritetet e Kosovës, që siç tha, “të përshkallëzojnë situatën duke shkaktuar tensione shtesë që mund të kenë pasoja të paparashikueshme në terren”.

    Aksioni për largimin e institucioneve të Serbisë nga objekti komunal në Mitrovicë të Veriut ishte paraparë të zhvillohej më 25 gusht, por u shty për dy javë.

    Paraprakisht, inspektorati komunal u kishte dërguar këtyre institucioneve një paralajmërim që të lironin zyrat pasi ato nuk kishin dorëzuar dokumente apo kontrata për të dëshmuar se kanë leje ta shfrytëzojnë objektin.

    Autoritetet në Mitrovicë të Veriut kanë thënë se objekti është pronë e tyre dhe se ai duhet të lirohet për shkak të disa “punimeve”. Por, në një deklarim të mëhershëm për Radion Evropa e Lirë, ato nuk specifikuan se për çfarë lloj punimesh bëhet fjalë.

    Më 23 gusht, Ambasada amerikane në Prishtinë kishte kërkuar nga autoritet e Kosovës që “të përmbahen nga ndërmarrja e çfarëdo veprimi që mund t’i rrisë tensionet”.

    Mitrovica e Veriut gjendet në veri të Kosovës, zonë e banuar me shumicë serbe. Tensionet në veri janë rritur që nga fundi i majit, pasi serbët lokalë po kundërshtojnë kryetarët e rinj shqiptarë.

    Udhëheqësit e rinj komunalë u zgjodhën në prill, në votimet që u bojkotuan nga popullata serbe.

    Pas rritje së tensioneve, Qeveria e Kosovës u pajtua në korrik që të ndërmerrte hapa drejt shtensionimit të plotë të situatës. Një ndër hapat për të cilat u pajtuan Prishtina dhe Brukseli parasheh edhe krijimin e bazës ligjore që do të mundësonte mbajtjen e zgjedhjeve të reja në katër komunat në veri.

    Në këtë kuadër, më 5 shtator u publikua udhëzimi i ri administrativ që mundëson largimin e kryetarëve të komunave përmes një peticioni./REL/

  • Kurti në 24-vjetorin e Policisë: Në qeverisjen tonë u shkatërruan 100 grupe kriminale dhe u konfiskuan mbi 2200 kg drogë

    Kurti në 24-vjetorin e Policisë: Në qeverisjen tonë u shkatërruan 100 grupe kriminale dhe u konfiskuan mbi 2200 kg drogë

    Kryeministri i Republikës së Kosovës, Albin Kurti, ka reaguar me rastin e 24-vjetorit të themelimit të Policisë së Kosovës.

    Përmes një postimi në rrjetin social Facebook, Kurti ka thënë se që nga gjenerata e parë policore, Policia ka shërbyer për të gjithë qytetarët duke mbrojtur jetën dhe pronën e tyre dhe duke ruajtur sovranitetin e vendit.

    Tutje kreu i ekzekutivit ka përmendur edhe sukseset e Policisë nën qeverisjen e tij, duke thënë se janë realizuar mbi 1 mijë e 100 operacione, janë shkatërruar 100 grupe kriminale dhe 16 laboratorë droge dhe janë konfiskuar 2 mijë e 200 substancë narkotike.

    “Si Qeveri e Republikës së Kosovës jemi zotuar për luftim të krimit, korrupsionit dhe çdo ilegaliteti që cënon sigurinë e vendit tonë e të qytetarëve tanë dhe jam mirënjohës që në këtë rrugëtim prej më shumë se dy vitesh, kemi arritur suksese falë zyrtarëve policor të përkushtuar e profesional në gjithë territorin e Republikës së Kosovës. Mbi 1100 operacione të realizuara, 100 grupe kriminale të shkatërruara, mbi 2.200 kg substance narkotike të konfiskuara, 16 laboratorë të drogës të shkatërruar, janë suksese që Policinë e Kosovës e kanë renditur ndër institucionet më të besueshme për qytetarët tanë ndërsa Republikën tonë e kanë ngritur në listat e shteteve serioze e të përkushtuara për luftimin e kriminalitetit”, shkroi Kurti.

    Postimi i plotë i tij:

    Policia e Kosovës sot shënon 24 vjetorin e themelimit të saj. “24 vite në shërbim dhe në mbrojtje” është motoja e këtij përvjetori, e cila më së miri përfaqëson Policinë tonë. Që nga gjenerata e parë policore kur filloi trajnimin me 6 shtator 1999, Policia jonë shërbeu për të gjithë qytetarët tanë duke mbrojtur jetën dhe pronën e tyre e duke ruajtur sovranitetin e vendit tonë.

    Si Qeveri e Republikës së Kosovës jemi zotuar për luftim të krimit, korrupsionit dhe çdo ilegaliteti që cënon sigurinë e vendit tonë e të qytetarëve tanë dhe jam mirënjohës që në këtë rrugëtim prej më shumë se dy vitesh, kemi arritur suksese falë zyrtarëve policor të përkushtuar e profesional në gjithë territorin e Republikës së Kosovës. Mbi 1100 operacione të realizuara, 100 grupe kriminale të shkatërruara, mbi 2.200 kg substance narkotike të konfiskuara, 16 laboratorë të drogës të shkatërruar, janë suksese që Policinë e Kosovës e kanë renditur ndër institucionet më të besueshme për qytetarët tanë ndërsa Republikën tonë e kanë ngritur në listat e shteteve serioze e të përkushtuara për luftimin e kriminalitetit.

    Të gjithë zyrtarëve policor që sot janë në krye të detyrës në çdo cep të Republikës së Kosovës u uroj 24 vjetorin e themelimit të Policisë. Bashkë ndajmë sfida e suksese, bashkë do të ngrisim e forcojmë edhe më shumë shtetin tonë.

  • Sveçla flet për sukseset e Policisë: Anëtarësimi në Interpol s’po ndodh për shkak të pengesave politike

    Sveçla flet për sukseset e Policisë: Anëtarësimi në Interpol s’po ndodh për shkak të pengesave politike

    Ministri i Punëve të Brendshme, Xhelal Sveçla, ka thënë se Policia e Kosovës është treguar e suksesshme në veri të vendit, siç ka thënë pas një kohe të gjatë. Ai ka premtuar më shumë luftë kundër shkelësve të ligjit, raporton EO.

    Ai ka deklaruar se numri i rasteve të pazbardhura është minimal, përfshirë edhe pjesë e veriut të vendit.

    Në 24-vjetorin e themelimit të këtij Policisë së Kosovës, Sveçla ka folur profesionalizmin e tyre.

    “Është mirë që policia e Kosovës pas një kohe të gjatë është jashtëzakonisht e suksesshme në atë pjesë të territorit të Republikës së Kosovës kjo tashmë është evidente. Unë jam i bindur që puna e policisë nuk do të ndalet me kaq. Është fal edhe profesionalizmit të njësiteve të cilat ne i vizituam. Numri i rasteve të pa zbuluara është minimale përfshirë edhe atë pjesë të Republikës sonë. Herë do kur do e unë jam i bindur që shumë shpejt secili do të jap llogari për shkeljet, për krimet që ka bërë e që bënë në cilin do cep të Kosovës”, tha ai.

    Sveçla, tha se anëtarësimi i PK në Interpol është duke u bërë për shkak të pengesave politike.

    “Për sa i takon aftësive të PK-së patjetër që jo vetëm se PK do të ishte pjesë e Interpolit por do të ishte një ndër policit më të mira në Interpol, ashtu siç është policia më e mirë në rajon. Është çështje pengesave politike për të cilat ne të gjithë jemi dëshmitarë, unë jam i bindur që me një mobilizim të duhur të të gjithë akterëv në këtë fushë ne do të arrijmë edhe këtë sukses ashtu edhe siç u bëmë pjesë apo dërguam përfaqësuesin tonë në Europol”, tha ai.

    Sveçla ka folur edhe për besueshmërinë që e ka ky institucion te qytetarët.

    “Policia e Kosovës është institucioni me besueshmërinë më të madhe në shoqërinë tonë. Kjo edhe nuk është e rastësishme falë punës së jashtëzakonshme të çdo zyrtari policor, fal përgatitjes së tyre profesionale dhe pajisjeve të cilat ata me profesionalizëm i përdorin në të mirë të qytetarit në përforcim të rendit dhe ligjit. Gjithmonë duke pasur në fokus barazinë e qytetarëve, duke pasur në fokus të drejtat e tyre dhe ushtrimin e këtyre detyrave të tyre ta bëjnë në një vizion të përgjithshëm në të mirë të të gjithë shoqërisë”, tha ai.

    Sveçla nuk ka treguar kohën se kur do të plotësohen kërkesat e PK-së. Ai tha se përmirësimet po vërehen në Policinë e Kosovës.

    “Policia e Kosovës është një institucion themelor, ne jemi duke bërë të gjitha përpjekjet që jo vetëm policia e Kosovës të ketë mbështetje e duhur qoftë nga Qeveria qoftë edhe nga institucionet e tjera. Ka përmirësime edhe po shihen përmirësime në pajisje, në mjete në logjistiken e tyre të përgjithshme. Ka përmirësime edhe në të ardhura, por patjetër se ka hapësire për të bërë më shumë. Unë jam i bindur që do t’i tejkalojmë të gjitha”, tha ai.

  • Zeqiri: Për 24 vjet që nga themelimit, Policia e Kosovës ende nuk ka sigurim shëndetësor

    Zeqiri: Për 24 vjet që nga themelimit, Policia e Kosovës ende nuk ka sigurim shëndetësor

    Me rastin e shënimit të 24 vjetorit të themelimit, Policia e Kosovës ditën e sotme e ka filluar aktivitete të ndryshme. Që nga mëngjesi, portat e stacionit të Policisë së Kosovës të hapura për qytetarët.

    Aktivitetin e sotëm e kanë vazhduar në sheshin e Prishtinës, për t’i prezantuar disa nga pajisjet e njësiteve policore, ndër to armë, robotikë, automjete, autoblinda, motorë, pajisje të forenzikës dhe ato të mjekësisë.

    Në këtë manifestim, prezent kanë qenë edhe drejtori i Policisë së Kosovës, Gazmend Hoxha, po ashtu edhe ministri i Punëve të Brendshme, Xhelal Sveçla.

    Edhe 24 vjet pas themelimit, Policia e Kosovës vazhdon ende të përballet me sfida dhe të shumta.

    Kryetar i Sindikatës së Policisë së Kosovës Imer Zeqiri, në një prononcim për ATV-në, ka përsëritur kërkesën e tyre që pjesëtarët ta kenë sigurim shëndetësor e jetësor.

    “Policia e Kosovës, për kundër rezultateve dhe sukseseve të arritura të saj, është ballafaquar dhe ka përjetuar edhe sfida të ndryshme. Njëra ndër kushtet që apo kërkesë që ka qenë në vazhdimësi që nga themelimi i Policisë së Kosovës ka qenë që Policia e Kosovës të bëhet me sigurim shëndetësor dhe jetësor, e të cilën ende nuk e kemi dhe pas njëzet e katër viteve, një institucion kaq i rëndësishëm i shtetit të mos ketë sigurim shëndetësor dhe jetësor, definitivisht është shumë e padrejtë dhe shumë e pakuptim, prandaj ne edhe paraprakisht kemi kërkuar edhe nga qeveritë paraprake, edhe nga kjo qeveri dhe do të kërkojmë në vazhdimësi që Policia e Kosovës sa më parë të bëhet me sigurim shëndetësor dhe jetësor dhe jo vetëm me këtë”, tha Zeqiri.

    Ai tha se kërkesë tjetër e sindikatës ka qenë që Policia e Kosovës të bëhet me Ligjin për pensionim në moshën 55 vjeçare si dhe shtesa e pagës për rrezikshmëri.

    “Kërkesë e sindikatës ka qenë edhe në vazhdimësi edhe viteve të kaluara që Policia e Kosovës të bëhet me Ligjin për pensionim në moshën 55 vjeçare, e ka shumë arsye pse si dhe kushtet e tjera të cilat na mungojnë, e që si kërkesë e re pas implementimit të ri të Ligjit të pagave na ka dalë edhe shtesa për rrezikshmëri dhe shumë mangësi të tjera që i pat ky ligj dhe njëfarë forme nuk patëm ndonjë ngritje të dukshme të pagës, përkundrazi në disa sektorë, edhe te zyrtarët policorë edhe te pjesë e stafit civil kemi pasur zbritje page, e që na kanë dalë kërkesa të reja që ende nuk janë realizuar, si ë krahasimi me koeficient apo vlerësimi me koeficient siç thuhet edhe në ligj për punë të njëjtë, pagë të njëjtë e që kjo në disa raste nuk ka ndodhë, prandaj, janë këto kërkesa në vazhdimësi që ne jemi duke i kërkuar dhe do t’i kërkojmë vazhdimisht deri në realizimin e tyre. Përgjigje konkrete ende nuk kemi marrë. Kanë kaluar shtatë muaj, po flasim për Ligjin e pagave dhe shtesën e rrezikshmërisë dhe pjesën e koeficientëve, prandaj po shpresojmë që muaji shtator do të jetë ai i muajt i cili një komision që është i formuar nga Qeveria, të dalë me informacione apo me vendime të qarta dhe të sakta për Policinë e Kosovës, përkundër edhe kushteve të tjera”, u shpreh Zeqiri.

    Zeqiri tregoi se gjatë këtyre 24 viteve, 23 zyrtarë policorë kanë humbur jetën gjatë kryerjes së detyrës si dhe mbi 4000 janë lënduar, madje prej tyre ka shumë që kanë mbetur me aftësi të kufizuara.

    “Në realitet derisa nuk kemi sigurim shëndetësor dhe jetësor, ndihmë këtyre zyrtarëve policorë u dilet nga vetë fondi i Policisë së Kosovës. Deri më tani kemi 23 zyrtarë policorë të cilët e kanë humbur jetën gjatë kryerjes së detyrës zyrtare dhe kemi mbi 4000 raste të lëndimeve gjatë kryerjes së detyrës zyrtare dhe çka është edhe më e keqe që nga këto lëndime kemi pjesëtarë të Policisë së Kosovës që kanë mbetë me aftësi të kufizuara apo me invaliditet të përhershëm dhe krejt këtë përkujdesje e bëjmë përmes Departamentit të Shërbimeve Shëndetësore që është në kuadër të Policisë së Kosovës, pra thjesht nga Fondi i Policisë së Kosovës dhe nuk kemi ndonjë përkrahje tjetër shtesë që do duhej të ishte”, tregoi Zeqiri. /atvlive.tv

    Më shumë detaje rreth kësaj çështje i gjeni në emisionin “A LIVE”, të cilin e gjeni në videon më poshtë: