Sot mbahet ceremonia e nënshkrimit të Projektit për Qeverisje Dixhitale.
Bëhet e ditur se projekti do të nënshkruhet nga ministri i Financave, Punës dhe Transfereve, Hekuran Murati dhe drejtori i Bankës Botërore për Kosovë dhe Maqedoni, Massimiliano Paoluçi.
Kryeministri i Kosovës, Albin Kurti, së bashku me zëvendëskryeministren dhe ministre e Punëve të Jashtme dhe Diasporës, Donika Gërvalla Schwarz, kanë pritur dje në një takim të përbashkët ambasadorët dhe diplomatët e akredituar të misioneve diplomatike në Republikën e Kosovës.
Temë qendrore e këtij takimi ishte sulmi terrorist i datës 24 shtator mbi Policinë e Kosovës në fshatin Banjskë të Zveçanit, nga i cili u vra në krye të detyrës, rreshteri i Policisë, tash Heroi i Kosovës, Afrim Bunjaku.
Në adresimin e tyre para diplomatëve ndërkombëtarë, Kurti dhe Gërvalla, i njoftuan diplomatët ndërkombëtarë mbi zhvillimet më të fundit sa i përket situatës së sigurisë në vend, prezantuan qëndrimet zyrtare të Republikës së Kosovës ndaj këtij sulmi terrorist dhe njëherazi kërkuan, që komuniteti ndërkombëtar të dënojë fuqishëm veprimet destabilizuese të institucioneve shtetërore të Serbisë në Republikën e Kosovës.
Gjatë takimit të njëjtë, Kurti dhe Gërvalla, theksuan se Qeveria dhe institucionet e Republikës së Kosovës edhe një herë kanë dëshmuar profesionalizëm dhe maturi, duke treguar se janë në shërbim të të gjithë qytetarëve pa dallim dhe paralelisht me këtë angazhimin e tyre për garantimin e integritetit territorial, sigurisë, ligjshmërisë dhe kushtetutshmërisë.
Në përfundim të takimit, Kryeministri Kurti dhe Zëvendëskryeministrja Gërvalla kanë ripërsëritur qëndrimin se institucionet e Republikës së Kosovës janë të përkushtuara për të bashkëpunuar ngushtë dhe bashkërenduar veprimet ndërmjet Qeverisë së Republikës së Kosovës dhe shteteve partnere, aleate dhe mike për të siguruar paqe dhe siguri në vend dhe rajon.
Presidentja e Kosovës, Vjosa Osmani, tha se Kosova duhet që së bashku me Shtetet e Bashkuara të përgatisë draftin për statutin e Asociacionit të komunave me shumicë serbe.
Në një intervistë për Radio Televizionin e Kosovës, Osmani tha se Marrëveshja drejt normalizimit të raporteve – që Kosova dhe Serbia arritën më herët gjatë vitit – nuk “është perfekte” për Kosovën, por është obligim ndërkombëtar.
Ajo tha se ende ka dyshime se si mund të zbatohen në praktikë disa pjesë të saj, duke përmendur nenin 7 dhe 10. Neni 7 flet për sigurimin e një niveli të duhur të vetëmanxhimit për komunitetin serb, në përputhje me marrëveshjet e arritura më parë në kuadër të dialogut. Ndërkaq, neni tjetër kërkon që palët të zbatojnë të gjitha marrëveshjet e arritura në dialog, përfshirë atë për Asociacionin.
“Mendoj që zgjidhja është si vijon: Ne duhet të ulemi me SHBA-në, të përgatisim draftin tonë, draftin e Republikës së Kosovës. Fillimisht [vetëm me SHBA-në], unë mendoj se kështu është zgjidhja, të ulemi me partnerët tanë në SHBA, të prezantojmë para sekretarit amerikan të Shtetit [Antony Blinken] draftin tonë, i cili është në përputhje me Kushtetutën e Kosovës, në përputhje me vendimin e Gjykatës Kushtetuese, në përputhje me letrën [e ish-shefes së diplomacisë së BE-së, Federica] Mogherinit që garanton se nuk do të ketë kompetenca ekzekutive dhe në përputhje me qëndrimin e shkruar amerikan në opinionin [e shkruar] nga [këshilltari i lartë i DASH-it, Derek] Chollet dhe [i dërguari i Uashingtonit për Ballkanin Perëndimor, Gabriel] Escobar që sqarojnë që një trup i tillë do të jetë një trup koordinues, pa kompetenca ekzekutive”, tha Osmani.
Kosova dhe Serbia kanë arritur marrëveshjen për Asociacionin më 2013 dhe më pas më 2015 marrëveshjen për parimet për themelimin e tij. Por, më 2015 Gjykata Kushtetuese e Kosovës gjeti se marrëveshja nuk ishte në harmoni të plotë me aktin më të lartë juridik dhe kërkoi që ajo të harmonizohej përmes akteve nënligjore.
Për jetësimin e marrëveshjes për Asociacionin e komunave me shumicë serbe në Kosovë, aktualisht ekzistojnë katër draft-statute dhe draft-vizione: Draft-statuti i Ekipit Menaxhues, draft-vizioni i kryeministrit të Kosovës, Albin Kurti, draft-statuti i kryeministrit të Shqipërisë, Edi Rama, dhe draft-statuti për Asociacionin i hartuar nga organizata gjermane Friedrich-Ebert-Stiftung (FES).
Shtetet e Bashkuara dhe Bashkimi Evropian vazhdimisht i kanë kërkuar Kosovës që të formojë Asociacionin, që është edhe kërkesa kryesore e Beogradit.
Qeveria e Kosovës druan se një asociacion njëetnik do të mund të cenonte funksionalitetin e shtetit. Por, SHBA-ja insiston se nuk do të lejojë që Asociacioni t’i ngjasojë entitetit të Republikës Sërpska në Bosnje e Hercegovinë.
BE-ja dhe SHBA-ja po ashtu kanë kërkuar nga Kosova dhe Serbia të zbatojnë menjëherë Marrëveshjen drejt normalizimit.
Kjo marrëveshje, prej 11 nenesh, mes tjerash parasheh edhe një nivel të vetëmenaxhimit për komunitetin serb në Kosovë dhe njohje të ndërsjellë të simboleve shtetërore, ndërsa kërkon nga Prishtina dhe Beogradi që t’i zbatojnë, po ashtu, të gjitha marrëveshjet e mëhershme të dialogut.
Gjatë intervistës, Osmani foli edhe për dialogun për normalizimin e raporteve me Serbinë. Ajo tha se për të pasur sukses ky proces – që lehtësohet nga BE-ja dhe mbështetet nga SHBA-ja – duhet një përfshirje direkete të Uashingtonit.
“Unë nga fillimi e kam thënë që nuk shoh sukses pa përfshirjen direkte dhe pa rolin e udhëheqjes së SHBA-së në këtë proces. Këtë e dëshmon edhe historia. Në çdo proces në Ballkanin Perëndimor, në veçanti në Kosovë, në qoftë se SHBA-ja nuk e merr rolin udhëheqës është problem që të kemi sukses në të ardhmen”, tha Osmani.
Presidentja sërish akuzoi Serbinë për “orkestrimin” e sulmit ndaj Policisë së Kosovës në Banjskë të Zveçanit më 24 shtator.
Ajo tha se armët që janë gjetur janë të njëjta që përdoren nga ushtria serbe.
“Plan i Serbisë, që ka qenë shumë më i madh sesa u realizua sepse ka qenë për një sulm të përmasave shumë më të mëdha sepse armatimi që është zënë ka qenë diku armatim për 400 persona”, tha ajo.
Osmani tha se pasi të përfundojnë hetimet dhe, siç u shpreh, të vërtetohet se Serbia ka gisht në këtë ngjarje, BE-ja duhet të vendosë masa të ashpra ndaj Beogradit.
Policia e Kosovës u sulmua nga një grup i maskuar dhe i armatosur, teksa forcat e rendit po tentonin të largonin barrikadat që ishin vendosur në një rrugë në fshatin Banjskë të Zveçanit – një prej katër komunave në veri, të banuara me shumicë serbe.
Grupi i armatosur më pas u strehua në manastirin e Banjskës, prej ku gjatë gjithë të dielës u përlesh me policinë.
Policia dhe ministri i Punëve të Brendshme, Xhelal Sveçla, kanë thënë se udhëheqës dhe pjesëmarrës i këtij sulmi ishte Millan Radoiçiq, nënkryetar i Listës Serbe – partisë kryesore të serbëve në Kosovë që gëzon mbështetjen e Beogradit zyrtar.
Si pasojë e sulmit është vrarë një polic i Kosovës dhe tre sulmues të dyshuar.
Kosova e ka bërë përgjegjëse Serbinë për sulmin, ndërsa Beogradi zyrtar serbët e Kosovës.
Shtetet e Bashkuara dhe Bashkimi Evropian kanë dënuar ashpër sulmin dhe kanë kërkuar që përgjegjësit të përballen me drejtësinë. /REL
Një analizë e Inteligjencës amerikane ka dëshmuar lidhjen mes kriminelëve që kryen sulmin terrorist ndaj Policisë së Kosovës në Banjskë me autoritetet shtetërore në Serbi dhe Rusi. Siç raporton Fox News, s’mund të eliminohet mundësia që edhe organizata terroriste “Wagner” të ketë pasur gisht në sulm.
Ekspertja e Inteligjencës ushtarake amerikane, Rebekah Koffler, ka theksuar se mundësia e përfshirjes së Serbisë dhe Rusisë në sulmin terrorist është lehtë të paramendohet nisur nga fakti se asnjëra nga këto nuk e njohin Kosovën dhe se të dyja synojnë destabilizimin e rajonit, transmeton gazeta online Reporteri.net.
“Analiza paraprake e inteligjencës sugjeron se personat e përfshirë në përleshjen vdekjeprurëse pranë fshatit Banjska në veri të Kosovës më 24 shtator, ishin të lidhur me forcat speciale serbe dhe inteligjencën ushtarake ruse. Sulmuesit u dukën të trajnuar profesionalisht dhe disa prej tyre flisnin serbisht dhe rusisht. Dhe, ndonëse prania e mercenarëve të Wagner nuk mund të konfirmohej, nuk e përjashtoj mundësinë e pjesëmarrjes së tyre në këto ngjarje të fundit”, tha Koffler për Fox News Digital.
Madje, sipas saj, ka zëra që thonë se Serbia dhe Rusia po synojnë që ta nisin një konflikt madhor mes serbëve dhe shqiptarëve, kështu për ta justifikuar prezencën e forcave të tyre në Kosovë, kinse si “ndërmjetësues të paqes”.
“As Rusia dhe as Serbia, të cilët janë aleatë të vendosur, nuk e njohin pavarësinë e Kosovës. Është qëllimi i tyre afatgjatë për ta ndryshuar situatën. Ka indikacione se Rusia dhe Serbia po punojnë së bashku për të ndezur një tjetër konflikt masiv serbo-shqiptar, në mënyrë që të krijojë justifikim për dislokimin e forcave serbe si për të siguruar “paqe dhe stabilitet”.
KFOR-i, misioni paqeruajtës i NATO-s që vepron në Kosovë që nga viti 1999, kohë më parë ka hedhur poshtë nocionin se njësitë Wagner ishin në Kosovë dhe se raportimet e tilla janë përgjithësisht të paverifikuara ose dezinformata.
Mirëpo, Koffler konsideron se një narrativë e tillë nuk është “larg mendsh”. Kjo pasi, sipas saj, Putini mund të synojë që përmes Vuçiqit ta heq vëmendjen e Uashingtonit dhe forcave të NATO-s nga Ukraina.
“Do të ishte në përputhje me doktrinën ruse të përshkallëzimit anësor nëse Putini do ta ndihmonte Vuçiqin të drejtonte një fushatë destabilizuese në Kosovë për ta larguar vëmendjen e forcave të Uashingtonit dhe NATO-s nga Ukraina. Ajo që Putini ka më shumë frikë është vendosja e forcave të NATO-s në Ukrainë”.
Për ambasadorin e Kosovës në ShBA, Ilir Dugolli, lidhja e Serbisë me kriminelët që kryen sulmin terrorist është e pashmangshme.
“Nuk ka dyshim se Beogradi është plotësisht përgjegjës për nxitjen dhe sponsorizimin sistematik të dhunës kundër institucioneve demokratike të Kosovës”, tha për Fox News Digital ambasadori i Kosovës në ShBA, Ilir Dugolli.
Sipas tij, fakti që dokumentet e Radojçiqit u sekuestruan në vendngjarje dhe disa të dyshuar u strehuan në Serbi, tregon përfshirjen e autoriteteve serbe që refuzojnë të dorëzojnë ata që ekzekutuan sulmin.
Megjithatë, shkruan tutje Fox News, perspektiva e ambasadorit serb në ShBA, Marko Gjuriq, është ndryshe. Gjuriq pretendon se është Kryeministri Albin Kurti ai i cili duhet të mbajë përgjegjësi të plotë për sulmin.
“Gjakderdhja në veri të Kosovës është një tragjedi që mund dhe duhej të parandalohej. Politikat e papërgjegjshme të Albin Kurtit kanë krijuar terrenin për tragjedinë e sotme”, citohet të ketë pretenduar Gjuriq.
Ndërsa, në një fjalim televiziv drejtuar serbëve, presidenti serb Aleksandar Vuçiq dënoi dhunën dhe hodhi poshtë kategorikisht pretendimin e Kurtit se sulmuesit ishin sponsorizuar nga Beogradi, në vend të kësaj duke thënë se serbët që kryen sulmin ishin nga Kosova. /Reporteri.net/
Presidenti i Serbisë, Aleksandar Vuçiq, tha se nënkryetari i Listës Serbe, Millan Radoiçiq, gjendet në Serbi dhe do të merret në pyetje nga organet serbe.
“Ai definitivisht do t’i përgjigjet ftesës nga autoritetet kompetente në Serbi. Republika e Serbisë dhe autoritetet kompetente do të bëjnë punën e tyre”, tha ai.
Në një intervistë për Radio Televizionin e Serbisë, Vuçiq tha se Radoiçiqi gjendet në territorin “e Serbisë qendrore” dhe mohoi se është i plagosur.
Kosova ka akuzuar Radoiçiqin se ka udhëhequr dhe ka marrë pjesë në sulmin më 24 shtator ku u vra një polic i Kosovës dhe tre sulmues të dyshuar.
“Millan Radoiçiq kurrë nuk është fshehur, kurrë nuk është turpëruar për rolin e tij… në diçka që ka ndodhur që nuk është në të mirë të Serbisë apo që nuk i ka sjell dobi Serbisë”, tha ai.
“Ai e konsideron veten luftëtar të lirisë, ai kurrë nuk ka hequr dorë nga shokët e tij dhe kurrë nuk do ta bëjë, por ka gjëra dhe pyetje që ai duhet t’iu përgjigjet”, tha presidenti serb.
Për pjesëmarrjen e pretenduar të Radoiçiqit në sulmin ndaj Policisë – i cili është nën sanksione amerikane dhe kërkohet në Kosovë për frikësimin e dëshmitarëve në rastin gjyqësor të njohur si Brezovica – ministri i Punëve të Brendshme të Kosovës, Xhelal Sveçla, ka publikuar edhe një video të incizuar me dron, që tha se e shfaq zyrtarin e Listës Serbe në Banjskë.
I pyetur për vërtetësinë e videos dhe nëse Radoiçiq ishte në Banjskë, Vuçiq tha se kjo do të përcaktohet nga autoritetet kompetente.
Kur u pyet për qëllimin e grupit të armatosur që sulmoi policinë e Kosovës, Vuçiq tha:
“Si mund ta di këtë, por jam i sigurt se ata shkuan të ruanin shtëpitë e tyre dhe u përgatitën për sulme në të ardhmen”.
Vuçiq tha se se pjesëtarët e grupit të armatosur që sulmoi Policinë e Kosovës më 24 shtator në Banjskë të Zveçanit, “nuk janë terroristë”.
“Për mua si president i Serbisë ata njerëz nuk mund të jenë terroristë. A mund ta justifikojë vrasjen e një polici… nuk ka asnjë justifikim dhe për këtë autoritetet shtetërore do të ndërmarrin hapa”, tha ai.
Vuçiq tha se tani ka më shumë informacione sesa në ditën kur ndodhi sulmi, kur iu drejtua publikut në Serbi.
“Ne do të kërkojmë që të na i tregojnë pamjet me dron se si u vra polici. Nuk ishte një vrasje e planifikuar”, tha ai.
Presidenti serb sërish mohoi se shteti i tij qëndron prapa sulmit në Banjskë.
Çfarë ndodhi në veri më 24 shtator?
Policia e Kosovës u sulmua nga një grup i maskuar dhe i armatosur, teksa forcat e rendit po tentonin të largonin barrikadat që ishin vendosur në një rrugë në fshatin Banjskë të Zveçanit – një prej katër komunave në veri, të banuara me shumicë serbe.
Grupi i armatosur më pas u strehua në manastirin e Banjskës, prej ku gjatë gjithë të dielës u përlesh me policinë.
Aktualisht, katër persona janë të arrestuar për ngjarjet në Banjskë, teksa Policia ka ekspozuar më 25 shtator armë dhe pajisje të tjera që ka thënë se janë konfiskuar në këtë fshat.
Kosova e ka bërë përgjegjëse Serbinë për sulmin, ndërsa Beogradi zyrtar serbët e Kosovës.
Shtetet e Bashkuara dhe Bashkimi Evropian kanë dënuar ashpër sulmin dhe kanë kërkuar që përgjegjësit të përballen me drejtësinë. /REL
Ish-koordinatori për dialog, Skënder Hyseni, në emisionin CONTEXT në ATV, tha se një nga qëllimet e organizatorit të sulmit në Banjskë, në këtë rast Qeverisë së Serbisë, ka qenë që të provokojë një reagim të pamatur të institucioneve të rendit dhe ligjit në Kosovë dhe të shkaktohet ndonjë masakër në vetë manastirin.
“Pse pikërisht Manastiri i Banjksës, mund të ketë ndodh që një nga qëllimet e organizatorit, Qeverisë së Serbisë në këtë rast të kësaj ndërmarrje, ka qenë të provokojë një reagim të pamatur disproporcional të institucioneve të rendit dhe ligjit në Kosovë dhe të shkaktohet ndonjë masakër në vetë manastirin e aq më parë kur aty kishte pasur një numër jo të vogël të pelegrinëve nga siç u tha Novi Sadi më duket”, tha Hyseni.
Ai madje tha se ëhstë e vështirë të bësh përpjekje për të ndarë kishën ortodokse serbe nga veprimet politike të Serbisë.
“Ka pasur përpjekje nga kisha ortodokse serbe, nga Eparhia e Rashkës së Prizrenit që me një lojë fjalësh të bindë opinionin sikurse ata nuk kanë asnjë lidhje me këtë, mirëpo nuk jam njeri i konspiracioneve, por po lexove midis rreshtave, mund të hetosh shumëçka se diçka nuk është në rregull. Dhe çfarëdo përpjekje të bësh për të ndarë kishën ortodokse serbe nga shumë veprime politike, ose një kishë ortodokse serbe të politizuar skajshëm nga veprimet e instirucioneve në Serbi është mision i pamundshëm. Është vështirë e bëshme. Natyrisht intensiteti i involvimit është i ndryshëm në kohë të ndryshme”, tha Hyseni. /atvlive.tv
Presidentja Vjosa Osmani, pas takimit që pati me kryetarët e partive opozitare në vend, ka thënë se uniteti nacional në këtë kohë të rëndë për Kosovën është imperativ dhe për këtë duhet të kontribuojnë të gjithë.
Osmani i falënderoi liderët e partive opozitare për qëndrimin korrekt dhe përkrahjen ndaj institucioneve të sigurisë në fazën e ballafaqimit me agjendën destabilizuese të Serbisë kundër Kosovës.
“Kryetarët e partive opozitare, janë informuar, brenda kufizimeve që lejon korniza ligjore, lidhur me zhvillimet e sigurisë, punën e institucioneve të Kosovës si dhe për rreziqet e shkaktuara nga Serbia për shkak të agjendës së saj destabilizuese e luftënxitëse e cila po shfaqet nëpërmjet akteve të agresionit dhe të terrorizmit”.
“Në të gjitha takimet janë përgëzuar institucionet e sigurisë për punën e shkëlqyeshme në ballafaqim me strukturat e dirigjuara nga Serbia që kryen sulmin terrorist kundër Kosovës dhe është shprehur mirënjohje e thellë për angazhimin e pashoq dhe sakrificën e policisë së Kosovës për të mbrojtur sovranitetin, integritetin territorial dhe të gjithë qytetarët e Kosovës, pa dallim”, thuhet në njoftimin e presidencës.
Tutje, bëhet e ditur se Osmani i ka siguruar liderët opozitarë se në çdo fazë të zhvillimeve do të njoftohen lidhur me përgatitjet dhe punën e institucioneve por edhe sipas saj, do të ketë bashkërendim të plotë me aleatët e Kosovës.
Kujtojmë se sot, Osmani bashkë me shefin e AKI-së, Petrit Ajetin, kanë takuar kryetarin e PDK-së, Memli Krasniqin, kryetarin e LDK-së, Lumir Abdixhikun dhe kryetarin e AAK-së, Ramush Haradinajn.
Përgatiti: Benita Zeneli
Bashkimi Evropian, pavarësisht situatës së krijuar në veri të vendit, po vazhdon të insistojë në mbajtjen e zgjedhjeve në katër komunat veriore.
Madje, zëdhënësi Peter Stano tërthorazi e pranon se Lista serbe vazhdon të jetë njëra nga adresat e tyre, për të diskutuar për pjesëmarrjen e serbëve në zgjedhjet e reja në 4 komunat veriore dhe kjo nuk do të ndryshojë, derisa të kryhen hetimet për ngjarjet e së dielës.
“Kur bëhet fjalë për incidente apo sulme terroriste, siç kemi parë të dielën, BE-ja pret për hetimet e duhura dhe pastaj i bën gjykimet dhe ndërmerr hapa në lidhje me to. Kur flasim për bashkëbiseduesit tanë në terren, ne kemi një numër të tyre që luajnë rol në dialog dhe në situatën në terren. Ndërkaq, për zgjedhje të reja të mundshme, pozicioni i BE-së është thënë qartë në qëndrimin e 27 vendeve anëtare, javën e kaluar, dhe nuk ka asgjë që mund të shtojmë në këtë fazë”, tha Stano.
Pavarësisht implikimit të disa pjesëtarëve në sulmin e së dielës kundër Policisë së Kosovës, bazuar në legjislacionin aktual sipas Institutit Demokratik të Kosovës, nuk ka asnjë mundësi që Listës Serbe t’i ndërpritet veprimtaria në Kosovë.
“Nuk ka bazë për ta çregjistruar, përderisa nuk i ndërron statutet e saj të brendshme. Për veprime individuale do të japin përgjegjësi penale individualisht, në këtë rast Radojicic do të jap përgjegjësisë si individ”, tha Eugen Cakolli nga Intituti Demokratik i Kosovës.
Derisa konsideron se duhet të gjendet mundësia për mbajtjen e zgjedhjeve në veri, njohësi politik, Bekim Kabashi, vlerëson se tani nuk është koha më e favorshme për mbajtjen e tyre.
“Nuk është ambient që i kontribuon frymës së besimit, sidomos te qytetarët serbë në veri, dhe kjo është përgjegjësi e institucioneve të shtetit që duhet të punojë me bashkësinë ndërkombëtare dhe t’ia imponojnë Serbisë për rolin e saj që e ka te serbët lokalë, që situata të qetësohet dhe të shkohet në zgjedhje e dialog, që të mund të gjejmë zgjidhje paqësore”, tha Kabashi.
Në fillim të shtatorit, Qeveria hartoi udhëzimin administrativ për caktimin e procedurave për largimin e katër kryetarëve nga pozita. Mirëpo, faktori ndërkombëtar si rrugë më të mirë ka konsideruar dorëheqjen e tyre.
Përgatiti: Fatlum Jashari
Tri ditë pas, Bashkimi Evropian përfundimisht e cilësoi terrorist sulmin ndaj Policisë së Kosovës në Banjskë të Zveçanit, në të cilin u vra rreshteri Afrim Bunjaku, u plagos një polic dhe u lëndua një tjetër.
Duke i vlerësuar si shumë serioze ngjarjet e së dielës, zëdhënësi për Punë të Jashtme dhe Siguri i BE-së, Peter Stano, tha se sulmi terrorist përbën “ndryshim shumë, shumë të rëndësishëm të situatës”.
Pa dhënë detaje për takimin e Komitetit për Politikë të Jashtme dhe Siguri, në të cilin u raportua se disa nga shtetet anëtare kanë kërkuar masa ndëshkuese ndaj Serbisë, Stano tha se do presin rezultatin e plotë të hetimit nga Kosova.
“Ne merremi me situata reale. Tani kemi një situatë ku është kryer një sulm terrorist në territorin e Kosovës, në veri. Policia e Kosovës është duke kryer hetim, misioni i EULEX-it është duke e mbështetur Policinë e Kosovës si reagues i dytë i sigurisë bazuar në nevojat dhe kërkesat nga Policisë së Kosovës. Ne duhet të shohim këto hetime. Bazuar në këto hetime do të vendosim, shtetet anëtare do të vendosin, dhe do të ndërmarrin hapa të mëtejmë”, tha Stano.
Pavarësisht video-dëshmisë se nënkryetari i Listës Serbe, Milan Radojicic, i afërt me presidentin e Serbisë, Aleksandar Vucic, u printe grupit terrorist, Stano tha se BE-ja nuk do të nxitohet për të konkluduar lidhjet dhe përfshirjen, e rrjedhimisht shkeljen eventuale të marrëveshjes bazë së Brukselit.
“Kur të kemi një fotografi të qartë nga hetimi për atë se çfarë ka ndodhur, kush ishte pas, kush është përgjegjës, pastaj do të ndërmarrim hapat apo pasojat e nevojshme. Në këtë fazë është e rëndësishme të qartësojmë të gjitha faktet, rrethanat, të gjitha dhe të sigurohemi ata që janë përgjegjës të japin llogari. Por, nuk do të kërcejmë për të nxjerrë përfundime bazuar në një video apo në diçka të postuar këtu apo atje. Hetimi duhet të bëhet plotësisht dhe të përfundohet plotësisht, që Bashkimi Evropian të ketë të fotografi të qartë se çfarë ka ndodhur dhe kush është përgjegjës dhe pastaj mund të flasim për pasojat”, tha Stano.
Pa paragjykuar rezultatet e hetimit dhe diskutimet brenda BE-së, zëdhënësi Stano tha se u takon shteteve anëtare të vendosin nëse do të ketë masa ndaj Serbisë, në çfarë niveli dhe nëse diçka e tillë do të bëhet me vendim formal.
Përgatiti: Arton Hamiti
Me një minutë heshtje në nderim të rreshterit Afrim Bunjaku, tashmë i vrarë nga grupi terrorist serb, filloi mbledhja e Qeverisë të mërkurën.
Andaj, edhe fjalimin hyrës kryeministri Albin Kurti ia dedikoi ngjarjes së 24 shtatorit në Banjskë të Zveçanit. Kurti kërkoi ndihmë nga ndërkombëtarët, për menaxhim të kufirit me Serbinë.
“Me mbi 5 milionë euro vlerë të armatimit ushtarak dhe sasi të mjaftueshme për një grup prej qindra luftëtarëve, është dëshmuar skenari për gjakderdhje në Kosovë. Aty janë përfshirë individë të sanksionuar nga Shtetet e Bashkuara të Amerikës dhe Mbretëria e Bashkuar”, tha Kurti.
Për ta mbështetur familjen e policit të vrarë, Qeveria ndau 50 mijë euro.
“Ne si shtet do të jemi gjithmonë krah familjes që na dha një dëshmor, andaj për ta mbështetur familjen e tij, propozoj të aprovohet ndarja e shumës buxhetore në vlerë prej 50 mijë eurove”, tha ministri i Financave, Hekuran Murati
Pavarësisht pse Qeveria ndau këto mjete financiare për rreshterin e vrarë, kolegët e tij pjesëtarë të Policisë, ka 9 muaj që nuk i marrin shtesat për rrezikshmëri në punë. E për ekzekutimin e pagesave, ministri i Financave as nuk dha ndonjë datë.
“Tani jemi në proces të dakordimit dhe në proces të definimit apo përcaktimit të të gjitha këtyre shtesave, por edhe të kompetencave apo përgjegjësive që parashihen dhe plotësohen me ligj. Besoj se shumë shpejt do të kemi edhe përafrim të këtyre kërkesave apo gjërave, në mënyrë që të sigurohemi që çdo gjë vjen në vendin e vet ashtu siç e parasheh ligji. Një gjë dua t’i siguroj qytetarët se shteti gjithmonë do t’iu qëndrojë pranë të gjithë atyre që shërbejnë për shtetin”, tha Murati.
Paraprakisht në mbledhjen e 162-të, Qeveria ndau 5 milionë euro për subvencionimin e pajisjeve efiçiente për ngrohje, 6 milionë euro shtesë për projektin e ndërtimit të rrugës Prishtinë – Podujevë dhe 1 milion euro për kompensim të dëmeve natyrore në bujqësi në 14 komuna.
Mes tjerash, Qeveria mori vendim për rindërtimin dhe rinovimin e shtëpive individuale që janë dëmtuar gjatë viteve 1998-1999, gjatë luftës në Kosovë.