Kuvendi i Kosovës sot do të mbajë seancë të re plenare.
Në rend të ditës në këtë seancë janë pyetjet parlamentare të deputetëve për kabinetin qeveritar.
Kujtojmë se dje, kuvendi mbajti seancë ku u diskutua për Raportin e Progresit të Komisionit Evropian për Kosovën.
Gjatë seancës së djeshme pati përplasje të ashpra mes deputetëve të pozitës e opozitës.
Përgatiti: Krenare Mulliqi
Ende pa i filluar punimet, Samiti i Organizatës për Siguri dhe Bashkëpunim në Evropë, sekretari amerikan i Shtetit, Antony Blinken, u largua nga Shkupi.
Blinken u largua menjëherë pas takimit me nikoqirin e samitit, ministrin e Jashtëm të Maqedonisë, Bujar Osmani, para se në këtë samit të vinte shefi i diplomacisë ruse, Sergej Lavrov.
Që nga fillimi i luftës në Ukrainë, Samiti i OSBE-së është njëri prej takimeve të rralla në nivel global, në të cilat mori pjesë edhe Rusia. Teksa kryediplomati rus përmendi Kosovën, fjalimi i Sergei Lavrovit u bojkotua nga disa prej ministrave të vendeve pjesëmarrëse.
“Ka qenë në traditën tonë që të kemi fjalime pozitive, por kjo nuk po ndodh sepse OSBE-ja është bërë vegël e Bashkimit Evropian. Në vitin 1999, NATO-ja kreu një agresion brutal të pamaskuar kundër Jugosllavisë – një anëtare e OSBE-së dhe OKB-së. Dhe, në vitin 2008, duke shkelur Rezolutën 12 44 të Këshillit të Sigurimit të OKB-së dhe parimin e paprekshmërisë së kufijve në Evropë nga akti final i Helsinkit, Serbisë iu hoq Kosova pa asnjë referendum”, tha Lavrov.
Ndërkohë, Ndihmës-sekretari-amerikan i Shtetit për Çështje Evropiane, James O’Brien, i ka bërë thirrje Rusisë që t’i japë fund shkeljes së parimeve të OSBE-së.
“Unë shtoj zërin tim, me atë të kolegëve, të cilët i bëjnë thirrje Rusisë, që t’i japë fund shkeljes së parimeve bazë të kësaj organizate, por nuk jam i sigurt nëse ajo është ende e gatshme të na dëgjojë”, tha O’Brien.
Për sfidat, me të cilat është përballuar OSBE-ja pas agresionit të paprovokuar të Rusisë kundër Ukrainës, si nikoqir i samitit, foli edhe kryeministri i Maqedonisë së Veriut, Dmitri Kovacevski.
“Kam tri mesazhe kyçe si paraardhës. Maqedonia e Veriut mori përsipër kryesimin me OSBE-në, në një kohë lufte aktive dhe një kërcënimi për sigurinë evropiane dhe paqen ndërkombëtare. Agresioni rus kundër Ukrainës shkeli rregullat e kësaj organizate dhe shkeli sigurinë evropiane dhe njerëzore, dialogun dhe shkatërroi jetën e njerëzve që duan të jetojnë të lirë dhe pa frikë nga lufta”, tha Kovacevski.
Në ditën e parë të takimit është paraparë nënshkrimi i deklaratës së përbashkët për luftën kundër korrupsionit në Evropën Juglindore. Ndërkaq, në këtë samit nuk ishte pjesëmarrëse e Kosova pasi kjo organizatë nuk e njeh statusin e saj.
Ambasadori i SHBA-së në Kosovë, Jeff Hovenier ka folur për situatën e sigurisë në Kosovë, pas paralajmërimeve për një destabilizim të mundëshëm në Ballkan.
Hovenier ka komentuar deklaratën e sekretarit të përgjithshëm të NATO-s, Jens Stoltenberg, i cili në Beograd foli për dislokimin e ushtrisë serbe pranë kufirit me Kosovën.
Hovenier tha pasiqë në Kosovë gjenden trupat ushtarake të NATO-s dhe ato amerikane ai fle rehat natën.
“Ne i përcjellim shumë për së afërmi një varg gjëra që mund të jenë burim jostabiliteti në rajon. Dhe natyrisht, shpesh kemi folur publikisht kur ishim të shqetësuar për dislokimin specifik ushtarak rreth zonës kufitare. Dhe kjo vazhdon të jetë diçka që ne e përcjellim nga afër. Por, do të thosha gjithashtu se një nga mënyrat si e shprehim se sa seriozisht e marrim këtë është përkushtimi ynë afatgjatë për sigurinë e Kosovës, që më së mirë shprehet përmes misionit të KFOR-it dhe pjesëmarrjes së ShBA-së në të”, tha ai , për Pressing te T7.
“Ne besojmë se NATO është aleanca ushtarake më e suksesshme në historinë e njerëzimit. Kjo është një deklaratë shumë, shumë e fortë, por unë qëndroj prapa saj. Dhe fakti që keni një mision të NATO-s në Kosovë, me përgjegjësi për të ofruar mjedis të qetë dhe të sigurt dhe për të mundësuar lirinë e lëvizjes është tregues, përkushtim shumë, shumë i fuqishëm i bashkësisë ndërkombëtare i përkushtimit tonë ndaj sigurisë së Kosovës. Fakti që keni disa qindra ushtarë amerikanë si pjesë e këtij misioni në role drejtuese që e mbështesin këtë është tjetër pasqyrim se sa seriozisht e marrin Shtetet e Bashkuara këtë. Pra, unë ende fle mjaft rehat natën duke e ditur që NATO është atje, duke e ditur se ka ushtarë amerikanë në NATO dhe duke e ditur se ata janë të aftë të përballojnë çfarëdo kërcënimi ndaj sigurisë që mund të shfaqet”, tha Hovenier.
Ministri i Punëve të Brendshme, Xhelal Sveçla, njofton se deri më tani numri i të arrestuarve për grabitjen e armatosur në një argjendari në Suharekë, ka shkuar në 8-të. Ai tha se policia është në kërkim edhe të një personi tjetër, i përfshirë në këtë rast.
Ai deklaron se krimet nuk do të mbesin pa u ndëshkuar dhe se “vendi i kriminelëve është burgu”.
I njëjti u ka uruar shërim policëve që u plagosën ga të dyshuarit.
Reagimi i tij i plotë:
Një javë më parë vendi ynë u terrorizua nga një plaçkitje e armatosur nga persona të maskuar në qendër të qytetit të Suharekës, ku një zyrtar policor mbeti i plagosur dhe një i lënduar.
Akte të tilla janë absolutisht të papranueshme dhe përgjigjja e vetme ndaj kriminelëve të tillë është sjellja para drejtësisë. Për këtë, Policisë së Kosovës i kam ofruar mbështetjen time të plotë institucionale si dhe kam kërkuar angazhim maksimal në zbardhjen e këtij rasti.
Sot jam njoftuar që Policia e Kosovës pas një pune intenzive hetimore ka lokalizuar plaçkitësit dhe ka realizuar operacionin e arrestimit të tyre. Njëri nga të dyshuarit ka shtënë drejt zyrtarëve duke plagosur një zyrtar policor dhe me këtë rast i njejti është neutralizuar. Deri më tash janë arrestuar tetë persona ndërsa Policia është në kërkim të personit tjetër të përfshirë në këtë rast. Dy zyrtarëve policor të cilët janë plagosur dhe zyrtarit të lënduar në reagim dhe arrestim të të dyshuarve të këtij rasti ju uroj shërim të shpejtë.
Vendi i kriminelëve është burgu, dhe ky është mesazh i qartë dhe i prerë që duhet të marrë kushdo që tenton që për çfarëdo arsye të destabilizojë sigurinë në vendin tonë. Krimet nuk do të mbesin pa u ndëshkuar sepse Republikën e Kosovës nuk do ta lejojmë të bëhet vend i pasigurisë.
Rendi dhe ligji do të mbizotërojnë në çdo cep të saj.
Përgatiti: Fatlum Jashari
Tetë ditë pas grabitjes së armatosur në një argjendari në Suharekë, një operacion i gjerë i Policisë, në shtatë lokacione të ndryshme në tri komuna, rezultoi me një të dyshuar të neutralizuar, disa të arrestuar, ndërsa një person mbetet në kërkim.
Sipas Policisë, i dyshuari shtiu me armë zjarri në drejtim të zyrtarëve, derisa përpos Prishtinës operacioni është kryer edhe në Fushë-Kosovë dhe Carralevë.
“Zyrtarët policorë në vetëmbrojtje janë detyruar ta përdorin forcën proporcionale, duke arritur të neutralizojnë një të dyshuar, përderisa katër të dyshuar të tjerë janë arrestuar. Deri më tani numri i të arrestuarve ka shkuar në shtatë persona, një i neutralizuar dhe një tjetër ende gjendet në kërkim policor”, thuhet në njoftimin e Policisë dhe Prokurorisë.
Polici i plagosur, sipas njoftimit zyrtar, është jashtë rrezikut për jetën.
Personi i eliminuar nga Policia gjatë aksionit është Dukagjin Gashi.
Në mesin e të arrestuarve janë: K.G., B.B., L.C. dhe T.B.
“Personat e dyshuar kanë të kaluar kriminale me dyshimet e bazuara për përfshirje në vepra penale, si: vrasje, grabitje, vjedhje e rëndë, sulm, kanosje, lëndim trupor, detyrim, armëmbajtje pa leje etj”, thuhet në njoftimin e Policisë dhe Prokurorisë.
Më 22 Nëntor, katër persona të maskuar kryen një grabitje të armatosur në Suharekë, në të cilën një polic ishte plagosur dhe një tjetër ishte lënduar.
Lidhur me rastin, më herët janë arrestuar edhe tre persona të tjerë, dy prej të cilëve janë ende në paraburgim dhe një është liruar në procedurë të rregullt.
Qeveria e Kosovës ka vendosur që të zgjatet afati për konvertimin e targave ilegale, deri më 15 dhjetor.
“Qeveria e Republikës së Kosovës ka zhvilluar mbledhje elektronike, në të cilën ka ndryshuar dhe plotësuar Vendimin e Qeverisë Nr.01/170 të datës 30 tetor 2023 , duke zgjatur kështu afatin për regjistrimin me benefite financiare për pronarët e automjeteve me denominimet “PR”, “KM”, “PZ”, “GL”, “UR”, “PE”, “DA” apo “ĐA” deri me 15 dhjetor 2023”, thuhet në njoftimin e qeverisë.
Ndryshe, Ministria e Punëve të Brendshme tanimë ka njoftuar të gjitha personat që kanë automjete targa ilegale do të kenë mundësi të përfitojnë nga lehtësirat për regjistrim në targa RKS, deri më datë 1 dhjetor 2023.
Kjo përfshinë taksat doganore, taksën administrative në Qendrën e Regjistrimit të Automjeteve, tarifën për targa dhe tarifën për pajisje me certifikatë të regjistrimit të Automjetit.
Çështja e heqjes së targave, që Serbia lëshon për qytetet e Kosovës, ka shkaktuar një sërë krizash në dy vjetët e fundit, si dhe largimin e serbëve nga institucionet e Kosovës në veri në nëntor të vitit 2022.
Policia e Kosovës ka thënë se të enjten e ka neutralizuar një të dyshuar për grabitjen e argjendarisë në Suharekë dhe se ka shkuar në shtatë numri i të arrestuarve për këtë rast.
Në një njoftim për media, policia tha se zyrtarët policorë janë detyruar që në vetmbrojtje të përdorin forcën proporcionale, me ç’rast kanë neutralizuar të dyshuarin gjatë një operacioni policor në Prishtinë.
Operacioni, përpos në Prishtinë, është zhvilluar edhe në dy lokacione të tjera: në Fushë Kosovë dhe në Carralevë.
Shtatë lokacione të ndryshme janë bastisur gjatë operacionit policor, tha policia.
“Deri më tani numri i të arrestuarve ka shkuar në shtatë persona, një i neutralizuar dhe një tjetër ende gjendet në kërkim policor”, tha policia.
Njoftimi i plotë i policisë:
Lidhur me rastin e grabitjes së armatosur të ndodhur me datën 22.11.2023 në Suharekë, ku të dyshuarit gjatë grabitjes kanë shtënë me armë zjarri në drejtim të zyrtarëve policorë, Policia e Kosovës, në bashkëpunim dhe koordinim me Prokurorinë Themelore në Prizren, ka vazhduar hetimet intensive, me qëllim të zbardhjes së rastit dhe sjelljes para organeve të drejtësisë së personave të dyshuar.
Si rezultat i hetimeve të pandërprera fillimisht ishin arrestuar tre persona të dyshuar për ndihmë në kryerje të veprës penale të grabitjes, përderisa hetimet drejt identifikimit dhe ndriçimit të rastit kanë vazhduar deri më sot, kur edhe është realizuar operacioni policor.
Pas hetimeve intensive dhe mbledhjes së dëshmive, sot në Prishtinë, Fushë Kosovë dhe Carralevë është realizuar operacioni policor i cili ka përfshirë kontrollin në shtatë lokacione të ndryshme, me qëllim të identifikimit dhe arrestimit të personave të dyshuar.
Gjatë zhvillimit të operacionit policor, një i dyshuar ka shtënë me armë zjarri në drejtim të zyrtarëve policorë duke ua rrezikuar drejtpërdrejt jetën e tyre, me ç’rast është plagosur një zyrtar policor. Zyrtarët policorë në vetëmbrojtje janë detyruar të përdorin forcën proporcionale, duke arritur të neutralizojnë një të dyshuar, përderisa katër të dyshuar të tjerë janë arrestuar. Deri më tani numri i të arrestuarve ka shkuar në shtatë persona, një i neutralizuar dhe një tjetër ende gjendet në kërkim policor.
Zyrtarit policor i është ofruar ndihma mjekësore në SHSKUK, ku sipas informatave të para nga mjekët kompetentë i njëjti është jashtë rrezikut për jetë.
Vlen të potencohet se personat e dyshuar kanë të kaluar kriminale me dyshimet e bazuara për përfshirje në vepra penale si: vrasje, grabitje, vjedhje e rëndë, sulm, kanosje, lëndim trupor, detyrim, armëmbajtje pa leje etj.
Të gjitha veprimet e mëtejme policore do të ndërmerren në bashkëpunim dhe koordinim me prokurorinë kompetente.
Në Shkup të Maqedonisë së Veriut, po zhvillon punimet samiti i OSBE-së, me pjesëmarrjen e gjitha vendeve anëtare të Organizatës për Siguri dhe Bashkëpunim në Evropë, përfshirë Rusinë.
Ministri i Punëve të Jashtme ruse, Sergei Lavrov, adresoi kritika të ashpëra ndaj OSBE-së, që sipas tij është bërë vegël e Bashkimit Evropian.
Më pastaj, Lavrov foli edhe për Kosovën, duke thënë se me shpalljen e pavarësisë më 2008-ën dhe pranimin e saj, është bërë siç thotë ai rrëmbimi i Kosovës nga Serbia, kjo duke shkelur Rezolutën 1244 të OKB-ës dhe pa referendum.
Gjatë fjalimit të Lavrovit, disa delegacione kanë lëshuar sallën e Samitit, ndërkohë reagim të rreptë bëri ministri i Punëve të Jashtme të Shqipërisë, Igli Hasani.
Ai tha se ngjarjet në Kosovë ishin shkëndija e fundit e tentimit për të shmangur vëmendjen nga lufta në Ukrainë, duke nxitur konflikt në Ballkanin Perëndimor. Ne po bëjmë më të mirën duke luftuar këtë së bashku me aleatët dhe partnerët tanë. Sipas tij Shqipëria, vazhdon të punoj fort dhe në mënyrë proaktive për një Ballkan Perëndimor stabil e paqësor.
Hasani, shtoi se një OSBE e fuqishme, është e nevojshme në ditët e sotme, pasi edhe përkundër progresit të dekadës së fundit, kërcënimet e vjetra janë duke dalë në sipërfaqe përsëri dhe pas këtyre tentativave për të shkaktuar probleme në Ballkanin Perëndimor, mund ta shihet qartë dora e njëjtë që po dëshiron ta dobësojë OSBE-në.
Maqedonia e Veriut, këtë dhjetor përfundon kryesimin e OSBE-së, e nga 1 Janari 2024, për një vit këtë rol do ta kryejë Malta.
Deputetja e Partisë Demokratike të Kosovës, Blerta Deliu Kodra kritikoi ashpër Qeverinë Kurti për mos angazhimin në luftën kundër korrupsionit dhe krimit të organizuar, derisa foli për Raportin e Kongresit.
Gatë debatit parlamentar lidhur me Raportin e Komisionit Evropian për Kosovën për vitin 2023, Kodra tha se Raporti i Komisionit Evropian e gjen Kosovën nën sanksione, derisa potencoi se 300 milionë euro është vlera e projekteve që i ka bllokuar BE-ja, për shkak të sanksioneve.
Ajo shtoi se pavarësisht që partia Lëvizja Vetëvendosje dhe lideri saj, Albin Kurti kanë premtuar se do të kenë prioritet luftën ndaj korrupsionit dhe krimit të organizuar, sipas saj tash e tri vjet nuk është bërë asgjë në këtë progres.
“Ky raport i Komisionit Evropian e gjen Kosovën nën sanksione. 300 milionë euro është vlera e projektit të cilat i ka bllokuar Bashkimi Evropian për shkak të sanksioneve të cilat rëndojnë Kosovën si pasojë e kësaj qeverie…Kushdo qe e ka lexuar këtë raport 133 faqesh e sheh, 21 herë përmendet fjala shqetësim, tre herë togfjalëshi shqetësim serioz, ndër të tjera përmendet edhe për korrupsionin, 32 here togfjalëshi fazë fillestare, 49 here progres i kufizuar, 3 herë përmendet pak progres, 30 herë nuk ka progres, 59 here pak progres dhe vetëm 8 herë togfjalëshi progres i mirë. Pra, në 184 cilësime, 176 janë me progres jo të mirë dhe vetëm 8 prej tyre me progres të mirë…Ndërsa, si mos më keq është thënë që është gjendja në luftën ndaj korrupsionit ku konstatohet se Kosova është në fazë fillestare nëse është bërë progres i limituar dhe është më i ulëti që Komisioni Evropian e ka për Kosovën…Në raportin e këtij viti fjala korrupsion është përmendur gjithsej 99 herë, më keq se kaq nuk ka qenë as në raportin e vitit 2020, ku është përmendur 88 herë…Edhe pse Lëvizja Vetëvendosje dhe lideri i saj Kurti siç e thoshin e kanë prioritet luftën ndaj korrupsionit dhe krimit të organizuar po del që pikërisht në këtë fushë tash e tri vjet nuk është bërë po thuajse fare progres”, tha Kodra.
Përveç Raportit të Progresit, deputetja Deliu Kodra foli edhe për gjenden e varfërisë në Kosovë, për çka tha se një qytetar në Kosovë jeton mesatarisht me 1.5 euro në ditë, për çka potencon se këshilltari i një ministre merr pagë afro 8 mijë euro.
Ajo theksi faktin se sipas të dhënave të BQK-së, afro 700 mijë qytetarë kanë kredi nëpër banka.
“Rreth 28 për qind e popullsisë sot jetojnë në pragun e varfërisë me 45 euro në muaj, ose me 1.5 euro në ditë. Paramendoni ky realitet i qytetarëve të Kosovës sot po ndodh në një moment kur një këshilltar i një ministre të kësaj qeverie paguhet me 7500 euro në muaj…Normat e interesit të kredive janë rritur në 6.3 për qind në vitin 2022 nga 5.8 sa ishin në vitin 2021. Nga të dhënat e fundit që janë publikuar nga Banka Qendrore e Kosovës, tregojnë se 653 mijë qytetarë kanë kredi nëpër banka”, tha Deliu- Kodra.
Ka nisur protesta e organizuar nga Sindikata e Zjarrfikësve para objektit të Qeverisë së Kosovës, raporton ATV.
Ata kanë njoftuar se protesta po zhvillohet për shkak se institucionet e shtetit nuk po i përmbushin kërkesat e tyre.
Përmes një reagimi që i kanë dërguar edhe kryeministrit Albin Kurti dhe institucioneve të tjera relevante, Sindikata thotë se zjarrfikësit janë në një situatë shumë të rëndë sa i përket organizimit, financimit dhe menaxhimit të shërbimit të zjarrfikjes dhe shpëtimit.
Siç shihet në videon që ka siguruar ATV nga vendi i ngjarjes, të gjithë zjarrfikësit që kanë dalë në protestë shihet se janë me uniformat e tyre dhe helmetën për mbrojtjen nga zjarri. /atvlive.tv