ATV

Tag: Ballina

  • Lajçak: BE-ja është gati për zgjerim për herë të parë pas një kohe të gjatë

    Lajçak: BE-ja është gati për zgjerim për herë të parë pas një kohe të gjatë

    I dërguari i posaçëm i Bashkimit Evropian për dialogun Kosovë-Serbi, Miroslav Lajçak, ka thënë se për herë të parë BE-ja është e gatshme për zgjerim.

    “Në samitin për Ballkanin, theksova se për herë të parë pas një kohe BE-ja është gati për zgjerim. Është koha për të përfituar nga kjo mundësi”, shkroi Lajçak në platformën X.

    Lajçak mori pjesë të enjten në samitin BE-Ballkani Perëndimor të organizuar nga instituti politik i Brukselit “Friends of Europe”.

    Emisari i BE-së tha se “gjeopolitika e ka hapur derën për integrim në BE, por ajo nuk do t’ju kalojë vetvetiu juve përmes kësaj dere, sepse për një gjë të tillë duhet të përmbushen kushtet”.

    “Për herë të parë e shoh BE-në më të gatshme për Ballkanin sesa Ballkani për BE-në”, u shpreh Lajçak duke përsëritur që vendet e rajonit duhet t’i zgjidhin të gjitha çështjet e hapura mes tyre, në mënyrë që një ditë të mos mund të bllokojnë njëra-tjetrën në rrugën drejt BE-së.

    Në Bruksel po zhvillohet debati kushtuar procesit të zgjerimit të organizuar nga “Miqtë e Evropës”.

  • Prokuroria Speciale ka ngritur 33 aktakuza me 89 persona për krime të luftës në Kosovë

    Prokuroria Speciale ka ngritur 33 aktakuza me 89 persona për krime të luftës në Kosovë

    Prokuroria Speciale e Republikës së Kosovës (PSRK), ka ngritur 33 aktakuza ku përfshihen 89 persona për krime lufte në Kosovë, raporton Ekonomia Online. Prokurorja Drita Hajdari në një konference për medie tha se ky proces ka paraqitur shumë probleme për shkak se shumica e të dyshuarve ndodhën në Serbi.

    “Në mesin e këtyre rasteve ka qenë edhe rasti për ‘Mejen’ dhe shumë e shumë raste të krimeve të luftës në Kosovë. Sa i përket aktakuzave, iu njoftoj se tani prokurorët vendor kanë ngritur gjithsej 33 aktakuza me 89 persona”.

    “Me marrjen e kompetencave ishim të ballafaquar me probleme të shumta e sidomos me rrethanën se kryerësit e këtyre veprave penale nuk kanë qenë në Kosovë. Shumica e tyre janë në Serbi ndërsa viktimat dhe dëshmitarët janë në Kosovë dhe kjo ka paraqitë një vështirësi të madhe për ngritjen e aktakuzave sepse nuk kemi mujtë me i ngritë aktakuzat pa i marrë në pyetje të pandehurit, mirëpo kjo rrethanë nuk na ka ndal”.

    Kryeprokurori i PSRK-së, Blerim Isufaj tha se ky institucion do të vazhdojë të punojë pa ndalur në ndjekjen e të gjitha rasteve që kanë të bëjnë me krime lufte.

    “Prokurorët tanë po punojnë më shumë përkushtim përkundër sfidave që masin sigurimin e provave dhe dëshmisë. Përkundër faktit që ka kaluar një kohë e konsiderueshme dhe janë krijuar vështirësi për një punë sa më të suksesshme për identifikimin e kryerësve dhe kapjen e tyre për t’i sjellë para drejtësisë”.

    “Me këtë rast dua t’i siguroj të gjithë qytetarët e Republikës së Kosovës se Prokuroria Speciale do të vazhdojë të punojë pa ndaluar në hetimin dhe ndjekjen e të gjitha rasteve që kanë të bëjnë me krimet e luftës, përkundër vështirësive që na presin”.

  • ​Stano për draft-statutin e ri të Asociacionit: Është i balancuar dhe evropian

    ​Stano për draft-statutin e ri të Asociacionit: Është i balancuar dhe evropian

    Zëdhënësi i BE-së, Peter Stano, tha se draft-statuti i Asociacionit të komunave me shumicë serbe që i është paraqitur palëve në proces të dialogut në Bruksel (Kosovës dhe Serbisë) është i balancuar dhe evropian.

    “Lidhur me draft-statutin e Asociacionit të Komunave Serbe, mund të kujtojmë vetëm se një propozim i ri i balancuar evropian për themelimin e Asociacionit të Komunave iu paraqit partnerëve përkatës nga EUSR për dialogun e Beogradit në Prishtinë gjatë vizitës së tij në rajon në fund. të muajit tetor dhe më pas u diskutua me të dyja palët gjatë takimit të liderëve në margjinat e Këshillit Evropian”, tha ai.

    Stano ka bërë të ditur arsyet se përse BE-ja nuk po e bënë publik përmbajtjen e draft-statutit të Asociacionit.

    “Propozimi i BE-së nuk është bërë publik pasi përpjekjet diplomatike janë në vazhdim. Ne kurrë nuk i zbulojmë dokumentet zyrtare publikisht dhe as nuk marrim pjesë në shkëmbime publike për to, ndërkohë që ato diskutohen. Të njëjtën gjë presim edhe nga partnerët, pasi është praktikë normale në ndërmjetësimin ndërkombëtar që procesi të zhvillohet në konfidencialitet”, tha tutje Stano.

    Por, ai nuk ka dhënë qëndrim të qartë nëse BE-ja ka një vlerësim se cila palë në proces të dialogut nuk po e zbaton marrëveshjen e Brukselit dhe Ohrit.

    “Në pyetjen tuaj të fundit, zbatimi është përgjegjësi e Palëve dhe deri më tani ato nuk kanë qenë në gjendje të ecin përpara dhe të përmbushin detyrimet e tyre” tha zëdhënësi i BE-së, Peter Stano, për RTV21.

  • Bisedimet në mes Kosovës dhe Serbisë dhe kushtet për integrimet evropiane

    Bisedimet në mes Kosovës dhe Serbisë dhe kushtet për integrimet evropiane

    I dërguari evropian për bisedimet Kosovë-Serbi, Miroslav Lajçak, tha të enjten në Bruksel se ka përparim në procesin e zbatimit të disa marrëveshjeve të arritura në bisedime, duke nënvizuar se pa normalizimin e marrëdhënieve asnjëra palë nuk mund të përparojë në rrugën evropiane.

    Ai i bëri këto komente gjatë një debati mbi zgjerimin e bllokut evropian të organizatës joqeveritare “Miqtë e Evropës“, në të cilin u tha se normalizimi i marrëdhënieve Kosovë – Serbi është me rëndësi strategjike.

    “Pa këtë normalizim nuk mundemi as të ëndërrojmë të ardhmen evropiane. Kemi përparim kohëve të fundit në këtë drejtim. Së shpejti do ta mbyllim dosjen e energjisë, ka progres në çështjen e targave, në çështjen e personave të pagjetur, në çështjen e zgjedhjeve lokale në veri dhe në zbatimin e marrëveshjes për rrugën drejt normalizimit të marrëdhënieve”, tha Lajçak, duke iu referuar marrëveshjes së arritur me 27 shkurt në Bruksel dhe pajtimit me 18 mars në Ohër për rrugët e zbatimit të saj.

    Javën që vjen Bashkimi Evropian pritet të debatojë politikat e zgjerimit dhe në kuadër të diskutimeve pritet miratimi i përfundimeve që është paralajmëruar se do të përfshijnë kërkesën që Komisioni Evropian ta bëjë marrëveshjen e Ohrit pjesë të negociatave për anëtarësimin e Serbisë në bllok, përkatësisht të kapitullit 35 të negociatave.

    Përfundimet pritet të miratohen nga ministrat e Jashtëm të vendeve anëtare në një takim më 12 dhjetor dhe më pas nga Këshilli Evropian, në një takim të udhëheqësve që do të zhvillojë punimet me 14 dhe 15 dhjetor.

    Presidenti serb, Aleksandar Vuçiq, ka thënë të mërkurën se ka mundësi që Marrëveshja e Ohrit të bëhet pjesë e negociatave për anëtarësim.

    Marrëveshja kërkon marrëdhënie të mira fqinjësore ndërmjet Kosovës dhe Serbisë, njohje të dokumenteve dhe simboleve dhe respektim të sovranitetit dhe tërësisë tokësore të njëra tjetrës. Ajo kërkon që palët të mos pengojnë njëra tjetrën në proceset integruese, por nuk kërkon njohje të ndërsjellë. Plani parasheh edhe përmbushjen e të gjitha marrëveshjeve të arritura më parë në bisedimet e ndërmjetësuara nga Bashkimi Evropian.

    Por, presidenti serb Vuçiq, ritheksoi se për Serbinë është e papranueshme që Kosova “të anëtarësohet në Kombet e Bashkuara”.

    “Jam takuar me francezët, gjermanët, italianët, të gjithë evropianët, amerikanët, për këtë gjë. Të gjithë e dinë këtë”, tha presidenti serb në një intervistë për revistën e përjashtme serbe, NIN. Sipas tij, nëse të gjitha pikat e marrëveshjes përfshihen në përfundimet e bllokut “dyert e BE-së për Serbinë do të mbyllen”.

    Që nga fillimi i bisedimeve për normalizimin e marrëdhënieve Kosovë – Serbi në vitin 2011, perëndimi e ka theksuar se ky është kusht për integrimet evropiane.

    Një zëdhënës i Departamentit amerikan të Shtetit i tha Zërit të Amerikës se Shtetet e Bashkuara vazhdojnë të mbështesin fuqishëm bisedimet e lehtësuara nga BE-ja si e vetmja rrugë për të arritur një marrëdhënie paqësore ndërmjet Kosovës dhe Serbisë.

    “Për këtë arsye, ne përsërisim thirrjet tona për qeveritë e Kosovës dhe Serbisë që të bëjnë përparim konkret në angazhimet që kanë marrë në kuadër të marrëveshjes së normalizimit dhe presim që të dyja vendet të zbatojnë plotësisht të gjitha detyrimet e tyre sipas Marrëveshjes Themelore dhe aneksit të zbatimit të saj”, thuhet në përgjigjen e zëdhënësit të DASH-it në të cilën ritheksohet përkushtimi i Shteteve të Bashkuara për të mbështetur Serbinë, Kosovën dhe të gjitha vendet e Ballkanit Perëndimor për të përmbushur aspiratat e tyre për integrim evropian dhe anëtarësim në institucionet euroatlantike.

    Por marrëveshja e Ohrit nuk i uli tensionet ndërmjet palëve, të cilat u përkeqësuan në fund të shtatorit pas një sulmi mbi policinë e Kosovës nga një grup serbësh të armatosur, ku mbeti i vrarë një oficer policie.

    Në projektin e përfundimeve të takimit të vendeve anëtare të BE-së i kërkohet Serbisë vënia para drejtësisë e autorëve të sulmit të 24 shtatorit, përgjegjësinë për të cilin e mori përsipër Milan Radoiçiq, ish-nënkryetar i Listës Serbe, partisë kryesore të serbëve në Kosovë që gëzon mbështetjen e Serbisë. Beogradi, e ka mohuar deri tani çdo lidhje me sulmin.

    Ministri për Komunitete dhe Kthim në qeverinë e Kosovës, Nenad Rashiq, tha të enjten se emri i Milan Radoiçiqit është në listën e të kërkuarve nga Policia Ndërkombëtare (Interpol). Kërkesa sipas tij është bërë nëpërmjet Misionit të Kombeve të Bashkuara, meqë Kosova nuk është pjesë e Interpolit për shkak të kundërshtimit të pavarësisë së saj nga Serbia dhe aleatja e saj Rusia.

    Ngjarjet e 24 shtatorit u pasuan nga shtimi i pranisë së forcave paqeruajtëse në Kosovës, por edhe një shtim përpjekjesh perëndimore për t’i nxitur palët të përshpejtojnë normalizimin e marrëdhënieve, mes shqetësimeve se Rusia mund të përpiqet të nxisë konflikt në Ballkan, për të shmangur vëmendjen nga agresioni i saj në Ukrainë.

    Udhëheqësit më të lartë evropianë i kërkuan më 26 tetor Kosovës të nisë procedurën për themelimin e Asociacionit të Komunave me shumicë Serbe, ndërsa Serbisë që të njohë de-facto shtetësinë e Kosovës.

    Ata u thanë të dyja palëve se në mungesë të përparimit për normalizimin e marrëdhënieve, rrezikojnë të humbasin mundësi të rëndësishme në radhë të parë integrimet evropiane.

    Serbia i ka shpallur këto integrime synim të saj, por ka refuzuar t’u bashkohet sanksioneve perëndimore kundër Rusisë për shkak të agresionit të saj në Ukrainë, në radhë të parë për shkak të mbështetjes së pretendimeve serbe ndaj Kosovës nga ana e Kremlinit.

    Ambasadori amerikan në Serbi, Christopher Hill, tha të enjten në Bruksel se Bashkimi Evropian duhet të dëshmojë se kësaj radhe mundësia për integrim është reale, ndërsa nënvizoi se Serbia po bën shumë në procesin e reformave sikur edhe në ndihmën e saj për Ukrainën.

    “Serbia po bën shumë për Ukrainën, por ju lutem të mos e bëni të madhe këtë, sepse nuk do të ishte në interes të të gjithëve në Serbi“, tha ambasadori Hill, pa dhënë më shumë hollësi për çfarë ndihme bëhet fjalë. /voa

  • DASH: Kosova dhe Serbia të bëjnë përparim konkret në angazhimet që kanë marrë në kuadër të dialogut

    DASH: Kosova dhe Serbia të bëjnë përparim konkret në angazhimet që kanë marrë në kuadër të dialogut

    Që nga fillimi i bisedimeve për normalizimin e marrëdhënieve Kosovë – Serbi në vitin 2011, perëndimi e ka theksuar se ky është kusht për integrimet evropiane.

    Një zëdhënës i Departamentit amerikan të Shtetit i tha Zërit të Amerikës se Shtetet e Bashkuara vazhdojnë të mbështesin fuqishëm bisedimet e lehtësuara nga BE-ja si e vetmja rrugë për të arritur një marrëdhënie paqësore ndërmjet Kosovës dhe Serbisë.

    “Për këtë arsye, ne përsërisim thirrjet tona për qeveritë e Kosovës dhe Serbisë që të bëjnë përparim konkret në angazhimet që kanë marrë në kuadër të marrëveshjes së normalizimit dhe presim që të dyja vendet të zbatojnë plotësisht të gjitha detyrimet e tyre sipas Marrëveshjes Themelore dhe aneksit të zbatimit të saj”, thuhet në përgjigjen e zëdhënësit të DASH-it në të cilën ritheksohet përkushtimi i Shteteve të Bashkuara për të mbështetur Serbinë, Kosovën dhe të gjitha vendet e Ballkanit Perëndimor për të përmbushur aspiratat e tyre për integrim evropian dhe anëtarësim në institucionet euroatlantike.
    Gjatë ditës së djeshme, i dërguari i posaçëm i BE-së për dialogun mes Kosovës dhe Serbisë, Miroslav Lajçak, tha në Bruksel se ka progres në zbatimin e disa marrëveshjeve të arritura në dialogun ndërmjet të dyja palëve.

    Ai e tha këtë gjatë debatit për zgjerimin të zhvilluar nga organizata “Miqtë e Evropës“.
    Lajçak theksoi se e ardhmja evropiane e rajonit të Ballkanit Perëndimor nuk mund as ëndërr të shihet pa normalizimin e raporteve mes Kosovës dhe Serbisë.

    “Normalizimi i raporteve mes Kosovës dhe Serbisë është një çështje me rëndësi strategjike. Pa këtë normalizim nuk mund as të ëndërrojmë të ardhmen evropiane. Kemi progres kohëve të fundit në këtë drejtim. Së shpejti do ta mbyllim dosjen e energjisë, ka progres në çështjen e targave, në çështjen e personave të pagjetur, në çështjen e zgjedhjeve lokale në veri dhe në zbatimin e marrëveshjes për rrugën drejt normalizimit të raporteve”, deklaroi Lajçak duke shtuar se ai është në kontakt të vazhdueshëm me palët për të vazhduar me zbatimin.

  • “Ai është pezulluar nga detyra”, Maqedonci flet për pjesëtarin e FSK-së, të dyshuar si i përfshirë në vrasjen e Liridona Ademajt

    “Ai është pezulluar nga detyra”, Maqedonci flet për pjesëtarin e FSK-së, të dyshuar si i përfshirë në vrasjen e Liridona Ademajt

    Ministri i Mbrojtjes, Ejup Maqedonci, në emisionin CONTEXT në ATV, tregoi se pjesëtari i FSK-së, Kushtrim Kokolla, i akuzuar për pjesëmarrje në vrasjen e Liridona Ademajt, është pezulluar nga detyra.

    “Si rasti i fundit kur gjykata faktikisht kur prokuroria e adreson këtë çështje dhe merret me individin, detyrë e jona është normalisht sipas rregulloreve që të pezullojmë, pra ta suspendojmë nga detyra për t’i dhënë mundësinë organeve të tjera të bëjnë hetimet e nevojshme, por edhe gjykatës që të kryejë punën e saj. Mirëpo, megjithatë ne vazhdojmë, kemi edhe ekipin e hetimeve brenda Policisë Ushtarake, ekip i cili realizon hetime, në rast se lidhet diçka me FSK-në edhe me kohën kur ka shërbyer aty që ndërlidhet edhe me krimin e supozuar jashtë”, tha Maqedonci.

    Ai thotë se në momentin që ai shpallet fajtor, atëherë automatikisht largohet nga FSK.

    “Ne në vazhdimësi ndjekim procesin gjyqësor, normalisht jo vetëm për të mbështetur aspektin e prokurorisë, por gjithashtu edhe për të shikuar edhe aspektin e ligjshmërisë të akuzës, pra në njëfarë forme, ne shikojmë edhe aspektin e mbrojtjes së drejtave të ushtarëve kur ballafaqohen me këto raste, por në momentin shpallet fajtor, atëherë largohet automatikisht nga FSK”, tregoi Maqedonci.

    Këtë rast, ai e vlerëson si rast të izoluar dhe nuk e përjashton se mund të ketë individë që mund të kryejnë akte të këqija jashtë institucionit.

    “Vlerësojmë se janë raste të izoluara. Një gjë duhet ta kemi parasysh se ushtria del prej popullit, pra qytetarët e këtij vendi e bëjnë ushtrinë. Çka është dallimi, është që normalisht ne jemi konsideruar ndër vite si institucioni më kredibilitetin më të lartë. Ne e kemi një kulturë të veçantë brenda FSK-së siç e kemi edhe brenda Ministrisë së Mbrojtjes që vjen si rezultat i formësimit ushtarak, formësimit, rregullit, disiplinës e të gjitha të tjerave. Megjithatë, ne nuk e përjashtojmë kurrë mundësinë që nga radhët tona të ketë edhe individë të cilët mund të kryejnë akte të këqija në raport jashtë institucionit, mirëpo megjithatë ne kemi marrë masa qysh në fillim. Në bëjmë vetingun, bëjmë një kontroll të së kaluarës të secilit pjesëtar qytetar që i bashkëngjitet FSK-së. Ne në vazhdimësi bëjmë edhe kontroll, i kemi hierarkinë ushtarake e cila është e obligueshme që të mbikëqyrë çdo lëvizje, qoftë edhe e dyshimtë, mirëpo normalisht ne nuk mund kontrollojnë çdo gjë 24 orë për secilin individ. Me të vërtetë, këto raste janë të izoluara”, deklaroi ministri Maqedonci. /atvlive.tv

  • Kolegji AAB, pjesë e fushatës “16 ditët e aktivizmit kundër dhunës gjinore”

    Kolegji AAB, pjesë e fushatës “16 ditët e aktivizmit kundër dhunës gjinore”

    Përgatiti: Kastriot Tahiri

    Salla e konferencës mezi i zuri.

    Në kuadër të fushatës 16 ditë të aktivizmit kundër dhunës me bazë gjinore, në kolegjin AAB u diskutua rreth rasteve të raportimeve të dhunës, për të cilat u tha se është rritur numri.

    “Siç jemi duke e parë në rastet e fundit, këtu në Kosovë dhe në regjion në gjithashtu kemi parë një ndikim negativ shkatërrues dhe afatgjatë mbi komunitetet ku dhuna po zhvillohet. Kemi parë një ngritje të raportimit të rasteve këtu në Kosovë deri 18 për qind, vitin e kaluar dhe para vitit të kaluar”, tha ambasadori i OSBE-së në Kosovë, Michael Davenport.

    “Roli i profesionistëve ligjorë i juve si juristë të ardhshëm është vendimtar, pasi që do të jetë instanca e fundit e qasjes në drejtësi për viktimat. Ju ftoj ta luftoni ngacmimin seksual, se ballafaqoheni me të çdo ditë, sepse është një formë e dënueshme”, tha zv.ministri i Drejtësisë, Vigan Qorrolli.

    Duke folur për rëndësinë që kanë organet e rendit, nga rrejti i grave kërkuan trajtim më serioz, për raportimet e dhunës.

    VOX: Adelina Berisha nga RRGK
    “Kemi raste kur për shkak të punës së keqe të prokurorit janë vra gratë, për shkak që gjyqtarit fjala juaj ka një peshë të madhe se fjala juaj do të shpëtojë një jetë ose jo”, tha Adelina Berisha nga RRGK.

    Shumë studentë, profesorë e mysafirë specialë erdhën për të dëgjuar edhe rreth Konventës së Stambollit, pjesë e së cilës është Kosova.

    Ky diskutim, do të shërbej në ngritjen e studentëve për çështjen kaq të ndjeshme, do të ndikojë që punën e tyre nëpër institucione shtetërorë ta bëjnë si duhet në të ardhmen…”, tha Mentor Leci, dekan i Fakultetit Juridik.

    Në kuadër të fushatës ”16 ditët aktivizmit kundër dhunës me baza gjinore” janë organizuar rreth 80 aktivitete.

  • Mbahet takimi i parë i Institutit për Dokumentimin e Krimeve të Luftës

    Mbahet takimi i parë i Institutit për Dokumentimin e Krimeve të Luftës

    Përgatiti: Krenare Mulliqi

    Tash e një muaj është emëruar drejtor ekzekutiv i Institutit për Krime Lufte. Në deklarimin e tij të parë, Atdhe Hetemi tha se ky Institut ka për mision mbledhjen, arkivimin, hulumtimin dhe dokumentimin e krimeve të luftës.

    Hetemi, bashkë me kryeministrin Albin Kurti, pjesëtarë të organizatave joqeveritare e zyrtarë të tjerë, morën pjesë në takimin e parë zyrtar të hapur lidhur me Institutin për Hulumtimin e Krimeve të Kryera gjatë Luftës, që pritet të funksionalizohet shpejt.

    I pari i ekzekutivit i cili tha se puna e këtij Instituti nuk është fare e lehtë, por, sipas tij, krimet e luftës do të dokumentohen dhe adresohen.

    Sipas tij, 24 vjet pas luftës, Kosova ende nuk e di dëmin ekonomik, emocional dhe psikologjik që ia ka shkaktuar lufta.

    Diskutimin rreth institutit e mirëpresin edhe në Fondin për të Drejtën Humanitare, organizatë kjo e pavarur, e cila i dokumenton krimet e luftës tash e më shumë se 20 vjet.

    Dokumentimin e krimeve të luftës, Instituti i rithemeluar do ta bëjë nga aspekti historik, ushtarak, ekonomik, juridik, ekologjik, kulturor, mjekoligjor dhe sociologjik dhe do ta krijojë fondin arkivor, si dhe përgatitjen e të dhënave statistikore.

  • Nenad Rasiq: Interpol i lëshon fletarrest për Milan Radojiçiqin

    Nenad Rasiq: Interpol i lëshon fletarrest për Milan Radojiçiqin

    Përgatiti: Fatlum Jashari

    Ministri për Komunitete, Nenad Rasiq, njoftoi për mediat në vend se INTERPOL-i ka lëshuar urdhër arrest për Milan Radojiçiqin.

    Ai tha se njoftimi është lëshuar pas kërkesë së Kosovës, përmes UNMIK-ut.
    Por, Prokuroria, Policia, Ministria e Punëve të Brendshme, misioni i OKB-së në Kosovë dhe INTERPOL-i, zyrtarisht, nuk konfirmuan këtë informacion.

    Me arsyetimin se nuk komentojnë individët, Organizata Ndërkombëtare Policisë – INTERPOL sqaroi se nuk lëshon flet-arreste, por “njoftime të kuqe”.

    Deri në publikimin e kronikës, Milan Radojçiq nuk ishte në këtë listë publike të INTERPOL-it.

    Zyrtarisht, “Njoftimi i kuq” është alarm për të arrestuar përkohësisht persona të kërkuar për ekstradim, dorëzim ose veprime të njëanshme ligjore.

    “Njoftimi i kuq” iu referohet personave të kërkuar nga një shtet ose nga tribunali ndërkombëtar, por jo nga INTERPOL-i dhe nuk është fletë-arrest tipik.
    Pasi tregoi se njoftimi i kuq ndryshe njihet si fletë-rreshtim i kuq, profesori Fatmir Çollaku, sqaroi se ai është një instrument nënkupton gatishmërinë për të arrestuar personin nëse ai haset në vendkalime apo shtete të ndryshme.

    “Për shembull fletë-rreshtimi i gjelbër, fletë-rreshtimet tjera, janë krejtësisht për faza tjera, në kuptimin e identifikimit të kryerësve të mundshëm të veprave penale për të cilët ekziston dyshimi i bazuar. Kurse në rastin konkret nuk kemi të bëjmë me dyshim, sepse bëhet fjalë për fletë-rreshtimin e kuq, që veç janë konsumuar nivelet e dyshimit, sepse personi në fjalë, i dyshuari e ka marrë përsipër atë vepër dhe nuk ka më asgjë tjetër pos arrestimit të tij”, tha profesori Çollaku.

    Edhe pse vlerësoi se fletë-rreshtimi ia kufizon lirinë e lëvizjes Radojçiqit, profesori përmendi rolin e kufizuar të Kosovës për të sjellë atë para drejtësisë.

    “Çka mund të bëjë Kosova këtu? Asgjë nuk mund të bëjë Kosova, sepse në Serbi nuk ka ingirenca, Kosova nuk është anëtare e INTERPOL-it. Por, është një solidarizim, është një gatishmëri e institucioneve ndërkombëtare që të jenë në frekuenca dhe në favor të sundimit të ligjit dhe luftimit të kriminalitetit”, tha Çollaku.

    Milan Radojçiq mori përgjegjësinë për përgatitjen edhe udhëheqjen e sulmit terrorist-paramilitar më 24 Shtator, në Banjskë, në të cilin mbeti i vrarë rreshteri i Policisë së Kosovës, heroi Afrim Bunjaku. Pas sulmit, Radojçiq u strehua në Serbi.

  • ​Lajçak thotë se ka progres në zbatimin e marrëveshjeve të dialogut

    ​Lajçak thotë se ka progres në zbatimin e marrëveshjeve të dialogut

    I dërguari i posaçëm i BE-së për dialogun mes Kosovës dhe Serbisë, Miroslav Lajçak, tha të enjten në Bruksel se ka progres në zbatimin e disa marrëveshjeve të arritura në dialogun ndërmjet të dyja palëve. Ai e tha këtë gjatë debatit për zgjerimin të zhvilluar nga organizata “Miqtë e Evropës“.

    Lajçak theksoi se e ardhmja evropiane e rajonit të Ballkanit Perëndimor nuk mund as ëndërr të shihet pa normalizimin e raporteve mes Kosovës dhe Serbisë.

    “Normalizimi i raporteve mes Kosovës dhe Serbisë është një çështje me rëndësi strategjike. Pa këtë normalizim nuk mund as të ëndërrojmë të ardhmen evropiane. Kemi progres kohëve të fundit në këtë drejtim. Së shpejti do ta mbyllim dosjen e energjisë, ka progres në çështjen e targave, në çështjen e personave të pagjetur, në çështjen e zgjedhjeve lokale në veri dhe në zbatimin e marrëveshjes për rrugën drejt normalizimit të raportev”, deklaroi Lajçak duke shtuar se ai është në kontakt të vazhdueshëm me palët për të vazhduar me zbatimin.

    Ai bëri thirrje që të mos humbet koha për implementimin e obligimeve nga dialogu dhe të mos humbet rasti për avancim në rrugëtimin drejt BE-së. Lajçak theksoi se viti i ardhshëm do të jetë një vit me kalendar të ngjeshur politik, sepse do të ketë zgjedhje në Bashkimin Evropian dhe në Shtetet e Bashkuara të Amerikës.

    Sipas Lajçakut, tash është një moment i ri në procesin e zgjerimit, që është shumë më i favorshëm sesa më parë. Ky moment i ri, tha ai, është krijuar nga presidenti i Rusisë, Vladimir Putin, dhe agresioni i tij ndaj Ukrainës”.

    Megjithatë, emisari i BE-së tha se “gjeopolitika e ka hapur derën për integrim në BE, por ajo nuk do t’ju kalojë vetvetiu juve përmes kësaj dere, sepse për një gjë të tillë duhet të përmbushen kushtet”.

    “Për herë të parë e shoh BE-në më të gatshme për Ballkanin sesa Ballkani për BE-në”, u shpreh Lajçak duke përsëritur që vendet e rajonit duhet t’i zgjidhin të gjitha çështjet e hapura mes tyre, në mënyrë që një ditë të mos mund të bllokojnë njëra-tjetrën në rrugën drejt BE-së.

    Në Bruksel po zhvillohet debati kushtuar procesit të zgjerimit të organizuar nga “Miqtë e Evropës”.

    Në këtë debat, Bashkimi Evropian porositi vendet e Ballkanit Perëndimor se nuk ka më kohë për të pritur që t’i normalizojnë raportet ndërmjet tyre porse kjo duhet të bëhet shpejt, si kusht për të shfrytëzuar mjetet nga plani për rritje ekonomike i miratuar më 8 nëntor nga Komisioni Evropian.

    Plani për rritje ekonomike për vendet e Ballkanit Perëndimor parasheh një paketë të madhe të asistencës financiare prej 6 miliardë eurosh për periudhën nga viti 2024 deri në vitin 2027. Sipas planit, nga kjo shumë, deri në 2 miliardë euro do të shkonin si asistencë pa kthim, ndërsa 4 miliardë në formën e kredive të favorshme apo investimeve kapitale. Një pjesë e këtyre mjeteve financiare do të mund të shkonin përmes pagesave direkte në buxhetet e vendeve të rajonit për t’u përdorur për këto qëllime.

    Në debat marrin pjesë edhe ambasadori amerikan në Beograd, Christopher Hill, drejtori i përgjithshëm për zgjerim në Komisionin Evropian, Jan Coopman, dhe shumë pjesëmarrës tjerë.

    Coopman tha se qëllimi i BE-së është t’i integrojë sa më shumë vendet e rajonit edhe para se të bëhen anëtare të BE-së, përfshirë edhe integrimin në tregun e brendshëm të Bashkimit Evropian.

    Në takim morën pjesë edhe ministrat nga disa vende të rajonit. Ata mbështetën idenë për integrimin gradual para integrimit formal në BE, por jo të shihet si alternativë e anëtarësimit.

    “Për të realizuar këtë, rajoni duhet t’i tejkalojë problemet e hapura. Nuk mund të pranojmë vende, të cilat kanë raporte të helmuara”, tha Coopman duke përmendur çështjet e hapura rreth kufijve.

    Këto kushte, sipas diplomatëve në BE, kanë të bëjnë para së gjithash me Kosovën dhe Serbinë, të cilat janë të përfshira në procesin e dialogut të lehtësuar nga Bashkimi Evropian.

    “Ne do ta kushtëzojmë planin e rritjes me normalizimin e raporteve. Kjo duhet të Duhet të ketë përparim në këtë [aspekt]. Nuk kemi më kohë për të pritur”, deklaroi Coopman. Ai tha se vlera e mjeteve nga ky plan është e madhe dhe nëse shtetet nuk i shfrytëzojnë, qytetarët do të humbasin.

    Ministri për çështje evropiane i Çekisë, Martin Dvorak, rikujtoi se nuk do të ketë mundësi për asnjë vend kandidat që të shmangë përmbushjen e kritereve në procesin e avancimit drejt BE-së.

    Ndërsa, ambasadori amerikan në Serbi, Christopher Hill, bëri thirrje që BE-ja të dëshmojë se kësaj radhe mundësia për integrim në BE është vërtet reale. Ai tha se Serbia po bën shumë në procesin e reformave sikur edhe në ndihmën për Ukrainën.

    “Serbia po bën shumë për Ukrainën, por ju lutem të mos e bëni të madhe këtë, sepse nuk do të ishte në interes të të gjithëve në Serbi“, tha Hill.

    Çka është plani për rritjen ekonomike në Ballkanin Perëndimor?

    Plan i ri për rritje ekonomike në vendet e Ballkanin Perëndimor, i miratuar nga Komisioni Evropian më 8 nëntor të këtij viti është i bazuar në katër shtylla.

    Shtylla e parë është “forcimi i integrimit ekonomik në tregun unik të BE-së”. Kjo do të varet nga përshtatja e vendeve të rajonit me rregullat e tregut unik dhe paralelisht hapja e tregut të tyre në sektorët përkatës për vendet fqinje.

    Shtylla e dytë e këtij plani është “forcimi i integrimit ekonomik brenda Ballkanit Perëndimor përmes tregut të përbashkët rajonal”. Kjo, sipas përvojës së BE-së do të ndikojë në një rritje potenciale ekonomike prej 10 për qind.

    Shtylla e tretë e këtij plani është “përshpejtimi i reformave fundamentale“. Kjo nënkupton dhe sundimin e ligjit që ndihmon edhe në tërheqjen e investimeve direkte të huaja dhe forcon stabilitetin rajonal.

    Shtylla e katërt e planit të ri të Komisionit Evropian për rritje ekonomike në Ballkanin Perëndimor është “rritja e asistencës financiare për të ndihmuar reformat“. Këtu përfshihet edhe propozimi për 6 miliardë euro ndihmë.

    Pasi vendet e rajonit në raportet tregtare me Bashkimin Evropian përfitojnë edhe nga Marrëveshjet përkatëse të Stabilizim-Asociimit, KE-ja propozon që të shkohet edhe përtej kësaj, duke bërë edhe ndryshime në këto marrëveshje për të mundësuar kushte të barabarta në treg dhe mes vendeve në procesin e zgjerimit dhe vendeve anëtare të BE-së.

    Të gjitha këto qëllime janë në përputhje edhe me idetë që po realizohen përmes Procesit të Berlinit, si dhe krijimin e “tregut të përbashkët rajonal”./rel/