Tag: Ballina

Ministria e Industrisë, Ndërmarrësisë, Tregtisë dhe Inovacionit (MINTI) ka shqiptuar 18 gjoba ndaj KEDS, në vlerë totale prej 90 mijë eurosh, pas konstatimit të parregullsive në njehsorët elektrikë.

Sipas njoftimit zyrtar, Inspektorati Qendror i Mbikëqyrjes së Tregut ka gjetur se për 18 njehsorë të verifikuar është konstatuar se u kishte skaduar afati i vlefshmërisë.

Gjatë muajit prill 2026, autoritetet kanë intensifikuar trajtimin e ankesave të konsumatorëve lidhur me devijimet në njehsorë. Një komision ad hoc i themeluar për këtë çështje ka pranuar gjithsej 574 ankesa të dokumentuara.

Nga verifikimet në terren, janë tërhequr 54 njehsorë nga shtatë rajone të Kosovës dhe janë testuar në laboratorët e Agjencia e Metrologjisë së Kosovës. Rezultatet tregojnë se në 38 prej tyre janë konstatuar devijime në kohë.

“Gjatë kësaj periudhe kohore, në 38 prej tyre janë konstatuar devijime kohore”, thuhet në njoftim.

Ndërkohë, MINT njofton se rastet e konfirmuara po i përcillen KESCO, nga e cila kërkohet që të bëjë kompensimin e menjëhershëm të konsumatorëve të dëmtuar.

MINT gjithashtu ka paralajmëruar se kontrollet dhe ndëshkimet do të vazhdojnë edhe gjatë muajit maj.

“Sigurojmë qytetarët… se edhe gjatë muajit maj do të vazhdojë me trajtimin e ankesave, verifikimin e njehsorëve dhe shqiptimin e gjobave”.

Bazuar në vendimin e Kryetarit të Kryeqytetit të Prishtinës, nga sot është bërë ndryshimi i qarkullimit të mjeteve motorike në rrugën “Ilaz Kodra”, në lagjen Dardania, duke e kthyer këtë rrugë në gjendjen e mëparshme të qarkullimit pas përfundimit të punimeve dhe riparimeve infrastrukturore në këtë zonë.

Rruga “Ilaz Kodra” do të jetë me një kah të qarkullimit, duke filluar nga kryqëzimi me rrugën “Sali Çeku”, në drejtim të rrugëve “28 Nëntori” dhe “Ise Boletini”. Rrugët “28 Nëntori” dhe “Ise Boletini” vazhdojnë të jenë me dy kahje të qarkullimit.

Këto ndryshime janë bërë me qëllim të përmirësimit të rrjedhës së trafikut dhe rritjes së sigurisë në këtë zonë, si dhe pas përfundimit të punimeve infrastrukturore.

Fahrije Hoti do t’i bashkohet politikës, duke kandiduar për deputete në Kuvendin e Kosovës në zgjedhjet e 7 qershorit. Lajmi është bërë i ditur nga ish-Presidentja e Kosovës, Vjosa Osmani, përmes një njoftimi në Facebook.

Sipas Osmanit, Hoti do të jetë pjesë e listës së kandidatëve për deputetë, duke përfaqësuar një figurë të fuqishme të grave dhe një histori të njohur të qëndresës dhe punës në Kosovë.

“Nëse një grua vendos të ngrihet, ajo e bën këtë për të gjithë”, është shprehur Osmani, duke e cilësuar Hotin si një grua “të fortë si guri, të pastër si loti dhe punëtore si askush tjetër”.

Ministria e Industrisë, Ndërmarrësisë dhe Tregtisë ka publikuar çmimet maksimale të lejuara për derivatet e naftës, të cilat do të vlejnë për sot.

Sipas vendimit të MINTI-t çmimi maksimal i naftës (dizel) është përcaktuar në 1.69 euro për litër, ndërsa benzina do të shitet deri në 1.49 euro për litër.

Çmimi i gazit është vendosur në 0.84 euro për litër.

Këto çmime do të jenë në fuqi për sot, ndërsa do të fillojnë të zbatohen nga ora 10:00.

Partitë politike të regjistruara në Kosovë, janë të obliguara që deri më 7 maj, të njoftojnë Komisionin Qendror të Zgjedhjeve për pjesëmarrje ose mospjesëmarrje në zgjedhjet e parakohshme për Kuvendin e Kosovës.

Ky obligim vlen vetëm për 53 partitë politike që aktualisht janë të regjistruara si parti politike në Kosovë, pra jo edhe për subjektet politike që duan të marrin pjesë në zgjedhje si nisma qytetare apo kandidatë të pavarur.

Gjithashtu, partitë duhet të informojnë KQZ-në brenda afatit të përcaktuar nëse planifikojnë të garojnë në kuadër të ndonjë koalicioni.

Partitë kanë saktësisht afat edhe tre ditë të vendosin nëse duan të garojnë në zgjedhje si koalicion apo të pavarura.

Sipas KQZ-së, koalicioni mund të ndërtohet nga së paku dy parti politike dhe sipas ligjit, partia politike nuk mund të tërhiqet nga koalicioni pasi të jete certifikuar derisa rezultati i zgjedhjeve të certifikohet nga ana e KQZ.

KQZ ka vendosur që periudha zyrtare e fushatës zgjedhore për zgjedhjet e 7 qershorit të zgjasë 10 ditë e 7 orë, duke filluar më 28 maj 2026 dhe duke përfunduar më 7 qershor 2026 në orën 06:59.

Shorti për renditjen e subjekteve politike në fletëvotim hidhet më 16 maj 2026.

Ushtruesja e detyrës së shefes së BE-së në Kosovë, Eva Palatova, tha sot se është inkurajuese të shohësh Kosovën të ngrihet 15 vende në Organizatën Botërore “Reporterët pa Kufij”.

Ajo theksoi se ky përparim duhet të mbahet nga zyrtarët publikë dhe institucioni politik.

“Ky përparim tani duhet të mbahet nga zyrtarët publikë dhe institucioni politik që ndajnë përgjegjësinë për sigurimin e një mjedisi që mundëson median”, nënvizoi Palatova.

Në njoftim ndër të tjera thuhet se BE do të vazhdojë mbështetjen e mediave dhe lirisë së shprehjes në Kosovë.

Vendimet gjyqësore si pasojë e kontratave kolektive në Kosovë janë bërë një burim i madh i barrës financiare për buxhetin e komunave.

Kjo pasi që këtyre të fundit po u merren shuma të konsiderueshme parash.

Kryetari i komunës së Prishtinës, Përparim Rama, në një përgjigje për Ekonomia Online, këtë dukuri e ka quajtur të padrejtë, duke shtuar se po bëhet qëllimshëm nga niveli qendror.

“Është definitivisht diçka që është bërë, që duket që është bërë qëllimshëm nga niveli qendror vetëm për me i pamundësu komunave për me i zhvillu projektet e tyre. Pra diçka që ministria e ka për përgjegjësi, një kontratë kolektive që ministria e ka nënshkruar, që ata ishte dashur me i pagu, që gjithsesi që të gjithë qytetarët i meritojnë ato paga të cilat nuk janë të paguara, mirëpo diçka që ishte dashur me e parë përgjegjësi qeveria, ajo e ka bë këtë barrë të komunave në mënyrë të padrejtë. Edhe si rezultat kemi një numër të madh të komunave që kanë mbet edhe pa zhvillu projekte shumë të rëndësishme në infrastrukturë, në shëndetësi, në arsim e të tjera, e të tjera për shkak të kësaj padrejtësie”, tha Rama për EO.

Kryetari Rama deklaroi se nga vendimet gjyqësore si komunë kanë paguar rreth 12 milionë euro, e që për kryeqytetin është një barrë e madhe.

“Deri tash m’duket që kemi pagu diku rreth 12 milionë, domethënë është një barrë shumë e madhe, po po them Prishtina ndoshta edhe e ka mundësinë me e tejkalu këtë barrë sepse kemi mënyra të ndryshme ku ne edhe rrisim fonde, mirëpo komuna ka disa komuna të tjera që varen prej këtyre fondeve edhe i ka blloku totalisht. Pra është një gjë e padrejtë edhe ndaj këtij qyteti, ndaj komunës së Prishtinës po edhe ndaj të gjitha këtyre komunave të tjera. Është një çështje që e ka nënshkru ministria, ministria është dashur me e marrë përgjegjësinë, ministria është dashur me e bë pagesën, e këta e kanë bë të kundërtën, pra ja kanë bart barrën komunave në mënyrë të padrejtë”, tha Rama.

Drejtori i Asociacionit të Komunave të Kosovës, Sazan Ibrahimi, ditë më herët njoftoi se mbi 344 milionë euro tashmë janë humbur nga komunat gjatë periudhës 2022–2026, kryesisht si pasojë e vendimeve gjyqësore që lidhen me kontratën kolektive.

Sipas tij, vetëm në muajt e parë të vitit 2026 janë ekzekutuar rreth 55 milionë euro.

Ministria e Industrisë, Ndërmarrësisë, Tregtisë dhe Inovacionit, ka publikuar çmimin maksimal të lejuar për shitjen e derivateve në tregun vendor, për sot dhe nesër.

Për datat 03-04.05.2026, çmimet maksimale të lejuara janë si vijon:

• Nafta (dizel): 1.69 euro/litër;

• Benzina: 1.49 euro/litër

• Gas: 0.84 euro/litër.

Postimi i plotë:

Të gjitha partitë politike që aktualisht janë të regjistruara në Kosovë, janë obliguar nga Komisioni Qendror i Zgjedhjeve që ta njoftojnë këtë institucion për pjesëmarrje apo mospjesëmarrje në zgjedhjet e parakohshme për Kuvendin e Kosovës, të cilat do të mbahen më 7 qershor 2026.

Partitë politike janë të obliguara që ta njoftojnë KQZ-në në rast se duan të marrin pjesë në këto zgjedhje përmes koalicionit.

Zëdhënësi i KQZ-së, Valmir Elezi, ka shpjeguar për KosovaPress, se njoftimi i pjesëmarrjes apo mospjesëmarrjes në zgjedhje është obligim vetëm për 53 partitë politike që aktualisht janë të regjistruara dhe aktive në Kosovë.

Po ashtu, Elezi tregoi se deri më 7 maj, partitë politike kosovare kanë afat që të njoftojnë KQZ-në në rast se duan të marrin pjesë në zgjedhje përmes koalicionit. Ai kujtoi se ligji ka bërë disa rregullime se për të drejtat dhe detyrimet e partive politike kur hyjnë në koalicion.

Në zgjedhjet e rregullta parlamentare të shkurtit të vitit 2025, morën pjesë 28 subjekte politike, prej të cilave 20 parti politike, 5 koalicione, 2 nisma qytetare dhe 1 kandidat i pavarur.

Ndërkaq, në zgjedhjet e parakohshme parlamentare që u mbajtën në fund të dhjetorit, garuan 24 subjekte politike, prej të cilave 18 parti politike 3 koalicione; 2 iniciativa qytetare dhe 1 kandidat i pavarur./KP

Policia e Kosovës, ka njoftuar se gjatë 24-orëve të fundit janë raportuar tetë raste të dhunës në familje. Të njëjtat, janë raportuar të kenë ndodhur në Obiliq, Graqanicë, Fushë Kosovë, Podujevë, Kaçanik, Malishevë, Rahovec dhe Mitrovicën të Jugut.

Nga Policia, po ashtu është bërë e ditur se, si pasojë e këtyre rasteve, janë arrestuar disa persona.

Raporti i Policisë:

DHUNË NË FAMILJE

Obiliq  01.05.2026 – 12:10. Është raportuar se viktima femër kosovare,  ka pësuar dhunë nga bashkëshorti i saj. Palët janë intervistuar, ndërsa me urdhër të prokurorit rasti procedohet në procedurë në rregullt.

Graqanicë  01.05.2026 – 14:30. Është raportuar se i dyshuari mashkull kosovar i mitur, ka shkaktuar dhunë-probleme në familje. Është njoftuar prokurori dhe nuk raportohet për të arrestuar.

Fushë Kosovë  01.05.2026 – 16:57. Pas një mosmarrëveshje në familje janë rrahur –sulmuar mes veti dy të dyshuar një mashkull dhe një femër–bashkëshort. Palët janë intervistuar dhe me urdhër të prokurorit rasti vazhdon të trajtohet në procedurë të rregullt.

Podujevë  01.05.2026 – 19:00. Është raportuar se viktima femër kosovare,  ka pësuar dhunë nga bashkëshorti i saj. Palët janë intervistuar dhe me urdhër të prokurorit  janë liruar në procedurë të rregullt.

DHUNË NË FAMILJE

Kaçanik  30.04.2026 – 00:00. Është raportuar se një mashkull kosovar është sulmuar fizikisht nda djali i tij. Viktima ka pranuar trajtim mjekësor, ndërsa i dyshuari me vendim të prokurorit është dërguar në mbajtje.

DHUNË NË FAMILJE & MBAJTJE NË PRONËSI  KONTROLL OSE POSEDIM TË PAAUTORIZUAR TË ARMËVE

Malishevë  01.05.2026 – 09:00. Është raportuar se viktima femër kosovare, ka pësuar dhunë nga bashkëshorti i saj i dyshuari mashkull kosovar. Në posedim të personit të dyshuar është  gjetur dhe konfiskuar një pistoletë me gaz. I dyshuari është arrestuar dhe  me vendim të prokurorit është dërguar në mbajtje.

DHUNË NË FAMILJE

Rahovec 01.05.2026 – 18:00. Është arrestuar i dyshuari mashkull kosovar,  pasi që i njëjti nën ndikim të alkoolit, ka shkaktuar dhunë psikike ndaj bashkëshortes së tij dhe tre fëmijëve të tyre duke i dëbuar edhe nga shtëpia. Me vendim të prokurorit i dyshuari është dërguar në mbajtje.

DHUNË NË FAMILJE

Mitrovicë Jugu 01.05.2026 – 03:00. Është arrestuar i dyshuari mashkull kosovar, për shkak se i njëjti kishte sulmuar fizikisht nënën e tij. Viktima ka pranuar trajtim mjekësor, ndërsa i dyshuari  me vendim të prokurorit është dërguar në mbajtje.