Kryeministri i Republikës së Kosovës, Albin Kurti është deklaruar për takimin me emisari amerikan, Gabriel Escobar.
Kurti përmes një postimi në platformën ‘X’ falënderoi Escobarin për angazhimin dhe mbështetjen e ShBA-së, ndërsa shtoi se ekziston nevoja që t’i kërkohet llogari Serbisë për sulmin në Banjskë.
Tutje shtoi, se e ka informuar Escobarin lidhur me hapat që ka ndërmarrë qeveria për çështjen e dinarit.
“Fantastike të takohesh me Zëvendës-Ndihmës Sekretarin Amerikan të Shtetit, Gabriel Escobar. E falënderova për mbështetjen e ShBA-së dhe nevojën që Serbia të mbahet përgjegjëse për sulmin e Banjskës. Gjithashtu e informova për hapat që ka ndërmarrë qeveria dhe gatishmërinë për të mirëpritur sugjerimet”, shkroi Kurti.
Great to meet w/ @StateDept DAS Escobar. Thanked him for 🇺🇲's support and stressed the need to hold Serbia accountable for the Banjska attack. Also informed him of steps our govt has taken to support the transition of @centralbank_ks reg & our readiness to address ongoing issues. pic.twitter.com/hjUsIgJZQF
Emisari i Shteteve të Bashkuara të Amerikës, Gabriel Escobar, ka thënë se marrëdhëniet me kryeministrin Albin Kurti kanë disa sfida për shkak të trajtimit të pakicës serbe. Megjithatë, ai tha se takimi ishte i mirë dhe se SHBA mbetet partneri më i qëndrueshëm dhe më i përkushtuar i Kosovës.
Emisari amerikan, pas takimit me Kurtin, tha se shpreson më shumë fleksibilitet nga Kosova sa i përket rregullores së BQK-së, ku ndalohet dinari serb. Krahas kësaj, ai tha se kryeministri i ka premtuar se do t’i shqyrtojë disa nga propozimet që i ka bërë sot sa i përket zbatimit të rregullores së BQK-së.
Sipas tij, komuniteti serb në Kosovë janë ndikuar negativisht nga rregullorja e BQK-së.
I pyetur mbi qasjen e tij në procesin e dialogut, Escobar tha se një gjë e tillë nuk është e pa balancuar, derisa përmendi mbështetjen ndaj Kosovës për anëtarësim në Këshill të Evropës dhe sigurimin e raketave antitank Javelin.
“Gjithçka që kemi bërë në vitin e fundit ka qenë në favor të Kosovës, kështu që menjëherë pas Ohrit kemi mbështetur kandidaturën tuaj për Këshillin e Evropës, kemi mbështetur proceset tuaja demokratike, përfshirë zgjedhjet në veri, ju qëndruam pranë pas sulmeve të 24 shtatorit dhe ne morëm një vendim për të ndihmuar në sigurimin e Javelin-ëve… Gjithçka që kemi bërë ka qenë për Kosovën dhe ne do të vazhdojmë ta bëjmë këtë… Ndërkohë, ne shpresojmë që Kosova të dëgjojë shqetësimet tona”, përfundoi ai. /kp/
Shefat e Misionit të Francës, Gjermanisë, Italisë, Mbretërisë së Bashkuar, Shteteve të Bashkuara dhe Bashkimit Evropian mirëpresin dhe lavdërojnë veprimin e Qeverisë së Kosovës për zbatimin e vendimit të Gjykatës Kushtetuese të vitit 2016, i cili konfirmoi pronësinë e Manastirit të Deçanit në disa hektarë. të tokës.
“Udhëzimi i Zyrës Qendrore Kadastrale për regjistrimin e kësaj toke në Manastirin e Deçanit dhe sigurimi që ky veprim të ketë përfunduar është një hap i rëndësishëm përpara nga autoritetet kosovare, në përputhje me aspiratat e saj evropiane dhe euroatlantike”.
“Siç e kemi thënë majin e kaluar në përvjetorin e vendimit të Gjykatës Kushtetuese, zbatimi i sundimit të ligjit dhe respektimi i pavarësisë së gjyqësorit janë obligime për të gjitha qeveritë e zgjedhura në mënyrë demokratike dhe parakushte të nevojshme për integrimin e Kosovës në institucionet evropiane dhe euroatlantike”, u tha në këtë deklaratë.
Follow the link and read the Quint Embassies' + EU 🇫🇷🇩🇪🇮🇹🇬🇧🇺🇸🇪🇺 statement on the Implementation of the Registration of the Decani Monastery's land 👇👇👇https://t.co/0EpM9I7Nan
Prania ushtarake e Aleancës Veri-atlantike (NATO) në Kosovë është e domosdoshme për ruajtjen e paqes dhe stabilitetin në tërë rajonin e Ballkanit Perëndimor, thuhet në raportin vjetor të NATO-s, të cilin do ta paraqesë të enjten në Bruksel sekretari i përgjithshëm i aleancës, Jens Stoltenberg.
Në raport theksohet se për vite të tëra misioni paqeruajtës i NATO-s në Kosovë, KFOR, e ka ruajtur një ambient të sigurt dhe lëvizje të lirë për të gjitha komunitetet në Kosovë, në bashkëpunim me organizatat tjera ndërkombëtare si, Bashkimin Evropian, Kombet e Bashkuara dhe të tjerat.
“Në vitin 2023 KFOR-i luajti rolin kyç për të siguruar stabilitet në Kosovë pas rritjes së tensioneve në veri të Kosovës. Pas shpërthimit të dhunës në muajin maj dhe shtator, aleatët dislokuan rreth 1.000 forca rezervë për misionin, që paraqet rritjen më të madhe në një decenieje. Kjo ia ka mundësuar KFOR-it ta trefishojë numrin e patrullimeve dhe ta katërfishojë praninë në veri të Kosovës“, thuhet në raport.
Tensionet në veri të Kosovës filluan të rriten në fund të majit 2023, pasi kryetarët e rinj të komunave Zveçan, Zubin Potok dhe Leposaviq, të shoqëruar nga Policia e Kosovës, hynë në ndërtesat komunale.
Banorët serbë e kundërshtuan këtë dhe organizuan protesta që kulmuan në dhunë më 29 maj në Zveçan, ku u plagosën dhjetëra demonstrues dhe ushtarë të KFOR-it.
Ato u përshkallëzuan disa muaj më vonë, më 24 shtator, kur Policia e Kosovës u sulmua nga një grup serbësh të armatosur në Banjskë të Zveçanit në veri të vendit, ku mbeti i vrarë një polic dhe tre sulmues.
Si rrjedhojë, NATO-ja e shtoi numrin e ushtarëve të saj në misionin paqeruajtës, KFOR, në Kosovë.
Sipas raportit të së enjtes, tani misioni i KFOR-it i ka 4.700 pjesëtarë në Kosovë, përfshirë edhe forcën rezervë.
Në raportin e tij vjetor, Stoltenberg përmend edhe ndihmën që NATO-ja ia ka ofruar organizatave të sigurisë në Kosovë për ndërtimin e kapaciteteve të tyre, sidomos në fushën e logjistikës, mbështetjen mjekësore, prokurim dhe menaxhim të resurseve njerëzore.
Edhe në këtë raport shprehet mbështetje e NATO-s për dialogun e ndërmjetësuar nga Bashkimi Evropian për normalizimin e marrëdhënieve mes Kosovës dhe Serbisë.
“NATO-ja mbetet e përkushtuar në mbështetje të dialogut të lehtësuar nga Bashkimi Evropian mes Beogradit dhe Prishtinës. Dialogu është platforma kryesore për arritjen e zgjidhjes e cila respekton të drejtat e të gjitha komuniteteve dhe ndërtimin e paqes së qëndrueshme, që është në dobi të sigurisë së Kosovës dhe stabilitetit të tërë rajonit të Ballkanit Perëndimorë“, thuhet në raport.
Në këtë raport të hollësishëm përmenden aktivitetet kryesore të NATO-s në vitin e fundit, nga angazhimi për ndihmë Ukrainës për t’u përballur me agresionin e Rusisë, rritja e pranisë në krahun lindorë për të siguruar mbrojtjen e territorit të të gjitha vendeve anëtare, rritja e investimeve për forcimin e kapaciteteve ushtarake të aleancës, deri tek angazhimi në misionet, siç është ai i KFOR-it në Kosovë.
NATO-ja prezanton rregullisht raport vjetor për aktivitetet e veta.
Raporti i prezantuar të enjten në Bruksel konsiderohet i fundit i paraqitur nga sekretari i tanishëm Stoltenberg, pasi pritet që së shpejti, mundësisht para samitit në Uashington në korrik, aleatët të pajtohen për emërimin e pasardhësit të Stoltenbergut. /Radio Evropa e Lirë
Gazeta gjermane Frankfurter Allgemeine Zeitung (FAZ), ka shkruar një artikull rreth zhvillimeve të fundit që kanë të bëjnë me Manastirin e Deçanit dhe mundësinë që Kosova të jetë pjesë e Këshillit të Evropës.
Artikullin e ka titulluar “Një manastir serb supozohet të hapë rrugën drejt Këshillit të Evropës”.
“Qeveria e Kosovës po ndërhyn në emër të një manastiri ortodoks serb në një mosmarrëveshje që vazhdon për më shumë se një dekadë. Arsyeja është se Kosova dëshiron të anëtarësohet në Këshillin e Evropës”, shkruan kjo gazetë gjermane.
“Në qendër të mosmarrëveshjes ishin 24 hektarë pyje dhe tokë bujqësore në afërsi të Manastirit të Deçanit në Kosovën perëndimore. Manastirit i takonte toka sipas disa vendimeve më të larta të gjykatës së Kosovës. Megjithatë, edhe pse Gjykata Supreme (2009) dhe Gjykata Kushtetuese (2016) kishin konfirmuar pretendimin e kishës për tokën, zyra përgjegjëse e regjistrimit të tokës, nën ndryshimin e qeverive kosovare, refuzoi të bënte regjistrimet e regjistrit të tokës në favor të kishës për çështje politike. Arsye”, shkruan kjo gazetë.
Sipas kësaj gazete, kjo mospërfillje e Gjykatës së saj Kushtetuese kohët e fundit ka penguar edhe shanset e suksesit të aplikimit të Kosovës për anëtarësim në Këshillin e Evropës, të cilin shteti ballkanik e ka paraqitur në maj të vitit 2022.
“Të mërkurën, megjithatë, Ministria e Jashtme e Kosovës ka njoftuar Këshillin e Evropës se Zyra e Regjistrimit të Tokave ka bërë regjistrimet e regjistrit të tokës në favor të manastirit me udhëzim të qeverisë. Në të njëjtën kohë, Konsullata e Përgjithshme e Kosovës në Strasburg i dërgoi Këshillit të Evropës një kopje të ekstrakteve të regjistrit të ri të tokës”, shkruan kjo gazetë.
Gazeta gjermane Frankfurter Allgemeine Zeitung, njofton se pritet që Asambleja Parlamentare e Këshillit të Evropës tash te votojë që Kosova të pranohet në Këshillin e Evropës.
“Nëse kjo ndodh, Komiteti i Ministrave të Këshillit të Evropës mund të marrë vendimin përfundimtar për pranimin.
Kreu i qeverisë së Kosovës, Albin Kurti, ka bërë të qartë të mërkurën se pa ndërhyrjen në emër të manastirit do të ishte bllokuar rruga e Kosovës drejt anëtarësimit në Këshillin e Evropës.
Emisari i SHBA-së për Ballkanin Perëndimor, Gabriel Escobar, sot do të takohet me kryeministrin Albin Kurti
Se kryeministri Kurti, do të takohet sot me Escobarin e ka konfirmuar dje, zëdhënësi i Qeverisë, Përparim Kryeziu.
Dje emisari Escobar takoi të parën presidenten Vjosa Osmani në vizitën zyrtare të nisur në Kosovë. Në orën 10:00 ai arriti në Presidencë ku zhvilloi takimin me Osmanin, me të cilën më vonë doli në konferencë për media.
Në krye të fjalimit të tij, Escobar i kushtoi disa fjalë presidentes që duket se ishin mesazh për kryeministrin. Atë e quajti garantuesen kryesore të marrëdhënieve Kosovë-SHBA.
“Faleminderit zonja Presidente për mikpritjen e ngrohtë në Kosovë. Ju jeni garantuesja kryesore dhe trashëgimia e marrëdhënieve bilaterale mes SHBA-së dhe Kosovës dhe faleminderit për këtë. Dua të them se kjo trashëgimi është e bazuar në një përkushtim të qëndrueshëm për sigurinë, integritetin territorial dhe pavarësinë e Kosovës. Pra, ne do të vazhdojmë t’i thellojmë marrëdhëniet tona në të gjitha linjat e interesave”.
Ndërsa nga ora 19:00 ka takuar krerët opozitarë në një takim të përbashkët.
Por, ndërkohë që po zhvillonte takimin me Osmanin u dha një lajm nga kryeministri Kurti në mbledhjen e Qeverisë, të cilin më pas do ta komentonte Escobar.
Kurti njoftoi se i kanë kërkuar Agjencionit të Kadastrit që ta zbatojë vendimin e Gjykatës Kushtetuese që t’ia regjistrojë tokën Manastirit të Deçanit.
Këtë vendim, emisari amerikan e cilësoi si të vështirë, por të nevojshëm. Ai me këtë rast përmendi institucionet e Kosovës.
“Dua ta përmend sa me rëndësi është vendimi i sotëm për Manastirin. Ishte vendim i vështirë, por i nevojshëm dhe i falënderojmë institucionet për gjithë bashkëpunim”.
Një ditë para se të vijë në Kosovë, të martën Escobar nga Brukseli pati disa vërejtje të ashpra për komunikimin diplomatik me Kurtin, duke pranuar se ka çarje.
“Partneriteti në mes të Shteteve të Bashkuara dhe Kosovës është mes popullit amerikan dhe atij të Kosovës, nuk depërton përmes një njeriu në Kosovë, apo një partie. Mirëpo, më duhet të them që aktualisht kemi probleme në komunikim me kryeministrin”.
Madje, Escobar shtoi se jo vetëm SHBA-ja ka probleme në komunikim, por është problem që e ka Kosova edhe me BE-në, NATO-n, Mbretërinë e Bashkuar dhe më shumë partnerë, përfshirë Shqipërinë dhe Maqedoninë e Veriut.
Emisari amerikan zbuloi arsyen e vizitës së tij në Kosovë kur u pyet se pse nuk po shkon në Maqedoninë e Veriut.
“Situata në Kosovë është e tmerrshme, prandaj më duhet ta vizitoj Kosovën”.
Këtu ai iu referua edhe situatës me dinarin, vendimin për të cilin e cilësoi “katastrofik” dhe “jokompetent”.
Escobar ka përsëritur që Shtetet e Bashkuara nuk e kundërshtojnë legjitimitetin e vendimit, mirëpo kanë probleme me mënyrën e zbatimit dhe për ndikimin që ka te komuniteti serb.
Kuvendi i Kosovës sot mban seancë të jashtëzakonshme.
Seanca pritet të fillojë nga ora 10:00.
Ndërkaq, në këtë seancë pritet të shqyrtohet Propozim-rezoluta për numrin e madh të kontratave njëburimore të nënshkruara gjatë mandatit të Qeverisë Kurti.
Agjencia Kadastrale e Kosovës tashmë e ka lejen e qeverisë që ta zbatojë vendimin e Gjykatës Kushtetuese, për pronat në favor të Manastirit Ortodoks të Deçanit.
Këtë e tregoi kryeministri Albin Kurti, të mërkurën. Tha se është prirë nga arsyeja e shëndoshë, për ta përmbushur një nga kushtet në rrugën drejt anëtarësimit në Këshillin e Evropës.
Për të treguar që po vepron jashtë vullnetit, e përsëriti qëndrimin e tij personal për 24 hektarët e kontestuar për shumë vite.
“Nuk do ta ndryshoj qëndrimin ndaj këtij vendimi të dëmshëm asnjëherë, por në anën tjetër nuk ka dyshim që anëtarësimi i Kosovës në KiE, do të ishte fitore historike dhe hap gjigand për Kosovën drejt njohjes nga pesëshja evropiane që mundëson anëtarësimin në NATO dhe BE”, tha Kurti.
Më 2016, Gjykata Kushtetuese vendosi pro Manastirit të Deçanit si pronare e tokës dhe pyllit, që pretendohej se ishin të kompanive shoqërore “Apiko” dhe “Iliria”.
Ky vendim i organit më të lartë kushtetues, sipas Kurtit, e lë institucionin që ky e drejton, pa mundësi për ta anuluar.
“Si kryeministër i Kosovës nuk më pëlqen ai vendim i çuditshëm, e i padrejtë e ndërkohë ka edhe procese gjyqësore tjera pezull për këtë çështje teksa ne si qeveri nuk kemi më mjete legale e juridike për të anuluar vendimin e Gjykatës Kushtetuese”, tha Kurti.
Kurti shtoi se vartësja e saj, kryediplomatja Donika Gërvalla, tashmë i ka dërguar notë verbale njoftuese Këshillit të Evropës. Muajt në vijim do të jenë determinues për anëtarësimin e Kosovës në këtë institucion evropian, ku kishte aplikuar në maj të 2022-ës.
Kundër kryeministrit doli kryetari i Deçanit, Bashkim Ramosaj, i cili tha se AKK-ja tashmë e ka zbatuar vendimin.
“Deçani përsëri goditet padrejtësisht, kësaj radhe nga një Urdhër Ekzekutiv i Kryeministrit të Republikës së Kosovës, z. Albin Kurti! Vendimi i Gjykatës Kushtetuese i vitit 2016, për 24 hektar të pronave, i cili vendim u zbatua sot, nga Agjencioni Kadastral i Kosovës me urdhëresë të Kryeministrit. Qe tri vite po pres që ky Kryeministër të më takojë një herë të vetme, për të diskutuar edhe për këtë temë për të cilën dha Urdhër Ekzekutiv sot!”, thuhet në reagimin e Ramosajt.
Kritika patën edhe deputetët opozitarë, që e akuzuan Kurtin për ndryshim të qëndrimit të kahershëm. Ndryshe nga këta, vendimin e përshëndeti edhe emisari amerikan, Gabriel Escobar, që qëlloi në Prishtinë në kohën kur u kumtua.
“Ishte një hap i vështirë, por i nevojshëm, ne i falënderojmë institucionet e Kosovës për gjithë bashkëpunimin në këtë çështje”, ka deklaruar Escobar.
Shtetet e Bashkuara dhe Bashkimi Evropian vazhdimisht kanë kërkuar nga Kosova zbatimin e aktgjykimit të Kushtetueses.
Prandaj shefi i Zyrës së BE-së në Prishtinë, Tomas Szunyog, tha se u bë realitet pritja e gjatë. Edhe ambasadori gjerman, Jorn Rohde, tha se zbatimi i vendimit është shumë i vonuar, por shënon hap të rëndësishëm në sundimin e ligjit.
Dioqeza Rashkë-Prizren dhe Manastiri i Deçanit nuk kanë reaguar për këto zhvillime, deri pasditen e së mërkurës.
Në Administratën Tatimore të Kosovës, u deklaruan si sponsorisim. Edhe pse u raportuan si të tilla, mbi 490 mijë euro, në të vërtetë nuk u transferuan kurrë te klubet sportive në Kosovë.
Këto të dhëna i bëri publike Zyra Kombëtare e Auditimit, në raportin “Efektiviteti i fondeve për financimin e sportit”, që mbulon periudhën kohore 2020-2024.
“Sponsorizimi dhe lirimi i 30% të tatimit në fitim për kompanitë private, ka rezultuar me shmangie tatimore. Nga 45 mostrat e testuara kemi gjetur se mbi 490 mijë euro nuk janë transferuar fare te klubet sportive si sponsorizim nga kompanitë private, edhe pse në Administratën Tatimore të Kosovës kompanitë kishin raportuar se i kishin dhënë këto mjete për sponsorizim. Për më tepër këto kompani sponsorizuese janë liruar nga tatimi dhe si rrjedhojë nuk i kanë paguar tatim shtetit”, tha Vlora Spanca, auditore e përgjithshme.
ZKA-ja konstaton se gjatë kësaj periudhe, Ministria e Kulturës, Rinisë dhe Sportit, ka subvencionuar organizatat sportive me 3.5 milionë euro.
Megjithatë, ata që i pranuan paratë nuk i raportuan Ministrisë si u shpenzuan.
“Organizatat sportive gjatë viteve 2020-2022, nuk kanë raportuar për shpenzimet e subvencioneve në vlerë prej 3.5 milionë eurove, të financuara nga MKRS-ja. Përveç financimeve me memorandume dhe me thirrje, MKRS-ja financon organizatat sportive edhe pa thirrje publike, vetëm me kërkesa drejtuar Ministrisë, formë të cilën nuk e ka të paraparë në ligje dhe rregullore”, tha Spanca.
Kështu, ZKA-ja dha disa rekomandime për MKRS-në dhe ATK-në.
“Për adresimin e këtyre çështjeve të trajtuara në raport, nga ZKA-ja janë dhënë 10 rekomandime për dy institucione. 6 rekomandime për MKRS-në, 2 rekomandime për ATK-në dhe 2 të përbashkëta për të dy institucionet”, tha Spanca.
Ndërkaq, në raportin “Menaxhimi i licencave në Komisionin e Pavarur për Media”, thuhet se shumica e mediave veprojnë pa i përmbushur obligimet financiare të tarifave vjetore gjatë viteve, dhe masat ligjore ndaj tyre nuk zbatohen nga Komisioni i Pavarur i Mediave.
Në mars, Auditori i Përgjithshëm ka publikuar gjithsej pesë raporte.
ZKA-ja synon që gjatë vitit 2024, të realizojë 123 auditime që do të mbulojnë fusha të ndryshme.
Brenda këtij lokali në qendër të Klinës në gusht të 2023-tës, ishte vrarë Anton Prelaj.
Ndaj të dyshuarit kryesor Tush Frrokaj, i cili ishte dorëzuar në polici një javë pas rastit, vetëm tani është ngritur aktakuzë e cila e rëndon për disa vepra penale.
“Për shkak të dyshimit të bazuar mirë se i njëjti ka kryer 4 vepra penale: vrasje e rëndë. Armëmbajtje pa leje. Shtrëngim. Marrja në posedim e pasurisë së paluajtshme”, tha prokurori Ersan Qavolli.
I pandehuri dhe viktima kishin për bashkëshorte, motrat e njëri-tjetrit. Por, sipas aktakuzës Tush Frrokaj ishte i ndarë nga gruaja e tij dhe në tentativë për t’u bashkuar e kishte takuar viktimën.
Por, çka u bisedua në këtë takim?
“Në orën 16:26 minuta, në atë lokal shkon i pandehuri Tush, e shikon të ndjerin që të dalë jashtë lokalit, ku edhe bisedojnë për rreth 20 minuta, më pas i ndjeri në ora 16:47, kthehet në tavolinën e tij ku i thotë i dëmtuarit Fatmir, “Tushi po dëshiron që të bashkohet prapë me gruan e vet që ishin ndarë…”.
Pas largimit nga vendi i ngjarjes, Frrokaj e kishte zhdukur armën, e cila ende nuk është gjetur.
“Fatkeqësisht armën nuk e kemi gjetur. Por me rastin e ekzaminimit balistik, ka rezultuar një model i armës, të cilën e ka pranuar i pandehuri. Fakti që arma nuk është gjetur, do të përdoret si rrethanë rënduese nëse i njëjti shpallet fajtor”, tha prokurori Ersan Qavolli.
Krahas armës, si rrethanë rënduese do të llogaritet edhe e kaluara kriminale e të pandehurit, i cili ishte dënuar dy herë për shpërdorim të pasurisë së huaj.
Bazuar në të dhënat që posedojnë, Prokurori është i bindur se i akuzuari duhet të shpallet fajtor.
“Jemi mëse të bindur se me provat e siguruara, duhet të shpallet fajtor…”, tha Qavolli.
Gëzim Baloku, avokat i të pandehurit, nuk ka pranuar të deklarohet lidhur me aktakuzën. Gjatë kohës sa ishte në arrati, 49-vjeçari përkohësisht ishte strehuar edhe në këtë objekt në fshatin Burojë të Skenderajt.
