Tag: Ballina

Incidenti i mesditës së djeshme në qytetin e Skenderajt nga ku mbetën të lënduar kryetari i degës së Vetëvendosjes, zëvendësministri Hysni Mehani dhe aktivisti Bahri Zabeli, nxiti tensione në mbrëmje mes policisë e qytetarëve në këtë qytet pas vendosjes së Njësisë Speciale. Vetëvendosje pretendoi se anëtarët e saj u sulmuan nga kryetari i Skenderajt, Sami Lushtaku, i cili e mohoi duke thënë se qytetarët reaguan pas thirrjes “Sami Serbia”. Policia njoftoi se dy persona u arrestuan për këtë rast, ndërsa për intervistim u ftuan dy të tjerë, përfshirë Lushtakun, që deri në njoftim thanë se nuk iu përgjigjen thirrjes.

Qytetarët e Skenderajt mbrëmë dolën në rrugë për të kundërshtuar prezencën e Njësisë Speciale të Policisë së Kosovës pasi atë e lidhën me incidentin ku u përfshi kryetari Lushtaku e zëvendësministri Mehani.

Drejtoresha e Policisë për rajonin e Mitrovicës, Afërdita Mikullovci, tha se vendosja e Njësisë Speciale ishte çështje rutinore dhe operative, e lidhur me kontrolle dhe aktivitete policore të zakonshme.

Por, këtë version s’e pranuan qytetarët, të cilët praninë e policisë e panë si presion politik.

Në ballë të qytetarëve doli ish-deputetja Ganimete Musliu, e cila kërkoi sqarim nga policia se pse ndodhën aty.

Ajo telefonoi policinë për të marrë përgjigje për këtë.

“Një pjesë e Njësisë Speciale e kanë vetëm plan operativ për shkak se është vera duke u afruar dhe ka më shumë qarkullim të automjeteve, nuk është asgjë për t’u shqetësuar”, i tha zyrtarja në telefon, të cilin Musliu e kishte vendosur me zë të lartë për ta regjistruar edhe mediat që ishin prezente.

Megjithatë, Musliu këtë përgjigje e mori si “tallje me qytetarët e Skenderajt”.

Përveç saj për situatën e krijuar reagoi edhe nënkryetari i Skenderajt, Fadil Nura, i cili e përshkroi si “atmosferë shtetrrethimi”.

“Sonte, në mesnatë, në Sheshin e Lirisë “Adem Jashari” në Skenderaj, shumëkush mund të ndiejë peshën e një simbolike të rëndë. Jo sepse historia po përsëritet, e as sepse kohët janë të njëjta, por sepse çdo atmosferë tensioni e shtetrrethimi në këtë qytet zgjon kujtime që ky vend i ka paguar shtrenjtë. Kur qytetarët fillojnë të ndiejnë presion aty ku duhet të ndiejnë liri, atëherë çdo pushtet duhet të reflektojë”.

Pas disa orësh tensione dhe grumbullimi të qytetarëve, Njësia Speciale dhe forcat tjera policore u larguan nga Skenderaj në orët e para të mëngjesit, ndërsa qytetarët paralajmëruan reagime të tjera edhe gjatë ditës së sotme.

Këtë mëngjes një reagim erdhi nga kryetari i PDK’së, Bedri Hamza, i cili tha se mbrëmë “pamë skena aspak të mira”.

Ai tha se Policia e Kosovës, me urdhër të Qeverisë, dërgoi njësi speciale në Drenicë “me prapavija presioni dhe demonstrimi force”.

Hamza ia la edhe një porosi kryeministrit në detyrë, Albin Kurti.

“E porosis kryeministrin në detyrë të ndërpresë propagandën, të ndërpresë urrejtjen dhe, para së gjithash, t’i ndalë menjëherë provokimet dhe keqpërdorimin e shtetit për skenarë të tij partiakë. Ai nuk mund ta parandalojë braktisjen nga votuesit me skenarë të rrezikshëm përçarës. Ndalu, Albin”, shkroi Hamza.

Ai iu bëri thirrje votuesve të PDK’së dhe nga të gjithë qytetarët ta ruajnë gjakftohtësinë dhe të fokusohen në datën 7 qershor.

“Aty do ta japim me votë përgjigjen tonë ndaj politikës së përçarjes”.

Ndërkaq, Organizata e Veteranëve të Luftës së UÇK-së ka ftuar konferencë për media, e cila pritet të mbahet në zyrat e kësaj organizate në Skenderaj nga ora 10:30.

Për incidentin e djeshëm, Prokuroria Themelore në Mitrovicë doli me një komunikatë ku sqaroi veprimet që kanë ndërmarrë.

“Prokuroria Themelore në Mitrovicë njofton opinionin publik se përkitazi me rastin e sotëm në Skenderaj, ku si pasojë e sulmit fizik, lëndime të lehta trupore kanë pësuar dy persona me iniciale H.M., dhe B.Z., prokurori kujdestar i Prokurorisë Themelore në Mitrovicë ka qëndruar gjatë tërë ditës në Skenderaj, ku së bashku me policinë janë mbledhur prova relevante lidhur me rastin. Po ashtu, janë intervistuar në cilësinë e viktimave H.M., dhe B.Z., pesë (5) dëshmitarë si dhe dy (2) të dyshuar me iniciale E.L., dhe B.N., të cilët me vendim të prokurorit janë dërguar në mbajtje për dyzetë e tetë (48) orë, me dyshimin për kryerjen e veprës penale “Lëndimi i lehtë trupor”. Ndërkaq, dy (2) të dyshuar tjerë për këtë rast me iniciale S.L., dhe K.H., deri në këto momente nuk i janë përgjigjur ftesës për intervistim”, tha dje prokuroria.

Ka nisur hetimi për rastin e djeshëm në minierën “Trepça” në Stan-Tërg, ku 18 minatorë mbetën të ngujuar për mbi 12 orë në thellësi rreth 800 metra.

Policia e Kosovës ka bërë të ditur se është njoftuar prokurori dhe se rasti është nën hetime.

“Dy ankuesit meshkuj kosovarë, një zyrtar dhe drejtori i minierës “Trepça”, kanë raportuar se si pasojë e këputjes së një kabllo të rrufepritësit është shkaktuar një zjarr i cili ka dëmtuar në tërësi një trafo të rrymës duke e lënë pa rrymë minierën. Si pasojë, lifti për bartjen e minatorëve ka dalë jashtë funksionimit dhe në minierë kanë mbetur 48 punëtorë. Në vendin e ngjarjes kanë dalë njësitë përkatëse policore, emergjenca dhe zjarrfikësit. Minatorët kanë dalë nga miniera në gjendje të mirë shëndetësore. Lidhur me rastin është njoftuar prokurori. Rasti nën hetime”, thuhet në raportin e PK-së.

Të gjithë minatorët kanë arritur të dalin nga miniera në gjendje të mirë shëndetësore, disa përmes daljeve emergjente.

Ministria e Industrisë, Ndërmarrësisë dhe Tregtisë ka publikuar çmimet maksimale të lejuara për derivatet e naftës, të vlefshme për datën 15.05.2026.

Sipas njoftimit zyrtar, çmimi i naftës (dizelit) është shtrenjtuar për 1 cent krahasuar me ditën paraprake, duke arritur në 1.60 euro për litër.

Ndërkohë, benzina do të tregtohet me çmim maksimal prej 1.50 euro për litër, ndërsa gazi me 0.76 euro për litër.

Këto çmime hyjnë në fuqi nga ora 10:00.

Qytetarët mund t’i adresojnë ankesat e tyre përmes emailit [email protected] ose në numrin e telefonit 0800 11000.

Drejtoria e Arsimit ka njoftuar se ka filluar procesi i regjistrimit të nxënësve në klasën e parë dhe në klasën parafillore për vitin e ri shkollor.

Sipas njoftimit, procedurat e regjistrimit të fëmijëve në klasën e parë do të zhvillohen nga 15 maji deri më 15 qershor për vitin shkollor 2026/2027.

Me këtë rast, drejtori i Arsimit, Arianit Elshani, u ka uruar fëmijëve që do ta nisin rrugëtimin e tyre në parafillore dhe fillore një fillim të mbarë dhe suksese në procesin mësimor.

“Drejtori i Arsimit, z. Arianit Elshani, u uron të gjithë nxënësve që do të nisin rrugëtimin e tyre në klasën parafillore dhe fillore një fillim të mbarë, shumë suksese dhe një përvojë të suksesshme në bankat shkollore”, thuhet në njoftim.

Drejtoria e Arsimit ka bërë të ditur se procesi do të përcillet dhe monitorohet nga sektori përkatës në Drejtorinë e Arsimit, ndërsa prindërit janë ftuar të ndjekin udhëzimet dhe afatet e përcaktuara për regjistrim.

Kryetari i Partia Demokratike e Kosovës, Bedri Hamza, ka reaguar pas zhvillimeve të mbrëmshme në Skenderaj, duke akuzuar Qeverinë e Kosovës për presion dhe demonstrim force përmes angazhimit të njësive speciale të Policisë së Kosovës në rajonin e Drenicës.

Hamza tha se mbrëmë janë parë “skena aspak të mira”, derisa sipas tij, Policia e Kosovës ka vepruar me urdhër të Qeverisë.

“Mbrëmë pamë skena aspak të mira, ku Policia e Kosovës, me urdhër të Qeverisë, dërgoi njësi speciale në Drenicë me prapavija presioni dhe demonstrimi force”, deklaroi Hamza.

Ai i bëri thirrje kryeministrit në detyrë, Albin Kurti, që të ndalë, siç u shpreh ai, propagandën, gjuhën e urrejtjes dhe provokimet politike.

“E porosis kryeministrin në detyrë të ndërpresë propagandën, të ndërpresë urrejtjen dhe, para së gjithash, t’i ndalë menjëherë provokimet dhe keqpërdorimin e shtetit për skenarë të tij partiakë”, tha kreu i PDK-së.

Hamza shtoi se, sipas tij, “nuk mund të parandalohet braktisja nga votuesit me skenarë të rrezikshëm përçarës”.

“Ndalu, Albin”, shkruan ai.

Hamza u bëri thirrje votuesve të PDK-së dhe qytetarëve që të ruajnë qetësinë dhe të fokusohen tek zgjedhjet e 7 qershorit.

Kandidatja për presidente nga Lidhja Demokratike e Kosovës, Vjosa Osmani, ka deklaruar se Kosova nuk do të mund t’ia shpaguajë kurrë diasporës gjithë kontributin që ka dhënë ndër vite për vendin.

Në emisionin “Rubikon”, Osmani tha se mërgata ka pasur rol kyç në periudha të rëndësishme të historisë së Kosovës, duke përmendur lobimin ndërkombëtar, luftën për çlirim dhe mbështetjen pas luftës.

“Nuk besoj se ndonjëherë do të mund t’ia shpaguajmë mërgatës sonë gjithë atë që ka bërë për Kosovën. Kosova kurrë nuk do të mund t’i hapte dyert në Shtëpinë e Bardhë pa kontributin e mërgatës sonë në vitet e ’90-ta. Po ashtu, Kosova nuk do të arrinte kurrë çlirimin pa ata djem e vajza që lanë jetën komode në shtetet perëndimore dhe erdhën për të dhënë jetën për Kosovën”, tha Osmani.

Ajo njëherësh tha se diaspora ka ndihmuar edhe në rindërtimin e vendit pas luftës dhe vazhdon të japë kontribut të jashtëzakonshëm edhe sot.

“Sikur të mos ishte mobilizimi i menjëhershëm i mërgatës, Kosova nuk do ta kishte kaluar aq lehtë periudhën e pasluftës dhe shkatërrimet që la pas lufta dhe gjenocidi serb. Edhe sot, ata vazhdojnë të japin kontribut të jashtëzakonshëm për vendin. I dua me gjithë zemër. Le të votojnë kë të duan. Me rëndësi është që sot të gjithë votojmë në liri”, deklaroi Osmani.

Sefte”, të paktën si komisionere për zgjerim do t`ia bëjë sot.

Përfaqësuesja e lartë e Bashkimit Evropian, Marta Kos, më 15 maj pritet të realizojë një vizitë për herë të parë në Kosovë, që kur mori detyrën nga 1 dhjetori i 2024-ës.

Ajo fillimisht do të zhvillojë takim me ushtruesen e detyrës së presidentes, Albulena Haxhiu.

Takimi do të mbahet nga ora 10:00.

Kurse, pas rreth gjysmë ore, ajo do të pritet edhe nga kryeministri në detyrë i Kosovës, Albin Kurti.

Sipas njoftimit, takimi do të zhvillohet nga ora 10:30.

Pas takimi të dy së bashkë do të mbajnë një konferecë për media.

Moszgjedhja e kreut të ri të shtetit në Kosovë shtoi paqëndrueshmërinë institucionale në vend këtë vit, duke nxitur zgjedhje të reja parlamentare pas një viti të humbur më 2025.

Dhe, ky jostabilitet mund të thellohet në mungesë të kandidatëve të qartë për postin e presidentit, dhe të pagatishmërisë së partive politike për të bërë lëshime.

Pavarësisht se nuk zgjidhet drejtpërdrejt nga qytetarët, a do të mundë të lehtësohej emërimi i një presidenti të ri nëse partitë paraqesin nga një kandidat para zgjedhjeve të parakohshme të 7 qershorit?

Cilat parti kanë paraqitur kandidat për president?
Vetëm Lidhja Demokratike e Kosovës (LDK) në opozitë ka bërë të ditur se bartësja e listës së saj zgjedhore, Vjosa Osmani, në kuadër të një bashkëpunimi parazgjedhor, do të jetë kandidate e saj për presidente.

Osmani kërkon një mandat të dytë në krye të shtetit, pas dështimit për t’u rikandiduar në prill.

Partitë e tjera të mëdha, si Lëvizja Vetëvendosje (LVV) në pushtet dhe partia kryesore opozitare, Partia Demokratike e Kosovës (PDK), nuk kanë paraqitur kandidatë.

Derisa partitë nuk janë të obliguara ta paraqesin ndonjë kandidat për president para zgjedhjeve, ato do të duhej të zotoheshin së paku për karakteristikat e profilit të kandidatit për president, apo për parimet të cilat do t’i udhëhiqnin në arritjen e një konsensusi politik, thotë Agon Maliqi, njohës i çështjeve politike në Kosovë.

“Duhet t’i sqarojnë saktë rrethanat në të cilat ata do të ishin dakord për një president, dhe cilat karakteristika duhet t’i ketë ai president, në mënyrë që të shmangen sërish zgjedhjet. Në bazë të këtij zotimi pastaj mund të kërkohet llogaridhënie prej tyre pas zgjedhjeve”, shprehet Maliqi për Radon Evropa e Lirë (REL).

Në praktikë, kjo do të nënkuptonte më shumë transparencë politike para zgjedhjeve dhe më pak improvizim pas tyre.

Pse LDK po, e partitë e tjera jo?
As partia në pushtet e kryeministrit në detyrë, Albin Kurti, e as PDK-ja nuk iu përgjigjën pyetjeve të REL-it nëse do ta bëjnë të ditur ndonjë kandidat të tyrin për presidentin e ardhshëm të Kosovës.

Maliqi beson se LDK-ja e paraqiti kandidatin për shkak të “rrethanave specifike” të ish-presidentes Osmani, ndërsa partitë e tjera nuk po e bëjnë sepse s’e kanë kandidatin e qartë, e as s’e ndiejnë ngutësinë për ta bërë tani.

“Mendoj se LDK-ja e ka bërë, me gjasë, nga bindja se narracioni i viktimizimit të saj nga ana e Kurtit mund të ngjallë emocione te një lloj votuesi, i cili në dhjetor ka votuar për LVV-në për shkak të binomit Kurti-Osmani, dhe jo vetëm për Kurtin”, shpjegon Maliqi.

Edhe sikur të kishte kandidatura tani, sipas Maliqit, ato do të mundë të dukeshin “artificiale”.

Ai argumenton se veçanërisht kur bëhet fjalë për presidentin – në mos edhe për pozita të tjera – do të ketë nevojë për lëshime mes partive.

Sepse zgjedhja e presidentit në Kosovë rrallëherë është proces që zgjidhet nga rezultati elektoral – ajo zakonisht kërkon marrëveshje politike, kompromis dhe lëshime ndërmjet partive.

Pikërisht këtu qëndron problemi kryesor: partitë po hyjnë në zgjedhje pa asnjë marrëveshje minimale për postin që mund ta përcaktojë stabilitetin institucional të vendit për vitet e ardhshme.

Një proces që kërkon kompromis
Kosova ka vuajtur nga mungesa e kompromiseve mes partive në vitet e fundit dhe zgjedhja e presidentit në këtë kohë duket detyrë jo edhe aq e lehtë.

Vendi e humbi tërë vitin 2025 si pasojë e mosthemelimit të Kuvendit fillimisht, e pastaj të Qeverisë, në mungesë të konsensuseve – dhe zgjedhjet po mbahen sërish brenda një kohe të shkurtër, për shkak të mospajtimeve për presidentin, pa asnjë garanci se çfarë do të ndodhë tutje.

LVV-ja, në pushtet që nga viti 2021, shihet sërish favorite për t’i fituar zgjedhjet, por ajo nuk parashihet t’i marrë vetë 80 vende në Kuvendin me 120 sosh.

Që votimi për presidentin e Kosovës të jetë i vlefshëm, nevojitet prania e 2/3 të të gjithë deputetëve në Kuvend.

Ehat Miftaraj, nga Instituti i Kosovës për Drejtësi, thotë për Radion Evropa e Lirë se Kosovës po i mungon një debat i mirëfilltë politik ndërmjet pozitës dhe opozitës për tema strategjike shtetërore, përfshirë edhe çështjen e presidentit.

“Në këtë aspekt, zgjedhja e presidentit në Kosovë duhet të shihet si proces që kërkon komunikim politik, kompromis demokratik, dhe transparencë ndaj publikut, e jo si çështje që adresohet përmes listave të dëshirave apo imponimit”, thekson Miftaraj.

Për të gjitha krizat institucionale brenda një viti e gjysmë, partia në pushtet dhe ato në opozitë e kanë fajësuar njëra-tjetrën.

Në fund, presidenti i ardhshëm mund të mos përcaktohet nga emrat që partitë shpallin para zgjedhjeve, por nga gatishmëria e tyre për kompromis kur të përballen me realitetin parlamentar pas 7 qershorit.

Deri në zgjedhjen e presidentit, funksionin do të vazhdojë ta ushtrojë Albulena Haxhiu, detyra gjashtëmujore e së cilës zgjat më së largu deri në tetor.

Prokuroria Themelore në Mitrovicë ka njoftuar se kryetari i Komunës së Skenderajt, Sami Lushtaku, nuk i është përgjigjur ftesës për intervistim lidhur me një incident të raportuar që përfshin sulm ndaj zëvendësministrit Mehani.

Sipas Prokurorisë, lidhur me këtë rast janë ndërmarrë veprimet e nevojshme hetimore, ndërsa dy persona janë ndaluar në lidhje me ngjarjen.

Prokuroria ka bërë të ditur se prokurori kujdestar ka qëndruar gjatë gjithë ditës në vendin e ngjarjes në Skenderaj, në bashkëpunim me Policinë e Kosovës, ku janë mbledhur prova relevante për zbardhjen e rastit.

“Lidhur me rastin e sotëm në Skenderaj, ku si pasojë e sulmit fizik, lëndime të lehta trupore kanë pësuar dy persona me iniciale H.M. dhe B.Z., prokurori kujdestar ka qëndruar gjatë tërë ditës në Skenderaj, ku së bashku me policinë janë mbledhur prova relevante lidhur me rastin,” thuhet në njoftim.

Po ashtu, Prokuroria ka bërë të ditur se janë intervistuar viktimat dhe disa dëshmitarë të rastit.

“Janë intervistuar në cilësinë e viktimave H.M. dhe B.Z., pesë (5) dëshmitarë si dhe dy (2) të dyshuar me iniciale E.L. dhe B.N., të cilët me vendim të prokurorit janë dërguar në mbajtje për 48 orë, me dyshimin për kryerjen e veprës penale ‘Lëndimi i lehtë trupor’,” thuhet më tej.

Ndërkohë, dy persona të tjerë të dyshuar, me iniciale S.L. dhe K.H., ende nuk i janë përgjigjur ftesës për intervistim.

Kandidatja për presidente, Vjosa Osmani ka kritikuar ashpër qasjen e kryeministrit Albin Kurti, lidhur me pjesëmarrjen e saj në konferencën për Bordin e Paqes.

Këto deklarata, Osmani i ka bërë në Rubikon të Klan Kosovës, e cila së bashku me kryetarin e LDK-së, Lumir Abdixhiku kanë bërë paraqitjen e tyre të parë pas bashkimit të tyre për zgjedhjet e 7 qershorit.

Osmani ka thënë se ka qenë qesharake dhe e paparë në historinë e Kosovës, pengesa që i është bërë asaj lidhur me marrëveshjen për Bordin e Paqes, ku i pranishëm ka qenë edhe presidenti amerikan, Donald Trump.

“Aty ka pasur tendenca për pengesa për marrëveshjen për Bordin e Paqes. Ka pasur një tendencë të paprecentë, të natyrës që donin në Kuvend ta ndryshonin tekstin e marrëveshjes e cila lëre që është në kundërshtim të plotë me të drejtën dhe praktikën ndërkombëtare dhe është e paprecendetë që nuk ka ndodhur asnjëherë në historinë e Kosovës. Është qesharake, është padituri e përmasave që unë nuk e kam parë, e as lexuar asnjëherë askund.”, ka thënë Osmani.

Ajo ka thënë se lidhur me këtë marrëveshje ka ftuar në takim Kurtin.

“Përkundër faktit që unë e kam ftuar në takime Kurtin që të bisedojmë për një gjë të tillë. Unë jam informuar nga grupi parlamentar i GUXO-s dhe ata kanë thënë se ai ka thënë se ka qenë i gabim madh që Vjosa Osmani është ulur në atë tryezë me Donald Trump. Sepse sipas tyre qenka dashur që ne mos të dukemi aty dhe që të jemi komplet jashtë radarit të SHBA-së.”, ka thënë tutje kandidatja për president.

Ajo ka thënë se kjo administratë e SHBA-së është më pro Kosovës që vendi ka pasur të paktën që nga viti 2008 e tutje.