Tag: Ballina

Në ditën e dytë të Forumit Ndërkombëtar për Gratë, Paqen dhe Sigurinë, është mbajtur një minutë heshtje në nderim të gruas e cila u vra sot nga bashkëshorti i saj në Pejë.

Kryetari i Kuvendit të Kosovës Glauk Konjufca, ka thënë se është i nevojshëm konsolidimi i menjëhershëm i mekanizmave të sigurisë dhe gjyqësisë që raste të tilla më të mos ndodhin.

“Sot u zgjuam me një lajm të trishtueshëm, vrasja edhe e një gruaje tjetër në qytetin e Pejës. Ajo që duhet të ndodhë është bëhet konsolidimi i mekanizmave tanë të sigurisë dhe gjyqësisë që raste të tilla më të mos ndodhin. Me qenë se shumica e rasteve që po ndodhin në Kosovës, dhuna e ushtruar ndaj tyre është kryesisht prej personave edhe më herët kanë pasur raste penal, raste të shkeljeve të rënda dhe sistemi i drejtësisë me shumë lehtësi i liron ata dhe pastaj kjo është parapërgatitje edhe për raste me të rënda siç ishin rastet e dy vrasjeve këtë në Kosovë. Është vërtetë mirë që jemi bashkë për të biseduar për këtë temë kaq të rëndësishme. Këtë edicion e bën edhe më domethënës periudha kur po mbahet në javën kur Kosova ka ditën që i kushtohet dhunës seksuale gjatë luftës së fundit në Kosovë. Rreth 20 mijë gra u dhunuan gjatë luftës së fundit në Kosovë. Këto janë dëshmia e vuajtjes sonë të vazhdueshme. Kurajo dhe forca e viktimave të këtij krimi për ta ngritur zërin është një frymëzim i jashtëzakonshëm për të gjithë ne. Ato përveq dhimbjes që i kanë përcjellur përballen vazhdimisht edhe me stigmën shoqërisë dhe mungesën e padurueshme të drejtësisë përderisa kryerësit e krimeve nuk e kanë marrë dënimin e merituar”, ka thënë ai.

Presidentja e Kosovës, Vjosa Osmani, ka reaguar pas vrasjes të një gruaje nga bashkëshorti i saj në Pejë.

E para e vendit ka thënë se ky fenomen i tmerrshëm dhe femicidi duhet të ndalet njëherë e përgjthmonë e me çdo kusht.

Ajo u bëri thirrje institucioneve të vendit, atyre të sigurisë dhe drejtësisë që të angazhohet për të ndalur dhunën mbi baza gjinore.

“Fatkeqësisht sot të gjithë jemi zgjuar sot në mëngjesë me lajmin e tmerrshëm për vrasjen edhe të një gruaje nga bashkëshorti i saj. Ky fenomen i tmerrshëm që po plagos shoqërinë dhe shtetin tonë, ky femicid me përmasa të jashtëzakonshme duhet të ndalet me çdo kusht. Mënyra e vetmë për të ndalë atë është nëse rizgjohemi të gjithë si shoqëri, si shtet dhe si komb. Duhet të çohemi në këmbë kundër këtij fenomeni sepse nuk kemi jetë vajzash dhe gra për të humbur. Prandaj i bëj thirrje të gjithëve që të ndalim njëherë e përgjithmonë dhunën mbi bazë gjinore”, tha ajo.

Osmani këto komente i bëri pasi mori pjesë në iniciativën “Thinking of you”, në kuadër të Forumit për Gratë, Paqen dhe Sigurinë.

Presidentja tha se ky instalacion do të ndërkombëtarizohet pasi është mënyra më artistike për të shprehur dhimbjen, solidaritetin dhe mbi të gjitha për të shprehur fuqinë e jashtëzakonshme të gruas së Kosovës.

“Thinking of you” si instalacion që ka filluar para sa vitesh ka qenë mënyra më artistike për të shprehur dhimbjen, solidaritetin dhe mbi të gjitha për të shprehur fuqinë e jashtëzakonshme të gruas së Kosovës. Përmes këtij instalacioni që filloi në Kosovë dhe më pas u bashkua e gjithë bota ne treguam storje të mbijetuarave të dhunës seksuale gjatë luftës, bëm thirrje për drejtësi dhe po ashtu ngritëm zërin për gratë dhe vajzat në botë që po përjetojnë dhunë”, theksoi Osmani.

Edhe autorja e këtij instalacioni, Alketa Xhafa-Mripa, tha se përmes të njëjtit tregohen storje të të mbijeturave të dhunës seksuale gjatë luftës.

“Është kënaqësia ime të zhvilloj instalacionin artistik “Thinking of you”, i cili i ka rrënjët në Kosovë dhe është i frymëzuar nga të mbijetuarat e Kosovës. Dhe ne po sjellim dritë për të mbijetuarat (e luftës) globalisht nga një vend i vogël siç është Kosova. Pra, në Hagë, më 19 qershor do të jetë një instalacion i madh artistik, ku zërat e të mbijetuarave do të dëgjohen në të gjithë botën. Pra, thjeshtë mos e nënvlerësoni kurrë fuqinë e një vendi të vogël sepse ne kemi shumë për të dhënë atje, dhe Kosova po sjell zërat e tyre atje”, tha ajo.

Një rast tragjik ka ndodhur në Pejë mëngjesin e sotëm, ku një burrë dyshohet se e ka vrarë gruan e tij.

Driton Rugova nga policia rajonale e Pejës, e ka konfirmuar se sot rreth orës 08:15 janë informuar se në rrugën “Bill Clinton”, ka ndodhur një rast dhe se policia me ekipin mjekësor kanë dal në vendin e ngjarjes.

Sipas tij ekipi mjekësor e ka konstatuar vdekjen e viktimës.

“I dyshuari i këtij rasti është arrestuar dhe ndodhet në objektet e Stacionit Policor në Pejë”, ka thënë ai.

ATV ka siguruar pamjet e vendit të krimit, ku shihen vetura të policisë para ndërtesës ku dyshohet se një burrë vrau gruan e tij. /atvlive.tv

Të martën në Asamblenë Parlamentare të Këshillit të Evropës do të zhvillohet diskutimi dhe votimi për aplikimin e Kosovës në Këshillin e Evropës. Kjo vjen pas miratimit me sukses të raportit të raportueses për Kosovën, Dora Bakoyannis, nga Komiteti për Politikë dhe Demokraci i Këshillit të Evropës, përmes të cilit u konstatua që Kosova ka përmbushur kushtet për t’u bërë anëtare e plotë e Këshillit të Evropës.

Në Strasburg ndodhet shefja e diplomacisë kosovare, Donika Gërvalla dhe zëvendësministri, Kreshnik Ahmeti, për të zhvilluar takime dhe koordinuar veprimet me partnerët dhe aleatët, të cilët po e mbështesin Kosovën në rrugën drejt anëtarësimit në këtë organizatë të rëndësishme ndërkombëtare.

Po ashtu ndodhet edhe një delegacion i Kuvendit të Kosovës, i cili udhëhiqet nga nënkryetarja e Kuvendit, Saranda Bogujevci. Kosova ka aplikuar në maj 2022 për anëtarësimin e Kosovës në Këshillin e Evropës. Serbia është kundër anëtarësimit të Kosovës në këtë organizatë.

Ministria e Jashtme e Kosovës ka thënë se propaganda dhe fushata e Serbisë për të penguar anëtarësimin e Kosovës në Këshillin e Evropës është jashtëzakonisht e egër dhe bie në kundërshtim të plotë me marrëveshjet e vitit të fundit mes Kosovës dhe Serbisë.

“Por shprehim bindjen tonë se shtetet anëtare të KiE-së vendimin e tyre do ta marrin jo bazuar në këtë propagandë, por bazuar në kriteret dhe parimet mbi të cilat është ndërtuar Këshilli i Evropës,” thuhet në komunikatë.

Nevojiten 2/3 e votave të Asamblesë për t’i rekomanduar Këshillit Ministror të KiE pranimin e Kosovës. Pas këtij votimi, për anëtarësimin e plotë të Kosovës në KiE do të mbetet hapi i fundit, i cili do të ishte vendimi i Këshillit Ministror më 16 maj.

Përgatiti: Fatlum Jashari

Një rund i ri bisedimesh në nivel kryenegociatorësh, në kuadër të dialogut Kosovë-Serbi, në Bruksel, me temë kryesore rregulloren e BQK-së për pagesa me para të gatshme është në agjendë këtë javë.

Gjetja e një zgjidhjeje të përkohshme për, siç u shpreh, “njerëzit e prekur nga vendimi”, është shpresa e Përfaqësuesit të Posaçëm të Bashkimit Evropian për Dialogun, Miroslav Lajcak.

“Pres që të dyja palët të vijnë në takim me mendje të hapur, fleksibilitet dhe qasje për të gjetur zgjidhje, bazuar në idetë e propozuara gjatë takimeve të kaluara”, tha Lajcak.

Nuk ka informacione zyrtare, nëse te çështjet e tjera do të diskutohet vendimi i Listës Serbe për bojkotimin e votimeve të 21 Prillit, për shkarkimin e kryetarëve në katër komunat me shumicë serbe në veri.

Pavarësisht rezultatit, opinionisti Ognjen Gogic nuk pret lëvizje nga qëndrimi.

“Edhe nëse kryenegociatorët arrijnë ndonjë lloj marrëveshje lidhur me çështjen e pagesave, nuk do të mjaftonte që Lista Serbe të ndërrojë qëndrimin lidhur me votimin për shkarkimin e kryetarëve në komunat veriore. Vendimi për bojkotin ka të bëjë më shumë me kushtet e votimit sesa me çështjet e tjera politike”, tha Gogic.

Bojkotin, sipas tij, Lista Serbe po e përdor vetëm si mbulesë.

“Lista Serbe është e shqetësuar që referendumi nuk do të ketë sukses. Në fakt, ata mendojnë nuk do të dalin mjaftueshëm votues për t’i shkarkuar kryetarët, prandaj ata mendojnë se është më mirë që, paraprakisht, të thërrasin për bojkotim të referendumit, sesa të marrin pjesë duke e ditur se do të dështojnë. Lista Serbe është e shqetësuar se regjistri i votuesve është i fryrë dhe që përmban më shumë votues të regjistruar sesa njerëz që jetojnë në komunat veriore. Dhe, e dinë që serbët janë shumë të hidhëruar me të dyja, Prishtinën, por edhe me Listën Serbe, kështu që do të ishte vështirë të mobilizohen”, tha Gogic.

Teksa vuri në pah se nuk mund të ketë ndërlidhje mes dinarit dhe bojkotit, Fitim Mulolli nga POLCON vlerësoi se përsëritja e skenarit të 23 Prillit 2023, për Listën Serbe, do të ishte humbje e arsyes dhe e argumentit kundër kryetarëve.

“Një mundësi e patën kur janë mbajtur zgjedhjet, tani iu dha një rast që e kanë kërkuar tash e sa kohë dhe nëse e shfrytëzojnë edhe Qeveria e Kosovës do të jetë legjitime në mbështetjen që kryetarët të vazhdojnë punën e tyre. Në anën tjetër, prapë në qoftë se vendosin të bojkotojnë këtë proces, automatikisht është edhe një dëshmi që Serbia tenton ta prolongojë, pra ta shtyjë dialogun, sa më shumë që është e mundur, sepse është në favor të saj”, tha Mulolli.

Të dielën, në Mitrovicë të Veriut, Zveçan, Leposaviq dhe Zubin Potok do të mbahen votime për shkarkimin e kryetarëve, të cilët morën drejtimin e këtyre komunave me numër të ulët votash në zgjedhjet e bojkotuara nga Lista Serbe.

Raporti: Fatlum Jashari

Të martën, në Asamblenë Parlamentare të Këshillit të Evropës në rend dite është votimi lidhur me aplikimin e Kosovës, në atë që vlerësohet si hapi i parafundit në rrugën e anëtarësimit në këtë organizatë të rëndësishme për të drejtat e njeriut.

Në prag të këtij zhvillimi, krahas përmendjes së përmbushjes së kritereve për anëtarësim, Ministria e Punëve të Jashtme e Kosovës shprehu brengën për angazhimin e shtuar destruktiv të Serbisë.

“Propaganda dhe fushata e Serbisë për të penguar anëtarësimin e Kosovës në Këshillin e Evropës janë jashtëzakonisht të egra dhe bien në kundërshtim të plotë me marrëveshjet e vitit të fundit mes Kosovës dhe Serbisë. Por, shprehim bindjen tonë se shtetet anëtare të KiE-së vendimin e tyre do ta marrin, jo bazuar në këtë propagandë, por bazuar në kriteret dhe parimet mbi të cilat është ndërtuar Këshilli i Evropës”, thuhet në reagimin e MPJD-së.

Në anën tjetër, presidenti i shtetit fqinj, Aleksandar Vucic, u shpreh i zhgënjyer për, siç tha, mbështetjen e perëndimin për Kosovën, teksa këmbënguli se kundërshtimi i Serbisë do të vazhdojë më 16 Maj, në Këshillin e Ministrave.

“Ata kanë bërë një truk të ri. Më 10 maj do të thonë se do t’i referohen Gjykatës Kushtetuese për vlerësim të draftit të evropianëve. Ata do të thonë që kjo është arsye që ne të votojmë për Kosovën në Këshillin e Evropës. Kështu që kjo do të ndodhë”, ka thënë Vucic.

Suksesi eventual në votimin e 16 Prillit, për çka nevojitet mbështetja e së paku dy të tretave të 46 vendeve anëtare, do t’i hapte rrugë vendimmarrjes përfundimtare në Këshillin e Ministrave, një muaj më vonë.

Në maj të vitit 2022, Kosova aplikoi për anëtarësim në Këshillin e Evropës, ndërsa muajin e kaluar tre krerët e shtetit nënshkruan një listë zotimesh, përfshirë lëvizjen drejt themelimit të asociacionit, si kusht në këtë rrugë.

Përgatiti: Nora Luta

Në cilësinë e të dyshuarës, ministrja Rozeta Hajdari në mëngjesin e së hënës u paraqit në Prokurorinë Speciale.

Hajdari u ftua për intervistim nga prokurorët specialë, që janë i duke hetuar dyshimet rreth keqpërdorimeve me rezervat shtetërore.

Ministrja që e udhëheq dikasterin e Industrisë, Ndërmarrësisë dhe Tregtisë, po dyshohet se e keqpërdori detyrën zyrtare.

Hajdari pas tri orë qëndrimi në PSRK, foli shkurt për mediat duke thënë se ka disa paqartësi.

“Sepse është fjala për intervistë për rezervën shtetërore, e cila kërkon qartësi në legjislacionin në fuqi… dhe ligjet e tjera, prandaj derisa t’i marrim qartësitë përkatëse ne do të bëjmë kërkesën të vijmë dhe do t’ua japim përgjigjet që kanë nevojë t’i marrin”, tha Hajdari.

Nga Prokuroria Speciale treguan se Hajdari ka shfrytëzuar të drejtën për t’u mbrojtur në heshtje.

“Rozeta Hajdari, Ministre në Ministrinë e Industrisë, Ndërmarrësisë dhe Tregtisë, është paraqitur në Prokurorinë Speciale për t’u intervistuar në cilësinë e të pandehurës, nën dyshimin se ka kryer veprën penale ‘’Keqpërdorim i pozitës apo autoritetit zyrtar’’, nga neni 414 i Kodit Penal të Republikës së Kosovës, lidhur me rezervat shtetërore. Mirëpo, ajo sot nuk është deklaruar dhe, siç e parasheh Kodi i Procedurës Penale, ka shfrytëzuar të drejtën për t’u mbrojtur në heshtje”, thuhet në njoftimin e Prokurorisë Speciale.

Hetimet nën dyshimet për keqpërdorim me rezervat shtetërore nisën vitin e kaluar, pas dyshimeve të ngritura në publik se një sasi e vajit dhe e grurit e porositur nga Polonia, nuk kishte ardhur në Kosovë.

Në gusht të vitit të kaluar ishin arrestuar tre persona, dy zyrtarët e MINT-it, Hafiz Gara, Irfan Lipovica, dhe biznesmeni i njohur në publik për afërsinë me Vetëvendosjen, Ridvan Muharremi.

Ata pas vendimit të Apelit, mbrohen në liri.

Sipas Prokurorisë, ata dyshohet se nuk kanë sjellë vaj e sheqer, derisa është pranuar 52.5 tonë më pak grurë sesa sasia e kontraktuar, duke i shkaktuar dëm buxhetit të shtetit mbi 600 mijë euro.

Përgatiti: Pranvera Krasniqi

Me iniciativë të presidentes Vjosa Osmani, në Prishtinë filloi edicioni i dytë i Forumit ndërkombëtar për Gratë, Paqen dhe Sigurinë.

Gjatë dy ditëve, do të trajtohen shumë çështje që ndërlidhen me gratë, trajtimin e tyre dhe të drejtat.

“Jemi bërë bashkë për dhunën që flitet për konfliktet, gratë e vajzat preken më së shumti. Ndërsa jemi bërë bashkë për t’i diskutuar këto çështje, ndiej inspirim të thellë nga gratë e Kosovës…”, tha Osmani.

Në këtë ngjarje mori pjesë virtualisht edhe ish-sekretarja e Shteteve të Bashkuara, Hillary Clinton. Ajo vuri theksin te dy gra që u zgjodhën presidente në Kosovë.

“Pas shumë vitesh ia keni dalë që të siguroni për viktimat e dhunës seksuale, ju keni zgjedhur presidenten e parë dhe tani të dytën që janë të përkushtuara për ruajtjen dhe forcimin e paqes, zgjerimin e mundësive ekonomike dhe duke dëshmuar që bashkëpunimi sjell më shumë rezultat”, tha Clinton.

Rëndësi iu dha edhe viktimave të dhunës seksuale gjatë luftës, për të cilat liderët e shteteve fqinje kërkuan drejtësi.

“Ne dënojmë fuqishëm të gjitha llojet e dhunës seksuale. Nuk duhet përdorur. Është e papranueshme dhuna seksuale si instrument i luftës dhe frikësimit. Nuk duhet të ketë pandëshkueshmëri për këto krime”, tha presidentja e Sllovenisë, Natasha Pirc Musar.

“Ndër ata që kanë bartur barrën më të rëndë të konflikteve janë gratë”, tha presidenti i Shqipërisë, Bajram Begaj.

Shembull i forcës në këtë aspekt, është Vasfije Krasniqi.

Presidentja Osmani ka ndarë medalje presidenciale për gratë e Afganistanit, siç tha ajo, për trimërinë dhe kontributin e tyre.

Pastaj, u mbajt edhe ceremonia e nënshkrimit të Qendrës Rajonale të Ekselencës.

Forumi për Gratë, Paqen dhe Sigurinë mblodhi në Prishtinë rreth 1 mijë pjesëmarrës nga e gjithë bota. Tema si këto të së hënës do të diskutohen edhe të martën, në ditën përmbyllëse të edicionit.

Ky është forumi i dytë i llojit të vet në historinë moderne të Kosovës.

Përgatiti: Nora Luta

Procesi gjyqësor ndaj Pjetër Shalës, i akuzuar për krime lufte nga Zyra e Prokurorit të Specializuar në Hagë, është drejt fundit.

Këtë të hënë në Gjykatën Speciale ZPS-ja ka paraqitur fjalën përfundimtare, duke kërkuar dënim maksimal për Shalën.

Gjatë paraqitjes së deklaratave përmbyllëse u tha se Shala kreu krime ndaj civilëve në një fabrikë në Kukës që përdorej si shtab lokal i UÇK-së.

Të rrahësh persona që nuk mund të mbrohen nuk është luftë, është një akt frikacak i pajustifikueshëm dhune. I akuzuari nuk bëri asgjë për t’ua lehtësuar dhimbjet. Ai rrahu njërin pas tjetrit dhe koha nuk e ka ndryshuar karakterin e tij. Për të gjitha këto arsye, ai meriton dënim të rëndë!”, tha prokurori i ZPS-së, Filippo De Minicis.

Prokuroria pretendon se një prej viktimave të Shalës vdiq nga maltretimet në fabrikën e Metalit në Kukës, ndërsa të tjerët që mbijetuan kanë shenja të përhershme fizike.

“Viktimat e krimeve të të akuzuarit nuk mund të largoheshin. Një prej tyre, vdiq në fabrikën e metalit të Kukësit e të tjerat kanë shenja të përhershme fizike e përndiqen prej asaj përvoje. Ata nuk mund të harrojnë. Ata dhe familjet e tyre na kanë përshkruar traumën e gjatë dhe të thellë prej të cilës vuajnë”, tha De Minicis.

Pjetër Shala akuzohet për krime lufte gjatë periudhës maj-qershor 1999 dhe pretendimet e ZPS-së janë se ai mban përgjegjësi penale individuale rreth ndalimit të disa civilëve në fabrikën e metalit në Kukës të Shqipërisë.

Shala ishte arrestuar në mars të vitit 2021, ndërsa gjatë gjykimit i cili nisi në shkurt të vitit të kaluar, janë dëgjuar dhjetë dëshmitarë.

Seanca pritet të vazhdojë edhe të martën, gjatë së cilës do të paraqitet fjala përfundimtare nga mbrojtja.

Presidentja e vendit, Vjosa Osmani, ka pritur në takim homologun e saj shqiptar, Bajram Begaj, i cili do të marrë pjesë në Forumin Ndërkombëtar për Gratë Paqen dhe Sigurinë që po mbahet në Prishtinë.

Në një konferencë për media pas takimit, Osmani falënderoi shtetin shqiptar për përkrahje në procesin e anëtarësimit të Kosovës në Këshillin e Evropës, duke thënë se së bashku me liderët e tjerë të Shqipërisë do të sigurohet që Kosova ta ketë përkrahjen e vazhdueshme.

Ajo tha se synimi i Kosovës është anëtarësimi në strukturat euro-atlantike dhe se për këtë do ta ndjekë shembullin e Shqipërisë.

Ajo shtoi se çdo sukses i Kosovës është edhe sukses i Shqipërisë si dhe anasjelltas.

Ndërkaq, presidenti i Shqipërisë, Bajram Begaj, duke vlerësuar raportet mes dy vendeve, tha se marrëdhëniet janë vëllazërore dhe se e kanë për detyrë për të qëndruar afër në çdo moment.

Në fjalën e tij, Begaj u zotua se Shqipëria do të vazhdojë të jetë mbështetëse e Kosovës në politikën e jashtme, duke përmendur njohjet e reja dhe anëtarësimin në organizatat ndërkombëtare.

Kreu i shtetit shqiptar gjithashtu foli edhe për procesin e anëtarësimit të Kosovës në Këshillin e Evropës, duke thënë se ai shpreson se votimi do të jetë në favor të Kosovës.