Tag: Ballina

Nënsekretarja e ShBA-së për Diplomacinë Publike, Elizabeth Allen, ka deklaruar se me presidenten Vjosa Osmani në takimin e sotëm kanë biseduar për Asociacionin e Komunave me Shumicë Serbe.

Ajo, në konferencën e përbashkët për media, ka deklaruar se Kosova duhet të vazhdojë përpara me Asociacionin e Komunave me Shumicë Serbe.

“Ne diskutuam për hapin esencial të Kosovës në rrugën euroatlantike që Kosova të vazhdojë përpara në aspektin strukturor me Asociacionin e Komunave me Shumicë Serbe”.

“Ne diskutuam për investimet, për të rinjtë, edukimin dhe trajnimin për të një të ardhme demokratike në Kosovë. Një të ardhme që gjenaratat e tanishmë janë duke punuar”, ka thënë Allen.

Prodhuesit vendor në Kosovë janë ankuar për mungesë të përkrahjes nga ana e Qeverisë. Të njëjtit, kanë kërkuar nga shteti që t’i marrë më shumë parasysh prodhuesit vendor, dhe t’i stimulojë me masa më të favorshme.

Përfaqësues të bizneseve kanë theksuar se ka rritje të prodhimit në vend, mirëpo jo edhe mbështetje ekzekutivi. Stimulimi me subvencione, apo masa të tjera është duke munguar nga ana e qeverisë tek prodhuesit vendor. Menaxheri i fabrikës për prodhimin e transformatorëve, Andi Selimi derisa ka konsideruar se këto panaire janë të rëndësishme për të promovuar biznesin e tyre dhe shkëmbyer ide me të tjerët, është shprehur se presin më shumë ndihmë nga qeveria. Madje, në disa raste, ai thotë se po harrohen nga vet shteti, duke përmendur këtu një grant nga Ministria e Industrisë, Tregtisë, dhe Ndërmarrësisë, të cilët nuk kanë mundur të marrin pjesë për shkak të kodit.

Se duhet të ndihmohen më shumë bizneset e thotë edhe përfaqësues i një kompanie me shirita ngjitës në Kosovë, i cili prodhon mbi 50 lloje të shiritave dhe ngjitës, Martir Demiri.

Madje, Martir Demiri thotë se sfidë është edhe mungesa e fuqisë punëtore pas liberalizimit të vizave. I pranishëm në panair ishte edhe menaxheri rajonal në Yildirim Group, Cemil Acar, i cili ka theksuar se janë duke bërë investime në Ferronikel në mënyrë që të fillojnë sa më shpejtë me prodhim. Ai ka thënë se kanë bërë investime për prodhimin e energjisë së gjelbër në mënyrë që të ulet kostoja e po ashtu edhe për të ndihmuar në reduktimin e emetimeve në atmosferë sa i përket nevojës për dioksid karboni.

Ndërsa ka shtuar se së fundmi kanë zhvilluar një takim me kryeministrin, Albin Kurti, derisa e ka vlerësuar si takim të frytshëm, pasi sipas tij, qeveria është zotuar se do të japin mbështetje Ferronikelit ditëve në vijim.

Nënsekretarja amerikane e Shtetit, Elizabeth Allen, ka takuar Presidenten Vjosa Osmani, raporton Ekonomia Online. Ato nënshkruajtën një marrëveshje mirëkuptimi ndërmjet Qeverisë së Shteteve të Bashkuara të Amerikës dhe Republikës së Kosovës, kundër manipulimit të informacionit nga shtetet e huaja.

Gjatë konferencës për media presidentja Osmani tha se aleanca e Kosovës me SHBA-të është e përjetshme dhe kjo po pasqyrohet vazhdimisht.

“Aleanca jonë e përjetshme pasqyrohet dhe zgjerohet vazhdimisht. Vizita e zonjës Allen dëshmon përkushtimin tonë të ndërsjelltë. I shpreha mirënjohjen e popullit të Kosovës për Shtetet e Bashkuara të Amerikës dhe se kjo mbështetje po vazhdon edhe sot. Bashkëpunimi ynë është materializuar në forma të ndryshme. Kjo marrëveshje është dëshmi e fuqizimit mes dy shteteve tona. Jam jashtëzakonisht e lumtur që nënshkruam këtë marrëveshje që të bashkojmë forcat kundër manipulimit të informacioneve. Fushatat dezinformuese synojnë ta cenojnë demokracinë në shtetet tona. Fatkeqësisht as Kosova nuk është kursyer nga këto sulme sidomos nga Rusia e cila po synon të sjell destabilizim. Këto forca dashakeqëse synojë të sulmojnë shtetet tona. Marrëveshja e sotme është në këtë funksion nuk përbën një tjetër marrëveshje por synon një pikë kthese në bashkëpunimin tonë dhe lehtëson shkëmbimin e informacionit dhe manipulimit të informacionit”, ka thënë Osmani.

Në fund Osmani ka thënë se Kosova gëzon lirinë demokracinë “falë edhe Shteteve të Bashkuara të Amerikës”.

“SHBA janë aleati ynë kryesor”, tha ajo.

Disa aleatë të SHBA-së brenda NATO-s po konsiderojnë dërgimin e ushtarakëve në Ukrainë për të trajnuar forcat e saj të armatosura, ka raportuar New York Times.

Disa kontraktorë ushtarakë amerikanë janë tashmë në terren për të riparuar sistemet e armëve të furnizuara nga SHBA. Duke u përballur me mungesën e trupave, qeveria në Kiev i ka kërkuar SHBA-së dhe NATO-s që të “ndihmojnë në trajnimin e 150,000 rekrutëve të rinj” brenda Ukrainës, në mënyrë që ata të mund të dërgohen në front më shpejt, sipas gazetës amerikane.

Masa “do të ishte një tjetër mjegullim i vijës së kuqe të mëparshme” dhe mund të tërheqë SHBA-në dhe BE-në “më drejtpërdrejt në luftë”, vuri në dukje NYT.

Edhe pse Shtëpia e Bardhë e ka kundërshtuar publikisht dërgimin e instruktorëve, kryetari i Shefave të Përbashkët të Shtabit mendon se kjo është e pashmangshme. “Ne do të arrijmë atje përfundimisht, me kalimin e kohës,” u tha gazetarëve gjenerali Charles Q. Brown Jr. të enjten, ndërsa udhëtonte për në Bruksel.

Një problem me vendosjen e instruktorëve të NATO-s në Ukrainë do të ishte nevoja për të zhvendosur mbrojtjen ajrore tashmë të pakët larg nga fusha e betejës në mënyrë që t’i mbronte ata nga sulmet ajrore dhe raketore ruse, sipas artikullit.

Sipas gazetës, SHBA do të jetë e detyruar të mbrojë çdo instruktor të NATO-s brenda Ukrainës nga sulmi, “duke e tërhequr potencialisht Amerikën në luftë”.

Presidenti francez Emmanuel Macron ngriti për herë të parë çështjen e dërgimit të trupave të NATO-s në Ukrainë në shkurt, si një ide që nuk duhet përjashtuar. Estonia dhe Lituania që atëherë kanë shprehur mbështetje për dërgimin e instruktorëve ose të trupave mbështetëse, për të liruar ushtarët ukrainas për detyrë luftarake.
Shtëpia e Bardhë është “e bindur” se nuk do të vendosë trupat amerikane në terren në Ukrainë – përfshirë instruktorët – dhe u ka kërkuar aleatëve të NATO-s që të mos e bëjnë këtë, tha një zyrtar anonim i Shtëpisë së Bardhë për New York Times.

Ndërkohë, Britania, Franca dhe Gjermania po punojnë për një plan për të dërguar kontraktorë për të ruajtur armët në zonën e luftimit, ka zbuluar gazeta amerikane.

Megjithëse SHBA-ja i ka ndaluar kontraktorët e mbrojtjes që të shkojnë në Ukrainë, “një numër i vogël tashmë është lejuar, nën autoritetin e Departamentit të Shtetit, për të punuar në sisteme specifike të armëve si mbrojtja ajrore Patriot”, vuri në dukje artikulli.

Nënsekretarja amerikane e Shtetit, Elizabeth Allen, ka mbërritur në Presidencë, raporton Ekonomia Online.

Allen është pritur nga presidentja Osmani.

Ato do të nënshkruajnë një marrëveshje mirëkuptimit ndërmjet Qeverisë së Shteteve të Bashkuara të Amerikës dhe Republikës së Kosovës, kundër manipulimit të informacionit nga shtetet e huaja.

PËRGATITI: ARTON HAMITI 

Rrahje me shkop gome, kabllo elektrike, gypa të ujit e keqtrajtime nga më të ndryshmet kishin përjetuar të burgosurit politikë, gjatë muajve maj e qershor të 1999-ës, në burgun e Prishtinës.

Në mesin e tyre ishte edhe Isak Shabani, tani deputet i Kuvendit të Kosovës.

“Në orën 22:00 kur binte zilja për të fjetur, 2-3 minuta më pas na merrnin, na lidhin dhe na dërgonin te zyrat e sigurimit shtetëror… ata na rrihnin tërë natën, ndërkohë në mëngjes na kthenin në qeli kinse për të pushuar, por torturat vazhdonin përsëri. E kam një rast të veçantë që kur ka ardhë një gardian shqiptar, më ka pyetur si je… I kam thënë se jemi tu përjetu gjithçka, vetëm me e mbytë veten, se tjetër çka nuk dimë çka me ba”, tha Shabani.

Për keqtrajtimet që dyshohet se i kanë bërë ndaj Shabanit dhe të tjerëve, Prokuroria Speciale e Kosovës ka ngritur aktakuzë në mungesë ndaj ish-drejtorit të burgut të Prishtinës, Ljubomir Çimburoviq, dhe gardianëve, Predrag Bradiq dhe Millivoje Iviq.

“Kam pasur rastin ta takoj edhe drejtorin e burgut dhe këta gardianë. Me urdhër të drejtorit nga këta gardianë janë rrahur të burgosurit politikë dhe jam rrahur edhe unë. Ka qenë një gardian qe ka përdorë torturë sikur në shtazë dhe ai gardian është quajtur Bradic”, shtoi tutje ai.

Në aktakuzën të cilën e ka siguruar ATV-ja shpjegohen në detaje format e keqtrajtimeve, nga data 24 maj e deri më 10 qershor të 99-tës, në burgun e Prishtinës dhe në atë të Lipjanit. Veç rrahjes, të burgosurit të cilët ishin sjellë nga burgu i Dubravës, ishin privuar edhe nga ushqimi.

“Agron Ramadani tri ditë rresht kishte qëndruar në objektin e sigurimit të shtetit, ku ishte maltretuar dhe rrahur në forma të ndryshme si me shkop gome, shkop druri, shok elektrik, ia kishin djegur pjesë të ndryshme të trupit, si pasojë e të cilave kishte humbur vetëdijen. Tortura më e madhe në këtë burg, përveç rrahjeve kishte qenë mungesa e madhe e ushqimit dhe ujit. Gjatë natës vazhdimisht kishin dëgjuar britma të njerëzve të cilët rriheshin, keqtrajtoheshin dhe torturoheshin nëpër pavijonet e tjera të burgut”, thuhet mes tjerash në aktakuzë.

Nga keqtrajtimet, dy nga të burgosurit kishin vdekur. Në aktakuzë përmendet gjithashtu edhe gardiani Dragisha Millenkoviq tashmë i akuzuar për krime lufte, i cili ishte arrestuar vitin e kaluar në Graçanicë./atvlive.tv/

PËRGATITI: FATLUM JASHARI

Që nga viti 2018 kur dështoi në votimin në Asamblenë e Përgjithshme, Kosova më nuk arriti as të futej në rend dite për anëtarësim eventual në Organizatën Ndërkombëtare të Policisë – INTERPOL.

Nga viti 2019 qeveritë e ndryshme kishin tërhequr dokumentacionin ose nuk kishin nisur fare procedurat, me arsyetimin se nuk kanë siguruar mbështetjen e mjaftueshme.
Përkundër premtimeve, deri tani, as pushteti aktual nuk i ka çuar në nivel tjetër përpjekjet për të qenë pjesë e organizatës më të rëndësishme policore në botë.

“Do t’i ndërmarr të gjithë hapat e mundshëm që anëtarësim i Kosovës, vitin e ardhshëm të jetë i sigurt”, pati deklaruar ministri i Punëve të Brendshme, Xhelal Sveçla.

Gjashtë muaj para mbledhjes së Asamblesë së Përgjithshme të INTERPOL-it, e cila do të mbahet në Nëntor, në Skoci, Qeveria nuk tregoi nëse ka nisur përgatitjet.

Pasi mosaplikimin për anëtarësim, në tre vjet të kësaj Qeverie, e cilësoi neglizhencë dhe papjekuri politike në dëm të sigurisë kombëtare, eksperti Drizan Shala tha se mungon një strategji që do t’i përfshinte të gjitha partitë.

“Ku mbi këtë koncept-dokument të gjithë, pa dallim, do të angazhoheshin në mënyra të ndryshme që t’i garantohen Kosovës votat e mjaftueshme, përmes kanaleve të caktuara, që më pastaj Kosova të marrë dritën jeshile për të qenë pjesë e mekanizmave të rëndësishëm, të domosdoshëm, për të garantuar sigurinë publike, njëkohësisht për të reflektuar mbi sigurinë nacionale të Republikës të Kosovës”, deklaroi Shala.

Në vlerësimin e Shalës, sulmi terrorist-paramilitar më 24 Shtator përbën një mundësi të çuar dëm nga Kosova, në synimet për të qenë pjesë e INTERPOL-it.

“Ta shfrytëzojë këtë momentum dhe të kërkojë anëtarësimin. Dhe, përmes anëtarësimit në INTERPOL do të ishte përmbyllur edhe rasti i Banjskës, do të silleshin para drejtësisë personat e involvuar – përmes flet-arresteve dhe këmbimit të informacioneve në kohë reale”, shtoi tutje ai.

Pasi theksoi se Policia e Kosovës i përmbush të gjitha kriteret e kërkuara, profesori universitar Avni Islami si pengesë përmendi angazhimin diplomatik kundërshtues të Serbisë.

“Serbia nuk është e interesuar që Kosova të aderojë në organizata të rëndësishme, siç është INTERPOL-i. Sepse, po të jetë pjesë e INTERPOL-it, Policia e Kosovës e ka të drejtën të lëshojë letër-rreshtime të ndryshme, siç kishim rastin e Radoicicit”, tha Islami.

Para 2018-tës, Kosova kishte aplikuar për anëtarësim në INTERPOL edhe më 2015, 2016 dhe 2017 – në dy raste nuk kishte arritur të futej në rend dite, ndërsa herën e tretë ishte tërhequr, në mungesë mbështetjeje.

Për herë të parë, Kosova shprehu zyrtarisht interesimin për të qenë pjesë e kësaj organizate më 2010 – por kërkesa e saj ishte shpërfillur./atvlive.tv/

PËRGATITI: ARTON HAMITI   

Kur Ministrja për Punë të Jashtme Donika Gërvalla, nëpërmjet një letre drejtuar Këshillit të Evropës u zotua se drafti për Asociacionin e komunave me shumicë serbe, do të dërgohet për interpretim në Gjykatën Kushtetuese deri në fund të majit, kryeministri Albin Kurti ishte në Mal të Zi.

As nga Kotori e as nga Prishtina, kryeministri nuk u deklarua rreth mundësisë së anëtarësimit në KiE. Shefi i ekzekutivit nuk tha asnjë fjalë as të premten kur përfundimisht, Kosova nuk ishte në agjendën e takimit të Komitetit të Ministrave.

Kryeministri u mjaftua vetëm më një komunikatë, ku e falënderoi Mbretërinë e Bashkuar për qëndrimin e mbajtur gjatë takimit të komitetit të ministrave

Njohës të rrethanave politike, vlerësojnë se qeveria duhet të dalë me një sqarim se pse Kosova dështoi të pranohet në organizatën e cila dje shënoi 75-vjetorin e themelimit.

“Kjo është një temë që zgjon shumë debat andaj duhet të dilet me sqarime dhe arsyetime. E dimë që Asociacioni ishte kusht por edhe kryeministri edhe ministrat përkatës duhet të dalin të thonë se nuk duam të shkojmë përpara me Asociacionin”, deklaroi juristi Taulant Hodaj.

Heshtja e kryeministrit po shihet edhe si tentim për ta larguar përgjegjësinë nga vetja.

“Mendoj që kryeministri Kurti po provon të gjejë një arsyetim për dështimin e Kosovës në anëtarësimin në Këshillin e Evropës duke u mundu me e kamufluar këtë dështim dhe duke u mundu me i hedh përgjegjësitë diku tjetër. Por, çfarëdo arsyetim do të jetë i pasinqertë sepse si kryeministër, përgjegjësinë kryesore e ka zotëri Kurti”, tha politologu Fidan Ukaj.

Ndryshe, Presidentja Vjosa Osmani, e cila nuk ka qenë e konsultuar për letrën që Ministria e Jashtme i kishte dërguar Këshillit të Evropës, tha se anëtarësimi i Kosovës në këtë organizatë është vetëm çështje kohe.

Këshilli i Evropës është organizata më serioze ndërkombëtare ku Kosova ka pasur mundësi real të pranohet viteve të fundit./atvlive.tv/

PËRGATITI: PRANVERA KRASNIQI   

Në orët e para të së shtunës, një pjesë e kodrës përfundoi në mes të asfaltit.

Sasia e madhe e dheut dëmtoi rëndë 150 metra të rrugës Dollc-Gjakovë, duke e bërë kështu të pakalueshme.

Meqë rruga është e bllokuar, zyrtarë nga Ministria e Infrastrukturës njoftuan qytetarët për rrugët alternative.

“Po mundohemi që Brenda një kohe të shkurtër rruga të lirohet për qarkullim, mendojmë që sot në mbrëmje apo nesër, udhëtaret t’i përdorin njëherë rrugët alternative”, tha Qamil Feka, drejtor i Departamentit për menaxhimin e rrugëve.

Disa vozitës që këtë rrugë e përdorin pothuajse çdo ditë, të shtunën u detyruan ta bëjnë në këmbë.

Shembja e dheut ua kishte lënë në gjysmë shëtitjen edhe disa vizitorëve.

Rruga 30 kilometërshe, Dollc-Gjakovë, ishte planifikuar të zgjerohej nga muaji mars i vitit 2019, kështu për t’u shtuar edhe dy shirita qarkullues.

Ndonëse i paraparë të përfundoj për 3 vjet, punët nuk janë afër përfundimit as pas 5 vjetësh.

Pavarësisht kësaj, sipas Ministrisë së Infrastrukturës, projekti me vlerë mbi 41 milionë euro, pritet të përfundojë në fund të vitit 2024./atvlive.tv/

PËRGATITI: KRENARE MULLIQI   

Nga sot të gjitha familjet që të ardhura mujore i kanë nga 100 euro për anëtar, mund të aplikojnë për marrje të skemës sociale.

Kjo do të mundësohet me reformën që do të bëhet në Asistencën Sociale, pilotimi i së cilës u bë të shtunën publike.

Me këtë reformë, parashihet të largohen disa kushte të cilat aktualisht duhet t’i plotësojnë personat të cilët aplikojnë për të qenë fitues të skemës sociale.

Familjet do të kenë mundësi të marrin mbështetje financiare edhe pasi gjithë fëmijët e tyre të jenë mbi moshën 5 vjeçare.

Sipas, shefit të Qeverisë, Albin Kurti, me këtë projekt nuk do të ketë më diskriminime.

Pas aplikimit në e-Kosova do të ndiqen disa procedura siç është vlerësimi i varfërisë e vizita për verifikim.

Ndërkaq, mjetet financiare nuk do të jenë të njëjta për gjitha familjet.

Personat të cilët nuk kanë aftësi të kufizuar, do të regjistrohen si punëkërkues dhe ndaj tyre ndihmë sociale do të ketë vetëm për 6 muaj.

Reforma në skemën sociale do të bëhet përmes ndihmës nga Banka Botërore.

Të gjitha familjet që marrin asistencë sociale aktualisht do të vazhdojnë ta marrin.

Ndërkaq implementimi i skemës sociale për herë të par nisi në 2007 dhe deri më tani nuk ka pasur ndonjë ndryshim./atvlive.tv/