Tag: Ballina

Përgatiti: Nora Luta

Nga prilli kur u rizgjodh kryetar i Zubin Potokut, Izmir Zeqiri ende nuk po e ushtron postin e tij nga objekti i komunës.

Zeqiri thotë se pengesë mbetet rinovimi i objektit komunal, që sipas tij është në proces të tenderimit.

E për procedurat e prokurimit në mungesë të resurseve njerëzore, kryetari i Zubin-Potokut ka autorizuar zyrtarët e prokurimit të komunës së Vushtrrisë.

Përveç infrastrukturës, sipas Zeqirit, objekti ka nevojë për përmirësim të furnizimit me ujë dhe energji elektrike.

Përveç Zubin Potokut në mungesë të stafit, për procedurat e prokurimit njësoj po veprojnë edhe tri komunat e tjera veriore.

Kjo, sipas Iniciativës për Progres, është praktikë e ndërtuar në mungesë të kapaciteteve.

Por Nrecaj thekson përgjegjësinë e lartë të një zyrtari të prokurimit, çka, sipas saj, kjo praktikë nuk mund të jetë shumë efikase dhe duhet të ndërpritet.

Derisa, kryetari Zeqiri tha se tenderi për rinovim të objektit komunal është në procedurë e sipër, nga fillimi i këtij viti e deri tash Zubin-Potoku ka iniciuar katër aktivitete të prokurimit.

Ato janë kryesisht furnizim me serra dhe asfaltime të disa rrugëve.

Zëdhënësi i Bashkimit Evropian, Peter Stano, ka reaguar sot në konferencë për media ndaj deklaratës së zëvendëskryeministrit të Kosovës, Besnik Bislimi i cili tha javën e kaluar se “ka informacione që është rekomanduar heqja e masave nga BE-ja”.

Stano ka theksuar se raporti për hapat që ka ndërmarrë Kosova për përmbushjen e detyrimeve i është deleguar Përfaqësuesit të Lartë të BE-së për Politikë të Jashtme, Josep Borrell, nga Këshilli i BE-së, por që shtoi se s’është e nevojshme që dikush nga jashtë të spekulojë për përmbajtjen dhe oraret e raportit.

“Kjo është një çështje institucionale mes Përfaqësuesit të Lartë dhe vendeve anëtare. Vendet anëtare janë ato që kanë kërkuar një raport dhe, natyrisht, është Përfaqësuesi i Lartë ai që do ta dërgojë raportin tek vendet anëtare. Ato do të jenë të parat që do të dinë se kur do të ndodhë dhe çfarë përmban raporti, dhe kjo ende nuk ka ndodhur”, ka theksuar Stano.

Sipas tij, raporti nga Borrell do të dërgohet fillimisht tek vendet anëtare, të cilat do ta shohin dhe diskutojnë përmbajtjen e tij, para se të marrin vendimet e nevojshme.

Hapja e urës së Ibrit në Mitrovicë për numrin dy në Qeverinë e Kosovës është një temë që duhet të trajtohet me seriozitet. Sipas zëvendëskryeministres, njëherësh ministres së Punëve të Jashtme dhe Diasporës, Donika Gërvalla forcimi i sovranitetit pa rritur rrezikun është strategjia më frytdhënëse e ekzekutivit. Ajo paralajmëron hapa pozitiv në këtë temë, mirëpo shton se janë të vetëdijshëm që nuk duhet të rrezikojnë sigurinë e vendit. Në anën tjetër, hapjen e urës së Ibrit e mirëpresin edhe nga Aleanca për Ardhmërinë e Kosovës, por theksojnë nevojën e koordinimit me aleatë, kurse kanë dyshime se ky vendim po merret për agjenda elektorale. Ndërkaq, analistët politikë kërkojnë nga qeveria që pa shumë zhurmë politike të hapë urën, përkundër që thonë se qëndrueshmëria e komunitetit serbë në veri nuk është siç ka qenë më herët.

Donika Gërvalla për KosovaPress nuk tregon se kur qeveria do të merr veprime për hapjen e urës, pasi thotë se në momentin kur do të ketë lëvizje qytetarët do t’i shohin.

“Edhe tema e urës edhe tema të tjera janë tema që duhet të trajtuar me seriozitet nga institucionet tona si nga ato lokale ashtu edhe ato qendrore. Strategjia e kësaj qeverie në forcimin e sovranitetit pa rritur rrezikun është strategjia më frytdhënëse që kemi parë gjatë 25 vjetëve të fundit. Ne duhet të vazhdojmë të bëjmë hapa pozitiv, ndërkohë jemi shumë të vetëdijshëm që nuk duhet të rrezikojmë territorin tonë, qytetarët dhe institucionet tona të sigurisë…Në momentin që do të ketë lëvizje ju do të jeni dëshmitarë të lëvizjeve dhe do t’i shihni”, thotë ai.

Hapjen e urës së Ibrit që bashkon Mitrovicën e Jugut të banuar me shqiptarë dhe Mitrovicën e Veriut, të banuar me serbë e konsideron të nevojshme edhe shefi i Grupit Parlamentar të AAK-së, Besnik Tahiri. Megjithatë, ai ngreh dyshime se ky veprim po bëhet për agjenda elektorale. Pavarësisht kësaj, Tahiri kërkon koordinim me Shtetet e Bashkuara të Amerikës për hapjen e urës, në mënyrë, siç thotë mos të ketë kthim prapa të këtij vendimi.

“Kur qeveria merr një veprim, pyetja e parë që shtrohet është për çka po e marrim këtë veprim. Cili është qëllimi? A është qëllimi para zgjedhjeve me i tregua popullit që po i bëjmë do veprime në veri pasi s’ka bërë asgjë. Apo me të vërtet është qëllimi me forcua integritetin dhe sovranitetin tonë në atë pjesë. Për me bërë këtë pjesë duhet me pas një bashkëpunim dhe bashkërendim me Shtetet e Bashkuara të Amerikës fillimisht…Ura duhet të hapet mirëpo kur të hapet ura shteti nuk guxon të kthehet prapa. Unë nuk e kam problemin e hapjes së urës pasi duhet të hapet. Duhet me na ndihmua Shtetet e Bashkuara të Amerikës dhe vendet të tjera që të hapet ura. Por unë kam problemin se këta marrin vendim për targa pastaj kthehen, marrin vendim për zgjedhje pastaj i organizojnë prapë. Unë e kam problem se me bërë me hap urën dhe me dal KFOR-i me thënë se s’bën me kalua andej, ku po mbet sovranitetin dhe integriteti”, deklaron Tahiri.

Ndërkaq, analisti politik, Dritëro Arifi, deklaron se s’pret as shumë presion të aleatëve ndërkombëtar për mos hapjen e urës së Ibrit, pavarësisht se vendet e QUNIT-it dhe KFOR-i kanë deklaruar se nuk është momenti që ura të hapet.

Ai thotë se hapja e urës së Ibrit është më shumë çështje humane dhe të drejtave të njeriut, andaj duhet t’i jepet drita e gjelbër.

“Qeveria e Kosovës duhet në heshtje që të bëjë këtë veprim, të hap urën por pa shumë zhurmë. Realisht presioni i madh që mund të ekzistojë nuk është siç ka qenë më parë, por edhe qëndrueshmëria e komunitetit serb nuk është siç ka qenë më parë. Në një mënyrë është një pozitë e favorshme por duhet të bëhet me hapa të kujdesshëm. Hapja e urës do të ndodh shumë shpejtë, sepse është më shumë një çështje humane dhe të drejtave të njeriut, se që krijon probleme. Mendoj se më shumë do të afrojë komunitetit serb që të integrojë në institucionet e Kosovës. Duhet me një vetëdijesim dhe bashkëpunim që kur të hapet ura mos të ketë protesta apo kundër efekt apo ndonjë notë verbale nga partnerët evropian”, thekson Arifi.

Revitalizimi i urës së Ibrit ishte paraparë në marrëveshjen për lirinë e lëvizjes, të arritur mes Kosovës dhe Serbisë më 2015 në Bruksel. Edhe pse 6 vjet më parë kanë përfunduar punimet me investime milionëshe të BE-së, ura vazhdon të jetë e mbyllur për veturat.

Pavarësisht kësaj, BE-ja ka deklaruar se nuk është momenti që ura të hapet për shkaqe të sigurisë.

Pikërisht sot janë bërë dhjetë vjet nga heqja e barrikadave mbi urën Ibër në Mitrovicë të vendosura nga strukturat paralele serbe.

Sekretari i Mbrojtjes në Britani të Madhe gjatë luftës në Kosovë, George Robertson thotë se aktualisht sfida më e madhe e sigurisë me të cilën përballet bota është mposhtja e presidentit rus, Vladimir Putin.

Robertson thekson se fitorja e Ukrainës është jetike për ndaljen e ndikimit rus në Ballkan dhe më gjerë. Në të kundërtën, shton ai, Rusia do të shkojë edhe “më larg”.

Derisa thotë se Rusia po kërkon të zgjerojë ndikimin e saj, në të gjithë botën e në veçanti në Ballkanin Perëndimor, ai shprehet optimist për të ardhmen e Ballkanit Perëndimor, e veçanërisht Kosovën, për të cilën shton se edhe merakoset.

“Nuk ka dyshim se Rusia po kërkon të zgjerojë ndikimin e saj, jo vetëm në Ballkanin Perëndimor, por në fakt në të gjithë botën dhe veçanërisht në Evropën Perëndimore. Por Ballkani Perëndimor është pjesë e territorit që ata (ruset) do të donin të dominonin. Prandaj, ata janë të përfshirë në përçarje, në sabotim ekonomik, ata janë të përfshirë në sulme kibernetike, sepse kjo është mënyra në të cilën ata veprojnë, dhe ata, nëse fitojnë në Ukrainë, do të bëjnë shumë më tepër në të ardhmen. Pra, njerëzit duhet të jenë shumë të kujdesshëm në këtë rajon për atë që Rusia do të bëjë përfundimisht, veçanërisht nëse fitojnë në Ukrainë.“

Ai gjithashtu tha se Kosova është e çliruar, por se duhet dhënë asaj të ardhmen e vet dhe të sigurohen për këtë.

“Ne i dhamë Kosovës lirinë e saj. E çliruam nga dhuna që po bëhej ndaj saj, por nuk i dhamë asaj të ardhmen e vet, e ardhmja e saj është në duart e njerëzve si ju, të popullatës së Kosovës në tërësi, dhe ata duhet të sigurohen që të ndërtojnë mbi këtë.

Ju e dini se fëmijët që ishin të vegjël në kohën e çlirimit 25 vjet më parë, tani do të jenë vetë prindër dhe gjyshër dhe prandaj ne dhe ju duhet të shohim shumë se çfarë duhet bërë për të krijuar një komunitet të begatë ku ka një unitet midis të gjitha vendeve të ndryshme në Ballkanin Perëndimor. E dini, Madeleine Albright u pyet një herë nëse ishte pesimiste apo optimiste dhe ajo u përgjigj, unë jam një optimiste që merakoset. Kështu që unë jam optimist për Ballkanin Perëndimor dhe veçanërisht për Kosovën, por merakosem gjithashtu.“

Ministri i Punëve të Brendshme, Xhelal Sveçla, u është përgjigjur kritikave të Departamentit të Shtetit dhe vendeve të QUINT-it, të cilët shprehen indinjatën me aksionet e Policisë së Kosovës, në veri të vendit, raporton EO.

Sveçla, në një prononcim për Ekonomia Online, i ka quajtur brenda e jo kritika, mospajtimet e partnerëve ndërkombëtarë për veprimet në komunat veriore.

“Nuk ka kritika, ka brenga të cilat kohë pas kohë ata i shfaqin. Ne bashkëpunojmë ngushtë më të gjithë, i kuptojmë brengat e tyre, por po ashtu qeveria e Republikës së Kosovës ka obligim qoftë ndaj gjeneratave të tanishme, por edhe brezave të ardhshëm që njëherë e përgjithmonë situatën atje ta stabilizojë në të mirë dhe rendit e ligjit”, ka thënë Sveçla.

Kreu i Ministrisë së Brendshëm thotë se në atë pjesë janë duke vepruar për rikthimin e qetësisë, rendit dhe ligjit.

“Atje është qetë është situatë e brishtë, por Policia e Kosovës është tregu jashtëzakonisht e zonja që të menaxhojë dhe të ballafaqohet me të gjitha sfidat”, ka thënë Sveçla.

Sveçla ka lavdëruar organet e rendit për menaxhimin e situatës në komunat veriore.

“Me përvojën e fituar me kapacitete të angazhuara mbi të gjitha me vullnetin e pashoq të secilit pjesëtarë të Policisë së Kosovës, cilado sfidë e ardhshme do të menaxhohet në mënyrën më të mirë të mundshme. Policia atje është duke siguruar rend dhe ligj për të iu shërbyer qytetarëve”, ka thënë ministri Sveçla.

Kritikat e faktorit ndërkombëtarë, erdhën pas një aksioni të Policisë së Kosovës, në veri të vendit ku u mbyllen disa filiale të bankës së Serbisë që operonte në katër komunat e asaj pjese.

Sveçla këtë aksion e vlerësuar si të duhur për largimin e mekanizmave të Serbisë nga Kosova.

Në këtë aksion të policisë së Kosovës, ishin konfiskuar rreth 1.6 milion euro, mbi 74 milionë dinarë (rreth 630 mijë euro), mbi 19 mijë franga e mbi 13 mijë dollarë amerikanë, si prova materiale.

Ditën e sotme parashikohet të mbajë mot me diell dhe vranësira.

Gjatë pasdites ka mundësi të ketë ndonjë reshje të izoluar, kryesisht në zonat malore, njofton Meteo Kosova, transmeton Sinjali.

Temperaturat minimale do të lëvizin prej 14 deri në 16°C, ndërsa ato maksimale prej 29 deri në 32°C.

Era do fryjë drejtimesh të ndryshme me shpejtësi prej 10-38 km/h.

Ambasadori i Shteteve të Bashkuara të Amerikës, Jeffrey Hovenier, i ka uruar besimtarët myslimanë me rastin e Kurban Bajramit.

Me rastin e kësaj feste ai i përcolli urimet më të ngrohta.

“Urimet më të ngrohta me rastin e Kurban Bajramit për besimtarët që po festojnë në Kosovë dhe në mbarë botën”, thuhet në urim.

Presidentja e vendit, Vjosa Osmani u ka uruar besimtarëve musliman festën e Kurban Bajramit.

“Kjo festë bashkon njerëzit, ndaj në këtë ditë hapen jo vetëm dyert, por edhe zemrat për ta shpërfaqur traditën tonë, si dhe shpirtin solidar për të ndarë diçka nga vetja për ata që kanë nevojë”, shkruan mes tjerash në urimin zyrtar.

Urimi i plotë:

Uroj që festa e Kurban Bajramit të sjellë gëzim, paqe dhe begati në familjet tuaja!

Kjo festë bashkon njerëzit, ndaj në këtë ditë hapen jo vetëm dyert, por edhe zemrat për ta shpërfaqur traditën tonë, si dhe shpirtin solidar për të ndarë diçka nga vetja për ata që kanë nevojë.

Kurban Bajrami është festë e sakrificës, mundësi për reflektim, dhembshuri dhe mirënjohje.

Shtëpitë tuaja në këtë ditë feste qofshin të mbushura me gëzim, dashuri, mirëkuptim dhe tolerancë.

Urime dhe gëzuar festa e Kurban Bajramit!

Kryeministri i vendit, Albin Kurti në nder të festës së Kurban Bajramit ka vizituar kryemyftiun e vendit, Naim Tërnava në selinë e Bashkësisë Islame të Kosovës.

Ai i shoqëruar nga ministrja e drejtësisë, Albulena Haxhiu, ministri i shëndetësisë Arben Vitia, ministri i mbrojtjes dhe sigurisë Ejup Maqedonci,ministri i kulturës, rinisë dhe sportit Hajrullah Ceku, uroi të gjithë besimtarët musliman Kurban Bajramin dhe duke theksuar se kjo festë kujton rëndësinë e gadishmërisë për sakrificë, raporton EO.

Në mesazhin e tij, Kurti ka thënë se shoqëria në komb duhet të jetë bashkë njeri tjetrin.

“E falënderoj nga zemra myftiun e bashkësisë islame të Kosoves,Naim Tërnaven për këtë mikëpritje të ngrohtë, ua uroj edhe njëherë Kurban Bajramin edhe kolegëve të tij e të gjithë besimtarëve, qytetarëve të vendit tonë shqiptarëve kudo që janë. Kjo festë na e rikujton edhe rëndësinë e sakrificës mbi të gjitha rëndesinë e gadishmerisë. Kurban Bajrami është festë të cilën të mirat materiale i ndajmë me të afërt, miqët, fqinjët e gjithashtu edhe me ata që janë të varfer e nevojtarë, e paralelisht me këtë ndajmë edhe kohë e dashuri.

Ai gjithashtu e falendëroi edhe Bashkësinë Islame të Kosovës, në krye me myftiun Tërnava për rolin e tij tradicional dhe historik që ka luajtur për të mirën e qytetarëve.