Tag: Ballina

Presidenti i Serbisë, Aleksandar Vuçiq, tha për mediat në Bruksel se gjatë rundit të dialogut të nivelit të lartë, ai nuk është takuar me kryeministrin e Kosovës, Albin Kurti, pavarësisht se një takim i tillë ishte paralajmëruar nga Bashkimi Evropian.

“Nuk ka pasur takim me Kurtin sepse Kurti nuk ka dashur apo nuk ka guxuar – pyeteni atë – të më takoj dhe të bisedojmë. Besoj se do të mësoni më shumë për këtë nga evropianët”, tha Vuçiq gjatë një deklarimi për mediat.

Vuçiq tha se është kthyer tri herë në takimin me shefin e diplomacisë së BE-së, Josep Borrell, dhe të dërguarin e bllokut për dialogun, Mirosllav Lajçak, të cilët ia kanë përcjellë mesazhet e Kurtit, të cilave ai i është përgjigjur. Ai e vlerësoi korrekt takimin me ndërmjetësit evropianë.

“Ai nuk ka dashur të më takoj”, tha Vuçiq kur u pyet nga gazetaret se pse nuk pati një takim të përbashkët, duke shtuar se Kurti ka thënë se “nuk është gati për një takim me Vuçiqin”.

“Jam i sigurt se BE-ja në njoftimin e saj do të thotë se kush nuk donte bisedime sot”.

Sipas presidentit serb, Kurti dëshiron që Serbia ta njohë Kosovën dhe “tani kanë dalë me disa kërkesa të tjera, por në thelb është një njohje de jure”.

Vuçiq tha se gjatë takimeve dypalëshe është folur për gjithçka që ka të bëjë me Kosovën dhe zbatimin e marrëveshjeve, teksa i ka konsideruar “të suksesshme” takimet në Bruksel.

Ai shtoi se kryenegociatorët e Kosovës dhe Serbisë do të vazhdojnë bisedimet javën e ardhshme, “të martën ose të mërkurën”.

Paraprakisht, Vuçiq përmes një postimi në Instagram deklaroi se në takim ka insistuar edhe për themelimin e Asociacionit të komunave me shumicë serbe në Kosovë.

Në Bruksel sot janë mbajtur dy runde të takimeve dypalëshe mes përfaqësuesit të lartë për politikë të jashtme dhe siguri i Bashkimit Evropian, Josep Borrell, dhe të dërguarit të BE-së për dialogun, Mirosllav Lajçak, me kryeministrin e Kosovës, Albin Kurtin dhe presidentin serb, Vuçiq.

Pavarësisht se BE-ja kishte paralajmëruar se pas takimeve dypalëshe do të mbahej edhe një takim trepalësh, ai nuk ndodhi.

Para takimeve me Kurtin dhe Vuçiqin, shefi i diplomacisë evropiane, Josep Borrell, tha se pret që në takimin e sotëm të dialogut mes Kosovës dhe Serbisë të diskutohet për arritjet në dialog, por edhe për nisjen e zbatimit të Marrëveshjes në rrugën drejt normalizimit të raporteve.

Në një deklaratë për media, para nisjes së takimeve, Borrell tha se takimet paraprake të nivelit të lartë mes kryeministrit të Kosovës, Albin Kurti, dhe presidentit të Serbisë, Aleksandar Vuçiq, do të diskutohet për hapat drejt zbatimit të marrëveshjes.

“Fatkeqësisht, zbatimi i marrëveshjes [për normalizimin e raporteve] ende nuk ka nisur. Dhe shpresojmë që sot ne definitivisht të bisedojmë se si të sigurohemi që ne përfundimisht të lëvizim përpara me këtë marrëveshje. Lidhur me këtë, do të diskutojmë për hapat e radhës dhe është e qartë se ajo për të cilat palët janë pajtuar duhet të zbatohet. Marrëveshjet janë baza e veprimeve, por veprimet duhet të vijnë pas marrëveshjeve. Zbatimi është fjala kyçe”, tha Borrell.

Shefi i diplomacisë së BE-së kujtoi se takimet paraprake mes Kurtit dhe Vuçiqit kryesisht kanë qenë për “menaxhimin e krizave të njëpasnjëshme”, por tha se shpreson që ky takim të jetë ndryshe.

“Sot, në rundin e ri të dialogut shpresojmë se do të përçojë një mesazh tjetër dhe të përfundojë ndryshe. I dërguari ynë i posaçëm ka punuar dhe duam që me dy liderët të diskutojmë se çfarë është arritur në dialog gjatë mandatit tonë që nga viti 2019. Po ashtu, për ne do të jetë e rëndësishme që të dimë se si të dyja palët e shohin të ardhmen e dialogut të ndërmjetësuar nga BE-ja, se si palët duan ta vazhdojnë këtë proces”, tha Borrell.

Ai tha se pas disa muajsh, postin e tij dhe të Lajçakut do ta marrin persona të tjerë, por theksoi se “marrëveshjet, konkluzionet e Këshillit dhe pritjet e BE-së nuk do të ndryshojnë”.

“Normalizimi i raporteve mes Kosovës dhe Serbisë është në zemër të angazhimit të BE-së në Ballkanin Perëndimor. Normalizimi po ashtu është i lidhur ngushtë me rrugën e pranimit [në BE]”, tha Borrell.

Ndërkaq, para takimeve në Bruksel Vuçiq tha se nuk pret asnjë rezultat nga takimi me Kurtin.

“Nuk pres asgjë. Pres që [Kurti] të dramatizojë dhe të bërtasë pak, derisa t’i them që të ndalet. Do ta dëgjoj me kujdes Borrellin dhe Lajçakun, nuk kam asgjë kundër tyre, ata punojnë në rrethana të vështira. Ne do të luftojmë për interesat e popullit tonë. Nuk pres konkluzione të mëdha”, tha Vuçiq për gazetarët.

Takimi i parë i Kurtit dhe Vuçiqitkëtë vit zhvillohet në kohën kur zyrtarët evropianë, të angazhuar në ndërmjetësimin e procesit, janë drejt përfundimit të mandatit pesëvjeçar.

Kryediplomati evropian pritet të flasë për media pas takimit trepalësh.

Josep Borrell do të shërbejë si shef i diplomacisë evropiane deri në vjeshtë, ndërsa javën e ardhshme do të dihet se kush do ta pasojë atë.

Mirosllav Lajçak është emëruar ambasador i BE-së në Zvicër, por do të veprojë si ndërmjetës në dialog derisa të gjendet zëvendësuesi i tij.

“Shpresojmë që të dy liderët të vijnë me vizionin dhe guximin e nevojshëm politik për ta çuar Kosovën dhe Serbinë më afër të ardhmes së tyre evropiane”, tha Lajçak një ditë përpara takimit.

Me shumë mundësi, takimi i sotëm do të jetë i fundit në kuadër të dialogut, nikoqir i të cilit do të jetë Borrell.

Në Bashkimin Evropian nuk kanë pritshmëri të mëdha nga ai.

Gjithçka që BE-ja pret nga udhëheqësit e Kosovës dhe të Serbisë, është që ata ta konfirmojnë përkushtimin e tyre ndaj marrëveshjeve që kanë arritur vitin e kaluar në Bruksel dhe në Ohër.

Marrëveshja për rrugën drejt normalizimit të marrëdhënieve, që është arritur më 27 shkurt të vitit 2023 në Bruksel dhe Aneksi për zbatimin e saj që është arritur më 18 mars, 2023, në Ohër, nuk i kanë nënshkrimet e Kurtit dhe Vuçiqit, sepse presidenti i Serbisë ka refuzuar një gjë të tillë.

Asnjëra palë, deri më tash, nuk ka bërë ndonjë lëvizje drejt zbatimit të ndonjë elementi të kësaj marrëveshjeje.

Prishtina refuzon të punojë për zbatimin e pikës 7 të marrëveshjes, e cila i referohet formimit të Asociacionit të komunave me shumicë serbe, ndërsa Beogradi vazhdon ta shkelë nenin 4, ku thuhet se nuk do ta kundërshtojë anëtarësimin e Kosovës në organizatat ndërkombëtare.

Pavarësisht mungesës së nënshkrimeve, BE-ja këmbëngul se marrëveshja është ligjërisht e detyrueshme për të dyja palët.

Por, një prej arsyeve pse Kosova dhe Serbia duhet të jenë të kujdesshme në procesin e dialogut është edhe kushtëzimi i pagesave nga Plani Evropian i Rritjes për Ballkanin Perëndimor me përparimin në dialog.

Për Kosovën dhe Serbinë angazhimi konstruktiv në procesin e normalizimit të marrëdhënieve është një parakusht specifik. Dhe në mungesë të këtij angazhimi mund të pezullohen edhe pagesat nga kjo paketë ambicioze e BE-së. Prandaj ky pritet të jetë edhe një motiv shtesë që palët në dialog të jenë më konstruktive në të ardhmen.

Gjatë qëndrimit në Bruksel, Vuçiq do të ketë takim edhe me presidentin e Këshillit Evropian, Charles Michel.

Nuk ka njoftime për takime tjera të kryeministrit Kurti në Bruksel, përveç atyre në kuadër të dialogut.

Kurti dhe Vuçiq janë takuar për herë të fundit më 14 shtator të vitit të kaluar.

Në atë takim është diskutuar për zbatimin e Marrëveshjes drejt normalizimit të marrëdhënieve, por ai ka rezultuar i pasuksesshëm dhe ka përfunduar me akuzat e Kurtit se Lajçak “nuk është neutral”.

Dhjetë ditë më vonë ka ndodhur sulmi në Banjskë – fshat në veri të Kosovës – ku grupe të armatosura të serbëve kanë sulmuar policinë e Kosovës dhe kanë vrarë një polic.

Në përleshjet e armatosura që kanë pasuar, janë vrarë edhe tre sulmues serbë.

Në fund të tetorit ka pasur edhe një përpjekje të pasuksesshme për t’i afruar palët, kur janë bashkuar edhe liderët kryesorë evropianë: kancelari i Gjermanisë, Olaf Scholz, presidenti i Francës, Emmanuel Macron, dhe kryeministrja e Italisë, Giorgia Meloni.

Kurti dhe Vuçiq kanë pasur takime të ndara me udhëheqësit evropianë, por dakordimi nuk ka qenë i mundur.

Kurti ka këmbëngulur në nënshkrimin e Marrëveshjes për normalizimin e marrëdhënieve, ndërsa Vuçiq ka refuzuar. /Radio Evropa e Lirë

Ministrja e Drejtësisë, Albulena Haxhiu, ka reaguar pas vendimit të Gjykatës Kushtetuese në lidhje me Ligjin për Byronë për Verifikim dhe konfiskim të pasurisë së pajustifikueshme.

Në llogarinë e saj në Facebook, Haxhiu tha se vullneti i qytetarëve për drejtësi po tentohet të përmbyset nga një grusht njerëzish që ende u shërbejnë dhe i kanë borxhe nomenklaturës së vjetër, por që beteja për reforma do të vazhdojë dhe se byroja do të bëhet.

Haxhiu ka shtuar se PDK e dërgoi në Kushtetuese këtë projektligj për të bllokuar e sabotuar reformën në drejtësi. Ajo tha se arsyet për këtë i kanë të qarta të gjithë.

E para e Ministrisë së Drejtësisë tha se Kushtetueses iu deshën 16 muaj për të vlerësuar përputhshmërinë e këtij projektligji. Ajo shtoi se 5 nga 9 gjyqtarët vendosën që “Ligjin më të rëndësishëm në kuadër të pakos kundër korrupsionit e keqpërdorimit të detyrës zyrtare ta shpallin të pavlefshëm.”

Ajo ka thënë se kanë inkorporuar secilin rekomandim të Komisionit të Venediktit.

“Në mënyrë që gjithçka të jetë përbrenda parimeve dhe standardeve më të larta të BE-së, kemi inkorporuar secilin rekomandim të institucionit më të lartë të Këshillit të Evropës siç është Komisoni i Venedikut.”

Përfaqësuesi i lartë i BE-së për politikë të jashtme, Josep Borrell, ka folur përpara takimit të lartë në kuadër të dialogut Kosovë – Serbi.

Borrell tha se me kryeministrin e Kosovës, Albin Kurtin dhe presidentin serb, Aleksandar Vuçiq, janë takuar shumë herë vitin e kaluar, e që sipas tij, në disa çështje, diskutimet kanë qenë intensive, por u ankua se shumë herë është dashur të merren me menaxhim të krizave.

“Ne jemi takuar shumë herë vitin e kaluar. Në disa çështje, diskutimet kanë qenë intensive. Në pothuajse në të gjitha takimet në maj, në qershor, në shtator, ne më së shumti jemi fokusuar në menaxhimin e krizave. Disa ngjarje na kanë gjetur shumë të zënë duke u përpjekur për të gjetur zgjidhje për krizat e përditshme”.

“Në muajt e ardhshëm do të jenë emra të rinj në pozitat tona, por marrëveshjet dhe pritshmeritë e BE-së nuk do të ndryshojnë. Përgjegjësitë nga marrëveshjet për Kosovën dhe Serbinë nuk do të ndryshojnë. Normalizimi i marrëdhënieve mes Kosovës dhe Serbisë është në zemër të Bashkimit Evropian në angazhimin në Ballkanin Perëndimor”, tha Borrell.

Më tej, kryediplomati evropian tha se nga takimi i sotëm pret që më në fund të lëvizet përpara me Marrëveshjen Bazike, teksa tha se çka është arritur deri më tani, duhet të implementohet.

“Shpresoj që sot definitivisht do të diskutojmë se si më në fund do të lëvizim përpara bazuar në këtë marrëveshje. Për këtë do të diskutojmë hapat e ardhshëm dhe është e qartë se çka është arritur duhet të zbatohet. Marrëveshjet janë baza, por implementimi duhet t’i ndjek marrëveshjet. Sot do të punojmë në hapat konkretë për këtë implementim për t’i tejkaluar krizat e çdo ditshme me angazhim të plotë në këtë proces të normalizimit”, tha ai.

Gjykata Kushtetuese e ka shpallur të pavlefshëm në tërësi Ligjin për Byronë Shtetërore për Verifikimin dhe Konfiskimin e Pasurisë së Pajustifikueshme, raporton EO.

Në një njoftim për vendimin, Kushtetuesja ka thënë se pesë nene të këtij ligji bien ndesh me Kushtetutën e Kosovës.

Në fund, Kushtetuesja e ka shpallur të pavlefshëm në tërësi këtë ligj. Vendimin e ka marrë me pesë vota pro dhe katër kundër.

Ligji ishte dërguar për vlerësim në Kushtetuese nga deputetë të Partisë Demokratike të Kosovës.

“Gjykata ka vendosur që (i) njëzëri, të deklarojë kërkesën e pranueshme; dhe (ii) të konstatojë, me tetë (8) vota për dhe një (1) votë kundër, që pika 2.1 e paragrafit 2 të nenit 2 (Fushëveprimi) në lidhje me paragrafin 2 të nenit 34 (Shqyrtimi në shkallën e parë) të Ligjit të kontestuar, nuk është në përputhshmëri me paragrafin 1 të nenit 7 [Vlerat] të Kushtetutës dhe paragrafët 1 dhe 2 të nenit 46 [Mbrojtja e Pronës] të Kushtetutës në ndërlidhje me nenin 1 (Mbrojtja e pronës) të Protokollit nr. 1 të Konventës Evropiane për të Drejtat e Njeriut; (iii) të konstatojë, me tetë (8) vota për dhe një (1) votë kundër, që pika 2.2 e paragrafit 2 të nenit 2 (Fushëveprimi) në lidhje me paragrafin 3 të nenit 22 (Periudha e verifikimit të pasurisë) të Ligjit të kontestuar, nuk është në përputhshmëri me paragrafin 1 të nenit 7 [Vlerat] të Kushtetutës; (iv) të konstatojë, me gjashtë (6) vota për dhe tri (3) vota kundër, që pika 1.1 e paragrafit 1 të nenit 10 (Përbërja e Komisionit Mbikëqyrës dhe Kompensimi) të Ligjit të kontestuar, nuk është në përputhshmëri me nenin 106 [Papajtueshmëria] të Kushtetutës; (v) të konstatojë, me tetë (8) vota për dhe një (1) votë kundër, që pika 1.2 e paragrafit 1 të nenit 10 (Përbërja e Komisionit Mbikëqyrës dhe Kompensimi) të Ligjit të kontestuar, nuk është në përputhshmëri me paragrafin 1 të nenit 136 [Auditori i Përgjithshëm i Kosovës] dhe paragrafët 1 dhe 2 të nenit 137 [Kompetencat e Auditorit të Përgjithshëm të Kosovës] të Kushtetutës; (vi) të konstatojë, me gjashtë (6) vota për dhe tri (3) vota kundër, që pika 1.4 e paragrafit 1 të nenit 10 (Përbërja e Komisionit Mbikëqyrës dhe Kompensimi) të Ligjit të kontestuar, nuk është në përputhshmëri me paragrafin 1 të nenit 132 [Roli dhe Kompetencat e Avokatit të Popullit] dhe paragrafin 3 të nenit 134 [Kualifikimi, Zgjedhja dhe Shkarkimi i Avokatit të Popullit] të Kushtetutës; dhe (vii) të shpallë të pavlefshëm, me pesë (5) vota për dhe katër (4) vota kundër, në tërësinë e tij, Ligjin nr. 08/L- 121 për Byronë Shtetërore për Verifikimin dhe Konfiskimin e Pasurisë së Pajustifikueshme.”

Gjykata Kushtetuese sot përmes një njoftimi ka bërë të ditur se i jepet të drejtë Qeverisë së Kosovës lidhur me Ligjin për pagën minimale, duke konstatuar se neni 2 (Ndryshimi dhe plotësimi i Ligjit Nr. 04/L-261 për Veteranët e Luftës së Ushtrisë Çlirimtare të Kosovës, i ndryshuar dhe plotësuar me Ligjin Nr. 05/L-141) i dhe se i njëjti nuk është në kundërshtim me nenin 24 (Barazia para Ligjit) dhe nenin 46 (Mbrojtja e Pronës) të Kushtetutës së Kosovës.

“Gjykata, ka vendosur (i) njëzëri, që të deklarojë kërkesën të pranueshme; dhe (ii) njëzëri, që të konstatojë që neni 2 (Ndryshimi dhe plotësimi i Ligjit Nr. 04/L-261 për Veteranët e Luftës së Ushtrisë Çlirimtare të Kosovës, i ndryshuar dhe plotësuar me Ligjin Nr. 05/L-141) i Ligjit të kontestuar, nuk është në kundërshtim me nenin 24 [Barazia para Ligjit] dhe nenin 46 [Mbrojtja e Pronës] të Kushtetutës së Republikës së Kosovës në lidhje me nenin 1 (Mbrojtja e pronës) të Protokollit nr. 1 të Konventës Evropiane për të Drejtat e Njeriut; (ii) me tetë (8) vota për dhe një (1) kundër, që neni 3 (Ndryshimi dhe plotësimi i Ligjit nr.04/L-092 për Personat e Verbër) i Ligjit të kontestuar, nuk është në kundërshtim me nenin 24 [Barazia para Ligjit] dhe nenin 46 [Mbrojtja e Pronës] të Kushtetutës së Republikës së Kosovës në lidhje me nenin 1 (Mbrojtja e pronës) të Protokollit nr. 1 të Konventës Evropiane për të Drejtat e Njeriut; (iii) njëzëri, që neni 4 (Ndryshimi dhe plotësimi i Ligjit nr.05/L-067 për Statusin dhe të Drejtat e Personave Paraplegjik dhe Tetraplegjik) i Ligjit të kontestuar, nuk është në kundërshtim me nenin 24 [Barazia para Ligjit] dhe nenin 46 [Mbrojtja e Pronës] të Kushtetutës së Republikës së Kosovës në lidhje me nenin 1 (Mbrojtja e pronës) të Protokollit nr. 1 të Konventës Evropiane për të Drejtat e Njeriut; (iv) me tetë (8) vota për dhe një (1) kundër, që të konstatojë që neni 6 (Ndryshimi dhe plotësimi i Ligjit nr.03/L-212 të Punës) i Ligjit të kontestuar, nuk është në kundërshtim me nenin 51 [Mbrojtja Shëndetësore dhe Sociale] të Kushtetutës së Republikës së Kosovës; dhe (v) njëzëri, të shpallë, që në bazë të nenit 43 (Afati) të Ligjit nr.03/L-121 për Gjykatën Kushtetuese të Republikës së Kosovës, Ligji nr.08/L-142 për Ndryshimin dhe Plotësimin e Ligjeve që Përcaktojnë Shumën e Beneficionit në Lartësi të Pagës Minimale, Procedurat e Caktimit të Pagës Minimale dhe Shkallët Tatimore në të Ardhurat Personale Vjetore, i dërgohet Presidentes së Republikës së Kosovës për shpallje”, thuhet mes tjerash në njoftimin e Gjykatës Kushtetuese.

Në korrik të vitit të kaluar, Ligji për pagën minimale ishte dërguar në Gjykatën Kushtetuese.

Shefi i deputetëve të AAK-së, Besnik Tahiri, bashkë me një grup tjetër deputetësh kanë dërguar kohë më parë në Gjykatë Kushtetuese plotësim ndryshimet që janë bërë nga Qeveria e Kosovës rreth pagës minimale.

Ligji i ri parashihte rritjen e pagës minimale në Kosovë, që ishte miratuar më 13 korrik 2023 në Kuvend, por kishte hasur në kundërshtime nga veteranët e luftës në Kosovë.

Aleatët e NATO-s e kanë emëruar të mërkurën kryeministrin e Holandës, Mark Rutte, si shefin e ardhshëm të NATO-s, njoftoi aleanca ushtarake.

Emërimi i Ruttes u bë formalitet pasi rivali i tij i vetëm për këtë post, presidenti rumun Klaus Iohannis, njoftoi javën e kaluar dorëheqjen nga gara, pasi kishte dështuar të siguronte mbështetje.

“Këshilli i Atlantikut Verior vendosi ta emërojë kryeministrin holandez Mark Rutte si sekretar të Përgjithshëm të NATO-s, i cili do ta pasojë Jens Stoltenbergun”, tha NATO-ja në një komunikatë.

Rutte do ta marrë detyrën e sekretarit të Përgjithshëm të aleancës ushtarake nga 1 tetori 2024, kur i mbaron mandati shefit të tanishëm Jens Stoltenbergut, tha ajo.

Pasi shfaqi interesim për këtë post vitin e kaluar, Rutte fitoi mbështetje të menjëhershme nga anëtarët kyçë të aleancës, përfshirë Shtetet e Bashkuara, Britaninë, Francën dhe Gjermaninë.

Të tjerët ishin më të rezervuar, posaçërisht vendet e Evropës Lindore që argumentuan se ky post duhet të mbahet nga dikush prej rajonit të tyre për herë të parë.

Megjithatë, ata në fund e mbështetën Rutten, i cili është një kritik i ashpër i presidentit të Rusisë, Vladimir Putin, dhe aleat i patundur i Ukrainës.

Stoltenberg, i cili ka 10 vjet në krye të NATO-s, tha se po e lë aleancën në “duar të sigurta” dhe e quajti Ruttes një lider të “fuqishëm transatlantik”.

“E mirëpres vendimin e aleatëve të NATO-s për ta zgjedhur Mark Rutten si pasuesin tim. Mark është një transatlantik i mirëfilltë, një lider i fuqishëm. I uroj atij sukses teksa ne vazhdojmë ta forcojmë NATO-n për sfidat e tanishme dhe të ardhshme”, tha Stoltenberg.

NATO-ja merr vendime me bashkëpajtim, prandaj Rutte, i cili po largohet nga politika në Holandë pas gati 14 vjetësh, mund të konfirmohej vetëm pasi ta fitonte mbështetjen e të gjitha 32 vendeve anëtare.

Rutte do të përballet me sfidën për ta ruajtur mbështetjen e aleatëve për luftën e Ukrainës kundër Rusisë, duke e siguruar njëkohësisht që NATO-ja të mos zhytet në luftë me Moskën.

Lidhjet e Mark Ruttes me Kosovën ndër vite

Te Mark Rutte autoritetet në Kosovë shohin një partner me të cilin mund të bisedojnë për një gamë të gjerë çështjesh – nga avancimi i vendit në rrugën drejt integrimit në Bashkimin Evropian deri te siguria dhe stabiliteti afatgjatë.

Vizitën e fundit në Kosovë Rutte e zhvilloi korrikun e kaluar, kur së bashku me homologun e atëhershëm nga Luksemburgu, Xavier Bettel, i bënë thirrje Kosovës dhe Serbisë që t’i ulnin tensionet dhe t’i ktheheshin dialogut për normalizimin e marrëdhënieve.

Presidentja e Kosovës, Osmani, takoi për herë të fundit Rutten javën e kaluar, në margjina të një samiti për paqen në Ukrainë, që u mbajt në Zvicër.

“Samiti ishte një mundësi e shkëlqyer për të biseduar me kryeministrin holandez, Mark Rutte, për rëndësinë e së ardhmes euroatlantike të Kosovës”, shkroi Osmani në X./ REL

Kryeministri i Kosovës, Albin Kurti, dhe presidenti i Serbisë, pritet të takohen në Bruksel sot (e mërkurë) për herë të parë që nga shtatori i vitit të shkuar dhe për herë të parë pas sulmit terrorist në Banjskë të Zveçanit.

Një ditë më herët, Kurti u shpreh se takimet në dialog do të jenë në funksion të rikapitullimit të procesit trevjeçar e edhe të prezantimit të ideve se si mund të ecet përpara.

Kryeministri Albin Kurti nuk ka shprehur pritje të mëdha nga takimi i parë pas nëntë muajsh. Por, ai ka theksuar se në takime me ndërmjetësit evropianë, e edhe me Vuçiqin, do të shprehen edhe ide për rrugën përpara.

“Besoj që përveç të tjerash, takimi i nesërm edhe bilateral edhe trilaterial do të jetë në funksion të rikapitullimit të këtij procesi tre vjeçar, të shohim se në çfarë gjendje ndodhemi dhe cilat janë idetë se si mund të ecet përpara”, ka deklaruar Kurti.

Sipas Kurtit, zgjidhja evropiane për fqinjësi të mirë me Serbinë, është marrëveshja e arritur vitin e shkuar në Bruksel dhe aneksi i saj i dakorduar në Ohër.

“E cila nuk është realizuar deri më sot për shkak se para se të kemi edhe zbatim kemi shkelja sistematike të Marrëveshjes nga Serbia, e kjo ka kulmuar me letrën e Bërnabiq nga 13 dhjetori i viti të kaluar, ku Serbia u tërhoq nga Marrëveshja Bazike, e prej aty na vijnë të gjitha problemet. Pra nga mos respektimi nga shkelja e marrëveshjes bazike vijnë problemet në raport me Serbinë”, është shprehur Kurti.

Ai u bëri thirrje vendeve anëtare të Bashkimit Evropian, që t’ia heqin masat Kosovës, ashtu siç ka rekomanduar përfaqësuesi i lartë i BE-së për politikë të jashtme dhe siguri, Josep Borrell.

Para takimit me presidentin Vuçiq, kryeministri Kurti do të zhvillojë takim me përfaqësuesin e Lartë të BE-së, Josep Borrell dhe me emisarin për dialog, Miroslav Lajçak.

Për herë të fundit Kurti e Vuçiqi u takuan më 14 shtator të vitit të kaluar, disa ditë para sulmit në Banjskë të Zveçanit, kur një grup i armatosur serbësh vrau policin Afrim Bunjaku, e në konfliktin pasues me Policinë u vranë tre sulmues. Pjesa më e madhe e grupit ka ikur në drejtim të Serbisë, ndërsa përgjegjësinë e ka marrë Milan Radoiçiqi, që gjendet i lirë në Serbi.

Pas kësaj, për udhëheqësit e Kosovës vazhdimi i dialogut u konsiderua i pakuptimtë, derisa BE-së iu kërkua që të marrë masa ndaj Serbisë, si organizatore e sulmit. Që atëherë Borrelli e emisari për dialog, Miroslav Lajçak nuk patën arritur t’i bindnin palët që të zhvillonin një rund tjetër bisedimesh.
Megjithëse Kurti-Vuçiq qenë dakorduar më 27 shkurt në Bruksel për një marrëveshje 11-pikëshe për normalizim dhe në Ohër për Aneksin e zbatimin e saj, nënshkrimet vazhdojnë të mungojnë për shkak të refuzimit të Serbisë. Me këtë marrëveshje në nenin 4 ishte arritur pajtimi që Serbia nuk do ta bllokojë anëtarësimin e Kosovës në organizata ndërkombëtare. E me nenin 7 u rikonfirmua se Serbia e fiton ngritjen e Asociacionit të komunave me shumicë serbe.

Bashkimi Evropian vazhdimisht i ka kritikuar palët për moszbatim të marrëveshjes. Por, konkretisht para një jave Peter Stano e ka akuzuar Serbinë se po e shkel ujdinë, duke iu referuar lobimit serb për mosanëtarësimin e Kosovës në organizata të ndryshme ndërkombëtare.

Një javë më parë ambasadorë të SHBA-së e të Gjermanisë në Kosovë theksuan se dialogu Prishtinë-Beograd duhet të përfundojë me njohje reciproke dhe se është i paimagjinueshëm anëtarësimi i tyre në BE, pa e njohur pavarësinë e njëra-tjetrës.

Ndërmjetësve të dialogut, Josep Borrell e Miroslav Lajçak, u skadon mandati së shpejti. Derisa Borrelli do të shërbejë në krye të diplomacisë evropiane deri në vjeshtë, Lajçaku është emëruar ambasador i BE-së në Zvicër, por ai do të veprojë si ndërmjetës në dialog deri sa të gjendet një zëvendësues.

Qytetarëve të Kosovës u duhet të shpenzojnë qindra, mijëra e ndonjëherë edhe miliona euro për të kryer transplantimin e organeve jashtë vendit. Kjo për shkak se vendi ynë është ndër të vetmit në rajon, që nuk e kryen këtë shërbim mjekësor.

Në vendin tonë nuk është arritur asnjëherë që të miratohet ligji për transplantimin e organeve. Derisa nevoja për miratimin e këtij ligji po konsiderohet të jetë e domosdoshme.

Deputeti i Partisë Demokratike të Kosovës, anëtar në komisionin për Shëndetësi, Bekim Haxhiu thotë se ky ligj është jashtëzakonisht i domosdoshëm. Për KosovaPress Haxhiu thekson se si pasojë e mungesës së këtij ligji, shumë pacientë shpenzojnë për t’u trajtuar jashtë vendit.

“Është jashtëzakonisht i domosdoshëm, ka nevojë Kosova për ligjin për transplantimin e organeve. Në mandatin e kaluar kemi iniciuar si komision parlamentar për shëndetësi draftimin e këtij projektligji. Për fat keq në ditën kur ne ishim në mbledhje të komisionit për ta shtyrë përpara këtë projektligj, ka shkuar vendi në zgjedhje dhe ajo çështje ka mbetur për legjislaturën e ardhshme. Draftligji është i gatshëm, është në pjesën e dokumentacionit të administratës së komisionit parlamentar për shëndetësi. Kjo qeveri nuk e ka përgatitur një projektligj të ri për transplantimin e organeve. Në agjendë legjislative të viti 2021 ishte e planifikuar që të vije në kuvend. Pastaj në të gjitha agjendat legjislative të qeverisë Kurti është larguar dhe nuk është sjellë në kuvend. Disa herë kam kërkuar në komisionin parlamentar për shëndetësi që ta inciojmë si komision parlamentar për shëndetësi, mirëpo nuk po ka një mbështetje nga ana e shumicës parlamentare të Vetëvendosjes…Nevoja është shumë e madhe, ka shumë pacientë që edhe shpenzojnë edhe vuajnë në mungesë të këtij ligji”,

Deputeti i Aleancës për Ardhmërinë e Kosovës, Shemsedin Dreshaj thotë se mungesa e këtij ligji është vetëm një segment i vogël i problematikës së madhe të shëndetësisë në Kosovë.

Dreshaj thotë për KosovaPress, potencon se qeveria aktuale shtynë përpara vetëm proceset që atyre u interesojnë.

“Çdo ligj i cili e rregullon një situatë të caktuar, një problematikë të caktuar brenda vendit, është i domosdoshëm për vendin. Mendoj, se ky ligj për kundër mangësie që i ka është mirë që të debatohet, të përmbyllet, dhe të aprovohet…Ne kemi pasur ligje edhe më të rëndësishme të cilat deri më sot nuk kanë ardhur. Pra, kanë qenë në agjendën legjislative dhe nuk kanë ardhur deri tek neve. Kjo legjislaturë shtyn përpara vetëm procese që këtyre ju interesojnë…Ky ligj është vetëm një segment i vogël i problematikës së madhe në shëndetësi që Kosova ballafaqohet me të përditë”,

Ndërkaq, deputetja e Lëvizjes Vetëvendosje dhe kryetarja e komisionit për Shëndetësi, Fatmire Kollçaku derisa pohon se është më se e domosdoshme që qytetarët ta kenë këtë shërbim, thotë se janë në pritje të ligjit të ri për shëndetësi.

Në një prononcim për KosovaPress, Kollçaku potencon se ka mjekë që janë të gatshëm për të kryer transplantimin e organeve.

“Ne jemi në pritje të ligjit të ri për shëndetësinë për të krijuar vërtetë të gjitha parakushtet, për të filluar edhe me transplantim të organeve. Mirëpo, deri tani ka munguar, se duhet përgatitur institucionet dhe ekspertët për këtë çështje. Ne kemi ekspertë, kemi mjekë që janë të gatshme por është dashur që të përgatitet edhe baza ligjore edhe kushtet për fillim. Unë besoj që shumë shpejtë si Kosovë ne do ta rregullojmë këtë çështje. Është më se e domosdoshme që qytetarët tanë ta kenë këtë shërbim këtu”, thotë Kollçaku.

Kujtojmë se nismën për këtë ligj e kishte marrë ish-ministri i Shëndetësisë, Ferid Agani. Në vitin 2013, ish-ministri shtyu përpara projektligjin për transplantimin e organeve, që lejonte operacionet edhe në klinikat private, por që u tërhoq me sugjerimin e ndërkombëtarëve.

Ani pse janë ndërruar disa ministra, miratimi i këtij ligji vazhdon të jetë në proces.

Ministria e Shëndetësisë në një përgjigje me shkrim për KosovaPres,s thotë se grupi punues ka hartuar draftin fillestar për këtë ligj dhe se pritet të finalizohet në fund të qershorit .

MSh-ja thotë se me miratimin e këtij koncept dokumenti do të hapet rruga për hartimin e Projektligjit për Transplantimin e Organeve, i cili është paraparë për vitin 2025.

“Ministria e Shëndetësisë në kuadër të Planit Kombëtar për Zhvillim 2024 – 2026 ka paraparë hartimin e koncept dokumentit për transplantim të organeve.Për hartimin e këtij koncept dokumenti është themeluar grupi punues, i cili ka hartuar draftin fillestar dhe pritet të finalizohet deri në fund të Qershorit.Me miratimin e këtij koncept dokumenti do të hapet rruga për hartimin e Projektligjit për Transplantimin e Organeve, i cili është paraparë për vitin 2025”, thuhet në përgjigjen e MSh-së.

Themeluesi i WikiLeaks u emocionua teksa u dha dënimi përfundimtar, duke i dhënë fund rrugëtimit të tij të jashtëzakonshëm

“Emri im është Julian Paul Assange”.

Me këtë, themeluesi i WikiLeaks shqiptoi fjalët e para që gazetarët dhe mbështetësit e mbledhur i kishin dëgjuar prej tij, pasi kishte filluar kapitulli i fundit – dhe ndoshta përfundimtari – i jashtëzakonshëm në betejën e tij ligjore, raporton The Guardian.

Në një gjykatë me panele druri, rrëzë një kodre të harlisur në bregun e Saipanit, Assange priti tri orë të një seance dëgjimore që do ta shihte atë të deklarohej fajtor për shkeljen e ligjit të spiunazhit të SHBA-së, në një marrëveshje që do ta lejonte atë të ribashkohej me familjen e tij në Australi,.

Teksa hyri në gjykatë nën një qiell blu flakërues, Assange nuk mori asnjë pyetje nga mediat e shumta – shumë prej të cilëve kishin fluturuar mijëra kilometra drejt këtij vendi të largët amerikan me 40,000 njerëz në Ishujt Mariana Veriore. Njëri pyeti nëse atij i pëlqente më shumë moti në Saipan apo në Londër.

Kryegjyqtarja Ramona V Manglona hapi procedurën. Ajo theksoi se salla e gjyqit ishte e mbushur në mënyrë të pazakontë dhe i kërkoi Assange të konfirmonte atë që kishte bërë dhe pse po e pranonte fajin.

Assange u përgjigj se duke punuar si gazetar ai kishte inkurajuar një burim për të ofruar informacion të klasifikuar dhe besonte se amendamenti i parë e mbronte atë aktivitet. Ai tash po pranonte se në fakt ishte një shkelje e aktit të spiunazhit të SHBA-së.

I pyetur përsëri nëse ai po e pranonte fajin sepse ai është “në fakt fajtor për atë akuzë”, Assange bëri një pauzë të gjatë, përcjell Gazeta Express.

“Jam” tha ai.

Ndërsa seanca e paprecedentë vazhdoi, gjyqtarja theksoi se koha e mbajtjes së saj ishte kyçe për rezultatin e saj.

“Nëse ky rast do të paraqitej para meje diku afër vitit 2012, pa përfitimin e asaj që di tani, se ju keni vuajtur një periudhë burgimi… në dukje një nga objektet më të rënda në Mbretërinë e Bashkuar… nuk do të isha aq e prirur ta pranoja këtë marrëveshje për pranimin e fajësisë para meje”, tha ajo.

“Por është viti 2024”.

Manglona deklaroi se do t’i pranonte kushtet e marrëveshjes për pranimin e fajësisë së arritur midis Assange dhe qeverisë së SHBA-së. Assange u ftua të qëndronte para saj dhe ta merrte dënimin e tij, me kohën e vuajtur tashmë në një burgun britanik që do të thotë se ai do të lirohej menjëherë, pa periudhë mbikëqyrjeje.

“Me këtë deklaratë duket se do të mund të dilni nga kjo sallë gjyqi si një njeri i lirë. Shpresoj se do të rivendoset pak paqe”, tha Manglona.

Themeluesi i WikiLeaks u shfaq emocional teksa ia tundi kokën gjyqtares, duke pranuar vendimin.

“Duket se ky rast përfundon me mua këtu në Saipan”, vazhdoi Manglona, ​​duke e pyetur nëse i kuptonte të gjitha detajet e marrëveshjes.

Assange u përgjigj, me zë pak të ngjirur: “Po.”

Ai shtrëngoi kravatën dhe mbajti syzet në dorë ndërsa gjyqtarja po ia kumtonte formalitetet e fundit.

“Me këtë… zoti Assange me sa duket është një ditëlindje e hershme e lumtur për ju”, tha ajo.

“Shpresoj se do ta filloni jetën tuaj të re në një mënyrë pozitive”.

Ndërsa Assange përqafoi avokatët e tij, shtrëngoi duart e atyre që e kishin përcjellur dhe firmoste autografe për mbështetësit, ai filloi të përlotet.

Përpara Paqësorit shkëlqyes, pranë një plazhi ku kotele endacake vraponin mes pemëve, një sagë ligjore 14-vjeçare mori një fund befasues dhe të papritur.

Është përfshirë nga zjarri objekti në ndërtim i Qendrës Urgjente dhe Mjekësisë Familjare në Lipjan, raporton ATVlive.

Derisa ende nuk dihet shkaktari i zjarrit, nuk raportohet për persona të lënduar.

Kujtojmë se gurthemeli për ndërtimin e QKMF-së në Lipjan u vu në dhjetor të vitit 2023, derisa punimet ishin planifikuar të përfundonin në 2025-tën.