Tag: Ballina

Përgatiti: Benita Zeneli

Kodi penal parasheh dënimin maksimal prej 3 vjetësh për ata që ushtrojnë dhunë në familje.

Por, deri më tani në Kosovë asnjë rast i tillë nuk është dënuar me kaq vjet burgim.

Bazuar në këtë, në drejtim të institucioneve të drejtësisë u adresuan disa kritika e kërkesa.

“Edhe sot më duhet me zë të lartë të thërras institucionet që të adresojnë përgjegjësitë që kanë, të mos i neglizhojnë rastet e dhunës në familje dhe që të marrin veprimet në përputhje me legjislacionin në fuqi, në raport me këto raste”, tha ministrja e Drejtësisë, Albulena Haxhiu.

Ndërkohë, derisa foli për programin kombëtar për kryerësit e Dhunës ndaj Grave të hartuar nga MD-ja, Haxhiu theksoi se janë trajnuar 15 profesionistë, ndërkaq ky program mori lëvdata nga zyra e Këshillit të Evropës në Prishtinë.

“Mangësi që është vërejtur gjatë pilotimit është kohëzgjatja e ulët e dënimeve, pra dënimet e ulëta kanë bërë që gjatë kohës sa të dënuarit kanë qenë duke e ndjekur këtë program, kanë përfunduar dënimet e tyre dhe mendoj se kjo ka sjellë situatën që ata është dashur ta ndërpresin këtë program. Programi kombëtar për kryesit e dhunës ndaj grave nuk është përgjegjësi të zbatohet vetëm nga MD-ja. Fillimi i zbatimit efektiv nis pikërisht atëherë kur prokurori ose gjyqtari e integrojnë programin si pjesë të dënimit dhe kryesve të dhunës, duke e mbajtur përgjegjës për krimin e bërë dhe duke i dhënë dënimin e merituar”, tha Haxhiu.

“Është një program psiko-social që i mban kryesit përgjegjës për krimet që kanë kryer dhe i mëson ata që t’i ndalin këto sjellje të dhunshme dhe të ndërtojnë raporte të respektit të ndërsjellët. E shoh përkushtim tuaj për vlerat tona të përbashkëta dhe luftën kundër dhunës gjinore dhe grave dhe është privilegj të punojmë për ju…”, tha Tabkut Soykan, zëvendësshef i Zyrës së Këshillit të Evropës.

Në nëntor të vitit 2023, ministria e Drejtësisë ka lansuar “Programin Kombëtar për Trajtimin e Kryerësve të Dhunës ndaj Grave”, i cili u pilotua në Qendrën Korrektuese në Dubravë për 6 muaj.

Përgatiti: Fatlum Jashari

Varësisht vëmendjes dhe përkushtimit të presidentit të ri të SHBA-së, Donald Trump, karshi dialogut Kosovë-Serbi, në vlerësimin e opinionistëve ky proces mund të gjendet mes një “status quo”-je të re dhe një zgjidhjeje eventuale.

Duke përmendur rrethanat në të cilat ndodhet Kosova dhe pafuqinë e BE-së për të çuar e vetme procesin përpara, sipas Bekim Kabashit, kthimi i Trumpit në Shtëpinë e Bardhë, në një fazë fillestare mund të ketë ndikim negativ në dialog.

“Kosova tash po hyn në një fazë të re kur është nën sanksione të BE-së, në një pasiguri të madhe në hapat integrues drejt BE-së dhe NATO-s, një humbje e madhe, e jashtëzakonshme, e një mundësie siç ka qenë ajo e anëtarësimit në Këshillin e Evropës – gjë për të cilin tanimë nuk mund të shpresojmë se mund të ndodhë, sepse ka divergjenca brenda partnerëve perëndimorë. SHBA-ja të mos flasim, tash është e pasigurt se si do të jenë këto raporte dhe se ku do të fokusohet SHBA-ja, presidenti Trump”, tha gazetari Bekim Kabashi.

Duke përmendur se fokusi i Trumpit mund të jetë në zhvillime më të mëdha gjeo-politike, megjithatë Kabashi sheh një mundësi për lëvizje.

“Ajo çfarë mund ta shpëtojë dhe ndihmojë Kosovën është, nëse interesi i arritjes së paqes me Kosovës dhe Serbisë lidhet me ndonjë interes gjeopolitik – e që është e mundshme. Kjo është përfundimi i luftës në Ukrainë. Nëse mund të ndërlidhet diçka me atje, atëherë Kosova dhe Serbisë do t’i bëhet presion për të shtyrë procesin e paqes. Përndryshe do të vazhdojmë kështu edhe për një periudhë të gjatë”, shtoi Kabashi.

Derisa në fillim pret një rishikim të gjendjes në terren në raport me ujditë e Brukselit, atë të Uashingtonit, profesori Dritëro Arfi tha se normalizimi Kosovë-Serbi, me kompromise, mund të shihet si sukses i parë i Trump në politikën e jashtme.

“Nëse Kosovën dhe Serbinë nuk mund ta zgjidhësh, Ukraina, Lindja e Mesme dhe Kina janë kafshata jashtëzakonisht të mëdha. Pra duke filluar nga hapet e vegjël dhe sukseset e vogla, mund të determinohet edhe suksesi i madh. Shpresoj që ndoshta kjo është logjika që administrata e re e Trump mund ta ndërtojë në Kosovë dhe në Serbi. Dhe, të mos befasohemi në shumë sesa këto marrëveshje, nuk përjashtohet as njohja reciproke mes Kosovës dhe Serbisë”, tha Arfi.

Gjatë mandatit të Joe Biden, Kosova dhe Serbia nën lehtësimin e BE-së u dakorduan për marrëveshjen bazë dhe shtojcën, por pa ecur me zbatim.

Paraprakisht, në fund të mandatit të parë të Trump, më 4 Shtator 2020, Kosova dhe Serbia u dakorduan për një listë zotimesh në Shtëpinë e Bardhë.

Nga lista që ka tani, Zyrës së Prokurorit të Specializuar të Kosovës (ZPS) i kanë mbetur edhe 43 dëshmitarë për t’i thirrur që të dëshmojnë fizikisht në sallën e gjyqit në gjykimin ndaj Hashim Thaçit, Kadri Veselit, Rexhep Selimit dhe Jakup Krasniqit.

Kjo është bërë e ditur nga zëdhënësi i DhSK-së, Michael Doyle i cili tha se numri i mbetur i dëshmitarëve që pritet të dëshmojnë ka ardhur si rezultat i njoftimit të ZPS-së që nuk do të thërrasë 12 dëshmitarë të tjerë e deklaratat e tetë të tjerëve do të pranohen me shkrim, raporton “Betimi për Drejtësi”.

“Në të njëjtën çështje gjyqësore, më 1 nëntor, Prokuroria njoftoi Trupi Gjykues se nuk synon më të thërrasë 12 dëshmitarë nga lista e mëparshme dhe synon të paraqesë deklaratat e tetë dëshmitarëve me shkrim, në vend të dëshmisë gojore në sallë të gjyqit. Në të njëjtin parashtrim Prokuroria thekson se pas këtyre ndryshimeve, numri i dëshmitarëve që japin dëshmi në sallë të gjyqit në kuadër të paraqitjes së provave prej Prokurorisë është ulur në 43”, tha ai gjatë konferencës javore.

Ndërsa, në rast të ndryshimeve shtesë në këtë listë, ZPS-ja ka njoftuar se do ia bëjë të ditur këtë gjë gjykatës deri në pushimin e dhjetorit.

“Prokuroria tha gjithashtu se pret, që deri në pushimin e gjykatës në dhjetor, të jetë në gjendje të njoftojë Trupin Gjykues lidhur me ndryshime shtesë për listën e dëshmitarëve”, tha Doyle.

Ndryshe, ai tregoi se në të njëjtën çështje gjyqësore, dëshmitari i 103-të, Shukri Buja ka dhënë dëshmi gjatë kësaj jave.

“Dëshmitari, Shukri Buja, dha dëshmi kryesisht në seancë të hapur, megjithëse disa pjesë të seancës ishin të mbyllura”, tha Doyle.

Doyle ka njoftuar se gjykimi ndaj Sabit Januzit, Imet Bahtijarit dhe Haxhi Shalës pritet të fillojë më 14 nëntor 2024.

Sipas Michael Doyle, në seancën e parë të gjykimit do të dëgjohen deklaratat hyrëse të ZPS-së dhe dy prej ekipeve mbrojtës.

“Gjatë deklaratave hyrëse, palët do të paraqesin argumentet e tyre, përfshirë provat që synojnë t’i parashtrojnë për të mbështetur ato. Në fillim të seancës të së enjtes së ardhshme, do të lexohet aktakuza dhe Kryegjykatësja do të informojë të akuzuarit për të drejtat e tyre, do të pyesë të akuzuarit nëse i kuptojnë akuzat kundër tyre dhe do t’u japë mundësinë për të konfirmuar vetëdeklarimet e tyre fillestare të pafajësisë. Pasi të jenë lexuar akuzat në aktakuzë, Prokuroria do të ketë dy orë për të bërë deklaratën hyrëse, pasuar nga Mbrojtja e Januzit, së cilës i është caktuar një orë dhe Mbrojtja e Haxhi Shalës, së cilës i janë caktuar 30 minuta”, ka thënë Doyle gjatë konferencës javore.

Ndërsa, sipas tij mbrojtja e Bahtijarit kishte thënë se parapëlqen që të bëjë deklaratat hyrëse pasi prokuroria të përfundojë me paraqitjen e provave të saj.

“Aktakuza pretendon se midis 5 prillit 2023 dhe 12 prillit 2023, z. Januzi dhe z. Bahtijari, me udhëzim të z. Shala, u takuan secili më vete me dëshmitarin në dy raste për ta nxitur atë që të tërhiqte dëshminë, ose të mos jepte dëshmi në proceset zyrtare para DHSK-së, ndër të tjera përmes kërcënimit të rëndë dhe premtimit për dhurata ose të ndonjë forme tjetër të përfitimit. Të akuzuarit akuzohen për pengim të personave zyrtarë në kryerjen e detyrave zyrtare dhe frikësim gjatë procedurës penale”, tha Doyle.

Ai tha se gjykimi mund të ndiqet në tri gjuhet zyrtare të gjykatës (shqip, anglisht dhe serbisht) në faqen e tyre të ineternetit e cila transmetohet me 45 minuta vonesë.

Gjithashtu, ai tha se gjykimi mund të ndiqet edhe nga galeria për publikun në ambientet e gjykatës.

Tutje, Doyle tha se në këtë rast, më 5 nëntor ishte hedhur poshtë një kërkesë e ZPS-së për pranimin në prova dëshmitë e dy dëshmitarëve me shkrim. Arsyeja e hedhjes së kërkesës ishte për shkak se Prokuroria kishte parashtruar kërkesën pas kalimit të afatit për parashtrim.

Ndryshe, Dhomat e Specializuara të Kosovës në Hagë, çdo të enjte, në orën 14:30, përmes platformës online “Zoom” mbajnë informim javor ku ofrojnë informacione të përditësuara mbi zhvillimet e fundit lidhur me procedurat gjyqësore dhe veprimtaritë në këtë gjykatë.

Ish-komandant i Zonës Operative të Nerodimes, Shukri Buja, pas pesë vjet hetimesh, është liruar nga të gjitha akuzat e Prokurorisë Speciale të Dhomave të Specializuara të Kosovës në Hagë, duke thënë se ky është rasti i parë i mbyllur për veprat penale të krimeve të luftës të hetuara nga kjo prokurori në mënyrë zyrtare.

Ai, përmes një postimi në facebook, ka thënë se kjo është një fitore e madhe dhe e rëndësishme, e cila vërteton pafajësinë e tij, por edhe pastërtinë dhe lavdinë e UÇK-së.

Postimi i Shukri Bujës në facebook:

Të nderuar qytetarë!

Kam kënaqësinë t’ju njoftoj se pas një procesi të gjatë hetimor që zgjati mbi pesë vjet prej 2019, më në fund jam liruar nga të gjitha akuzat e Prokurorisë Speciale të Dhomave të Specializuara të Kosovës në Hagë!

Kjo është një fitore e madhe dhe e rëndësishme, e cila vërteton pafajësinë time por edhe pastertinë dhe lavdine e UÇK-së.

Falë avokatëve të mi, Sir Geoffrey Nice dhe Taulant Hodaj, dhe insistimit të tyre për të mbyllur hetimet për mungesë provash, këtë javë mora konfirmimin zyrtar që gjithçka është mbyllur përfundimisht.

Ky është rasti i parë i mbyllur për veprat penale të krimeve të luftës të hetuara nga kjo Prokurori në menyrë zyrtare.

Besoj se ky rast im do të kontribuojë që drejtësia të thotë fjalën e fundit për bashkëluftëtarët tanë që ende gjenden në Hagë dhe shpresoj që edhe ata të kthehen faqebardhë dhe fitimtarë sa më shpejtë.

Lufta jonë, si popull, ka qenë një përpjekje e drejtë dhe legjitime për liri kundër okupatorit serbo-jugosllav, të cilët kanë kryer krime të rënda ndaj popullit tonë. Lufta jonë çlirimtare ishte e imponueshme dhe e drejtë.

Ky realitet u vërtetua nga rasti im dhe shpresoj se do të vërtetohet gjithashtu edhe nga rasti i bashkëluftëtarëve tanë që po përballen ende me proceset në Hagë.

Një falënderim i veçantë shkon për familjen time për mbështetje të palëkundur gjatë këtyre viteve, për qytetarët e Republikës së Kosovës që më mbështetën dhe më besuan, si dhe për avokatët e mi për angazhimin dhe kontributin e tyre të pandërprerë deri në epilogun e këtij rasti.

Me respekt,
Shukri Buja

Një person i moshës 37-vjeç ka mbetur i vrarë, si pasojë e të shtënave me armë zjarri sot në qytetin e Gjilanit.

Siç njoftoi Policia, viktima është gjetur i shtrirë skaj rrugës ”Mërgimtarët e Gjilanit”, pa shenja jete.

Në njoftimin e Policisë thuhet se vdekjen e viktimës e ka konstatuar ekipi nga emergjenca e spitalit të Gjilanit dhe se viktima shtetas kosovar dyshohet se është qëlluar nga arma e zjarrit.

“Ju njoftoj se me datën 07.11.2024 rreth orës 13:52 kemi pranuar informacion se një person është i shtrirë skaj rrugës ”Mërgimtarët e Gjilanit” në qytetin e Gjilanit. Njësitet policore relevante kanë dalë me urgjencë në vendin e ngjarjes se bashku me një ekip nga emergjenca e spitalit të Gjilanit të cilët ka konstatuar se viktima është pa shenja jete.
Nga hetimet e para dyshohet se viktima shtetas i Kosovës i vitit të lindjes 1987 është qëlluar nga armë zjarri”, njoftuan nga Policia për ATV-në.

Tutje, Policia njoftoi se në koordinim me Prokurorin e Shtetit, njësiti i hetimeve rajonale ka filluar hetimet në identifikimin e personave të dyshuar, ndriçimin dhe sqarimin e rrethanave të këtij rastit.

Ndërkohë, me urdhër të Prokurorit të Shtetit trupi i pajetë është dërguar në Institutin e Mjekësisë Ligjore në Prishtinë, për obduksion./atvlive.tv/

Bashkimi Evropian tha se Qeveria e Kosovës nuk mund të hartojë Statutin e Asociacionit jashtë dialogut, të lehtësuar në Bruksel.

Zëdhënësi i BE-së, Peter Stano tha se BE-ja e mbështetur nga vendet e saj anëtare dhe partnerët e saj përfshirë SHBA-në, zyrtarisht e ka paraqitur draft–statutin evropian për krijimin e Asociacionit. Ai tha se ky draft i është prezantuar personalisht kryeministrit Kurti nga lehtësuesi i BE-së së bashku me këshilltarët e sigurisë kombëtare të Gjermanisë, Francës dhe Italisë dhe përfaqësuesi i posaçëm i SHBA-së. Stano tha se Qeveria e Kosovës nuk mund të heq dorë nga përgjegjësitë e saj të dialogut ose t’i delegojë ato tek komunat me shumicë serbe.

“Në vitin 2013, Kosova nënshkroi Marrëveshjen e Brukselit, e cila u ratifikua nga Kuvendi i Kosovës me shumicë prej dy të tretave. 11 vjet më vonë, Kosova ende nuk i ka ndërmarrë hapat e nevojshëm drejt krijimit të saj dhe për këtë arsye po dështon në përmbushjen e detyrimit të saj të qartë sipas ligjit ndërkombëtar, i cili më pas u përsërit në marrëveshjet e 2015 dhe 2023. Sipas Marrëveshjeve përkatëse të Dialogut të 2013 dhe 2015, Statuti për themelimin e ASM-së duhet të hartohet dhe të diskutohet në Dialog. Çdo propozim duhet të diskutohet me Serbinë dhe ndërmjetësuesin e BE-së dhe të jetë në përputhje me marrëveshjet e vitit 2013 dhe 2015. Kjo gjithashtu do të thotë se Qeveria e Kosovës nuk mund të hartojë Statutin jashtë Dialogut”, tha Stano për RTV21.

Kryeministri, Albin Kurti, ka refuzuar të themelojë Asociacionin mbi propozimin evropian duke thënë se “ne e kemi një asociacion të komunave, nëse dikush e dëshiron një tjetër, kjo duhet të bëhet nga komuna. Nuk formon kryeministri asociacion e as nuk i themelon”. Por, Bashkimi Evropian konsideron se Qeveria nuk mund t’i shmanget përgjegjësive që ka marrë në procesin e dialogut dhe ato t’ia delegojë komunave me shumicë serbe. Sipas zëdhënësit të BE-së, Peter Stano, drafti iu dorëzua kryeministrit Kurti personalisht nga lehtësuesi i BE-së së bashku me Këshilltarët e Sigurisë Kombëtare të Francës, Gjermanisë dhe Italisë si dhe përfaqësuesi special të SHBA-së.

“Qeveria nuk mund të heqë dorë nga përgjegjësitë e saj në kuadër të Dialogut apo t’ua delegojë ato komunave me shumicë serbe të Kosovës. Në tetor 2023, në një përpjekje për të çuar përpara procesin e normalizimit, BE-ja e mbështetur nga shtetet anëtare dhe partnerët e saj si SHBA-ja prezantoi zyrtarisht një projekt-statut evropian për krijimin e Asociacionit. Ky draft-statut Evropian bazohet në modelet dhe praktikat e mira evropiane, si dhe në kornizën ligjore të Kosovës. Drafti iu dorëzua kryeministrit Kurti personalisht nga Facilitatori i BE-së së bashku me Këshilltarët e Sigurisë Kombëtare të Francës, Gjermanisë dhe Italisë si dhe Përfaqësuesin Special të SHBA-së”.

Përveç dorëzimit të draft-statutit Evropian në Qeverinë e Kosovës nga emisarët Evropian dhe Amerikanë, zëdhënësi i BE-së, Peter Stano, rikujton se drafti i ngjashëm ishte pranuar nga kryeministri Kurti dhe presidenti serb Vuçiq edhe në takimin e 26 tetorit 2023 në Bruksel.

“Në një takim të nivelit të lartë në mbështetje të Dialogut në prani të Presidentit Macron, Kryeministres Meloni dhe kancelarit Scholz, të dyja palët pranuan në parim draft-statutin Evropian. Në konkluzionet e tij të dhjetorit 2023, Këshilli Evropian përshëndeti “gatishmërinë e Serbisë dhe të Kosovës për të pranuar draft-statutin e paraqitur palëve nga Lehtësuesi i BE-së”. Kjo është një njohje zyrtare e dokumentit nga 27 shtetet anëtare të BE-së. Etiketimi i projektstatutit Evropian si “thjesht një non-paper” shpërfill ftesën e Këshillit të Bashkimit Evropian për të vazhduar mbi këtë bazë dhe vonon më tej perspektivën e krijimit të tij’’, tha Stano.

Bashkimi Evropian i ka bërë thirrje Kosovës që të ndërmarr hapa konkretë për themelimin e Asociacionit, ndërsa për Serbinë përmbushjen e obligimeve të saj që rrjedhin nga marrëveshja për normalizim të marrëdhënieve.

“Na vjen keq që një vit pasi palët miratuan dokumentin në parim, nuk u bë asnjë përparim në krijimin e tij në përputhje me draft-statutin Evropian. Në përputhje me riangazhimin e saj zyrtar ndaj Dialogut dhe zbatimin e plotë të të gjitha marrëveshjeve të Dialogut të 20 shtatorit 2024. Ne i bëjmë thirrje Kosovës që të ecë përpara me themelimin e saj pa vonesa të mëtejshme. Serbia pritet të përmbushë obligimet e saj që rrjedhin nga Marrëveshja për Rrugën e Normalizimit, paralelisht me Kosovën që të ecë përpara me themelimin e Asociacionit bazuar në Draft Statutin Evropian, në përputhje me planin e zbatimit të propozuar nga Lehtësuesi i BE-së”, tha Stano.

Qeveria e Kosovës përmes një përgjigje nga zëdhënësi, Përparim Kryeziu, ka thënë se insistojnë që të ketë nënshkrim të marrëveshjes Bazike dhe Aneksit të saj të zbatimit, duke kërkuar që të respektohet rendi i gjërave në proces të dialogut.

“Prandaj, nuk mundemi që një vit pas takimit të tetorit të vitit të kaluar, në të cilin refuzohet oferta jonë për nënshkrimin e paketës, të nxjerrim draft statutin e BE-së nga paketa e ta hedhim paketën e njohjes se paku de facto reciproke. Rikujtojmë se draft statuti i BE-së nuk e ka nënshkrimin as të Përfaqësuesit të Lartë të BE-së, Borrell e as të emisarit të tij, Lajçak, aq më pak të Kryeministri Kurti. Statusi i draft statutit është ai i një non-paper, njëri ndër disa propozimet që janë bërë në vitet e kaluara”, tha Kryeziu.

Shukri Buja tha të enjten në Hagë që Jakup Krasniqi ka qenë zëdhënës i Ushtrisë Çlirimtare të Kosovës (UÇK) dhe është marrë me detyra operative.

“Ka qenë zëdhënës i UÇK-së dhe detyrat operative nuk kanë kuptim”, tha Buja, i cili po dëshmon për të tretën ditë me radhë në gjykimin ndaj Hashim Thaçit, Kadri Veselit, Rexhep Selimit dhe Jakup Krasniqit.

Një gjë të tillë, Buja e kishte thënë edhe në gjykimin ndaj Fatmir Limajt në vitin 2005 dhe se këtë përgjigje ai e dha gjatë kundërpyetjeve të avokates së Krasniqit, Shyamala Alagendra, raporton “Betimi për Drejtësi“.

Buja tha se emërimin e Krasniqit si zëdhënës e ka pritur me padurim për shkak të personalitetit të tij.

“Jakup Krasniqin në emërimin si zëdhënës i UÇK-së e kam prit me padurim sepse ka qenë një personalitet i jashtëzakonshëm. Një njeri që ka pasur vizion politik të jashtëzakonshëm dhe ka qenë një njeri që është pritur në mënyrë jashtëzakonisht të mirë nga popullata civile”, tha Buja, duke shtuar se Krasniqin e ka takuar rreth qershorit 1998.

Nga dalja publike si zëdhënës i UÇK-së, Buja tha se u kuptua që Krasniqi ishte anëtar i Shtabit të Përgjithshëm. Tha se detyra operative në UÇK gjatë verës kanë pasur Azem Syla si komandant i Përgjithshëm dhe Sokol Bashota si zëvendës i tij.

Ndërsa, në korrik të ’98-ës, sipas tij, Bislim Zyrapi ishte shef i Shtabit të Përgjithshëm e që edhe kjo ishte një detyrë operative.

Në pyetjet e avokatit të Veselit, Rodney Dixon, dëshmitari tha se e kishte kuptuar që Veseli në periudhën maj-qershor ka qenë ministër i Shërbimit Informativ të Kosovës.

“Në muajin maj ka dalë informacioni për ministrat në kuadër të Qeverisë së Përkohshme të Kosovës”, tha Buja.

Buja tha se nuk ishte përgjegjësi e Ilmi Reçicës për t’i zbatuar rregullat disiplinore dhe nuk kishte të bënte me asnjë lloj hetimi sa i takon çështjeve disiplinore.

“Nuk ka qenë detyrë e Zbulim-Kundërzbulimit. Ka qenë detyrë e Policisë Ushtarake dhe e komandantit të brigadës”, tha Buja.

Ai pohoi se ZKZ-ja dhe Policia Ushtarake nuk kishin të bëjnë me njëri-tjetrin pasi ishin të ndara nga funksionimi.

Për shkak se Donika Gërvalla, ministre e Punëve të Jashtme dhe Diasporës dhe zëvendëskryeministre gjendet në vizitë zyrtare jashtë vendit, ka dështuar të mbahet seanca e së enjtes ndaj saj në Gjykatën Themelore në Prishtinë.

Ministrja Gërvalla ngarkohet se në cilësinë e zyrtares së lartë publike, në formularin për deklarim të pasurisë më 22 mars 2021, nuk ka paraqitur saktë të dhënat e kërkuara me ligj, raporton “Betimi për Drejtësi”.

Mbrojtësi i të akuzuarës Gërvalla, avokati Arianit Koci, e ka njoftuar gjykatësin Dibran Jusufi se e akuzuara Gërvalla nuk ka mundur të jetë prezente në këtë seancë për shkak të një vizite zyrtare jashtë vendit.

Po ashtu, i njëjti ka kërkuar që seanca të caktohet për një datë tjetër, atëherë edhe e akuzuara Gërvalla do të jetë prezente.

Lidhur me këtë, prokurori Paulin Pashku, ka thënë se sipas Kodit të Procedurës Penale ka mundësi ligjore që të vazhdojë shqyrtimi gjyqësor në mungesë të të pandehurës, por që nëse e pandehura do të paraqitet në seancën tjetër, atëherë nuk e kundërshton propozimin e avokatit Koci.

Më pas, gjykatësi Jusufi konstatoi se në mungesë të të akuzuarës Gërvalla nuk janë plotësuar kushtet për mbajtjen e kësaj seance.

Ndryshe, MPJD-ja ka njoftuar se Gërvalla do të marrë pjesë në Forumin e Lartë për të Ardhmen e Demokracisë, që do të mbahet më 7 dhe 8 nëntor 2024 në Vilnius, Lituani, me ftesë të Ministrit të Punëve të Jashtme të Lituanisë, Gabrielius Landsbergis.

Gjykata Themelore në Prishtinës më 19 qershor 2024 kishte konfirmuar aktakuzën për mosraportim të pasurisë ndaj Gërvallës, duke refuzuar kërkesën për kundërshtim të provave dhe hudhje të aktakuzës.

Më pas, Gjykata e Apelit, e ka refuzuar si të pabazuar ankesën e mbrojtjes së Gërvallës, duke vërtetuar aktvendimin e Gjykatës Themelore në Prishtinë, me të cilin ishte konfirmuar aktakuza ndaj saj.

Lidhur me akuzën për mosraportim të saktë të pasurisë, në seancën fillestare më 7 mars 2024, Gërvalla ishte deklaruar e pafajshme.

Sipas aktakuzës së Prokurorisë Themelore në Prishtinë, të përpiluar më 31 janar 2023 nga prokurori Astrit Gashi, Gërvalla ngarkohet se në cilësinë e zyrtares së lartë publike me obligim ligjor të deklarimit të pasurisë, në formularin për deklarim të pasurisë më 22 mars 2021, nuk ka paraqitur saktë të dhënat e kërkuara me ligj.

Aktakuza thotë se e njëjta në këtë formular nuk ka deklaruar asnjë të hyrë-të ardhur të bashkëshortit të saj Stefan Schwarz edhe përkundër se të njëjtin e ka deklaruar si bashkëshort.

Tutje, në akuzë thuhet se Gërvalla nuk ka deklaruar në tërësi parcelën kadastrale-toka bujqësore në pronësi të saj në sipërfaqe prej 3964 m2 në ZK Dubovik-Komuna e Deçanit, duke e deklaruar vetëm sipërfaqe prej 2000 m2.

Po ashtu, Gërvalla sipas akuzës thuhet se nuk ka deklaruar as biznesin “Alb Lingua UG” e regjistruar në Bon të Gjermanisë në emër të saj.

Me këto veprime, Gërvalla akuzohet se ka kryer veprën penale “Mosraportimi ose raportimi i rremë i pasurisë, i të ardhurave, i dhuratave, i dobisë tjetër materiale ose i detyrimeve financiare”, nga neni 430, paragrafi 2 të Kodit Penale të Republikës së Kosovës.

Ndryshe, Prokuroria Themelore në Prishtinë, më 29 maj 2023 kishte konfirmuar për “Betimi për Drejtësi” se ka ngritur aktakuzë ndaj Gërvallës.

“Referuar kërkesës së parashtruar nga ana juaj, ju njoftojmë se Prokurori i Shtetit, më 31.01.2023, ka ngritur aktakuzë ndaj D.G., për shkak të veprës penale “Mos raportimi ose raportimi i rremë i pasurisë, i të ardhurave, i dhuratave, i dobisë tjetër materiale ose i detyrimeve financiare”, sipas Kodit Penal të Republikës së Kosovës, si dhe të njëjtën e ka proceduar në Gjykatë për trajtim të mëtejmë”, kishte konfirmuar zëdhënësja e kësaj prokurorie, Laureta Ulaj.

Pasi u bë i ditur lajmi për ngritjen e aktakuzës, ministrja Gërvalla përmes një postimi në Facebook, tha se është përpjekje për të hedhur baltë mbi përfaqësuesit e institucioneve.

Ndryshe, më 2 tetor 2021, “Betimi për Drejtësi” ka raportuar se Donika Gërvalla, zëvendëskryeministre dhe ministre e Punëve të Jashtme dhe e Diasporës (MPJD), nuk ka deklaruar të gjitha funksionet në institucione vendore e ndërkombëtare.

Katër muaj pas këtij hulumtimi, Agjencia Kundër Korrupsion (AKK), tani Agjencia për Parandalimin e Korrupsionit (APK), kishte njoftuar se është ende duke trajtuar rastin e ministres Gërvalla.

Sipas këtij hulumtimi, rezultoi se Gërvalla nuk ka deklaruar se posedon biznes në Gjermani, nuk ka treguar se është drejtoreshë e një fondacioni në Kosovë dhe as nuk ka deklaruar pasurinë e burrit dhe fëmijëve të saj.

Policia e Kosovës ka dal sot me raport lidhur me dy tentim vrasje që kanë ndodhur dje në Prishtinë, me ç’rast janë plagosur dy persona.

Në rrugën “Carraleva”, në Kodrën e Trimave u plagos një person në këmbë nga persona të panjohur. Në vendngjarje u sekuestruan tri gëzhoja të armës së zjarrit.

“Rr. Carraleva, Prishtinë 06.11.2024 – 07:15. Viktima mashkull kosovar është duke u trajtuar në QKUK, pasi është qëlluar plagosur në këmbë nga persona të panjohur. Në vendin e ngjarjes janë sekuestruar tri gëzhoja të armës së zjarrit. Rasti është duke u hetuar”, thuhet në njoftimin e policisë.

Ndërsa në fshatin Drenoc po ashtu është plagosur një burrë nga një person që tashmë është arrestuar.

“Fsh. Drenovc, Prishtinë 06.11.2024 – 14:53. Viktima mashkull kosovar është dërguar në QKUK për trajtim mjekësor, pasi që në rrethana të panjohura është plagosur me armë zjarri nga i dyshuari mashkull kosovar. I dyshuari është arrestuar dhe me vendim të prokurorit është dërguar në mbajtje, ndërsa një pistoletë me 11 fishekë është sekuestruar”, thuhet tutje në raport.