Tag: Ballina

Përgatiti: Krenare Mulliqi

Pavarësisht pajisjeve të reja dhe programeve të avancuara të krijuara për të thjeshtuar numërimin e votave, Komisionit Qendror të Zgjedhjeve vetëm iu komplikuan punët.

Fillimisht për shkak të pengesa të qasjes në ueb-faqe, KQZ-ja nuk arriti t’i publikoj rezultat preliminare të vendvotimeve, brenda dyzet e tetë 48 orëve nga mbyllja e vendvotimeve, ashtu siç e parasheh Ligji i ri për Zgjedhjet.

Derisa aktualisht ky institucion po përballet edhe me probleme në sistemin e numërimit të votave, të cilat poashtu po shkaktojnë vonesa në nxjerrjen e rezultateve për kandidatët për deputetë.
Të gjitha këto, po vlerësohet se e dëmtojnë gjithë procesin e zgjedhjeve.

Madje, sipas Kolshit, vështirësitë me të cilat po përballet KQZ-ja mund t’i shtyjnë partitë të vënë në pikëpyetje rezultatin përfundimtar të zgjedhjeve.

Njohës të procesit të zgjedhjeve, problemet e KQZ-së i lidhin edhe me rezultatin e partisë në pushtet.

Problemet e KQZ-së nxitën reagime të shumta të përfaqësuesve të partive politike, si nga pushteti, ashtu edhe nga opozita.

Qeveria, në anën tjetër, hoqi përgjegjësin për problemet e serverëve dhe softuerëve të Komisionit Qendror të Zgjedhjeve.

Më shumë detaje i gjeni në Edicionin Qendror të lajmeve në videon më poshtë:

Përfundimi i numërimit të votave të kandidatëve për deputetë për zgjedhjet parlamentare të 9 shkurtit pritet të merr kohë deri në dy javë.

Kështu ka thënë kryetari i KQZ-së, Kreshnik Radoniqi, i cili shtoi se në të njëjtën periudhë kohore do të bëhet edhe vlerësimi i pakove me fletëvotime nga diaspora.

KQZ sot në mbledhjen e radhës njoftoi për anulimin e 529 zarfeve me fletëvotime nga diaspora për shkak të parregullsive. Ndërkaq, u theksua se numërimi i votave për kandidatët për deputetë në qendrat komunale të numërimit ka nisur në 18 komuna, ndërkaq në tetë të tjera do të nisë sot.

Kryetari i KQZ-së, Kreshnik Radoniqi, tha se meqenëse s’ka nisur me kohë numërimi në të gjitha qendrat komunale ky proces pritet të përmbyllet brenda dhjetë dite apo maksimumi dy javë.

“Meqenëse nuk kemi filluar në të gjitha qendra komunale të numërimit dhe me pa edhe atje si po shkon procesi nuk kemi bërë një vlerësim sesa do të zgjatet i tërë procesi për t’u përmbyllur numërimi. Por e përafërt do të jenë diku dhjetë ditë deri në dy javë po besoj”, tha ai.

Ai foli edhe për “sulmin apo ndërhyrjen” në sistemin e KQZ-së, ku tha se kjo çështje është në duart e prokurorisë dhe policisë, dhe sapo të marrin raportin nga këto dy institucione do të dalin me qëndrim.

“Kjo çështje tash është në duart e policisë dhe prokurorisë. Pa e marrë raportin nga ata, ne nuk do të japim asnjë informacion, pasi nuk i kemi. I kemi disa dyshime tona, por ato dyshime janë adresuar në polici dhe ata do të japin raportin”, tha Radoniqi.

Drejtori i Zyrës për Regjistrim, Certifikim dhe Kontrollin Financiar të Partive Politike, Besnik Buzhala, tha se vonesat në numërimin e votave për kandidatët për deputetë në qendrat komunale po ndodh për shkaqe teknike.

“Numërimi në Qendrat komunale të numërimit të fletëvotimeve për kandidatë për fletëvotimet e rregullta ka filluar në 18 komuna. Katër prej të cilave ka filluar me datën 11 shkurt 2025 dhe 14 të tjera më 12 shkurt 2025. Në këto 18 komuna ku ka filluar numërimi gjithsejtë janë numëruar 114 vendvotime nga 1.196 vendvotime gjithsej, ndërsa sot pritet të fillojë numërimi në tetë komuna të tjera”, tha ai.

Krahas kësaj, Buzhala bëri të ditur se KQZ-ja ka anuluar 529 zarfe me fletëvotime nga diaspora për shkak, siç u tha, parregullsive të shfaqura.

“Nga data 9 shkurt deri sot në orën 12:00 janë vlerësuar sot 8.766 zarfe, ku prej tyre 8 mijë e 247 zarfe me fletëvotime me votime janë aprovuar, ndërsa 529 zarfe me fletëvotime janë refuzuar. Këto kanë ndodhur për arsye si në vijim: 319 zarfe janë anuluar për shkak se votuesit nuk janë regjistruar në periudhën e aplikimit, 34 zarfe janë refuzuar për shkak se ka pasur më shumë se një fletëvotim brenda një zarfi. Pesë zarfe janë anuluar për shkak se mungon vula apo pulla postare, 16 zarfe janë anuluar për shkak se votuesit kanë dërguar fletëvotime nga shtete të ndryshme nga shteti që janë regjistruar. Ndërkaq, 50 zarfe janë refuzuar për shkak se brenda zarfit ka qenë vetëm dëftesa e regjistrimit dhe jo fletëvotimi”, tha ai.

Në lidhje me këto të dhëna reaguan anëtarët e KQZ-së nga partitë politike, ku anëtari i PDK-së, Arianit Elshani, tha se KQZ-ja duhet të fillojë nga sot publikimin e rezultateve të kandidatëve për deputetë.

“Ky është një shqetësim jo vetëm i anëtarëve të KQZ-së, por i të gjithë opinionit publik dhe kandidatëve dhe subjekteve e qytetarëve që të dihet se ku ka përfunduar vullneti i tyre i shprehur në ditën e zgjedhjeve. Është më se e nevojshme një alarmim i KQZ-së në lidhje me procesin e transparencës në raport me daljen e votuesve, numrin e përgjithshëm të votuesve dhe votat e kandidatëve… Unë insistoj dhe kërkoj që kjo të bëhet që nga sot. KQZ-ja të fillojë publikimin e rezultateve të kandidatëve. S’ka kohë më për t’u humbur. Sa më shumë që ka vonesa aq më e madhe është pakënaqësia dhe presioni pasi krijohet pabesi në raport me institucionin”, tha ai.

Anëtari i KQZ-së nga LDK-ja, Sami Hamiti, kërkoi nga sekretariati të ketë një plan B për numërimin e votave të kandidatëve për deputetë në rast se bie sërish sistemi elektronik.

“Po shihet se në planin operacional dhe pjesën e funksionalizimit të QKN-ve nuk jemi në kohë. Edhe ato që i kemi hap janë hapur me vonesë dhe me probleme të theksuara. Unë nuk jam mjeshtër i IT-së, as rrjetit e as sulmeve kibernetike. Ne si trup jemi KQZ dhe kemi obligim me kryer punën tonë për numërimin e votave pasi dikush pret”, theksoi ai.

Mirëpo, anëtari i KQZ-së nga radhët e LVV-së, Alban Krasniqi, tha se procesi i numërimit të votave po shkon mirë. Ai tha se një pjesë e kritikave për vonesa është tërësisht i gabuar.

“Një pjesë e këtyre kritikave apo perceptimit që është krijuar për këtë proces zgjedhor është tërësisht i gabuar. Ne çdo herë kur organizojmë zgjedhje të reja harrojmë qysh kemi kaluar në zgjedhjet e mëparshme. Mua më kujtohet prej vitit 2010 me vjedhjet industriale të votave që kanë ndodhur dhe e dina se s’ka mbetur kuti pa u prekur dhe janë pranuar zgjedhjet. Në vazhdimësi në vitet e mëparshme ka pasur rregullsi dhe asnjë proces zgjedhor s’ka përfunduar pa 1 muaj e gjysmë. Sot jemi në një situatë me gjithë vështirësitë teknike që i kuptojnë dhe tentimet për të sulmuar sistemin mendoj se sot kur shkon në qendra komunale të numërimit vëreni një transparencë të paparë asnjëherë kurrë më parë…Kandidatët e subjekteve le të pijë dikush bensedin dhe dikush le të duron, pasi rezultati është në kuti dhe ai do të bëhet publik. Në mars ata kanë me ditur fatin e tyre në këto zgjedhje… Në lidhje me atë që është bërë natën e zgjedhjeve ka qenë problem teknik. Futja e të dhënave është bërë prej njerëzve të thjesht dhe gabimi ka qenë se dy persona kanë futur shifra përtej asaj që ka qenë e logjikshme”, theksoi ai./KP/

Ish-komandanti i Zonës Operative të Drenicës, Sylejman Selimi ka përfunduar dëshminë e tij në Dhomat e Specializuara në Hagë. Për katër ditë, në gjykatore ai është përgjigjur në pyetjet e Zyrës së Prokurorit të Specializuar, avokatëve mbrojtës dhe trupit gjykues, rreth Shtabit të Përgjithshëm të UÇK-së.

Ai pohoi se Shtabi i Përgjithshëm nuk ka pasur kompetencë për ndalimin apo mbajtjen e personave.

Lidhur me ketë, Selimi është përgjigjur në pyetjet e avokatit të Hashim Thaçit, Luka Mishetiq, si dhe mbrojtjes së Kadri Veselit, Rodeny Dixon.

Pjesë nga seanca:

Selimi: Sa i përket zonës, zona i ka pasur kompetencat në zonën operative te Drenicës, kurse sa i përket arrestimit, Shtabi i Përgjithshëm nuk e ka pasur këtë kompetencë, ose ndalimin e tyre, asnjëherë nuk është mbajtur një takim që këta me u arrestu.

Dixon: A mund të konfirmoj që ju nuk keni pasur asnjë rregullore nga Shtabi i Përgjithshëm apo nga ndonjë burim tjetër lidhur me mënyrën se si te ndaloheshin personat, kush ishte përgjegjës, çfarë roli kishte policia ushtarake, apo i palëve të tjera ne këtë proces, a është e sakte kjo?

Selimi: Po.

Dixon: Pra ju nuk keni pasur asgjë me shkrim apo me gojë nga Shtabi i Përgjithshëm, lidhur me ketë teme, a është e saktë kjo?

Selimi: E saktë.

Gjatë dëshmisë, Selimi është ndalur më gjatë te Shtabi i Përgjithshëm duke thënë i njëjti ishte pothuajse inekzistent, “një shtab më shumë politik e logjistik sesa operacional”.

“Termi si shtab i përgjithshëm është term i madh dhe një term në shikim të parë mendova që është një shtab ku shumë njerëz punojnë në atë shtab dhe një objekt që është me plot salla operative, me një shef operativ, me një ekip profesionale, që jep detyra, urdhra, një shtab ku te paktën numri duhet të sillet prej 60 deri 100 më tepër, një kohë kur ne po flasim ose në kohë lufte. Ne po flasim për një shtab pothuajse inekzistent, një shtab më shumë politik ose një pjesë edhe logjistik, sesa një shtab operacional me anëtarë të cilët janë të përhershëm ose me anëtarë të cilët e kanë një adresë ose një shtab që e ka një strukturë, një sallë operative, disa oficerë që e menaxhojnë situatën në luftë. Ne fatkeqësisht këtë nuk e kemi pasur, as nuk e kam parë asnjëherë të organizuar në nivel të tillë dhe kjo ka bërë që shumë komandantë të zonave në teren t’i marrin vendimet vet, të shohin situatën vet, të përgjigjen vetë”, tha Selimi.

“Shpesh herë i drejtohemi Shtabit të Përgjithshëm por asnjëherë nuk e ke ditë ku janë anëtarët, për arsye të ndryshme, ose i ke pasur jashtë shteti, edhe atëherë kur jam munduar t’i takojë ka qenë zor dhe lidhshmëria e Shtabit të Përgjithshëm gjatë luftës dhe zonave kjo ka qenë pengesë dhe është dashur që një komandant zone t’i marrin veprimet vetë dhe të organizojë dhe të udhëzojë ose të marrë pjesë vetë ne luftime dhe të interesohet edhe për ushtarët dhe pjesën civile”, tha Selimi në Gjykatën Speciale”, shtoi ai.

Në fund të dëshmisë së tij, Selimi tha se Adem Jashari ka qenë figura kryesore e UÇK-së.

“Nuk ka marrë urdhra nga shtabi i përgjithshëm por ka dhënë urdhra ose është konsultuar me Shtabin e Përgjithshëm, me njerëz të cilët i ka njohur. Adem Jashari nuk ka mundur të marrë urdhra nga dikush tjetër, Adem Jashari ka qenë komandant kryesor, pa Adem Jasharin nuk mund të kishte UÇK. Adem Jashari ka qenë figura kryesore elmbematike e UÇK-së, Shtabi i Përgjithshëm është në bashkëpunim me Ademin dhe gjithë të tjerët, por figura kryesore është Adem Jashari”, tha ai.

Mënyrën e marrjes në pyetje nga ana e trupit gjykues e kritikoi avokati i Kadri Veselit, Rodney Dixon, sipas së cilit, pyetjet nuk janë sqaruese dhe të paanshme.

“Këto nuk janë pyetje sqaruese, janë pyetje që po i përdorni si bazë ju nga ana e trupit gjykues. Nuk janë pyetje që duhet t’i bëjë trupi gjykues. A keni marrë vendim për mocionin tonë që është pezull, mocioni i nëntorit 2024. Kemi kërkuar të garantohet paanashmëria dhe drejtësia e procesit gjyqësor, duam që kjo të merret parasysh. Sot pyetjet nuk janë të paanshme, këto janë pyetje jo sqaruese”, mbrojtja e Veselit.

Megjithatë, kryetari i trupit gjykues tha se do të vazhdojnë marrjen në pyetje.

Pas intervistimit nga turpi gjykues dhe pyetjeve shtesë nga avokatët mbrojtës, Selimi e përfundoi dëshminë e tij në Hagë.

“Gjatë procedurës pranë Dhomave të Specializuara, kam pasur edhe statusin e personit të dyshuar. Me këtë rast, dëshiroj të informoj publikun se të gjitha procedurat hetimore ndaj meje kanë pushuar”, tha Selimi në një deklaratë për media.

Selimi e ka nisur dëshminë të hënën, si dëshmitar me kodin 04290 dhe atij i është dhënë garanci se nuk do të ndiqet penalisht për dëshminë e tij.

Procesi gjyqësor ndaj Hashim Thaçit, Kadri Veselit, Jakup Krasniqit e Rexhep Selimit ka nisur në prill të vitit 2023 ndërkaq, ata po qëndrojnë në qendrën e paraburgimit prej nëntorit të vitit 2020.

Ndaj tyre rëndojnë akuza për krime të pretenduara të luftës.

Ish-krerët e UÇK-së janë deklaruar të pafajshëm për të gjitha pikat e aktakuzës./KosovaPress

Në Dhomat e Specializuara të Kosovës (DhSK) në Hagë është marrë vendim që për mbrojtjen e Pjetër Shalës të zgjatet afati për dorëzimin e dosjes së apelit ndaj urdhrit për zhdëmtim të viktimave, i cili obligon të pandehurin që t’i paguaj 208 mijë euro dëmshpërblim.

Njoftimi për apel, mbrojtja e Shalës e kishte dorëzuar më 28 janar andaj afati i fundit ishte që dosjen ta dorëzonte me së largu deri më 28 shkurt. Por, ky afat është shtyrë deri më 14 mars 2025.

Pjetër Shala i përfaqësuar nga mbrojtja e tij, ka dorëzuar në Apel kërkesën kundër urdhrit për zhdëmtim që iu shqiptua më 29 nëntor 2024, i cili e obligonte që t’iu paguante viktimave 208 mijë euro.

Duke u mbështetur në pesë pika, Shala kërkon që të Paneli i Apelit ta pezullojë shqyrtimin e apelimit kundër këtij urdhri për zhdëmtim derisa të shqyrtohet apelimi për dënimin me 18 vjet burg, ndaj tij për krime lufte ose ta anulojë masën e dhënë dhe ta kthejë atë në rishqyrtim tek një trup gjykues tjetër, raporton “Betimi për Drejtësi“.

Ndryshe, në kërkesën e dorëzuar më 28 janar 2025, thuhet se Paneli i gjyqtarëve ka gabuar duke e mbajtur përgjegjës Shalën për dëmin që nuk është shkaktuar nga veprimet ose mosveprime e tij.

Ndërsa, në pikën dy, Shala nëpërmjet mbrojtjes së tij, të kryesuar nga Jean-Louis Gilissen pretendon se paneli ka gabuar në përcaktimin e dëmshpërblimit, duke u bazuar në supozime për dëmet që viktimat mund të kenë pësuar, pa vlerësuar nëse këto mund të lidhen me veprimet e të pandehurit.

Në pikën tre, Shala pretendon se Paneli ka gabuar duke dhënë shpërblime kompensimi pa kërkuar prova të mjaftueshme për dëmet e pësuara. Si rrjedhojë, Shala pretendon se Paneli i gjyqtarëve ka supozuar kostot e trajtimeve mjekësore dhe humbjet financiare pa kërkuar të dhëna konkrete që të vërtetojnë këto humbje.

Kësisoj, Shala thotë se Paneli ka vepruar arbitrarisht, duke mos kërkuar vërtetimin e dëmeve dhe ka kundërshtuar jurisprudencën e njohur të GJEDNJ-së, që kërkon dëshmi të qarta për dëmet për të marrë kompensim.

Në pikën katër, Shala pretendon se Paneli ka gabuar duke caktuar një shpërblim joproporcional me gjetjet lidhur me rolin e tij në krimet për të cilat u dënua, duke shtuar faktin se ai është dënuar për pjesëmarrjen në ndërmarrjen e përbashkët kriminale.

Si rrjedhojë, mbrojtja pretendon se nuk është marrë në konsideratë aspekti financiar i Shalës si dhe ai është urdhëruar të paguajë dëmshpërblim të lartë.

Në pikën e pestë, mbrojtja e Shalës thotë se paneli ka gabuar duke vendosur përgjegjësi civile ndaj të pandehurit para se të përfundojë apelimi ndaj dënimit me burgim.

Mbrojtja pretendon që nëse dënimi ndaj Shalës ndryshohet në Apel, atëherë urdhri për dëmshpërblim duhet të rishikohet dhe shumat financiare të përcaktuara duhet të rregullohen.

Si rrjedhojë, ata pretendojnë se duke pasur parasysh se dënimi nuk është ende përfundimtar dhe po shqyrtohet në Apel, është e drejtë që procesi për zhdëmtimin të ndërpritet derisa të përfundojë shqyrtimi i apelimit për dënimin.

Sipas tyre, kjo do të sigurojë që të drejtat e Shalës për një proces të drejtë të respektohen.

Ndryshe, më 29 nëntor 2024, Pjetër Shala u urdhërua që të paguaj 208 mijë euro për viktimat si zhdëmtim.

Më 16 korrik, Pjetër Shala është dënuar me 18 vjet burgim  ku u konstatua se përtej dyshimeve të bazuara është fajtor për pikat 1, 3 dhe 4 të akuzës.

Shala u shpall fajtor për ndalim arbitrar si krim lufte kundër së paku 18 personave në periudhën mes 17 majit 1999 deri më 5 qershor të atij viti në Fabrikën e Metalit në Kukës, torturë si krim lufte kundër së paku 18 personave dhe vrasje e paligjshme si krim lufte kundër një personi.

Ndryshe, gjatë muajit shkurt 2023 kishte filluar gjykimi në këtë rast, ku më 21 shkurt Prokuroria dhe mbrojtja e viktimave kanë paraqitur deklaratat e tyre hyrëse, kurse më 22 shkurt janë dëgjuar deklaratat hyrëse të mbrojtjes së Pjetër Shalës, si dhe deklarata pa betim e tij.

Në mars 2023 kishte filluar paraqitja e provave të Prokurorisë, ku janë dëgjuar 10 dëshmitarë, kurse në gusht kishte filluar paraqitja e provave nga mbrojtësi i viktimave ku janë dëgjuar dy dëshmitarë.

Pjetër Shala u arrestua më 16 mars 2021, nga autoritetet belge dhe u transferua në Hagë më 15 prill 2021, në bazë të një kërkese për bashkëpunim në zbatimin e fletëarrestit dhe urdhrit për transferim lëshuar nga Dhomat e Specializuara të Kosovës.

Në aktakuzën e konfirmuar, Shala ngarkohet me përgjegjësi penale individuale në forma të ndryshme për krime lufte si ndalim arbitrar, trajtim mizor, torturë dhe vrasje të paligjshme, të kryera në kontekstin e konfliktit të armatosur në Kosovë dhe në lidhje me këtë konflikt.

“Krimet për të cilat akuzohet z. Shala u kryen përafërsisht midis 17 majit 1999 dhe 5 qershorit 1999, kundër personave që u mbajtën të ndaluar në fabrikën e metalit në Kukës (Shqipëri), që pretendohet se përdorej prej Ushtrisë Çlirimtare të Kosovës”, thuhet në komunikatë. /BetimipërDrejtësi/

Presidentja e Republikës së Kosovës, Vjosa Osmani, sot është takuar me kryetarin e Komisionit Qendror të Zgjedhjeve, Kreshnik Radoniqi.

Presidenca njofton se tema kryesore e këtij takimi ishte mbarëvajtja e procesit zgjedhor, me ç’rast presidentja ripotencoi rëndësinë e angazhimit të plotë për garantimin dhe ruajtjen e integritetit të këtij procesi, transmeton Telegrafi.

“Lidhur me problemet e evidentuara në platformën elektronike të raportimit të rezultateve, Radoniqi sqaroi se KQZ-ja, menjëherë ka ftuar institucionet e sigurisë dhe ato të drejtësisë që të hetojnë problemin dhe se KQZ-ja është në pritje të raportit përfundimtar nga institucionet e sigurisë mbi çështjet e identifikuara që kanë ndikuar në funksionimin e kësaj platforme. Ky raport do të ndihmojë në vlerësimin dhe adresimin e çështjeve të evidentuara, duke siguruar transparencë të plotë mbi arsyet që kanë çuar te ky problem”, bëhet e ditur në njoftim.

Njëkohësisht, presidentja Osmani është njoftuar nga Radoniqi se KQZ-ja, është duke punuar për të garantuar që çdo votë e dhënë për partitë politike të konfirmohet edhe gjatë procesit të numërimit të votave të kandidatëve. Sipas kreut të KQZ-së, ky proces po realizohet me kujdes të shtuar për të siguruar përputhjen e plotë ndërmjet votave të regjistruara në sistem dhe atyre që ndodhen në kutitë e votimit.

“Që nga dita e zgjedhjeve, Presidentja ka qenë në kontakt të vazhdueshëm me kryetarin Radoniqi si dhe institucionet përkatëse të sigurisë dhe ka kërkuar që të ndërmerren të gjitha masat e nevojshme për të mbrojtur procesin zgjedhor dhe për të garantuar respektimin e plotë të vullnetit të qytetarëve duke rikonfirmuar çdo votë edhe nëpërmjet numërimit manual, përveç atij të bërë në sistemin elektronik”, vijon njoftimi.

Në takim, Presidentja Osmani shtroi nevojën e koordinimit të mekanizmave institucional për ruajtjen e integritetit të procesit zgjedhor dhe të vetë votës së qytetarëve.

Zgjedhjet parlamentare u mbajtën më 9 shkurt, ku sipas rezultateve preliminare, LVV ka dalë e para, PDK e dyta dhe LVV e treta./Telegrafi/

Komisioni Qendror Zgjedhor ka bërë të ditur se po vazhdon procesi i numërimit në Qendrat Komunale të Numërimit në komunat: Deçan, Gjakovë, Drenas, Gjilan, Fushë Kosovë, Kamenicë, Mitrovicë e Jugut, Lipjan, Obiliq, Prishtinë, Skenderaj, Shtërpcë, Viti, Ranillug, Partesh, Kllokot, Mitrovicë e Veriut dhe Hani i Elezit.

KQZ tutje njofton se procesi i numërimit ka filluar edhe në Qendrën komunale të numërimit në Ferizaj.

“Në orën 08:00 ka vazhduar procesi i numërimit në Qendrat Komunale të Numërimit në komunat: Deçan, Gjakovë, Drenas, Gjilan, Fushë Kosovë, Kamenicë, Mitrovicë e Jugut, Lipjan, Obiliq, Prishtinë, Skenderaj, Shtërpcë, Viti, Ranillug, Partesh, Kllokot, Mitrovicë e Veriut dhe Hani i Elezit.

Gjithashtu, procesin e numërimit e ka filluar edhe Qendra Komunale e Numërimit në Ferizaj, ndërkaq për qendrat tjera të cilat do të fillojnë procesin e numërimit do të njoftojmë së shpejti”, thekson KQZ.

Ndryshe, referuar ueb-faqes së Komisionit Qendror të Zgjedhjeve (KQZ) deri më tani janë përpunuar 99.72% e votave nga 2.526 qendra votimi nga gjithsej 2.533.

Sipas rezultateve preliminare, Lëvizja Vetëvendosje vazhdon të prijë me 40.86% të votave, që përbën 341,562 vota.

Partia Demokratike e Kosovës (PDK): E dyta me 22.05% ose 184,238 vota.

Lidhja Demokratike e Kosovës (LDK): E treta me 17.64% ose 147,777 vota.

AAK-NISMA-Konservatorët-Intelektualët-Ideal: E katërta me 7.46% ose 62,278 vota.

Lista Serbe: E pesta me 4.53% ose 37,843 vota.

Këto rezultate nuk përfshijnë votat me kusht, votat e personave me nevoja të veçanta dhe votat e diasporës, të cilat janë ende në proces numërimi.  /Telegrafi/

Komisioni Qendror i Zgjedhjeve ka njoftuar se pas përfundimit të votimit në vendvotime si dhe pas përfundimit të votimit jashtë Kosovës në përfaqësi diplomatike dhe përmes postës, i gjithë angazhimi i institucionit është i përqendruar në shpalljen e rezultateve përfundimtare për subjektet politike dhe kandidatët për deputetë.

Deri në shpalljen e rezultateve përfundimtare, KQZ njoftoi se duhet të numërojë votat e kandidatëve për deputetë dhe të bëjë verifikimin e votave të subjekteve politike nga formularët të cilët janë plotësuar në vendvotime; numërimin e votave me kusht; votat e personave me nevoja të veçanta dhe votat nga votimi jashtë Kosovës.

“KQZ është e përkushtuar maksimalisht që të gjitha këto procese të kryhen në kohën më të shpejtë të mundur, por duke siguruar saktësi në evidentimin e vullnetit të çdo votuesi. KQZ sqaron se integriteti i votës nuk është i cenuar dhe pavarësisht vonesave që janë shkaktuar si pasojë e problemeve me platformën elektronike, rezultatet përfundimtare do të jenë të sakta dhe të bazuara në vullnetin e qytetarëve të shprehur përmes votës së tyre”, thuhet në njoftimin e KQZ-së.

KQZ njofton se procesi i numërimit të votave të kandidatëve për deputetë dhe verifikimin e votave të subjekteve politike, e kanë filluar gjatë ditës së djeshme në Qendrat Komunale të Numërimit në komunat: Prishtinë, Lipjan, Obiliq dhe Partesh.

“Në QKN-të e Obiliqit, Lipjanit dhe Parteshit, procesi i numërimit dhe evidentimit të këtyre rezultateve në platformë elektronike dhe formularët digjital, është zhvilluar pa ndonjë problem, por në QKN-në e Prishtinës janë paraqitur probleme të herëpashershme. Aktualisht, procesi i numërimit është duke u zhvilluar në këto Qendra Komunale të Numërimit dhe gjatë ditës do të fillojë edhe në qendra të tjera, për të cilat do të njoftojmë”, thuhet në njoftim.

KQZ poashtu ka njoftuar se nisur nga fakti që të dielën në mbrëmje kishte probleme të mosfunksionimit të platformës për rezultatet preliminare, KQZ i ka bërë thirrje Prokurorisë së Shtetit dhe institucioneve tjera të sigurisë për ta sqaruar situatën dhe për mbështetje teknike.

“KQZ është vënë në dispozicion për bashkëpunim me të gjithë akterët relevantë dhe po punon që të përfundojë numërimi dhe adresimi i çështjeve teknike të mosfunksionimit. Ndërkaq, lidhur me rezultatet preliminare të subjekteve politike dhe të pjesëmarrjes, që gjatë këtyre ditëve janë evidentuar pasaktësi, KQZ njofton se janë duke ndërmarrë të gjitha veprimet për të bërë përmirësimet e nevojshme dhe publiku do të njoftohet me kohë”, përfundon njoftimi.

Serbia ka ndërhyrë në procesin zgjedhor të Kosovës, deklaron shefja e Misionit të Bashkimit Evropian për Vëzhgimin e Zgjedhjeve në Kosovë (EOM), Nathalie Loiseau. Ajo thotë se presidenti serb, Alaksandar Vuçiq, dhe zyrtarë të tjerë nga Beogradi, kanë bërë presion që të votohet një listë e caktuar.

Në një intervistë për KosovaPress, Loiseau kritikon edhe emisarin amerikan për misione të posaçme, Richard Grenell për deklarimet e tij gjatë fushatës zgjedhore në vend.

Grenell pati shkruar se “Retorika e Kurtit duke pretenduar se është afër SHBA-së, është plotësisht e rreme”. “

Mos u mashtroni”, kishte thënë ai.

Loiseau i cilëson këto deklarata jo vetëm si ndërhyrje por edhe “shokuese”.

“Ka aspekte pozitive, së pari ka shumëllojshmëri listash, duke përfshirë edhe në veri, kështu që ka shumë mundësi për votuesit, dhe votuesit që vijnë jashtë Kosovës, do të mund të votojnë lehtësisht si në zgjedhjet e mëparshme, pavarësisht thashethemeve. Do të isha më negative në lidhje me raportet për presionet që vijnë nga Serbia për të votuar për një listë të caktuar. Kemi dëgjuar zyrtarë të Serbisë që mbështesin një listë të caktuar, e cila është ndërhyrje në procesin zgjedhor. Po ashtu, ishim dëshmitarë të ndërhyrjes nga dërguari i posaçëm i SHBA-ve, [Richard]Grenell, dhe kjo është e pafat, shokuese dhe jo diplomatike. Kemi dëgjuar rregullisht presidentin [serb] Vuçiq, por edhe anëtarë të tjerë nga qeveria ose parlamenti i Serbisë, duke u thënë votuesve se duhet të votojnë për një listë të caktuar, dhe kjo nuk duhej të kishte ndodhur”, deklaron ajo.

Ajo kritikon partinë në pushtet, Lëvizjen Vetëvendosje, dhe gjuhën e përdorur gjatë fushatës zgjedhore.

“Kishte një shumëllojshmëri listash, që natyrisht është e mirë, duke përfshirë shumicën e komunave dhe parti politike joshumicë. Tonaliteti i fushatës ndonjëherë ishte mjaft i ashpër. [Kishte] Më shumë kritikë të kundërshtarit sesa promovim të programit tënd. Ishte veçanërisht e ashpër për kandidatet gra, në takime, tubime dhe online. Për këtë më vjen shumë keq, sepse është një pengesë për gratë që të hyjnë në politikë, dhe nuk duhet të jetë kështu. Media bënë më të mirën për të intervistuar kandidatët nga parti të ndryshme politike, por siç e dimë të gjithë, partia në pushtet vendosi të mos marrë pjesë në disa debate ose të shkojë në disa intervista në disa media, dhe është një turp, sepse duhet të sigurojmë që votuesit të kenë një mundësi të informohen dhe të dëgjojnë gjithçka, dhe për partitë e vogla mbulimi mediatik nuk ishte i barabartë”, shprehet ajo në intervistën për KosovaPress.

Shefja e Misionit të BE-së për Vëzhgimin e Zgjedhjeve në Kosovë, ndër të tjera, thotë se personat me aftësi të kufizuara kanë pasur problem qasjen në disa qendra votimi.

“Pamë që votuesit mund të votonin, megjithatë kishte probleme me qasjen në disa qendra votimi për votuesit me aftësi të kufizuara. Kishte shumë pasiguri për mënyrën se si të zbatohej ligji zgjedhor në lidhje me votimin me asistencë, sepse nëse shikoni ligjin, nëse kërkoni votim me asistencë, duhet të paraqisni një certifikatë, dhe nuk kam parë asnjë qendër votimi që të ketë kërkuar një certifikatë. Ndoshta kjo duhet të sqarohet. Por, atmosfera ishte shumë e qetë, dhe njerëzit ishin vërtet të interesuar që demokracia të jetë diçka e gjallë në Kosovë”, përfundon ajo.

Mbi 100 vëzhgues nga Bashkimi Evropian janë angazhuar ditën e zgjedhjeve më 9 shkurt, për çka Loiseau konsideron se ishte proces paqësor.

Kosova mbajti të dielën zgjedhjet e para të rregullta që prej shpalljes së pavarësisë më 2008.

Të drejtë vote në Kosovë kanë pasur mbi 1 milion e 970 mijë votues, ndërkaq numri i qytetarëve që kanë votuar më 9 shkurt është mbi 799 mijë.

Bashkimi Evropian (BE) ka thënë se mezi pret formimin e Kuvendit dhe Qeverisë së re të Kosovës, pas zgjedhjeve parlamentare të 9 shkurtit, të cilat i cilësoi si paqësore dhe konkurruese.

Në një komunikatë të përbashkët më 11 shkurt, shefja e politikës së jashtme të BE-së, Kaja Kallas, dhe komisionarja për Zgjerim në BE, Marta Kos, thanë se do ta “vazhdojmë angazhimin tonë me autoritetet, me qëllim mbështetjen e Kosovës për t’u afruar më shumë me BE-në dhe për të përfituar plotësisht nga mundësi të rëndësishme si, Plani i Rritjes për Ballkanin Perëndimor”.

Pas numërimit të 99 për qind të votave, Lëvizja Vetëvendosje e kryeministrit Albin Kurti mori më së shumti vota në zgjedhjet parlamentare të 9 shkurtit, përkatësisht 47 nga 120 vendet parlamentare – megjithëse, jo mjaftueshëm për të formuar qeverinë e vetme.

Sipas rezultateve preliminare, Partia Demokratike e Kosovës pritet t’i ketë 25 deputetë, Lidhja Demokratike e Kosovës 20 dhe koalicioni i mbledhur rreth Aleancës për Ardhmërinë e Kosovës 8.

Këto shifra mund të ndryshojnë pas numërimit të votave me kusht dhe të diasporës, shkruan Radio Evropa e Lirë.

Rreth 40.59 për qind e mbi 1.9 milion votuesve me të drejtë vote në Kosovë votuan më 9 shkurt në zgjedhje që misioni vëzhgues i bllokut i vlerësoi si pozitive dhe të qeta, por me disa të meta.

BE-ja pret që Qeveria e re e Kosovës të angazhohet në bashkëpunim të përgjegjshëm rajonal dhe t’i rrisë përpjekjet për forcimin e sundimit të ligjit dhe administratës publike, si dhe për mbrojtjen e lirisë së shprehjes, thuhet në komunikatë.

Partia e kryeministrit Kurti është përballur me kritika për përdorim të gjuhës negative dhe për bojkotimin e medias gjatë fushatës zgjedhore, përfshirë nga vetë misioni vëzhgues i BE-së në Kosovë.

Në fillim të janarit, organizata joqeveritare ndërkombëtare e vendore i bënë thirrje Lëvizjes Vetëvendosje që të hiqte dorë nga bojkotimi i disa mediave të caktuara.

Ajo kishte thënë se nuk po bojkotonte mediat, por po “përjashtonte” tri kanale specifike dhe se një vendim i tillë “nuk cenonte peizazhin e pasur dhe të larmishëm mediatik të Kosovës”.

BE-ja gjithashtu e përsëri se përparimi në normalizimin e marrëdhënieve me Serbinë është e vetmja mënyrë për Kosovën për të ecur përpara në rrugën e saj evropiane.

“Prej Kosovës pritet t’i zbatojë detyrimet që rrjedhin nga Marrëveshja për rrugën drejt normalizimit, si dhe nga të gjitha marrëveshjet e mëparshme të dialogut, pa vonesa të mëtejshme dhe pa parakushte. Nuk ka zgjidhje tjetër mos dialogut të lehtësuar nga BE-ja”, thuhet tutje në komunikatë.

Kosova dhe Serbia e arritën Marrëveshjen për normalizimin e marrëdhënieve në fillim të vitit 2023, por asnjëra prej tyre nuk ka bërë asnjë hap drejt zbatimit të saj deri tani.

Sipas komunikatës, Komisioni Evropian “mbetet i gatshëm ta përgatisë një opinion” rreth aplikimit të Kosovës për anëtarësim në BE, “sapo Këshilli ta kërkojë atë”.

Kosova aplikoi për anëtarësim në Bashkimin Evropian, më 15 dhjetor të vitit 2022, por vazhdon të mbetet vendi i vetëm në Ballkan që ende nuk e ka statusin e vendit kandidat

Këshilli, përkatësisht përfaqësuesit e 27 shteteve anëtare, vendosin se kur aplikacioni i dërgohet Komisionit Evropian, i cili ftohet të përgatisë një opinion për meritat e vendit aplikues për të marrë statusin e vendit kandidat dhe për të hapur negociatat e anëtarësimit./REL

Prokuroria Themelore në Gjilan bën të ditur se pas postimit nga qytetarët në rrjetin social “Facebook” të fotografisë së të dëmtuarës A.S. me lëndime trupore, ka autorizuar Policinë e Kosovës që të ndërmarre veprime hetimore, lidhur me këtë çështje penale.

Përmes një postimi në rrjetin social në Facebook bëhet e ditur se me urdhër të prokurorit kujdestar rasti është iniciuar si “Trafikimi me njerëz”, nga neni 165 të Kodit Penal të Republikës së Kosovës.

“Prokuroria Themelore në Gjilan në bashkëpunim me Policinë e Kosovës do të ndërmarrin të gjitha veprimet e nevojshme hetimore, në mënyrë që të identifikohet/en kryerësi/it e kësaj vepre penale”, thuhet në njoftim.