Tag: Ballina

Ministrja për Evropën dhe Punët e Jashtme, Elisa Spiropali do të zhvillojë ditën e nesërme, të mërkurën një vizitë zyrtare në Kosovë ku do të pritet nga krerët më të lartë të shtetit.

Gjatë kësaj vizite në Prishtinë, Spiropali do të pritet fillmisht nga homologu i saj, zëvendëskryeministri i parë dhe ministri për Punët e Jashtme dhe Diasporën, Glauk Konjufca.

Më tej, ministrja do të pritet në takime të veçanta nga presidentja e Republikës, Vjosa Osmani, kryetarja e Kuvendit, Albulena Haxhiu, si dhe nga kryeministri Albin Kurti.

Spiropali do të zhvillojë gjithashtu takime me drejtuesit e partive kryesore parlamentare në Kuvendin e Kosovës, kryetarin e PDK-së Bedri Hamza, të LDK-së Lumir Abdixhiku dhe AAK-së, Ramush Haradinaj.

Takimet do të fokusohen te thellimi i bashkëpunimit mes dy vendeve, riaktivizimi i mekanizmave institucionalë të bashkëpunimit, përgatitjet për mbledhjen e përbashkët qeveritare G2G dhe zbatimi i marrëveshjeve të nënshkruara.

Po ashtu, në zgjerimin e bashkëpunimit ekonomik, veçanërisht në zbatimin e projekteve madhore kombëtare si hekurudha Durrës-Prishtinë, shtimin e projekteve infrastrukturore dhe energjetike të përbashkëta, pa lënë mënjanë koordinimin në mbështetje të faktorit shqiptar në rajon dhe bashkëpunimin me diasporën.

Gjatë vizitës, Spiropali do të theksojë mbështetjen e Shqipërisë për forcimin e subjektivitetit ndërkombëtar të Kosovës, avancimin e njohjeve të reja dhe anëtarësimin e Kosovës në organizatat rajonale e ndërkombëtare, si dhe për integrimin euroatlantik të Kosovës.

Anëtari i Lidhjes Demokratike të Kosovës, Gani Geci, ka reaguar lidhur me çështjen e zgjedhjes së presidentit, duke vlerësuar se kryeministri i vendit, Albin Kurti për president e do dikë ‘’që ka më pak dije dhe ndikim në arenën ndërkombëtare, por edhe në popull.’’

Geci ka thënë edhe se, Kurti ka edhe një arsye tjera se pse pse ‘’nuk e do’’ Osmanin si presidente për mandat të dytë, duke përmendur marrëveshjen e Brukselit dhe e Ohrit dhe se, siç ka thënë Geci, Kurti ‘’nuk po ia fal fjalët e Vjosa Osmanit për “lojën e bixhozit me miqtë tanë ndërkombëtarë ekzistencialë”.’’.

‘‘Tani, Albini, duke pasur parasysh se për Vjosën ka gjasa që 15 deputetët e LDK-së të mos rrinë në sallë, po don me e mënjanu Vjosën nga politika dhe po don me gjetë një figurë për të cilën mund të rrijë në sallë edhe AAK, të paktën, në mos edhe PDK. Për një anëtar të familjes Jashari, ne sallë rrinë te gjithë PDK LDK AAK . Se çfarë do të ndodhë saktë mbetet të shihet në këto 8 ditët e ardhshme.’’, ka thënë ai mes tjerash.

Geci ka thënë edhe se LDK, e ka lëshuar rastin që të jetë faktor në vend pas zgjedhjeve të 9 shkurtit, ku i kishte 20 deputetë.

Postimi:

Të dashur qytetarë, jemi para një sfide të madhe për zgjedhjen e Presidentit të Kosovës.

Pasi LDK lëshoi shansin e vet për të qenë faktor në Republikën e Kosovës pas zgjedhjeve të 9 shkurtit, ku kishte 20 deputetë dhe shumë mundësi, tani me 15 deputetë 5 më ks pak mundësi.

Tani këtu kemi vetëm kalkulimet e Albin Kurtit.

Pa dashjen e Albin Kurtit nuk mundet askush ta zgjedhë presidentin, pikë. Varet në tërësi se çfarë do dhe kë do të zgjedhë Albini.

Angazhimi i Edi Ramës në këtë drejtim nuk i ka ndihmuar aspak Vjosa Osmanit, përkundrazi.

Tani t’i shohim numrat:

LVV 57 deputetë plus 9 minoritete = 66.

PDK ka 22 deputetë.

LDK ka 15 deputetë; është pikëpyetje a marrin pjesë të gjithë në zgjedhjen e Vjosa Osmanit.

AAK i ka 6 deputetë.

Lista Serbe ka 9 deputetë.

Në sallë, për t’u zgjedhur Presidenti, duhet të qëndrojnë dhe të marrin pjesë në votim 2/3 e deputetëve, ose së paku 80 deputetë.

Në LDK janë dy deri në katër deputetë që mund edhe të mos marrin pjesë në seancën e Kuvendit për zgjedhjen e Vjosa Osmanit presidente dhe, nga kjo arsye, Albin Kurti nuk po dëshiron të rrezikojë me Vjosa Osmanin: nga pak po dëshiron ta eliminojë Vjosen politikisht, e nga pak nuk po rrezikon me shku në zgjedhje te reja.

Ka edhe një arsye tjetër pse Albin Kurti nuk e do Vjosën, e ajo është marrëveshja e Brukselit dhe e Ohrit, pra Asociacioni (Zajednica), Vetëmenaxhimi (Samoupravljanje).

Albini, si duket, nuk po ia fal fjalët e Vjosa Osmanit për “lojën e bixhozit me miqtë tanë ndërkombëtarë ekzistencialë”.

Vjosa Osmani është njohëse më e mirë e Kushtetutës dhe e marrëveshjeve ndërkombëtare se Albin Kurti. Marrëveshja e Brukselit dhe e Ohrit është në kundërshtim me Kushtetutën – këtë e ka thënë presidentja Vjosa Osmani menjiher pas marrëveshjes .

Vjosa është e vetmja që, në postin e presidentes, mund t’i sjellë probleme Albin Kurtit në raport me këtë marrëveshje antikushtetuese.

Albini nuk dëshiron zhurmë në të ardhmen në këtë drejtim, pra po dëshiron implementimin e kësaj marrëveshjeje kundërkushtetuese pa zhurmë, sepse zhurma e atyre që e kanë pranuar marrëveshjen e vitit 2013 dhe 2015 – këtë të fundit e rrëzoi Gjykata Kushtetuese – është ende prezente.

Tani Albinit i duhet dikush që ka më pak dije dhe ndikim në arenën ndërkombëtare, por edhe në popull.

Vjosa Osmani ka krijuar autoritet të jashtëzakonshëm në arenën ndërkombëtare, që po e zbeh autoritetin e Albin Kurtit në politikën e jashtme.

Thjesht, në një takim jashtë Kosovës ku marrin pjesë Vjosa Osmani dhe Albini, Albini mbetet nën hijen e Vjosës.

Tani, Albini, duke pasur parasysh se për Vjosën ka gjasa që 15 deputetët e LDK-së të mos rrinë në sallë, po don me e mënjanu Vjosën nga politika dhe po don me gjetë një figurë për të cilën mund të rrijë në sallë edhe AAK, të paktën, në mos edhe PDK.

Për një anëtar të familjes Jashari, ne sallë rrinë te gjithë PDK LDK AAK .

Se çfarë do të ndodhë saktë mbetet të shihet në këto 8 ditët e ardhshme.

Bordi i Paqes ka hapur zyrtarisht uebfaqen e tij, duke shënuar një hap të ri në angazhimin për ndërtimin e një arkitekture më efektive dhe pragmatike të paqes në nivel ndërkombëtar. Në faqen zyrtare janë publikuar edhe 28 shtetet themeluese të këtij mekanizmi të ri ndërkombëtar, ku mes tyre figurojnë edhe Kosova dhe Shqipëria.

Në deklaratën themeluese thuhet se paqja e qëndrueshme kërkon gjykim pragmatik, zgjidhje me sens të përbashkët dhe guxim për t’u larguar nga qasjet dhe institucionet që shpesh kanë dështuar të sjellin rezultate konkrete.

Dokumenti thekson se paqja afatgjatë ndërtohet kur qytetarët fuqizohen për të marrë përgjegjësi mbi të ardhmen e tyre, si dhe përmes partneriteteve të qëndrueshme, të orientuara drejt rezultateve dhe të bazuara në ndarjen e barrës dhe përgjegjësive.

Po ashtu, theksohet nevoja për një trupë ndërkombëtare më fleksibile dhe më efektive në fushën e paqebërjes, duke kritikuar qasjet që krijojnë varësi të përhershme dhe institucionalizojnë krizën, në vend që ta tejkalojnë atë.

The Official Board of Peace Website.https://t.co/0IccukrtiD

— Board of Peace (@BoardOfPeace) February 24, 2026

Sipas njoftimit, palët themeluese janë zotuar të krijojnë një koalicion shtetesh të gatshme për bashkëpunim praktik dhe veprim efektiv, duke miratuar Kartën e Bordit të Paqes.

Në mesin e 28 shteteve themeluese që paraqiten në uebfaqe janë: Shtetet e Bashkuara të Amerikës, Shqipëria, Kosova, Turqia, Arabia Saudite, Katari, Emiratet e Bashkuara Arabe, Pakistani, Izraeli, Egjipti, Jordania, Kazakistani, Uzbekistani, Paraguai, Maroku, si dhe vende të tjera nga Evropa, Azia, Afrika dhe Amerika Latine.bo

Eksperti amerikan për Ballkanin Perëndimor, Daniel Serwer, e ka cilësuar krijimin e Dhomat e Specializuara të Kosovës në Hagë si një “gabim të madh”.

Në një intervistë për A2 CNN, Serwer tha se mënyra se si po trajtohen ish-luftëtarët e Ushtria Çlirimtare e Kosovës përbën padrejtësi dhe se gjykata ka tejkaluar mandatin e saj.

“Unë e shikoj si kthimin e viktimës në dhunues dhe jam shumë i zhgënjyer me gjykatën. Mori një interpretim të gjerë të mandatit të vet. Kjo nuk më pëlqen aspak dhe po del si një gabim i madh që unë i kam nxitur politikanët në Kosovë që ta zbatojnë, por tashmë po del gabim i madh. E ka tejkaluar masën, e ka vënë gjykatën në një kanalizim që do të përfundojë në diskreditimin e gjyqit dhe jo të UÇK-së”, u shpreh ai.

Serwer foli edhe për Bordin e Paqes, duke e cilësuar atë si një ide të gabuar.

Sipas tij, autorizimi nga Këshilli i Sigurimit ka ndodhur pa një mandat të qartë dhe pjesëmarrja në këtë mekanizëm shihet me dyshim nga evropianët.

“Bordi i Paqes nuk është diçka për të cilën jam entuziast. Mendoj se ishte gabim që u autorizua pa një mandat të qartë dhe kjo pjesëmarrje është e dyshimtë në sytë e evropianëve. Në thelb është një ide jo e mirë, por kjo nuk do të thotë se Kosova të mos marrë avantazh dhe të mos e rrisë profilin ndërkombëtar. Mendoj se Kosova dhe Shqipëria po e bëjnë këtë”, deklaroi Serwer.

Shqiptaro-amerikani, Harry Bajraktari, ka mohuar se ka ambicie për t’u bërë President i Kosovës, pas Raportimeve i njëjti po lobon në ShBA për këtë post.

Bajraktari ka thënë se vazhdon të mbështes presidenten aktuale, Vjosa Osmanin, edhe për një mandat, duke thënë se ajo është kandidatja e duhur.

“Për të shmangur çdo keqinterpretim, po e them qartë sërish: NUK KAM AMBICIE PËR T’U BËRË PRESIDENT I KOSOVËS”, ka shkruar Bajraktari.

Kryeministri i Kosovës, Albin Kurti, ka nisur një seri takimesh me liderët e partive opozitare për të diskutuar procesin e zgjedhjes së presidentit të ri.

Të hënën, Albin Kurti, ka takuar kreun e LDK-së, Lumir Abdixhiku, e një ditë më herët edhe atë të PDK-së, Bedri Hamza. Për zgjedhjen e presidentit të ri, kanë mbetur edhe tetë ditë. Kurti, ka paralajmëruar intensifikim të bisedimeve për të gjetur zgjidhje për çështjen e Presidentit, pas takimeve që zhvilloi me kreun e PDK-së, Bedri Hamzën dhe atë të LDK-së, Lumir Abdixhikun.

Ai tha se zgjidhja është tek tri partitë e para, Vetëvendosja, PDK dhe LDK, teksa qartësoi se presidentja aktuale, Vjosa Osmani, e cila po synon edhe një mandat, nuk është kandidatja e tij për president.

“ Në vijim do të intesifikojmë bisedimet në mënyrë që ta kemi një zgjidhje për çështjen e presidentit, për shkak se përgjithësisht përshtypja është që subjektet politike konsiderojnë që pas atyre katër palë zgjedhjeve që i patëm, nuk do të duhej që edhe në vitin 2026, gjysmën e parë të na e marrin zgjedhjet e reja”, ka deklaruar Kurti.

Kurti tha se do të përpiqen maksimalisht që t’i evitojnë zgjedhjet e reja. Ai tha se nuk ka përafrim më shumë me asnjërin nga liderët e partive opozitare, por bëri një llogaritje të numrave me LDK’në, për çka tha se nuk ëshyë një formulë e sigurtë për ta tejkaluar këtë çështje.

“Edhe Vetëvendosje me LDK’në nuk është një formulë e sigurtë që ne ta tejkalojmë këtë çështje dhe të mos detyrohemi që të shkojmë sërish në zgjedhje. Nuk mund të them që kam përafrim më shumë me njërin ose tjetrin, por e bëra aritmetikën e numrave që është një fakt objektiv mes nesh që duhet trajtuar me seriozitet maksimal. Me fjalë të tjera do të përpiqemi maksimalisht që t’i evitojmë zgjedhjet për shkak të mos zgjedhjes së presidentit”, tha Kurti.

Megjithatë, ai u shpreh optimist se do të gjendet zgjidhje.

“Mua ajo që më bën optimist ësstë konstruktiviteti i atmosferës në këto takime, fakti që e kuptojmë plotësisht njëri-tjetrin dhe në të njëjtën kohë që nuk shoh zell për zgjedhje të reja. Gatishmëria ekziston, por zell për zgjedhje të reja nuk shoh. Këto elemente më bëjnë optimist që në këto ditët e pakta të mbetura do të mund të gjejmë zgjidhje”, ka deklaruar Kurti para gazetarëve.

Fillimisht, mbrëmjen e së dielës, Kurti u takua edhe me kryetarin e Partisë Demokratike e Kosovës, Bedri Hamza. Ky i fundit theksoi se zgjedhja e presidentit është përgjegjësi e përbashkët e të gjitha forcave politike.

“Si subjekt opozitar, nuk do të jemi pengesë e proceseve shtetërore, por nuk do të mbështesim kandidatura që nuk përfaqësojnë unitetin qytetar dhe frymën kushtetuese,” deklaroi Hamza, duke bërë thirrje për reflektim dhe shmangie të kalkulimeve afatshkurtra partiake.

Ndërkaq, kreu i LDK-së, Lumir Abdixhiku bëri të ditur se në takim me Kurtin janë diskutuar dy rrugë të mundshme: arritja e një konsensusi të gjerë politik brenda nëntë ditëve të mbetura nga afati kushtetues, ose një marrëveshje klasike politike mes partive.

“Dakordimi i përgjithshëm është se ka vetëm dy rrugë: ose konsensus politik mes faktorëve të vendit, ose marrëveshje politike mes partive. Në të dyja rastet duhen dy të tretat e votave,” tha ai, duke shtuar se palët do të vazhdojnë takimet në ditët në vijim.

Mandati i presidentes Osmani përfundon në fillim të prillit, ndërsa sipas afateve kushtetuese, presidenti i ri duhet të zgjidhet deri më 4 mars. Osmani ka shprehur ambicien për një mandat të dytë pesëvjeçar, por ende nuk është e qartë nëse gëzon mbështetjen e nevojshme parlamentare.

Sipas Kushtetutës, në dy raundet e para për zgjedhjen e presidentit kërkohen 80 vota nga 120 deputetë, ndërsa në raundin e tretë mjaftojnë 61 vota. Një kandidat duhet të sigurojë fillimisht të paktën 30 nënshkrime për të hyrë në garë.

Vjosa Osmani po kërkon mandatin e dytë në krye të shtetit. Ajo synon të jetë e para e vendit edhe për pesë vitet e ardhshme. Teksa kanë mbetur nëntë ditë nga afati kushtetues kur Kuvendi duhet t’ia besojë edhe një mandat Osmanit, ose të zgjedhë dikë tjetër për President, ose vendi të shkojë në zgjedhje të reja, këto janë procedurat se si arrihet deri aty.

Dilema e kuorumit

Kushtetuta e Kosovës dhe Rregullorja e Kuvendit e përcaktojnë çështjen e kuorumit dhe mënyrën se si zgjidhet Presidenti i Republikës. Megjithatë, meqenëse këto dispozita janë interpretuar në mënyra të ndryshme, varësisht nga interesat politike, çështja është dërguar dy herë në Gjykata Kushtetuese e Republikës së Kosovës dhe është trajtuar në detaje.

Fillimisht ishte rasti i Behgjet Pacolli. Në atë rast, Gjykata Kushtetuese konstatoi shkelje, sepse në raundin e parë kishin marrë pjesë më pak se 80 deputetë dhe nuk kishte dy kandidatë në garë. Prandaj, çështja e raundeve veç e veç ishte përmendur vetëm shkarazi.

Për ta kuptuar më qartë çështjen e kuorumit për zgjedhjen e Presidentit, duhet t’i referohemi rastit të Hashim Thaçi. Në këtë rast, Gjykata Kushtetuese ka dhënë sqarime të hollësishme.

Në Aktgjykimin KO47/16, saktësisht në pikën 63, thuhet: “Gjykata thekson që, për të qenë e vlefshme procedura për zgjedhjen e Presidentit të Republikës së Kosovës, në raundin e parë dhe të dytë të votimit, të paktën 2/3 (dy të tretat) e të gjithë deputetëve të Kuvendit duhet të jenë të pranishëm dhe të votojnë, ndërsa në raundin e tretë, të paktën shumica e të gjithë deputetëve të Kuvendit duhet të jenë të pranishëm dhe të votojnë, në pajtim me paragrafët 4 dhe 5 të nenit 86 të Kushtetutës.”

Pra, në raundin e parë dhe të dytë duhen të paktën 80 deputetë të pranishëm në sallë dhe që votojnë, ndërsa në raundin e tretë mjaftojnë të paktën 61 deputetë.

Si konsumohen raundet?

Raundi i parë dhe i dytë konsiderohen të konsumuar vetëm nëse në sallë janë të pranishëm të paktën 80 deputetë dhe ata votojnë. Në të kundërtën, raundi është i pavlefshëm dhe nuk mund të vazhdohet me raundet e tjera, pasi raundi mbetet i pakonsumuar.

Në pikën 64 të të njëjtit aktgjykim thuhet: “Në mënyrë që raundi i parë i votimit të jetë i vlefshëm, të paktën 2/3 (dy të tretat) e të gjithë deputetëve të Kuvendit duhet të jenë të pranishëm dhe të votojnë. Nëse ky kusht nuk plotësohet, raundi i parë do të jetë i pavlefshëm. Rrjedhimisht, nuk mund të mbahet raundi i dytë. Në mënyrë që raundi i dytë i votimit të jetë i vlefshëm, i njëjti numër, pra të paktën 2/3 (dy të tretat) e të gjithë deputetëve të Kuvendit, duhet të jenë të pranishëm dhe të votojnë. Nëse ky kusht nuk plotësohet, raundi i dytë i votimit do të jetë i pavlefshëm. Vetëm atëherë kur raundi i parë dhe raundi i dytë janë të vlefshëm, mbahet raundi i tretë. Për të qenë i vlefshëm, raundi i tretë kërkon të paktën praninë dhe votimin e shumicës së të gjithë deputetëve të Kuvendit.”

Pra, për të kaluar në raundin e tretë, ku kërkohen vetëm 61 deputetë, duhet që më parë të jenë konsumuar në mënyrë të vlefshme dy raundet paraprake. Dhe për t’u konsumuar këto dy raunde, është e domosdoshme që të paktën 80 deputetë të jenë në sallë dhe të votojnë

Shefi i grupit parlamentar i AAK-së, Besnik Tahiri, është shprehur i bindur se nëse kryetari aktual i kësaj partie, Ramush Haradinaj, do të hynte në garë për president të Kosovës, ai do të fitonte.

Tahiri, në emisionin “DPT te Fidani” në Klan Kosova, tha se një kandidaturë e Haradinajt do të kishte mbështetje të mjaftueshme.

“Se me ba me hi në garë, Ramushi e fiton. Me ba me hi në garë e fiton, absolutisht. Në një garë kur vjen një figurë si Ramush Haradinaj dhe kushdo tjetër, ajo është tjetër muhabet. Unë jam i bindur që kemi vota”, tha Tahiri.

Kryetari i Lidhja Demokratike e Kosovës, Lumir Abdixhiku, ka deklaruar se procesi i zgjedhjes së Presidentit të Republikës duhet të trajtohet me përgjegjësi të lartë politike, në mënyrë që të shmanget një krizë e re institucionale.

Pas takimit me kryeministrin e Kosovës, Albin Kurti, Abdixhiku tha se afati kushtetues për zgjedhjen e Presidentit është i kufizuar dhe kërkon maturi e kompromis.

“Sot, në ambientet e Kuvendit të Republikës së Kosovës, aty ku përcaktohet fati i institucioneve, kam zhvilluar një takim ndërpartiak LDK–LVV me Kryetarin e Lëvizjes Vetëvendosje dhe njëkohësisht Kryeministrin e Republikës së Kosovës, z. Albin Kurti, lidhur me procesin e zgjedhjes së Presidentit të Republikës dhe çështjen e stabilitetit institucional të vendit,” ka deklaruar Abdixhiku.

Ai theksoi se koha në dispozicion është shumë e shkurtër.

“ Procesi i zgjedhjes së Presidentit po zhvillohet brenda një afati të kufizuar kohor. Na kanë mbetur më pak se 9 ditë për të arritur një zgjidhje. Prandaj, në këtë kohë të shkurtër kërkohet përgjegjësi e lartë politike, e cila nënkupton qartësi, maturi dhe vullnet për kompromis, në mënyrë që të shmanget çdo rrezik për paqëndrueshmëri institucionale,” u shpreh ai.

Kreu i LDK-së nënvizoi se institucioni i Presidencës duhet të mbetet mbi ndarjet partiake.

“Është thelbësore të kuptohet se Presidenca duhet të mbetet institucion që garanton ndarjen e pushteteve dhe shërben si faktor uniteti për vendin, e jo si vazhdim i shumicës qeverisëse,” tha Abdixhiku.

Duke iu referuar qëndrimit zyrtar të LDK-së, ai theksoi se partia sheh dy rrugë të mundshme përpara.

“Në këtë frymë, dhe në përputhje me deklaratën politike të miratuar në Kuvendin e Lidhjes Demokratike të Kosovës, LDK vlerëson se ekzistojnë dy rrugë të qëndrueshme përpara: ose një konsensus i gjerë parlamentar rreth një emri të përbashkët për President, ose një marrëveshje politike ndërmjet partive parlamentare,” deklaroi Abdixhiku.

Sipas tij, në të dyja rastet kërkohet mbështetja e dy të tretave të deputetëve.

“Në të dyja rastet, kërkohet mbështetja e së paku dy të tretave të deputetëve të Kuvendit të Kosovës; dhe ditët në vijim do të na tregojnë se cila rrugë do të jetë e mundshme. Nëse asnjëra, vendit i vijnë zgjedhjet, një skenar i panevojshëm në këtë kohë,” paralajmëroi ai.

Në fund, Abdixhiku theksoi se LDK do të angazhohet për një zgjidhje që garanton stabilitet.

“LDK do të veprojë në këtë proces me përgjegjësi shtetërore, transparencë të plotë dhe vullnet për gjetjen e një zgjidhjeje, duke pasur si prioritet absolut ruajtjen e stabilitetit institucional dhe interesin e Republikës së Kosovës,” përfundoi ai.

Policia e Kosovës ka pranuar sot donacion nga Gjermania në vlerë 200 mijë euro.

Në këtë donacion përfshihen pesë vetura dhe pajisje teknologjike.

“Me datën 23.02.2026, Zv.Drejtori i përgjithshëm i PK-së z.Fehmi Hoti me bashkëpunëtorë, priti në takim përfaqësuesin e Ambasadës Gjermane zëvendës ambasadorin z. Christian Böttcher, ku edhe u bë pranim-dorëzimi i një donacioni nga Republika Federale e Gjermanisë. Ky donacion synon mbështetjen për Policinë e Kosovës, konkretisht në forcimin e mbikqyrjes së kufirit shtetëror.

Donacioni në fjalë ka vlerën rreth 200 mijë euro, përfshirë 5 vetura dhe paisje teknologjike. Policia e Kosovës, vlerson lartë bashkëpunimin dhe përkrahjen e vazhdueshme të Qeverisë Gjermane dhe Ambasadës Gjermane, në ngritjen e kapaciteteve logjistike dhe të teknologjisë”, theksohet në njoftim.