Tag: Ballina

Në dhjetor 2025, presidentja e Komisionit Evropian (KE), Ursula von der Leyen njoftoi qëllimin për të hequr të gjitha masat e mbetura ndaj Kosovës deri në fund të janarit.

Lidhur me këtë, Telegrafi ka pyetur BE-në se deri ku ka arritur procesi për heqjen e tërësishme të masave të mbetura.

BE-ja, në një përgjigje me shkrim për Telegrafin, ka thënë se pas përfundimit të procedurave të brendshme, Komisioni mund të vazhdojë tani me lëshimin e 205 milionë eurove të mbetura si asistencë financiare.

Sipas tyre, kjo do të bëhet pasi të përfundojë nënshkrimi i kontratave për asistencën financiare të planifikuar nën programet IPA 2021 dhe 2022.

“Lëshimi i ardhshëm përfundimtar i fondeve do të përfshijë: 74 milionë euro për projekte nën programet vjetore IPA 2021 dhe 2022, si dhe 131 milionë euro për projekte nën Kornizën e Investimeve për Ballkanin Perëndimor (WBIF)”, thuhet në përgjigje.

Tutje theksohet se Komisioni dhe Shërbimi i Jashtëm Evropian do të forcojnë angazhimin e tyre me autoritetet e Kosovës, përfshirë edhe një vizitë të ardhshme të Komisionerit Kos”.

“ Nga ana e saj, Kosova pritet të intensifikojë zbatimin e reformave shumë të nevojshme lidhur me BE-në dhe të avancojë në përmbushjen e detyrimeve të ndërmarra në Dialogun e lehtësuar nga BE-ja. BE-ja do të vazhdojë të ndjekë dhe të vlerësojë situatën shumë nga afër”, thuhet në përgjigje.

Masat ndëshkuese të BE-së u vendosën ndaj Kosovës në qershor të vitit të 2023 pas rritjes së tensioneve në veri të vendit.

Lëvizja Vetëvendosje e ka propozuar për president të Kosovës, ministrin e Punëve të Jashtme dhe të Diasporës, Glauk Konjufcën.

Postimi i plotë i VV-së:

Zgjedhjet e 28 dhjetorit 2025, që erdhën si rezultat i një bllokade mbi dhjetëmujore, përveçse u mbajtën në një afat të afërt kohor, dhanë gjithashtu rezultatin më të qartë në historinë e Kosovës së pasluftës. Qytetarët folën fuqishëm kundër bllokimit të shtetit dhe në favor të themelimit të institucioneve.

Në përputhje me këtë rezultat, pa asnjë vonesë u konstituuan dy institucionet themelore të vendit, Kuvendi dhe Qeveria, ndërsa procesi i radhës që kemi përpara është ai i zgjedhjes së Presidentit.

Duke pasur parasysh përcaktimet politike të subjekteve parlamentare, si subjekt fitues, propozuam që vendit t’i ofrojmë një kandidat konsensual për President. Për këtë arsye, ftuam disa herë radhazi në takim subjektet më të mëdha opozitare, me synimin për të gjetur emra dhe propozime rreth të cilëve do të mund të ndërtonim pajtim për këtë pozitë, për zgjedhjen e së cilës kërkohet pjesëmarrja e të paktën 80 deputetëve në sallë.

Pavarësisht insistimit tonë, nga këto subjekte nuk morëm asnjë propozim konkret, ndërsa u refuzuan edhe ofertat tona me emra të caktuar.

Subjekti ynë politik është i bindur se në vendin tonë ka shumë emra të denjë për këtë pozitë të rëndësishme shtetërore, rreth të cilëve do të mund të ndërtohej një pajtueshmëri për të ecur përpara. Në këtë fazë, zgjedhjet e reja do të ishin krejtësisht të panevojshme.

Në këto rrethana, Lëvizja VETËVENDOSJE!, pas të gjitha përpjekjeve për të arritur marrëveshje, do të propozojë për kandidat për President ministrin e Punëve të Jashtme dhe Diasporës, ish-kryetarin e Kuvendit, deputetin e shtatë legjislaturave dhe njeriun e dytë më të votuar në historinë e Republikës sonë, z. Glauk Konjufca.

Në të njëjtën kohë, i ftojmë edhe njëherë subjektet opozitare që të propozojnë një kandidat. Nëse u nevojiten nënshkrime plotësuese ne ju ndihmojmë nga grupi ynë parlamentar.

Jemi të bindur se kjo sfidë është e kalueshme, zgjedhjet janë të evitueshme dhe është plotësisht e mundshme të gjejmë pajtueshmëri për të ecur përpara.

Ministrja e Ministrisë së Industrisë, Ndërmarrësisë dhe Tregtisë (MINTI), Mimoza Kusari-Lila, ka njoftuar se ka nënshkruar vendimin për caktimin e çmimeve tavan të produkteve të naftës.

Sipas saj, ky vendim erdhi pas rritjes së menjëhershme të çmimeve të naftës si pasojë e situatës në Lindjen e Mesme.

Në njoftim bëhet e ditur se marzha tregtare maksimale e lejuar në shitjen me shumicë është deri në 2 eurocentë për litër, ndërsa në shitjen me pakicë deri në 12 eurocentë për litër.

“Vendimi vjen pas mbikëqyrjes së vazhdueshme të tregut të naftës, analizimit të evidencave ditore nga Dogana e Kosovës dhe raporteve të Inspektoratit Qendror të Mbikëqyrjes së Tregut, ku është konstatuar se rritjet e çmimeve nga importi janë reflektuar menjëherë në çmimet e shitjes. Marzha tregtare maksimale e lejuar: Shitja me shumicë: deri në 2 eurocentë për litër; Shitja me pakicë: deri në 12 eurocentë për litër”, thuhet në njoftimin e ministres.

Tutje theksohet se inspektorët do të jenë në terren për të mbikëqyrur zbatimin e këtij vendimi dhe se çdo shkelje ose moszbatim do të trajtohet sipas legjislacionit në fuqi.

Kryeministri i Kosovës, Albin Kurti, nuk ka dhënë një përgjigje konkrete lidhur me kandidatin e mundshëm për president, teksa po hynte në mbledhjen e Grupit Parlamentar të LVV-së.

I pyetur nga gazetarët nëse kandidate për këtë pozitë është Vjosa Osmani, Kurti tha se është duke shkuar në mbledhjen e grupit parlamentar, ku do të diskutohet çështja e presidentit.

“Besoni që ngapak edhe unë jam kurreshtar po si ju“, iu përgjigj Kurti gazetarëve nëpyetjen se kush është emri për president.

Ndërkaq i pyetur për spekulimet rreth emrit të Andin Hotit, kryeministri tha shkurt: “Është çështje orësh kur do t’i mësojmë të gjitha, që të gjithë bashkë”.

Nga 62 euro, çmimi për metër kub të betonit ka arritur në 70 deri në 90 euro, varësisht nga cilësia.

Rritja e çmimit konsiderohet se lidhet me zhvillimet e fundit në tregjet ndërkombëtare dhe tensionet në Lindjen e Mesme.

Ekspertët paralajmërojnë se kjo do të ndikojë edhe në shtrenjtimin e materialeve tjera ndërtimore por edhe banesave.

Ndërkohë që ndërtimtarët kanë paralajmëruar se gjatë këtij viti pritet të rritet edhe çmimi i armaturës.

Rritje, ndonëse jo shumë e theksuar, është regjistruar edhe në muajt e fundit të vitit 2025.

Sipas të dhënave të Agjencisë së Statistikave të Kosovës, indeksi i materialeve ndërtimore ka shënuar rritje prej 0.5 për qind krahasuar me muajt paraprak./atvlive.tv

Me 7 vota për, asnjë kundër e dy abstenime, Komisioni për Buxhet në Kuvendin e Kosovës e ka miratuar ndarjen e mjeteve financiare për RTK-në për periudhën janar-qershor 2026, në vlerë prej 4 milionë e 480 mijë euro.

Po ashtu, Komisioni ka udhëzuar Drejtorin e Përgjithshëm të Thesarit që ta bëjë transferimin e këtyre mjeteve në buxhetin e RTK-së.

Paraprakisht, kryetari i Komisionit për Buxhet, Enver Haliti, ka theksuar se meqenëse raporti për vitin e kaluar nuk është miratuar nga Bordi i RTK-së për këtë arsye nuk duhet të hidhet në votim.

“Siç e patë edhe deklarimin e menaxhmentit dhe bordit raporti për vitin e kaluar nuk është miratuar në Bordin e RTK-së, kështu që unë propozoj që atë mos ta hedhim fare në votim. Për shkak se nuk është miratuar nga ana e bordit, mbetet që bordi i ri të vendosë se çfarë do të bëjë me raportin e vitit të kaluar. Ndërsa sa i përket vendimit që ka të bëjë me ndarjen e mjeteve buxhetore për sesionin pranveror, këtë vendim duhet ta marrim, në mënyrë që RTK të mos mbetet pa buxhet dhe të mos përsëritet situata e njëjtë që kishim vitin e kaluar”, ka thënë Haliti.

Gjatë raportimit para Komisionit për Buxhet në Kuvendin e Kosovës, ud. drejtori i përgjithshëm i Radiotelevizionit të Kosovës, Hysen Hundozi, bëri të ditur se përveç raportit gjashtëmujor për vitin e kaluar dhe projeksionit buxhetor për gjashtëmujorin e parë të këtij viti, RTK-ja ka dorëzuar edhe një kërkesë të veçantë drejtuar Komisionit.

Sipas tij, përmes kësaj kërkese i është propozuar Komisionit që t’i rekomandojë qeverisë faljen e kredisë prej 2.5 milionë eurosh, e cila ishte marrë si zgjidhje emergjente për tejkalimin e krizës financiare.

“Arsyet janë të shumta dhe rasti i ‘Milionerit’ është arsyeja kryesore, për shkak se nëse me datën 20 mars ekzekutohet ky urdhër përmbarimor, atëherë RTK-ja do të rrezikohet më shumë se çdo herë tjetër”, ka thënë Hundozi para komisionit.

Lidhur me këtë kërkesë, kryesuesi i Komisionit për Buxhet, Enver Haliti, deklaroi se çështja do të shqyrtohet nga anëtarët e Komisionit dhe RTK do të njoftohet me kohë. /rtk/

Lufta e nisur nga Shtetet e Bashkuara të Amerikës e Izraeli në Iran pritet të përshkallëzohet dhe të marrë përmasa edhe më të mëdha përpara me kërcënimet e vazhdueshme nga udhëheqësit iranianë. Një shqetësim i veçantë ka dalë në dritë ditët e fundit me pretendimet e zyrtarëve izraelitë dhe perëndimorë se raketat balistike iraniane kanë kapacitetin për të arritur objektiva thellë në Evropë.

Në mesin e shteteve që mund të goditen nga raketat balistike iraniane është edhe Kosova e vendet e rajonit.

Një deklaratë nga Ministria e Punëve të Jashtme e Izraelit paralajmëroi se aftësitë balistike të Iranit “shkojnë përtej Lindjes së Mesme”, ndërsa regjimi në Teheran u etiketua si një kërcënim në rritje për paqen botërore.

Iran’s ballistic capability spans beyond the Middle East. The Iranian Ayatollah regime is threatening world peace. pic.twitter.com/VKTAmf3Qaq

— Israel Foreign Ministry (@IsraelMFA) March 2, 2026

Sipas vlerësimeve, Irani ka arsenalin më të madh dhe më të larmishëm të raketave në Lindjen e Mesme, me mijëra raketa balistike të afta të godasin objektiva shumë përtej kufijve të tij, përfshirë Izraelin dhe pjesë të Evropës Lindore.

Grafiku i detajuar u publikua nga Qendra për Studime Strategjike dhe Ndërkombëtare si pjesë e Projektit të saj të Mbrojtjes nga Raketat.

Harta tregon rrezet e ndikimit koncentrik që shtrihen nga 300 deri në 2,500 kilometra, që do të thotë se një pjesë e konsiderueshme e Evropës Juglindore është brenda rrezes së mundshme.

Ndër raketat me rreze të shkurtër veprimi, dallohen Fateh-110 dhe Shahab-1, me një rreze veprimi prej rreth 300 kilometrash. Raketat me rreze të mesme veprimi, si Shahab-3 dhe Ghadr-110, mund të arrijnë deri në 2,000 kilometra, ndërsa sistemi Sejjil vlerësohet të ketë një rreze veprimi të ngjashme.

Irani ka përmirësuar më tej aftësitë e tij ofensive duke zhvilluar raketa lundruese dhe dronë. Raketat lundruese Soumar dhe Hoveizeh vlerësohet se kanë një rreze veprimi prej më shumë se 1,300 kilometrash. Dronët e tipit Shahed-131 dhe Shahed-136 mund të operojnë në distanca prej afërsisht 900 dhe deri në 2,500 kilometrash, përkatësisht

Sipas një infografiku të publikuar nga ministria izraelite, raketat iraniane mund të përbëjnë një kërcënim për shumë qytete evropiane. Mesdheu Lindor konsiderohet më i ekspozuari, ndërsa pjesë të Ballkanit dhe Evropës Juglindore janë brenda rrezes së projeksionit.

Kryeqytete të tilla si Athina, Sofja, Bukureshti, Prishtina, Tirana, Beogradi dhe Sarajeva, janë brenda rrezes së treguar. Në një fushëveprim më të gjerë teorik, tregohen gjithashtu Budapesti, Vjena, Varshava dhe Bratislava. Megjithatë, një distancë më e madhe mund të zvogëlojë fizibilitetin operativ të sulmeve të mundshme.

Tensione të mëtejshme u shkaktuan nga një sulm me dron që thuhet se goditi një bazë britanike pranë Limasolit në Qipro. Qiproja, e cila aktualisht mban presidencën e radhës të Bashkimit Evropian tha se nuk ishte e përfshirë në konflikt pasi një dron Shahed dëmtoi një bazë ajrore britanike në bregdetin jugor të ishullit.

Ka mbetur vetëm edhe një ditë deri në përfundim të afatit për zgjedhjen e presidentit të ri të Kosovës. Institucionet duhet ta përmbyllin procesin deri më 5 mars, në mënyrë që të shmangen zgjedhjet e parakohshme, pasi mandatit të presidentes aktuale, Vjosa Osmani, i vjen fundi në fillim të prillit.

Presidentja aktuale synon një mandat të dytë, ndonëse emri i saj ishte propozuar nga Lëvizja Vetëvendosje në vitin 2021. Aktualisht, kjo parti nuk ka bërë publik ndonjë emër konkret për kandidat.

Pavarësisht disa takimeve ndërmjet liderëve politikë, përfshirë kryeministrin Albin Kurti dhe kryetarët e Partia Demokratike e Kosovës dhe Lidhja Demokratike e Kosovës, Bedri Hamza dhe Lumir Abdixhiku, diskutimet për një kandidat konsensual kanë dështuar.

Kurti zhvilloi dje takimin e tretë radhazi me Abdixhikun, por as ky takim nuk prodhoi rezultat konkret.

“Takimi shkoi në atmosferë konstruktive, por ende nuk e kemi zgjidhjen për presidentin”, deklaroi Kurti pas takimit.

Pas këtij takimi, u mblodh edhe grupi parlamentar i LDK-së për të shqyrtuar situatën politike.

Deputeti i LDK-së, Besian Mustafa, deklaroi se partia e tij nuk i konsideron të nevojshme zgjedhjet e reja në këtë fazë dhe mbetet e hapur për të kontribuar në zgjedhjen e presidentit, por vetëm përmes një marrëveshjeje politike.

“Sot kemi dy opsione: një kandidat konsensual mes të gjitha partive politike, ose një marrëveshje politike mes VV-së dhe LDK-së”, tha Mustafa.

Ai theksoi se shumica parlamentare ka 66 ulëse dhe pa votat e saj nuk mund të realizohet zgjedhja e presidentit.

Sa i përket emrit të Vjosa Osmanit, Mustafa u shpreh se LDK nuk heziton të deklarohet, por theksoi se deri tani nuk ka kandidaturë zyrtare.

“Me vetëm 15 deputetë, LDK nuk mund të sigurojë e vetme 30 nënshkrimet e nevojshme për propozim”, shtoi ai.

I pyetur për emrin e Glauk Konjufcës, Mustafa tha se nuk ka pasur veprim zyrtar nga VV për një kandidaturë të tij.

“Në parim po kërkojmë një kandidat konsensual mes të gjitha partive politike, një kandidat jopartiak, ose një kandidat si rezultat i një marrëveshjeje politike”, deklaroi Mustafa.

Në një takim të mbajtur të shtunën mes Kurtit dhe Hamzës, kreu i PDK-së tha se i ka bërë ofertë kryeministrit për një president të zgjedhur nga partia e tij.

“Ne nuk kemi arritur që të kemi një kandidat i cili do të ishte konsensual, së paku jo deri më tani, e i cili do të shkonte përtej propozimeve partiake. Tash, lajmi i mirë është që PDK-ja ka vendosur të propozojë një kandidat dhe kjo natyrisht që jep shpresë për garë interesante në javën e ardhshme”, deklaroi Kurti pas takimit.

Hamza theksoi se nuk ka marrë pëlqimin e Kurtit për një emër të propozuar nga PDK-ja.

Sipas Kushtetutës së Kosovës, në dy raundet e para për zgjedhjen e presidentit kërkohen 80 vota nga 120 deputetë, ndërsa në raundin e tretë mjaftojnë 61 vota. Një kandidat duhet fillimisht të sigurojë të paktën 30 nënshkrime për të hyrë në garë.

Me afatin që po afrohet, mbetet të shihet nëse partitë do të arrijnë një marrëveshje në momentet e fundit, apo vendi do të shkojë drejt zgjedhjeve të reja.

Instituti i Mjekësisë Ligjore i Kosovës ka bërë të ditur se janë gjetur dhe identifikuar mbetjet mortore të Myrteza (Skënder) Dylhasit nga Gjakova, i rrëmbyer gjatë luftës së fundit në Kosovë.

Ceremonia e rivarrimit të tij është caktuar për të premten, më 6 mars. Homazhet do të zhvillohen nga ora 12:00 deri në 13:00 në Pallatin e Kulturës “Asim Vokshi” në Gjakovë, ndërsa varrimi do të mbahet në orën 13:30 në Kompleksin Memorial në Çabrat.

Myrteza Dylhasi, më 27 mars 1999, së bashku me babanë e tij, Skënder Dylhasin, gjashtë anëtarë të familjes Qerkezi, dy fqinj të familjes Jetishi dhe një anëtar të familjes Ymeraga, u rrëmbyen nga forcat serbe nga shtëpia e Halim Qerkezit në Gjakovë.

Komuna e Gjakovës bën thirrje për pjesëmarrje në homazhe dhe përkujtim të kujtimit të viktimave të luftës, duke nderuar kështu kontributin dhe sakrificën e tyre për lirinë e Kosovës.

Drejtoria e Shëndetësisë dhe Mirëqenies Sociale në Pejë ka njoftuar se caktimi i termineve për shërbimin e mamografisë do të realizohet çdo ditë pune, nga e hëna deri të premten.

Sipas njoftimit zyrtar, pacientët mund të paraqiten për caktimin e terminit në intervalin kohor nga ora 07:00 deri në ora 13:00.

Autoritetet shëndetësore bëjnë të ditur se të gjithë të interesuarit duhet të paraqiten në sportelin e Qendrës Kryesore të Mjekësisë Familjare brenda këtij orari, në mënyrë që të pajisen me termin për kryerjen e mamografisë.

Drejtoria ka falënderuar qytetarët për mirëkuptimin dhe bashkëpunimin.