Tag: Ballina

Predikuesi islamik nga Bosnje e Hercegovina, Elvedin Peziq, pritet të dëbohet gjatë ditës nga Kosova, pasi një ditë më parë ishte shoqëruar nga Policia e Kosovës para një aktiviteti në Vitomiricë të Pejës.

Kështu tha për Radion Evropa e Lirë (REL) një burim i informuar për organizimin dhe qëndrimin e Peziqit në Kosovë.

Sipas këtij burimi, deri më tani nuk ka informacione të tjera për arsyet e shoqërimit të Peziqit.

Policia e Kosovës ende nuk i është përgjigjur kërkesës së REL-it për konfirmim dhe informacione shtesë lidhur me rastin.

Ndërkohë, Këshilli i Bashkësisë Islame të Kosovës në Pejë i tha REL-it se BIK-u nuk kishte qenë në dijeni për ardhjen e Peziqit dhe aktivitetet e tij në Kosovë.

Sipas BIK-ut, Peziqi nuk kishte kërkuar leje apo pëlqim për aktivitetin, ndërsa institucioni nuk kishte ofruar mbështetje materiale apo logjistike për vizitën e tij.

BIK-u konfirmoi se ka pasur komunikim me Policinë e Kosovës lidhur me rastin.

“Policia e Kosovës na është drejtuar me shkresë dhe ne jemi përgjigjur”, tha Këshilli i BIK-ut në Pejë, pa dhënë detaje për përmbajtjen e komunikimit.

Këshilli i BIK-ut shtoi se çdo aktivitet fetar në objektet fetare apo në objekte të tjera duhet të ketë lejen ose pëlqimin e institucionit fetar.

Xhemati i një xhamie në Dobrushë kishte shpërndarë në rrjetet sociale njoftimin për aktivitetin e planifikuar të Peziqit.

Peziq u shoqërua të enjten për intervistim informues, para një aktiviteti ku ishte planifikuar të merrte pjesë në Vitomiricë.

Lajmin për REL-in e kishte konfirmuar Rexho Kojiq nga organizata joqeveritare “Vullnetarët e Rinj” nga Kosova, e cila ishte organizatore e aktivitetit.

Kojiq kishte thënë se Peziq ishte transferuar në një stacion policor në Prishtinë dhe se ai kishte hyrë rregullisht në Kosovë përmes pikëkalimit kufitar në Kullë, me dokumente të Bosnje e Hercegovinës.

Sipas tij, Policia i kishte thënë se Peziq do të mbahej për gjashtë orë për verifikim të identitetit dhe se nuk kishte nevojë për angazhimin e një avokati.

Kojiq kishte thënë gjithashtu se Peziqi ishte pyetur nëse kishte leje nga Bashkësia Islame e Kosovës për mbajtjen e aktivitetit.

“Ai nuk është hoxhë në ndonjë xhami dhe nuk kishte nevojë për një leje të tillë. Bëhej fjalë për promovimin e një libri”, kishte thënë Kojiq.

REL-i ka kontaktuar edhe Komunat e Pejës dhe Prizrenit, si dhe Bashkësinë Islame të Kosovës, për të kërkuar informacione nëse kanë qenë në dijeni të vizitës së Peziqit, nëse kanë pasur rol në organizimin e aktiviteteve dhe nëse ka pasur ndonjë mbështetje apo financim institucional për vizitën e tij.

Në aktivitet ishte planifikuar të merrte pjesë edhe Mithad Qeman, po ashtu predikues islamik, i cili, sipas Kojiqit, ishte shoqëruar nga Policia, por ishte liruar menjëherë.

Peziq dhe Qeman kishin planifikuar të promovonin një libër në Vitomiricë dhe më pas të zhvillonin një aktivitet në Dobrushë të Istogut. Për të premten ishte planifikuar edhe një aktivitet në Reçan të Prizrenit.

Kush është Elvedin Peziq?

Peziq është një predikues islamik nga Bosnje e Hercegovina, i cili prej vitesh është aktiv në internet dhe njihet për qëndrime konservatore dhe si një nga predikuesit që identifikohen me selefizmin.

Ai ka më shumë se 300 mijë ndjekës në Facebook dhe është aktiv edhe në platforma të tjera, ku publikon ligjërata, këshilla fetare dhe komente për çështje shoqërore.

Qëndrimet e tij janë kritikuar në të kaluarën në Bosnje e Hercegovinë. Bashkësia Islame e Bosnjë e Hercegovinës kishte reaguar ndaj një deklarate të Peziqit për rolin e gruas në shoqërinë perëndimore, duke vlerësuar se qëndrime të tilla nuk janë në përputhje me mësimet islame për të drejtat dhe detyrimet e grave myslimane.

Kojiq, megjithatë, kishte thënë për REL-in se, sipas tij, Peziq nuk paraqet rrezik për sigurinë e Kosovës.

“Po të kishte pasur çfarëdo indikacioni për diçka të tillë, ne nuk do ta kishim mbështetur një tubim të tillë”, kishte deklaruar ai.

REL-i është në pritje të përgjigjes së Policisë së Kosovës për të sqaruar arsyet e shoqërimit, statusin e Peziqit dhe bazën e mundshme ligjore për largimin e tij nga Kosova.

100 kadetë kanë përmbyllur me sukses përgatitjen profesionale dhe nga sot do t’i bashkohen Shërbimit Korrektues të Kosovës (SHKK), raporton Ekonomia Online.

Në ceremoninë e diplomimit, drejtori i SHKK-së, Ismail Dibrani, u bëri thirrje zyrtarëve të rinj që detyrën ta ushtrojnë me profesionalizëm, integritet dhe respekt për dinjitetin njerëzor, duke theksuar rëndësinë e tyre jo vetëm në garantimin e sigurisë dhe rendit, por edhe në proceset e rehabilitimit dhe riintegrimit të të burgosurve.

Dibrani, tha se kjo është dita kur një ëndërr, një përpjekje dhe një angazhim i gjatë marrin formë.

“Për ju, kjo është dita kur një ëndërr, një përpjekje dhe një angazhim i gjatë marrin formë. Por mbi të gjitha, kjo është dita kur ju bëni përsipër një përgjegjësi të madhe. Të jesh zyrtar korrektues nuk do të thotë të veshësh thjesht një uniformë. Do të thotë të mbash mbi vete besimin që institucionet e Republikës së Kosovës vendosin mbi ju”, tha Dibrani.

Ai theksoi se nga sot kadetët do të kenë përgjegjësinë për garantimin e sigurisë, rendit dhe disiplinës në institucionet korrektuese.

“ Nga dita e sotme, ju do të jeni ata që do të garantoni sigurinë, rendin dhe disiplinën në institucionet tona korrektuese. Por puna juaj do të jetë shumë më tepër se kaq.

Ne kemi një mision më të gjerë. Ne duhet të garantojmë sigurinë, por njëkohësisht të krijojmë mundësi për rehabilitim, riintegrim dhe ndryshim. Sepse për çdo person që hyn në një institucion korrektues, duhet të ekzistojë mundësia që një ditë të kthehet në shoqëri si njeri i doreshëm për shoqërinë dhe i përgjegjshëm. Dhe në këtë proces, roli juaj është jashtëzakonisht i rëndësishëm”, u shpreh ai.

Dibrani tha se profesionalizmi dhe respekti për dinjitetin njerëzor duhet të jenë pjesë e ushtrimit të detyrës.

“Ndoshta një ditë fjalët e tuaja, një vendim i drejtë, një sjellje profesionale apo një mundësi që i jepni dikujt për të ndryshuar do të ketë ndikim shumë më të madh sesa mund ta imagjinoni sot.

Duhet ta kuptoni se siguria dhe respekti për dinjitetin njerëzor nuk janë të kundërta, ato ecin bashkë. Ligji është udhërrëfyesi juaj, profesionalizmi është forca juaj, integriteti është mbrojtja juaj, dhe respekti për njeriun duhet të jetë gjithmonë pjesë e mënyrës se si ushtroni autoritetin tuaj”, tha Dibrani.

Duke iu drejtuar familjarëve të kadetëve, Dibrani tha se edhe ata kanë pjesë në suksesin e tyre.

“Të nderuar familjarë, pas secilit prej këtyre 100 kadetëve qëndron një familje. Një familje që ka qenë pranë tyre në ditët më të mira dhe në ditët më të vështira. Një familje që ka pritur, ka inkurajuar dhe ka besuar. Prandaj, kjo është dita juaj. Kjo diplomë është gjithashtu dëshmi e mbështetjes që ju keni dhënë.

Sot keni të drejtë të jeni krenarë, sepse nga sot djemtë dhe vajzat, bashkëshortët dhe bashkëshortet, vëllezërit dhe motrat tuaja do të shërbejnë në një ndër institucionet më të rëndësishme në Republikën e Kosovës”, deklaroi ai.

Në fund, Dibrani tha se Shërbimi Korrektues i Kosovës do të vazhdojë të punojë për krijimin e kushteve dhe mbështetjes së nevojshme për zyrtarët e rinj. “Dhe unë ju premtoj se Shërbimi Korrektues do të vazhdojë të punojë që ata të kenë kushte, përgatitje dhe mbështetje të nevojshme për ta ushtruar me dinjitet këtë profesion”, përfundoi Dibrani.

Fehim Sali ka dalë sot më 14.08.2026 para Gjykatës Themelore në Prishtinë nën dyshimin se ka kryer veprën penale të spiunazhit.KALLXO.com ka siguruar dosjen e Prokurorisë Speciale ndaj të dyshuarit ku përshkruhen veprimet e të pandehurit.

Në dosjen e Prokurorisë thuhet se i pandehuri Fehim Sali nga një datë e pacaktuar e deri gjatë arrestimin e tij, me datë 13.08.2026, në territorin e Republikës së Kosovës dhe atë të Serbisë, me dashje dhe me qëllim të përfitimit material, në cilësinë e personit të rekrutuar nga Shërbimi Inteligjent i Republikës së Serbisë, i njohur si BIA, ka ofruar ndihmë të vazhdueshme për këtë shërbim të huaj, duke vepruar sipas urdhrave dhe udhëzimeve të zyrtarit të lartë të BIA-s.

Tutje, sipas dosjes, i dysharu Fehim Sali ka ofruar informacione për situatën politike në Kosovë, ka bërë identifikimin e zyrtarëve të Agjencisë së Kosovës për Inteligjencë (AKI), dhe të njëjtit janë fotografuar nga i arrestuari me qëllim identifikimin e tyre.

Sipas PSRK-së, Sali ka ofruar informacione të personave që i përkasin sektit vehabi dhe personave të tjerë, e të cilët më pas i ka propozuar te zyrtari i BIA-s si objektiva të mundshme për kontaktim dhe rekrutim.

Sipas dosjes së Prokurorisë Speciale, i dyshuari Fehim Sali ka ndërmjetësuar për çështje dhe dokumente të lidhura me institucionet e Republikës së Serbisë, si dhe ka krijuar dhe mbajtur kontakte me persona me ndikim politik dhe shoqëror në Serbi dhe në Republikën e Kosovës, nga komunitetet jo shumicë, të cilëve këtyre të fundit edhe u ka ofruar udhëzime dhe orientime për mënyrën e veprimit politik, të gjitha këto me qëllim të sigurimit, mbledhjes dhe përcjelljes së informatave me interes për BIA-n serbe dhe realizimit të interesave të këtij shërbimi inteligjent të huaj.

Sipas prokurorisë, përmes këtyre veprimeve, i pandehuri ka vepruar në kundërshtim me interesat shtetërore të Republikës së Kosovës, kështu duke cenuar dhe dëmtuar rendin kushtetues dhe sigurinë kombëtare të Republikës së Kosovës.

Ndryshe i dyshuari për spiunazh Fehim Sali është mësimdhënës nga qyteti i Dragashit.Sali është arrestuar nën dyshimin për veprën penale të spiunazhit, ndërsa sot në orët e paradites pritet të mbahet seanca dëgjimore ndaj tij.

Fehim Salim është arrestuar më 13.08.2026 në njërën nga pikat kufitare të Kosovës.KALLXO.com nga burime brenda institucioneve të drejtësisë kishte mësuar se Fehim Sali është i arrestuari nga autoritetet e vendit për dyshime për spiunazh.

Arrestimi i Sali u bë me urdhër të Prokurorisë Speciale të Kosovës në pikën kufitare në Merdare, pikë kjo në Podujevë.

“Me urdhër të Prokurorisë Speciale të Republikës së Kosovës, hetuesit policorë nga Drejtoria për Hetimin e Krimit të Organizuar dhe Krimeve të Rënda, në pikën kufitare në Merdare të Podujevës, kanë arrestuar një shtetas të Republikës së Kosovës, me inicialet F. S., nën dyshimin se ka kryer veprën penale ‘Spiunazh’”- thuhej në njoftimin e Prokurorisë Speciale.

Deputeti i Partisë Demokratike të Kosovës (PDK), Artan Behrami, është paraqitur para dyerve të Sallës së Këshillit të Sigurisë së Republikës së Kosovës, ku presidentja, në koordinim me kryeministrin, mund të shqyrtojë çështje që lidhen me shpalljen e gjendjes së jashtëzakonshme.

Behrami ka thënë se është tronditur nga deklaratat e analistit dhe ish-ambasadorit Lulzim Peci, të bëra një natë më parë në një studio televizive.

“Sepse nëse Kurti në shtator shpall gjendje të jashtëzakonshme, kjo do të jetë fundi i Republikës sonë. Po ashtu, kjo do ta pamundësojë edhe festën për krerët e UÇK-së, por ndoshta edhe protestën në rast se shkon keq verdikti”, ka deklaruar Behrami.

Ai ka thënë se kryeministri Albin Kurti mund të synojë ta “paralizojë Kosovën” më 16 shtator, në ditën kur pritet të merret një vendim në Hagë lidhur me rastin e krerëve të UÇK-së.

“Prandaj, u bëj thirrje të gjithë qytetarëve të Kosovës që të na bashkohen për t’i rezistuar këtij njeriu dhe për të parandaluar që Kosova të shndërrohet në një shtet autoritar”, ka thënë Behrami.

Deklaratat e tij vijnë një ditë pasi ish-ambasadori Lulzim Peci, në një studio televizive, ngriti shqetësime për zhvillimet që mund të pasojnë muajin shtator.

“Unë, si qytetar i Kosovës, i frikohem një skenari të tmerrshëm që neve mundet me na pritë pas shtatorit, sepse e përmenda edhe një herë derdhjen e gjakut. Problemi është se ne mund të mbërrijmë në një situatë më të komplikuar, deri në atë pikë që zoti Kurti të shpallë gjendjen e jashtëzakonshme pa kurrfarë baze ligjore, pa parlament, pa kurgjo”, ka deklaruar Peci.

Ai ka shtuar se një skenar i tillë, sipas tij, do të hapte rrugë për procese të ndryshme politike, si në aspektin e brendshëm ashtu edhe në raport me veriun dhe situatën e përgjithshme në Kosovë.

Behrami, duke iu referuar këtyre deklaratave, ka shprehur frikën se Kurti mund të tejkalojë kompetencat e tij në rast të një situate të jashtëzakonshme.

Ministria e Industrisë, Ndërmarrësisë, Tregtisë dhe Inovacionit ka publikuar çmimet maksimale të lejuara për derivatet e naftës për sot, 14 gusht.

Sipas vendimit, çmimi maksimal i naftës është 1.73 euro për litër, i benzinës 1.50 euro, ndërsa gazit 0.61 euro për litër.

Çmimet e reja hyjnë në fuqi nga ora 10:00.

Deputetja e Aleancës, Time Kadrijaj, ke hedhur poshtë raportimet se ajo në të kaluarën e kishte takuar personin, Skender Llugiqin, që dje bëri thirrje për pushkatimin e Ramush Haradinajt.

Kadrijaj, ka thënë se fotoja e shpërndarë ku shihet ajo dhe Llugiqi, është bërë me inteligjencë artificiale dhe s’është e vërtetë.

Deputetja e Aleancës, po ashtu ka paralajmëruar që do e denoncojë Vudi Xhymshitin i cili edhe e ka publikuar foton, duke thënë se le të merret drejtësia me këtë të fundit.

Postimi:

Të nderuar qytetar, se ku ka arrit poshtërsia e këtij pushteti po e dëshmoj tani.

Me intilegjens artificiale e postuar nga Vudi Xhymshiti në rrjete sociale, se gjoja une kam takuar Skender Llugiqin, përsonin që ka kërcnuar Komandantin Ramush Haradinaj. Kjo nuk qëndron dhe është e pa vërtet.

Personin në fjalë do ta denoncoj, dhe le të merren organet e drejtësis me të.

Jeni në ramje të lirë, kësaj radhe ju ka dal fëtyra e vërtet.

Fehim Sali është arrestuar nën dyshimet për veprën penale të spiunazhit, në një operacion të përbashkët të Agjencisë Kosovare të Inteligjencës, Policisë së Kosovës dhe Prokurorisë Speciale.

Fehim Sali dyshohet se për një periudhë të gjatë ka bashkëpunuar me Agjencinë serbe të Inteligjencës (BIA) dhe se ka mbajtur kontakte me zyrtarin e saj, Zelimir Matoviq.

Ai punon si arsimtar në shkollën serbe “9 Maji” në Rapçë të Dragashit dhe më herët ka qenë i angazhuar në Këshillin Konsultativ për Komunitete pranë Zyrës së Presidentes, raporton rtk.

Po ashtu, dyshohet se merret me ndërmjetësimin për prona dhe dokumente serbe, ndërsa dyshohet se është angazhuar në grumbullimin e votave për mbështetësit e Aleksandar Vuçiqit.

Fehim Sali, është i arrestuari nën dyshimet për veprën penale të spiunazhit, në një operacion të përbashkët të Agjencisë Kosovare të Inteligjencës, Policisë së Kosovës dhe Prokurorisë Speciale.

Fehim Sali dyshohet se për një periudhë të gjatë ka bashkëpunuar me Agjencinë serbe të Inteligjencës (BIA) dhe se ka mbajtur kontakte me zyrtarin e saj, Zelimir Matoviq, shkruan RTK.

Ai punon si arsimtar në shkollën serbe “9 Maji” në Rapçë të Dragashit dhe më herët ka qenë i angazhuar në Këshillin Konsultativ për Komunitete pranë Zyrës së Presidentes.

Po ashtu, dyshohet se merret me ndërmjetësimin për prona dhe dokumente serbe, ndërsa dyshohet se është angazhuar në grumbullimin e votave për mbështetësit e Alleksandar Vuçiqit.

Pritjet në dalje të Kosovës po vazhdojnë edhe gjatë mëngjesit, teksa shumë bashkatdhetarë kanë nisur kthimin drejt vendeve ku jetojnë dhe punojnë

Sipas të dhënave të fundit, në pikën kufitare Dheu i Bardhë, pritjet për të dalë nga Kosova janë deri në 1 orë, ndërsa në Merdare qytetarët po presin rreth 30 minuta.

Fluksi i shtuar në këto pika kufitare lidhet kryesisht me lëvizjet e mërgimtarëve gjatë sezonit të verës, kur numri i automjeteve në rrugët që lidhin Kosovën me vendet e rajonit dhe Evropës rritet ndjeshëm.

Qytetarët që planifikojnë të udhëtojnë këshillohen të informohen paraprakisht për gjendjen në pikat kufitare dhe të marrin parasysh kohën e pritjes gjatë planifikimit të udhëtimit.

Të dhënat për gjendjen në kufi përditësohen nga Qendra Kombëtare për Menaxhim Kufitar.

Muharremi: Qytetarët kanë të drejtë të kërkojnë zbatimin e ligjit, madje edhe t’i nxjerrin nga zyrat kryeministrin dhe ministrat e betuar si deputetë
Read more

Sekretarja e Partisë Demokratike të Kosovës, deputetja Vlora Çitaku, i ka shkruar sërish letër kryesuesit Astrit Dehari për t’i kërkuar që ta thërrasë vazhdimin e seancës konstituive të Kuvendit për nesër në orën 11:00.

PDK-ja kërkoi që Dehari ta përmbushë “obligimin kushtetues dhe procedural”.

“I nderuar z. Dehari, Po ju shkruaj sërish, në cilësinë tuaj si kryesues i seancës konstituive sipas moshës, në emër të Grupit Parlamentar të Partisë Demokratike të Kosovës, kërkojmë nga ju që të përmbushni obligimin tuaj kushtetues dhe procedural dhe që nesër, më 14 gusht 2026, në ora 11.00 të thirrni vazhdimin e seancës konstituive, ashtu siç kërkohet edhe me Rregulloren e Kuvendit të Republikës së Kosovës”, thuhet në letër.

Moskonstituimi i Kuvendit brenda afatit të përcaktuar, “tashmë ka krijuar një situatë të rëndë të shkeljes së Kushtetutës dhe të mosrespektimit të aktgjykimeve të Gjykatës Kushtetuese”, shkruan PDK-ja në letër. “Mosrespektimi i afateve dhe procedurave të përcaktuara me Rregulloren e Kuvendit vetëm sa e thellon më tej këtë situatë”, shtohet aty.

PDK-ja thotë se Dehari duhet të ketë parasysh se “sipas jurisprudencës së Gjykatës Kushtetuese, pavarësisht tejkalimit të afatit kushtetues, Kuvendi duhet të konstituohet. Shkelja e afatit nuk e shuan detyrimin për konstituimin e tij”.

“Prandaj, duke e thirrur nesër vazhdimin e seancës konstituive, ju keni mundësinë dhe detyrimin që të parandaloni një shkelje të rëndë dhe të mundësoni vazhdimin e procesit të konstituimit të Kuvendit. Ju rikujtojmë se roli juaj si kryesues i seancës konstituive sipas moshës është i përcaktuar dhe i kufizuar nga Kushtetuta, aktgjykimet e Gjykatës Kushtetuese dhe Rregullorja e Kuvendit. Përgjegjësia juaj është të mundësoni zhvillimin dhe vazhdimin e seancës deri në konstituimin e Kuvendit. Nuk është në kompetencën tuaj që, mbi bazën e vlerësimeve apo konsideratave politike, të vendosni nëse dhe kur duhet të vazhdojë procesi i konstituimit të Kuvendit”, thuhet në letër.

Vlerësimet dhe negociatat politike u takojnë forcave politike, shkruan PDK-ja në letër, duke shtuar se “ato mund dhe duhet të zhvillohen vetëm brenda kornizës kushtetuese të Republikës së Kosovës, të cilën të gjithë jemi të obliguar ta respektojmë”.

“Për këtë arsye, ju kërkojmë që, pa vonesa të mëtejshme, të thirrni për nesër, më 14 gusht 2026, në ora 11.00 vazhdimin e seancës konstituive dhe të mundësoni ushtrimin e mandatit kushtetues të deputetëve të zgjedhur të Republikës së Kosovës”, thuhet në fund të letrës.