ATV

Tag: Ballina

  • Rubin: Ne duam njohje reciproke në mes Kosovës dhe Serbisë, qëndrimi i SHBA-së për UÇK-në ka evoluar

    Rubin: Ne duam njohje reciproke në mes Kosovës dhe Serbisë, qëndrimi i SHBA-së për UÇK-në ka evoluar

    I gjithë rajoni i Ballkanit Perëndimor është i cenueshëm ndaj dezinformatave ruse dhe kineze, por “një pjesë e madhe” e tyre vjen nga Serbia dhe ky është një “problem i madh që duhet të adresohet”, thotë James Rubin, përgjegjës i Qendrës Globale të Angazhimit.

    Qendra është një organ i Departamentit amerikan të Shtetit, e krijuar për të ekspozuar dhe për t’iu kundërvënë propagandës dhe dezinformimit.

    I pyetur se si e komenton hapjen e Russia Today – organizatë ndërkombëtare e lajmeve e kontrolluar nga shteti rus – në Serbi, Rubin thotë:

    “Ne nuk do të donim të shihnim Russia Today ose media [të tjera] ruse kudo në botë. Duam që ato të mbyllen”.

    Në intervistën dhënë Radios Evropa e Lirë gjatë një qëndrimi të shkurtër në Prishtinë, Rubin flet edhe për Ushtrinë Çlirimtare të Kosovës, themelues të së cilës po përballen aktualisht me akuza për krime lufte dhe krime kundër njerëzimit.

    Rubin thotë se qëndrimi i SHBA-së për UÇK-në ka evoluar ndër vite.

    Në ditët e para, kujton ai, SHBA-ja i ka dënuar “aktivitetet terroriste të kryera nga grupet shqiptare”, por me evoluimin e procesit të paqes, thotë se UÇK-ja është bërë qendër e atij procesi.

    “UÇK-ja luajti një rol vendimtar në marrëveshjet që u nënshkruan nga krerët e saj dhe në zbatimin e çmilitarizimit të premtuar”, thotë Rubin.

    “Unë kam kujtime të dashura të punës me liderët e tyre. Kjo nuk do të thotë se çdo gjë që ka ndodhur në atë kohë të luftës, është diçka që unë do ta mbështesja”.

    “Por, nuk mendoj se duhet ta rishkruajmë historinë për këtë temë”, shtoi ai.

    Gjatë luftës në Kosovë në fund të viteve 1990, Rubin ka qenë ndihmëssekretar i Shtetit amerikan.

    Kosova i ka ndarë në vitin 2013 Medaljen Presidenciale të Meritave për angazhimin e tij për çlirimin e Kosovës.

    Radio Evropa e Lirë: Zoti Rubin, faleminderit që po flisni për Radion Evropa e Lirë në Prishtinë! Në Kosovë jeni faktikisht vetëm transit. Dje [10 prill] keni qenë në Mal të Zi, tani po shkoni në Maqedoni të Veriut. Çfarë ju ka kthyer në Ballkanin Perëndimor?

    James Rubin: Sekretari [amerikan i Shtetit, Antony] Blinken më ka kërkuar të marr përsipër një sfidë të re, me të cilën përballet bota. Dezinformimi dhe manipulimi i informacionit janë një disiplinë e re, një kërcënim i ri për botën. Unë jam përgjegjës i Qendrës Globale të Angazhimit dhe quhem ‘I dërguar special’. Ajo që përpiqemi të bëjmë këtu, është t’i ndjekim vetë ofruesit e dezinformatave, ta trajtojmë këtë problem rrënjësisht dhe ta zgjidhim, e jo të presim që të thuhen gënjeshtra për Shtetet e Bashkuara, për Perëndimin, të cilat janë përhapur nga portalet në këtë pjesë të botës.

    Mendoj se nuk është sekret që në Maqedoni të Veriut dhe në Mal të Zi, ka media që përsërisin gënjeshtrat ruse, dezinformatat ruse, duke thënë gjëra të tilla si ‘në Ukrainë ka armë biologjike’ – kur kjo nuk është e vërtetë dhe është hedhur poshtë si ide edhe nga Konventa e Armëve Biologjike në Gjenevë – apo duke thënë se Shtetet e Bashkuara e kanë dashur këtë luftë [në Ukrainë] ose e shohin këtë luftë si operacion për të fituar para. Të gjitha këto gënjeshtra dezinformuese, për fat të keq, janë shumë të spikatura dhe shumë të përhapura në Ballkanin Perëndimor.

    Kështu që, unë kam ardhur këtu për të biseduar me qeveritë, që të bëjnë diçka në këtë drejtim. E kuptoj që ky është një problem i vështirë dhe nuk është një problem i lehtë. Dhe, nuk jemi të përsosur as ne në Shtetet e Bashkuara. Por, ne duhet të zhvillojmë një kod operativ të sjelljes – nëse dëshironi – një mënyrë për të bërë biznes, të cilën e ndajnë të gjithë, ligjërisht, institucionalisht [dhe] krijon struktura në secilën prej qeverive.

    Unë kam biseduar me Qeverinë malazeze për këtë, jo me Qeverinë aktuale, sepse, në fakt, nuk ka një të tillë, por me liderët e ardhshëm. Dhe jam inkurajuar shumë, se të gjithë e njohin këtë problem. Ne do të punojmë me ta si partnerë që të përpiqemi të kuptojmë, së paku, se si ta ndalojmë rritjen e këtij dezinformimi dhe të fillojmë ta kontrollojmë.

    Radio Evropa e Lirë: Çfarë prisni të bëjnë ato? Si të ndalet kjo disiplinë?

    James Rubin: Para së gjithash, nuk është lehtë. Ne duhet ta pranojmë se ekziston liria e shtypit dhe ne e duam lirinë e shtypit. Por, nëse keni llogari të Qeverisë kineze në mediat sociale, ato duhet të etiketohen si llogari të Qeverisë kineze. Njerëzit nuk duhet të mendojnë se ky është vetëm një kinez i zakonshëm që thotë diçka, ata duhet ta dinë se është llogari qeveritare. Ky është një shembull.

    Ne duhet të përpiqemi të sigurojmë që pronësia e huaj e mediave është transparente. Ky është [edhe] një shembull i diçkaje që duhet bërë. Dhe, të vendosen rregulla… Nëse një medium, thjesht, kopjon një gënjeshtër ruse, ata nuk mund të pretendojnë se janë gazetarë. Kjo është diçka tjetër, quhet dezinformim. Dhe, ne duhet të përpiqemi ta ndalojmë këtë.

    “Pjesa më e madhe e dezinformatave vjen nga Serbia”

    Radio Evropa e Lirë: A është ndonjëri prej vendeve të Ballkanit Perëndimor më i cenueshëm përballë dezinformimit rus dhe kinez?

    James Rubin: Unë mendoj se i gjithë rajoni është i cenueshëm në përgjithësi ndaj problemit, sepse mediat përhapen gjerësisht në rajon nga shumë vende të ndryshme. Natyrisht, një pjesë e madhe e saj vjen nga Serbia. Dhe, ky është një problem i madh që duhet të adresohet.

    Por, qeveritë e tjera në Mal të Zi, në Maqedoninë e Veriut, duhet t’i parandalojnë ose të përpiqen t’i parandalojnë këto gënjeshtra që të përhapen, duke përdorur çdo mjet që munden. Ne do të donim të shihnim që ato krijojnë njësi qeveritare, që mund të fillojnë ta shqyrtojnë dhe analizojnë këtë problem, në mënyrë që ne të mund të përpiqemi ta ndalojmë atë.

    Radio Evropa e Lirë: Këtë herë nuk do të udhëtoni në Serbi?

    James Rubin: Nuk do të udhëtoj në Serbi me këtë rast. Shikoni, unë jam realist. E di se, duke marrë parasysh të kaluarën time, unë nuk jam ndoshta diplomati më i mirë për t’u takuar me zyrtarë të Qeverisë serbe. Unë jam në dijeni për realitetet e rajonit. Nga ana tjetër, ne kemi një mundësi tani – dhe mund të flasim për këtë në një minutë – ku Serbia dhe Kosova mund të fillojnë t’i normalizojnë marrëdhëniet e tyre dhe ne t’i lëmë pas disa nga këto padrejtësi të së kaluarës.

    Radio Evropa e Lirë: Si e komentoni hapjen e [mediumit rus] Russia Today në Serbi, vitin e kaluar, dhe përhapjen e dezinformatave prej tij?

    James Rubin: Ne nuk do të donim të shihnim Russia Today ose media [të tjera] ruse kudo në botë. Duam që ato të mbyllen. Ato janë mbyllur në pjesën më të madhe të komunitetit evropian.

    Mendoj se qeveritë që duan të jenë pjesë e Evropës, duhet të kuptojnë se Evropa ka marrë një qëndrim të guximshëm dhe të fuqishëm kundër pushtimit rus të Ukrainës.

    Ky është rregulli numër një i sistemit ndërkombëtar, që nuk duhet ta pushtoni fqinjin tuaj.

    Rusia e ka thyer këtë rregull. Qeveritë që duan të jenë pjesë e Evropës, duhet të kuptojnë se nëse bashkohen me Rusinë, ato i vënë në rrezik marrëdhëniet e tyre me Evropën.

    Radio Evropa e Lirë: Zoti Rubin, derisa flasim, mediat ndërkombëtare raportojnë për rrjedhje të informacioneve të ndjeshme të inteligjencës. Sa e rrezikshme është kjo për sigurinë kombëtare të Shteteve të Bashkuara? A dihet se si ka ndodhur?

    James Rubin: Kjo është një prej atyre çështjeve, ku si zëdhënës i Qeverisë amerikane duhet të them se flas me shumë kujdes. Gjithçka që mund t’ju them për këtë, është se kjo është një çështje që duhet ta diskutojë Departamenti i Mbrojtjes. Por – më e rëndësishmja – unë mendoj se tani është çështje e Departamentit të Drejtësisë që ta hetojë këtë informacion.

    “Shtetet e Bashkuara dhe Perëndimi i kanë kuptuar ngadalë rreziqet nga dezinformimi”

    Radio Evropa e Lirë: Edhe një pyetje në lidhje me dezinformimin. Kush e ka avantazhin në këtë pikë – përgënjeshtrimi i dezinformatave nga Perëndimi apo propaganda ruse? Ju keni thënë njëherë se Perëndimi i është përgjigjur ngadalë shfaqjes së Kinës në hapësirën e informacionit.

    James Rubin: Nëse duam të jemi realistë, dhe unë jam realist, Shtetet e Bashkuara dhe Perëndimi i kanë kuptuar ngadalë rreziqet nga dezinformimi dhe manipulimi i informacionit nga Rusia dhe Kina. Ato kanë shpenzuar miliarda e miliarda dollarë për këtë projekt në fushën e informacionit, për shumë e shumë vite.

    Unë mendoj se duhet ta intensifikojmë lojën tonë. Sekretari Blinken më ka kërkuar ta marr këtë punë, sepse ai dëshiron që Shtetet e Bashkuara ta intensifikojnë lojën e tyre. Sekretari Blinken beson se ky është një kërcënim real dhe domethënës për botën. Dhe, siç e kam theksuar, kjo ndodh çdo ditë në gjithë botën. Kjo është arsyeja përse ai i ka mbështetur aq shumë përpjekjet që po bëj këtu në Ballkan, për ta zgjidhur problemin e dezinformimit rus, jo vetëm për të reaguar, por edhe të përpiqemi t’i japim fund.

    Radio Evropa e Lirë: Sa po ndikojnë lajmet e rreme dhe dezinformatat në disa procese në Ballkanin Perëndimor, sikurse dialogu ndërmjet Kosovës dhe Serbisë?

    James Rubin: Jam i sigurt se problemi i informimit ka qenë rrënja e problemeve në këtë pjesë të botës për një kohë shumë-shumë të gjatë. Për herë të parë u bëra i vetëdijshëm për këtë ide të dezinformimit në vitet ‘90, kur dëgjova dhe shikova lajme të sponsorizuara nga qeveria për grupe të ndryshme etnike, të cilat ishin të dizajnuara për ta zemëruar njëri-tjetrin, të dizajnuara për të zhvilluar urrejtje mes njëri-tjetrit dhe ne i pamë pasojat e kësaj dhe luftërat e tmerrshme të kësaj pjese të botës.

    Pra, ka nga ata që nuk duan të shohin marrëdhënie të normalizuara midis vendeve të ndryshme të Ballkanit Perëndimor. Ka nga ata që nuk duan t’i shohin vendet e Ballkanit Perëndimor të bëhen pjesë e Bashkimit Evropian dhe të bëhen pjesëmarrës normalë në institucionet evropiane. Sigurisht që kjo [anëtarësimi në BE] nuk është diçka që politika e jashtme e Kremlinit është krijuar për ta arritur, [ajo] është krijuar për ta arritur të kundërtën.

    Kështu që, unë do t’i bëj thirrje kujtdo në këtë pjesë të botës që dëshiron të shohë një të ardhme për fëmijët e tyre dhe të shohë një të ardhme më të ndritshme për vendin e vet, të punojnë së bashku si shoqëri, për t’u dhënë fund gënjeshtrave që prodhojnë vetëm urrejtje mes komuniteteve.

    Radio Evropa e Lirë: Do të qëndrojmë në temën e dialogut edhe pak. Kosova dhe Serbia së fundmi janë pajtuar për një marrëveshje për rrugën drejt normalizimit, e cila nuk parasheh njohje reciproke. A mund të ketë normalizim të marrëdhënieve mes Kosovës dhe Serbisë pa njohje zyrtare?

    James Rubin: Më lejoni të them vetëm se si një amerikan që flet për Shtetet e Bashkuara të Amerikës, ne duam të shohim njohje reciproke, ne besojmë se kjo është rruga e duhur e veprimit. Megjithatë, si realist, si diplomat, dua të them se jam i inkurajuar që procesi që ka zhvilluar Bashkimi Evropian ka mundësinë t’i normalizojë marrëdhëniet ndërmjet Serbisë dhe Kosovës, ta lejojë Kosovën të jetë pjesë e Bashkimit Evropian, ta lejojë Kosovën të jetë pjesë e NATO-s, të lejohet Kosova të jetë pjesë e Këshillit të Evropës. Këta do të ishin hapa të mëdhenj përpara për këtë vend për të cilin kam një ndjenjë të veçantë dhe një dashuri të veçantë.

    Dhe, mund të mos i arrijë të gjitha objektivat që mund t’i dëshirojnë Shtetet e Bashkuara të Amerikës ose që mund t’i dëshirojë populli kosovar, por nëse mund të arrijmë të njihen simbolet e sovranitetit të Kosovës në atë kuptim; nëse mund të arrijmë marrëdhënie normale dhe shkëmbime ambasadash dhe të gjithë hapat e nevojshëm për t’i bërë vendet ta trajtojnë njëra-tjetrën normalisht; dhe nëse Serbia nuk e bllokon më ose nuk mund ta bllokojë Kosovën që të mos jetë pjesë e NATO-s, Bashkimit Evropian dhe të jetë pjesë e institucioneve evropiane, atëherë mendoj se populli i Kosovës do të ketë arritur diçka shumë më tepër sesa që mund të shpresojë dhe ka shpresuar për një kohë të gjatë.

    Kështu që, unë do t’i nxisja njerëzit që shikojnë, ta theksojnë pozitiven. Nuk është e përsosur. Në këtë biznes, ne nuk mund të lejojmë që e përsosura të jetë armikja e së mirës dhe mendoj se do të jetë një lajm i mirë për popullin e Kosovës nëse vendi i tyre është pjesë e Evropës në kuptimin institucional, pjesë e NATO-s, pjesë e institucioneve të Perëndimit, edhe nëse nuk arrihet rezultati i përsosur i njohjes.

    “Liderët e Serbisë duhet të mësohen me idenë se s’do t’i marrin të gjitha që duan”

    Radio Evropa e Lirë: Në fakt, anëtarësimi i Kosovës në organizatat ndërkombëtare është diçka që Aleksandar Vuçiq, president i Serbisë, tha se nuk do ta zbatojë, nuk do ta mbështesë. Kështu tha ai, pasi u arrit marrëveshja. Gjithashtu, ai në njëfarë mënyre mbështetiListën Serbe në veri të Kosovës që të mos marrë pjesë në zgjedhjet e Kosovës për katër komunat në veri. Ai paralajmëroi se kryeministri i Kosovës, Albin Kurti, do që ta sundojë veriun dhe njerëzit atje do të jenë nën okupim. Si po kontribuon kjo në normalizimin?

    James Rubin: Unë do t’i shmangem futjes në disa prej këtyre detajeve sepse, ndryshe nga kohët e vjetra kur e studioja këtë rajon me shumë kujdes dhe punoja në disa nga problemet shumë afër, nuk jam i njohur me të gjitha deklaratat që i bëtë.

    Megjithatë, besoj se është jashtëzakonisht e rëndësishme që, nëse liderët e Serbisë duan ta shohin vendin e tyre pjesë të Evropës, pjesë të Bashkimit Evropian, pjesë të NATO-s, ta kenë mundësinë për të qenë një e ardhme më e mirë për popullin e tyre, ata duhet të mësohen pak me idenë se nuk do t’i marrin të gjitha gjërat që duan dhe ndoshta duhet të bëjnë më shumë për ta ndërtuar mbështetjen për një marrëveshje që në të vërtetë nuk është mes Kosovës dhe Serbisë.

    Anët teknike të kësaj janë disi të komplikuara, por këto janë marrëveshje që do të ishin ndërmjet Kosovës dhe Bashkimit Evropian dhe Serbisë dhe Bashkimit Evropian. Dhe, Serbia nuk do të ishte në pozitë për ta bllokuar anëtarësimin e Kosovës në Bashkimin Evropian.

    Kjo do të ishte në duart e vendeve të Bashkimit Evropian. Shtetet e Bashkuara të Amerikës do të punojnë me lidershipin e Bashkimit Evropian për të arritur një rezultat që nëse Kosova i kryen, i respekton zotimet në këtë dokument, Bashkimi Evropian do të vendosë ta sjellë Kosovën [në BE], pavarësisht nëse Serbia do ta preferonte apo jo.

    “UÇK-ja, qendër e procesit të paqes për Kosovën”

    Radio Evropa e Lirë: Zoti Rubin, do të kalojmë te një temë tjetër. Njerëzit në Kosovë ju njohin nga angazhimi juaj gjatë luftës në Kosovë. Si e shihnit në atë kohë rolin e Ushtrisë Çlirimtare të Kosovës(UÇK)?

    James Rubin: Qëndrimi i Shteteve të Bashkuara për UÇK-në evoluoi. Në ditët e para, para se të dija shumë për të, ne i kishim dënuar aktivitetet terroriste që ishin kryer nga grupet shqiptare. Por, me evoluimin e procesit të paqes, UÇK-ja u bë qendra e atij procesi të paqes dhe ishte Hashim Thaçi, në bisedimet e Rambujesë, ai që mori vendimin e guximshëm për të rënë dakord me Marrëveshjen e Rambujesë. Dhe, ky ishte vendimi që lejoi NATO-n t’i mbështeste shqiptarët e Kosovës. Po të mos ishte marrë ai vendim, nuk mendoj se do të rrinim kaq të lumtur dhe të lirë në një qytet modern evropian këtu në Prishtinë.

    Shumë e shumë shqiptarë do të kishin vdekur.

    Pra, UÇK-ja luajti një rol vendimtar në marrëveshjet që u nënshkruan nga krerët e saj dhe në zbatimin e çmilitarizimit të premtuar prej tyre. Dhe, siç më thanë në atë kohë, nëse ne i zbatonim premtimet tona për ta përdorur fuqinë ushtarake në emër të tyre, ata do t’i zbatonin premtimet e tyre. Ata i zbatuan premtimet e tyre për t’u çmilitarizuar dhe kanë qenë duke punuar ngushtë me KFOR-in dhe me përfaqësuesit zyrtarë të Shteteve të Bashkuara të Amerikës këtu për shumë e shumë vite.

    Mendoj se është e drejtë të thuhet se ajo marrëdhënie ishte ajo që u mundësoi shqiptarëve ta shmangnin atë që do të ishte një masakër e madhe në këtë pjesë të botës. Kështu që, unë kam kujtime të dashura të punës me liderët e tyre. Kjo nuk do të thotë se çdo gjë që ka ndodhur në atë kohë të luftës është diçka që unë do ta mbështesja. Natyrisht, ka gjëra që janë bërë.

    Por, le të jemi qartë, kërcënimi erdhi nga forcat ushtarake serbe, kërcënimi i masakrimit masiv erdhi nga forcat ushtarake serbe.

    Dhe, po, UÇK-ja me gjasë kishte probleme që u ekzaminuan dhe u panë që nuk ishin të përsosura. Por, nuk mendoj se duhet ta rishkruajmë historinë për këtë temë.

    Radio Evropa e Lirë: Tani, Hashim Thaçi dhe themelues të tjerë të UÇK-së po akuzohen se ishin anëtarë të një ndërmarrjeje të përbashkët kriminale me qëllimin e përbashkët për të fituar dhe ushtruar kontroll në të gjithë Kosovën përmes mënyrave të ndryshme. Si e komentoni këtë?

    James Rubin: Unë, thjesht, nuk kam asnjë koment për këtë.

  • Plagosja në veri, Policia e Kosovës: Dyshohet se një zyrtar policor u përfshi në këtë rast

    Plagosja në veri, Policia e Kosovës: Dyshohet se një zyrtar policor u përfshi në këtë rast

    Mbrëmë u raportua për një rast të një personi të plagosur nga përfshirja me armë zjarri në veri të Mitrovicës, rast ky, për të cilin pati reagime të shumta, ndër to kur në mediat serbe u tha se në këtë rast ishte përfshirë një zyrtar policor i Kosovës.

    Lidhur me këtë, Policia e Kosovës përgënjeshtroi mediat serbe, duke deklaruar se nuk ka plagosur asnjëri.

    Mirëpo pasditen e sotme Policia e Kosovës ka reaguar përsëri.

    Sipas një komunikate për media, Policia e Kosovës, njoftoi se pas hetimeve të pandërprera dhe angazhimeve të njësiteve policore në vendin e ngjarjes, dyshohet për përfshirje të mundshme të një zyrtari policor në gjuajtje me armë zjarri, shkruan atvlive.tv.

    “Bazuar në informacionet dhe dëshmitë e siguruara janë marrë masa të suspendimit ndaj zyrtarit policor, pasi i njëjti nuk kishte raportuar lidhur me rastin dhe për përfshirjen e tij në rast, nga ku PK-ja kishte lëshuar njoftim se nuk ka qenë e përfshirë në shkëmbim apo gjuajtje me armë zjarri”, thuhet në komunikatë.

    Po ashtu, bëhet e ditur se janë marrë masa të suspendimit edhe ndaj tre zyrtarëve të tjerë të mundshëm të përfshirë në rast.

    Tutje, Policia njoftoi se për këtë është njoftuar Inspektorati Policor i Kosovës dhe Prokuroria, për procedura të mëtejme penale.

    “Policia e Kosovës do të vazhdojë të realizojë detyrat zyrtare konform autorizimeve ligjore, të mbajë të informuar opinion në mënyrë të drejt dhe të paanshme, pa marrë parasysh se kush është përfshirë në rast dhe në asnjë rrethanë të vetme, nuk do të veprojë ndryshe, vetëm sipas legjislacionit në fuqi. Njëkohësisht Policia e Kosovës do të bashkëpunojë ngushtë me Inspektoratin Policor dhe Prokurorin e Shtetit, me qëllim që të vazhdojë të mbajë përgjegjës zyrtarët policorë, të cilët nuk përkojnë dhe veprojnë sipas standardeve më të larta etike dhe profesionale”, përfundon komunikata./atvlive.tv/

  • Grajqevci: Kanë ndërtuar shtëpi mbi eshtrat e shqiptarëve për të zhdukur krimet

    Grajqevci: Kanë ndërtuar shtëpi mbi eshtrat e shqiptarëve për të zhdukur krimet

    Kryetari i Këshillit Koordinues të Familjeve të Personave të Zhdukur, Ahmet Grajqevci, në emisionin A23 në ATV, ka thënë se për familjarët, shpresat janë të vogla për gjetjen e të dashurve të tyre, pasi që sipas tij, Serbia do të bëjë çdo gjë për fshehjen e tyre.

    “Për ne familjarët, shpresat janë shumë të vogla, sepse Serbia pa një trusni të madhe ndërkombëtare, të perëndimit dhe botës demokratike nuk do ta bënë atë, do ta neglizhon, do ta fshehë, çdo gjë do të bëjë sepse i ka fshehë trupat, ka hedh në Danub, Peruçac, Petrovasellë, ka ndërtuar shtëpi, ka ndërtuar asfalt, tash po ndërton edhe kisha mbi eshtrat e shqiptarëve”, tha Grajqevci.

    Ai kërkoi nga të gjitha institucionet që zhvillojnë takime me palën serbe që gjithmonë ta kenë prioritet çështjen e personave të zhdukur.

    “Ne gjithmonë kemi insistuar që kushdo që të jetë prej udhëheqësisë në takime me palën serbe, gjithherë duhet ta iniciojë çështjen e parë, çështjen e personave të zhdukur, sepse Serbia, vite-vite po e neglizhon këtë proces sikur qëllimisht e fshehë çështjen e personave të zhdukur me dhunë nga Kosova, kur e dimë që një numër i madh i tyre është marrë gjallë, dhe gjallë ka hy në territoret e Serbisë dhe ne e dimë rrugëtimin e tyre në Serbi, por nuk e dimë qëndrimin e tyre, vendndodhjen, po as përfundimin e tyre se ku janë”, tha Grajqevci. /atvlive.tv

  • (VIDEO) Momenti kur automjeti i Bernard Ndrecës shpërthen sapo ai hipën në të

    (VIDEO) Momenti kur automjeti i Bernard Ndrecës shpërthen sapo ai hipën në të

    Euronews Albania ka mundur të sigurojë pamjet e fiksuara nga kamerat e sigurisë, kur automjeti tip ‘Audi’ i kreut të Rithemelimit në Vaun e Dejës, Benard Ndreca, hidhet në erë.

    Nga pamjet e siguruara, shihet Ndreca i cili hipën në automjet rreth orës 07:10 minuta dhe teksa ai nis lëvizjen me automjetin e tij, sasia e tritolit e vendosur në pjesën e përparme të makinës shpërthen.

    Shpërthimi është tepër i fuqishëm duke dëmtuar makinën në pjesën e motorit.

    Ndreca mundet të dalë nga automjeti duke i shpëtuar mrekullisht atentatit.

    Nga video shihet gjithashtu që pranë makinës ndodhej edhe një grua, e cila gjithashtu ka shpëtuar për mrekulli.

    Vetë Ndreca ka reaguar në lidhje me incidentin, duke thënë se nuk ka konflikte me njeri dhe se sulmi mund të ketë ardhur për shkak të angazhimit të tij politik.

    Kamerat e sigurisë kanë kapur edhe momentin kur dy autorët e maskuar kanë vendosur tritolin në pjesën e përparme të makinës nga krahu i shoferit.

    Grupi hetimor ndodhet në vendngjarje dhe po vijon mbledhjen e provave që mund të bëjnë të mundur identifikimin dhe kapjen e autorëve.

     

  • Kurti konfirmon adresën e re të Ambasadës së Kosovës në Mbretërinë e Bashkuar

    Kurti konfirmon adresën e re të Ambasadës së Kosovës në Mbretërinë e Bashkuar

    Kryeministri i vendit, Albin Kurti ka konfirmuar se Ambasada e Kosovës në Mbretëri të Bashkuar do të zhvendoset në Hyde Park.

    Ai ka shkruar në Twitter se Kosova është e interesuar të forcojë lidhjet me Mbretërinë e Bashkuar.

    “I emocionuar të ndaj që ambasada Kosovës në Mbretërinë e Bashkuar ka një adresë të re dhe së shpejti do të zhvendoset në Hyde Park në një shtëpi që i përkiste komedianit të ndjerë Spike Milligan. Ne jemi të nderuar nga historia kulturore që mban lokacioni dhe synojmë të forcojmë më tej lidhjet tona”, ka shkruar Kurti.

  • Lista Serbe kërkon urgjentisht tërheqjen e Njësive Speciale të Policisë nga veriu

    Lista Serbe kërkon urgjentisht tërheqjen e Njësive Speciale të Policisë nga veriu

    Lista Serbe përmes një reagimi, nuk ka hezituar të shtyjë përpara propagandën e saj nxitëse e përçarëse për të arritur qëllimet e saj për nxitje të tensioneve në veri.

    Në reagim, Lista Serbe ka dënuar siç e kanë quajtuar atë “tentativës për vrasjen e serbit Milan Jovanoviq nga Njësia Speciale e Policisë së Kosovës”.

    Ata kanë fajësuar Policinë se po ushtrojnë terror ndaj popullatës serbe në veri, ndërsa kanë kërkuar që urgjentisht Njësia Speciale të largohet nga veriu i Kosovës, pasi sipas tyre atje janë ilegalisht.

    “Forcat speciale të Kurtit që janë ilegalisht të pranishme në veri të Kosovës dhe Metohisë kanë derdhur edhe një herë gjak serb dhe kanë tentuar të vrasin bashkëqytetarin tonë Milan Jovanoviq nga Zveçani në urën e Bistricës”, thotë Lista Serbe në reagimin e saj.

    Rreagimi i plotë:

    Lista serbe dënon ashpër tentativën për vrasjen e serbit Milan Jovanoviq nga forcat speciale të Kurtit në Urën e Bistricës, në rrugën Kosovska Mitrovicë – Leposaviq dhe kërkon tërheqjen urgjente të të gjitha njësive speciale që janë të pranishme ilegalisht në veri të Kosovës dhe Metohisë, dhe ngacmimi i vazhdueshëm i popullit serb në këtë zonë, ndëshkimi i përgjegjësve për tentativën e vrasjes së Milan Jovanoviqit por edhe Miljan Deleviqit dhe publikimi i videove të bëra nga kamerat në urën e Bistricës për të dyja ngjarjet e përmendura.

    Forcat speciale të Kurtit që janë ilegalisht të pranishme në veri të Kosovës dhe Metohisë kanë derdhur edhe një herë gjak serb dhe kanë tentuar të vrasin bashkëqytetarin tonë Milan Jovanoviq nga Zveçani në urën e Bistricës.

    Kjo pikë famëkeqe, ilegale e forcave speciale shqiptare është shndërruar në simbol të represionit të regjimit të Albin Kurtit mbi serbët, mbi të cilin u tentua për të dytën herë vrasja e një serbi.

    Zemërimi i mëtejshëm i qytetarëve provokon konstatimin se përgjegjësit për sulmet ndaj serbëve fshihen nga autoritetet më të larta në Prishtinë dhe ministri në krye të Sveçlës, i cili padyshim i mbështet veprimet ilegale të këtyre njësive.

    U bëjmë thirrje përfaqësuesve ndërkombëtarë që urgjentisht të dënojnë egërsinë e këtyre njësive parapolicore që po shtypin qytetarët e thjeshtë dhe të kërkojnë tërheqjen e tyre nga veriu i Kosovës dhe Metohisë, për të rivendosur paqen në këtë zonë dhe për të parandaluar rrezikimin e jetës por edhe të paqes dhe sigurinë e të gjithë qytetarëve.

  • KQZ pritet të miratojë listën me qendrat e votimit për zgjedhjet në veri

    KQZ pritet të miratojë listën me qendrat e votimit për zgjedhjet në veri

    Komisioni Qendror i Zgjedhjeve në mbledhjen e radhës pritet të miratojë listën me qendra të votimit të cilat do të hapen për zgjedhjet e 23 prillit në veri të vendit.

    Kështu ka bërë të ditur zëdhënësi i këtij institucioni, Valmir Elezi.

    “Sa i përket çështjes së qendrave të votimit në mbledhjen e radhës KQZ do të miratojë listën me qendra të votimit të cilat do të hapën në këto zgjedhje”, ka thënë Elezi.

    Elezi ka folur pasi ka dështuar të mbahet mbledhja e KQZ-së e cila ishte paraparë për sot.

    Sipas tij, KQZ ka shtyrë për në mbledhjen e radhës diskutimet dhe vendimmarrjen për qendrat e votimit që do të hapen në zgjedhjet e 23 prillit në katër komuna të veriut të Kosovës.

    Ai ka thënë se në mbledhjen e paraparë të zhvillohet sot, në rend dite ishte edhe njoftimi lidhur me vlerësimin e rrezikut për qendrat e votimit në këto komuna.

    “Në momentet e fundit derisa po diskutohej në Këshillin për operacione zgjedhore ku po trajtoheshin shumë prej çështjeve të cilat priteshin të dilnin sot në rendin e ditës, anëtarët e KQZ-së konsideruan se do duhet më shumë informacione lidhur me pikat e rendit të ditës që kanë qenë të planifikuara për sot, për mbledhjen e KQZ-së. Mbledhja e paraparë të zhvillohet sot në ora 11:00 është shtyrë për ditën e nesërme, ndërkaq për orën do të ju njoftojmë nesër”, tha zëdhënësi i KQZ-së, Valmir Elezi, transmeton kp.

    Megjithatë, sipas Elezit ky institucion është duke i zhvilluar të gjitha përgatitjet për mbajtjen e zgjedhjeve në veri të Kosovës.

    “Sa i përket përgatitjeve që është duke i zhvilluar KQZ-ja, në fillim të këtij procesi zgjedhor diku rreth muajit mars, KQZ-ja ka miratuar planin operacional dhe të gjitha afatet e aktiviteteve zgjedhore, megjithatë KQZ është duke zhvilluar përgatitjet në kuadër të këtyre planifikimeve. Natyrisht kemi parasysh edhe sfidat të cilat e shoqërojnë këtë proces zgjedhor dhe si institucion jemi të përkushtuar për të përmbushur detyrat tona kushtetuese dhe ligjore me qëllim të organizimit të këtij procesi zgjedhor…Planifikimet, përgatitjet janë duke u bërë në bazë të dinamikës që është paraparë me planin operacional të miratuar nga ana e KQZ-së”, tha Elezi.

    Zgjedhjet në katër komunat në veri të vendit do të mbahen më 23 prill.

  • Osmani: Serbia synon ta marrë Kosovën ashtu siç bëri Rusia me Krimenë

    Osmani: Serbia synon ta marrë Kosovën ashtu siç bëri Rusia me Krimenë

    Presidentja e Kosovës, Vjosa Osmani, ka thënë se Serbia po i përdor taktikat ruse për ta frikësuar Kosovën.

    Në një intervistë për “The Sun Online”, ajo ka thënë se një situatë e rrezikshme po krijohet në Ballkan.

    Sipas saj, presidenti serb, Aleksander Vuçiq, është “thellësisht i lidhur” me Putinin, duke shtuar se Serbia synon ta marrë territorin e Kosovës, ashtu siç bëri Rusia me Krimenë.

    Ajo ka thënë se Serbia po armatos dhe po financon grupe paraushtarake. “Të gjitha këto tregojnë se është pikërisht i njëjti plan si ai i Putinit për Krimenë”, ka thënë ajo.

    Osmani i kërkoi Perëndimit të vazhdojë t’i mbështesë ata, duke paralajmëruar se konflikti në Ballkan do të destabilizojë më tej një Evropë tashmë të brishtë.

    Derisa ka folur për Planin Evropian, ajo ka thënë se janë absolutisht të zhgënjyer që njohja reciproke nuk përfshihet në mënyrë eksplicite në këtë marrëveshje.

    Sipas saj, njohja reciproke është zgjidhja e vetme që mund të garantojë paqe dhe stabilitet afatgjatë.

    Ajo ka shtuar se partnerët evropianë duhet t’ia rikujtojnë vazhdimisht Serbisë se Kosova është e pavarur dhe e tillë do të mbetet gjithmonë.

  • ​Dëshmitarja e parë në rastin ndaj Thaçit dhe të tjerëve po dëgjohet në seancë private

    ​Dëshmitarja e parë në rastin ndaj Thaçit dhe të tjerëve po dëgjohet në seancë private

    Dëshmitarja e parë e Zyrës së Prokurorit të Specializuar (ZPS) në Hagë është duke e dhënë dëshminë e saj para trupit gjykues në rastin ndaj ish-krerëve të Ushtrisë Çlirimtare të Kosovës (UÇK). Dëshmitarja është e mbrojtur dhe identiteti i saj nuk është i bërë i ditur për publikun, transmeton kp.

    Seanca ndaj Hashim Thaçit, Kadri Veselit, Jakup Krasniqit e Rexhep Selimit ka filluar me pyetjet e prokurorisë për dëshmitaren dhe të njëjtat kanë vijuar në seancë private.

    Tutje, dëshmitarja ka konfirmuar se është intervistuar nga prokuroria e kësaj gjykate edhe në dy raste të tjera në Prishtinë.

    Prokuroria ka paraqitur dokumentet me dëshmitë e saj por ato nuk janë transmetuar për publikun.

    Trupi gjykues ka bërë të ditur se dëshmia e dëshmitares së parë do të zgjasë katër ditë.

    Pas më shumë se dy vjet në paraburgim, gjykimi ndaj ish-krerëve të UÇK-së ka filluar më 3 prill me deklaratat hyrëse të palëve.

    Thaçi, Veseli, Krasniqi dhe Selimi janë deklaruar të pafajshëm për të gjitha pikat e aktakuzës.

    Ata po gjykohen për krime të pretenduara të luftës dhe po mbahen në qendrën e paraburgimit në Hagë prej nëntorit të vitit 2020.

  • Nis gjykimi ndaj ish-krerëve të UÇK-së, dëgjohen dëshmitarët e parë (LIVE)

    Nis gjykimi ndaj ish-krerëve të UÇK-së, dëgjohen dëshmitarët e parë (LIVE)

    Ka nisur gjykimi ndaj ish-krerëve të Ushtrisë Çlirimtare të Kosovës. Në gjykimin e sotëm fillon procesi i paraqitjes së provave nga Zyra e Prokurorisë Speciale, përkatësisht dëgjimi i dëshmitarëve.

    Seanca të tilla pritet të ketë më 12 dhe 13 prill. Seanca pritet të ketë më pas më 17, 18, 19 dhe 20 prill.

    KLIKO KËTU për ta parë drejtpërdrejt seancën

    Më 4 prill 2023 ka filluar gjyqi ndaj katër ish-krerëve të UÇK-së pas më shumë se dy vjetësh.

    Hashim Thaçi, Kadri Veseli, Rexhep Selimi dhe Jakup Krasniqi po qëndrojnë në paraburgim në Hagë prej nëntorit të vitit 2020.

    Ata po akuzohen nga Zyra e Prokurorit të Specializuar me akuza për krime kundër njerëzimit, si përndjekje, burgosje, akte çnjerëzore, torturë, zhdukje dhe vrasje, si dhe me 4 pika për krime lufte si arrestim, ndalim arbitrar, torturë dhe vrasje të paligjshme.

    Sipas aktakuzës këto krime janë kryer në territore të ndryshme të Kosovës dhe Shqipërisë, si në Likoc, Jabllanicë, Llapushnik, Drenoc, Malishevë, Bajgorë, Majac, Zllash, Kleçkë, Kukës dhe Rahovec.

    Zyra e Prokurorit të Specializuar kishte njoftuar Gjykatën Speciale më 23 korrik për hetimin penal ndaj katër krerëve të UÇK-së.

    Ndërkaq, në prill të 2022, ZPS-ja ka paraqitur aktakuzë të ndryshuar, ku i ka zgjeruar akuzat për krime lufte edhe në Gjilan, Budakovë dhe Semetisht.

    Personat që janë ndaluar dhe dërguar në këto zona përshkruhet se ishin serbë, bashkëpunëtorë të tyre ose përkrahës të LDK-së.

    Aktakuza fillestare kundër katër të akuzuarve u konfirmua më 26 tetor 2020, dhe u ndryshua më 3 shtator 2021, 29 prill 2022, dhe 30 shtator 2022. Versioni me më pak redaktime i Aktakuzës u dorëzua më 27 shkurt 2023. Kjo është aktualisht aktakuza në fuqi në këtë çështje gjyqësore.

    Secili prej të akuzuarve është akuzuar mbi bazën e përgjegjësisë penale individuale me gjashtë akuza për krime kundër njerëzimit: përndjekje, burgim, akte të tjera çnjerëzore, torturë, vrasje e paligjshme dhe zhdukje me forcë e personave. Gjithashtu kundër secilit prej të akuzuarve janë ngritur katër akuza për krime lufte: arrestim dhe ndalim i paligjshëm dhe arbitrar, trajtim mizor, torturë dhe vrasje e paligjshme.

    Në Aktakuzë parashtrohet se krimet për të cilat janë ngritur akuzat u kryen së paku prej marsit 1998 deri në shtator 1999 dhe ndodhën në disa vende në Kosovë, si edhe në Kukës dhe Cahan, në Shqipërinë e Veriut. Pretendohet se krimet u kryen nga anëtarë të Ushtrisë Çlirimtare të Kosovës (UÇK) kundër qindra civilëve dhe personave që nuk merrnin pjesë në luftime. Në Aktakuzë pretendohet se Thaçi, Veseli, Selimi dhe Krasniqi mbajnë përgjegjësi penale individuale në bazë të formave të ndryshme të përgjegjësisë penale, për krime të kryera në kontekstin e një konflikti të armatosur jondërkombëtar në Kosovë të cilat ishin pjesë e një sulmi gjerësisht të përhapur dhe sistematik kundër personave që dyshoheshin si kundërshtarë të UÇK-së.

    Duke filluar më 3 prill, Zyra e Prokurorit të Specializuar (ZPS) do të bëjë deklaratën hyrëse dhe për këtë qëllim i janë caktuar më së shumti 5 orë. Më tej, është planifikuar që mbrojtësi i viktimave do të bëjë deklaratën e tij hyrëse që do të zgjasë më së shumti 45 minuta. Pas mbrojtësit të viktimave, do të bëjnë deklarata hyrëse secili prej katër ekipeve të Mbrojtjes. Është planifikuar që këto deklarata të bëhen më 4 prill.

    140 persona janë pranuar si viktima pjesëmarrëse në procesin gjyqësor. Personat të cilët demonstrojnë se kanë pësuar dëm fizik, mendor ose material si pasojë e drejtpërdrejtë e një krimi të paraqitur në Aktakuzën e Konfirmuar paraqesin kërkesë për të marrë pjesë në procesin gjyqësor në DHSK. Këtu përfshihen persona që janë dëmtuar drejtpërsëdrejti dhe persona të cilët kanë pësuar dëm si pasojë e lidhjes së ngushtë me një viktimë të drejtpërdrejtë që pretendohet se është vrarë ose lënduar.