ATV

Tag: Ballina

  • Supremja vendos që KEDS të kompensojë konsumatorët – Vendimi u mor në mars, por u publikua vetëm pas kërkesës së ATV-së

    Supremja vendos që KEDS të kompensojë konsumatorët – Vendimi u mor në mars, por u publikua vetëm pas kërkesës së ATV-së

    Gjykata Supreme ka vërtetuar aktgjykimin që detyron KEDS-in t’ua kthejë borxhin prej 40.8 milionë Eurosh konsumatorëve të 34 komunave, për dëmin e shkaktuar nga faturimi shtesë prej 3,5% për katër komunat në veri, në periudhën 2012-2017.

    Supremja nxori vendimin që obligon Zyrën e Rregullatorit për Energji ta detyrojë KEDS-in të bëjë kompensimin, muajin e kaluar, kur rregullatori ende po shqyrtonte rritjen e tarifave të energjisë për 15%, që kap vlerën 50 milionë euro.

    Ndërsa, e publikoi vetëm sot, pas kërkesës nga ATV-ja.

    Me aktgjykimin e shkallës më të lartë, vërtetohet se ZRRE-ja jashtëligjshëm u vendosi qytetarëve të 34 komunave barrën për katër komunat në veri.

    ATV ka siguruar vendimin e Gjykatës Supremes, me të cilin e detyron KEDS-in që t’ua kthejë konsumatorëve 40.8 milionë euro, për faturimin shtesë prej 3.5% për në katër komunat më shumicë serbe në veri – në periudhën 2012-2017.

    KEDS-i nuk është përgjigjur në pyetjet e ATV-së lidhur me vendimin e Supremes.

    Më 2017, me vendim të gjykatës ishte ndalur praktika e faturimit shtesë prej 3,5% për katër komunat në veri.

    Po atë vit, ZRRE-ja vendosi që barrën për energjinë e pafaturuar në Mitrovicë të Veriut, Zveçan, Leposaviq dhe Zubin Potok ta bartë KOSTT-i. /atvlive.tv

  • Nikaj: Gjendja në veri të Kosovës është e jashtëzakonshme

    Nikaj: Gjendja në veri të Kosovës është e jashtëzakonshme

    Sekretari i PDK-së dhe ish-ambasadori i Kosovës në Bruksel, Bernard Nikaj, në një intervistë dhënë në emisionin DIREKT në ATV, duke folur për zgjedhjet që do të mbahen në veri të vendit më datën 23 prill, ka thënë se këto zgjedhje po mbahen në një situatë e cila mbetet e jashtëzakonshme.

    “Ne si PDK kemi qenë ndër të parët që i kemi regjistruar kandidatët dhe kemi shprehur gatishmërinë tonë për të marrë pjesë në zgjedhjet në veri, kurdo që ato të organizohen. Sa na përket neve si parti, vazhdojmë të jemi të përkushtuar për mbajtje të zgjedhjeve në pjesën veriore të vendit dhe i kemi bërë të gjitha përgatitjet për to. Kjo pjesa tjetër është ende e paqartë, por unë shpresoj që zgjedhjet do të mbahen me datën 23. Zgjedhjet do të jenë të lira edhe pse prapë se prapë, këto zgjedhje po mbahen në një situatë e cila mbetet e jashtëzakonshme”, tha Nikaj.

    Ai tha se ideja e mbajtjes së zgjedhjeve është që të sigurohet pjesëmarrja e të gjithë komuniteteve që jetojnë në veri të vendit.

    “Medoemos edhe shtyrja e zgjedhjeve nga presidentja në dhjetor, për muajin prill është bërë që sigurohen zgjedhje të cilat janë jo vetëm ligjore, por edhe legjitime. Ne po hyjmë në një periudhë ku jemi afër zgjedhjeve dhe këtu po ka shumë paqartësi e posaçërisht kur ka shumë paqartësi sa i përket sigurisë së mbajtjes së zgjedhjeve, lokacionet e mbajtjes së tyre dhe mundësisë që kryetarët të votojnë të lirë dhe të papenguar”, tha Nikaj.

    Ai tha se ka kohë që PDK ka paralajmëruar institucionet që situata e sigurisë në veri po rrëshqet nga normaliteti.

    “Ka një kohë që kemi paralajmëruar dhe kemi tërhequr vërejtjen që situata e sigurisë në veri po rrëshqet nga normaliteti dhe po rrëshqet përtej kompetencave që i ka Policia e Kosovës dhe përtej kapaciteteve që policia mund t’i implementojë në veri. Kjo në vazhdimësi ka ndodh dhe tani jemi në një situatë ku është prerogativë edhe kushtetues edhe ligjor, por edhe demokratik i vendit tonë që zgjedhjet të mbahen, por duhet siguruar që ato të jenë të lira dhe demokratike në përputhje me traditën që e kemi pasur”, theksoi Nikaj. /atvlive.tv

  • Kastrati: Gjoba ndaj PSD-së ka qenë e qëllimshme

    Kastrati: Gjoba ndaj PSD-së ka qenë e qëllimshme

    Nënkryetari i PSD-së, Qendron Kastrati, gjatë një interviste në emisionin A23 në ATV, tha se dënimi që i është bërë kësaj partie nga AIP me një gjobë prej 20 mijë eurove, ka qenë i qëllimshëm, siç thotë ai, për ta mbytur zërin opozitar kundër Asociacionit.

    “Bëhet fjalë për aksionin simbolik që e kemi bërë para Qeverisë në oborrin e Qeverisë, duke i vendosur fletat e peticionit që kanë qenë peticion i organizuar atëherë nga Lëvizja Vetëvendosje kundër ‘Zajednicës’ ose Asociacionit të Komunave me shumicë serbe në Kosovë. Ky ka qenë një aksion simbolik, ndërsa sot PSD, duke pasur parasysh edhe qysh e ka gjendjen financiare dhe qysh është një parti që nuk ka shumë financa, ende nuk është e madhe, kjo tregon që është një qëllim së pari me e mbyt zërin kritik, me e mbytë zërin opozitar edhe në anën tjetër, duke e pasur parasysh që tash pritet, që e ka konfirmuar edhe kryeministri që ka me e bë Asociacionin e komunave me shumicë serbe, me u mundu me heshtë dikë që ta bëjë një gjë të tillë”, tha Kastrati.

    Ai tha se Agjencia për Informim dhe Privatësi (AIP), është e kapur nga Lëvizja Vetëvendosje.

    “Mos ta harrojmë se udhëheqja e këtij institucioni është bashkëshortja e një prej anëtarëve të Lëvizjes Vetëvendosje që e ka promovuar Albin Kurti si ardhje, dhe nëse nuk gaboj ka qenë edhe kandidat në njërën prej zgjedhjeve”, tha Kastrati. /atvlive.tv

  • ​S’ka kuorum për votimin e Projektligjit për Prokurorin e Shtetit

    ​S’ka kuorum për votimin e Projektligjit për Prokurorin e Shtetit

    Në seancën e sotme plenare nuk ka pasur kuorum për votimin e amendamenteve për Projektligjin për Prokurorin e Shtetit. Në votim kanë marrë pjesë vetëm 50 deputetë dhe seanca është përcjellë me mungesë kuorumi edhe për projektligje të tjera.

    Deputeti Driton Selmanaj, nga Komisioni për Legjislacion ka thënë se janë nxjerrë 34 amendamente për Projektligjin për Prokurorin e Shtetit,

    “Ne si grup punues e kemi trajtuar me kujdes dhe kemi përfshirë të gjitha grupet e interesit në draftimin e këtij projektligji. Janë nxjerrë disa amendamente të cilat kanë marrë konsensusin e plotë të gjithë akterëve të përfshirë. Unë në emër të komisionit kërkoj që deputetët ta votojnë këtë projektligj”, ka thënë Selmanaj, transmeton kp.

    Për votimin e këtyre amendamenteve nuk ka pasur kuorum.

    “Vetëm 50 deputetë po marrin pjesë në votim, asnjë kundër, asnjë abstenim. Nuk ka kuorum Kuvendi për t’i miratuar këto amendamente, kështu që i barten seancës së radhës”, ka thënë Konjufca.

    Mungesë të kuorumit ka pasur edhe për votimin e projektligjit për racionalizimin dhe vendosjen e vijave llogaridhënëse të agjencive ekzekutive. Votimi i amendamenteve bashkë me projektligjin janë bartur në seancën e radhës.

    Vota të mjaftueshme nuk ka pasur as për votimin e rekomandimeve lidhur me raportin e auditimit të teknologjisë së informacionit “Sistemi për Menaxhimin e Pagave”.

    Vetëm 49 deputetë kanë marrë pjesë edhe në votimin e rekomandimeve lidhur me raportimin e auditimit: “Funksionimi i sistemit të Grantit të Performancës Komunale dhe menaxhimi i projekteve të financuara nga Donatorët për vitin 2021”.

    Por, deputetët kanë miratuar propozimin e Lëvizjes Vetëvendosje për zëvendësimin e anëtarëve në komisionet parlamentare.

  • Avokati Yll Zekaj ngre shqetësimin e madh, sulmet ndaj gazetarëve po rriten nga viti në vit

    Avokati Yll Zekaj ngre shqetësimin e madh, sulmet ndaj gazetarëve po rriten nga viti në vit

    Avokati i avokat i Asociacionit të Gazetarëve të Kosovës (AGK), Yll Zekaj, në një intervistë dhënë për emisionin DIREKT në ATV, ka ngritur një shqetësim të madh për sulmet ndaj gazetarëve në Kosovë, duke thënë se këto sulme, po rriten nga viti në vit, transmeton atvlive.tv.

    Ai tha se sulmi ndaj gazetarit Valon Syla ishte sulm kundër lirisë së shprehjes dhe lirisë së mediave, liri këto të garantuara edhe me Kushtetutën e Republikës së Kosovës, por edhe me Konventën Ndërkombëtare për të Drejtat e Njeriut.

    “Shteti i Kosovës nuk po e gjen forcën dhe mundësinë që t’i sigurojë këto liri që formalisht janë të garantuara me aktet më të larta juridike, por në praktikë shteti po dështon që t’i mbrojë gazetarët nga sulmet e një pas njëshme me të vetmin qëllim që është kryerja e punës së tuyre apo informimi i publikut rreth ngjarjeve që ndodhin në vend”, tha Zekaj.

    Sipas tij, jo vetëm ndaj gazetarit Syla, por sulme të një pas njëshme po ndodhin edhe ndaj gazetarëve të tjerë dhe kjo ekskluzivisht lidhet me profesionin që gazetarët e ushtrojnë.

    Zekaj tha se është shqetësuese fakti se numri i sulmeve ndaj gazetarëve po rritet nga viti në vit.

    “Ne, veç nëse e zbërthejmë në numra rastin e sulmeve ndaj gazetarëve, shohim që çdo vit kemi numër më të madh të rasteve të sulmit ndaj gazetarëve. Nëse bëjmë një krahasim ndër vite, në vitin 2020 kemi patur 24 raste të sulmit ndaj gazetarëve, në vitin 2021 me 29 raste, në vitin 2022 kemi përfunduar vitin me 33 raste të sulmeve ndaj gazetarëve. Kjo po tregon që shteti i jonë nuk po arrinë të qesë para përgjegjësisë sulmuesit e me dënime adekuate do t’i jepin një përgjigje që gazetarët nuk guxojnë të preken gjatë ushtrimit të detyrës së tyre”, tha avokati Zekaj. /atvlive.tv

  • Pasi aprovohet një material prove i mbrojtjes së Selimit, seanca kalon në private

    Pasi aprovohet një material prove i mbrojtjes së Selimit, seanca kalon në private

    Gjykatësi i Gjykatës Speciale Charles L. Smith ka aprovuar kërkesën e Geoffrey Roberts, avokatit të ish-kreut të UÇK-së, Rexhep Selimit, për shtimin e një materiali prove.

    Materiali është aprovuar në kohën kur dëshmitarja e parë e Prokurorisë Speciale për rastin “Thaçi dhe të tjerët” po intervistohet nga mbrojtja, e cila kërkoi 14-orë për parashtrimin e pyetjeve.

    Gjatë kohës sa dëshmitarja e parë e Prokurorisë po sillej në seancë, avokati Roberts ka parashtruar kërkesë për dy dokumente që t’i shtohen si materiale prove përgjatë periudhës së intervistimit.

    Kjo është aprovuar nga gjykata. Prokuroria nuk e ka kundërshtuar kërkesën, por thënë se janë disa pjesë në dokument që janë përsëritëse.

    Më pas, seanca ka kaluar në private.

    Dëshmitarja e parë e prokurorisë po shënon ditën e tretë të intervistimit. Për të janë paraparë katër ditë ofrim dëshmie.

    Avokati Roberts: Ndërkohë që po vjen dëshmitarja, dëshiroj që të paraqes si provë dhe të regjistrohet si provë kallëzimi penal që u diskutua dje me dëshmitaren. Është dokumenti me numër identifikimi ERN-066676 dhe 066696. Sërish, për qartësim, nuk ka të bëjë fare me vërtetësinë, por është thjesht një dokument janë deklaratat bashkëlidhur që kanë efektin mbështetës.

    Prokurori Holing: Nuk kemi kundërshtim, por thjesht ka pjesë që përsëriten të cilat kanë bëjnë me vërtetësinë e fakteve për të cilat i janë bërë pyetje dëshmitares.

  • ​Konjufca: Ka tendencë për destabilizim të veriut para zgjedhjeve të 23 prillit

    ​Konjufca: Ka tendencë për destabilizim të veriut para zgjedhjeve të 23 prillit

    Kryetari i Kuvendit, Glauk Konjufca, ka deklaruar se ka tendencë të qartë që të destabilizohet veriu i Kosovës përpara zgjedhjeve të 23 prillit. Ai për KosovaPress ka theksuar se shtyrja e dytë e këtyre zgjedhjeve është e paarsyeshme. Sipas tij institucionet duhet të kryejnë detyrat dhe obligimet e tyre ligjore e kushtetuese.

    Kreu i legjislativit u ka bërë thirrje për qetësi të gjithë qytetarëve që jetojnë në veri të Kosovës.

    “Tash kemi nevojë për qetësi dhe ju bëjë thirrje të gjithë qytetarëve të cilët jetojnë në atë pjesë që të mos bien pre e veprimeve të cilat mendoj që dirigjohen, jo brenda Kosovës, por kryesisht në anën tjetër pra nga Serbia. Të segmenteve të caktuara, të strukturave të cilat ata ende synojnë t’i mirëmbajnë dhe financojnë, edhe të cilat mundohen, dhe qëllimi kryesor i të cilave është destabilizimi i Kosovës, zhvendosja jashtë orbitës së sigurisë së Kosovës, po sidomos në atë pjesë të territorit. Meqenëse edhe zgjedhjet po afrohen tash, pra pas dhjetë dite është data e zgjedhjeve, nuk janë të rastësishme të gjitha këto që po ndodhin, meqë është një tendencë e qartë që te destabilizohet ajo pjesë e vendit, përpara zgjedhjeve të 23 prillit. Me qëllim që të delegjitimohet i gjithë procesi, që edhe në anën tjetër të krijohet përshtypja e rrejshme por me mjete të dhunshme që pa Listën Serbe edhe pa këto struktura nuk ka qetësi dhe paqe në pjesën e veriut të Kosovës, ka deklaruar Konjufca për KosovaPress.

    Sipas tij, institucionet e Kosovës duhet të argumentojnë se në vend funksionon rendi, ligji dhe Kushtetuta.

    “Unë mendoj që Kosova i ka të gjitha kapacitetet e saj dhe gjithë mekanizmat e nevojshëm që të garantojë një situatë në te cilën qytetarët, të gjithë pa dallim etnie, që jetojnë në atë pjesë të territorit të mund të ushtrojnë të drejtën e tyre elementare, që është e drejta për të votuar. Edhe këtë të drejtë ta garantojnë institucionet të cilat janë kushtetuese, institucionale dhe shtetërore të Republikës së Kosovës. Jam plotësisht i bindur dhe besoj shumë që Kosova e ka këtë kapacitet, pa shkaktuar kurrfarë irritimi, pakënaqësie, rezistence me mjete të tjera, për arsye se nuk ka kurrfarë nevoje. Pra, data është caktuar moti, një herë pastaj është shtyrë. Mendoj që shtyrja e dytë do të ishte e paarsyeshme. Së pari çfarë duhet të bëjmë është që të sigurohemi se secili institucion po e kryen detyrën e vet sipas obligimeve kushtetuese. E pastaj kur i marrim rezultatet zgjedhore, atëherë do të shihet dhe do të hyjmë në një etapë tjetër. Por këtë etapë nuk mund ta paragjykojmë para 23 prillit”, ka shtuar ai.

    Më 23 prill pritet të mbahen zgjedhjet në katër komunat e veriut të Kosovës./kp

  • Michael Steiner: Serbia të ballafaqohet me të kaluarën e saj kriminale

    Michael Steiner: Serbia të ballafaqohet me të kaluarën e saj kriminale

    Krimet serbe në Kosovë kanë ndodhur dhe ballafaqimi i Serbisë me të kaluarën e saj është në radhë të parë në interesin e vetë Serbisë. Kështu thotë në një intervistë ekskluzive diplomati Michael Steiner, ish shef i UNMIK-ut dhe ish këshilltar i kancelarit gjerman Gerhard Schröder.

    “Për sa kohë që Serbia nuk e bënë këtë, do të sorollatet si një zombi në historinë e saj”, nënvizon Steiner, teksa thekson se “pavarësia e Kosovës është fakt dhe realitet dhe nëse Serbia refuzon ta njohë këtë realitet, ky nuk është më problem për Kosovën, por për vetë Serbinë”, thekson Steiner.

    Radio Kosova: Zoti Steiner, që nga koha kur ju keni lënë Kosovën, pasi ju përfunduat mandatin e Shefit të UNMIK-ut, ka kaluar një kohë e gjatë. Kosova ka 15 vite që është e pavarur. Si i keni parë zhvillimet në Kosovë, sidomos pas shpalljes së pavarësisë më 17 shkurt 2008, e këndej?

    Steiner: Së pari, zoti Gashi, është gjë e bukur që mund të bashkëbisedojmë. Kosova në këto vite ka lënë prapa një rrugë të gjatë enorme. Gjatë kësaj kohe kemi parë ndërrim demokratik të qeverive dhe pushteteve, ndërsa janë zhvilluar mirë institucionet shtetërore. Gjithashtu, mund të shihet se ka pasur edhe një zhvillim politik të shoqërisë civile e cila ka evoluar nga një shoqëri e dalë prej dhunës dhe luftës, në një shoqëri civile gjithnjë e më stabile. Natyrisht, edhe më tej ka probleme për sa i përket luftimit të korrupsionit, pastaj probleme të zhvillimit ekonomik, por parë në tërësi, kam një ndjenjë të mirë për arritjet e shënuara.

    Radio Kosova: Vetëm 5 vjet pas shpalljes së pavarësisë, me ndërmjetësimin e Bashkimit Evropian në vitin 2013 kanë filluar bisedimet ndërmjet Kosovës dhe Serbisë për normalizimin e marrëdhënieve ndërmjet dy vendeve. Janë arritur shumë marrëveshje, por një pjesë e madhe e tyre nuk janë zbatuar nga Serbia. Tani kemi një marrëveshje, e cila nuk është nënshkruar nga palët, por është pranuar? A besoni se Serbia do ta njohë një ditë pavarësinë e Kosovës?

    Steiner: E para, Kosova tashmë është shtet sovran! Ky është fakt! Është fakt, realitet objektiv! Pyetja nëse Serbia e njeh këtë realitet, apo e refuzon, ky nuk është problem për Kosovën, por është problem për Serbinë, e cila po bllokon vetveten. Për Kosovën, ç’është e vërteta, është me shumë rëndësi që për sa kohë ekziston ky realitet refuzues nga ana e Serbisë, Kosova të mos ketë disavantazhe praktike nga kjo gjendje. P.sh. të mos ketë pengesa gjatë anëtarësimit në organizata dhe institucione ndërkombëtare, pastaj të mos ketë pengesa në aspektin e zhvillimit ekonomik, sigurisë, udhëtimit të lirë etj. Natyrisht, kjo do të duhej të vlente për të dyja vendet dhe kjo është vendimtare, prandaj kjo është edhe ideja bazike e Planit gjermano-francez për Normalizimin e marrëdhënieve ndërmjet dy vendeve.

    Radio Kosova: Gjermania sot është një nga aleatët kryesor të Kosovës, ndërsa bashkë me Francën janë edhe autorë të planit për normalizimin e marrëdhënieve ndërmjet Kosovës dhe Serbisë që ju e përmendet. Si e vlerësoni rolin e Gjermanisë dhe BE-së në procesin e dialogut, që po zhvillohet ndërmjet Kosovës dhe Serbisë dhe çfarë mendimi keni për planin gjermano – francez?
    Steiner: Fakti që Gjermania së bashku me partnerët e saj dhe Bashkimin Evropian është e angazhuar për arritjen e një marrëveshje ndërmjet dy vendeve, është një gjë vërtet shumë e mirë. Gjermania ka përvojë, madje përvojë shumë të mirë, për sa i përket qasjes së normalizimit. Për më tepër kjo është qasja e vetme reale dhe e duhur që bazohet në normat faktike, gjendjen faktike, që njëkohësisht adreson interesat e vërteta dhe reale ekzistuese. Dhe kjo është rruga e vetme e drejtë nga duhet shkuar dhe unë gëzohem që Gjermania bashkë me partnerët e saj në BE është angazhuar në këtë drejtim.

    Radio Kosova: Po bëhen 24 vite nga përfundimi i luftës në Kosovë dhe Serbia nuk po kërkon falje për krimet e kryera. Përveç kësaj krerët e shtetit serb kanë mohuar edhe masakrat e kryera prej ushtrisë së tyre në Kosovë, si ajo e Reçakut që kishte ndodhur në janar të vitit 1999.

    Steiner: Shihni! Objektivisht kjo çështje është sqaruar. Krimet serbe në Kosovë kanë ndodhur dhe për këtë organizatat ndërkombëtare kanë dhënë qëndrimin e tyre. Që Serbia të ballafaqohet dhe ta shohë këtë të vërtetë me sytë e saj dhe të marrë qëndrim për këtë realitet që ka ndodhur, është në radhë të parë në interesin e vetë Serbisë. Po e them këtë si gjerman, duke u nisur nga historia jonë gjermane. Je vërtet i lirë të ndërtosh dhe formësosh të plotë të ardhmen tënde, vetëm atëherë kur gjen forcë për të njohur anën negative të së kaluarës tënde. Për sa kohë që nuk e bën këtë, atëherë do të sorollatësh si një zombi në historinë tënde dhe kjo mund të shihet tek ata, që gjërat e pakëndshme përpiqen t’i fshehin nën tepih. Sido që të jetë, e rëndësishme është që objektivisht gjërat janë të qarta, janë sqaruar dhe është thellësisht e domosdoshme që Serbia të konfrontohet me të kaluarën e saj kriminale, për të çliruar vetveten, në mënyrë që të mund të punojë me gjithë forcën drejt së ardhmes.

    Radio Kosova: Ka një temë për të cilën po thyhen shtizat. Fjala është për Asociacionin e Komunave Serbe. Serbia po kërkon kompetenca ekzekutive, ndërsa bashkësia ndërkombëtare dhe Qeveria e Kosovës thonë se nuk do të ketë asociacion me kompetenca ekzekutive? Si e shihni ju Asociacionin e Komunave serbe?

    Steiner: Për këtë temë nuk dua të deklarohem në hollësi, por ajo që mund të them është se nisur nga forma si është bërë në Propozimin evropian, nuk shoh as një rrezik për Kosovën nga Asociacioni.

    Radio Kosova: Në Hagë këto ditë ka filluar gjykimi i ish krerëve të UÇK-së. Në mesin e të akuzuarve është edhe ish kryeministri dhe ish presidenti Hashim Thaçi, të cilin ju kur ishit shef i UNMIK-ut e keni njohur personalisht. Si e vlerësoni formimin e Dhomave të Specializuara?

    Steiner: Edhe për këtë çështje nuk mund dhe nuk do të ishte serioze të deklarohem!

    Radio Kosova: Qeveria e Kosovës, sot udhëhiqet nga Albin Kurti, lider i një parti që ka dalë në skenën politike në Kosovë disa vite më vonë kur ju e keni lënë Kosovën. Si do vlerësonit sot qeverisjen në Kosovë nga qeveria aktuale?

    Steiner: Për çështje të brendshme, natyrisht nuk kisha dashur të deklarohem! Por ajo që mund të them është se unë shoh vullnetin e kosovarëve që të ndërtojnë në mënyrë demokratike vendin e tyre, Kosovën, dhe të bëhen pjesë e familjes evropiane, atje ku e kanë vendin. Kosova ka një potencial enorm si dje ashtu dhe sot, si vendi me popullatën më të re në Evropë, dhe ajo që vërehet është se kjo gjeneratë e re politikanësh, është tani në pozita dhe vendet kyçe dhe kjo gjeneratë e re është e hapur, ka energji shumë të madhe dhe mendoj se është shumë me rëndësi që ky potencial ekzistues kosovar të shfrytëzohet maksimalisht. Kur isha shef i UNMIK-ut në Kosovë, vendet që vizitoja më me dëshirë ishin shkollat, sepse aty unë shihja të ardhmen e vendit tuaj.

    Radio Kosova: Zoti Steiner, edhe një pyetje: Si e shihni të ardhmen, përkatësisht perspektivën evropian dhe atlantike të Kosovës?

    Steiner: Nuk kam as një dyshim, sepse tashmë rruga për integrime euro-atlantike është e trasuar. Kosova është një vend evropian dhe i përket familjes evropiane ku e ka vendin dhe duhet të jetë pjesë e Bashkimit Evropian. E di që kjo rrugë ka zgjatur shumë dhe është e gjatë, aq sa nganjëherë më iriton edhe mua pse funksion disi ngadalë. Sidoqoftë, perspektiva evropiane e Kosovës është qartë e siguruar. Nuk e di se kur kjo ditë do të vijë, por e di që kjo ditë do të vijë !

  • Raporti i FMN-së: Kosova dhe Shqipëria, më të varfrat në Evropë edhe në 2023

    Raporti i FMN-së: Kosova dhe Shqipëria, më të varfrat në Evropë edhe në 2023

    Shqipëria dhe Kosova janë renditur sërish nga Fondi Monetar Ndërkombëtar (FMN) si shtetet më të varfra të Evropës në vitin 2023, bazuar në të ardhurat për frymë, që maten duke llogaritur fuqinë blerëse, një tregues real se sa vlerë ka paraja për banorët e një vendi.

    PBB për frymë bazuar në barazinë e fuqisë blerëse (PPP), është produkti i brendshëm bruto i konvertuar në dollarë ndërkombëtarë duke përdorur normat e barazisë së fuqisë blerëse.

    Një dollar ndërkombëtar ka të njëjtën fuqi blerëse mbi PBB-në si dollari amerikan në Shtetet e Bashkuara.Sipas të dhënave të përditësuara të FMN-së në Pasqyrën Ekonomike Globale 2023, dhe të përpunuara nga “Monitor”, Shqipëria renditet e parafundit në Europë me të ardhurat për frymë prej 19 mijë dollarë ndërkombëtar.

    Pas Shqipërisë renditet Kosova, që e ka këtë tregues akoma dhe më të ulët, në 15.6 mijë dollarë ndërkombëtarë.Bosnjë Hercegovina ka të ardhura për frymë pak më të larta se Shqipëria, në 19.6 mijë dollarë ndërkombëtarë, Maqedonia e Veriut 21.1 mijë, Serbia me 25.4 dhe në krye të rajonit vijon të qëndrojë Mali i Zi, me 27.6 mijë dollarë ndërkombëtarë.Mesatarja e Europës është gati 50 mijë, ndërkohë që Shqipëria i ka të ardhurat për frymë të matura sipas fuqisë blerëse gati sa gjysma e Europës Lindore.

    Parashikimet e Fondit Monetar Ndërkombëtar shtrihen deri në vitin 2028, ku sërish si Shqipëria ashtu dhe Kosova vlerësohet se do të vijojnë të mbeten më të varfrat e Europës.Edhe në treguesin tjetër direkt, atë të Prodhimit të Brendshëm Bruto për frymë, që për Shqipërinë ka arritur në 7 mijë dollarë, sërish vlerësohemi nga FMN të fundit për vitin 2023, së bashku me Kosovën, që është në nivelin e 5,600 dollarëve.Të dhënat e tjera të publikuara nga Eurostat më herët (ku nuk përfshihet Kosova) tregojnë se Shqipëria ka mbetur pas në të ashtuquajturin proces të konvergjencës, që nënkupton rritje me ritme më të shpejta se vendet e zhvilluara të Europës në mënyrë që të kapet mesatarja e Europës për një periudhë kohore të caktuar.

    Rritja e viteve të fundit, ndonëse në nivele të ngjashme me vende të rajonit, nuk ka arritur të shtojë mirëqenien e qytetarëve, duke u bërë dhe një faktor për ritmet e larta të emigracionit.

    Sipas Eurostat, në vitin 2021, vendi ynë kishte Prodhimin e Brendshëm Bruto (PBB) për frymë, të shprehur në barazinë e fuqisë blerëse, sa 32% e mesatares së Bashkimit Europian.Në treguesin tjetër, atë të Konsumit Individual për Frymë (AIC) që mat konsumin sipas barazisë së fuqisë blerëse dhe nivelit të çmimeve, Shqipëria renditet po e fundit, me 39% të mesatares së Bashkimit Europian, njësoj me vitin e kaluar dhe shumë më e ulët se mesatarja prej 48% e vendeve kandidate (përjashtuar Turqinë).Ndërsa për treguesin e të ardhurave për frymë, diferenca me shtetet e rajonit nuk është shumë e lartë, në treguesin e konsumit individual ajo thellohet, duke reflektuar aftësinë e ulët të fuqisë blerëse të shtetasve shqiptarë për të ardhurat që kanë, e lidhur me çmimet relativisht të larta në vend.

  • Dhunohet seksualisht një 15-vjeçare në Prishtinë, gjendet në bagazhin e veturës ku ndodheshin 7 persona

    Dhunohet seksualisht një 15-vjeçare në Prishtinë, gjendet në bagazhin e veturës ku ndodheshin 7 persona

    Numri i rasteve të ngacmimeve, sulmeve e dhunës seksuale në vendin tonë ka marrë përmasa shqetësuese. Në shumë prej tyre, viktima janë vajzat e shpesh të dyshuar, janë persona të njohur të tyre të cilët përkundër moshës minorene të viktimave, krijojnë raporte intime me to dhe i keqpërdorin seksualisht, raporton Gazeta Sinjali.

    Një ngjarje e tillë ka ndodhur së fundi në Prishtinë, ku një vajzë e mitur dyshohet se është dhunuar nga një person i moshës madhore.

    Burimet e Gazetës Sinjali brenda Prokurorisë kanë bërë me dije se e gjithë ngjarja është zbuluar në orët e hershme të mëngjesit të djeshëm, ku një njësi policore që po patrullonte, ka ndalur për kontroll një veturë.

    Gjatë kontrollit është vërejtur se brenda veturës janë shtatë persona, ku dy nga ta, përfshirë viktimën, ishin të shtrira në bagazhin e veturës.

    Shtatë personat që ndodheshin brenda automjetit janë shoqëruar në stacion policor ku janë intervistuar nga hetuesit policorë. 15-vjeçarja që ndodhej në bagazh ka deklaruar para hetuesve policorë që ka kryer marrëdhënie seksuale me njërin prej të dyshuarve.

    Bazuar në dëshminë e saj, ngjarja ka ndodhur në një motel në dalje të Prishtinës. Në kuadër të veprimeve hetimore, viktima është dërguar për ekzaminime gjinekologjike.

    Ndërkohë është intervistuar edhe 22-vjeçari, i cili ka pranuar se ka qëndruar në motel me vajzën e mitur.

    Pas përfundimit të procedurave policore, Prokurori i Shtetit ka nxjerrë aktvendim që të dyshuarit t’i caktohet masa e ndalimit policor dhe i njëjti do të hetohet nën dyshimet për kryerjen e veprës penale ‘Dhunim’.