ATV

Tag: Albin Kurti

  • ​Kurti: Serbia jokonstruktive, ndërkombëtarët t’i bëjnë presion

    ​Kurti: Serbia jokonstruktive, ndërkombëtarët t’i bëjnë presion

    Kryeministri Albin Kurti ka deklaruar se ndërmjetësit evropianë duhet të bëjnë trysni mbi Serbinë, meqë shenjat nuk janë të mira për konstruktivitet.

    Pas homazheve në Kompeksin Memorial në Mejë, Kurti ka theksuar se ministri Elbert Krasniqi ka ftuar në takim ekipin menaxhues për hartimin e draft-statutit. Megjithatë, ata nuk janë përgjigjur.

    “Ministri im i Administrimit të Pushtetit Lokal, Elbert Krasniqi i ka ftuar në takim ekipin menaxhues, por ata nuk janë përgjigjur. Pra, është kjo ministri ne kuadër të qeverisë e cila merret për se afërmi me këtë menaxhues për draft-statutin, siç është bërë marrëveshja dikur në Bruksel, e siç është ndryshuar përbërja në qeveri, para se unë të bëhem sërish kryeministër. Por, me datën 2 maj në bazë të tekstit të marrëveshjes se Brukselit, e cila fitoi aneksin e zbatimit në Ohër, çështje urgjente është çështja e të pagjeturve dhe të zhdukurve me dhunë”, ka deklaruar Kurti.

    Ai ka shtuar se shenjat nuk janë të mira për konstruktivitet nga ana e Serbisë, për çka ndërmjetësit evropianë dubrt të bëjnë trysni.

    “Unë kërkoj që teksti i dakorduar tashmë të shndërrohet në marrëveshje. Sa i përket Kosovës dhe meje, gjithçka është e qartë dhe e garantuar, por ndërmjetësit evropianë do të duhej të bëjnë trysni mbi palën tjetër. Shenjat nuk janë të mira për konstruktivitet, kur dimë që pikërisht në Batajnicë në varrezën masive, ku nuk ka asnjë pllakë, asnjë shënim që aty ka pasur dikur varrezë masive, organizohet paradë ushtarake, e ku ftohen edhe kriminelët serbë nga veriu i Kosovës edhe lideri separatist i serbëve të Bosnjës, Dodik. Këto shenja nuk janë të mira, mirëpo me palën tjetër nuk do të mund të merremi ne, sepse ne nuk jemi juridiksion mbi Beogradin, këtë duhet ta bëjë Bashkimi Evropian”, ka shtuar ai. /KP

  • BE: Të zbatohen të gjitha nenet e Marrëveshjes së Ohrit, palët nuk mund të vendosin parakushte

    BE: Të zbatohen të gjitha nenet e Marrëveshjes së Ohrit, palët nuk mund të vendosin parakushte

    Bashkimi Evropian ka vazhduar me mesazhet e qarta se Kosova dhe Serbia duhet të zbatojnë të gjitha nenet e Marrëveshjes së arritur në Ohër të Maqedonisë së Veriut më 18 mars.

    Zëdhënësja e BE-së, Zoi Muletier, ka folur për votën e Serbisë kundër Kosovës në Këshillin e Evropës.

    “Vëmë re se Komiteti i Ministrave të Këshillit të Evropës votoi dje pro dërgimit të aplikacionit të Kosovës për anëtarësim në Asamblenë e saj Parlamentare (APKE). Këtë e vendosin anëtarët e Këshillit të Evropës. Në Dialogun Beograd-Prishtinë, BE-ja pret që të gjitha nenet e Marrëveshjes të zbatohen në mënyrë të përshtatshme, në mirëbesim dhe në mënyrë të pavarur nga njëri-tjetri – për të cilën palët ranë dakord në aneksin e zbatimit në Ohër”, ka thënë Muletier.

    Sipas saj, secila palë duhet të japë diçka për të marrë diçka në këmbim.

    “BE-ja si Lehtësues i Dialogut të Beogradit në Prishtinë është plotësisht i vetëdijshëm për ndjeshmëritë dhe kompleksitetet politike që lidhen me procesin e zbatimit, dhe për këtë arsye ne u kemi paraqitur një propozim palëve për një qasje hap pas hapi në fazën e zbatimit të t’i ndihmojë ata të zbatojnë detyrimet e tyre. Ajo ndjek një logjikë të thjeshtë që secila palë duhet të bëjë diçka për të marrë diçka. Kjo është e vetmja mënyrë realiste për t’i bërë gjërat dhe ofron një ekuilibër dhe garanci”, ka thënë ajo për RTV21.

    Muletier ka thënë se Marrëveshjes së Ohrit mes Kosovës dhe Serbisë, nuk mund t’i vihen parakushte për zbatim.

    “Kryenegociatorët nuk mundën të arrinin një marrëveshje më 4 prill në Bruksel dhe diskutimet vazhdojnë. Prandaj, liderët pritet të diskutojnë këtë çështje në takimin e nivelit të lartë më 2 maj. Ndërkohë që diskutimet vazhdojnë, asnjëra palë nuk duhet të vendosë ndonjë parakusht pasi nuk mund të funksionojë kështu zbatimi i Marrëveshjes dhe gjithashtu bie ndesh me atë që është rënë dakord”.

  • ​Kurti: Liberalizimi, pranimi i aplikimit në KiE konfirmojnë se jemi në rrugën evropiane

    ​Kurti: Liberalizimi, pranimi i aplikimit në KiE konfirmojnë se jemi në rrugën evropiane

    Kryeministri i Kosovës, Albin Kurti u shpreh sot se vendimi për liberalizimin e vizave për qytetarët e Kosovës, por edhe pranimi i aplikimit të Kosovës në Këshillin e Evropës konfirmojnë se vendi është në rrugën evropiane dhe se Kosova i përket Evropës.

    Kurti në fjalën hyrëse në mbledhje të qeverisë së Kosovës tha se qytetarët e Kosovës nga 1 janar 2024 do të mund të udhëtojnë në 32 vende të tjera përfshirë edhe Bullgarinë, Rumaninë dhe Qipron.

    “Javën që lamë pas dhe këtë javë çdo qytetar është ndier më evropian dhe më afër Evropës. Liberalizimi i vizave kishte ngecur për 4 vite në agjendën e Këshillit të BE me shumë punë dhe angazhim veçanërisht me vendet hezituese vitin e kaluar arritëm që gjatë presidencës çeke të zhbllokojmë këtë proces…..Nga 1 janari i vitit të ardhshëm qytetarët e Kosovës më në fund do të mund të udhëtojnë pa viza në 32 vende të tjera evropiane përfshirë këtu edhe Bullgarinë, Rumaninë dhe Qipron që nuk janë pjesë e Zonës Schengen. Pasaporta do të jetë mëe fuqishme ashtu siç shteti jonë po bëhet përherë e më i fortë“, tha ai.

    Duke folur për pranimin e aplikimit në Këshillin e Evropës, i cili ndodhi këtë të hënë (24 prill), shefi i ekzekutivit kosovar shprehu besimin që si shtet demokratik Kosova do të jap kontribut të çmuar në të ardhmen si anëtarë me të drejta të plota në KiE.

    “Ne besojmë thellësisht që si shtet i ri demokratik dhe paqedashës do të japim kontributin e çmueshëm në të ardhmen si anëtarë me të drejta të plota në Këshillin e Evropës dhe natyrisht që rezultatet gjithnjë e më të mira sa i përket tri vlerave fundamentale të Këshillit të Evropës sa i përket sundimit të ligjit, demokracisë dhe të drejtave të njeriut kanë ndikuar në këtë arritje të madhe. Këto dy vendime të rëndësishme brenda më pak se 1 jave konfirmojnë rrugën tonë evropiane, konfirmojnë që jemi në rrugën e duhur dhe konfirmojnë se Kosova i përket Evropës si union, si vlerë“, theksoi ai.

    Gjatë mbledhjes së sotme, kryeministri Kurti tha se do ta shqyrtojnë edhe projektligjin ratifikimin e marrëveshjes për statusin dhe funksionet e Komisionit Ndërkombëtar për Personat e Zhdukur.

    Sipas tij, çështja e personave të zhdukur me forcë gjatë luftës në Kosovë është një çështje aktuale dhe permanente deri në zgjidhjen e plotë të saj.

    “Sot do të shqyrtojmë edhe projektligjin për ratifikimin e marrëveshjes për statusin dhe funksionet e Komisionit Ndërkombëtar për Personat e Zhdukur, kjo iniciativë e aprovuar në parim vite më parë sot po konkretizohet dhe po merr drejtimin e duhur. Çështja e personave të zhdukur me forcë gjatë luftës në Kosovë është një çështje aktuale dhe permanente deri në zgjidhjen e plotë të saj. Temë prioritare e cila do të vazhdoj të adresohet edhe më tutje si çështje e natyrës urgjente. Miratimi i këtij projektligjit sot është i një simbolike të veçantë dhe gjithashtu i një rëndësie të madhe jo vetëm se jemi në prag të 27 prillit Dita e Personave të zhdukur gjatë luftës në Kosovë, por është edhe në vazhdën iniciativave të konkretizuara së fundmi si në procesin e liberalizmit të vizave ashtu edhe anëtarësimin në Këshillin e Evropës”, tha ai. /KP

  • Kurti: Isha i gatshëm ta shkruaj vet draft-statutin për Asociacionin, s’më lanë

    Kurti: Isha i gatshëm ta shkruaj vet draft-statutin për Asociacionin, s’më lanë

    Kryeministri i Kosovës, Albin Kurti, tha se ka qenë i gatshëm që vet ta shkruaj draft-statutin e Asociacionit.

    Por sipas tij, një gjë e tillë nuk është pranuar nga palët në takimin e Ohrit.

    “Në takimin e Ohrit kam pranuar që draft-statutin ta shkruaj unë por me ato tri shtyllat parimore që duhet pranuar parimisht. Një gjë e tillë u refuzua dhe mua mu tha nga ndërmjetësit që këtë duhet ta bëjë ekipi menaxhues si pasojë e marrëveshjeve të mëhershme në dialogun e Brukselit para një dekade”.

    “Pra tash i përket ndërmjetësit që ta përcaktojë agjendën e takimit të datës 2 maj, ndërkaq unë do ta takoj në një konferencë ndërmjetësin Lajçak”, tha Kurti.

    “Nuk ka anëtar të grupit punues nga ana jonë. Unë e kam zëvendësin tim i cili në portofolin e tij është përgjegjës për integrimet evropiane”.

    “I përket ekipit menaxhues që të shfaqet por ministri Elbert Krasniqi i ka bërë ftesë për takim atyre por që nuk kanë pranuar”, tha tutje Kurti.

    Shefi i ekzekutivit foli edhe për zgjedhjet në veri, raporton EO.

    “Ne kemi bërë fushatë vazhdimisht. Unë kam pasur takime e fushata është zhvilluar nga kandidatët për kryetar të komunave atje. Mirëpo fushatë më të egër kundër serbëve të Kosovës moti nuk ka pasur e udhëhequr e financuar nga Beogradi dhe ekzekutuar nga elemente kriminale”, tha Kurti.

  • ​Kurti: Mbështetja e grave në biznes fuqizon ekonominë e vendit

    ​Kurti: Mbështetja e grave në biznes fuqizon ekonominë e vendit

    Kryeministri i Kosovës, Albin Kurti është shprehur se fuqizimi i grave në biznes ndikon zhvillimin e ekonomisë në përgjithësi.

    Kurti këto komente i bëri në ceremoninë “Java e Pronësisë Industriale dhe Inovacionit”, e cila iu dedikua grave në Inovacion dhe Kreativitet dhe është organizuar nga Ministria e Industrisë, Ndërmarrësisë dhe Tregtisë.

    Ai u shpreh se gratë kanë dëshmuar që janë protagoniste, si ndërmarrëse e si punëtore e sot janë shumë aktive, prandaj janë të obliguar t’i mbështesin ato.

    Kurti po ashtu u shpreh se mundësia në financa për gratë nuk është vetëm fuqizim i grave në biznes, por fuqizim i ekonomisë në përgjithësi.

    “Ne detyrohemi dhe obligohemi t’i përkrahim ato, që janë në fillim të nismave të tyre, ato që janë në mes të një vështirësie biznesore, dhe t’i nxisim ato që kanë dëshirën e vullnetin. Qasja në financa, qofshin ato edhe të ulëta, është përcaktuese për pronën apo rritjen e biznesit, por edhe vetë përvojat e aftësitë e deri tek rezultatet finale. Ne duhet të sigurohemi për një fillim sa më të barabartë, sepse edhe rrugëtimi para këtij fillimi në shumicën e rasteve nuk ka qenë i barabartë. Shumica e tyre kanë pasur më shumë sfida gjatë përvojave jetësore e të karrierës e ne si qeveri jemi të vëmendshëm për këto dallime që në fëmijëri dhe jemi duke ndërhyrë kudo që është e mundshme…Ato që kanë zgjedhur rrugën e të bërit biznes, kanë zgjedhur guximin dhe ne duhet t’i përkrahim. Andaj, investimi në këtë drejtim është i domosdoshëm. Qasja në mjetet financiare për gratë që e duan punën, është edhe interes afatgjatë i ekonomisë së vendit tonë. Mundësimi në financa për to, nuk është vetëm fuqizim i grave në biznes, por fuqizim i ekonomisë në përgjithësi”, u shpreh Kurti.

    Ministrja e Industrisë, Ndërmarrësisë dhe Tregtisë, Rozeta Hajdari u shpreh se përfshirja e grave në studimet shkencore, por edhe si ndërmarrëse të suksesshme po lënë gjurmë në ekonominë vendore.

    Ajo tha se kjo armatë punëtoresh po përkrahet me politika të shëndosha edhe nga Qeveria e Kosovës.

    “Kohëve të fundit gratë e Kosovës po përzgjedhin drejtimet e studimit në shkencë, teknologji, inxhinieri e matematikë ku çdo ditë e më tepër ky numër po rritet. Gjithashtu, edhe si ndërmarrëse të suksesshme me kreativitetin dhe idetë inovatore ato po krijojnë po krijojnë dhe po lënë gjurmë të dukshme në ekonominë e Kosovës dhe duhet të themi edhe me një dozë krenarie meritore se këtë armatë punëtore qeveria e Kosovës dhe MINT e ka mbështetur dhe po vijon ta mbështes me politika të shëndosha e normativa ligjore e programe e skema përkrahëse financiare…Sot teksa shënojmë këtë ditë të rëndësishme për pronësi intelektual dhe inovacionin si faktor me ndikim të lartë për zhvillimin e ekonomisë dhe shoqërisë duhet theksuar se me globalizmin e ekonomisë dhe krijimin e lidhjeve të shpejta të transportit dhe teknologjisë së inovacioneve ku tregu është shumë konkurrues dhe ndryshon me shpejtësi është vendimtare të bëhemi bashkë për të nxitur kreativitetin dhe inovacionin tek ndërmarrësitë tanë“, tha ajo.

    Teksa ka listuar shumë nisma ligjore që kanë ndërmarrë si MINT, ministrja Hajdari theksoi se më 11 maj në Bruksel do të nënshkruhet marrëveshje e pjesëmarrjes në programin tregu i përbashkët i Bashkimit Evropian me vlerë 4.2 miliardë euro.

    “Çka është me rëndësi të ndaj me ju një lajm të mirë është se kemi filluar negociatat dhe përmbyllur për marrëveshjen e pjesëmarrjes në programin tregu i përbashkët i Bashkimit Evropian me gjithsej vlerë 4.2 miliardë euro ku shumë biznese tona të vogla e të mesme mund të aplikojnë për thirrje për përfitime si një mundësi të shkëlqyeshme që bizneset e inovatorëve mund të jenë përfitues për përmirësimin e konkurrueshmërisë së industrisë dhe kjo marrëveshje do të nënshkruhet më 11 maj në Bruksel”, theksoi ajo.

    Ndërsa, zëvendësministrja e Kulturës, Rinisë dhe Sportit, Daulina Osmani u shpreh se gratë janë shtyllë nxitëse e inovacionit dhe kreativiteti dhe këtë e kanë dëshmuar pavarësisht sfidave.

    “Gratë kanë dhënë kontribut të rëndësishëm në fushat të ndryshme të pronësisë intelektuale përkundër sfidave dhe vështirësive që ky sektor ka hasur ndër vite. Sot po nderojmë punën e rëndësishme të grave të profileve të ndryshme përfshirë këtu shkrimtare, regjisore, film-bërëse e sipërmarrëse që janë shtyllë nxitëse e inovacionit dhe kreativitetit…. Kemi përfunduar një proces shumë të rëndësishëm të reformimit të kornizës ligjore dhe rregullative në fushën e të drejtave të autorit për shkak të trendëve të reja dhe dinamikës që ndodh në sferën legjislative evropiane përkitazi me të drejtën e autorit…Projektligji për të drejtat e autorit është miratuar nga Qeveria e Kosovës dhe shumë shpejt pritet të miratohet edhe në Kuvendin e Kosovës”, theksoi ajo. /KP

  • Vetëvendosja e PDK-ja ndajnë komunat në veri

    Vetëvendosja e PDK-ja ndajnë komunat në veri

    Zgjedhjet e jashtëzakonshme në veri të Kosovës prodhuan rezultate qysh në rundin e parë.

    Në të katër komunat, fituese ishin partitë shqiptare.

    Lëvizja Vetëvendosje e Partia Demokratike e Kosovës fituan nga dy komuna.

    Mitrovica e veriut e Leposaviqi u fituan nga Vetëvendosja, ndërkaq në Zveçan e Zubin Potok, pushtetin pritet ta marrë PDK-ja.

    Kësisoj, në entuziazmin e fitoreve, kryetarët e ardhshëm premtuan se punën do ta fillojnë menjëherë.

    “Për të gjitha sfidat jemi të vetëdijshëm dhe të përgatitur. Siç thashë më herët, do të jem kryetar i të gjithëve, pa marrë parasysh a janë përkrahës a jo, kështu që jemi të gatshëm dhe me padurim po e presim bashkëpunimin me të gjitha komunitetet, me të gjitha lagjet e me të gjithë fshatrat”, tha kryetari i zgjedhur i Mitrovicës së Veriut, Erden Atiq.

    Ani pse nuk mori vota nga serbët, Atiq beson se do të mund të qeverisë si në një komunë normale.

    Se do të ketë sfida në punën si kryetar, e pranon edhe i zgjedhuri i qytetarëve për ta udhëhequr Zubin Potokun. Megjithatë, Izmir Zeqiri i PDK-së ka një tjetër plan për komunën.

    “Ne fillimisht nuk synojmë që t’i marrim objektet tash. Për mua është i rëndësishëm themelimi i kabinetit, por natyrisht më e rëndësishmja për mua do të jetë, sepse unë jam i hapur dhe pa dallim etnie të marrë kuadrin më të mirë të mundshëm, pra në këtë rast kisha pas dëshirë që në kabinetin tim të involvohen kryesisht serbët, pasi edhe janë shumicë”, tha Zeqiri
    Një thirrje për kryetarët e zgjedhur të komunave veriore e pati edhe kryeministri Albin Kurti.

    “Me këtë rast prej gjithë atyre që u zgjodhën nga dje, kërkoj që të punojnë me përkushtim dhe të shërbejnë pa dallim etnie, prejardhje, pa dallim feje apo gjinie. Duhet të dëshmohen se ashtu siç i kanë fituar qytetar, siç e thotë Kushtetuta janë në nivel të detyre që të jenë gjithëpërfshirës duke mos diskriminuar askënd”, tha Kurti.

    Zgjedhjet e së dielës në 4 komunat veriore të vendit, u zhvilluan pa incidente, derisa dalja e votuesve në zgjedhje ishte vetëm 3,47 për qind. Mosdalja e serbëve në votime, bëri që të katër komunat të fitohen nga kandidatë shqiptarë. /atvlive.tv

  • Kurti: Shteti ynë do të jetë vlerë e shtuar për Këshillin e Evropës

    Kurti: Shteti ynë do të jetë vlerë e shtuar për Këshillin e Evropës

    Kryeministri i Kosovës, Albin Kurti ka reaguar pasi Komiteti i Ministrave e procedoi aplikimin e Kosovës për në Asamblenë Parlamentare të Këshillit të Evropës.

    Kurti ka shkruar në Facebook, se shteti ynë do të jetë vlerë e shtuar për Këshillin e Evropës.

    “Shteti ynë do të jetë vlerë e shtuar për Këshillin e Evropës. Këshilli i Evropës do t’i shtojë vlerë demokracisë, të drejtave të njeriut dhe sundimit të ligjit në shtetin tonë. Falënderoj ministrinë e Punëve të Jashtme dhe Diasporës, ministren Gërvalla, zëvendësministrin Ahmeti dhe ekipet e tyre për punën e pandërprerë, si dhe partnerët tanë e shtetet anëtare, për përkrahjen e pakursyer”, ka shkruar Kurti.

    Komiteti i Ministrave të shteteve anëtare, me mbi dy të tretat e votave të nevojshme, i dha sot mbështetje aplikimit të Kosovës në Këshillin e Evropës, duke përmbyllur kështu fazën e parë të anëtarësimit të plotë të Kosovës në këtë organizatë të rëndësishme ndërkombëtare.

  • Hapet platforma KGenU, Kurti: Shfrytëzojeni këtë mundësi që të gjeni një vend pune

    Hapet platforma KGenU, Kurti: Shfrytëzojeni këtë mundësi që të gjeni një vend pune

    Qeveria e Kosovës ka bërë thirrje gjithë të rinjve që të regjistrohen në platformën “Kosova Generation Unlimited” (KGU) – praktikë me pagesë.

    Në tryezën me temën “Të rinjtë e komuniteteve tregojnë për impaktin e iniciativës KGU”, është theksuar mbështetja e të rinjve që kanë nga shteti.

    Kryeministri i vendit, Albin Kurti tha se po mundohen që kjo nismë të arrijë edhe tek të tjerët, siç tha ai, që të kuptohet se Kosova është vend i mundësive për të rinjtë, komunitet joshumicë e për të gjithë.

    Kurti ka theksuar se edhe platforma e lansuar më parë, “Superpuna” ka arritur efekt pozitiv tek gjithë të rinjtë.

    “Krahas kësaj nisme qeveria ka lansuar edhe platformën “Superpuna”, e cila ofron mundësi punësimi për të rinjtë e moshës prej 18 deri në 25 vjeç. Për vetëm dy muaj kemi mbi 4 mijë e 700 pozita të lira pune, mbi 6 mijë e 400 punëkërkues të verifikuar, mbi 3 mijë e 700 biznese të regjistruara e mbi 2 mijë marrëdhënie punë. Andaj, ju ftojmë që ta shfrytëzoni edhe këtë mundësi, të regjistroheni e ta gjeni një vend pune me pagë të garantuar nga shteti, nga praktika në KGenU në punësim me Supërpunën. Duhet të ju tregojmë gjithë të rinjve për këto mundësi në mënyrë që të kemi sa më shumë të regjistruar në këto dy platforma e veçanërisht në KGenU, që gjithashtu ata të bëhen pjesë e punës praktike me pagese. Shpresoj se kjo nismë të arrije edhe te të tjerët që të kuptohet se Kosova është vend i mundësive për të rinjtë, komunitet joshumicë e për të gjithë”, tha Kurti.

    Se KGenU është një platformë e mirë për punësimin e të rinjve, e tha edhe Ministri i Financave, Hekuran Murati.

    Murati tha se me këtë po mundohen ta ulin papunësinë tek të rinjtë. Ai theksoi se një numër i madh i të rinjve nga komuniteti joshumicë kanë shprehur interesim të regjistrohen në këtë program.

    “Është e një rëndësie të veçantë që të punojmë drejt uljes së papunësisë tek të rinjtë e ketë jemi duke e bërë. Pra, duke ndërtuar ura lidhëse mes edukimit dhe punës përmes praktikes, trajnimeve të ndryshme, por edhe punës së garantuar përmes platformës SuperPuna. Platforma KGenU ka arritur sukses të madh deri tani dhe jemi të lumtur që ndër përfituesit, pra të praktikes në punë të ofruar përmes KGenU kemi edhe shumë të rinj nga komuntitet joshumicë…Si ministri, mbesim të përkushtuar në mbështetjen e të rinjve drejt zhvillimit të tyre profesional dhe kemi krijuar edhe mekanizma të ndryshëm për të arritur këtë qëllim, ndër to edhe platforma SuperPuna”, tha Murati.

    Po ashtu, Murati ka falënderuar gjitha bizneset dhe organizatat joqeveritare për rolin e tyre në mundësimin e praktikes dhe kontributin e tyre në zhvillimin profesional të këtyre tek të rinjtë.

    Shefja e Zyrës së UNICEF në Kosovë Nona Zicherman, është shprehur e kënaqur me ecurinë e kësaj platforme.

    “KGNU është ndërtuar mbi një themel të fortë partneriteti. Si UNICEF, ne jemi shumë të kënaqur që kemi partneritet me Ministrinë e Financave, Punës dhe Transfereve, dhe me mbështetjen e Rrjetit Kosovar CSR, për të zgjeruar mundësitë e investimit për të rinjtë duke shtuar vlerë në fushat tona të ekspertizës dhe njohurive, të cilat përfshijnë dekada të punës këtu në Kosovë dhe globalisht, në fuqizimin dhe zhvillimin e aftësive të të rinjve, dhe përvojën e gjerë në kontakt me komunitetet e cenueshme dhe të margjinalizuara. Kjo platformë përafrimi KGNU, tani numëron, 9600 të rinj dhe 570 subjekte të mundshme pritëse të regjistruara. Në katër muajt e fundit tashmë janë ofruar 600 vende për punë praktike dhe jemi shumë të lumtur të raportojmë se 61 për qind e pjesëmarrësve në këtë periudhë të fundit ishin gra të reja”, tha Zicherman.

    Drejtoresha ekzekutive, Rrjeti CSR në Kosovë Zana Bajrami Rama tha se ky program ka dhënë shembull pozitiv se si partneritetet dhe mobilizimi i bizneseve private, institucioneve publike të jenë gjithashtu faktor të rëndësishëm në ndërtimin e së ardhmes së tyre të suksesshme.

    “Ajo që ne duam ta arrijmë bashkërisht, është sa më shumë diversitet në mesin e bizneseve dhe të rinjve dhe sa më shumë gjithë përfshirje. Padyshim KGenU ka dhënë një shembull shumë pozitiv se si partneritetet dhe mobilizimi i bizneseve private, inistitucioneve publike, agjencive zhvillimore dhe shoqërisë civile mund të gjenerojë gjenerata të reja të përgatitur për tregun e punës dhe të jenë gjithashtu faktor të rëndësishëm në ndërtimin e së ardhmes së tyre të suksesshme. Ajo që duhet të ketë rendësi për ne si komunitet i biznesit është që të gjenerojmë praktikantë cilësor, që koha që ata kanë kaluar në kompanitë tona të jetë e vlefshme dhe një vlerë e shtuar për zhvillimin e tyre profesional, që i ndihmon atyre që me vetëbesim të hynë në tregun e punës”, tha Rama./KosovaPress/

  • Bojkoti i zgjedhjeve nga serbët në veri, vjen reagimi i kryeministrit Kurti

    Bojkoti i zgjedhjeve nga serbët në veri, vjen reagimi i kryeministrit Kurti

    Kryeministri i Kosovës, Albin Kurti, ka thënë se dalja e ulët e qytetarëve në zgjedhjet e jashtëzakonshme në komunat veriore të vendit është si pasojë e atmosferës së frikësimit dhe shantazhit nga Serbia.

    “Bojkoti ishte i imponuar nga fushata kërcënuese e Beogradit zyrtar dhe e veglave të tij kriminale në terren në veri. I falënderoj qytetarët për kurajon dhe qetësinë”, ka thënë Kurti.

    Ai, me anë të një postimi në rrjetin social Facebook, i ka falënderuar të gjithë menkanizmat që e kanë mundësuar mbarëvajtjen e këtyre zgjedhjeve.

    “Zgjedhjet për kryetar në katër komunat veriore të Kosovës dhe për kuvendet komunale në dy sosh, dje u zhvilluan qetë dhe pa incidente. Falënderoj KQZ-në për organizimin, policinë e Kosovës për sigurinë dhe qytetarët për mbështetjen”.

    Ndër tjera, ai shtoi se sistemi institucional dhe shërbimet publike në komunat do të mund të funksionojnë më shumë e më mirë.

    “Uroj kryetarët dhe asamblistët e zgjedhur dje. Ata duhet të punojnë me përkushtim dhe të shërbejnë pa dallim. Qeveria do t’i përkrahë e ndihmojë. Sistemi institucional dhe shërbimet publike do të mund të funksionojnë më shumë e më mirë. Për mirëqenien e qytetarëve dhe të drejtat e tyre”, ka shkruar Kurti.

  • Kurti viziton BIK-un për Fitër Bajram, çmon rolin e tyre për çështjen kombëtare

    Kurti viziton BIK-un për Fitër Bajram, çmon rolin e tyre për çështjen kombëtare

    Kryeministri i Kosovës, Albin Kurti, së bashku me kabinetin e tij qeverisës, ka vizituar Bashkësinë Islame të Kosovës (BIK), me rastin e festës së Fitër Bajramit, ku u prit nga myftiu Naim Tërnava, raporton Ekonomia Online.

    Nga aty, Kurti uroi besimtarët për festën e Fitër Bajramit, ndërkaq kërkoi që solidariteti të mos jetë i kufizuar vetëm për muajin e Ramazanit.

    Kurti tha se Tërnava i ka njoftuar se sa shumë është rritur solidariteti në popullsi pikërisht gjatë muajit të Ramazanit.

    “Sot në ditën e Fitër Bajramin bashkë me kolegë nga Qeveria erdhëm që t’ia urojmë këtë festë të madhe që vjen pas muajit të shenjtë të Ramazanit dhe me të cilën besimtarët kanë treguar përkushtim dhe sakrificë. Ne urojmë që përkushtimi për anën shpirtërore të njeriut gjatë jetës dhe solidariteti shoqëror e farefisnor të mos jetë i kufizuar vetëm në këtë muaj por të jetë në secilin muaj gjatë gjithë vitit”, ka theksuar Kurti.

    Ai në këtë vizitë ka kujtuar rolin, sipas tij të madh, historik e shoqëror të BIK-ut në historinë e re të Kosovës.

    “Te medreseja janë organizuar shumë mbledhje e takime, të cilët edhe i kanë strehuar veprimtarët politikë por edhe kanë mundësuar tubime ku janë mbajtur diskutime e vendime të rëndësishme për zhvillimet politike të asaj kohe. E dimë që nga lufta e fundit 37 imamë i kemi dëshmorë të kombit sot”, është shprehur Kurti.