Serbëve në Kosovë u dalin pagat në llogari, por s’ka dinarë

Përgatiti: Krenare Mulliqi

Pagat nga shteti serb iu dolën. Por, shumë qytetarë serbë të cilët jetojnë në Kosovë, nuk kanë arritur t’i tërheqin të hollat, pasi institucionet financiare nuk kishin mjaftueshëm dinarë.

Në mungesë të dinarit, qytetarëve u janë dhënë shuma vetëm deri në 10 mijë dinarë apo 85 euro.

“Kjo situatë po na komplikon jetën se s’po mund t’i marrim pagat. Është situatë e rëndë. Mora vetëm 10 mijë dinarë, sepse ky është kufizimi, kaq mund të na japin”, thotë një qytetar.

“Po krijohet tollovi e madhe. Kemi familje e fëmijë e nuk po mund t’i marrim paratë”, thotë një tjetër qytetar.

Njëkohësisht, qytetarët serbë nuk janë shumë as të informuar se si të veprojnë, derisa BQK-ja ndaloi pagesat në dinarë.

BQK-ja deri më tani ka dërguar vetëm mesazhe dhe nuk dihet nëse shkuan te individët që duhej, meqë shumë serbë nuk posedojnë numra të operatorëve që veprojnë në Kosovë.

Qytetarët thonë se të vetmin informim i kanë mediat.

“Është keq që nuk jemi informuar për çështjen e dinarit. Kjo është politikë e Prishtinës, por është dashur më shumë transparencë. Për komunitetin serb ky vend është i keq”, tha një qytetar.

“Unë s’e kam idenë për procedurat, askush asgjë s’më ka thënë, po këto janë çështje politike në të cilat qytetarët nuk përfshihen”, tha një tjetër qytetar.

Kritika për mungesë të fushatës nga BQK-ja ka edhe shoqëria civile.

Vendimi i BQK-së për dinarin po zbatohet nga 1 shkurti.

Aleatët ndërkombëtarë u bëjnë thirrje autoriteteve ta shtyjnë zbatimin e rregullores, ndërsa në Bruksel pati një takim javën e kaluar mes një delegacioni të BQK-së në lidhje me çështjen e dinarit.

Më shumë detaje i gjeni në Edicionin Qendror të lajmeve në videon më poshtë: