Blog

Ukraina dhe Gjermania po fillojnë punën mbi planet për prodhimin e përbashkët të dronëve të përparuar dhe sistemeve të tjera mbrojtëse të testuara në betejë, tha të martën presidenti ukrainas Volodymyr Zelensky, ndërsa Kievi synon të shkallëzojë luftën e tij më shumë se katërvjeçare kundër pushtimit të plotë të Rusisë.

“Ne i kemi propozuar Gjermanisë një marrëveshje dypalëshe për dronë që mbulon lloje të ndryshme dronësh, raketash, softuerësh dhe sistemesh moderne mbrojtëse. Ekipet tona po fillojnë punë konkrete”, tha Zelensky në një konferencë të përbashkët për shtyp me Kancelarin gjerman Friedrich Merz gjatë një vizite në Berlin, raporton Associated Press.

Merz tha se angazhimi i Gjermanisë për të mbështetur përpjekjet e luftës së Kievit është “një sinjal shumë i qartë” për Rusinë.

“Ne nuk do të lëkundemi në përpjekjet tona për të mbrojtur Ukrainën”, tha ai.

Përpjekjet diplomatike të udhëhequra nga SHBA-të për t’i dhënë fund luftës së Rusisë ndaj fqinjit të saj janë zbehur së fundmi, ndërsa lufta me Iranin po tërheq vëmendjen e administratës Trump, megjithëse Tammy Bruce, zëvendësambasadorja e SHBA-së në Kombet e Bashkuara, i tha Këshillit të Sigurimit të OKB-së të hënën se Uashingtoni “do të vazhdojë të shtyjë për një fund të negociuar dhe të qëndrueshëm” të luftës.

Rusia ka pushtuar rreth 20% të Ukrainës deri më tani. Kjo përfshin Gadishullin e Krimesë, të cilin Rusia e pushtoi në vitin 2014.

Ministri i Punëve së Brendshme, Xhelal Sveçla ka përgëzuar aksionin e Policisë së Kosovës dhe Prokurorisë Speciale i cili rezultoi me sekuestrimin e 17.9 kilogramëve të substancave narkotike.

Sipas një postimi në rrjetin social në Facebook, Sveçla ka shkruar se lufta ndaj këtij krimi është jo vetëm në funksion të sigurisë publike, por edhe të shëndetit e mirëqenies së fëmijëve e të rinjve.

“Përgëzoj aksionin e suksesshëm të Policisë së Kosovës dhe Prokurorisë Speciale që rezultoi me sekuestrimin e 17.9 kilogramëve substancë narkotike të llojit heroinë. Lufta ndaj këtij krimi është jo vetëm në funksion të sigurisë publike, por edhe të shëndetit e mirëqenies së fëmijëve e të rinjve tanë. Nuk ka asnjë kompromis përballë kësaj dukurie jashtëzakonisht të dëmshme për shoqërinë tonë dhe as në luftimin e këtyre grupeve kriminale”, ka shkruar Sveçla.

Tutje bëhet e ditur se angazhimi do të vazhdojë me vendosmëri të plotë për të parandaluar dhe goditur çdo veprimtari kriminale që cenon sigurinë dhe të ardhmen e shoqërisë sonë. /Telegrafi/

Një sulm masiv me dron rus gjatë natës të së martës shënjestroi infrastrukturën civile dhe portuale në rajonin e Odesës, duke dëmtuar një anije me flamur panamez, një skelë dhe një barkë në portin Izmail.

Kështu bëri me dije të martën Guvernatori Rajonal i Odesës, Oleh Kiper. Në rrethinën përreth, një sulm shkatërroi një punishte riparimi makinash, duke shkaktuar një zjarr që përpiu dy autobusë pasagjerësh dhe shtatë makina.

Shërbimi Shtetëror i Emergjenca vetë Ukrainës në rajonin e Odesës publikoi pamje që tregonin ekipet e shpëtimit duke luftuar me flakët. Reuters nuk ishte në gjendje të konfirmonte vendndodhjen dhe datën e pamjeve; megjithatë, nuk u gjetën versione më të vjetra të videos të postuara para 14 prillit.

Zyrtarët lokalë raportuan se gjashtë shtëpi private dhe një ambulancë u dëmtuan gjithashtu në breshëri. Zjarrfikësit arritën të shuanin flakët pavarësisht se u penguan vazhdimisht nga sirenat e sulmeve ajrore. Nuk u raportuan viktima ose lëndime, dhe shërbimet komunale mbeten në vend për të pastruar mbeturinat.

Një sulm me dron ukrainas në Jelets, në rajonin e Lipetskut (Rusia perëndimore), la një grua të vdekur dhe pesë të plagosur (katër prej të cilëve u shtruan në spital).Guvernatori i rajonit, Igor Artamonov, raportoi sulmin, siç raportohet nga Tass dhe Interfax: “Jelets u godit nga një sulm me dron. Fatkeqësisht, ka viktima”.

Një grua vdiq në një shtëpi në rrugën Cherokmanova. Pesë persona tët jerë u plagosën, katër prej të cilëve u shtruan në spital. Të gjithëve po u ofrohet kujdesi i nevojshëm mjekësor, shkruan A2CNN.

Forcat ukrainase konfirmuan se goditën me dronë uzinën ruse Cherepovets-Azot, e cila prodhon kimikate të nevojshme për të bërë eksplozivë. Gjigandi kimik me bazë në rajonin e Vologdës prodhon qindra mijëra ton amoniak, nitrat dhe acid nitrik çdo vit. Produktet e tij shërbejnë si lëndë të para për prodhimin e TNT-së, heksogjenitdhe përbërësve të tjerë për prodhimin e municioneve.

Deputeti i Vetëvendosjes, Egzon Azemi dhe zëdhënësi i Lëvizjes VV-së, Arlind Manxhuka u shpallën fajtorë për nxitje të përçarjes dhe mosdurimit, duke u dënuar secili veç e veç me nga një vit e gjashtë muaj burgim.

Deputeti Egzon Azemi ka dal me reagim duke thënë se u dënuan asnjë provë.

“Ata që lirojnë terroristët serb që gjuajn bomba duan të na denojnë neve aktivistëve shqiptarë vetëm sepse reaguam ndaj këtij skandali. Arlind Manxhuka dhe unë sot u dënuam nga 1 vit e 6 muaj burg, pa asnjë provë nga sistemi i vjetruar i drejtësisë që liron terroristët serb. Edi Zenelaj dhe Qerim Elshani u dënuan me nga 6 muaj burgim. Krejt kjo nga ata që i nënshtrohen Serbisë. Pra në total 4 vite burg për ata reagojnë kur lirohen kriminelët serb që gjujan bomba e vrasin policë. Qantat që vijnë andej kufirit të Republikës kurrë nuk do të na mbyllin gojën. Rroftë Republika e Kosovës, turp atyre që lirojnë krimenlë serb e neve na denojnë veç pse reagojmë”, ka shkruar ai.

Qerim Elshani dhe Edi Zenelaj u shpallën fajtorë për veprën penale “kanosje”, dhe u dënuan secili veç e veç me nga gjashtë muaj burgim.

Shpallja e aktgjykimit u bë nga trupi gjykues në përbërje: Kushtrim Shyti, kryetar i kolegjit, si dhe anëtarët Violeta Namani dhe Avi Syla.

Palët kanë të drejtë ankese brenda 30 ditësh nga dita e pranimit të aktgjykimit në formë të shkruar.

Në shpallje ishte i pranishëm Edi Zenelaj, si dhe mbrojtëset: avokatja Teutë Xhema, për Egzon Azemin, dhe avokatja Valentina Shabani, për Arlind Manxhukën.

Ndërkaq, munguan të akuzuarit Egzon Azemi, Arlind Manxhuka dhe Qerim Elshani, si dhe prokurorja speciale, Fikrije Fejzullahu.

Ndryshe, Gjykata Themelore në Prishtinë, më 7 mars 2025, kishte shpallur aktgjykim me të cilin kishte liruar nga akuza Arlind Manxhukën, ndërsa Egzon Azemin, Qerim Elshanin dhe Edi Zenelaj i kishte dënuar me nga 6 muaj burgim. Por, Gjykata e Apelit më 27 tetor 2025 e ktheu rastin në rigjykim.

Ndryshe, Prokuroria Speciale e Republikës së Kosovës (PSRK), më 8 nëntor 2023 ka ngritur aktakuzë ndaj Arlind Manxhukës, Egzon Azemit, Qerim Elshanit dhe Edi Zenelajt, të cilët ngarkohen se kanë kryer veprën penale “Kanosja” dhe “Nxitja e përçarjes dhe mosdurimit”.

Sipas aktakuzës të siguruar nga “Betimi për Drejtësi”, Manxhuka dhe Azemi ngarkohen për veprën penale “Nxitja e përçarjes dhe mosdurimit”, ndërkaq Elshani dhe Zenalaj akuzohen për “Kanosje”. Të njëjti po akuzohen se me dashje kanë kanosur të dëmtuarit, gjykatësin e Gjykatës Themelore në Prishtinë – Departamenti Special Mentor Bajraktari dhe prokurorin special Afrim Shefkiu.

Në aktakuzë thuhet se të pandehurit Manxhuka dhe Azemi më 28 dhjetor 2022, duke keqpërdorur pozitën e tyre zyrtare nëpërmjet rrjetit social “Facebook”, me dashje kanë përhapur dhe nxitur urrejtje e mosdurim ndaj të dëmtuarve Bajraktari dhe Shefkiu, të cilët në cilësi të personave zyrtarë më 28 dhjetor 2022 kishin marrë vendim për ndryshimin e masës së paraburgimit kundër të dyshuarit Dejan Pantiq.

“I pandehuri Arlind ka shpërndarë postimin me fjalët: “Ky aktgjykim është akttradhëti”, pastaj kanë vazhduar me postime tjera nxitëse “Për kë punon kjo Gjykatë!?, e të ngjashme, ndërsa i pandehuri Egzon ka postuar shkrimin me fjalët: “Pas atentatit që kreu në Paris, ndaj Esat Pash Toptanit, ndër të tjera, Avniu tha”, ku këtij shkrimi i dyshuari i ka bashkangjitur një fotografi me përshkrimin: “Tradhtarët plumbin e kanë hak””, thuhet në aktakuzë.

Tutje, sipas aktit akuzues, me këto veprime të njëjtit kanë ndërmarrë veprime të rrezikshme, nxitëse e linçuese me tendenca për të ndikuar apo penguar ushtrimin e funksionit të të dëmtuarve e cila ka mund të prishë rendin publik dhe të dëmtojë imazhin dhe integritetin e tyre personal.

Me këtë, secili veç e veç, ngarkohen për veprën penale: “Nxitja e përçarjes dhe mosdurimit” nga neni 141, paragrafi 2 lidhur me paragrafin 1 të Kodit Penal të Republikës së Kosovës.

Ndërkaq, sipas aktakuzës të pandehurit Elshani dhe Zenelaj, menjëherë pas postimeve të të pandehurve të lartcekur në mënyrën e përshkruar si në dispozitivin e parë, të nxitur nga të njëjtit, të pandehurit me dashje kanë kanosur të dëmtuarit Afrim Shefkiu dhe Mentor Bajraktari.

“I pandehuri Qerim ka komentuar në postimin e të pandehurit Egzon Azemi me fjalët: “Atij jo plumin po bumen n’goj po u dashke me ja lshu që mos mi jet as copëza me hy n’dhe në tokën tonë!”, ndërsa i pandehuri Zenelaj kishte ndërmarrë aksion duke vendosur grafite në mure me mbishkrimin “Shtyll e Turpit Gjyqtari Mentor Bajraktari dhe Prokurori Afrim Shefkiu”, me ç’rast tek të dëmtuarit kanë shkaktuar ndjenjën e ankthit, frikës dhe pasigurisë për jetë”, thuhet në aktakuzë.

Qeveria ka zhvilluar sot një mbledhje elektronike, në të cilën ka shqyrtuar dhe miratuar Projektligjin për Energjinë Elektrike.

Kjo u bë e ditur përmes një njoftimi për media të ekzekutivit.

Sipas njoftimit, projektligji që mori dritën jeshile, ka për qëllim përcaktimin e rregullave dhe masave për sektorin e energjisë elektrike, për të garantuar furnizim të sigurt, të qëndrueshëm dhe cilësor me energji elektrike, me çmime të përballueshme dhe transparente për konsumatorët fundorë, duke adresuar njëkohësisht caqet klimatike të vendit.

I akuzuari Liman Berisha, për kanosjen e moderatorit Alaudin Hamiti, ka pranuar fajësinë në seancën e shqyrtimit fillestar.

Këtë deklarim ai e bëri pas leximit të aktakuzës nga prokurori Arian Frrokaj.

I akuzuari Berisha deklaroi se ndihet fajtor dhe shprehu pendesë për rastin e ndodhur, duke theksuar se nga ai incizim nuk ka pasur asgjë kundër të dëmtuarit Alaudin Hamiti. Ai kërkoi falje ndaj tij dhe familjes së tij, si dhe i propozoi gjykatës që gjatë matjes së dënimit t’i shqiptohet një dënim sa më i butë, raporton “Betimi për Drejtësi”.

Mbrojtësi i të akuzuarit, avokati Gojart Zymberi, deklaroi se e mbështet deklarimin e klientit të tij, duke shtuar se ai nuk ka pasur ndonjë qëllim për rrezik real apo serioz ndaj të dëmtuarit, dhe se nga deklarimi i tij vërehet se bëhet fjalë për një reagim emocional.

Po ashtu, ai i propozoi gjykatës që të aprovojë pranimin e fajësisë dhe të shqiptojë një dënim sa më të butë, si dhe të ndërpritet masa e arrestit shtëpiak për të mbrojturin e tij.

Prokurori i shtetit, Arian Frrokaj, nuk e kundërshtoi pranimin e fajësisë, duke theksuar se ai mbështetet në dispozitat ligjore në fuqi dhe se gjatë caktimit të dënimit duhet të merren parasysh rrethanat lehtësuese dhe rënduese.

Ndërkaq, përfaqësuesja e palës së dëmtuar, avokatja Blinera Osmani, tha se e mbështet në tërësi qëndrimin e prokurorit, duke theksuar se si pasojë e kërcënimit serioz, i dëmtuari ka përjetuar ndjenjë të vazhdueshme pasigurie për jetën dhe integritetin e tij personal. Sipas saj, kjo gjendje ka ndikuar drejtpërdrejt në gjendjen emocionale të tij, duke i shkaktuar ankth, stres të vazhdueshëm dhe çrregullim në jetën e përditshme. Ajo propozoi që gjykata t’i shqiptojë të akuzuarit dënimin në përputhje me kërkesën e prokurorisë.

Pala e dëmtuar, Alaudin Hamiti, tha se e mbështet përfaqësuesen e tij dhe shtoi se dëshiron të dijë arsyet e kërcënimit, pasi që nuk e njeh të akuzuarin dhe nuk ka kërcënuar askënd.

Pranimi i fajësisë u aprovua nga gjyqtari i rastit, Eroll Gashi, i cili tha se lidhur me masën e arrestit shtëpiak do të vendoset me rastin e shpalljes së aktgjykimit.

Sipas aktakuzës së Prokurorisë Themelore në Prishtinë, të datës 19 mars 2026, më 26 nëntor 2024, rreth orës 14:30, në Facebook, në adresën e Klan Kosovës, i pandehuri Liman Berisha, në formë shkrimi dhe mesazhesh zanore, ka dërguar porosi kërcënuese ndaj moderatorit Alaudin Hamiti, duke shkruar: “Edi (ish-banor i programit) është nipi jem, atë fjalë që ia ke thanë, Alaudin, besom ka me pagu me jetë, dhe po e rrite atë ton, ka me hanger plumbin shpejt”.

Sipas aktakuzës, me këtë veprim i dëmtuari ka ndjerë frikë dhe pasiguri.

Prandaj, Berisha ngarkohet me veprën penale “Kanosja” nga neni 181, paragrafi 2 i Kodit Penal të Republikës së Kosovës.

Nënkryetari i Kuvendit, Ardian Gola, tha se pati pajtim nga kryesia e Kuvendit qe në seancën e së premtes në rend të ditës të futet Projektligji për Byronë Shtetërore për Verifikimin dhe Konfiskimin e Pasurisë së Pajustifikueshme, raporton Ekonomia Online.

“Sot nuk patëm diçka shumë specifike, përjashtimisht faktit që seancën e kemi caktuar të premten në ora 10:00. Arsyeja pse nuk u vendos për të enjten, që është rëndom praktikë parlamentare, konsiston në faktin që ishim një ditë me vonesë në mbajtjen e mbledhjes së kryesisë dhe për shkak se rregullorja në mënyrë shprehimore e përcakton afatin dyditor prej mbledhjes së kryesisë, respektivisht prej ndarjes së materialeve për deputetët e deri te seanca plenare e radhës, u deshëm që të shtyjmë për të premten ose të shkojmë me seancë të jashtëzakonshme. Po, patëm dakordim edhe me nënkryetarët e grupeve parlamentare dhe të premten në orën 10:00 do të kemi seancën plenare të radhës, ku si pika më të veçanta janë projektligji për Byronë për Konfiskimin e Pasurisë së Pajustifikueshme, edhe vendimin e Qeverisë për dërgimin e forcave të sigurisë në Gaza. Pikat tjera janë çështje më shumë të brendshme të Kuvendit, nuk ka diçka tjetër specifike”, tha ai.

Juristja e mediave, Flutura Kusari, ka reaguar lidhur me zhvillimet e sotme në Kuvendin e Kosovës, duke i cilësuar ato si të paprecedenta.

Përmes një postimi, Kusari tha se ajo që ka ndodhur gjatë mbledhjes përgatitore të Komisionit Ad Hoc për përzgjedhjen e anëtarëve të Radio Televizioni i Kosovës është, sipas saj, “më së paku me thënë, tronditëse”.

Ajo theksoi se e monitoron punën e Kuvendi i Kosovës që nga viti 2012–2013, por nuk ka parë më herët situata të ngjashme.

Postimi i plotë:

Ajo që ka ndodhur sot në parlament në mbledhjen përgatitore të Komisionit Ad Hoc për përzgjedhjen e anëtarëve të RTK-së është, më së paku me thënë, tronditëse.

Unë e monitoroj Kuvendin pak a shumë që nga viti 2012–2013. Kurrë nuk kam parë diçka të tillë.

Detajet më vonë ose nesër, pasi të përfundon edhe mbledhja për anëtarët e KPM-së e cila mbahet sot në orën 14:00.