Blog

Tetë fëmijë janë vrarë në Shtetet e Bashkuara të Amerikës.

Ngjarja tragjike ndodhi pas të shtënave masive që pati sot në Shreveport të Louisianës.

Siç shkruan NBC News, zyrtarët policorë të Departamentit të Shreveportit iu përgjigjën thirrjes së bllokut 300 të West 79th Street menjëherë pas orës 6 të mëngjesit (sipas orës lokale) pas raportimeve për një shqetësim familjar.

Zëdhënësi i policisë Christopher Bordelon e përshkroi skenën e krimit si “të gjerë”, që përfshin dy shtëpi në zonë dhe një të tretë në “Harris Street”, aty pranë.

Dhjetë persona u qëlluan, ku tetë prej tyre mbetën të vrarë. Viktimat janë të moshës nga 1 deri në 14 vjeç, bëri të ditur Bordelon në një konferencë për shtyp. Ai tha se të shtënat ndodhën të shtunën në mbrëmje.

“Personi përgjegjës, sapo u largua nga vendi i ngjarjes, kreu një grabitje makine këtu, shumë afër qoshes së West 79th dhe Lynnwood, në të cilën kohë, zyrtarët e patrullës së policisë së Shreveport e ndoqën automjetin”, tha Bordelon.

Zyrtarët policorë qëlluan dhe vranë të dyshuarin gjatë ndjekjes, shtoi tutje Bordelon.

Nesër me fillim nga ora 11:00 kryetari i Lëvizjes Vetëvendosje njëherësh kryeministër i Kosovës Albin Kurti, do të takohet me kryetarin e Lidhjes Demokratike të Kosovës Lumir Abdixhikun, për të diskutuar lidhur me çështjen e zgjedhjes së Presidentit.

Për këtë temë në emisonin Info Magazine në Klan Kosova ka folur deputeti i LDK-së Ermal Sadiku.

Ai u shpreh se nuk ka ndonjë pritje për këtë takim, dhe sipas tij, në VV janë manipulantë fantastikë

“Këta janë manipulantë fantastikë, krejt tjetër çka flasin dhe në fund krejt tjetër çka veprojnë. Këta flasin për një emër të përgjithshëm, a partiak dhe në fund e qesin në vota Glauk Konjufcën. Nuk mundem t’i marrë seriozisht politikanët që tjetër çka flasin dhe tjetër çka veprojnë dhe kështu kanë qenë gjithë jetën e tyre”, u shpreh deputeti i LDK-së në Klan Kosova.

“Përbesë nuk po mundem t’i komentojë, po ndihem keq kur po i dëgjoj se çka po thonë e pastaj se çka po bëjnë”, theksoi Sadiku.

Për zgjedhjen e shefit/es së shtetit ka kohë deri më 28 prill.

Ky është afati kushtetues, kur Kosova duhet ta ketë të zgjedhur Presidentin, për të shmangur zgjedhjet e reja të parakohshme.

Janë publikuar pamjet nga momenti i shpërthimit të zjarrit që “përpiu” gjysmën e pallatit 12-katësh në Tiranë, pak ditë më parë.

Sipas videos, flakët kanë nisur nga mbeturinat e një marketi të vendosur në përdhes të pallatit, duke u përhapur me shpejtësi.

Si pasojë e zjarrit të madh i cili shpërtheu të martën e kaluar, 30 banesa u shkrumbuan ndërsa dhjetëra familje mbetën pa strehë, ka njoftuar

Ish-presidentja e vendit, Vjosa Osmani, ka bërë të ditur se gjatë pjesëmarrjes në Forumin Diplomatik të Antalyas ka takuar liderë ndërkombëtarë që kanë mbështetur Kosovën.

Përmes një postimi në Facebook, Osmani tha se në kuadër të forumit ka shprehur mirënjohje për përkrahjen e vazhdueshme ndaj vendit dhe qytetarëve të tij.

“Gjatë këtij viti në Forumin Diplomatik të Antalias, ishte kënaqësi të falendëroja liderët që kanë mbështetur vendin tonë dhe kanë qëndruar pranë popullit të Kosovës. Me këtë rast, shpreha mirënjohjen ndaj Emirit të Katarit, Sheikh Tamim Bin Hamad Al Thani, si dhe ndaj Kryeministrit të Katarit, Sheikh Mohammed bin Abdulrahman Al Thani”, shkroi Osmani.

Policia e Kosovës ka njoftuar se ka arrestuar tre persona në Ferizaj, pasi dyshohen për grabitje.

Prangosja e tyre ka ndodhur mesditen e sotme në fshatin Slivovë të kësaj komune.

Sipas policisë, fillimisht ishte arrestuar i dyshuari i parë, pas raportimit për grabitjen në një lokal në këtë fshat.

“Me datë 19.04.2026, rreth orës 12:00, stacioni policor në Ferizaj ka pranuar një telefonatë nga një qytetar, i cili ka raportuar se në marketin e tij, në fshatin Slivovë të Ferizajt, kishte ndodhur një grabitje. Sipas ankuesit, një person mashkull, rreth 30 vjeç, i veshur me rroba të zeza, me syze dhe me shall të vendosur mbi fytyrë deri mbi hundë, kishte hyrë në lokal dhe nën kërcënimin e një arme të gjatë kishte marrë paratë nga arka, për t’u larguar më pas në këmbë në drejtim të varrezave të fshatit.”, thuhet në njoftim.

Aty thuhet se njësitet reaguese dhe ato të hetimeve kanë dalë menjëherë në vendin e ngjarjes dhe pas rreth gjysmë ore kanë arritur që ta arrestojnë të dyshuarin, duke konfiskuar edhe një armë automatike.

“Në vendin e ngjarjes kanë dalë edhe hetuesit dhe krimteknikët rajonalë. Rreth orës 12:50 është konfiskuar një armë e gjatë automatike e tipit AK-47, e cila dyshohet se është përdorur në kryerjen e veprës penale.”, thuhet në njoftim.

Gjithashtu, janë arrestuar edhe dy persona të tjerë, të dyshuar për përfshirje në këtë rast: R.H. 38 vjeç dhe V.S. 28 vjeç.

“Për të gjitha veprimet policore është njoftuar prokurori i shtetit për krime të rënda, i cili ka autorizuar hetuesit policorë për vazhdimin e hetimeve dhe intervistimin e të dyshuarve. Pas intervistimit dhe me vendim të prokurorit, tre të dyshuarit janë ndaluar në mbajtje për 48 orë.”, përfundon njoftimi.

Pas kthimit nga Barcelona, kryeministri i vendit, Albin Kurti, ka bërë homazhe në Hallaq të Vogël e Rufc të Ri të Lipjanit, në nderim të të vrarëve më 19 prill 1999.

Krahas pamjeve, Kurti shkruan se “atë ditë, forcat e armatosura të Serbisë vranë 20 civilë të pafajshëm. Ata u ndanë nga familjet e tyre dhe u ekzekutuan. Më pas, të gjithë u varrosën në një varrezë masive”.

Tutje, Kurti ka shkruar:

Në këtë ditë përkujtojmë grupin e intelektualëve të Mitrovicës. 23 mjekë, profesorë dhe veprimtarë të çështjes kombëtare dhe të të drejtave të njeriut, në Dreth të Zubin Potokut, u rrëmbyen dhe u zhdukën me dhunë nga forcat e armatosura të Serbisë.

Krahas mohimit të krimeve gjenocidale, Serbia vazhdon të shkelë detyrimet e saj ndërkombëtare duke ua mohuar familjeve të drejtën për të vërtetën dhe drejtësinë, duke mos zbardhur fatin dhe vendndodhjen e personave të zhdukur me dhunë gjatë luftës në Kosovë.

Ne nderojmë sot e gjithmonë, çdo jetë të dhënë për lirinë e Kosovës dhe qëndrojmë pranë familjarëve, duke ruajtur kujtesën dhe duke kërkuar drejtësi.

Sakrifica për liri mbetet udhërrëfyese për të çuar përpara Republikën e Kosovës!

I përjetshëm qoftë kujtimi i dëshmorëve dhe martirëve të kombit!

Postimi i plotë:

Deputeti nga radhët e Lëvizjes Vetëvendosje, njëherit ish komandant i UÇK-së, Fadil Hadergjonaj i gëzohet vendimit që mori Kuvendi për dërgimin e kontigjentit të Forcës së Sigurisë së Kosovës në mision ndërkombëtar në Gaza.

Hadergjonaj në një intervistë për Ekonomia Online u shpreh se vet ka qenë pjesë e proceseve prej fillimit deri tek formimi i Ushtrisë së Kosovës dhe marrja pjesë e saj në misione ndërkombëtare për stabilizim.

“Është një vendim i jashtëzakonshëm, është një vendim i madh i Kuvendit të Republikës së Kosovës, sidomos përçkon mesazhin e fuqishëm se subjektiviteti i Republikës së Kosovës gjithnjë e më shumë po rritet. Kur flasim për Forcën e Sigurisë së Kosovës, kjo ka themelet e forta në UÇK. Sot patëm edhe 27 vjetorin e rënies së heroit Sali Çekaj dhe 12 dëshmorëve të tjerë, por historia na tregon dhe aktiviteti i Sali Çekajt ishte një ndër nismëtarët dhe ideatorët e themelimit të grupeve të armatosura deri edhe në ngritjen, zhvillimin e UÇK-së dhe luftës për çlirimin e Kosovës. Pastaj proceset nëpër të cilat ka kaluar FSK-ja, pjesëtarët e saj janë sfiduar, sidomos gjatë kohës së TMK-së për shkak të kushteve, çarmatimit, për shkak të gjitha aspekteve që kanë qenë. Por vetëm vullneti i madh dhe vendosmëria e tyre ka bërë që të vazhdojnë e të qëndrojnë përkundër pagave të vogla, përkundër mungesës së pajisjeve, përkundër mungesës së infrastrukturës ligjore dhe shumë e shumë gjërave të tjera. Por ishin të betuar dhe të vendosur që amanetin e të rënëve për lirinë e Kosovës ta çojnë në vend. E ai amanet ishte që ne të kemi shtet, të kemi institucione të forta të sigurisë dhe gjithsesi të ecim në procesin e integrimeve euroatlantike që janë edhe vizion strategjik që nga Presidenti Rugova”, tha Hadergjonaj për EO.

Ai tha se marrja e këtij vendimi është meritë e të gjithëve mirëpo veçanarisht e Forcës së Sigurisë së Kosovës, të cilët janë shume profesionistë dhe të stërvitur ndërkombëtarisht.

“Vendimi që ne morëm në Kuvend i ka paraprirë një marrëveshje e quajtur “Marrëveshja e Bordit të Paqes”, pjesë e të cilës është edhe Republika e Kosovës, ndër themeluesit e atij bordi. Dhe nga aty burojnë pastaj edhe obligimet e forcës ndërkombëtare stabilizuese pjesë e të cilës do të jetë edhe Forca e Sigurisë së Kosovës për t’i dhënë fund apo për të zbatuar planin gjithëpërfshirës për dhënien fund të konfliktit në Lindjen e Mesme, përkatësisht në Gaza. Vërtet është një arritje e madhe dhe kjo meritë ekskluzive është e natyrisht e të gjithëve, por në veçanti është e profesionalizmit dhe ekspertizës si dhe përfaqësimit dinjitoz të pjesëtarëve të FSK-së, të cilët janë ngritur, zhvilluar dhe stërvitur në kuadër të standardeve ndërkombëtare. Kështu që merita u takon atyre, sepse kudo që janë shfaqur, qoftë në aktivitete individuale, qoftë në aktivitete kolektive, stërvitje të ndryshme të përbashkëta me shumëkombëshe, kanë treguar një performancë të jashtëzakonshme dhe kanë treguar se kanë arritur një nivel të zhvillimit dhe profesionalizmit që e lakmojnë edhe shumë ushtri rajonale. Dhe kjo e ka rritur, është dëshmi se FSK-ja është bërë një partner i besueshëm për miqtë tanë, në veçanti për SHBA-të dhe shtetet e NATO-s që na ndihmojnë që bashkarisht ta kemi edhe lirinë edhe pavarësinë edhe shtetin e Kosovës. Është një arritje e madhe, unë si një prej pjesëtarëve të të gjitha këtyre proceseve deri në pensionimin tim, vërtet jam shumë krenar dhe i lumtur sepse unë asnjëherë, edhe pse kam përfunduar shërbimin aktiv në uniformë, vazhdoj të shërbej në formë tjetër, por prapë mendjen, bindjen dhe zemrën e kam te ushtarët tanë”, tha Hadergjonaj.

Me vetëm nëntë ditë të mbetura nga afati kushtetues për zgjedhjen e presidentit, deputeti i Lëvizjes Vetëvendosje, Arbër Rexhaj, ka paralajmëruar intensifikim të përpjekjeve politike nga kryeministri Albin Kurti për arritjen e një marrëveshjeje.

Ai për KosovaPress, ka bërë të ditur se java e ardhshme pritet të karakterizohet me takime më të shpeshta të Kurtit, duke theksuar nevojën që procesi të kalojë nga diskutimet e përgjithshme në propozime konkrete për emra.

“Unë pres intensitet të takimeve. Pres që të ketë takime gjatë javës së ardhshme. Natyrisht duhet të kalojmë në propozime konkrete të emrave të zgjidhjes së problemit që na çon në drejtim të zgjedhjes së presidentit apo presidentes. Ashtu siç kemi biseduar në grupin parlamentar, nuk do të ketë asnjë problem që e pengon këtë proces sa i përket LVV-së. Ne jemi të bindur se duhet të zgjidhet presidenti”, deklaron ai.

Sipas tij, dështimi për zgjedhjen e presidentit në këtë fazë do të kishte pasoja serioze politike, ku vendi mund të hyjë në një cikël krizash, në të cilin zgjedhjet mund të përsëriten vazhdimisht.

Duke folur për dialogun ndërpartiak, Rexhaj ka theksuar se kompromisi është i domosdoshëm, por ka kritikuar qasjen e disa partive opozitare. Ai ka vlerësuar se diskutimi i kritereve, siç propozon LDK-ja, është i nevojshëm, ndërsa ka kundërshtuar kërkesën e PDK-së për ftesa zyrtare për takime, duke e cilësuar si pengesë për komunikim.

Rexhaj thotë se LVV-ja është e gatshme për kompromis për presidentin, por sipas tij, kjo nuk nënkupton tërheqje të njëanshme, por gatishmëri për të shqyrtuar emra konkretë dhe për të ndërtuar konsensus brenda grupit parlamentar.

Nëse Kuvendi nuk zgjedh presidentin deri më 28 prill, vendi shkon në zgjedhje të reja.

Deri më tani, pas aktgjykimit të Kushtetueses për këtë çështje, është mbajtur vetëm një takim mes Albin Kurtit dhe Lumir Abdixhikut nga LDK-ja. Në anën tjetër, PDK-ja ka kërkuar ftesë zyrtare për takim, e cila deri më tani nuk ka ndodhur./KosovaPress

Në 27-vjetorin e rrëmbimit dhe zhdukjes së 23 qytetarëve shqiptarë në fshatrat Dreth dhe Kalludër të Zubin Potokut, është rikujtuar një nga rastet më të rënda të luftës në Kosovë, i njohur si “Grupi i Intelektualëve”.

Përmes një reagimi publik, Kushtrim Gara udhëheqësi i Njësisë së Komisionit Qeveritar për Persona të Zhdukur, ka theksuar se bëhet fjalë për 23 jetë të ndërprera padrejtësisht, plagë që, sipas tij, mbeten ende të hapura për familjet dhe shoqërinë.

“23 jetë të ndërprera padrejtësisht… 23 plagë që nuk mbyllen kurrë… jetë, familje, histori që jetojnë me ne çdo ditë,” ka deklaruar ai.

Ngjarja ka ndodhur më 19 prill 1999, kur 23 shqiptarë, kryesisht nga rajoni i Mitrovicës, u rrëmbyen dhe u zhdukën me forcë, ndërsa deri më sot fati i tyre mbetet i pazbardhur.

“Sot, 19 prill 2026, përulemi me dhimbje e respekt para jetëve dhe kontributit të tyre, duke qëndruar pranë familjeve dhe duke kërkuar drejtësi e të vërtetën,” ka shtuar Gara.

Ai ka theksuar se edhe pas 27 vitesh, mungesa e përgjigjeve dhe e drejtësisë vazhdon të jetë shqetësuese, duke përmendur se dokumente zyrtare dëshmojnë përfshirjen e Ushtrisë Jugosllave në këtë krim.

“Edhe pas 27 vitesh, ky rast mbetet pa përgjigje. Dokumente zyrtare dëshmojnë përfshirjen e Ushtrisë Jugosllave në këtë krim, ndërsa mungesa e bashkëpunimit dhe mos hapja e arkivave vazhdojnë të pengojnë zbardhjen e fatit të tyre,” ka theksuar ai.

Në fund, është bërë thirrje që kujtimi për viktimat të mbetet i gjallë dhe përpjekjet për zbardhjen e fatit të tyre të mos ndalen.

“Kujtimi për ta nuk zbehet. Ai jeton në përkushtimin tonë për të mos harruar asnjë emër dhe për të kërkuar pa ndalur të vërtetën,” ka përfunduar Gara.