Blog

Ministri i Punëve të Brendshme, Xhelal Sveçla, ka reaguar pas vendimit të Gjykatës Themelore në Prishtinë, e cila e ka dënuar me 6 vjet burgim ish-zyrtaren e OSBE-së, Jelena Gjukanoviq, për veprën penale të spiunazhit.

Në reagimin e tij, Sveçla tha se institucionet e sigurisë së Kosovës janë angazhuar fuqishëm në zbulimin dhe parandalimin e aktiviteteve të spiunazhit që, sipas tij, kanë rrezikuar drejtpërdrejt sigurinë kombëtare dhe rendin kushtetues të vendit.

Ai theksoi se Gjukanoviq ka nxjerrë dhe shpërndarë dokumente të brendshme dhe të ndjeshme të institucioneve të Kosovës te akterë të ndryshëm në Serbi.

Sveçla shtoi se institucionet e sigurisë do të vazhdojnë pa kompromis luftën kundër këtyre veprimtarive, duke kërkuar njëkohësisht më shumë vendosmëri në vendimmarrje dhe ndëshkueshmëri, në përputhje me peshën dhe pasojat që, sipas tij, këto vepra kanë për shtetin.

“Askush nuk është mbi ligjin dhe asnjë veprim që cenon sigurinë dhe rendin kushtetues të Republikës së Kosovës nuk do të tolerohet”, u shpreh Sveçla.

Deputetja e AAK-së, Time Kadrijaj ka kritikuar thirrjen e seancës për presidentin.

Ajo ka thënë se kjo është një shpikje e LVV-së.

“Asnjëherë s’ka ndodh me u thirr një seancë me diskutua për presidentin. Si është e mundur të thirret një seancë në orën 17:00 dhe të diskutohet për presidentin. Jo, kryetare, nuk diskutohet në parlament për presidentin, sillen emrat të cilët ju jeni dakorduar dhe aty votohet. Por që të diskutohet e keni shpikur një praktikë të re, këtë po e zbulon LVV”, ka thënë ajo gjatë seancës së Kuvendit.

Në reagim e saj, kryetarja e Kuvendit Albulena Haxhiu ka thënë se Kuvendi është vendi ku duhet të diskutohet duke shprehur besimin se deri në orën 17:00 do të ketë emra të propozuar për presidentin.

Këtë vit në Haxh dhe për vizitë në vendet e shenjta myslimane, nga vendi ynë, do të shkojnë mbi dy mijë besimtarë, që është numër identik me vitin e kaluar, deklaroi për AIM-n, Irsal Jakupi, sekretar i përgjithshëm i Bashkësisë Fetare Islame.

“Numri është plotësuar sipas kuotës të cilën e caktoi Ministria e Haxhit në Arabinë Saudite dhe këtë vit do të ketë 2.020 besimtarë nga vendi, të cilët do të udhëtojnë drejt vendeve të shenjta, edhe pse ishin paraqitur më shumë. Numri është identik si edhe vitin e kaluar. Besimtarët do të udhëtojnë prej 14 deri më 21 maj, me fluturime çarter me aeroplan”, shtoi Jakupi.

Sa i përket moshës, sipas tij, këtë vit ata që udhëtojnë në haxh i takojnë gjeneratës më të re, ndërsa më i moshuari është një 75-vjeçar. Çmimi për aranzhim për Haxh është 6.700 euro, që është më i lartë për 250 euro në krahasim me vitin e kaluar.

Festa e madhe e Bajramit të Kurbanit, këtë vit bie më 27 maj. Haxhi shërben për t’u kujtuar myslimanëve se të gjithë janë të barabartë në sytë e Zotit – Allahut. Kjo është shtylla e pestë e Islamit dhe rikujton udhëtimin e profetit Muhamed në vitin 632. Synon t’i afrojë myslimanët e të gjitha kombësive, duke i pastruar ata nga mëkatet dhe duke i afruar ata me Zotin.

Qendra Kryesore e Mjekësisë Familjare (QKMF) në Obiliq ka njoftuar se gjatë ditës së sotme një ekip mjekësor është përfshirë në një aksident komunikacioni, derisa ishte në kryerje të detyrës zyrtare për transport emergjent të një pacienti.

Sipas njoftimit të QKMF-së, si pasojë e aksidentit kanë pësuar lëndime të lehta trupore dy punëtorë shëndetësorë, si dhe dy persona nga pala tjetër e përfshirë në aksident. Nga QKMF-ja është bërë e ditur se të lënduarit janë jashtë rrezikut për jetë.

Ngjarja ka ndikuar edhe në ofrimin e shërbimeve shëndetësore, pasi, siç thuhet në njoftim, për shkak të aksidentit janë shkaktuar vonesa të përkohshme në realizimin e disa shërbimeve.

QKMF Obiliq u ka bërë thirrje qytetarëve për mirëkuptim, duke theksuar se pavarësisht situatës, shërbimet shëndetësore janë duke vazhduar normalisht.

Kuvendi i Kosovës ka miratuar edhe tri pika, të cilat u shtuan si pika të rendit të ditës në fillim të seancës plenare.

Është miratuar projektligji për ratifikimin e Protokollit Shtesë 5 të marrëveshjes për aderimin dhe amendamentin e Marrëveshjes së Tregtisë së Lirë të Evropës Qendrore.

Me 80 vota për është votuar Projektligji nr. 10/L-038 për ratifikimin e Protokollit Shtesë 6 për tregtinë në shërbime, për Marrëveshjen mbi ndryshimin dhe pranimin e Marrëveshjes së Tregtisë së Lirë të Evropës Qendrore.

Me 91 vota për është votuar ratifikimi i Protokollit Shtesë për zgjidhjen e mosmarrëveshjeve, i marrëveshjes për amendamentin dhe aderimin në Marrëveshjen e Tregtisë së Lirë në Evropën Qendrore.

Kuvendi do të mbajë sot në orën 17:00 një seancë të jashtëzakonshme për çështjen e Presidentit.

Sipas ftesës që kryeparlamentarja Albulena Haxhiu ua ka bërë deputetëve, thuhet se në rend dite do të jetë vetëm një pikë: “Diskutim lidhur me zgjedhjen e Presidentit të Republikës së Kosovës”.

Kryeministri Albin Kurti sot në dy raste nuk u është përgjigjur pyetjeve të gazetarëve në lidhje me çështjen e Presidentit.

LVV-ja ka kërkuar nga PDK-ja dhe LDK-ja tre emra për President, si propozim “konkret dhe përbashkues” për zgjidhjen e kësaj çështjeje që po rrezikon ta çojë vendin sërish në zgjedhje.

Kryetari i LDK-së, Lumir Abdixhiku ia paraqiti në fundjavë Albin Kurtit emrin e Vjosa Osmanit dhe i kërkoi kryeministrit garanci se 66 deputetë të mazhorancës do ta votonin atë.

Kurti nuk është deklaruar ende për këtë, ndërsa jemi në fund të afatit për zgjedhjen e Presidentit.

Nëse nuk zgjidhet Presidenti i ri, Kosova do të mbajë zgjedhje të reja brenda 45 ditësh.

Sot në Kampin e Njësive Speciale në Vrellë, janë certifikuar 44 zyrtarë policorë të Njësisë për Reagim të Shpejtë (NJRSH), pas përfundimit me sukses të trajnimit dyjavor në fushën e “Ballafaqimit me turma”.

Trajnimi është realizuar nga instruktorët e Drejtorisë së Njësisë Speciale Operative (DNJSO), përmes Divizionit të Trajnimeve në kuadër të Departamentit të Burimeve Njerëzore, me fokus në ngritjen e kapaciteteve profesionale për menaxhimin e situatave me turma dhe tubime publike.
Ky aktivitet përbën pjesë të një cikli të planifikuar trajnimesh, i cili do të vazhdojë me përfshirjen e NJRSH-së në të gjitha tetë (8)rajonet policore, në përputhje me konceptin nacional për menaxhimin e trazirave qytetare.