Blog

Deputetja e Lëvizjes Vetëvendosje, Arbëreshë Kryeziu-Hyseni, para seancës së Kuvendit ka deklaruar se kandidatja për presidente, Feride Rushiti, tashmë i ka votat e nevojshme për t’u zgjedhur në këtë post, raporton Ekonomia Online.

Ajo u ka bërë thirrje deputetëve të partive opozitare që të jenë të pranishëm në seancë dhe të marrin pjesë në raundin e dytë të votimit.

“E vërtetë është që zonja Feride Rushiti tashmë i ka votat për t’u zgjedhur presidente, prandaj unë po e shfrytëzoj rastin t’u bëj thirrje të gjithë deputetëve të partive opozitare që ndryshe prej mbrëmë, sot të jenë prezent në sallë dhe t’i bashkohen raundit të dytë të votimit, sepse besoj që nëse duam zgjidhje, e kemi rastin të votojmë zonjën Feride. Nëse jo, atëherë besoj po shihet qartazi kush është bllokuesi dhe kush po do ta çojë vendin në zgjedhje të reja”, tha Kryeziu-Hyseni.

Sipas saj, pjesëmarrja në votim është kyçe për të shmangur një krizë të re politike dhe për të siguruar funksionalitetin institucional të vendit.

Një 21-vjeçar nga Austria ka pranuar se pati planifikuar sulm xhihadist në një koncert të Taylor Swiftit në Vjenë në gusht të 2024-tës.

Burri, i njohur vetëm si Beran A., po ashtu ka pranuar se ka qenë pjesë e një organizate terroriste, edhe pse ka mohuar të gjitha akuzat tjera, përfshirë ato për planin për sulm në Mekë të Arabisë Saudite.

Prokuroria e Shtetit ka thënë se në shtëpinë e burrit ka gjetur një bombë pothuajse të kompletuar.

Beran A. ishte arrestuar pas informacioneve nga CIA pak para koncertit të planifikuar të Swiftit në Vjenë.

Si rezultat, tri koncerte krejtësisht të shitura në stadiumin “Ernst Happl” u anuluan. Më shumë se 195 mijë njerëz pritej të merrnin pjesë.

Beran akuzohet për terrorizëm dhe shkelje të tjera.

Ai akuzohet bashkë me një 21-vjeçar të njohur si Arda K., që bashkë akuzohen se kanë qenë pjesë e Shtetit Islamik. Ata akuzohen se kanë planifikuar edhe sulme në Mekë, Stamboll e Dubai.

“Klienti im ka shkaktuar goxha frikë dhe panik te njerëzit dhe do të përgjigjet për këtë, nuk ka asnjë dilemë”, ka thënë avokatja e tij.

Sipas akuzës, Beran kishte planifikuar sulmin të paktën deri më 21 korrik 2024. Ai u arrestua më 7 gusht, një ditë para koncertit të planifikuar.

Prokurorët e akuzojmë se ka shpërndarë edhe propagandë online si dhe ka përgatitur eksplozivë. Sipas akuzës, ai ka marrë instruksione nga interneti se si të përgatitet një bombë e stilit të IS-it.

Të dy mund të përballen me deri 20 vjet burgim nëse shpallen fajtorë.

Ylli botëror i muzikës, Taylor Swift, pati mësuar për planin teksa ishte në aeroplan për në Austri. Ajo ishte shprehur se falë CIA-s është shmangur një masakër.

Instituti Kombëtar i Shëndetësisë Publike të Kosovës (IKSHPK) ka ngritur shqetësime serioze lidhur me nivelin e ndotjes së ajrit në vend, duke e cilësuar atë si një ndër sfidat më të mëdha mjedisore dhe shëndetësore aktualisht.

Sipas këtij institucioni, termoelektranat e Kosovës A dhe B, që përdorin thëngjillin si burim energjie, vazhdojnë të jenë ndër ndotësit kryesorë të ajrit. Ato lëshojnë substanca të dëmshme si ozoni (O3), oksidet e azotit (NOx), dioksidi i squfurit (SO2) dhe grimca të imëta PM10 dhe PM2.5, të cilat kanë ndikim të drejtpërdrejtë në shëndetin e qytetarëve.

“Bazuar në të dhënat e institucioneve relevante mjedisore, sektori i energjetikës kontribuon me rreth 40% të emisioneve ndotëse në Kosovë. Sipas tyre, ndotja e shtuar ditëve të fundit, veçanërisht nga tymtarët e Obiliqit, ka rritur përqendrimin e grimcave të dëmshme në ajër për periudha të gjata”.

Instituti paralajmëron se mbi 90% e këtyre grimcave, pasi absorbohen nga sistemi respirator, ndikojnë në rritjen e infeksioneve, veçanërisht tek grupet më të ndjeshme si fëmijët, të moshuarit, gratë shtatzëna dhe personat me sëmundje kronike.

Në reagim, IKSHPK rendit edhe pasojat e mundshme nga ndotja e ajrit, duke përfshirë rritjen e vdekshmërisë, përhapjen e sëmundjeve respiratore si bronkiti dhe përkeqësimin e astmës, dëmtimet në sistemin kardiovaskular, si dhe ndikimet potencialisht kancerogjene.

Përballë kësaj situate, Instituti ka propozuar një sërë masash urgjente, përfshirë monitorimin në kohë reale të ndotjes dhe publikimin transparent të të dhënave, kontrollin e rregullt të filtrave të termocentraleve, si dhe inspektime të shpeshta dhe gjoba për shkelësit.

Po ashtu, kërkohet instalimi i teknologjive moderne për reduktimin e ndotjes, përfshirë sistemet e desulfurizimit dhe reduktimit të oksideve të azotit, si dhe modernizimi i pajisjeve ekzistuese.

Në aspektin e mbrojtjes së shëndetit publik, IKSHPK rekomandon krijimin e një sistemi të integruar informimi në raste emergjente, rritjen e hapësirave të gjelbra, vendosjen e standardeve më të rrepta për emetimet industriale dhe zbatimin rigoroz të ligjeve për mbrojtjen e mjedisit.

Ekspertët e institutit paralajmërojnë se nëse nuk ndërmerren masa urgjente, vendi mund të përballet me pasoja të rënda shëndetësore dhe rritje të ndjeshme të vdekshmërisë, veçanërisht nga sëmundjet kardiovaskulare dhe ato respiratore.

Kjo javë ka filluar nën ndikimin e masave të ngrohta ajrore dhe si e tillë do të vazhdojë edhe të martën, mirëpo me një destabilizim të lehtë të atmosferës, ku parashihet ndonjë rrebesh i izoluar në lokalitete gjatë orëve të pasdites.

Nga dita e mërkurë gradualisht do të shtrihen masat e ftohta ajrore, duke sjellë shtim të vranësirave dhe reshje lokale shiu gjatë orëve të pasdites, veçanërisht orëve të mbrëmjes, kur pritet edhe ulje e theksueshme e temperaturave.

Të enjten do të mbesin plotësisht nën ndikimin e masave të ftohta ajrore me origjinë polare, si pasojë moti do të jetë kryesisht i vranët dhe herë pas here me reshje shiu. Në zonat malore reshje bore.

Të premten parashikohet mot me diell dhe vranësira, ndërsa lokalisht mund të ketë ndonjë reshje të izoluar shiu, e në zonat malore borë. Në orët e mëngjesit, varësisht nga prezenca e kthjellimeve, temperaturat mund të zbresin në vlera negative.

Vlen të theksohet se, të enjten dhe të premten nuk përjashtohet mundësia që fjolla bore të paraqiten edhe në zonat më të ulëta, veçanërisht edhe në zonën e Llapit.

Të shtunën parashikohet mot me diell dhe vranësira, ndërsa lokalisht priten reshje të pakta lokale shiu. Po ashtu, në orët e mëngjesit priten vlera negative.

Edhe dita e diel do të vijojë me diell dhe vranësira, me mundësi për ndonjë reshje të izoluar. Përderisa temperaturat do të fillojnë të shënojnë ngritje në vlerat maksimale.

Era do të fryjë kryesisht nga drejtimi i verilindjes, e cila herë pas here pritet të jetë mjaft e fuqishme, me shpejtësi prej 15-52 km/h.

Temperaturat minimale do të lëvizin prej -2 deri në 9°C, ndërsa ato maksimale prej 6 deri në 26°C./meteokosovo

Komandanti i FSK-së, Bashkim Jashari ka pritur në takim kryetarin e Komitetit Ushtarak të NATO-s, Admiral Giuseppe Cavo Dragone dhe kryetarin i Komitetit Ushtarak të Bashkimit Evropian, Gjeneral Sean Clancy.

Jashari iu uroi mirëseardhje delegacionit të udhëhequr nga Admiral Dragone dhe Gjeneral Clancy, me ç’rast i njoftoi për zhvillimet aktuale brenda forcës, me theks të veçantë mbështetjen e FSK-së në kuadër të operacioneve ndërkombëtare.

Gjithashtu u diskutua edhe për të arriturat e deritashme të FSK-së, ku u theksua nevoja për avancimin e bashkëpunimit në aktivitetet e përbashkëta, në mes të FSK-së dhe organizatave respektove.

“Gjatë takimit u vlerësua lartë zhvillimi dhe kontributi i FSK-së në kuadër të këtyre aktiviteteve, si dhe u adresuan nevojat për bashkëpunim në sferat me interes të përbashkët. Poashtu, u vlerësua kontributi i KFOR dhe NALT në mbështetje të forcës. Në fund të takimit, palët u zotuan për vazhdimin dhe rritjen e bashkëpunimit korrekt dhe profesional në realizimin e përbashkët të aktiviteteve të ndryshme”, thuhet në njoftim.

Ushtria izraelite ka lëshuar një paralajmërim urgjent për banorët në dhjetëra fshatrash që të evakuohen në veri, duke thënë se kjo është për sigurinë e tyre pasi Hezbollahu “shkel” marrëveshjen e armëpushimit.

“Në dritën e shkeljes së marrëveshjes së armëpushimit nga Hezbollahu, IDF është e detyruar të veprojë me forcë kundër saj”, tha sot në X zëdhënësi i Forcave të Mbrojtjes së Izraelit (IDF) për gjuhën arabe.

“Kushdo që është pranë operativëve, objekteve ose pajisjeve ushtarake të Hezbollahut po e vë jetën e tij në rrezik”, tha ai.

Pavarësisht një armëpushimi të shpallur midis Izraelit dhe Libanit, forcat izraelite dhe Hezbollahu vazhdojnë të sulmojnë njëri-tjetrin, me secilën palë që akuzon tjetrën për shkeljen e armëpushimit.

E diela ishte dita më vdekjeprurëse për vdekjet e civilëve në Liban që nga fillimi i armëpushimit, sipas Ministrisë së Shëndetësisë libaneze, e cila raportoi 14 civilë të vrarë në të gjithë vendin.

Me rastin e Ditës Botërore për Siguri dhe Shëndet në Punë, institucionet e Kosovës kanë theksuar nevojën për forcimin e inspektoratit dhe përmirësimin e kushteve të punës, duke paralajmëruar edhe ndryshime ligjore dhe masa konkrete për parandalimin e aksidenteve në vendin e punës, raporton Ekonomia Online.

Ministri për Punë, Familje dhe Vlerat e Luftës Çlirimtare, Andin Hoti, tha se fokusi i tij ka qenë forcimi i inspektoratit dhe ndryshimi i qasjes ndaj bizneseve.

“Dy gjëra i kam pasur me rëndësi kur e kam marrë nën mbikëqyrje këtë ministri në raport me inspektoratin. E para, që inspektorati të ketë dinjitet, të forcohet, të ndjejë mbështetjen e shtetit vetë. Dhe e dyta, që inspektorati të mos shihet si çekiç ndaj bizneseve në Kosovë, por të shihet si partner ndaj bizneseve në Kosovë, por që natyrisht, pashmangshëm, qytetarin ta ketë prioritet mbi të gjitha”, tha ai.

Ai shtoi se Qeveria është duke ndërmarrë hapa konkretë për përmirësimin e sistemit të sigurisë dhe shëndetit në punë.

“Qeveria e Republikës së Kosovës është duke u angazhuar në përforcimin e sistemit kombëtar për siguri dhe shëndet në punë. Këtë vit ne kemi planifikuar ndryshim-plotësimin e Ligjit për Sigurinë dhe Shëndetin në Punë, ndryshimin e rregullores për certifikimin dhe licencimin e personave fizikë dhe juridikë, rritjen, themelimin e Këshillit Nacional për Siguri dhe Shëndet në Punë si mekanizëm trepalësh me ekspertë, fillimin e mbikëqyrjes dhe kontrollit të personave fizikë dhe juridikë që operojnë në këtë fushë, modernizimin e procesit të promovimit profesional për ekspertë përmes digjitalizimit, ndërtimin e ekipeve të bashkëpunimit mes profesionistëve, shoqatave dhe institucioneve, si dhe nisjen shumë shpejt të një fushate gjithëpërfshirëse vetëdisuese, domethënë të sensibilizimit, me qëllim të parandalimit të aksidenteve në vendin e punës”, tha ai.

Zëvendës shefi i Misionit dhe shef i Bashkëpunimit për Zhvillim në Ambasadën e Suedisë, Henrik Riby, theksoi rëndësinë e kushteve të sigurta të punës dhe rolit të inspektoratit.

“Shumë punëdhënës sot e kanë kuptuar se mund të tërheqin dhe mbajnë stafin duke ofruar jo vetëm kushte të sigurta, por edhe përfitime shtesë si mundësi trajnimi, aktivitete sociale, udhëtime, çfarëdo qoftë. Dhe kjo po rritet shumë. Ne e shohim këtë si një trend shumë pozitiv, sepse nuk mund ta trajtosh keq punëtorin dhe të presësh që ai të prodhojë diçka. Por megjithatë ka sektorë ku kushtet e punës nuk janë vërtet në standardet e duhura dhe në vetvete janë më të rrezikshme, si sektori i ndërtimit apo minierat. Dhe kjo është një nga arsyet pse kemi edhe inspektoratin e punës. Pas çdo vendi të sigurt pune, çdo punëtori të respektuar, çdo kontrate të drejtë, qëndron një rojtar i padukshëm, dhe ai është inspektorati i punës. Por edhe viti i kaluar, 2025, na kujtoi pse ky institucion është kaq i rëndësishëm. Patëm qindra aksidente, patëm dhjetëra jetë të humbura. Siguria nuk është e garantuar kudo. Ajo duhet të përmirësohet dhe duhet të zbatohet”, tha ai.

Ai shtoi se inspektorati i punës është linjë mbrojtëse mes neglizhencës dhe jetës njerëzore, duke vlerësuar edhe përparimin në digjitalizimin e inspektimeve.

“Dhe këtu qëndron inspektori i punës, jo si një trup burokratik, por si linja e mbrojtjes midis neglizhencës dhe jetës njerëzore. Në të njëjtën kohë, kemi parë përparim të jashtëzakonshëm brenda inspektoratit. Digjitalizimi i inspektimeve i ka bërë ato shumë më të shpejta, më transparente dhe më efektive në mbrojtjen e të drejtave të punëtorëve. Kjo pasqyron një përkushtim ndaj drejtësisë dhe llogaridhënies. Dhe mendoj se inspektorati i punës është një nga inspektoratet në Kosovë që është shembull për t’u ndjekur nga çdo institucion tjetër që merret me këto çështje”, tha ai.

Koordinatori i programit të ILO-s për Kosovë, Blerim Murtezi, theksoi se përmirësimi i kushteve të punës ndikon drejtpërdrejt në rritjen e produktivitetit.

“Nga puna jonë në këtë fushë, në nivel global dhe nga praktikat e ndryshme ndërkombëtare, kemi mësuar një gjë shumë të thjeshtë. Kur përmirësohen kushtet e punës, përmirësohet vetë puna. Nuk ka kompromis mes sigurisë dhe produktivitetit. Ato të dyja bashkëveprojnë, domethënë nuk mundet njëra pa tjetrën. Ajo që kemi filluar me Inspektoratin e Punës është baza dhe është vetëm fillimi. Pra, nga digjitalizimi, tek trajnimin, tek mbështetja konkrete në terren. Dhe nga ILO duhet të jemi të sinqertë: nuk është diçka që mund ta bëjë një institucion i vetëm. Përmirësimi i kushteve të punës natyrisht që i takon Inspektoratit të Punës të mbikëqyrë bazën ligjore, por nuk është një institucion i vetëm që mund të garantojë sigurinë dhe shëndetin në punë. Për këtë, sepse ne mund të kemi ligje të mira, mund të kemi rregullore të mira dhe strategji të mira, por në fund të ditës nuk do e masim suksesin me ligje apo rregullore, do e masim me atë se sa po respektohet”, tha ai.

Ushtruesi i detyrës së drejtorit të Inspektoratit Qendror të Punës, Kastriot Jashari, tha se ky institucion është i angazhuar edhe në luftimin e ekonomisë informale dhe rritjen e transparencës.

“Ne në kuadër të punës sonë, përveç mandatit ligjor të cilin po e ushtrojmë, njëkohësisht po e luftojmë në të njëjtën kohë potencialisht edhe ekonominë informale brenda për brenda subjekteve të cilët nuk respektojnë shtyllat kryesore të funksionimit ligjor. Në fakt, meqenëse jemi sot këtu në këtë donacion të rëndësishëm të ILO-s me Qeverinë Suedeze, s’mund pa e përmendur raportin që është hartuar në muajt paraprak, i cili është bërë raport model nga ILO-ja dhe që janë nxjerrë specifika reale aty të kohës ku është i publikuar në faqen zyrtare të Inspektoratit Qendror të Punës. Duke falënderuar partneritetin që kemi ne me ILO-n dhe donacionet e Qeverisë Suedeze, ne sot posedojmë si Inspektorat Qendror i Punës pajisje elektronike, tableta si dhe pajisje tjera që ndikojnë drejtpërdrejt në rritjen e efikasitetit, llogaridhënies dhe transparencës së inspektorëve. Kjo ndikon drejtpërdrejt në zhdukjen ose eliminimin, reduktimin për çdo dyshim potencial të punës së inspektorit që po aq sa është e ndjeshme, duhet të jetë edhe dinjitoze përballë çdo sfide të cilën e kanë”, tha ai.

Eugen Cakolli nga KDI ka deklaruar se seanca e mbrëmshme për presidentit, sot nuk duhet të vijohet me rundin e dytë.

Ndër të tjera, ai e quajti shkelje të pastër kushtetuese seancën e jashtëzakonshme të së hënës për presidentin.

“Secili prej tre aktgjykimeve të Gjykatës Kushtetuese lidhur me çështjen e zgjedhjes së presidentit ka përcaktuar në mënyrë të qartë se kuorumi në këtë rast nënkupton edhe praninë edhe pjesëmarrjen në votim të të paktën 80 deputetëve. Madje edhe kjo çështja e interpretimit të togëfjalëshit ‘minus ata deputetë’, që kanë marr leje nga kryetarja, është duke u keqinterpretuar qëllimshëm, sepse mospjesëmarrja eventuale e deputetëve nuk ka asnjë ndikim në uljen e kuorumit apo mundësisë për vazhdimin e seancës”, tha Cakolli.

“Ajo çfarë ngjau dje ishte padyshim shkelje e pastër kushtetuese, dhe për më keq nuk u administrua në procedurë kyçe, ajo e pjesëmarrjes”, tha ai në Klan Kosova.