Blog

Ministër në detyrë i Punëve të Jashtme dhe Diasporës, Glauk Konjufca, ka zhvilluar një vizitë zyrtare në Irlandë, ku ka takuar përfaqësues të lartë shtetërorë dhe parlamentarë, me fokus forcimin e marrëdhënieve bilaterale dhe integrimin evropian të Kosovës.

Gjatë vizitës, ai u takua me Ministren për Punë të Jashtme dhe Tregti, Helen McEntee, me të cilën diskutoi për zgjerimin e bashkëpunimit ndërmjet dy vendeve.

“Në vizitën time të parë bilaterale në Irlandë pata kënaqësinë të takohem me Ministren për Punë të Jashtme dhe Tregti znj. Helen McEntee, me të cilën diskutuam për marrëdhëniet ndërmjet Republikës së Kosovës dhe Irlandës, miqësinë mes popujve tanë dhe shumë vlera të përbashkëta që ndajmë,” ka deklaruar Konjufca.

Ai theksoi se ekziston një vullnet i përbashkët për të thelluar raportet mes dy shteteve. “Ishte vlerësim i përbashkët që raportet tona duhet të zgjerohen dhe intensifikohen në shumë drejtime dhe fusha”, u shpreh ai.

Një ndër temat kryesore të takimit ishte integrimi evropian i Kosovës. Konjufca bëri të ditur se ka kërkuar mbështetjen e Irlandës për aplikimin e Kosovës në Bashkimi Evropian.

“Duke qenë se Irlanda do të marrë drejtimin e presidencës së Bashkimit Evropian, kërkuam mbështetjen e tyre në pranimin e aplikimit të Kosovës për anëtarësim në BE”, tha ai.

Sipas tij, palët u pajtuan se Kosova duhet të jetë pjesë e proceseve integruese rajonale. “U dakorduam që Kosova nuk mund të veçohet nga procesi dhe përcaktimi i anëtarësimit të vendeve të Ballkanit Perëndimor në Bashkimin Evropian,” shtoi Konjufca.

Gjatë qëndrimit në Irlandë, ai zhvilloi takime edhe me anëtarë të Komitetit të Përbashkët për Çështjet e BE-së të parlamentit irlandez, si dhe me senatorin Pat Casey.

“Këto takime riafirmuan mbështetjen parlamentare të Irlandës për rrugën evropiane të Kosovës”, përfundoi Konjufca.

Gjykata Speciale ka shtyrë afatin për shpalljen e aktgjykimit në rastin e ish-krerëve të UÇK-së deri më 20 korrik. Sipas njoftimit të saj, arsyeja e këtij vendimi është “kompleksiteti i rastit”. Megjithatë, kjo datë mund të mos jetë përfundimtare, pasi është paralajmëruar edhe mundësia e një shtyrjeje tjetër, nëse “bëhet absolutisht e nevojshme”.

Lidhur me këtë vendim, për Kanal10 ka folur edhe Shqipe Selimi, bashkëshortja e Rexhep Selimit.

Ajo vlerëson se shtyrja e vendimit përfundimtar mund të ketë lidhje edhe me situatën politike në Kosovë.

Sipas saj, ekziston mundësia që vendimi për katërshen e UÇK-së të shtyhet deri në vjeshtën e këtij viti.

“Gjykata Speciale nuk ka qenë aspak bashkëpunuese me trupat mbrojtëse të katërshes së UÇK-së. Vazhdimisht kanë bërë cenime të drejtave të njeriut qoftë me vizita, qoftë me telefonata e qoftë me dosje. Edhe ky vendim që të shtyhet marrja e vendimit për katërshen, unë mendojë që Gjykatës i nevojitet më shumë kohë se sa është vendosur që të shqyrtojë të gjitha ato dosje që i ka dorëzu prokuroria, dosje këto të sponzorizuara nga Serbia. Unë mendoj se edhe situata politike në Kosovë mund të ndikojë në marrjen e vendimit në Gjykatën Speciale,, përshkak se Kosova është në një proces zgjedhor dhe mund të shtyhet edhe marrja e vendimit në Hagë, gjithashtu vlen të theksohet se vendimi mund të shtyhet jo vetëm në korrik por deri në vjeshtë”, tha ajo.

Anëtari i kryesisë së LDK-së Armend Zemaj ka bërë të ditur se të shtunën do të definohet çështja e bashkëpunimit me Vjosa Osmanin për zgjedhjet e 7 dhjetorit.

Sipas tij kjo çështje tashmë është e kryer. I pyetur nëse të shtunën ndodh “ecja e përbashkët” me Osmanin siç iu referua ai, Zemaj tha për RTV21 se shpreson që po.

” Ne shpresojmë që edhe pse duket që tashmë është punë e kryer por këshilli ka edhe autorizime tjera…si formalitet pas të shtunës mund të flasim për një listë ku Vjosa Osmani i bashkëngjitet LDK-së “, tha ai

Xhavit Haliti nga Partia Demokratike e Kosovës tha se ky subjekt politik në zgjedhjet e 7 qershorit po garojnë për vendin e parë.

“Luftojmë për vend të parë, as për të dytin as për të tretin” , tha ai.

Derisa u pyet edhe për lëvizjet e fundit në skenën politike, konkretisht bashkimi i Vjosa Osmanit me LDK-në a paraqesin rrezik për PDK-në, ai tha se nuk e kanë betejën me Osmanin.

“PDK betejën e ka me VV-në, nuk e kemi me Vjosa Osmanin. Vjosa Osmani ka qenë një deputete është bërë presidente në kushte dhe rrethana të veçanta dhe tani ka kalu aty ku ka qenë në LDK, varet shumë se sa i japin fushë ata si parti dhe në çfarë pozicionin do ta vendosin ka të dhëna se do ta udhëheq fushatën e LDK-së do të ketë betejë me Kurtin”, u shpreh Haliti për RTV21.

Në seancën fillestare të mërkurën në Gjykatën Themelore në Prishtinë në gjykimin për rastin e vrasjes në Aktash, të akuzuarit Korab Gashi, Valdrin Ademi, Erd Marevci dhe Vesel Bunjaku u deklaruan të pafajshëm për “Vrasje në tentativë” dhe “Armëmbajtje pa leje”, Bunjaku edhe për “Manipulim me prova”. Kurse Robert Llumnica, Salih Sekiraqa dhe Fatos Abazi u deklaruan të pafajshëm për “Vrasje të rëndë”, ndërkaq e pranuan fajësinë për “Armëmbajtje pa leje”.

Në këtë rast, Korab Gashi, Valdrin Ademi, Robert Llumnica, Salih Sekiraqa, Fatos Abazi, Erd Marevci, Endrit Llapashtica, Dardan Marevci dhe Vesel Bunjaku, akuzohen lidhur me rastin e vrasjes së Premtim Gashit, më 1 shtator 2024 në lagjen Aktash në Prishtinë, raporton “Betimi për Drejtësi“.

Deklarimin rreth fajësisë, të akuzuarit e bënë pasi aktakuza u konsiderua e lexuar. Më pas, prokurori i rastit, Bashkim Zeqaj konsideroi së është bërë me vullnet të lirë dhe në përputhje me dispozitat ligjore, si dhe propozoi që Gjykata ta aprovojë këtë pranim të fajësië.

Avokati Arlind Jupolli, mbrojtësi i të akuzuarit Robert Llumnica, tha se e mbështet pranimin e fajësisë së të mbrojturit të tij dhe propozoi që Gjykata ta aprovojë. Njëjtë u deklaruan edhe mbrojtësit e të akuzuarit Salih Sekiraqa dhe Fatos Abazi, avokatët Naser Sopjani dhe Mentor Neziri.

Po ashtu, i akuzuari Salih Sekiraqa, tha se nuk e kupton aktakuzën e Prokurorisë, pasi që ai dhe djali i tij janë sulumuar vazhdimisht, por që në aktakuzë djali i tij i mitur nuk është i përfshirë. Gjithashtu, ai tha se në aktakuzë thuhet se është sulumuar nga persona të paidentifikuar, duke theksuar se shumica nga ta janë prezent në sallë.

Gjykatësja e rastit, Fatime Dërmaku, njoftoi të akuzuarit dhe mbrojtësit e tyre se në afat prej 30 ditësh kanë të drejtë të parashtrojnë kërkesë për hudhje të aktakuzës dhe kundërshtim të provave.

Paraprakisht, në këtë seancë u bë veçimi i procedurës për të akuzuarit Dardan Marevci dhe Endrit Llapashtica pasi që të njëjtit gjenden në arrati, mirëpo Gjykata vlerësoi se nuk janë plotësuar kushtet që për të njëjtit të zhvillohet gjykimi në mungesë.

Ndryshe, seanca e 20 prillit 2026 kishte dështuar pasi nuk kishte përfunduar ekspertiza psikiatrike për të akuzuarin Valdrin Ademi.

Prokuroria Themelore në Prishtinë më 12 shkurt 2026 kishte ngritur aktakuzë ndaj nëntë personave: Korab Gashi, Valdrin Ademi, Robert Llumnica, Salih Sekiraqa, Fatos Abazi, Erd Marevci, Endrit Llapashtica, Dardan Marevci dhe Vesel Bunjaku, lidhur me rastin e vrasjes së Premtim Gashit, më 1 shtator 2024 në lagjen Aktash në Prishtinë.

Sipas aktakuzës, rasti ndërlidhet me një përplasje të armatosur mes dy grupeve në lokalin “From”, ku si pasojë mbeti i vrarë Premtim Gashi, dhe disa persona të tjerë u plagosën. Të akuzuarit ngarkohen për disa vepra penale, përfshirë “Vrasje të rëndë”, “Vrasje të rëndë në tentativë”, “Manipulim me prova”, si dhe “Mbajtje në pronësi, kontroll ose posedim të paautorizuar të armëve”.

Motivi i sulmit, sipas aktakuzës, lidhet me konfliktin e mëhershëm të datës 4 mars 2024, të ndodhur mes Shkumbin Sekiraqës (djali i Salih Sekiraqës) dhe Pajtim Gashit (vëllai i tani të ndjerit Premtim), i cili e kishte përshkallëzuar konfliktin mes dy grupeve.

Familja Brahimaj ia shtriu dorën e pajtimit familjes Sadrija, pas ngjarjes tragjike ku i riu Rexhë Brahimaj, u ther për vdekje nga i dyshuari Qazim Sadrija, i cili u vetëdorëzua dje në polici.

Lajmin për këtë gjest madhor e dha ish-deputeti i AAK-së Daut Haradinaj.

“Pas ngjarjes tragjike që ndodhi në Gjakovë, sot familja Brahimaj nderoi veten dhe kombin tonë duke i shtrirë dorën e pajtimit familjes Sadriu nga Stublla e Gjakovës. Bashkë me bacën Shaqë u ndjemë tepër të nderuar nga nga familje heroike e Naser Brahimajt. Mehmeti dhe Skenda, të cilët, edhe pse humbën mashkullin e familjes, treguan vlera shqiptare dhe dëshmuan se nuk ka plumb për vëllezërit shqiptarë. Qoftë kjo e fundit që na ndodh. Familjes emblemë Brahimaj, ngushëllime!”, ka shkruar Haradinaj në Facebook duke e shoqëruar edhe me video momentin e pajtimit.

30 vjeçari Rexhë Brahimaj, do të varroset sot në fshatin Jabllanicë, pasi u ther për vdekje në orët e para të së martës në Gjakovë.

Sipas njoftimit të familjes, ceremonia mortore do të mbahet me fillim nga ora 17:00.

Ish-deputeti i Partisë Demokratike të Kosovës, Ferat Shala, ka ngritur shqetësime mbi prodhimin e KEK-ut gjatë ditës së sotme.

Duke paraqitur të dhënat, Shala thotë se vendi po mbulon rreth 80% të konsumit, me import.

“Në praktikë, kjo përbën një problem serioz, pavarësisht arsyetimeve nga KEK-ja në emër të riparimeve dhe një të ardhmeje më të mirë. Realiteti sot është prodhim minimal vendor, varësi ekstreme nga importi dhe ekspozim i plotë ndaj çmimeve të tregut”, shkruan Shala.

Shala vlerëson se o nuk është zgjidhje, por transferim i barrës te konsumatori, i shoqëruar madje me kosto shtesë si interesi i huasë ndërmjet KEK-ut dhe KESCO-s.

Sipas tij, këtë keqmenaxhim po e paguan konsumatori.

Ky është postimi i plotë i tij:

Nga të dhënat zyrtare të ENTSO-E shihet se sot, në orën 09:00, prodhimi nga KEK ishte vetëm rreth 121 MWh, ndërsa kërkesa për energji në të njëjtën orë ishte rreth 627 MWh.

Në mungesë të kapaciteteve të tjera prodhuese, kjo nënkupton se Kosova po mbulon rreth 80% të konsumit me import.

Ndërkohë, kapaciteti potencial i KEK është rreth 850 MWh, që do të thotë se sot po operon me vetëm rreth 14% të kapacitetit të tij.

Në praktikë, kjo përbën një problem serioz, pavarësisht arsyetimeve nga KEK në emër të riparimeve dhe një të ardhmeje më të mirë. Realiteti sot është prodhim minimal vendor, varësi ekstreme nga importi dhe ekspozim i plotë ndaj çmimeve të tregut.

Sa i përket importit, nuk jemi naivë, të gjithë e dimë kush janë akterët kryesorë në këtë treg.

Nga ana tjetër, ZRRE, për të shmangur kostot e larta të shkaktuara nga importi (sipas vetë ZRRE-së), po i zhvendos këto kosto për vitin 2027. Pra, nuk i eliminon, por i shtyn për vitin e ardhshëm, duke e futur konsumatorin në një barrë financiare që mund të bëhet e papërballueshme.

Kjo është qasja e këtij pushteti ndaj së ardhmes.

Kjo nuk është zgjidhje, por transferim i barrës te konsumatori, i shoqëruar madje me kosto shtesë si interesi i huasë ndërmjet KEK-ut dhe KESCO-s.

Nëse këto zhvendosje të kostove bëhen pa bazë të qartë ligjore, atëherë kjo nuk është më vetëm çështje politike apo teknike, por një çështje që duhet trajtuar institucionalisht, nëse jo nga ZRRE (si institucion i kapur nga qeveria), atëherë gjithsesi nga Prokuroria.

Në fund, konsumatori po paguan për keqmenaxhim, për vendime të gabuara, për mungesë transparence dhe për përfitimet e grupeve të interesit në tregtimin e energjisë.